Ka Nupepa Kuokoa, Volume XXXIV, Number 33, 17 August 1895 — Page 2
| This text was transcribed by: | Phillip M. Arnold |
| This work is dedicated to: | Julia Toomey Arnold Class 1932 |
Ka Nupepa Kuokoa
KE KILOHANA POOKELA NO KA LAHUI HAWAII.
MA KE KAUOHA
KANAWAI 11.
He KANAWAI E PAKUI HOU ANA I HAAWINA NO KE KAU AHAOLELO KUIKAWA O KA REPUBALIKA O KE KAU O 1895
E Hooholoia e ka Ahaolelo o Repubalika o Hawaii:
PAUKU 1. O ka huina malalo ae nei, nona ka huina ekolu tausani ($3,000) e lawe ia mailoko ae o na dala a pau o ka waihona dala i loaa mai na loaa mau mai o ke Aupuni o ke Hawaii Pae Aina i loko o ka manwa e pau ana i ka la kanakolu kumamakahi o Maraki M.H. 1896
AHAOLELO.
Na lilo o ke Senate a me ka hale o ka Poeikoloia.................$3,000.00
PAUKU 2. E lilo keia i Kanawai mai kona ia e hoolahaia ai.
Aponoia i keia la 10 o Augate, M. H. 1895.
(Kakauinoaia) SANFORD B. DOLE
Peresidena o ka Repubalika o Hawaii.
KANAWAI 12.
HE KANAWAI E HOOKUUIA AI NA WAIWAI A PAU O NA HALE LEHULEHU PALAPALA I HOOHUIIA O KA LEHULEHU.
E Hooholoia e ka Ahaolelo o ka Repubalika o Hawaii:
PAUKU 1. O na waiwai a pau oia na waiwai paa a me na waiwai lewa o na Hale Lehulehu Palapala i hoohuiia o ka lehulehu e hookuu loa ia mai na auhau a pau o ke Aupuni.
PAUKU 2. E lilo keia i kanawai mai kona la aku e hoolahaia ai.
Aponoia i keia la o Augate, M.H. 1895
(Kakauinoaia) SANDFORD B. DOLE
Peresidena o ka Repubalika o Hawaii.
KANAWAI 13.
HE KANWAI E HOOPAU AI I KA MOKUNA 41 O NA KANAWAI O KE KAU O 1884 I KAPAIA “HE KANAWAI HOOHOIHOI AI I NA UWEA OLELO MOANA,” MOKUNA 27 O NA KANAWAI O KE KAU O 1887 I KAPAIA “HE KANAWAI E HAWAII AI I KA MANA I KE AUPUNI HAWAII E HANA AELIKE NO KA HANA ANA I NA TELEGARPA ME NA AINA E A MAWAENA O NA MOKUPUNI O KEIA PAE AINA,” MOKUNA 14 O NA KANANAWAI O KE KAU O 1888 I KAPAIA “HE KANAWAI E HAAWI AI I KA MANA I KE AUPUNI HAWAII E HANA AELIKE NO KA HANA ANA I NA UWEA TELEGARPA MOANA UWILA MAWAENA O NA MOKUPUNI O KEIA PAE AINA,” A ME KA MOKUNA 70 O NA KANAWAI O KE KAU O 1890 I KAPAIA “HE KANAWAI E HAAWI ANA I KA MANA I KE AUPUNI HAWAII E HANA AELIKE AKU NO KA HANA ANA A MALAMA ANA I NA UWEA TELEGRAPA MOANA.”
E Hoolohoia e ka Ahaolelo o ka Repubalika o Hawaii
PAUKU 1. O ka Mokuna 41 o na kanawai o ke Kau o 1884 i kapaia “He Kanawai e hoohoihoi ai i na Uwea Olelo Moana;” Mokuna 27 o na Kanawai of ke Kau o 1887, i kapaia “He Kanawai e haawi ai i ka Mana i ke Aupuni Hawaii e hana aelike no ka hana ana i na Uwea Telagarapa me na Aina E, a mawaena o na Mokupuni o keia Pae Aina;” Mokuna 14 o na Kanawai o ke Kau o 1888 i kapaia “He kanawai e haawi ai i ka Mana i ke Aupuni Hawaii e hana aelike no ka hana ana i na Uwea Telegarapa Moana Uwila mawaena o na Mokupuni o keia Pae Aina;” a me ka Mokuna 70 o na Kanawai o ke Kau o 1890 “He Kanawai e haawi ana i ka mana i ke Aupuni Hawaii e hana aelikeaku no ka no ka hana ana a malama ana i ka Uwea Telegarapa Moana;” ma keia ke hoopau loa ia nei.
PAUKU 2. E mana keia kanawai mai kona la aku e apono ia ai.
Aponoia i keia la 10 o Augate, M. H. 1885.
(Kakauinoaia) SANFORD B. DOLE
Peresidena o ka Repubalika o Hawaii.
