Ka Nupepa Kuokoa, Volume XXXIV, Number 32, 10 August 1895 — Page 2
| This text was transcribed by: | Tina Mendes |
| This work is dedicated to: | Kimo Kahahane, my tutukane |
Ka Nupepa Kuokoa
KE KILOHANA POOKELA NO KA LAHUI HAWAII.
MA KE KAUOHA.
KANAWAI 10
HE KANAWAI E HOOKAAWALE ANA I MAU HAAWINA PAKUI NO NA
HOOLILO O KE AUPUNI O KA REPUBLALIKA O HAWAII NO NA MAKAHIKI ELUA E PAU ANA IKA LA 31 O MARAKI, 1896.
E Hooholoia e ka Ahaolelo o ka Repubalika o Hawaii:
PAUKU 1. O na huina dala maope iho nei i hiki aku ka huina i ka $56.600.00 ma keia ke hookaawale ia nei e uku ia ae mailoko mai o na dala a pau iloko o ka Waihona Aupuni i loaa mai mailoko mai o na loaa mau o ko Hawaii Pae Aina i pakui ia mawaho ae o na huina dala i hookaawale ia mamua aku nei, no keia mau kumu, penei:
KEENA O NA AINA E.
Ka Bans $600.00
KEENA O KA LOIO KUHINA.
Uku o na Makai, Oahu $40,000.00
Uku o na Luna Halepaahao, na Kiai'a me na Luna o na Paahao 10,000.00 $50,000.00
KEENA KALAIAINA.
Oihana Kinaiahi o Honolulu, Papa Uku 4,000.00
Uku o ka Agena Aina (ma ka $3,000.00 o ka makahiki) 2,000.00 6,000.00
$56,000.00
PAUKU 2. E mama keia kanawai mai a mahope aku o ka ia e hooiaha ia ai.
Aponoia i keia la 6 o Augate, M.H. 1895. (Kakauinoaia)
SANFORD B. DOLE,
Peresidena o ka Repubalika o Hawaii
Va hookohuia o Mr. C.B. Wells i keia la i lala no ka Papa Alani o ka Apana Auhau o Wailuku mokupuni o Maui, ma kahi o G.P. Wilder i waiho mai.
Eia ka Papa i keia wa:
L.A. Andrews,
M.P. Waiwaiole,
C.B. Wells.
J.A. KING,
Kuhina Kalaaina,
Keena Kalaiaina, Augate 3, 1895.
2557-3
Ua hookohuia i keia la, o M.F. Scott a me W.W. Wait i mau hoa no ka Papa Alanui, no ka Apana Auhau o Kona akau Mokupuni o Hawaii, ma kahi o W.D. McWayne a me D. Makainai i waiho mai.
Eia ka papa i keia wa:
George Clark, Lanahoomalu
M.F. Scott
W.W. Wait,
J.A. KING,
Kuhina Kalaiaina.
Keena Kalaiaina, Iulai 31, 1895.
2557-3
Ua hookohuia o A. WHEYDTMANN i keia la i Notari no ka Lehulehu no ka Apana Hookolokolo Kaapuni Ekolu o ko Hawaii Paeaina.
J.A. KING,
Kuhina Kalaiaina.
Keena Kalaiaina, Iulai 31, 1895.
2557-3
Ua hoopukaia i keia la keia mau hookohu malalo iho maloko o ka mahele o ka Loio Kuhina:
O ARTHUR M. BROWN Esq. i Ilamaku ma kahi o Edward G. Hitchcock Esq. i waiho mai.
O EDWARD G. HITCHCOCK Esq. i Makai Nui no ka Mokupuni o Hawaii ma kahi o George H. Williams Esq. i waiho mai.
WILLIAM O. SMITH, Loio Kuhina,
Honolulu, Augate 1, 1895. 2557-3
KEENA KALAIAINA,
Buro Kakau Kope,
Iulai 19, 1895.
Ua hookohuia o MR. G. E. THRUM keia la, i Agena Hooiaio Palapala Kopei no ka Apana o Hilo, Mokupuni o Hawaii.
THOS. G. THRUM, Luna Kakau Kope Nui.
Aponoia:
J.A. KING,
Kuhina Kalaiaina.
2556-3
Ua hookohuia o GOODALE ARMSTRONG Esq. i keia la, i Komiaina no na Alaliilii a me na Pono Wai no ka Apana o Wailuku, Mokupuni o Maui.
J.A.KIN, Kuhina Kalaiaina.
Keena Kalaiaina, Iulai 19, 1895.
