Ka Nupepa Kuokoa, Volume XXXIV, Number 41, 12 ʻOkakopa 1895 — Page 4
| This text was transcribed by: | Francene H Aarona |
| This work is dedicated to: | To those who created the Hawaiian dictionaries, so I could discover words I had not heard before |
Ka Nupepa Kuokoa
KE KILOHANA POOKELA NO KA LAHUI HAWAII.
KA
NUPEPA KUOKOA
--- ME ---
Ko Hawaii Paeaina i Huiia
---
No Ka Makahiki . . . . . . . $ 2 00
No Eono Mahina. . . . . . 1 00
Kuike ka Rula.
HAWAIIAN GAZETTE CO.
GEO. H. PARIS, Luna Nui.
A. U. KAWAINUI, Luna Hooponopono
@ Honolulu, Oahu, Lakou a pau.
POAONO,- - - - - OKATOBA 12, 1895
KULA SABATI.
---
HAAWINA XXX.---OCT. 27.
Samuela ke kamalii. I Sam. 3: 1 - 13.
O SAMUELA, ke keiki, lawelawe aku la ia na Iehova imua o Eli. Kakaikahika olelo a Iehova ia manawa : aole he hoikeia ʻ na i laha.
2 Aia mau la, ia Eli i moe ilalo ma kona wahi, ua powehiwehi kona maka, aole ia i ike ;
3 Mamua o ke pio ana o ke kukui o ke Akua ma ka halelewa o Iehova, kahi i waiho ai ka pahu o ke Akua, a ua moe iho o Samuela ;
4 Hea mai la o Iehova ia Samuela, i aku la ia, Eia no wau,
5 A holo aku la io Eli, la, i aku la, Eia no wau, no ka mea, ua kahea mai oe ia ʻ u. I mai la ia, Aole au i kahea aku ; e moe hou oe. A hele aku la ia, a moe iho la.
6 Kahea hou mai la o Iehova, E Samuela. A ala mai o Samuela, a hele io Eli la, i aku la, Eia no wau ; no ka mea, ua kahea mai oe ia ʻ u. I mai la ia, Aole au i kahea aku, e kuu keiki ; e moe hou @oe.
7 A o Samuela, aole ia i ike ia Iehova ia wa, aole hoi i hoikeia ka olelo a Iehova ia wa, aole hoi i hoikeia ka olelo a Iehova ia ia.
8 Kahea hou mai la o Iehova ia Samuela, o ke kolu keia. Ala mai la ia, a hele aku la io Eli la, i aku la, Eia no wau ; no ka mea, ua kahea mai oe ia ʻ u. A ike iho la o Eli, na kahea mai o Iehova i ke keiki.
9 No ia mea, olelo aku la o Eli ia Samuela, O hoi oe e moe ; a i kahea hou mai oia ia oe, e i aku oe, E Iehova, e olelo mai, no ka mea, ua lohe kau @kauwa. A hoi aku la o Samuela a moe iho la ma kona wahi.
10 Hele mai la o Iehova, a hoike ia iho, a kahea mai la e like me na manawa mamua, E Samuela, e Samuela. I aku la o Samuela, E olelo mai, no ka mea, ua lohe kau kauwa.
11 Olelo mai la o Iehova ia Samuela, Aia hoi, e hana auanei au i kekahi mea iloko o ka Iseraela, i mea e kai ai na pepeiao elua o na mea a pau i lohe.
12 Ia la no hooko aku au maluna o Eli i na mea a pau a ʻ u i olelo ai no kona hale, o ka hoomaka ana, a me @ka hoopau ma.
13 Ua hai aku au ia ia, e hoohewa mau loa ana au i kona hale, no ka hewa ana i ike ai : no ka mea, na kana mau keiki i lawe mai ai ka hewa maluna o laua iho, aole ia i kaohi aku ia laua.
PAUKU GULA. 1 Sam. 3 : 9 E Iehova, e olelo mai, no ka mea ua lohe kau kauwa.
MANAO NUI. E pono i na kama@hi ke hoolohe aku i ke Akua.
