Ka Nupepa Kuokoa, Volume XXXIV, Number 42, 19 October 1895 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

KA NUPEPA KUOKOA

@

Ko Hawaii Paeaina i Huiia

 

o ka Makahiki,…$2 00

@ Mahina,…1 00

Kuike k@ @ula

 

HAWAIIAN GAZETTE CO.

GEO. H. PARIS, Luna Nui.

J. U. KAWAINUI, Luna Hooponopono.

@ Honolulu, Oahu, Lakou a pau.

 

POAONO,…OKATOBA 19, 1895

 

KULA SABATI.

 

HAAWINA-XXXI. NOV. 3.

O Samuela ka Lunakanawai. 1 Samuela 7:5-15.

OLELO aku la o Samuela, E hoouluulu i ka Iseraela a pau ma Mizepa, a e pule aku au ia Iehova no oukou.

            6 A houluukluia'e la lakou mai Mizepa, a kuhikuhi lakou i ka wai, a ninini aku @a imua o Iehova, a hookeai lakou ia la, i aku la, Ua hana hewa makou ia Iehova. Hooponopono aku la o Samuela i na mamo a Iseraela ma Mizepa.

            7 A lohe ae la ko Pilisetia i ka akoakoa ana o na mamo a Iseraela ma Mizepa, pii aku la na haku o ko Pilisetia e ku e i ka Iseraela. A lohe ae la na mamo a Iseraela, makau iho la lakou i ko Pilisetia.

            8 I aku la na mamo a Iseralea ia Samuela, Mai hooki oe i ka hea ana'ku ia Iehova, i ko kakou Akua no makou, i hoopakele mai ai oia ia makou i ka lima o ko Pilisetia.

            9 Lawe aku la o Samuela i e keikihipa omo waiiu, a kaumaha aku la ia mea a pau i mohaikuni ia Iehova no ka Iseraela, a hoolohe mai o Iehova ia ia.

            10 A ia Samuela i kaumaha aku ai i ka mohaikuni, hookokoke mai ko Pilisetia e kaua mai i ka Iseraela: hoohekili mai la @ Iehova me ka hekili nui maluna o ko Pilinetia ia la, a hoopuehu ia lakou; a pe@hiia iho la lakou imua o ka Iseraela.

            11 Hele aku la na kanaka o ka Iseraela mawaho o Mizepa, a hahai aku la i ko P@tia, a luku aku la ia lakou a hiki ma Betekara.

            12 Lawe aku la o Samuela i pohaku, a kukulu iho la mawaena o Mizepa a o @, a kapa aku la i kona inoa, o Ebe@era, i iho la, Ua kokua mai o Iehova @a kakou a hiki ia nei.

            13 A pio iho la ko Pilisetia, aole i hele hou mai lakou maloko o ka mokuna o ka @; a ku mai la na lima o Iehova i ko PIlisetia i na la a pau o Samuela.

            14 A o na kulanakauhale i lilo i ko Pilisetia, u ahoihoiia mai ia no ka Iseraela, mai Ekerona a hiki i Gata; a me ko laila aina a puni na ka Iseraela, lawe ae mailoko mai o ka lima o ko Pilisetia. A ua kuikahi ka Iseraela me ka Amora.

            15 A hooponopono aku la o Samuela i ka Iseraela i na la a pau o kona ola ana.

            PAUKA @LA. @ Samuela 7:12. Ua kakua mai o Iehova ia kakou a hiki ia nei.

            MANAO NUI. O Iehova he pakaua wikani no kona poe manaoio.