2556-3
Ua hookohuia o S. KAILEWA i keia la, i Luna Pa Aupuni no ka Pa Aupuni ma Paia iloko o ka Apana o Makawao, Mokupuni o Maui, ma kahi o G.E. Simpso i waiho mai.
J.A. KING, Kuhina Kalaiaina.
Keena Kalaiaina, Iulai 18, 1895.
2556-3
I KULIKE ai me ka Pauku 1 o ka Mokuna XXXV. o na Kanawai o 1888, na kukulu an i keia la a ua hookaawale i pa e hoopea ia ai no holoholna aea ma Kamiloloa, Kona, Mokupuni o Molokai, ma ka apana aina e waiho la mawaena o na palena o Kapaakea ame Kamiloloa a i ikeia o Kapeakea, ma ka Apana o Kona Mokupuni o Molokai.
I kulike ai me ka Pauku 2 Mokuna XXXV. o na Kanawai o 1888, ua hookohu ai i keia la ia H.PEELUA, i Luna Pa Aupuni no ka Pa Aupuni maluna ae.
J.A.KING, Kuhina Kalaiaina.
Keena Kalaiaina, Iulai, 18, 1895.
2556-3
NUPEPE KUOKOA
ME
Ko Hawaii Paeaina i Huiia
o ka Makahiki $2.00
No Eono Mahina $1.00
Kuike ka Kula
HOOPUKAIA E KA
PUKA 1 2 3 4 5 6
ANA PULE PULE PULE PULE PULE PULE
Iniha $ 1.50 $ 2.00 $ 2.50 $ 3.00 $ 3.50 $ 4.00
2 Iniha 2.00 2.75 3.50 4.00 4.50 5.00
3 Iniha 2.50 3.50 4.50 5.00 5.50 6.00
4 Iniha 3.00 4.00 5.00 6.00 6.75 7.50
5 Iniha 3.50 4.75 6.00 7.00 8.00 9.00
6 Iniha 4.00 5.50 7.00 8.00 9.00 10.00
O na Olelo Hoolaha a pau e hoouna ia nai ana no ka Hoolaha maloko o keia Nupepa, e hoouna pu mai me ka auhau, a ina aole, aohe hookomo ia.
HAWAIIAN GAZETTE CO.
GEO. H. PARIS, Luna Nui.
J.U.KAWAINUI, Luna Hooponopono
No Honolulu, Hawaii, Lakou a pau.
POAONO, Augate 10, 1895.
Ke Kanawai Aina.
Eia ka Bila Aina ua hooholo loa ia e na hale kaukanawai elua, a he mea maopopo e lilo aku ana ia i kanawai no ka Repubalika. Ua noonoo a kuakakuka mua ia keia kumuhana ano nui e ka Mana Hooko o ke au o ka Repubalika, hoolaha mua a i ka noho ana mai nei o ka Ahaolelo, ua haawaiia i na hale elua a noonoo pihaia e ia mau hale kaawale. Ua hookomoia he mau hoololi i ka bila kumu a ka Mana Hooko, ua okioki a kiola ia kekahi mau pauku a ua hookome ia mai he mau pauku pakui. Mahope o keia mau kaana pono ana, ua haawi hou ia iloko o na lima o ke Komite Kuka o na hale elua e noonoo hou ia ai a hooholo loa ia. He mea pono e hoao koke ia ke kanawai ke loaa na apono ana o ka Peresidena, no ka mea, malia ma ia hoaoia ana e ikeia ai he mau hoololi kekahi i makemake ia, e hiki ai ke hooponopono koke ia i ka wa e hono mai ai ke kau mau.
Kanawai Hoomoe Waeaolelo Moana Pakipika.
Ua lawe mai ka Mana Hooko o ka Repubalika iloko o keai kau kuikawa o ka Ahaolelo, he bila kanawai e hoohoihoi ai i ka hoomoe ana i waeaolelo moana Pakipika mai Amerika mai a i Hawaii nei. Ua noonoo ia e na hale pakuhi a hooholo loa ia. Aole nae ililo i kanawai, aka hiki mai nei o Col. Z.S. Spalding o Kealia o Kauai mai Europa loa mai ma ka la 1 iho @ei o Augate me kekahi hoolala hana hoomoe waeaolelo ma ke ano ku i ka lawelawe hana maoli ana a waiho mai nei imua o ke aupuni.
Ke olelo ia nei, eia o Mr. Spalding me kekahi poe mea dala o Beritania, ua makau e hoomoe i waeaolelo mawaena o Kapalakiko a me Honolulu, me ke malama i ka hana hou ana i ka waeolelo, a maluna o ia hui ke koikoi no kana hana maikai, ke ae ke aupuni Hawaii e hoopaa i ka uku aku i ka hui hoomoe waeaolelo i $50,000 o ka makahiki no ka namawa he iwakalua mahahiki ka loihi, me ke koi pu mai e haawi aku i pono kaokoa no lakou ma ia manawa.