Ua hookohuia o Mr. C. B. Wells i keia la i lala no ka papa Alanui o ka Apana Auhau o Wailuku mokupuni o Maui, ma kahi o G. P. Wilder i waiho mai.
Eia ka Papa i keia wa:
L. A. Andrews
M. P. Waiwaiole
C. B. Wells.
J. A. King
Kuhina Kalaaina
Keena Kalaaina, Augate 3, 1895
2558-3
_______________________________________________
Ua hookohuia i keia la, o M. F. Scott a me W. W. Wait, i mau hoa no ka papa Alanui, no ka Apana Auhau o kona akau Mokupuni o Hawaii, ma kahi o W. D. McWayne a me D. Makainai i waiho mai
Eia ka Papa a i keia wa:
George Clark, Lunahoomalu
M. M. Scott
W.W. Wait.
J. A. King
Kuhina Kalaaina
Keena Kalaaina, Julai 31, 1895
2557-3
______________________________________________
Ua hookohuia o A. WHEYTDMANN i keia la i Notari no ka Lehulehu no ka Apana Hookolokolo Kapuni Ekolu no ko Hawaii Paeaina.
J. A. King
Kuhina Kalaaina
Keena Kalaaina, Julai 31, 1895
2557-3
___________________
Ua hoopukaia i keia la keia mau hookohu malalo iho maloko o ka mahele o ka Loio Kuhina:
O ARTHUR M. BROWN Esq. Ilamuku ma kahi o Edward G. Hitchcock Esq. i waiho mai
O EDWARD G. HITCHCOCK Esq. i Maikai nui no ka Mokupuni o Hawaii ma kahi o George H. William Esq. i waiho mai.
WILLIAM O. SMITH
Loio Kuhina.
Honolulu, Hawaii Augate 1, 1895 2557-3
__________________________________________
Aha hookolokolo Kaapuni Apana Eha o ko Hawaii Pae Aina. Ma ka hana o ka waiwai o R. P. Kuikahi i make o Hamakua, Hawaii, a noi ana e apono ia ua hoolilo he $1,717.39 mai loko mai o na dola he $1,717.39 i loaa iaia, a e nei ana e nana a aponoia keia mau mea a e kamehaia e mahele i ka waiwai i koi e paa nei iaia i ka poe kuleana, a e hookuu iaia a me kona mau hope mai ko lakou noho lunahooponopono ana.
Ke kauohaia nei o ka POALIMA, la 30 o Sepatemaba. A. D. 1895, hora 10 a.m. imua oia lunakanawai ma ke Keena, ma ka Hale Hookolokolo ma Hilo, Hawaii, oia kahi a me ka manawa i kohoia no ka hoolohe ana i na noi ia a me ka papa hoi (?)__ waiwai, a mailala a ma ia wa e hele mai ai ka poe a pau i kuleana e hoike mai ina he kumu kokahi e noolu ia ai ma noi la, a e hoike mai ai i ka poe i kuleana i na waiwai ia.
Kakauia ma Hilo, Augate 9, 1895.
Me ka Aha:
Daniel Porter
Kakauolelo 2559-3
___________________________________________________
(Kolamu Elua)
Aha hookolokolo Kaapuni Apana elua o ko Hawaii Pae Aina. Ma ka hooponopono waiwai. Ma ka hana o ka waiwai o Luka (w), Makalena (k), Palena (k), Makanahelehele (k), Kaiuli (k), Ikoa (k), Kaahaaina (k), Kuanea (k), Kekua (k), Hoopii (k), a me Kalama (k) i make kauoha ole. Ma ke Keena imua o Hon. J. W. Kalua Lunakanawai.
Ma ka helukelu a me ka waihoia ana mai o ka palapala noi a ikaaka Kuluhiwa (k) e hoike ana ua make kauoha ole na poe i oleloia maluna no Keanae, ma Keanae, i ka la ________ o ________ 189_, a e noi ana e hooholoia ka waiwai i na Hooilina a e hoonohoia i Komosina.
Ua kauohaia o ka POAHA keia 19 o SEPATEMABA, M. H. 1895, ma ka hora 10 kakahiaka, oia ka manawa i kohoia no ka hoolohe ana i ua noi ia imua o ua Lunakanawai ia, ma ka Hale Hookolokolo ma Wailuku, a ma ia manawa a ma ia wahi no e hele mai ai na mea a pau i pili e hoike mai i ke kumu, ina he kumu oiaio ko lakou e ae ole ia ai ua noi ia.
Kakauia ma Wailuku, ko Hawaii Pae Aina, Aug. 12, M. H. 1896
Na ka Aha:
G. Armstrong
Kakauoleloo ka Aha Kaapuni Apana Elua
2559-3
______________________________________________________
Aha Hookolokolo Kaapuni Apana Eha o ko Hawaii Pae Aina. Ma ka hana o ke Kahu Malama Waiwai o Kawailepolepo Kuikahi keiki oo ole o Hamakua, Hawaii.