            OLELO HOAKAKA. Aole i hooko ia ko Iehova mau wanana e pili ana i ko Eli mau poino no na makahiki iwakalua. Ia wa no ua hoo@heeia ka Iseraela e na koa Pilisetia. Ua lawe pio ia ka pahu berita. Ua pepehiia a make na keiki elua o @. I ka wa a Eli i lohe @ i keia mau lono luuluu, ua hina oia ilalo @ naha kona ai, a make koke oia. No na makahiki iwakalua mahope @, ua hookaumahaia k@ Iseaela a @ui na mainoino, M. K. 1134-1094. Alaila ua ao aku o Samuela ia lakou e hoomaopopo @ i ka lakou hewa nui ma ka haalele ana ia Iehova, a hoolohe lakou i kona mau olelo paipai e imi hou i ko lakou Akua hoopakele. Ua laweia'ku ka halelewa o Iehova mai Silo aku ia Nova, 1 Sam. 21:1; mai ia Noba aku a hiki i Gileboa, 1 Sam. 28:46, mai Gileboa aku a hiki ia Gibeona @ Oihanaalii 16:39. Ua hoihoia mai ka pahu @ berita e na'lii Pelesitia @ waihoia na Kirejaba Jarima, Mailaila aku ua halihali o Davika @ ka pahu berita a hiki i kona wahi @oho, oia @oi ia Ziona, Ua malama pono o Davida i keia mea hoa@o, a laa kona wahi noho, o Ziona, ia Iehova, me he mea la oia no ko Iehova kulanakauhale alii. Aole i lanakila koke o Samuela ma kona mau hoeueu ana i ka hana haipule oiaio. Ua hoomanao ka Iseraela i na pomaikai o ka wa kahiko a pololei ko lakou mau uhane i ka olelo a ke Akua Lokomaikai, "auwe ae ia k@o ka hale a pau o ka Iseraela mamuli o Iehova." Ua hoomakaukau lakou i ko lakou naau, a malama ia Iehova wale no. Ua akoakoa nui lakou ma Mizepa mahope o ko lakou hoolei ana'ku i na kii akua. Ma keia haawina Baibala ua aoikeia ko Samuala lanakila ma kona hoeueu hou ana i ke ano haipule maoli o ka lahui Iudaio. He haawina kupono loa keia no keia lahui o Hawaii nei i keia manawa.

            S. SAMUELA,- nona na makahiki 6@ ia wa. O MIZEPA he puu kiekie kakoke loa ia RAMA, ko Samuela wahi noho, he mau mile cha mai Ierusalema aku ma ka aoao komohana akau. Ua lawelawe oia i kona oihana lunakanahiku no na makahiki 20, e kaahele ana io ia nei no ka hooholo ana i ka pono, 1 Samuela 7:16. 6. WAI,- ma ke ano he hana hoohiki e like me ko keia lahui i ka wa kahiko ma Hawaii nei. 7. HAKU,- elima na alii Pilisetia, @ Sam. 6:16, 17. 8. HOOKI,- no ko lakou paulele ana i kona mana. Ua lawelawe oia i ka oihana kaula, he @ uwao no Iehova, aole he kilokilo wale no e like me na kahuna hoopunipuni o na hoomana kahiko o Hawaii nei. 9. MOHAIKUNI,- he hoailona keia o ko lakou hoolaaia hana mana keia ma ka hooholo ana @ hana mai na aouli mai ia wa hookahi. 11. BETEKARA,- nalowale ke kahua o keia kauhale, pili i ka palena o Pilisetia. 12. EBENEZERA,- no keia inoa ke ano "ka pohaku o ke kokua." Eliezera, "ke Akua ko'u Akua." 13. Hou,-nolaila he wa hou ia no ka lahui Iudaio, a lilo ka Iseraela i lahui ikaika, kuonoono, pomaikai. 14. KUIKAHI,- no ko Samuela wikani no ka hoopono pono hou ana i ka lahui. 15. OLA,- a hiki i ka wa a Saulo i lilo ai i moi, mamuli o kona haiolelo ma 1 Samuela 12:6-25, oiai ua mau kona pauleleia ana no kona naauao, haipule, eleu.

            I. KA MIHI O KA LAHUI, 5-8. Mahea i akoakoa ai ka Iseraela? Heaha ke kumuhana no keia halawai? Heaha na hana a Samuela i paipai ai i ka wa mamua iho? Heaha kona olelo hooikaika? Heaha ke kumu no ka hoonoho ana ia Mizepa i ko lakou kahi e akoakoa ai? Heaha ka hoike o ka Iseraela i ko lakou wa i mihi ai? E hiki ana anei i kekahi lahui ke lilo i lahui ikaika ke ole na hana haipule? Heaha ka pomaikai e loaa ai i na lahui kanaka ma ko lakou mihi ana imua o ke Akua oiaio? Hiki anei i keia lahui ke hooponopono hou ia ke ole ko lakou haalele ana i na kuko ino a me na hana hewa? Heaha na mea i hoikeia ma ka ninini ana'ku i ka wai imua o Iehova? Heaha ka pomaikai e loaa ai ma ka hookeai ana? Pehea i hooponopono ai o Samuela i ka Iseraela imua o Iehova ia wa? Heaha ka pomaikai i hiki ai ia Samuela ke loaa ai ma kona pule ana?

