Ka Nupepa Kuokoa, Volume XXXIV, Number 31, 3 August 1895 — Page 2
| This text was transcribed by: | Charles Routt |
| This work is dedicated to: | Awaiaulu |
Ka Nupepa Kuokoa
KE KILOHANA POOKELA NO KA LAHUI HAWAII.
MA KE KAUOHA.
KANAWAI 7.
HE KANAWAI E HOOKUU AI I KE CANAIGRE A ME NA MEA ULU OLONA A ME NA MEA A PAU I HOOMAKAUKAUIA A I HANA IA MAILOKO MAI O KE CANAIGRE A ME NA OLONA A PAU MAI UA MEA ULU MAI, A ME NA HALE WILI, NA MIKINI, MA LAKO HANA, NA MEA HANA A ME NA HALE I LAWELAWEIA MA KA MALAMA ANA, MAHI ANA A I OLEIA MA KA HOOMAKAUKAU ANA WALE NO OIA MAU MEA, MAI NA AUHAU A ME NA DUTE KOMO MAI A PAU.
E Hooholoia e ka Ahaolelo o ka Repubalika o Hawaii:
PAUKU 1. Mai a mahope aku o ka hoololo la ana o keia Kanawai a no ka manawa o umi makahiki mai ka la i haua ia ai keia nei, o na canaigre a me na mea ulu olona a pau, a me na mea i hoomakaukau ia a i hana ia mailoko mai o ke canaigre a me na olona a pau mai na mea ulu mai i hooulu ia iloko o keia aina, a me na hale wili, na mikini, na lako hana a me na mea hana a me na hale i lawelawe ia ma ka malama ana, mahi ana, a i ole ia hoomakaukau ana i ke canaigare a me na mea ulu olona e hookuu ia a ma keia ke hookuu ia nei mai na auhau a me dute a pau.
PAUKU 2. E mana keia Kanawai mai kona la aku e hoolaha ia ai.
Aponoia i keia la 26 o Iulai, M. H. 1895.
(Kakuinoaia) SANFORD B. DOLE,
Peresidena o ka Repubalika o Hawaii.
KANAWAI 8.
HE KANAWAI E HOOKAAWALE ANA I MAU HAAWINA PAKUI NO NA HANA O KE AUPUNI O KA REPUBALIKA O HAWAII NO NA MAKAHIKI ELUA E PAU ANA MA KA LA 31 O MARAKI, 1896.
E Hooholoia e ka Ahaolelo o ka Repubalika o Hawaii:
PAUKU 1. O na huina dala mahope iho nei i hiki ka huina i ka $8,300.00, ma keia ke hookaawale ia nei mailoko ae o kekahi mau dala e loaa ana i ka Waihona iloko o na makahiki elua e pau ana i Maraki 31, 1896, mai ka aie ana i hoomanaia e ke Kanawai i aponoia i Ianuari 11, 1893, a me ke Kanawai 16 o ke Aupuni Kuikawa, i aponoia ma Feberuari 18, 1895, a mai na koena loaa mau mai; eia nae, o kekahi mau dala i haawi ia mai na loaa mau mai, a i olela mai na hoahu ana iloko o ka manawa e hiki ai e hana pela e hoihoi hou ia mailoko ae o na dala i loaa mai manauli oia aie ana:
OIHANA KALAIAINA.
Na uapo hou, Pal@kai, Eli ana i ke Awa o Honolulu a me ka nuku. Papolaku palle lepo, kahawai o Haaliliamanu.. $2,500.00
Na hale hou, Na lua pa@, Hale hoahu pauda a me na Halemai. Hale noho no ke Kumukula, Puna... 800.00
OIHANA WAI.
No ka pakui ana o na paipu wai no ka Oihana Wai o Hilo, mai ke Poo aku... 5,000.00
$8,300.00
PAUKU 2. E mana keia Kanawai mai a mahope aku o knoa la e hoolaha ia ai.
Apon@ia i keia la 26 o Iulai, M.H. 1885.
(Kakauinoaia) SANFORD B. DOLE
Peresidena o ka Repubalika o Hawaii.