Ma ka heluhelu a me ka waiho ia ana mai o ka palapala noia me ka Papa Hoike Helu a Wm. Horner. Kahu Malama o ka waiwai o Kawailepolepo Kuikahi, e noi ana e aponoia na hoolilo he $1,018.42 mailoko mai o na dala he $1,069.87 i loaa iaia, a e noi ana e nana a aponoia kela mau mea, a o kauohaia e mahele i ka waiwai e paa nei iaia i ka poe kuleana, a e hookuu iaia a me kona mau hope mai ka noho Malama.
Ke kauohaia nei, o ka POALIMA, la 20 o SEPATEMABA, A. D. 1895, hora 10 a.m. imua o ia Lunakanawai ma ke keena, ma ka Hale Hookolokolo ma Hilo, Hawaii, oia kahi a me ka manawa i kohoia no ka hoolohe ana i ua noi ia a me ka helu waiwai, a malaila a ma ia wa e hele mai ai ka poe a pau i kuleana e hoike mai, ina he kumu ka lakou e ae ole ia ai ua noi ia, a e hoike mai i ka poe i kuleana i ua waiwai la.
Kakauia ma Hilo, Hawaii, Augate 8, 1895.
Na ka Aha:
Daniel Porter
Kakauolelo 2559-3
________________________________________________________
Aha Hookolokolo Kaapuni Apana Eha o ko Hawaii Pae Aina. Ma ka hana o ka waiwai o Ana, Kana a me Kamaka, he mau keiki oo ole o Kohala Akau.
Ma ka heluhelu a me ka waiho ana mai o ka palapala noi a me ka papa hoike helu o Neil Campbell me o Emalia Campbell ia kana wahine o Kahala Akau, ke kahu malama o Ana, Kama a me Kamaka e noi mai ana e aponoia na hoolilo he $76.00 mailoko mai o na dola he $62.40 i loaa iaia, a e noi ana, e nana ia a aponoia keia mau mea, a e kauohaia e mahele i ka waiwai e paa nei i kona lima i ka poe i kuleana a e hookuu iaia a me kona poe hope ka noho ana malama.
Ke kauohaia nei, o ka POAONO, la 5 o OKATOBA, A. D., 1895, hora 10a.m. imua oia Lunakanawai ma ke keena, ma ka Hale Hookolokolo ma Kohala Akau, Hawaii, oia kahi a me ka manawa i kohoia no ka hoolohe ana i ua noi ia a me ka helu waiwai, a malaila a ma ia wa e hele mai ai ka poe a pau i kuleana e hoike mai, ina ke kumu ka lakou e ae ole ia ai ua noi la, a e hoike maii ka poe i kuleana i ua waiwai la.
Kakauia ma Hilo, Hawaii, Augate 5, 1895.
Na ka Aha:
Daniel Porter
Kakauolelo
2559-3
____________________________________________________________
[ Please check dates below – dates are blurred. There’s a discrepancy]
Aha Hookolokolo Kaapuni Apana Ekahi o ko Hawaii Pae Aina. Ma ka hana o ka waiwai o Hannah Kukona O Honolulu, Oahu, i make kauoha ole.
Ma ka heluhelu a me ka waiho ana mai o ka palapala noi a Benjamin Kaluna o Honolulu, e olelo ana ua make kauoha ole o Hannah Kukona o Honolulu, ma Honolulu, ma ka la 11 o Dekemaba, A. D. 1896 , a e nai ana e hoopukaia na palapala Lunahooponopono waiwai ia A. B. Halola.
Ke kanohaia nei, o ka Poalima, la 30 o Augate, A. D. 1895 , hora 10 a.m. oia ka manawa i kohoia no ka hoolohe anai ua palapala noi la me ke keena Hookolokolo o keia Aha ma Honolulu, a me ia manawa a me ia wahi e hele mai ai na mea a pau i pili e hoike mai ina ke kumu kekahi e ae ole ia ai ua noi la.
Kakauia ma Honolulu,Aug. 1, 1895
Na ka Aha:
Charles F. Peterson
Kakauolelo
2557-3
(Kolamu Ekolu)
KA
NUPEPA KUOKOA
_______________#________________
KO HAWAII PAEAINA I HUIIA
O Ka Makahiki ......................................... $2.00
No Eono Mahina ................................... 1.00
Kuike Ka Rula
_________________________#________________________
HOOPUKALA I KA
PUKA} 1 2 3 4 5 6
Ana} Pule Pule Pule Pule Pule Pule
_____________________________________________________________________________
_____________________________________________________________________________
INIHA $1.50 $2.00 $2.50 $3.00 $3.50 $4.00
2 INIHA $2.00 $2.75 $3.50 $4.00 $4.50 $5.00
3 INIHA $2.50 $3.50 $4.50 $5.00 $5.50 $6.00
4 INIHA $3.00 $4.00 $5.00 $6.00 $6.75 $7.50
5 INIHA $3.50 $4.75 $6.00 $7.00 $8.00 $9.00
6 INIHA $4.00 $5.50 $7.00 $8.00 $9.00 $10.00
------> O na Olelo Hoolala a pau e hoouna ia mai ana no ka Hoolala maloko o keia Nupepa, e hoouna pu mai me ka auhau, a ina aole, aohe hookomo ia.
