Ka Nupepa Kuokoa, Volume XXXIV, Number 29, 20 Iulai 1895 — Page 4
| This text was transcribed by: | Kate Motoyama |
| This work is dedicated to: | sister sally vrana |
Ka Nupepa Kuokoa
KE KILOHANA POOKELA NO KA LAHUI HAWAII.
KA
NUPEPA KUOKOA
--ME--
Ko Hawaii Paeaina i Huiia
--
o ka Makahiki - - - $2 00
No Eono Mahina - 1 00
Kahiko ka Rula.
--
HAWAIIAN GAZETTE CO.
GEO. H. PARIS, Luna Nui.
J. U. KAWAINUI, Luna Hooponopono.
No Honolulu, Oahu, Lakou a pau.
--
POAONO, - - - IULAI 20, 1895.
--
KULA SABATI.
--
HAAWINA XVIII. AUG. 4.
Ka Olelo Hoike o ka poe Kiu. Nahelu
13@17-20; 23, 33.
HOOUNA aku la o Mose ia lakou e makaikau i ka aina o Kanaana, i aku la hoi ia lakou. E haele oukou ma keia aoao kukuluhema, a e pii ilua i ka mauna.
18 E nana i ke ano o ka aina, a me na kanaka e noho ana ilaila, he ikaika paha lakou, he nawaliwali paha; he hapa paha lakou, he nui loa paha;
19 Ma ka aina hoi a lakou e noho la, he maikai paha, he ino paha; a me na kulanakauhale a lakou e noho la, ma na halelewa paha, ma na pakaua paha;
20 A me ke ano o ka aina, he momona paha, he wi paha; he laau paha ilaila, aole paha; i nui hoi ka ikaika o oukou, a e lawe mai i kekahi hua o ka aina. O ka manawa ia o ka huawaina pala mua.
23 A hele aku lakou i ke kahawai i Esekola, a oki iho la i kekahi lala me ka huiwaina hookahi, a amo mai la maluna o ka mamaka mawaena o na kanaka elua. O na pomeraite kekahi a me na fiku.
24 Ua kapaia ia wahi ke kahawai o Esekola no ka huiwaina a na mamo a Iseraela i oki ai malaila.
25 A hala na la he kanaha a ka makaikai ana i ka aina, hoi mai la lakou.
26 Hele mai la lakou a hiki io Mose la a me Aarona, a me ke anaina kanaka a pau o na mamo a Iseraela, i ka waonahele o Parama, i Kadesa; a hoakaka mai la lakou ia laua, a i ke anaina kanaka a pau, a hoike mai la i ka hua o ka aina.
27 Olelo mai la lakou iaia, i mai la, Ua hele aku makou i ka aina au i hoouna aku ai ia makou, a he oiaio no e kahe ana ka waiu a me ka meli ialaila; eia hoi ka hua o ia wahi.
28 Aka, ua ikaika na kanaka e noho ana ma ia aina; a ua paa i na papohaku na kulanakauhale, a nui loa: eia hoi kekahi, ua ike makou i na keiki a Anaka malaila.
29 E noho ana ka Ameleka ma ka aina kukuluhema; o ka Heta, me ka Iebusa, a me ka Amora, ua noho lakou ma na mauna; a ua noho ko Kanaana ma ka moana a ma kapa o Ioredane.
30 Hoomalielie iho o Kaleba i kanaka imua o Mose, i mai la, E hele koke aku kakou, a e komo i ka aina; no ka mea, e hiki pono no ia kakou ke lanakila maluna on a.
31 Aka, i mai la na kanaka i hele pu me ia. Aole e hiki ia kakou ke hele ku e i ua poe kanaka la; no ka mea; ua oi aku ko lakou ikaika i ko kakou.
32 A lawe mai la lakou i ka olelo hoino i ka aina a lakou i makaikai aku ai i na mamo a Iseraela, i mai la, O ka aina kahi a makou i kaahele ai e makaikai aku, he aina ia e hoopau ana i na kanaka e noho ana malaila: a o na kanaka a pau a makou i ike ai malaila, he poe kanaka nunui.
33 Malaila makou i ike ai i na kanaka nunui, i na keiki a Anaka, na ka poe kanaka nunui mai; ua like makou me na uhiui i ko makou maka, a pela hoi makou imua o ko lakou maka.
PAUKU GULA, Nahelu 14:9. Me kakou no hoi o Iehova: mai makau ia lakou.
