Ka Nupepa Kuokoa, Volume XXXIV, Number 45, 9 November 1895 — NA LETA [ARTICLE]

NA LETA

Aole o makou makemake e lawe i ke koikoi o na hala no na manao i hoopuka ia malalo o keia poo. Na Anoai o Kohala E ke KUOKOA, Aloha oe: - E oluolu mai ia'u i keia mau wahi anoai o ka makani Apaapaa o Kohala. KA LA HAUOLI. Ma ka la 26 o Okatoba i hala iho nei, ua wehe ae o Mrs. Kunane a me kana kane i ahaaina no ka laua makahiapo Cas. Kakae ma ko laua home noho. Ua hoomakaukau ia na mea ai o kela a me keia ano, e like me ka puaa opae luau a me na mea like o ke kuahiwi a me na i-a momona o ke kai. Ua akoakoa ae he heluna nui o na kanaka a me na wahine. Ua hoopiha a lawa, e like paha me keia hooheno ana. Ai Lihaliha i ke kini o Puna, Pakuikui i ka momona a ke kiu. Pela pu hoi ia wehi o ke kuahiwi ua unu ia mai a kokoke i ke alo, aohe mea a ka maka e hoohalahala ai, ua like no mai Kaena a Waialua, oia hou na Opae ono o Malama, Na luau palupalu o ka Hiwa. O ka uala a me ka poi na ai kamaaina e loaa ai keia hooheno: Piikoi aku oe i ke keokeo, Kamano io ula o Keamolewa He hewa iho oe i ka Hawaii, I ka poi uouo kaohi puu. Ua nani a maemae na hana o keia la a maluhia pu, aohe haunaele, a ua haawi pu ia na lau oliva o ke aloha mai na opio mai a me na makua no ka hoomanao i ka opio nona ka la hauoli. NA HANA AKAMAI. Mamuli o ka loea a akamai o Mrs. Alice Kunane, ua hanaia ka ohe a lilo i umeke poi i hoohiwahiwaia me na pua ma na aoao. Aole hoi oia wale no, o na pono lumi kekahi oia hoi na pika pua, puahi, eke pakaukau a me na moena liilii hehi wawae puka, a o keia mau mea a pau, ua hanaia mailoko mai o ka ohe a me ka lauhala i hoolulu ia a ula, me na po-ke pua kaula malino i i hanaia me ka noeau nui. He nani a panio lua ole na mea i hanaia ai. KA HUI KULA BAIBALA. Ua wehe ae nei na opio o ka hui o Halaula, Kohala Sugar Co. i hui kula Baibala, a ua kohoia o Capt. C. Uluihi i Peresidena, a o J. Waihoolana i kakauolelo, S. L. Hukiku ka hope kakauolelo, o G. W. Kalohai ke kumu ao Baibala, a e hoomaka ana ma ka la 3 o Novemaba. Ke noi ia aku nei oukou e hoomau i ka hana maikai. O Mrs. Kalei Pilipo a me Mrs. Hana, Sam. Haina na alihikaua. HANA HOU IA. Eia ke hana hou ia nei ka hale wili o ka hui o Kohala Sugar Co. malalo o ka noho poo ana o G. Renton. Me ka lunahooponopono ko'u welina a me na keiki oniu hua metara ko'u anoi. D. W. KAONOHI, Halaula, Kohala, Nov. 1, 1895.