_____________________________________________________
HAWAIIAN GAZETTE CO.
GEO. H. PARIS, Luna Nui
J. U. KAWAINUI, Luna Hooponopono
No Honolulu, Oahu, Lakou a pau
___________________________________________________________________________
___________________________________________________________________________
POAONO, .............................. Augate 17, 1895
___________________________________________________________________________
___________________________________________________________________________
Aponoia Hawaii e Beritania Nui
Ua loaa mai i ka ManaHooko o ka Repubalika o Hawaiii ka Poaono aku nei i hala, mai ke Komisiona Beritania Hawes mai, ko Beritania Nui elele i hoohanohano mai ai e noho kokoke ma ke kulanakauhale poo aupuni o Hawaii, he palapala koikoi e hoike ana, ke ike aku nei ke Aupuni o Beritania Nui i ka pololei o ke koi a ka Repubalika o Hawaii e hoole ana aole he mau kupa Beritania o W. H. Richard a m e T. B. Walker, aka he mau kupa Hawaii laua a no ia mea aohe o ke Aupuni o Beritania kuleana kupono i ka laua mau koi i ke Aupuni liona e komo aku ai e keakea no laua.
He hulu manu keokeo nui launa ole keia e popohe nei i ka papale kapu o ke kuka kilo aupuni ana a ka Repubalika, a he lanakila maopopo hoi no ke Aupuni Hawaii, a ka lahui e ike mai aii ka lawelawe ia o na hana kuwaho o ka aina me ka pololei, ke kuoo a me ka wikani. A o ka makou mea mahalo loa, iloko o keia wa e holo nei keia mau koi, ua oia mau no ka noho launa oluolu ana o na aupuni a elua, he haawina kamahao a ka Repubalika e haaheo ai.
____________________________________
____________________________________
Aia i Kaupoku o Hanalei
O kekahi o na mea koikoi loa i loaa mai i ka Mana Hooko o ka Repubalika o Hawaii i ka la 14 o Augate nei, oia ko ke Komisina Beritania Hawes panee hou ana mai i ka palapala a ke Keena o ko na aina e o Bereitania Nui no na mea e pili ana i ka hoehu hookahuli aupuni a na anee alii iloko o Ianuari i hala, ko na kipi hookolokolo a me hoopai ia anae ka Aha Koa.
Ua noonoo akahele iho na alakai kanawai o ke kalaunu i na moolelo o ka hookolokolo ia ana. A o ka manao o keia poe ike kanawai i hoike aku ai i ke Keena o kon aina e, oia ka hoapono ana, ua pololei a maua ka hana a ka aha hookolokolo koa o ka Repubalika malalo o na kanawai o Hawaii. Me ka pakui pu mai o na alakai kanawai , ua loaa a haawi ia i ka poe kipi na hookolokolo ana maikai.
O kahi kinaunau waleno, oia na oleloike i lawe ia e kue ia V. V. Ashford, no ka mea aole i koikoi e kupono ai ke hoopai ia. No ka mea, o ka hapanui o na oleloike, na ka poe no i komo pu a i ae i ko lakou hewa. Oia hihia wale no kai nema ia a e pono ai ke noi aku e kapae no.
Ua kuikahi keia olelo hooholo me ka noonoo o ka Aha Kiekie o Hawaii nei ma na mea pili ia mea hookahi.
Ke lohe hou ia mai nei, ua hoole ke Aupuni o Beritania Nui, aole e komo mai e keakea ma ke koi a Johnstone, kala haole kiu i kipaku pu ia ai me Cranston.
Ke hapai ia mai nei na hana a ka Repubalika he mau hana e haaheo ai no ka lahui a me ka aina no ka pololei o ka lakou mau hookele a lawelawe oihana pili aupuni ana, a o ka oi loa aku hoi i ka wa a na [ulu....?] a me na hookui ana ma o a maanei o ke aupuni. Eia nae, ua ku iho na hookele o ke aupuni me ke kuoo a noonoo naauao e loaa nei na mahaloia ia lakou. Ola ka alua o keia hookele!
(Kolamu Eha)
Ka Waeaolelo e hui ai o Hawaii me ke Ao Holookoa
Ua hana ia a kakau inoa ia he aelike ma ka la 12 o Augate, mawaena o Sanford Ballard Dole, Presidena o ka Repubalika o Hawaii, ma ka inoa o ke aupuni, me ka ae pu o ka Aha Kuhins, o ka aoao mua, a me Zephaniah Swift Spaulding, o ka aoao elua, ka mea hana aelike, no ka hana, hoomoe a me ka malama ana waeaolelo moe moana mai kekahi wahi ma Kaleponi a hiki i Honolulu nei. Me ka hoomoe pu i waeaolelo kuloko ma ka aina a ma ke kai mai kahi kokoke i Kawaihae, Hawaii, a i Nuu ma Maui; ma ka aina mai a i Napili ma Maui Komohana; moe ma ke kai i hoea i Pukoo ma Molokai, komo ma ke kai a hoea i Waikiki ma Oahu; ma ka aina a hiki i Waianae, alaila lau me ka kai a hoea i kahi kokoke i Nawiliwili ma Kauai.