OLELO HOAKAKA. Ma ka buke mua o Samuela, ua loaa ka moolelo o ka Iseraela mai ka wa hanau mai o Samuela, M. K. 11.49, a hiki i ka make o Saulo, M. K. 1056. I ka wa mua o Eli ke kahuna nui a me ka lunakanawai noho i. Ua hoohiki o Hana, ina paha e loaa ana ia ia he keikikane, e haawiia ana ʻ ku a laa ia Iehova. Ua kapaia kona keiki makahiapo Samuela, oia " Na ke Akua i lohe ai , " no ka mea ua @oe mai o Iehova i kona pule. Ua hanauia oia ma Rama, he mau mile aha mai Ierusalema aku. Ua noho e o Samuela malalo o ko Eli hoomalu ana, no na makahiki kekahi kakaikahi. Ma Silo ka halelewa ia wa, he mau mile 17 mai Ierusalema aku ma ka akau. Ua hana hewa nae na keiki o Eli. Aole oia ia wa ia laua.
1. LAWELAWE,---ma a hana kupono no na kamalii. HOIKEIA ʻ NA, ---e like me na kauoha no Iehova mai ia Mose a me Iosua. 2. WAHI,---he keena pili koke i ka hale bea. 3. PIO,---ua kolikoliia ka uiki o ka ipukukui, a mau ka aa ana a hiki i ke pio ana, Oihk. 24 : 2-4, ma ke kakahiaka nui. 4. HEA,---mailoko mai o ke keena kapu, paha. 5. HOLO,---wikiwiki kona he olohe ana. 6. MOE,---me he mea la, he moeuhane wale no. 7. IKE,---me ka hoomaopopo ole ana no ke Akua mai ka leo kahea, Joba 33 : 14. 8. KOLU,---no ka mea aole hookuli o Samuela ; waleaole, oia kona hemahema. 9. OLELO,---oi aku ka moakaka o ka olelo mamua o na hoikeana e ae o ke Akua. 10. LOHE,---ke ano hana kupono keia no na kamalii a pau loa. 11. KANI,---a hoomauia a lokuloku me ka eha no ke ano o na mea i loheia. 12. HOOKO,---mamuli o ka wanana, ma ka mokuna mamua iho, 2: 27 - 36. 13. KAOHI,---no ka mea, ua pili keia mana i ka noho makua ana : na ka makuakane e ana i ke keiki hoomaniha a auwana wale.
I. KE KAMALII E LAWELAWE ANA, 1-8. Owai o Samuela ? No keaha la keia inoa ? Heaha kona lawelawe ana ? Ehia mau makahiki nona ? No hea mai kona ano hoolohe, hoopono, haipule ? Owai ke keikialii i olelo ia ma ke ano like, 2. Oihanaalii 34 : 1 - 7 ? a me kekahi keiki ma ke Kauoha Hou, 2 Tim, 3 : 13 ? Heaha kekahi mau hana kupono no na keiki haipule ? No keaha la ua kaawale o Iehova ia wa ma ka nana ʻ ku ? Ua kupono anei i na kamalii e kali iki a kali iki ae mamua o ka hoolohe pono ana i ko ke Akua leo kahea ia lakou pakahi ? Heaha kekahi mau pomaikai no na keiki ma kaohana haipule ? Ua kupono anei i na makua ke hoonaauao ole i ko lakou mau keiki ma ka olelo a ke Akua mehe meala e hiki ana ia lakou ke heluhelu a noonoo a ike pono i ko ke Akua mau manao ?
II. KE KEIKI I KAHEA LA, 5-8. Heaha ka leo i hoala mai ia Samuela i kona wa i moe ai ? Owai ka mea kahea mamuli o ko Samuela kuailo ana ? Heaha ko Samuela hana ? Ehia mau kahea no ke Akua mai ia Samuela ? Heaha ke kumu no ka olelo, " aole ia i ike ia Iehova " ? Ke kahea nei anei ke Akua i na kanaka i keia mau la, aole paha ? Pehea e ike pono ana oe i ka leo kahea a ke Akua ? Heaha ke kumu no ko Iehova kahea ana ia Samuela, aole i na keiki o Eli ? Owai kekahi mau mea i kahea ia mai mamuli o na moolelo o ke Kauoha Kahiko, ma ka hoopuka ana i ko lakou mau inoa pakahi, Kinohi 22 : 11, Ruta 3 : 4 ? Ua like anei kou kulana me ko Samuela, aole paha ? Heaha na kumu no kou hana ana ma ke ano like ?