            II. KA PULE ANA NO KA LAHUI, 7-9. Heaha ka hana o na'lii o Pilisetia? No keaha la ua kue lakou i ka akoakoa ana o ka Iseraela no na hana haipule? Ina paha ua hoolohe ka lahui i ke Akua,  E hiki anei ia lakou ke hookauwa aku i na hewa? Heaha ke kumu no ka makau o ka Iseraela? Pehea i pau ai keia makau no ko Samuela pule ana no ko lakou pono? Heaha ka olelo hoike o ka Baibala e pili ana i ko Samuela mana haipule Halelu 99:6; Ieremia 15:1? I ka wa hookahi me ko Samuela pule ana, heaha ka hana kupaianaha? He pane anei keia i ko Samuela pule? Heaha na hana i pili ai i ka pule o Samuela? Heaha na mea i hoailonaia ma ka mohaikuni? Owai ka mea uwao i keia wa no ka pono o ko Iesu manaoio, Rom. 8:27?

            III. KA LANAKILA O KA LAHUI, 10:15. Pehea i pili ai ka hekili i ka lanakila o ka Iseraela? Owai ka mea nana i hooahuee aku i ka puali o Pilisetia? Heaha ka hana o ka Iseraela? Heaha ka mea hoomanao a Samuela i kukulu ai? Owai ka inoa a me ke ano? Heaha kona olelo hoike, ka pauku gula no keia haawina? Heaha na hua maikai o keia lanakila? Heaha ka loihi o ka @maikai i loaa ai? Me wai ke kuikal@? Owai ke poe Amora? Ehia mau makahiki a Samuela i hoomaluai i ka Iseraela? Heaha na ano okoa o ko Samuela kulana maikai?

            MANAO PILI. 1. He pono anei ke hoeueu hoi i ke ano noho haipule o ka lahui Hawaii? 2. Heaha na kumu no ka hoakoakoa ana i na lehulehu i mea e laha ai ke ano haipule? 3. Heaha ke kumu no ka pono o ka mihi mamua o hoaponoia ana? 4. Heaha ka pono o ka noi ana ia hai e pule aku no kakou? 5. Ua mahalo aku anei oe i ke Akua no na pomaikai i loaa ai ia oe ma ka pule?

 

Lulu Luakini o Kawaiahao.

 

            I @a hoahanau o ka Ekalesia Makua o Kawaiahao, a me na hoaloha a pau iloko o ka pono o Iesu Karisto e noho ana ma Honolulu nei, a ma na wahi a pau iloko o ka Paeaina, a me na makamaka a pau e noho mai la i ko na aina e, e aloha oukou a pau, e ka poe e heluhelu ana i keia, a e nana oluolu iho, na ka Haku kakou e alakai.

KE HOIKE AKU NEI.

            Maloko o na la o ka makahiki piha hookahi i hala aku la, ua hapai hou aenei kakou e kukulu, a e hana hou i ka Halepule o Kawaiahao, i kulike ai me ka palapala i hoopuka ia ma ka Nupepa KUOKOA, "Ke Leo Aloha," he pule a he palapala uwalo aku, na ke Komite o ka Ekalesia iloko o Okatoba o ka makahiki i hala. Ua ko ia, a ke ike kakou ano. Ua hoomaemae ia ke kahua, ua kukulu ia na kia, ua moe na pio, ua ku na pou ha-na, ua kau na kua, ua hahau ka papahele, ua ku na o'a, ua moe na k@la, ua hi'a na aahe, ua hoa kaula, ua kau ke pili, ua hamo ke pena, a paa ka Halepule, a ke ku kilakila nei ka ka Luakini o Kawaiahao, ka Hale o ke Akua Mana Loa, na paa a ua lanakila ka hana a oukou, iloko o keia makahiki piha i hala ae nei me ka aie ole. Ua oi aku ka paa, ka ikaika, ka maikai a me ka nani i kona mua.

A KE HOIKE HOU AKU NEI.

            O kahi apana hakina hana i koe a kakou, o@a no ka mahelehele pono ana i keena Kula Sabati maloko a me kekahi mau wahi hana liilii e ae e pili ana i ka Luakini.

            Me ka manaolana ulumahiehie, oia ke kumu o keia kakau ana aku, ke hoolaha akea aku nei ma ka Nupepa KUOKOA no ka lua o ka manawa, i ike like kakou a pau, e hoomanao iho, o ka la Sabati e hiki mai ana, oia ka la 20 o keia mahina o Okatoba nei, oia ka la e lulu hope loa ai kakou no ka Luakini.

            NOLAILA: Ke kauleo piha ia'ku nei oukou e na hoahanau, a me na makamaka a pau i kakau a i kohokoho mai i ka lakou haawina no ka wa ae nei i hala, e paa nei na inoa ma ka buke a me na pepa hoomanao me na leta ma ka lima o ke Kahu e waiho nei. E hoomanao mai oukou mai poina, ma ua la la e hiki mai ana, e hoihoi mai kela a me keia e like me kana i hoolaa ai no ka Haku a no kona Betela.