Ua ae aku ke aupuni e haawi i keia mau pomaikai malalo iho i ka mea nona ka aoao elua, penei:
(1) Ka pono kaokaoo ka hoomoe waeaolelo ana a hoopae ana mai maluna o na mokupuni o Hawaii, no ka manawa he iwakalua makahiki, e hoomaka ana mai Novemaba ekahi 1895 aku, ke paa a hooholo ia na elele waeaolelo ma ia wa. Aole nae keia haawi ana he mea ke keakea aku ai i na pono kuikahi i haawi ia i kekahi mau aupuni kuwaho e Hawaii.
(2) E uku ke aupuni i $40,000 uku kokua i ka makahiki no ka waea kuwaho a me kuloko, ma ka $10,000 o ka hapaha makahiki. Aka aole e loaa keia pono kaokoa a me keia uku kokua ala a hoomaka ia ka hana ana i ka waeaolelo a paa mamua ae a ma ka la 1 o Novemaba , 1897. A aole no hoi e loaa keia mau pomaikia ala a komo pu o Amerika Huipuia i ke kokua dala pu ana.
(3) Ke ae hou nei ke Aupuni i ka hoomoe ana i na waeaolelo maluna o na aina aupuni, a e kukulu i mau kahua maluna o ia mau aina; e hookuu wale i na date o na waiwa no ka waeaolelo; e hookuu ia na auhau; e hookuu wale ia na uku o ke awa. O keia mau pomaikai e haawia nei, no ka manawa he iwakalua makahiki.
Eia na pomaikai o kela a me keia ano:
(a) E hoopaa mai ka aoao elua ma ka waiho ana mai me ke Kuhina Waiwai he $25,000 ma na Bona Hawaii. Eia ke ano, ina ua hoomaka ia ka hana o ka waeaolelo a mamuli o kekahi kumu aloe i paa loa maloko mai o ka manawa i aelike ia, alaila e lilo loa keia puu dola hoopaa i ke Aupini. Aka ina mamua ae o ka la 1 o Mei, 1897, ua hoopau mai ka aoao elua i ka hooko ana i ka aelike, alaila e hoihoi hou ia no keia puu dala .
(e) Ina hoi ua hoomoe ia ka waeakuloko a paa, a ua makemake ke Aupuni e kuai a lilo nona, alaila o na lilo ponoi wale no ka ke Aupuni e uku aku ai, a e hoike aku nae ke Aupuni ia makemake ona iloko o ka makahiki hookahi mahope o ka paa ana. A ua ae pu ka aoao elua e hoohana wale ia ka mokuahi hoomoe waeaolelo no ka hana ana i ka waeaolelo poino, a o ka mea wale no e uku ai o na lilo ponoi o ia kapili ana.
(i) E hoouna wale ia na elele waeaolelo a ke Aupuni a mai na luna aupuni mai paha maloko o na waeaolelo, me ka uku ole a hiki i ke $40,000 a ka makahiki. A o ka mea oi aku kela, e uku kr Aupuni e like me ko ka poe e ae.
(o) O ka uku o ka huaolelo hookahi e hoouma ai maloko o ka waeaolelo kuloko, aole e oi aku i ka 10 keneta; aole nae e hookikina ia na hoouna ana no na elele waeaolelo i emi iho ka nui malalo o ke dala hookahi.
(u) O na uku mea hou o na nupepa, aole e oi aku i ka hapalua o ka uku huaolelo mau. Aole nae e hookikinaia ka hoeuna ana i na elele waeaolelo nupepa i emi iho ka nui malalo o ka hookahi dola.
(h) O na uku o na elele waea no ka huaolelo hookahi e hooanaia ai maloko o ka waeaolelo kuwaho mawaena o Honolulu a me Kapalakiko aia ma ka mea hoomoe waeaolelo Amerika Huipuia.
(j) In mahope o ka pua ana o ka waeaolelo a hooholoia na huaolelo, ua hiki ole ke hoohanaia ka waeaolelo mawaena o Honolulu a me Kapalakiko mamuli o kekahi kula, no ka manawa he kanaiwa la, alaila e hoolawe ke Aupuni i ka uku kupono no ia manawa ma ka hapaha o ke $80,060 (30,060?) . Ina hoi no ka waeaolelo kuloko ia poino a hala ia manawa he kanaiwa la, alaila e hoolawe me ke Aupuni i ka uku kupono no ia manawa ma ka hapaha o ka $10,000.