III. KE KAMALII E HOOLOHE ANA, 9-13. Heaha ko Eli olelo ao ia Samuela ? Heaha ko ke Akua olelo ? Heaha ko Samuela olelo pane ? Heaha ka olelo hoike o Iehova ia Samuela ? Heaha kona olelo ao ia Eli i ka wa mamua ? Ua malama pono anei o Eli i kona ohana, aole paha ? He kanaka haipule maoli anei o Eli ? No keaha la aole i hoikeia a moakaka loa ke ano o ka uku hoopai e loaa ana ia ia ? Pehea e pono ai i na kamalii ke hoolohe i na hana paakiki i ko lakou wa kamalii ? Ehia mau makahiki mamua o ka hooko ana i ka wanana i loaa ai ia Samuela ?
MANAO PILI. 1. Pehea e hiki i na kamalii ke lawelawe ma ka hooholo ana i ka hana a ka Haku ? 2. Ua lohe anei oe i ka olelo kahea a ke Akua ia oe ? 3. E pono ke hoopaiia na makua molowa ? 4. Pehea e pomaikai ai na makua ma ka malama pono ana i ko lakou mau keiki ? 5. E pono anei i na keiki ke hoomalu a aua i ko lakou mau mea kino ?
---
Moolelo o ka Ahahui Euanelio Mokupuni o Hawaii.
---
La Hana 1, Sept. 19, 1895---Halawai hou ka aha ma ka luakini o Haili, Hilo, ma ka la 19 o Sept. A. D. 1895, hora 1:30 p.m. e like me ka hoopakele ae i ke ola o keia lahui, mai keia mai korela ae e laha nei ma Honolulu i keia wa.
Hoomaopopoia na lala i hiki mai.
Na Kahu---Rev. S. L. Desha ko Haili, Hilo, Rev. L. K. Kalawe ko Puula, Puna, E. J. Kaauwai, haiolelo no Onomea.
Na Elele---Kahoewaa ko Haili, Kailiula ko Onomea, Hakalau a hiki i Kailua me Helani, aole, G. B. Kaloku ko Kona-waena ; Kealakekua, aole; Jno. Keala ko Pukaana, Kaohe a hiki i Waiohinu me Kapaliiuka, aole ; Kalapana me Opihikao, L. K. Kalawe komite, J. K. Kanuha ka elele, Puula S. K. Kenoi ka elele, Olaa S. L. Desha komite, aole elele. Mai ka ekalesia haole mai o Hilo, Dr. Wetemoa ka elele. Nalala mau, O. H.Gulika, J. N. Kamoku, Wm. Kamau, J. S. Kalaua.
Koho ana i na luna nui o ka aha, Ma ke noi a Jno. Kalana, ua kapae ia na rula maa mau, a ua kohoia o Desha i lunahoomalu a me L. K. Kalawe i kakauolelo me 1 balota.
Noi mai o Kamoku e lilo na kahu kula sabati nui, na kahu kula sabati apana, na elele a me na poe haipule kupono e ae, i mau hoa kuka no keia aha, aponoia.
Koho ana i na Komite---1 Komite Imihana. O. H. Gulika, Kamau a me Kamoku.
Na Kamau hoi i waiho a i heluhelu mai i ka hoike hapa o ke komite imihana.
1 Hapa hora haipule.
2 Hoike kihapai.
3 palapala hoopii.
4 Oihana Kuwaho.
5 Oihana Kuloko.
(a) Misiona i na aina e.
(e) Hale kahu, hale halawai, luakini.
(i) Oia kahu.
(o) Kula hanai.
(u) Keiki a ka aha.
(h) Ekalesia kahu ole.
(k) Na hana hoeueu.
(l) Na hana e kulai ana i ka pono.
6 Heluhelu haawina.
7 Komite imi haawina.
8 Ka malama ana i ka Poaha hope o Feberuari i la haipule no na kula.
9 Kahi a me ka wa e noho hou ai keia aha.
Aponoia ka hoike a ke komite.
Hapaiia ka noonoo ana i ka ninau 2 Hoike kihapai ; na ke kakauolelo i ko Pukaana a me kaohe, noi mai o kamau e waihoia keia hoike a hiki i kekahi mahele o ke kumuhana 5, ekalesia kahu ole, aponoia. Na kalawe i ko Kalapana me Opihikao a me ko Puula ; na Desha i ko Haili.