KANAWAI 9.
HE KANAWAI E PALE AKU AI I KA UMII ANA I KA WAWAI.
E Hooholoia e ka Ahaolelo o ka Repubalika o Hawaii:
PAUKU 1. O na huaolelo “umii ana i ka Wawai” e like me la i lawelaweia ma keia Kanawai e manaoia oia no ka umii ana, hana ino ana, hoopoino ana, a i ole ia kina i hanaia i na wawai o na kaikamahine opiopio; a pela pu no hoi me na mea i lawalaweia ma ia umii ana, hana ino ana, hoopoino ana a i ole ia hookina ana i na wawae, a peia no hoi kekahi hoao ana e hana ia mea.
PAUKU 2. Ma keia ke papa loa ia nei na hana umii wawae a o kekahi mea nana i umii a i ole ia nana hoao e umii i na wawae e like me ia i hookakaia a i ole ia i manaoia e hoakaka ma ka Pauku 1 o keia Kanawai, a i ole ia i hoomana aku e ae aku paha i na hana umii wawae, a i ole ia me ka ike no ua kokua wale aku ma ia umii wawae ana ina oia he kanaka lanakila, a i ole ia ma kekahi ano oia kekahi i hana a i ike paha a i ole ia ma kekahi ano ma kokua a ao aku paha ia hana, i hoopaila oia ina e ahowaia i@ o kekahi Lunakanawai Apana e uku i kekahi hoopai aole e emi malalo o iwakaluakumamalima dala a aole hoi e oi aku mamua o @ma ha@eri dala a i ole ia hoopaahaoia ma ka hana oolea aole e emi mamau hoopai a i elua e like me ka manao o ka Lunakanawai he pono, a i @ ia ua hiki i ua mea la a mau mea paha me kahi o ia hoopai e haalele i ko Hawaii Paeaina ma kekehi manawa i hoakakaia e ia Lunakanawai, a o kekahi hoi ana mai iloke o elima makahiki e manaoia no ia he hoalahou ana ae i ka hoopai i kaohiia mamuli o ia haalele ana.
PAUKU 3. E pili no na hoakaka ana o keia Kanawai i na hana umii wawae a pau e hanaia ana i ka manawa e mana ai o keia Kanawai ina aole i hoopau kokeia ia mau hana a o keia a me keia hoomau ana aku o ia mau hana umii wawae e lilo no ia i mau hana hewa hou ana. Aole e manao ia kokahi mea maloko nei he mea e hookuu ia ai kokahi mea nana i kokua a i ole ia i ike i kekahi umii wawae ana mai na kaumaha a me na hoopai o na kanawai e pili ana i ka hoeha a me na hana e kina ai a i ole ia na hana malalo o kekahi kanawai kupono e ae.
PAUKU 4. E mana keia Kanawai mai a mahope aku o ka la e hoolaha ia ai.
Aponoia i leia la 26 o Iulai, M.H. 1895.
(Kakauinoaia) SANFORD B. DOLE,
Peresidena o ka Repubalika o Hawaii.
Ua hookohuia i keia la, o M.F. Scott a me W. W. Wait i mau hoa no ka Papa Alanui, no ka Apana Auhau o Kona akau Mokupuni o Hawaii, ma kahi o W. E. McWayne a me D. Makainai i waiho mai.
Eia ka papa i keia wa:
Gaorge Clark, Luna hoomalu
M.F. Scott,
W.W. Wait,
J.A. KING,
Kuhina Kalaiaina.
Keena Kalaiaina, Iulai 31, 1895.
2557-3
Ua hoopukaia i keia la keia mau hookohu malalo iho maloko o ka mahele o ka Loio Kuhina:
O ARTHUR M. BROWN Esq. i Ilamuku ma kahi o Edward G. Hitchcock Esq. i waiho mai.
O EDWARD G. HITCHCOCK Esq. i Makai Nui no ka Mokupuni o Hawaii ma kahi o Geroge H. William Esq. i waiho mai.