            Ina ua pilikia kekahi no kona hiki kino ole mai ma ia la, e haawi mai ka lima o ke Kahu, ma ka lima o ka luna apana, a i ole ia ma ka lima o na hoaloha kupono.

            A ke kauleo pu ia aku nei no hoi i ka poe a pau i aloha i na hana a ka Haku, na hoahanau o na ekalesia e ae, na makamaka haole, a me na malihini, e akoakoa like mai kakou ma ia la, me na wahi hipuu lau oliva o ke aloha, e pupu like me ka lokahi, i hookahi puuwai, i hookahi umauma, i hookahi pana ana, a i hookahi ka manao ma keia hana maikai.

            No ka mea, no ke Akua ka Hale, ke Kihapai, a Nana no keia hana e kakoo nei ia kakou imua, a kakou e ike kumaka nei, ua holopono ka hana ma na ano a pau. No ka mea, o ko kakou nawaliwali ana a me ko ko kakou hemahema maoli, ua kupono ia i ko ke Akua aloha a me kona lokomaikai piha ia kakou a pau, me ka malu ma o Iesu'la.

Me ke aloha,

NA KE KOMITE KUKULU HALE.

            Kawaiahao, Honolulu, Okatoba 9, 1895.

 

Halawai Ahahui Opiopio o Maui.

 

            E noho ana ka Ahahui Opiopio Nui Imipono Karistiano o na Mokupuni o Maui ma ka Halepule o Wailuku, Maui, ke hiki aku i ka la 4 o Novemaba, 1895, hora 10 kakahiaka. Nolaila ke kono ia aku nei na lala a pau o keia ahahui, e akoakoa pau ma kahi a ma ka manawa i hoike ia maluna. Pela mai ke Kakauolelo o ka Ahahui.

 

He Leta mai Kilibati mai.

 

Kariakaibuke, Iune 29, 1895.

            Rev. W. N. Lono me ka ohana.

            Aloha nui mau loa oukou. Eia no au ke olena aku nei ko'u mau wahi maka liilii o ke ake nui e ike aku ia oe, Maka ame Kanoho. Auwe! ke noke maila oukou i ka haweleku i ka waiu o ka makua (@). Auwe! Ono ino ia mea waliwali a oukou e hana walea mai la. O ka ua ko luna, owau ka lalo nei, o ka makani moae ko kai mai o ka moana @ipolipo, owau hoi ko uka nei. Aloha no, ke o nei kokea iluna o ko'u wahi poo, kokoke e puni, ke nahunahu kapakahi ae nei au i kahi apana niu kokoke a pau loa na wahi niho i ka helelei. Auwe! Ahu ka hoka i kapakai, ua malulelule kahi pauku kino, aka o ko'u manao, he ikaika mau no ia, aole olalau kahi lunaikehala, ke mikioi nei no e like no me kuu wa opiopio, ke mau nei no ka ikaika o ko makou alii ma ka pono o ka Haku. Ua paa iho nei ko makou luakini hou, nani keia luakini, onionio, ohi na io-nao ke hele ku-kuku nei ka kula la, ke haiamu nei na kula Sabati, ke mau nei no na anaina pule Sabati a me na halawai Poakolu a halawai Poalima a na wahine.

            Aia o Nua i Abaiang a me Tarawa, a hala loa'ku i Maiana no ke hoolana aloha i kana wahine. Auwe! aloha ino, owau ke hele aku ana i ona'la, aole oia e hoi hou mai io'u nei, wahi a Davida.

            E Lono e, he nui loa ke aloha o ko Maiana poe ia oe, ke kali aku nei no o ko hoi mai. Aohe hula o Maiana no ka huhu loa o ke alii Te Moaniloa, kipaku ia mai kekahi kumu Pope aea haukae e Te Moaniloa, i hele aku ua kumu Pope'la e hoowalewale i ua alii'la a haawi aku i ke dala, @o@e, paka ame kekahi mau mea e ae i mauna e komo aku ai kona aoao hoomana i Maiana, ua hoole mai o Te Moaniloa haumana a Lono, a ua kipaku ia mai ua wahi kumu Pope nei, a hoa-a wale iho no aole he hula ma Butaritari nei, aole he makemake o ke alii.