He hapa kenturia a keu na makahiki a kakou i kali hoomanawanui ai no ka pae mai ona waeaolelo ma Hawaii nei, me ka haawi pu aku kekahi poe [ i na ] pomaikai
[Kolamu Elima]
kaokoa, na kokua uku dola a me na hoohoihoi ana a pau, aka aole nae i pae iki mai kala mea nui iloko o ko kakou ake loihi ana. Eia hoi o Mr. Splading, kekahi kamaaina kuonoonoo Hawaii i noho aku nei ma na aina e he mau makahiki a hoi mai nei e hoeueu i keia hana e hoohui ai ia kakaou o ke kikowaena o ka Pakipika me ko ke ao [ae?] nei aupuni, a e kamailio i ka imo ana a ka maka a e ike me kakoui na mea a pau e hana ia ana ma na welelau o ka honua.
Ua hiki hou ole ia kakou hoapaapa hou aku i keia iini nui o kakou ka poe e ola ana i ke au a ka naauao i hopi kelakela loa ia. Nolaila, ke mahamaha ae nei ke KUOKOA, e hele aku o Mr. Spalding imua me keia hana nui, a e hoohikiwawe mai i ka hoomoe ana i ka waeaolelo a pae i ka Paredaiso nei o ka Pakepika.
__________________________________
Hoopaa Dala no Ka Aelike Hana Waeaolelo
Ma ke kakahiaka o ka Poakolu iho nei, ua waiho ae o Col. Z. S. Spalding me ke Keena Waiwai he, $25,000 o na Bona Aupuni Hawaii no kona hhoko ana i ka Aelike Hoomoe Waeaolelo Pakipika mawaena o Kaleponi a me Honolulu. E lilo wale keia puu dala nui i ke Aupuni Hawaii, a e hoihoi ma ke ano loaa aupuni, ke hooko ole oia i na olelo o ka aelike mawaena o ke Aupuni Hawaii a me ia no no ka hoomoe ana i ka waeaolelo moana a ke aupuni i hawaii ai i ka pono kaokoa no iwakalua mau makahiki ka loihi a me ka uku pu aku iaia he $40,000 e ka makahiki, ke paa na waeaolelo elua iloko o ka manawa i aelike ia a hoohanaia.
Mamua ae nei, ua haawi aku kakou i na aelike hoomoe waeaolelo i kekahi poe hui e aku, me na hoohoihoi a pau ma ko kakou aoao no ka hoomoe ia mai o keia mea mea nui a kakou i kuko a moeuhane mau ai, aka, aole nae i hana ia e like me keia kekahi hoopaa mai ma ka aoao o ka poe hana aelike mai me kakou. O ko kakou ake a meomeo nui i keia wa naauao loa o ke ao nei i hooku olohelohe ia ai kakou mai ka launa ana me ko ka honua holookoa iloko o ka imo ana a ka maka, o ka loaa ia kakou o keia mea kupanaha nana e hoohui nei i na aina a me na lahui i mamao mai a Hawaii aku. Nolaila, o ka makou ka hoahoa, e hiki io mai keia mea nui i ko kakou wa e ola ana.
____________________________________
Laina Mokuahi Oregona me Asia
I ke kakahiaka nui wale hora 4 o ka la 12 o Augate nei, ua komo mai la ka mokuahi Asloun o ka Laina Mokuahi hou e hooholo ia nei mawaena Potalana, Oregona ma Amerika Huipuia a me na aina Kahiko ma Asia, me ke kipa ma Honolulu nei ma ka holo ana mai a me ka hoi ana. He mokuahi nui elua kia keia nona na tona he 2828. Ke aumeume nei keia mau laina mokuahi nunui a waiwai i ke kalepa o ka moana Pakipika nei, no ka halihali ana i na waiwai kalepa a me na ohua mai kekahi aina puni ole a i kekahi. Ua hali mai oia no Honolulu nei he mau haneri tona ukana, a no na aina kahiko aku o Asia he ahua nui okoa. Ma ke kakahiaka Poalua iho nei, ua holo aku keia mokuahi no Iapana a me Kina.
____________________________________
Ka Mokukaua Amerika Olympia a Halulu iho
Ua loaa mai he leta makamaka i Honolulu nei, na ke Kapena o ka pualikoa marina o ka mokukaua Amerika Piladelapia i ku loihi iho ai i Honolulu nei a hoi aku ia i Kapalakiko e kapili hou i na hemahema, e olelo ana, o ka Poalua, Augate 20, oia ka la a ka mokukaua Amerika hou nani Olympiae haalele ai i ke awa o Kapalakiko a holo no Kina. Aka no ka makemake o Kapena J. J. Read, kono alii moku kiekie, o ka holo mama a ku i Honolulu nei iloko o ka manawa i emi iho i ka hebeloma hookahi – nolaila, ke upu ia aku nei e ku mai ana oia i na wa a pau mahope iho o o ka la 25 o Augate. E holo ana keia mokukaua nani e hui me na manuwa Amerika ma ka mahele o ke kai o Kima, e lilo i mokukaua lawe hae no ka Adimarala Amerika o ia aumoku, a o ka mokukaua lawe hae Balatimoa, e hoihoi ia ae ana e kapili hou ma ka pa kapili mokukaua ma Kapalakiko.