Ma ka Paokolu iho nei, ua halawai ae kekahi poe lawelawe oihana o keia kulanakauhale me ka Aha Kuhina e kukakuka no keia kumuhana a Mr. Spalding i lawe mai nei. Ua kamakamailio lakou ma keia kahua hana e onou ia mai nei ma na ano a pau, a me he mea la ma ka hoomaopopo ana, o ka Mr. Spalding hoolala hana i waiho mai ai, oia ka oi o na mea a pau i ikeia e kakou. Ua aelike ia, iloko o ka manawa e hoomau ia ai ko ke Aupuni Hawaii uku kokua ana i keia hui, e hookuu wale ia na elele palapala a pau a ke aupuni, a e hooholo ia hoi ona uku kuikawa kupono no na elele palapala a na hui kalepa e hoouna ai maloko o keia waeaolelo. Ua hoomappopo ia i keia wa, ua lokahi ke aupuni a me Mr. Spalding ma na mea e ae, koe ka auhau a ka hui e kau ai maluna o ka huaolelo hookahi a me kekahi mau mea liilii e ae.
Aia a lawe ia mai ka bila waeaolelo hou ma na olelo elua imua o ka Ahaolelo e ike paka iho ai kakou i ke au nui a me ke au iki.
Ke keu mai nei kekahi poe no keia puu dala nui e koua ai i keia hui iloko o ka makahiki. Aka he makemake kakou a pau e launa mau kakou me ke ao holookoa i na la a pau, ina he ua a malie, e ake o ka loke i na mea e hana ia ana a i ulia mai la ma kela wahi keia wahi o ka konua. Aole e hooko ia keia moeuhane pomaikai ina he noho wale iho no ke kakou e palaualelo ai.
A ke komo mai nei hoi na hoonui noonoo o kekahi poe ma ka hookomo ana mai i keia hoolala manao e pau ai keia uku kokua waeolelo, oia ke kau i auhau aupuni i hookahi hapawalu keneia maluna o na waiwai lewa. Ma ka manao o kekahi poe ike lawelawe oihana, iloko o ka makahiki mahope o ka paa ana o ka waea a kamailioia, e lawa ana ka nui o ia auhau no ka uku ana i na mea a pau.
Mahope iho o ka paa ana o na mea maluna ae i ka hoonohola, ua hoolahaia mai la ma ka olelo namu no hoolala hana a Mr. Spalding, a ke lawe mai nei mokou ma ke ano nui, penei:
He mau malama kona o ka huli ana e loaa na mea oiaio a me na huahelu no na mea pili i ka hoomoe ana i waeaolelo mawaena o na mokupuni iho nei a me ona waeaolelo mawaena o Honolulu a me Kaleponi, a o ka hopena ua loaa iaia no mea a pau mai kekahi anaaina naauao mai o Ladana.
Ua loaa na huahelu o na lilo no ka haua, hoomoe a me ka hoolako ana i ua waeaolelo elua, oia ka laina piliaina a me laina Kaleponi a me ka moku hana waea.
Ua hoolala oia a holopoo kahi e loaa ai na dala e hapai ai i ka haua.
O na kahua kahi e holopono ai keia mau hoolala ana e loaa ke dala, oia ka loaa o kekahi uku kokua a hoopaa paha mai na Aupuni mai e hoopomaikai ia ana, no ka mea ua hoomaopopo ia aole e uku ia ana na lilo ponoi o keia hana no kekahi mau manawa.
Ua makaukau au i na mea a pau no ka lawelawe koke i ka hana, koe wale no o ka maopopo ole o ke aha la ka nui o ka uku kokua e hilinai aku ai e loaa ana mai na aupuni mai e hoopomaikai ia ana.
Aole oia i makemake e hana aku ke Aupuni Hawaii o ai mamua o ka mea i maopopo a akaka no kona mau pomikai iho, a nolaila i waiho mai ai oia i na hoolala ana; aole e hookomo ia ke aupuni iloko o ka pilikia; o ka makemake wale no e loaa mai ona uku kokua haahaa a e hoopaa no ka hoomau ana a me ka maikai o ka waeaolelo.
Eia no hoolala ano nui e hoohui ia ai iloko o ka aelike mawaena o ke Aupuni a me a'u.