Kumuhana 3, Palapala hoopii, Na ke kakauolelo i heluhelu i ka palapala hoopii a ka wahine kanemake a Rev. D. K. Meheula, no ka aie o ka ekalesia o Kekaha N. Kona, i ka hanai kahu, ma ke noi a Kamau, e kohoia i komite nana e pane aku i ka wahine kanemake, no ka manao haohao o keia aha no ka maopopo ole o ka huina aie, aponoia. Na Kamoku i waiho mai i ka inoa o ke kakauolelo o keia aha, i komite pane aku i ka wahine kanemake no keia mea, hooholoia.
Kumuhana 4, Oihana kuwaho---Hapaiia ka noonoo ana no na dala $550. a ka ahahui paeaina ma Honolulu i hooholo ai no keia mokupuni, noi mai o Kamau, e waihoia keia iloko o ka lima o kekahi komite wae, a na ia komite no e noonoo a mahelehele ae iwaena o na ekalesia pakahi o keia mokupuni, aponoia. Koho ka lunahoomalu i keia komite Wetemoa, Kulika, Kamau, Kaloku, Kenoi, Keala, Kaliula.
Kumuhana 5, Oihana Kuloko---(a) Misiona i na lahui e. Na Guli ka i hoike nui mai i ka hana iwaena o na Iapana, a he mea waiwai no hoi no ka aha ka lohe ana i na mea a pau, i kokua pu ia mai e ka lunakanawai o Puna, a na Desha no na Pukiki, a he nui wale aku na mea maikai i lohe ia, a e hoi aku na kahu me na elele e hooikaika no keia mea ma na ekalesia o lakou. Noi mai ke kakauolelo o ka aha, e hoopanee ia keia halawai a noho hou ma ka hora 9:30 a.m. apopo, apono ia. Hoopaneeia me ka pule a Kamoku.
La Haua 2, Sept. 20, 1895---Halawai hou ka aha ma ka manawa i hoopaneeia, S. L. Desha ka lunahoomalu ma ka noho, weheia na hana me ka himeni a me ka pule a Kawaha. Malamaia ka hapa hora haipule, kaheaia na lala, heluheluia ka moolelo o ka halawai i hala a apono ia.
Hapaiia na hoike komite. Na Dr. Wetemoa ka lunahoomalu o ke komite mahele i na dala $550, a ka ahahui paeaina i hooholo ai ma Honolulu, i ke kau o June, 1895 no ka oihana kuwaho, penei : Haili, Hilo $70, Onomea $10, Hakalau $10, Laupahoehoe $10, Hamakua-hikina $40, Hamakua-waena me komohana $15, S. Kohala $10, Waimea $25, N. Kohala $70, Kohala-komohana $5, Kekaha $30, Kailua me Helani $60, Kona-waena $20, Kealakekua $30, Pukaana $55, Kaohe $5, Milolii $5, Waiohinu me Kapaliiuka $30, Kalapna me Opihikao $40, Puula $10.
Ma ke noi a Jno. Keala e lawe ia ka hoike a ke komite a noonoo, a ua aponoia, a noi hou mai oia e apono loa aku i keia hoike, hooholoia.
Hapaiia ka mahele (e) Hale Kahu Hale Halawai, Luakini. Na Desha i ka hale kahu o Haili, ua hoomaemae hou ia a ua nani loa, a nana no i ka hale halawai o Kalepolepo, ua paa oia.
(i) Ola Kahu---He nui na mea i hoakakaia no keia mea, a ua kauoha ia na elele e hoi aku a hooikaika i keia hana iwaena o na hoahanau ma na ekalesia o lakou.
(o) Kula Hanai---Na Dr.Wetemoa i hoike mai, he $10,000 i hookumu mua ia ma ka waihona o D. P. Lyman i kinohi, a i kokua nui ia mai i keia wa e C. R. Bihopa, no ka pono a me ka pomaikai o ke kula hanai o Hilo, ua kokua pu ia mai e ka lunahoomalu o ka aha a me F. S. Lyman a me na hoa e ae no na mea e pili ana no keia kula i aloha ia, a ua kauohaia na lala a pau e hoi aku a hooikaika e imi i mau keiki hou a hoihoi mai no ke kula hanai o Hilo.
Na F. S. Lyman i hoike mai i ka hana a ke Akua iwaena o aa Pake, ke ala mai nei lakou no ia hana maikai. Noi mai o Kalana, e hoopanee ia keia aha a noho hou ma ka hora 2 p.m. aponoia, hookuuia me ka pule a Gulika. Noho hou ka aha ma ka manawa i hoopaneeia, pule o Jno. Keala.