WILLIAM O. SMITH
Loio Kuhina.
Honolulu, Augate 1, 1895. 2057-3
KEENA KALAIAINA,
Buro Kakau Kope.
Iulai 19, 1895.
Ua hookohuia o MR.G. E. THRUM keia la, i Agena Hooiaio Palapala Kopei no ka Apana o Hilo, Mokupuni o Hawaii.
THOS. G. THRUM,
Luna Kakau Kope Nui.
Aponoia:
J.A. kING,
Kuhina Kalaiaina.
2556-3
Ua hookohuia o S. KAILEWA i keia la, i Luna Pa Aupuni no ka Pa Aupuni ma Paia, iloko o ka Apana o Makawao, Mokupuni o Maui, ma kahi o G.E. Simpson i waiho mai.
J. A. KING,
Kuhina Kalaiaina.
Keena Kalaiaina, Iulai 18, 1895.
2556-3
I KULIKE ai me ka Pauku 1 o ka Mokuna XXXV. o na Kanawai o 1888, ua kukulu au i keia la a ua hookaawale i pa e hoopaa ia ai na holoholona aea ma Kamiloloa, Kona, Mokupuni o Molokai, ma ka apana aina e waiho la mawaena o na palena o Kapaakea ame Kamiloloa a i ikea o Kapaakea, ma ka Apaua o Kona Mokupuni o Molokai.
I kulike ai me ka Pauku 2 Mokuna XXXV. o na Kanawai o 1888, ua hookohu au i keia la ia H. PEELUA, i Luna Pa Aupuni no ka Pa Aupuni maluna ae.
J. A. KING,
Kuhina Kalaiaina.
Keena Kalaiaina, Iulai 18, 1895.
2556-3
KA NUPEPA KUOKOA
me
Ko Hawaii Paeaina i Huiia
O ka Makahiki, $2.00
No Eono Mahina, 1.00
Kuik@ ka Rula.
HOOPUKAIA E KA
Puka 1 2 3 4 5 6
ANA. Pule Pule Pule Pule Pule Pule
Iniha $1.50 $2.00 $2.50 $3.00 $3.50 $4.00
2 Iniha 2.00 2.75 3.50 4.00 4.50 5.00
3 Iniha 2.50 3.50 4.50 5.00 5.50 6.00
4 Iniha 3.00 4.00 5.00 6.00 6.75 7.50
5 Iniha 3.50 4.75 6.00 7.00 8.00 9.00
6 Iniha 4.00 5.50 7.00 8.00 9.00 10.00
O na Olelo Hoolaha a pau e hoouna ia mai ana no ka Hoolaha maloko o keia Nupepa, e hoouna pu mai me ka auhau, a ina aole, aohe hookomo ia.
HAWAIIAN GAZETTE CO.
GEO. H. PARIS, Luna Nui.
J. U. KAWAINUI, Luna Hooponopono.
No Honolulu, Oahu, Lakou a pau
POAONO, AUGATE 3, 1895.
Kela a me keia.
Ua kahakaha iho nei na Hale elua o ka Ahaolelo ia lakou, ma ka hooia ana aku, eia lakou ke ku nei ma ke kahua hana a ke aupuni Repubalika i kukuluia ai i kinohi, oia ka hoohuiaina. Me he mea la i ka hoomaopopo aku i keia wa, o ka hoao wale ana no paha a na Komisina Hoohuiaina i na la hope o Peresidena Harrison i ka 1893, ka manawa hoi o Hawaii malalo o ke Aupuni Kuikawa, ka makamua o ke kukakuka ia ana o ke kuikahi hoohuiaina me ko Peresedena Harrison elele a hooholoia no hoi, waiho ia aku ai imua o ke Senate i na la waena o Feberuari 1893 no ka apono mai. Aka aole nae i ha@ ai ia ka noonoo no ke kuikahi a komo mai o Cleveland i Peresidena, ua kii hou ia ua kuikahi la a unuhi ia mai ke Senate mai. Malia paha ma ka unuhi honua ana aku o Cleveland mai ka Aha Senate aku i ke kuikahi, ke koho aku nei kahou ua hookahua ia kona manao kue i ka hoohui la Hawaii, me ka hoao hou ole aku i ko kakou wa i kukulu ai i Repubalika kumukanawai ma Hawaii nei. Aole anei he mea pono ma ko kakou ano kulana aupuni hou a ua Cleveland nei i ike mua mai ai mahope iho o ke kukala ana i ke Aupuni Repubalika kumukanawai ke hoao hou, a ke kahakaha i na aoao a elua ma ka moolelo no ko kakou noi ana aku a me kona hoole a ae mai paha e kukakuka.