1. Na'u e lawe i na lilo a pau i hoolilo e ia iho nei ma ka imi ana e loaa na ike i hoike ia mamua aenei a me na lilo hou o ia ano e hiki mai ana.
2. Na'u e auamo i na lilo me ko ke Aupuni komo ole mai, no ke kukakuka ana e loaa na aelike me na Aupuni e ae, na anaaina, ka waea a me ka moku hoomoe waeaolelo, na agena dala, a e kaikai i na lilo e ae a pau e hoea mai ana no ka hooko ana e holopono ka hana.
3. Na'u e haawe, me ka lilo ole o ke Aupuni, no ka hoolako ana i na dala kupono e kukulu ai i na waeaolelo elua ma ko kaua kulana e hana ai me ka maikai, komo pu me ka hoomoe ana i na iaina maluna o na aina e hui ai na laina o ka waeaolelo kuloko a me na kahua e hiki ai ke hoohanaia, me ko ke Aupuni wahi hoolilo dala ole mai a aie dala ia aku paha. Koe wale no kahi kokua dala e aeliki ia ai e uku.
4. Na'u e lawelawe e hooholo pono i na mea a pau a hoomaka i ka hana ana o ka waea olelo maloko mai o umikumamawalu malama mai Okatoba 31, 1895 aku, a paa pono na laina elua maloko mai o umikumamawalu mau malama, oia hoi ma Okatoba 31, 1895.
5. Na'u e lawelawe, me ko ke Aupuni lilo ole, e hoomau i ka malama maikai ana i na waeaolelo elua e hoohana mau ia ai laua no ka manawa he 20 mau makahiki ka loihi.
6. E hooki ia ka uku kokua a ke Aupuni ina e hoohana ole ia na waeaolelo elua mahope o ka paa ana a hala na la he 90 nee papa. O ia hooki ana ma ka $10,000 o ka makahiki no ka waiho hana ole o ka waeaolelo kuloko, a ma ke $40,000 ina no ka waeaolelo kuwaho. Ina e hala ka makahiki maope aku e ka pau ana o ke 90 mau la me ke hoohana ole ia, alaila he mana ko ke Aupuni e hoopau ai i ka aelike no ka laina e moe hana ole ana.
7. Ua hiki i ke Aupuni ke hoouna wale i na elele waeaolelo maloko o na waea elua, me ka uku ole a hiki i ke $50,000 o ka makahiki, e heiu ia ma ka uku huaolelo mau.
8. E hoonohonoho ia a e aelike ia ona papa no ka uku o na huaolelo o ka waea kuloko nei a hookomo ia io@ko o ka aelike.
O ka uku huaolelo o ka waeaolelo kuwaho, aia me ka uku e hoopaa ia ai me ka aelike me na aupuni kuwaho e kokua dala ana i ka waeaolelo, me na uku e hoemi ana i ko na pupepa uku.
9. E waiho aku au me ke Kuhina Waiwai i $25,000 ma na hona Hawaii, ke kakauinoa ia ka aelike, a e paa ia e ia ma ke ano hoopaa e hana au e hoomoe i ua mau waeaolelo la e like me na olelo o ka aelike. E ae ia au i umikumamawalu malama e hooholo pono ai i ka'u mau hoolala ana a e noonoo i ka nui o na kokua e loaa mai ana ia'u mai na bona ia'u ina iloko o ia manawa ua hoike aku au i ke Aupuni aole e hiki ia'u ke hooko, a i ole ia ina mahope iho ma ke aelike ana me ke aupuni no ka hooloihi aku a hoopau paha.
10. E hoolilo aku no au i ke Aupuni maloko o hookahi makahiki mai ka paa ana mai o ka waeaolelo kuloko, i ua waeaolelo la me ka aie ole, ke uku mai ke Aupuni i na lilo ponoi wale no o ka hana ia ana o na laina aina a me na kahua e pili ana ilaila.
A ina i makemake ke Aupuni pela, alaila e ae ia aku no ke Aupuni e hoonana i ka moku hoomoe waeaolelo i pili i keia laina ae no ka hana hou ana paha ma ka lilo ponoi wale no.
Na ka noonoo ana i ka mea pono no ko'u aoae no keia hana nui, e ae mai ke Aupuni i keia:
1. E uku mai i $50,000 uku kokua no ka makaiki a no ka manawa he 20 makahiki ka loihi.
2. E haawiia mai ia'u ka pono kaokoa o ka hoopae ana i na iaiana waeaolelo ma na nokupuni o Hawaii mai na kapakai komohana o Amerika Akau a mawaena o na mokupuni ne ka manawa he 20 makahiki.