            Ua pau aela au maanei, o ke aloha no ko oukou a nui, a mau loa aku mai ka Haku mai. E Lono e hai nui ae oe i ko'u aloha nui ia Rev. H. Binamu ma, Rev. Kauka Hai ma ame na haipule apau ma ko Hawaii Paeaina. Ke kokoke mai nei ka manawa e hele aku ai, ke hoomanao nei au i kela olelo kuahana a ka Haku. Penei, o ka mea hoomanawanui a hiki i ka hopena, e ola ia. Aloha kaua.

            Owau iho no o J. W. KANOA, kou hoa paa@a iloko o ka olelo hoopomaikai a ko kakou Haku Iesu Karisto.

 

            E ku mai ana ka mokuahi Australia ma ka la 21 ae nei o keia malama, a e huli hoi aku ana ma ka la 26 o Okatoba nei, me ka hali pu aku i na mea a pau, na ohua a me na ukana mai keia awa aku.

 

Mai Kona Akau mai.

 

            Eia ke telepona na hiki mai iuka ae nei o Holualoa, ke kamailio pu nei ko Kona Akau poe me ko Kau, Hilo, Hamakua a me ko na Kohala. Nani maoli keia a ke Aupuni Repubalika e hana mai nei. He mau mile koe hiki aku i Huehue, i kahi o John Maguire, no ka pau e o na pou i lawe ia mai, nolaila aole i hiki i Huehue.  Ua hoi aku ka haole hana telepona i Kau.

            Nui ke kanalua o na kanaka i kela mau la no ka ma'i kolera.  He kolera io anei?  Mamuli o keia ma'i ua pii iki ae ke kumukuai o ka palaoa, ko a pela aku o na halekuai o keia apana, a mamuli no hoi o keia ma'i ua haule hope loa kekahi mau kula no ka paa ia o na kumu, o ka poe i auwana no Honolulu.

            Hale Kula hou:  Ua paa iho nei ka ekolu o na hale kula o ka hale kula o Kailua, ma ke ano he hale kukoa mawaho ae, mai ka hale kula mai, aole ma ke ano i hana rumi ia iloko o ka hale hookahi.  Hale nui keia e lawa ai na haumana malalo o ka haneri.  Ua hoi mai Lei na kumu kula o ke kula o Pahoehoe, eia laua ke noho mai nei, e hoomaka ana ke kula ma ka la 14 aenei.  He wahi Iapana kai make o Laaloa i ka la 5 aku nei, ua manao ia i pepehi maoli ia ka mea i make ai.  I ka imi pono ia ana aku, aohe oiaio oia mau lono hoopuiwa, o ka mea oiaio i make ma'i no.

            Me ka mahalo.             D. A.

 

Hoomanao no John Kalama.

 

            Ia Mrs. Sera J. Kalama

            Me ka walohia.

            Me ka mahiehie o ke aloha a makee i kamakamaka ia maluna iho o ko makou mau puuwai pakahi i keia la mamuli o ka poha ana mai he lono e ulona ana ka manawa i ke kaumaha, luuluu, eehia, manaonao, lihaliha a mokumokuahua o ka naau e i ana, au hala, au nalo, au akoia ka liko, ke ola, ka hanu hopeloa o John Kalama ma Makawao mokupuni o Maui ma ka hora 4 o ka wanaao o ka la 20 o Sepatemaba makahiki o ko kakou Haku, 1895.  Nolaila ke hooholo nei makou ma o ko makou komite la.

            Oiai ma kekahi manawa o ka A. D. 18883 i hala, au kipa mai olua ma ko makon mau kaiaulu nei a hookumu ihola i keia Ahahui Imipono Karisiano a o kana i hana ai au waiho iho oia he kiahoomanao e hiki ai ia makou ko hoopoina olo.  Nolaila o makou o na lala o ka ahahui Imi Pono Karisiano o Kona-waena ma ka apana o Kona Akau mokupuni o Hawaii me ke aloha walohia me ka naa i poniia me ka naauauwa e ke aloha oiaio me na puuwai i kipona ia e ka ehaeha ame ke kaumaha, ke komo pu aku nei makou iloko o ke kumakena pu ana me oe.  A ke nonoi nei makou i ke Kahi Kolu Mana Loa iloko Kona lokomaikai nui a kiekie palena ole Nana e hoomama mai i na luuluu me ka mumakena o ke kanikau no kau kane i nalohia.  Nolaila, pomaikai ke kanaka ke makei loko o ka Haku.  Nana no i haawi mai a Nana no i lawe aku e hoonani ia ke Akua.

 

NA KOMITE.

 

            Kona-waena; Danlela P. Hoolapa, N. Kona; Hoomanawanui Opio, S. Kuhia ame Kaiwipunakea.