Hapaiia ka mahele (u) Keiki a ka Aha---Aole.
(h) Ekalesia kahu ole---Ma ka noonoo ana o ka aha, ua hoomauia aku no ka hapanui o na komite e like me mamua, a o J. N. Kamoku oia ke komite no Olaa.
(k) Na hana hoeueu---Na ke kakauolelo i heluhelu i ka hoike a ke komite hoeueu Z. M. Naahumakua, a ma ka noonoo ana o keia aha, ua hoomauia aku no oia i komite hoeueu no na ekalesia pilikia o keia mokupuni.
(l) Na hana e kulai ana i ka pono---He nui na mea i hoakakaia e na hoa no ka haunaele i loaa ma Pohoiki, Puna, ma ka la sabati i ka manawa e ku ai ke Kinau, a mamuli o na hoakaka piha ana a Gulika no ka la sabati, ua paipai pu mai oia : He mea pono no i na hoahanau o Puna, e lokahi lakou e hana i palapala hoopii imua o na ona o kela laina oku ahi, a e hookoia ana no, a ua kauoha pu ia na lala o keia aha, a me na luna ekalesia pu e hoi aku, a e hooikaika e kinai i na hana hoomanamana ma na kihapai o lakou.
Hapaiia ke kumuhana 6, Heluhelu Haawina---Aole.
Hapaiia ke kumuhana 7, Komite imi haawina---Ua hoomauia no kela komite mua.
O ke kumuhana no na kahunapule a pau e hoomakaukau ai no ke kau o Maraki 1896, ma Hookena, S. Kona, aia ma 1 Kor. 1:24, O Kristo no ka mana o ke Akua a me ka ikaika o ke Akua.
Kumuhana 8, Ka malama ana i ka Poaha hope o Feberuari i la haipule no na kula---Hooholoia.
Kumuhana 9, kahi a me ka wa e noho hou ai ka aha---Hooholoia ma Hookena S. Kona, i ke kau o Maraki, A. D. 1896.
Na ka lunahoomalu o ka aha i heluhelu mai he palapala kono na Mrs. Terry kumu poo o ke kula hanai o Hilo, i na lala o ka aha e hui pu aku me lakou ma ka paina luau hoolauna e malamaia ana ma ka hora 12:30 awakea o ka la apopo ma Hilo Boarding School, aponoia.
Waiho mai o W. Kamau, he olelo hooholo, hooholoia : O makou o na lala o ka Ahahui Euanelio o ka mokupuni o Hawaii, ke haawi aku nei makou i ko makou hoomaikai aloha i ka ekalesia o Haili, Hilo, a me na hoaloha e ae no ko lakou hoolako ana mai i na mea e oluolu ai ke ola kino, aponoia. Nana no i noi hou mai e heluhelu ia ka moolelo. Heluheluia a aponoia. Noi hou mai no oia e hoolahaia ka moolelo o keia aha ma ka nupepa Kuokoa, aponoia. Hoopaneeia ka aha me ka himeni a me ka pule a ka lunahoomalu. L. K. KALAWE, Kakauolelo o ka Aha. Puula, Puna, Sept. 28, 1895.
---
Kuu Lei Daimana ua Hala.
Mr. L. H. O KE KUOKOA, Aloha oe :---
Ua hanau ia o Mrs. H. Kalehuamakanoe Kellen ma Haena, Kauai, i Aperila 15, 1870, mai ka puhaka mai o Mrs. Hana Kahikikolo. Ua piha iaia na makahiki he 25 o ke ola ana ma keia ao, a hala aku la ma kela ao mau o na mea a pau e hele aku ai. He kaikamahine oluolu oia me ka puuwai hamama i na mea a pau e kipa aku ana ma kona home. Ua mare ia oia me Ahlo o Waimea, Kauai, i ka 15 o kona mau makahiki, a ua loaa mai ko laua puhaka mai he hookahi keiki, a ma ko na pake ano mau no ka makee i na keikikane, ua lawe malu aku la oia i ke keiki me ka ike ole o ka makuahine a me maua hoi na kupuna, a ua nui paha oia e noho mai nei i Kina, me kona ike ole i ke aho hope loa o kona mama.