3. E ae mai ke Aupuni e hookomo mai me ke dote ole a mau uku e ae paha i na pono haua waeaolelo a pau i pili i ka waeaolelo.
4. E ae mai ke Aupuni i na aina aupuni e lawe ia ana e hoohana ia me ka uku ole no ke kukulu kahua a no ka manawa he 20 makahiki a me ka pono e hoopae a me ke ala e hele aku ai a me kekahi mau pono e ae.
5. Ina aole e hana ia a paa kela waeaolelo maloko mai o 18 malama mai Okatoba 31, 1895 aku, alaila he mana ko ke Aupuni e hoopau mahope o ka hala ana o keia manawa i ae ia ai e hana.
O ka manao hoolala no ka lawelawe ana i ka hana hoomoe waeaolelo, o ke kukulu i hui Amerika no ka lawelawe a hooponopono ana ia waeolelo ma Amerika Huipuia a me ke kukulu ana i hui ma Honolulu no ka malama ana i ka waeaolelo kuloko.
E noi ia aku ana ke Aupuni o Amerika Huipuia e kokua mai i keia hana.
Iloke o ka Pana ana Hoakahi.
Us hoonuanua ia ae ka hale noho o Mr. a me Mrs. Paul Newmann i ke ahiahi Poakolu iho nei, e kekahi anaina nui mokolukolu, no ka hoohanohano ana aku i ka awaiauluia ana o ka laua kaikamahioe Anita me Mr. H. Focke. Ma ka hora 7:30 ahiahi, ua hoohuiia ae la laua e Rev. Makua Leon'ra i kane a i wahine no ka manawa mau loa a he make wale no ka mea nana e hookaawale ia laua. A mapohe o ka hikiikii ia ana o na puuwai elua i hookahi pana ana, alaila ua haawi ia he manawa no na makamaka a me na hoaluha o ka paa mare e hele mai ai e ike. Ua ku iho laua no ka hora a oi e lulu i na lima akua o ke aloha a e hoolohe i na leo kalokalo a oomaikai o ka poe i helu ia ma ka hapalua paha o ke tausani ka nui. I ke pau ana o ka peo ike i na mea mare, alaila ua holo iho la ke kanikani e oki i ka maeaono mare a e kaana ia. Pau ka paina ana, alaila ua hone mai la na leo mele hulahula haole a ka hui Kawaihau, e hoeueu mai ana no ka puni a na kapuai mama a me na niniu ana pahee. Aole i hookuu wawe ia na hana o ka po a huli na kao o ka lewa lani, aole no hoi me ka hoi malu a haawi ole iho i na olelo hoomaikai i na makua kanu pua rose onaona ia a me na kama elua no laua ka po hanohano e luakaha la ana. Nui na makana waiwai i hoouna ia ae ia Mr. a me Mrs. Focke.
Ahaaina a ke Kuhina Amerika.
He ahaaina ka ke Kuhina Amerika a me Mrs. Willis i aawi aimaloko o ka Hale Kuhina Amerika i ke Kapena a me na Aliimoku o ka manuwa Amerika Bennington, ma ke ahiahi Poalua iho nei o keia hebedoma. Ua kanalima a oi na malihini i hiki ae, mawaena o lakou kekahi poe koikoi o keia anaina. Ua hoouluwehi ia ke keena hookipa me na pua, a ua lilo kela launa ana o ia ahiahi i mea oluolu i na mea a pau. Ua hoopuni ia he ewalu mau pakaukau a ua kaana ia na mea ai mama.
Malia o Honeaku i ona Kokua.
Ke oleloia mai nei, e hanu aku ana ka hui mokuahi Oceanic, nana e halihali nei i na eke leta panalaau mai Ladana a hiki i Kikane, a pela no hoi ma ke pelu ana aku, i na kokua mai a na aupuni Panalaau o Ausetaralia a me Ni Kilani no ke kapili ana i mau mokuahi hou a holo mama no ka laina mai na panalaau mai a hiki i Kapalakiko. No ka mea, eia he kamailio e lohe ia nei ke makemake ia nei e hoemi i ka manawa halihali leta mai Nu Kelani a hiki i Ladana iloko o na la he iwakalua kumamawalu wale no. A no keia manao hoeueu halihali leta puahi me ka mama i hoeueu ia ai e hone aku i mau kokua mai na Panalaau mai.
Hooweliweli Hou ia Iapana.