            Hawaii, Oct. 9, 1895.

 

He Hoalohaloha na na Lahainaluna.

 

MRS. SARAH KALAMA,

            Aloha oe a nui loa:

            Na ke aheahe laumakani makou i hai mai, o kau mea aloha he kane o John Kalama, ua hala.

            E Sarah e, ua hala io anei o John Kalama?  Ke lawe mai nei ka makani aheahe mai ke kai mai i kou leo, me he leo la no ka hanehane me ka huaolelo, "Ae, ua hala kuu Kalama."  Auwe!  Walohia wale!!  Minamina ino!!! Aloha wale kou hoapili o ke anu a ka Ukiu e iniki iho ana i ka ili, welenia no hoi, lokuleku a huihui wale.  Aole no nae he i mai o Kalama e, he anu wau, a pehea no e anu ai o Kalama he kupa no ia wao, a he aloalo kuaua no ia kuahiwi, eia ka hoi ke kau oi loa aku o ke anu o Makawao, ke anu la o Kalama anu o Sarah, anu ka ohana a pau, a hohola ae la ke anu a puni ka Paeaina.

            O Iehova o na Kaua Kona Inoa, ua lawe aku ia oia i ka uhane o Kalama kau kane aloha nui ia, me ka palanehe loa mai ko olua kihapai home aku ma Makawao ma ka wehena kaiao o ka la 20 o Sepatemaba iho nei a waiho iho la i ke kino puanuanu i kona kumu o ka lepo.

            A ma ia mea, ke noho la oe me ka ukana nui he aloha, he kaumaha, he luuluu me ka paumako nona.  E ke kaikuahine e, o makou pu kekahi i loohia iho nei ia haawina hookahi, no kam mea, o ka makou hoahanau no ia o ka ohana hooka na ka makuahine ke Kula Nui o Lahainaluna.  Na makou i pili ia wahi, na makou i holoholo ia kula panoa i ka la, na makou i aolo ke anu me ke koekoe o ka ua Paupili o Lele.  Ke hoomanao nei makou nona, a me he mea la, o Kalama no paha e holoholo mai la i kela kula wela nopu i ka la, i ka piina ikiiki o Puopelu, i ka ihona walawala o Lelekahauli, a ke komo ae la i ka olu kohai o ka malu kukui o Kaukaweli, a e auau ana paha i ka wai hui e Auwalawao.  Aloha wale o Lahainaluna, ka ipukukui pio ole i ka makani Kauaula, kahi a Kalama i walea ai, i kilohi ai a i hoohihi ai i ka nani, ka anapa me ke alohilohi o kou malamalama, a ua pili aku ia malamala ou ia Kalama, ua komo iloko, iloko lilo loa o kona puuwai, a me ia malamalama no ia a hele aku la, nolaila:

E hooholoia, o makou o na poe Lahainaluna a pau e noho ana iloko o ka apana o Kona Akau, mokupuni o Hawaii, he mau hoa no ka papa kula hookahi me John Kalama, a he mau hoa no na papa kula malalo iho i noho pu me na pokii hou loa, a i kulike a me kela olelo kaulana i papahiia ma ka umauma o na Lahainaluna a pau "O na manu hulu like, lele like no lakou a pau;" nolaila, ke hookomo aku nei makouia makou pakahi a pau loa iloko me oe e auamo pu i na luuluu, na u, na kaumaha a me ke kumakena ana no ke aloha a me ka minamina nui no kau mea aloha he kane i hala i ka make o John Kalama.  A ia kakou e u pu ana nona, e liuliu ae kakou a hooia aku i ko na lani oiaio, oiaio loa kau olelo, "o ke ola o ke kanaka, me he mahu la i pua ae a nalo iho,"  "E hoi ka lepo i ka lepo, a e hoi ka uhane me ke Akua ka mea nana mai."

E Hooholoia, oiai kakou a pau iloko o ke kaumaha ana, ke pa-e mai nei ka leo aloha mailoko lilo loa mai o ka Nohoalii mai o ke Keikihipa, e haliu aku kakou a hoolohe ia leo aloha "E hele mai oukou a pau i o'u nei e ka poe luhi a me ka poe kaumaha, a na'u oukou e hoomaha aku.  A ina ua pili keia leo kahea i ko kakou mau kau maha, alaila, e pau ana a e hoomamaia mai ana kakou, a e hauoli ana kakou me ia iloko o kona lokomaikai.

E hooholoia, e Hoounaia i hookahi kope o keia i ka wahine kane make Mrs. Sarah Kalama, a i mau kope pakahi i na nupepa olelo Hawaii a pau.