Eia ke hoouna aku nei kakou ia Hon. R. W. Kakela he Elele Kuhina hou no Hawaii e nono kokoke aku ma ke kulanakauhale poo aupuni o ka Repubalika nui ma kela aoao mai o ka moana; a o ka makou leo e kala nei i ka mana hooko, hoolako ia aku ke Kuhina hou e hele nei me na elelo hoonaauao a pau, na kuhikuhi ana a me na hoike manao a pou no ka hooholo ana e ko ke kahua o ko kakou aupuni e ku nei, oia ka hoomare ana ia Amerika me Hawaii, a e loaa auanei ia kakou he ikaika hou, he manaolana hou a he aupuni keekeehi kulana no kakou a no ka kakou mau mamo mahope o kakou. Aole he mea hou ka hoohulaina ia kakou na Hawaii, no ka mea ke mau nei no ka makamaka o ka paanaau o ka moolelo o Hawaii nei ia kakou. He mau aupuni pahaki ke na mokupuni o Hawaii nei mamua aku o na makahiki 1818, a na Kamehameha ka Nui i kaua me na alii aimoku pakahi o na mokupuni kaawale a hui malalo o ke aupuni hookahi. Nolaila mai kaeko kakou ke hoohui aku me Amerika Huipuia, kekahi o na aupuni nui a waiwai o ka honua nei. O ko kakou hui ana me Amerika Huipuia, he hoopii hou ana ae ia i ko kakou kulana a i ke anuu o ka hanohano hou ae a me ka hilinai hou ia. Nolaila, e leha aku imua i na hiohiona hauoli e alohi mai nei no Hawaii.
Eia ke hoala ia mai nei ka paio ana no ka pono o ke kuu akea ana aku i ka haawi mau aha mele puhi ehe ma na la Sabati, malalo o ke kumu hoopilipili i loaa ai i na kanaka paahana he manawa e hoolohe ai. Oiai i na la e ae, aole e hiki i na paahana ke luakaha pu ma ia mau aha mele no ka paa loa i ka hana, aole no hoi e hiki i na po no ka maluhiluhi i ke ao a hooluolu i ka po.
Ke olelo nei kekahi poe, ina e hookuu ia aku ke puhi ohe akea ma na la Sabati, alaila o ke noi ia mai koe e wehe i na hale kuai rama i ka la Sabati, na hule hana keaka, na halekuai lole, a me ia mea aku ia mea aku, alaila lilo maoli ana i la hana mau aohe hoi he la hoomaha.
Ke waiho mai nei hoi kekahi i kona manao, e hoolilo i ka Poaono holookea i la noho wale aohe hana i hiki ai i ka paahana ke kaana pu i ka hoolohe ana i na leo mele puhi ohe a mau mea e ae kupono i na la nui. Ke hoole nei ka paahana, aole e pono e hoemi mai i na la hana o ka hebedoma, mahope emi pu mai a pananaiki loa ka mea loaa i ka paahana ke emi pu mai ka wa hana. Nolaila ke hoonakulu nei keia manao iloko o kekahi poe, ma ke kolua kekahi a hoole kehahi.
Ua noho keia lahui malalo o ka maa o ka malama ana i na Kapu o ka la Sabati, a nolaila aole e hiki i ke aupuni ke lilo i mea nana e ku paio i ka pono o keia kumu hana.