Ua hiki i Ladana ka loke ma ke la 13 o Iulai mai Sana Peterobero ae e hoike ana ma ka la 11 o ia malama no, ua noi mai ke keikialii Lobanoff Potaviski a kuhina o ko na aina e ia Mr. Nishi Tokihiro, ko Iapana Kuhina ma Rusia, e hoike aku maloko mai o ka manawa hea e pau ai no Iapana i ka haalele mai i ka Anemoku o Liao Tung. Ua pane aku ke Kuhina, e paa ana o Iapana i keia aina a hiki i ka wa e uku piha ia ai na dala huikala kaua a me ona uku dala hou mai o Kina no ka hoihoi ia ana o ka anemoku Liao Tung.
Ua hoole mai ke keikialii Lobanoff i ka lawe ana i keia pane, a ua hoonaauao koke aku i ke kuhina Rusia ma Iapana e ninau aku i ke apuni e hoike mai i ka la e unuhi ia aku ai na koa Iapana a pau loa mai na aina paa aku o hina.
Mokukaua Pananaiki
Ua hoouna mai nei ka hui kapili moku o Glasgow, Sekotia, nana i kapili i ka mokuahi kuloko Waila, i na kii a me na hoakaka ana ia Kapena J.A. King a Kuhina Kalaiaina hoi i keia wa "o ka mokuahi kaua pananaiki i kapiliia no kekahi aupuni kuwaho." Ua hoomaoe mai ua poi kapili moku la, malia o makemake ke Aupuni Hawaii i kekahi la e hiki mai ana i moku o la ano. He mokuahi no keia hookahi oneki, uhi ia me ke kila, he 127 kapuai ka loa, ua makaukau no na pukuniahi kani alapine, a e hiki ke holo he umikumamalua mile i ka hora. A oia ano mokukau, ua hiki ke lawe ia mai a haawi i Hawaii nei me na lako a pau no ke $90,000.
Mokukaua Olympia no Kina.
Ua loaa i ka mokukaua Amerika hou "Olympia" na kauoha a ke Aupuni, e haalele ia Kapalakiko ma ka la 15 o Augate, a e holo no Kina. Iaia e hiki ai malaila, e hookuu ia mai ana ka mokukaua lawe hae o Adimarala Carpenter, ka "Balatimoa" e hoi mai i ka pa kapili mokukaua o Mokupuni Liowahine ma ke kaikuono o Kapalakiko. Ke olelo ia nei, o keia mokukaua lawe hae Amerika ka oi o na mokukana e hiki ana ma ke kai o Kina i keia wa, no ka mea, aohe mau manuwa Beritania a me Rusia e ku la ma na kai o Kina o like mai ana me keia, ma na ano a pau. A ke olelo nei ka poe maamaalea hakilo mokukawa, aia ka "Olympia" mamua loa o na manuwa e kona papa hookahi, a ke hooia ia nei, oia aku ana ka moku lawe hae ikaika o Amerika Huipuia i hoonoho ia ma na kai o Kina. Ma ka hoao oihana ia ana mai nei o ka "Olympia" e ka papa komiaina, ua haomau ia ke kuu ana i ka holo no eha mau hora me ke pao mau ia o ke ahi, a ua ikeia ua loaa ka holo he 19 a me 6 hapaumi mau mile i ka hora ma ka averiga ana. Noiaila, o keia ka mokukaua holo loa o Merika Huinuia.
Holopono ka Hana o Kawaiahao.
Eia ke hele aku nei e pau loa na hana a na kamana i ka luakini o Kawaiahao. Ua maikai a nani ka hana ana ia loko o ka luakini e hoomana ai i ke Akua ike oleia. E hiki ana ka nui o na lilo i ka $10,500 a ke uku ia nei na limahana i na hebedoma a pau. He mea e olioli Iubile ai no na hoahanau a pau ka nee mua ana o keia hana maikai me ke kuia ole. Hookahi wale no komite hoomanawanui nana i hele e i@ dala no keia hana nui i hiki ole i ka mana o ke kanaka, oia ke kahu o ka ekalesia. Nui no na hoauwae puu a na hoomaloka, aka ua oi aku no na poe kokua i ka hana maikai, a nolaila i holopono ai kana hana huli dala. Ma ia mea e ike ia ai me ka hoohewahewa ole, o ke Akua pu kekahi i kokua i ka hana hou ana a paa o Kawaiahao.
Hoopaiia na Haole Aihue Moku.