________________________________________
Ua apono aku ka Ahakuka o ke Aupuni i ka hoomaikeike manao a ka Maua Hooko, e huikala kumu aku ia W. H. C. Greig a me Louis Marshall, kekahi o na paahao kalaiaina i komo kukonukonu iloko o ka hoehu hookahuli aupuni o Ianuari aku nei i hala, a i hoopai koikoi ia e ka Aha Koa. O keia mau paahao, he omaimai mau, a eia laua iloko o ka Halemai Moiwahine e lapaau ia nei he mau hebedoma aenei. Eia ka manao kumu o keia huikala ana, e haalele laua i ka aina me ka hoi hou ole mai.
(Kolamu Eono)
Make Ana o Kauka Kamika
Ua hala aku i ka make keia kulanakauhale, i ka wa a na moa e oluwalu ana ke oo i ka wehewehena kai no o ka Poaono i hala, Augate 10, Kauak J. Mott Smith (Kauka Kamika), kekahi o na kamaaina o Hawaii nei, mahope o ka hoomailo ana a ka mai no kekahi mau malama me ka ehaeha. Ua hanau ia o Kaua kamika he Amerika ma Nu Ioka i ka 1824, nolaila ua 71 ka nui o kona mau makahiki o ke ola ana ma keia honua. He kauka huki niho kana oihana i ao ai i kona mau la; a ua lawelawe ia oihana no ekolu makahiki ma kona aina.
Ua haalele oia i ka aina a maau ae i ka wa e hu ana ke gula o Kaleponi, a ike no hoi i ka hele ana o na pomaikai o ko Kaleponi poe i hiki mua ae. Ua holo loa mai oia i Honolulu nei i ka 1850, a i ka 1851 ae, ua wehe oia i kana oihana huki niho Monikahaae iluna o ka hale laau ma ke kihi hikina o na huina alanui Papu a me Hotele. No kona hiki ana mai hookahi wale no me ka makaukau ma ia hana, ua holomua oia a kuonoono. Ua hoomahuahua aku oia i kona imi pomaikai ana ma ke komo ana iloko o o na hui mahiko me ka holopono.
Ua pii o Kauka Kamika mai ka noho lunahooponopono a i ke Kuina Waiwai i ke ao o Kamehameha V., a ua noho ma ia oihana o ka hilinai ia no kekahi mau makahiki me Mr. Harris. I ka pau ana o noho’na kuhina, ua holo oia i Amerika Huipuia e noho ai ma ke ano kokua ia Kuhina noho E. H. Allen, aka no ka ike ole ia mai e ke Aupuni o Amerika Huipuia o ia ano hana, ua kaapa wale no oia malaila no kekahi mau makahiki.
I ka make ana o H. A. P. Carter ke Kuhina Hawaii ma Wasinetona, Ua hookohu ia oia ma ia kulana kiekie a hiki i ka wa o ke aupuni alii i hookahuli ia ai ma o ko Liliuokalnai puni wale i na alakai hewa, ua hookohu ia ae o Kakina e pani ma ia hakahaka.
Ua hoi mai i Hawaiinei i kela makahiki aku nei, noho a make aku la. Ua waiho iho oia mahope nei, he kokoolua he wahine, he eha mau kaikamahine a me ekolu mau keikikane. He makamaka oiaio oia no Hawaii nei.
Ma ka hora 2:30 auina la Sabati aku nei i hala, ua manele ia aku kona kino kupapau mai ka halepule Bihopa aku e ka huakai nui o na makamaka a me na hoaloha a kanu ia aku ia ma ka ilina o Maemae. O na poe i hoohanohano aku e hapai i kona pahu, o na hoaloha S. M. Damon, J.O. Carter, W. F. Allen, J.H. Paty, F. A. Scheafer, Allen Herbert, A. S. Hartwell a me B. F. Dillingham.
___________________________________________
He Kamaaima Kuonoono
I ka make ana aku nei o Kauka J. Moyy Smith, ua waiho oia mahope nei he palapala hooilina a me ka waiwai nui i koho ia kona waiwai io aia ma kahi o ka $339, 750 ka huina, a penei ka hoomaopopo ana:
Pahale ma Nuuanu ................................... $10,000
Halekuaime ka aina ma Monika-
haae............................................... 15,000
Lako hale ma Honolulu ........................... 600
Na mahele kopaa ..................................... 162,000
Na Bona ................................................... 83,100
Na aie i hoopaa ia ma ka moraki ............. 26,600
Lako hale ma Bosetona ........................... 5,000
Na kuleana mahele .................................. 30,300
Na nota aie ............................................... 7,150
Huina.................... $339,750
Ma ka palapala kauoha , ua hooili oia i keia waiwai nui e mahelehele like ia mawaena o ka wahine a me na keiki ehiku, mahope o ka hooili ana i kona kaikuahine ia Mrs. Amanda Day Munson, he $10,000; i ka wahine kanemake a kona hoahanau i make, he $3,000; i kona pokii ia Aaugustus B. Smith, he $2,000. O ka wahine a me na keiki iho la no na lunahooko kauohe, a e lawelawe lakou me ka bona ole. Ua waiho ia ae ka palapala kauoha imua o ka Aha Kaapuni no ka hooiaio ia.