He Ilamuku hou ko ka Repubalika
Ma ka la hope o Iulai i kunewa koke iho la, ua hooko io mai o Ilamuku E. G. Hitchcock i kona kaunu i lolii loihi a i haalele pinepine ai, ma o kona waiho io ana mai i ka oihana koikoi a mana nui i paa ai oia no elua makahiki ae nei i hala, oia ka Ilamuku o ka Repubalika, a e hoi ana e lawelawe hou ma ka oihana makai nui o ka mokupuni o Hawaii, a e noho ma ke kulanakauhale ua lani pili o Hilo. Nolaila, aole no i kaawale loa o Mr. Hitchcock mai ka launa a hui pu ana i ka oihana hoomalu. E hoomanao ia, o kana lawelawe ana i ka oihana Ilamuku i na makahiki elua i hala, ua hooko ia no ia me ka eleu a me ka manao paa no ka pono a me ka maluhia. He oiaio, he weliia oia e na mea a pau, oiai oia e noho poo ana ma ka oihana, a ua loaa no hoi iaia ka mahaloia ma kana hookele ana i pau ai i ka pokopoko a lewa e na kuamoo o na alakai kipi o ka hoao hookahuli Repubalika o Ianuari aku nei o keia makahiki. Ke hookuu nei ka oihana iaia me ka minamina nui ia e kona hope a me na makai kumau.
Ma ka la i o Augate nei, ua pii mai o Mr. Arthur M. Brown, ka Hope Ilamuku mua a oia ka haku o ka oihana hoomalu i keia wa, aka oiai he kanaka opiopio oia, eia nae ua hoike mai no kana mau hana i kona wa e noho hope ana i ka hiki e hookele i ka hoeule o ka oihana ana i noho ai a kamaaina, a ua loaa no hoi iaia ka hilinai ia e ke aupuni a me keia anaina.
O ke keikikane hiapo a ka Ilamuku i pau, i noho hope makai nui mai nei no Molokai, o H. R. Hitchcock, oia aku ana ka mea pani ma kahi o ka hope Ilamuku i hookiekieia.
He Kanawai Hoohoihoi Waeaolelo Pakipika.
Eia imua o ka Ahaolelo keia kanawai a ka mana hooko o ka Repubalika Hawaii i lawe mai ai no ka hoohoihoi ana i ka poe e makemake ana e hoomoe i ka waeaolelo ma ka moana Pakipika nei, a he hoike ana hoi ia i ko ke Aupuni mikiala i keia hana ano nui i anoi ia e kapalulu mai ma ko kakou mau kaiaulu mai kekahi aina puni ole a pulelo aku i kekahi.
Pauku 1. Ma keia ua aeia a ua hawaiia ka mana i ka Peresidena, me ka ae o ka Aha Kuhina, e hana a hooholo i kekahi aelike a mau aelike paha me kekahi mea a poe paha, hui i hoohulia a mau hui i hoohuiia paha, aupuni a mau aupuni paha, no ka hana ana, malama ana a hoohana ana aku i kekahi uwea telegarapa a mau uwea paha e hoohui ana i na mokupuni o ka Repubalika, a i ole ia e hoohui ana i ka Repubalika o Hawaii me na aina e waiho ana a i ole ia e pili pu ana me ka moana Pakipika.
Pauku 2. Ua hiki no e hookomo ia malalo o kekahi aelike a mau aelike paha o ia anoi kekahi mau k@u e ae ana e lawelaweia me ka uku ole kekahi o na aina aupuni i kupono no ka hana ana, malama ana, a e ole ia hoohana ana aku o kekahi uwea a mau uwea paha o ia ano; E hookomo mai me ke dute ole i na mea hana a pau e lawelawe ia ana maka hana ana, malama ana a i ole ia hoohana ana aku o kekahi uwea a mau uwea paha o ia ano; E ae aku i ka lawe ana a me ka hoohanaia ana e like me ke kanawai i na aina, ka waiwai a i ole ia na kuleana hele i kupono no ka hana ana, malama ana a hoohana ana aku o ia uwea a mau uwea paha a me na hoohui ana ma ka aina o ia mau uwea; E hookuu no kekahi mau makahiki i ha’i ia ka nui maloko o laila i na auhau a pau maluna o ka waiwai e waiho ana maloko o ka Repubalika o ia uwea a mau uwea paha a i pili paha ia mau mea a i kupono a pili maoli paha i ka hana ana, malama ana a hoohana ana aku o ia uwea a mau uwea paha; E hookuu i na uku a me na auhau o ke awa maluna o kekahi moku a mau moku paha e hoohanaia ana ma ka hoomoe ana a malama ana paha i kekahi uwea a mau uwea paha o ia ano, a i ole ia i hoonoho ia ma na kai o ka Repubalika no ia hana; a E haawi aku i ia hana a mau hana paha i na kokua dala ana i ikeia ua kupono a pomaikai i ka Repubalika.