Ua kaapuniia e Mrs. H. K. Kellen na mokupuni a pau o Hawaii nei, a na ka lawa ole o ka makemake makaikai, ua lana hou kona manao e ike ia Kaleponi he aina anu. A ma ka Hoikeike Anuanu iho nei, ua hiki aku oia no laila a ike hoi i na mea nani a pau, a i kona hoi ana mai no Hawaii nei, ua hoike mai oia i na mea a pau e pili ana no ia aina. Ua hookahi makahiki a oi kona noho ana i ka hau oki o Kaleponi me kana kane hou Mr. Kellen, a na ka ike o ko laila poe kauka i hai mai e hoi no Hawaii oiai ua nui loa ka ma ʻ i, he mau la helu wale no koe ou a hala aku ma kela ao ; kai no e hala ana.
Ua hanau i Kaleponi he hookahi keiki, ua make e no nae i ka wa i hanau mai ai, a hookahi hoi ana keiki i hanau ai ma Iwilei, Honolulu, a ua make no nae. Ua loaa mai kona puhaka mai he ekolu keiki, a hala wale aku la no oia, menemene wale. Ua hoonaauao ia oia ma na kula olele Enelani like ole, a ma ka nana ana, ua lawa oia ma ia mau mahele nui a pau o ka olelo haole. Ko ai no na mea a pau a ka baibala i hai mai ai. He lepo no oe, a e hoi hou aku no oe i ka lepo, a pela no hoi, Nana no i haawi mai, a Nana i lawe hou aku. E hoomaikai ia Kona inoa. O maua iho no me ke aloha, MR. & MRS. H. KAHIKIKOLO. Haena, Kauai, Sept. 27, 1895.
---
Ka Helu Malama o Hawaii.
---
Kaelo, oia ka malama o Ianuari
Kaulua " " Feberuari
Nana " " Maraki
Welo " " Aperila
Ikiiki " " Mei
Kaaona " " Iune
Hinaiaeleele " " Iulai
Mahoe Mua " " Augate
Mahoe Hope " " Sepatemaba
Ikua " " Okatoba
Welehu " " Novemaba
Makalii " " Dekemaba
O keia ae la maluna ka helu a ka poe lawaia.
Nana, oia ka malama o Ianuari
Welo " " Feberuari
Ikiiki " " Maraki
Hinaiaeleele " " Aperila
Kaaona " " Mei
Mahoe Mua " " Iune
Mahoe Hope " " Iulai
Ikua " " Augate
Welehu " " September
Makalii " " Okatoba
Kaelo " " Novemaba
Kaulua " " Dekemaba
O keia ae la ka helu a ka poe mahiai o Hawaii.
HELU MALAMA O MAUI.
Ikua, oia ka malama o Ianuari
Makalii " " Feberuari
Hinaiaeleele " " Maraki
Kaelo " " Aperila
Kaulua " " Mei
Kaaona " " Iune
Ikiiki " " Iulai
Nana " " Augate
Hilina " " September
Hilinama " " Okatoba
Hilinehu " " Novemaba
Welehu " " Dekemaba
HELU MALAMA O OAHU.
Hilina, oia ka malama o Ianuari
Ikiiki " " Feberuari
Kaaona " " Maraki
Makalii " " Aperila
Hinaiaeleele " " Mei
Mahoe Mua " " Iune
Mahoe Hope " " Iulai
Welehu " " Augate
Hilinehu " " Septem.
Kaulua " " Okatoba
Kaelo " " Novemab
Hilinama " " Dekemab
HELU MALAMA O KAUAI.
Ikiiki, oia ka malama o Ianuari
Kaelo " " Feberuari
Hinaiaeleele " " Maraki
Kaulua " " Aperila
Kaaona " " Mei
Nana " " Iune
Mahoe Mua " " Iulai
Mahoe Hope " " Augate
Welehu " " Sept.
Makalii " " Okatoba
Hilina " " Novemab
Hilinehu " " Dekemab
S. H. P. KALAWAIAOPUNA,
Kalaupapa, Okatoba 3, 1895
---
HOALOHALOHA A KA AHAHUI HOONAAUAO LILIUOKALANI
MAHELE II.
---
Ia Ka Mea Kiekie ke Kamaliiwahine Virginia Poomaikelani.