_____________________________________________
Ke pii mau aku nei ka makaikai o Waianae mahope mai nei o ka hiki loa ana aku nei o ke alahao a hiki ilaila. O na la Poaono a me Sabati na ia oi loa o ka makahehi ia e hele, a oia no hoi na la emi loa o ka uku kaa. E holo mau ana he puulu a he puali okoa a moe i Waianae i ke ahiahi Poaono, a ma ke ahiahi Sabati e hoi mai ai. Eia hoi kekahi wahi hoomaha lawaia e hoomaa ia nei i hope mai iwaean ulu kiawe, a e lilo aku ana i wahi lawaia no kamahele.
________________________
Ua hala aku nei o Peresidena Wight o ka Hui Hooholo Mokuahi o Waila no Kapalakiko no ka paipai ana i ke poo o kekahi laina hooholo mokuahi pili aina hou i lono wale ia e hooholo ia ana ma na awa a ka mokuahi Kinau e holoholo nei mai Honolulu aku a Hilo. Aka o ka mea oiaio, ua haawi ia mai i ka Hui o T. H. Davies & Co. he mokuahi na lakou e kuai aku i na hui mokuahi kuloko o kakou. Aole i liloi ke kuai ia i keia wa, aka ua hele ia aku la nae e kiu.
(Kolamu Ehiku)
Ka Hawaiian Gazette
He Nupepa Namu Elua Puka ana o ka Hebedoma, ma na
POALUA a me POALIMA
E hoopuka ia nei e ka hui
HAWAIIAN
GAZETTE
COMPANY.
O ka Nupepa Kuloko Alakai keia ma ka Olelo Beritania e hoolahaia nei maloko o ka Paeaina a hala loa aku i na aina E a ke heluhelu ia nei e na mea a pau ma na oihana na Halekula a komo loa iloko o na ohana.
Ka Uku Pepa Laulaha
No Ka Malama ..................................................... $ .50
No Ka Makahiki Kuloko ...................................... 5.00
“ “ “ Kuwaho ................................... 6.00
Keena Hana Helu 318
Alanui Kalepa.
Pahu Leta O. Honolulu Pahu
2531-tf
_______________________________________________________________________
Halepai
Hawaiian
Gazette.
O keia ka Halepai Nupepa Alakai o ke Kulanakauhale o Honolulu nei. Ua lako i na Hua Kepau o na ano a pau a ka makemake e ui ae ai.
Eia ma keia ka Halepai e pai ia nei ka Nupepa KUOKOA, a me Nupepa HAWAIIAN GAZETTE PACIFIC COMMERCIAL ADVERTISER CHURCH CHRONICLE a me PLANTER’S MONTHLY.
Ua hiki loa i keia Halepai ke pai aku i na pepa nunui hoolaha alanui, na buke, na bila kikoo, na bila hookaa, na palapala poloai ahaaina a me na hana e ae a pau o ka oihana pai.
Eia maloko o keia Halepai he KeenaHumuhumu Buke, kahi e humu ia ai na Buke, na pepa a me na mea a pau i pili i ka humuhumu ana i na palapala. He oluolu ke kuka ana a he emi kupono na auhau.
Keena Hana, Helu 318 Alanui Kalepa, Honolulu,
Ka Hale iluna.
2531-tf
_____________________________________________________________
Na Hua
Kuni
Inoa
[picture of a name stamp]
Eia ka Hui Hawaiian Gazette Co., ke hana paka maoli nei i na Hui Kuni Inoa o kela a me keia ano, nuia liilii e like me ka iini a ka manao.
O keia mau Hua Kuni Inoa, ua lawa ia no ke kahakaha ana ma ke kanana a pepa e ae e hoailona ai i ka Inoa a kohu maluna o kekahi mea i makemake ia e kuni a kaha paha.
He like ole na uku o na Papa Kuni Inoa, no ka mea aia no ke kau ia o ka uku a maopopo ke ano o ke Papa Inoa au i makemake ai, he nui a he liilii paha. Aka ke oluolu ka uku a he waipahe na kuka ana.
E kipa kino mai e nana i ike ku maka, a i ole ia e hoouna mai i na kauoha ma ke
Keena Hana, ma ka Halepai,
HAWAIIAN GAZETTE,
Helu 318, Alanui Kalepa, Honolulu,
2531-tf