Pauku 3. Oia kokua dala ana ua hiki no e hana ia ma ke ano. (1) He uku dala a kokua paha i hoomaopopoia i ke’a a me keia hapalua makahiki no kekahi manawa i hoakakaia; a i ole ia, (2) He hooia ana o ka Repubalika no ka hookaaia ana o ke kumupaa, a i ole ia ka ukupanee, a i ole ia oia mau mea a elua o kekahi huina i hoakakaia o na bona o kekahi mea, a i ole ia o kekahi hui e hana ana, a i ole ia e hoohana aku ana i ia uwea a mau uwea paha; a i ole ia, (3) He uku kokua ma ka haawi ana aku i ka mea, a i ole ia i ka poe i hoakakaia maloko oia aelike i kekahi huina i hoakakaia o na bona o ka Repubalika e kau ana ka ukupanee ma ke ano a e hookaa ia i ka mamawa a mau manawa paha i hoakakaia maloko; a i ole ia, (4) He kakau inoa ana e lawe i na mahele kumu waiwai o kekahi hui a mau hui paha i hoohuiia, i kukulu ia no ka hana ana aku i kekahi uwea a mau uwea paha o ia ano; a i ole ia, (5) He hooia ana e loaa ana kekahi huina loaa i ka makahiki; a i ole ia, (6) Ke komo pu ana aku o keia aupuni me na aupini e ae me ka hana like ana a noho @na ana no kekahi uwea o ia ano; (7) He hoohui ana ae o kekahi mau hana elua a oi ae paha o na ano hana i olelo mua ia aenei maluna, a i ole ia ma o kekahi mau mea kupono e ae i hoakaka mua oleia ae nei maluna.
Pauku 4. E hookomo ia no hoi maloko o ia aelike a mau aelike paha na kumu a ka Peresidena a me ka Aha Kuhina i manao ai ua kupono no ka malama ana i na pono o ka Repubalika e pili ana i ka lawelaweia ana ame ka malama ana o ia uwea.
Pauku 5. O kekahi aelike a mau aelike paha i hooholoia malalo a i ole ia mamuli o ka mana o keia Kanawai, e pili ana i ka uku ana aku i kekahi dala, e kaa no ia malalo o ka hooholo ia ana a aponoia ana e ka ahaolelo.
Pauku 6. Ma keia ua ae ia a ua homana ia ka Peresidena e hoohana aku i kekahi aina e, ma ke huli ana a loaa na ike piha e pili ana i ka nui, ke kaumaha, kekahi agena a mau agena paha e kokua maloko o ka Repubalika a i ole ia ma ka hanaia ana a me ke ano o ka uwea a mau uwea paha i kupono no na hana i hoakaka ia maloko o keia Kanawai, a me ka moku a mau moku hana uwea i kupono, a me na mea e ae a pau i pili pono i ka manao nui o keia Kanawai, a me ka hooholo ana i kekahi aelike a mau aelike paha oia ano.
Pauku 7. I mea e hookaaia ai na lilo e loaa ana mamuli o keia Kanawai, ma keia ke hookaawaleia nei he umi tausani dala, mailoko ae kekahi mau dala iloko o ka Waihona i hookaawale ole ia no kekahi hana e ae, a oia mau dala, a i ole ia o ka hapa e ia mau dala i kupono e hooliloia aku ma ke ano i kauohaia ai e ka Peresidena.