---
Mahope iho o ka hora 10 o ke awakea Poakahi iho nei, ua hele kino ae ke Komite o ka Ahahui Hoonaauao Liliuokalani Mahele II. imua o ke Alii ka Moiwahine Kanemake a me na Mea Kiekie na Keikialii, ma ka home noho kulanakauhale o ka Moiwahine kanemake ma Honuakaha, no ka waiho ana aku i ka lakou mau olelo hooholo hoalohaloha no ka make ana o ka Mea Kiekie ke Alii Virginia Poomaikalani, ke Kama ʻ lii nana i hoohanohano iho i ka noho Peresidena o ia Ahahui no na kauna makahiki elua a oi. Ua apo aloha ia mai ke komite a hookipaia aku la me ka maikai, ka poe hoi i ku ae a heluhelu aku la i ka olelo hoalohaloha a ka Ahahui malalo iho, penei :
I ke Alii Ka Moiwahine Kanemake Kapiolani a me na Mea Kiekie na Kama ʻ lii kane David Kawananakoaa me Cupid Kalanianaole, Welina :
Oiai, ua oluolu i ke Akua Kiekie Loa ma Kona mana ike ole ia, e lawe aku mai keia ola ana a i ke aupuni uhane ma ke ahiahi o ka Poakolu i hala, Okatoba 2, 1895, ma Kalihi, Honolulu, Mokupuni o Oahu, ia Ka Mea Kiekie ke Alii ke Kama ʻ lii Wahine
VIRGINIA POOMAIKELANI, ka Peresidena o ka Ahahui Hoonaauao Liliuokalani Mahele II. no na makahiki moau he ewalu a oi i hala, o ka hoomanawanui pu ana i ka pulama e hooholo i na hana o ka Ahahui ; nolaila, o makou o na luna a me na iaia o kela Ahahui mao ko makou komite la, me ka luuluu a me ka paumako nui ke hooholo nei :
Akahi. Ke komo pu aku nei ka Ahahui Hoonaauao Liliuokalani Mahele II. me oe e ke Alii ka Moiwahine Kanemake a me na Mea Kiekie na Keikialii iloko o na kumakena ana no kou pokii alii i aloha nui ia a makuahine o na kama ʻ lii, a ke kulou haahaa nei imua o ka Haku nona ke ola ana o na kino a me na uhane me ke noi e hoomama mai i ko oukou mau naau kaumaha a pau.
Alua. E hoounaia i kope o keia olelo hooholo i na nupepa Hawaii a pau o keia kulanakauhale.
O makou iho no o ke Komite o ka Ahahui Hoonaauao Liliuokalani Mahele II. me ka luuluu no ka lawe ia ana aku o ko makou Peresidena,
Kahanuulani Meek,
Carrie Sharratt,
Kahakuwaiaoae Clark,
Keliikaapuni Kawainui,
Kaumealani Kapono,
Hanaia ma Honolulu i ka la 5 o Okatoba, 1895.
Ka Hawaiian Gazette
He Nupepa Namu Elua Puka ana o ka Hebedoma, ma na
POALUA a me POALIMA
e hoopuka ia nei e ka Hui
HAWAIIAN GAZETTE COMPANY.
O ka Nupepa Kuloko Alakai keia ma ka Olelo Beritania e hoolahaia nei maloko o ka Paeaina a hala loa aku i na Aina E a ke heluhelu ia nei e na mea a pau ma na oihana na Halekula a komo loa iloko o na ohana.
Ka Uku Pepa Laulaha.
No ka Malama. . . . . . . . . $ 50
No ka Makahiki Kuloko. . . . . 5.00
" " Kuwaho. . . . . 6.00
Keena Hana Helu 318, Alanui Kalepa.
Pahu Leta O. Honolulu Oahu 2531-tf
Na Hua Kuni Inoa
Eia ka Hui Hawaiian Gazette Co., ke hana paka maoli nei i na Hua Kuni Inoa o kela a me keia ano, nui a liilii e like me ka iini a ka manao.
O keia mau Hua Kuni Inoa, ua lawa ia no ke kahakaha ana ma ke kanana a pepa e ae e hoailona ai i ka Inoa a kohu maluna o kekahi mea i makemake ia e kuni a kaha paha.
He like ole na uku o na Papa Kuni Inoa, no ka mea aia no ke kau ia o ka uku a maopopo ke ano o ka Papa Inoa au i makemake ai, he nui a he liilii paha. Aka he oluolu ka uku a he waipahe na kuka ana.
E kipa kino mai e nana i ike kumaka, a i ole ia e hoouna mai i na kauoha ma ke
Keena Hana-Ma ka Halepai : HAWAIIAN GAZETTE, Helu 318 Alanui Kalepa, Honolulu 2531-tf
Halepai Hawaiian Gazette.