            O makou no ma o ko makou Komite.

            J. W. Keliikoa, D. Alawa, S. K. Haluapo, Robert Makahalupa, Abbe K. Kauhaihao.

            Keauhou, Kona A.H. Oct. 9, 1895

 

Na hoomaikai Kamahao i na Lala o ka Ahahui Manawalea.

 

I ka Mea i Mahalo Nui ia:

            Mrs. Kulamanu Allen,

            Peresidena a me na lala a pau o ka Ahahui Manawalea Hawaii.

            Me ka Paumako nui.

            Oiai, mamuli o na haawina kamahao o ke aloha kuhohonu oiaio no ka lahui; ua pahola ia mai e na puuwai hamama o na kane a me na wahine hanohano o ko Hawaii Paeaina, no ke kokua a malama ana i na ohana e noho hune ana ma ke aloalii nei, i na mea e pono ai ke ola kino; mamuli o na hana hoomalule a ka mai kolera.  No na anahulu ekolu a oi aku ka loihi o keia hana maikai ana.  A nolaila, ua weheia ka hale halau a ke aloha, a ua moakea ka piko o ka lokomaikai.  E ka Ahahui Manawalea Hawaii.  Nolaila,

            E hooloia, E hoonaniia ke Akua Kiekie Loa, He malu ma ka honua nei, He aloha nui i kanaka.  A nana no e haawi mai i na pomaikai a me ke ola loihi ana o ka Aha Manawalea Hawaii.

            E Hooholoia, o na hana maikai a me na haawina pono a pau; i hooko ia maloko o ka A.M.H., he mau hana pookela oi kelakela loa ia o ka nani a me ka hanohano, maluna o na ohana hune o ka lahuikanaka ma ke aloalii nei; e lilo auanei i kiahoomanao no na puuwai o ka lahui no ka wa pau ole.

            E Hooholoia, O na kane hanohano a pau, i kokua mai me ka manao oluolu a piha lokomaikai nui wale.  E paholaia me ke kaulike i na hoomaikai palena ole ia, e na ohana hune a pau e noho ana ma ka Mahele 8 o ke kulanakauahale o Honolulu, o ko Hawaii Pae Aina.

            E Hooholoia, E paiia ma na nupepa ke kope o na olelo hooholo, mahope iho o ka loaa ana i ka A.M.H. keia palapala hoomaikai.

            O makou iho me ka haahaa o na lala o ke komite i kho ponoia e na makaainana e noho ana ma ka Mahele 8 o Honolulu nei.

            L. W. P. Kanealii, Edward Lilikalani, D. M. Punini Jr., Kemelia Kuhia, W. H. Kailimai.

 

Ka Hawaiian

Gazette

 

He Nupepa Namu Elua

Puka ana o ka Hebedo

ma, ma ua

 

POALUA a me POALIMA

 

e hoopuka ia nei e ka

Hui

 

HAWAIIAN

GAZETTE

COMPANY.

 

            O ka Nupepa Kuloko

Alakai keia ma ka Olelo

Beritania e hoolahaia nei

maloko o ka Paeaina a

hala loa aku i na Aina E

a ke heluhelu ia nei e na

mea a pau ma na oihana

na Halekula a komo loa

iloko o na ohana.

 

Ka Uku Pepa Laulaha.

 

No ka Malama             $ 50

No ka Makahiki Kuloko.        5.00

"           "           Kuwaho..        6.00

 

Keena Hana Helu 318.

            Alanui Kalepa.

 

Pahu Leta O. Honolulu Oahu

2531-tf

 

Na Hua

Kuni

Inoa

 

Eia ka Hui Hawaiian Gezette Co., ke hana paka maoli nei i na Hua Kuni Inoa o kela a me keia ano, nui a liilii e like me ka iini a ka manao.

 

O keia mau Hua Kuni Inoa, au lawa ia no ke kahakaha ana ma ke kanana a pepa e ae e hoailona ai i ka Inoa a kohu maluna o kekahi mea i makemake ia e kuni a kaha paha.

 

He like ole na uku o na Papa Kuni Inoa, no ka mea aia no ke kau ia o ka uku a maopopo ke ano o ka Papa Inoa au i makemake ai, he nui a he liilii paha.  Aka he oluolu ka uku a he waipahe na kuka ana.

 

E kipa kino mai e nana i ike kumaka, a i ole ia e hoouna mai i na kauoha ma ke

 

Keena Hana - Ma ka Halepai: HAW

AIIAN GAZETTE, Helu 318

Alanui Kalepa, Honolulu

2531-tf

 

Halepai

Hawaiian

Gazette.