O na haole nona na inoa John Mongomerry, John Sullivan a me Paul Volual, i aihue ai i ka moku kiakahi heihei Bonnie Dundee, he manawa ae nei i hala me ka manao e mahuka a holo i ka aina e maluna ona. Ua kau io no lakou maluna o ke kiakahi i ka po a holo iwaho o ke awa, uka ili e ke kiakahi. Makau lakou a holo iaka nei o ka aina e pee ai, aka hopu ia lakou, hookolokoloia a waihoia no ke kau kiure kaapuni o ka Apana Ekahi nei. I ka Poakahi mua o Augae nei, ka wa hoi i noho ai ke kau kaapuni, ua lawe ia keia mau haole imua o ka aha no ka hewa aihue. I ka ninau ia ana, ua ae lakou i ka hewa. O ka waiwai io o keia kiakahi heihei, he $2,000, a ke ona ia nei e Peresidena Dole, Oscar White a me W. L. Wilcox. Ma ka Poalua mai, ua kau ka aha i ka hoopai maluna o lakou pakahi, ma ka eono maiama hoopaahao ma ka hana oolea. Ua hemo mai no ka moku me ka poino nui ole.
Hoouna ia e kiu ia Canada.
Mai ka mea kakau mai o ka nupepa "Tamblune" o Kikako e noho ana ma Wasinetona i lohe ia ae ai, ua ae maoli mai ka Oihana Kaua eia ke loaa nei ia Lutanela Brown o ka pualikoa, kekahi o na aliikoa opio, na ike ma ka palena o Canada, aka aole e hoike ia aku ana kona wahi e hele la, mahope hoopilikia ia oia e na mana aupuni o Canada. He nui wale na manawa a ka Oihana kaua hoouna ai i na aliikoa i na palena o Canada ma ia ano hana hookahi, aka ike e ia lakou e na Canada a kena ia lakou e hoi me ka loaa wahi ike nui ole. O ka Lutanela Brown hana, oia ka nana i na alanui, na kahawai a me na ano nui o ka aina, me ka maka e haka ano no kona noho ia aku e Amerika Huipuia.
Hoolala Kuai ia Cuba.
Ua lohe ia ma Wasinetona i ka la 18 o Iulai, aia kekahi poe mea dala o Nu Ioka ua hoohui ae ia lakou no ke kuai maoli ana ia Cuba a lilo mai ke aupuni mai o Sepania, a o ka lakou wale no e kali la o ka hiki mai o ka wa uluaoa ma Cuba, alaila hookomo aku i ka lakou hoolala e kuai. O ke kumukuai i manao ia e haawi aku, he $100,000,000. Ua like no keia manao, me ka hoolala ana la i manao ia e Hamilton Fish, ke Kuhina nui o Amerika Huipuia i ka wa o Gnerala Kalani e noho Peresidena ana. E noi ia aku ana na hooikaika a ke aupuni e kokua mai, a ke upu ia aku nei no hoi, malia o noi ia aku ke aupuni e noho hope mai no ka haapaa ana e uku i ke kumupaa a me ka ukupanee o ka ale e hoaie ia mai ana e ka hui. Ma ia wa hookahi pu no hoi, ua puapuai mai na lohe mai ke keena ae o ke Kuhina nui o Amerika Huipuia me he mea la, aia keia ohana Iudaio waiwai o Rokekaila mahope mai o keia manao. Ke manaoio nei kela poe hui, ina e malama pono ia ka oihana waiwai o Cuba a hooponopono maikai ia ke Aupuni, alaila ua hiki no ia Cuba ke lawe i ke kaumaha o ka hoowe holookoa o ka Sepania aie i keia wa e kau mai nei, me keia $100,000,000 aie hou. Eia i ka ohna Rokekaila ke paa nei he $1,000,000,000 o ko Sepania aie aupuni, a i ole he elima hapaono paha o ka ale holookoa a pau. Aia no hoi ia lakou e paa ia nei ka hapanui o na bona o na hui aiahao o Sepania Ke ona ia nei e lakou keia minerala wai dala kauiana o Alameda, i hoohanaia no na haneria makaiki i hala o oia no hoi ke kumu dala e kamau nei o keia aupuni alii pahulu. Ua manaoio ia, ua ike lakou i ka pono ole o ka hoao ana e paa mai ia Cuba malalo o ka hoowalu ana a Sepania, a ke hoolawa nei lakou ia Sepania, a ke hoolawa nei lakou ia Sepania me na lako kaua, me ka manaolana aia a hiki mai ka wa maikai, alaila onou aku keia hoolala hana.
Mau Hale Pohaku a ku iho.
O keia kihi aina hakahaka akea e ku ia nei e ka Halepea Lio Poniniu o Keo Vikoa ma ke kihi o na huina alanui Hotele a me Betela, no ka waiwai keia o ke Hula Kamehameha. Ke puhee mai nei na lohe, eia ke hoolala nei na kahu maiama waiwai o ke kula, e kukulu i ialani hale pohaku e hoopuni ai ia wahi kikowaena o ke kulanakauhale a na hale oihana e muimuia ai ke ku ae ia mau hale. A ma ia hana ana no hoi e puhuu ai na dala o keia waiwai nui mai ka noho puliki paa ia ana a kaana ia mawaena o ka poe paahana.