---
O keia ka Halepai Nupepa Alakai o ke Kulanakauhale o Honolulu nei. Ua lako i na Hua Kepau o na ano a pau a ka makemake e ui ae ai.
Eia ma keia Halepai e pai ia nei ka Nupepa KUOKOA, a me Nupepa HAWAIIAN GAZETTE PACIFIC COMMERCIAL ADVERTISER CHURCH CHRONICLE a me PLANTER ʻ S MONTHLY.
Ua hiki loa i keia Halepai ke pai aku i na pepa nunui hoolaha alanui, na buke, na bila kikoo, na bila hookaa, na palapala poloai ahaaina a me na hana e ae a pau o ka oihana pai.
Eia maloko o keia Halepai he Keena Humuhumu Buke, kahi e humu ia ai na Buke, na pepa a me na mea a pau i pili i ka humuhumu ana i na palapala. He oluolu ke kuka ana a he emi kupono na auhau.
Keena Hana, Helu 318 Alanui Kalepa, Honolulu ka Hale iluna. 2531-tf
Hoolaha Humau.
Aole loa e maikai a oluolu ke ola ana o kekahi mea kino uhane ola ina he aaiole kona akepaa a hiki ole ke lawelawe i kana mau hana me ka hololea. E hahai ana ka nalulu a me na nawaliwali e ae ma ka moali o ke ake ponalo. He mea oiaio keia i hooiaio ia ma na wahi o na poai oluolu akau iloko o ka hapaha keneturia, o na
HUALE A AYERS,
oia wale no ka LAAU HOOLA AKE maikai loa i ikeia. E hoola ana i ka lepopaa, ka nalulu eha, na ma ʻ i oloko o ka opu, a ma ke ano LAAU OHANA aohe ona lua e like ai.
O ka Ayers Sasaparila, oia ka Laau Hoomaemae Koko Kilakila, e haawi ai i ka ikaika a me kahooponopono ana ia loko o ke kino o ke o ka ili, e hoopau ana i na maluhilukanaka. E pepehi a ulupa ana i na PUHA, e hoola ana i na pohapohahi o ke ola ana a e kipaku loa ai i na ano ma ʻ i a pau. O ka poe ma;i no ka wali pono ole o ka ai, ka nawaliwali mau a ano ma ʻ i e ae i ulu ae mai ke koko ino mai, he mea pono e inu i ka laau
SASAPARILA A AYERS.
He laau e hooikaika ai i ka nawaliwali, a e hoopuipui mai ai i ke kino. Ma ka inu ana i keia laau, e hoonoono ia ai ka ai ana, oluolu ka moe ana a maikai ke ola ana.
O ka Ayers Cherry Pectoral
laau, aohe lua ma ka hoola awiwi ana i na KUNU, ANU a me na PUU EHA. E hoola ia na KUNU KALEA a me na ma ʻ i pili i ke ake me ka hikiwawe loa.
O na Huaale a Ayers, na sasaparila a me ka Ayers Cherry Pectoral, aia kahi e loaa ai ma ka Halekuai o ka
Hollister Drug Co. Lt.
Na Agena ma ka Paeaina Hawaii. 2514
KAKELA ME KUKE
---
Ka Halekuai Nui
--- O NA ---
WAIWAI LIKE OLE
---
NA MEA
HANA KAMANA AIPAU
Na lako pili hao kukulu hale,
Na kepa,
Na lei ilio,
Na Kaulahao ilio,
Na Pahi,
Na Upa,
Na kope hulu,
Na Pulupulu.
PALAU LIO
Na mea mahiai,
Na au ho,
Na au koi,
Na kua bipi,
Na lei bipi,
Na kaniahao bipi,
Na uwea pa,
Na kaa palala,,
Na mea piula,
Na ipuhao.
Makau me Aho Lawaia
Na Iliwai
Na kaula,
Na hulu pena,
Na pulumi,
Na pena, me ka aila,
Na kopa,
Na aila mahu
Na pakeke
Na pakeke hao,
Na kapu hao,
Na pauda,
Na kukakepele,
Na uwiki, a me
Na ipukukui.
Mikini Humuhuu Kaulana
Wilcox, & Gibbs Hookahi Lopi.
ka Remington, Elua Lopi.
A me na ukana he nui loa, o kela ano me keia ano.
Kakela me Kuke.
2326 q