Pauku 8. E mana aku no keia Kanawai, a e lilo i Kanawai mai a mahope aku o kona ia e aponoia ai.
Paulele Kapekepeke.
Halahu ka pahuna a ka Lunahooponopono o ke Aloha Aina, aole i loaa iho o Samaria.
Ua ike au i na manao pane a ka lunahooponopono o ke Aloha Aina, ma kona poo, “He Kahunapule hoo kamani! Ke Samaria Hoopilimeai!” Ua nana akahele au i kona mau olelo mai ka mua a hiki i ka hope o na mea i loaa mai, a ua maopopo loa ia’u keia mau mea
1 – Ua ano pupule loa ka noonoo o ka lunahooponopono. 2 – Ua piha kona naau me na manao o ke kanaka ahiu. 3 – Ua halahu loa kana mau pane mawaho o ke kumuhana i ulu mai ai keia mau kalai olelo ana. Ua wehe mua ae oia i kona mau manao pane, ma kona wehewehe ana i ka moolelo o ke kanaka Samaria, ka mea nana i haawi i na kokua i ke kanaka i haule iwaena o na powa. Aohe kahua o keia manao a ka lunahooponopono i lawe mai ai a hoopiha @pala i kana nupepa, oiai hoi, ma ka’u pane ma ke Kuokoa o ka la 20 o Iulai, aohe mau kamailio no keia kanaka Samaria, aole au i olelo ma ioa kukulu manao, he kanaka Samaria au, a i ole ua like au me ke kanaka o Samaria; nolaila au i olelo ai, ua pupule loa ka lunahooponopono o ke Aloha Aina i kona lawe ana mai ia moolelo i pili ole i ka’u manao i kalai ai. I mea e ike ai oe a me ka lehulehu pu i kou pupule, e hai aku au ia oe penei:
Samaria – o kekahi o na mahele ekolu o ka aina hoano, nolaila he aina o Samaria; aia a oleloia kanaka Samaria, alaila pololei kau pane o ka la 22 o Iulai. E ke hoa, e ikeia ka halahu o kau poka mua loa ia Samaria aina, o Samaria kanaka kau i ki ae nei.
O ka lua o kau pane, oia keia; O ko Karisto aloha wale mai oia ke kumu o ke ola, ua hoole loa ua luna hooponopono nei i na hana pono a maikai, pehea la e haawi mai ai ka Haku i ke ola ke ole e hana ke kanaka i kekahi mau hana a Iesu i kauoha mai ai oiai oia ma keia ao. Ua pili pu ke aloha o Karisto me na hana maikai, aole laua e kaawale. Ua hoike aku o Samaria, ke hana nei na kahunapule i kakoo i ke Aupuni, i kekahi mau hana maikai aole nae oia i olelo aku e oia mau loa ana ua poe kahunapule nei, oiai o ko ke Akua kuleana ia, aole no hoi e hiki i ka lunhooponopono o ke Aloha Aina ke komo ae me ko ke Akia aoao a oleo ma he kahunapule hookamani keia, a pela aku; oiai, o ka mana hana aia ia i ke kanaka, o na hoapono ana, mai ke Akua ka makua mai ia, aka ke hana mau nei ko’u manao no ko Akua lokomaikai a me ke aloha.
Ua alapahi mai nei ua lunahooponopono nei o ke Aloha Aina, aole ka oia i haalele i ke Akua, ua paa loa ka iloko ona ia manao Akua Heaha la ke kohu e keia olelo me kau e olelo nei, aohe ou makemake e hele iloko o ka halepule laa o ke Akua. O kou hoole ana i ko ke Akua hale, oia kou hoole ana i ke Akua, a o kou hoino a kuamuamu i ka inoa o na kahunapule i hoolaa ia ma ka inoa o ka makua, ke keiki a me ka uhane hemelele, oia no kou hoino loa ana aku i ua kahi kolu la; ka mea oi aku o ka mana, a nana auanei e paopao i kou poo, a e kuipalu i kou kino iloko o ka hoino mau loa ia.