 

O keia ka Halepai Nupepa Alakai o ke Kulanakauhale o Honolulu nei.  Ua lako i na Hua Kepau o na ano a pau a ka makemake e ui ae ai.

 

Eia ma keia Halepai e pai ia nei ka Nupepa KUOKOA, a me Nupepa HAWAIIAN GAZETE PACIFIC COMMERCIAL ADVERTISER CHURCH CHRONICLE a me PLANTER'S MONTHLY.

 

Ua hiki loa i keia Halepai ke pai aku i na pepa nunui hoolaha alanui, na buke, na bila kikoo, na bila hookaa, na palapala poloai ahaaina a me na hana e ae a pau o ka oihana pai.

 

Eia maloko o keia Halepai he Keena Humuhumu Buke, kahi e humu ia ai na Buke, na pepa a me na mea a pau i pili i ka humuhumu ana i na palapala.  He oluolu ke kuka ana a he emi kupono na auhau.

 

K@@a Hana, Helu 318 'Alanui Kal@

pa, Honolulu ka Hale iluna.

2531-tf

 

Hoolaha Kumau.

 

            Aole loa e maikai a oluolu ke ola ana o kekahi mea kino uhane ola ina he aaiole kona akepaa a hiki ole ke lawelawe i kana mau hana me ka hololea.  E hahai ana ka nalulu a me na nawaliwali e ae ma ka moali o ke ake ponalo.  He mea oiaio keia i hooiaio ia ma na wahi o na poai oluolu akau iloko o ka hapaha keneturia, o na

 

HUALE A AYERS,

 

oia wale no ka LAAU HOOLA AKE maikai loa i keia.  E hoola ana i ka lepopaa, ka nalulu eha, na ma'i oloko o ka opu, a ma ke ano LAAU OHANA aohe ona lua e like ai.

 

            O ka Ayers Sasaparila, oia ka Laau Hoomaemae Koko kilakila, e haawi ai i ka ikaika a me ka hooponopono ana ia loko o ke kine o ke o ka ili, e hoopau ana i na maluhilukanaka.  E pepehi a ulupa ana i na PUHA, e hoola ana i na pohapoha hi o ke ola ana a e kipaku loa ai i na ano ma'i a pau.  O ka poe ma'i no ka wali pono ole o ka'ai, ka nawaliwali mau a ano ma'i e ae i ulu ae mai ke koko ino mai, he mea pono e inu i ka laau

 

SASAPARILA A AYERS.

 

He laau e hooikaika ai i ka nawaliwali, a e hoopuipui mai ai i ke kino, Ma ka inu ana i keia laau, e hoonoono ia ai ka ai ana, oluolu ka moe ana a maikai ke ola ana.

 

            O ka Ayers Cherry Pectoral laau, aohe lua ma ka hoola awiwi ana i na KUNU, ANU a me na PUU EHA.  E hoola ia na KUNU KALEA a me na ma'i pili i ke ake me ka hikiwawe loa.

            O na Huaale a Ayers, na Sasaparila a me ka Ayers Cherry Pectoral, aia kahi e loaa ai ma ka Halekuai o ka

 

Hollister Drug Co. Lt.

 

Na Agena ma ka Paeaina Hawaii.

2514

 

KAKELA

ME

KUKE

 

Ka Halekuai Nui

 

-O NA-

 

Waiwai LIKE OLE

 

NA MEA

 

HANA KAMANA AIPAU

 

Na lako pili hao kukulu hale,

            Na kepa,

            Na lei ilio,

            Na kaulahao ilio,

            Na Pahi,

            Na Upa,

            Na kope hulu,

            Na Pulupulu.

PALAU LIO

            Na me mahiai,

            Na au ho,

            Na au koi,

            Na kua bipi,

            Na lei bipi,

            Na kaulahao bipi,

            Na uwea pa,

            Na kaa palala,

            Na mea piula,

Na ipuhao.

 

Makau me Aho Lawaia

 

Na Iliwai

            Na kaula,

            Na hulu pena,

            Na pulumi,

            Na pena, me ka aila,

            Na kopa,

            Na aila mahu

            Na pakoke

Na pakeke hao,

            Na kapu hao,

            Na p@uda,

            Na uwiki, a me

            Na ipukukui.

 

Mikini Humuhumu Kaulana

 

Wilcox, & Gibbs Hookahi Lopi.

 

ka Remington, Elua Lopi.

 

            A me na ukana he nui loa, o kel@@ano me keia ano.

 

Kakela me Kuke

5325 q