Ke paa keia mau hale e like me ia e hoolala ia nei, alaila ua pakui mai ia i ka hiehie o ke kulanakauhale, a ua hoomahuahua hou mai hoi i na hale e lawelawe ia ai he mau oihana nui hou aku no ko ka lehuiehu mau pomaikai.
Owai ke olelo mai aole o Honolulu hele imua e like me ka pii ana aia iluna. O ka mea i koe, o ke kali wale aku no i ka koe, o ke kali wale aku no i ka hooko ia ana o keia mau pakui hou mai i na hana hou iloko o Honolulu kulanakauhale.
Ke Kai Ula Hana Mana.
O keia hana mana ma ka Kai Ula i kahakaha ia ai ka moolelo o na keiki o ka Iselaela i pakele ai mai a Parao aku e alualu ana, ua ike hou la mai nei ua hana mana ia, pela ka hoike a Mekia Generala Tulloch i ke aupuni o Beritania Nui. Oiai ola e ana ana i ke alahele o ka puka ana o ka Iselaela, ua ike aku ia oia me kona mau maka ponoi i ke kupulau i hala. Ua wili he makani ikaika launa pono ole, a iloko o na hora pokole wale no, ua kuebu ia aku la ke kai o ka moana wai o Menzaleh a pau loa mai ka ike ia ana aku ma o aku o ka pulena ike a ka maka, a hookoe iho la i na moku holoholo pea a pau e kapakahi ana maluna o kohola one.
Ma ka Lio mai Farani a Amerika.
Aia o Mons, Wiasemsky, he haole paihiihi no ke kulanakauhale o Parisa, ke hoeueu la i kekahi pili waiwai koikoi ua hiki iaia ke holo maluna o ka lio mai Parisa aku a hiki i ka Repubalika nui o Amerika Huipuia. O kana i hoolala ai, he holo maluna o ka lio mawaena aku o Siberia a hiki i ke kowa o Berina, alaila, ma ka wa kupuno, e holo oia maluna aku o na papa hau paa mai Siberia a hoea i Alaska me ke kau no maluna o ka lio e like me kana e keha nei. Ua @ehuehu no keia haole ke hooko io oia a pau pono, no ka mea, o kona inoa no ke kamailio nui ia ana.
Ohuohu ka Mokuahi Waila.
O ka kuakai elua a ka mokuahi Waila i holo pani aku nei ma ko ke Kinau mau awa o Maui a me Hawaii, oia kekahi kuakai ohuohu nui wale i na ohua i holo aku la i ka Poalua iho nei. No ka mea, ua pau loa kona mau keena ohua kapena i ka lawe ia a ua oi wale aku. Ua hiki aku kona mau ohua papa ekahi i ke 66 a oi me ka helu ole ia o na ohua oneki. A mawaena o na ohua i kau aku la, elua mau lunamakaainana o E. E. Richards ame G.P. Kamauoha.
Beritania Lima nui.
He nui ke pioloke ma ke kulanakauhale o Rio de Jaeiro i ka ia 24 o Iulai, no ka pakaha ia ana o ka mokupuni o Trinidad e na Beritania. Ua hoouna aku ke aupuni o Berazila he elua mau paiapaia i ke Keena Kuhina Beritania e kue ikaika loa ana me ka lawe pu mai i ka hana a ka Aha Hookolokolo Moana o Beritania Nui i ka 1782, a maiaio o ka mana o ia hana, ua haalele ia mai o Trinidad e na Beritania a wa hoioi hou ia ia Potugala. Eia hoi ka mea i mahui ia mai Beritania mai.
Ladana, Iulai 24.----No ka waeaolelo i hoouna ia mai ianei mai Nu Ioka ma e pili ana i ko Berazila kua ana mai i ka Beritania Nui koi i ka mokupuni o Trinidad, ke olelo nei ka poe mana a ike ke ninau ia aku, o ko Beritania kuleana ia mokupuni mai ka 1790 mai ia, oia ka wa i lawe la ai me ke kue ole ia mai ma ka aoao o Potugala. Eia hoi kekahi, aole i waiho mai nei o Berazila i kekahi koi i ka mokupuni o Trinidad, aka ua makaukau ke Aupuni o Beritania e kukakuka ma ke ano hoaloha i kekahi elele a Berazila e makemake ai ke hele ae e kukakuka ma keia kumuhana.