Ka Nupepa Kuokoa, Volume XXXV, Number 10, 6 Malaki 1896 — HALA! HALA LOA! Keoni Toma Walakahauki. [ARTICLE+ILLUSTRATION]

HALA! HALA LOA!

Keoni Toma Walakahauki.

Ma ka hora 4:30 o ka auina la Poakahi nei, i haalele mai ai o John J. Waterhouse i keia ola ana, ma kona wahi noho ma Alanui Wale, mauka ae nei o Maemae. No kekahi mau mahine he nui i kaahope ae nei i loohia ai oia i kekahi nawaliwali, a me ia nawaliwali no oia a hala aku ia. Ma ka wa mai kolera aku nei, ua haawi oia i kana mau kokua no ke kinai a me ke kaohi ana i ka laulaha ana ae o ia mai

weliweli, a nui launa ole kana mau hooikaika ana, oiai he hoa oia no ka Papa Ola. Me he mea la, o kekahi kumu nui paha keia nana i hoonawaliwali iaia. He mau hebedoma i hala ae nei, ua loohia oia i ka nawaliwali e waiho ai iluna o kahi moe, a e aumeume ana i mawaena o ka maikai ae a me ke kokomo ana ino i ka nawaliwali koikoi; hui pu me kona loaa ana i kekahi anu inoino a ikaika hoi, a loohia kona puuwai i

ka rumatika, a na ia mea i hooawiwi loa i kona make ana. Ma ka auina la Poakahi nei, mamua o ka lele loa ana o kona hanu, ua kii ia aku kana wahine. I kona hoea ana aku ma kahi ana e moe ana, pane mai la oia iaia: "E! Maanei oe e noho mai ai i ike aku au ia oe. Ke nawaliwali mai nei au." Aole i liuliu, pau ae la ka a ana o ke kukui o ke ola iloko'na. Ua hala - ua hala aku kekahi makamaka ilikeokeo oiaio o na kanaka Hawaii. Ua haalele iho oia he wahine me na keiki ewalu. O kana keiki hiapo, oia o Fred, oia ka mea hookaa dala o loko o kona halekuai; o Ereneke, kekahi keiki ana, he kauka kana oihana e ao nei ma Nu Ioka; o John, kekahi keiki, aia ma ke Kulanui o Princeton, a e puka ana oia ma ka malama ae nei o Iune; a o George ka muli loa o na keikikane aia no maloko o ia kula hookahi. O na kaikamahine eha, eia no i ke alo o ka makuahine.

Ua hanauia oia ma Tasmania ma ka la 7 o Iulai, 1841, a i ka 9 o kona

mau makahiki, hoea mai oia me kona mau makua i Hawaii nei. Ua hoonaauaoia ma ke Kulanui o Punahou. He oihana kalepa kana i lawelawe ai me kona makuakane. Ma ka 1871, ua hala oia no Enelani no ke kiai ana i ke kulana o na makeke kalepa waiwai malaila, mamuli o ke kauoha a kona makuakane, hala he 18 malama o kona noho ana malaila, hoi mai oia a hui kalepa me kona kaikaina me Hanale Walakahauki.

He Kahukula Sabati oia no ke Kula Sabati o ka Ekalesia o Kaukeano, no na makahiki he nui, he lala no ke komite papa himeni no na makahiki he 20, a he kulana diakona no loko o ia Ekalesia. He kanaka hoopono a he puuwai kona i hoopihaia i ka oluolu a me ke aloha oiaio i na kanaka Hawaii. Ma ka hora 4 auina la Poalua nei i maneleia mai ai kona kino wailua no ka ilina ma Maemae.

KEONI TOMA WALAKAHAUKI.