Ua mao popo no nae la’u, ua piha loa kou naau i na manao o ke kanaka ahiu.
Ua helu lalau mai nei ua lunhooponopono nei i na kahunapule i haule i ka lepo, i ka moe kol@he, a he wahine manuahi, me na keiki kamehai, a ua hai pu mai nei i na kahunpule i make a i lawe ia imua o na aha euanelio e hookolokolo ai, o keia mau manao a pau, aole loa i ku maluna o ke kahua e kakele la nei na kalai olelo ana; ua hala aku ia mawaho ae o na kalai naauao ana oiai, e hoomanaoia, ma ke Aloha Aina o ka la 15 Iulai, ma ke kolamu o na nuhou kuloko, e ike ia keia mau lelo, penei:
“He 11 wale no o na kahunapule i lawe ole i ka hoohiki malalo o keia aupuni, a o kekahi poe iho, ua hihia i na kaula a ka nahesa o ke a@ nei, a haalele i ka mea a lakou i paulele ai.” – “A o kekahi poe iho” – Owai ia poe? Oia nona kahunapule i kakoo i ke Aupuni Repubalika o Hawaii, a i lawe i ka hoohiki, oia poe kahunapule ke kumu elelo, o lakou ka’u i olelo ai ke hoomau nei no lakou ma na hana pono, o keia poe ka ka lunahooponopono o ke Aloha Aina i olelo ai, ua hihia i na kaula a ka nahesa, a o Samaria kekahi o ia poe; nohea heia poe kahunapule au i helu mai nei a me ko lakou mau hewa, a ua make kekahi poe? E ka lunahooponopono lalau, e waiho pela, a i na ua make kekahi poe, e hookuu aku ia lakou e moe malie. E hoopololei iho oe i na kalai olelo ana maluna o na kahunapule i hoohiki i keia aupuni, a malaila wale no.
Ua hiki anei i ka lunahooponopono o ke Aloha Aina ke hai mai owai ia iwaena a na kahunapule i hoohiki e kakoo i keia aupuni e noho ana he wahine manuahi kana? A he keiki kamehai? a ke noho haahaa nei me ka pelapela?
Aole i pau.
Ka Hawaiian Gazette
He Nupepa Namu Elua Puka ana o ka Hebedoma, ma na POALUA a me POALIMA e hoopuka ianei e ka Hui HAWAIIAN GAZETTE COMPANY.
O ka Nupepa Kuloko Alaka keia ma ka Olelo Beritania e hoolahaia nei maloko o ka Paeaina a hala loa aku i na Aina E a ke heluhelu ia nei e na mea a pau ma na oihana na Halekula a komo loa iloko o na ohana.
Ka Uku Pepa Laulaha.
No ka Malama $ 50
No ka Makahiki Kuloko 5.00
No ka Makahiki Kuwaho 6.00
Keena Hana Helu 318.
Alanui Kalepa
Pahu Leta O. Honolulu Oahu
2531-tf
Na Hua Kuni Inoa
Eia ka Hui Hawaiian Gazette Co., ke hana paka maoli nei i na Hua Kuni Inoa o kela a me keia ano, nui a liilii e like me ka iini a ka manao.
O keia mau Hua Kuni Inoa, ua lawa ia no ke kahakaha ana ma ke kanana a pepa e ae e hoailona ai i ka Inoa a kohu maluna o kekahi mea i makemake ia e kuni a kaha paha.
He like ole na uku o na Papa Kuni Inoa, no ka mea aia no ke kau ia o ka uku a maopopo ke ano o ka Papa Inoa au i makemake ai, he nui a he liilii paha. Aka he oluolu ka uku a he waipahe na kuka ana.
E kipa kino mai e nana i ike kumaka, a i ole ia e hoouna mai i na kauoha ma ke
Keena Hana – Ma @ka @Halepai@ HAWAIIAN GAZETTE, Helu 318 Alanui Kalepa, Honolulu 2531-tf