MANAO NUI. E pono ke hoole i na olelo hooweliweli, ina makemake kakou e hooko i na kauoha o ke Akua.
OLELO HOAKAKA. Ua haalele ka Iseraela ia Mauna Sinai ma ka mahina o Mei, a hiki i Kadisa Barenea ma Iulai, pau na la kaahele umikumamakahi, Kanawailua 1:2. Ua hapaia ua wahi la "Aina Gadisa," oia hoi "ka punawai hemolele," i keia wa. He waihona wai ano nui malaila. O keia wahi he pukaua no hoi ma na palena o Kanaana ma ka hema, he mau mile kanalima mai Beereliba mai. He wa kupono no ke komo ana o ka Iseraela. Ua pau ka paonioni ana o Aigupita me Babulona, no ko laua nawaliwali. Ua makau nae ka Iseraela. Ua kauoha o Mose ia lakou e hele imua, Kan. 1:20,21. Ua noi aku lakou iaia e kali a loaa ia lakou he olelohoike mai kekahi poe kiu mai. Ua ae aku o Mose i ko lakou noi, a koho i mau kanaka kupono 12.
17. KUKULUHEMA,--oia hoi ke Kona o Kanaana; aole keia ko lakou kukulu e hele aku ai, no ka mea ua hoomoana ka Isearaela mawaho o Kanaana ma ka aoao hema. 18. NANA,--i keia mau mea eha, (1) Ke ano o ka aina, (2) Ke ano o na kanaka, (8) Ke alalhele kupono e komo ai, (4) Na hana e hooma kaukuu ai i ka Iseraela no ka lanakila. 19. PA-KAUA,--Na wahi kupono e pale aku ai i na enemi. 20. MANAWA,--ma Iulai me Augate. 21. REHOBA,--oia hoi ma ka palena akau o Kanaaana, Kan. 18:28. 22. ANAKA,--he ohana lahui, Iosua 14, 15, nona na mahele ekolu i oleloia ma keia pauku. O ke ano o ka inoa oia no a-i, me he mea la ua ikaika lakou e like me na bipikane ma na aahuki o ka a-i. O Heberona ko lakou kulanakauhale alii, Iosua 15:13. 23. ESEKOLA,--he awawa ma ka aoao akau o Heberona. O ke ano o ka inoa oia hoi huiwaina. HUIWAINA,--ua kaulana loa o Suria no kona mau huawaina, a lilo keia i hoailona o ka lahui Iudaio. Ua kanuia kekahi kumuwaina mau Suria mai ma Enelani, a hoohua pono. Ua loaa kekahi huiwaina nona na paona he 19 a hoounaia aku i kekahi keonimana ma ke ano he haawina manawalea. Ua halihaliia e na kanaka elua ma ka manele i mea e pilikia ole aina hua. O ke kaupaona nui o ka huiwaina i oleloia, oia no he 25 paona me na auneka 5: nona ka loa he 24 iniha, a me ka laula he 22 iniha. POMERAITE--oia no na hua ano like me apala, e ulu ana ma kekahi mau pa-hale ma Honolulu nei. 24. KAHAWAI,--awawa ka pololei. 25. Hor,--me ka pilikia ole; no ka mea, ua like lakou me ka poe Aigupita e komo pinepine ana i Kanaana. 26. HOAKAKA,--i ka momona o ka aina. 27. WAIU,--nui ka mauu, nui hoi na pua. MELI,--aole loaa i kanaka ke kopaa a hiki i keia heneturia: aka o ka meli oia no ka mea ono hookahi. 28. PAOPHAKU,--e like me ko AIgupita, oia ka poe e noho ana ma ka waonahele, ka poe a ka Iseraela i kaua aku ai, aole no lakou na pakaua: ua kaua aku lakou ma ke aka. Aole no ka Iseraela na mea kupono no ka lawepio ana i na pakaua. 29. AMALEKA,--e noho ana ma ka aoao hema o Kanaana. Puk. 17:8-16. HETA,--he lahui kahiko nui loa ko lakou aupuni; ano like me Babulona. AMORA,--ka poe kuaaina, he Niape, Amosa 2:9. KANAANA,--ke poe e noho ana ma na aina papu, haahaa. 30. HOOMALIELIE,--me ka hooikaika ana. KALEBA,--oia me Iosua, Nah. 14:6, na koa elua wale no, e hoike ana i ka paulele ana ia Iehova nona mai ke kauoha e paio aku i ko Kanaana. Aka, ua makau nui ka Iseraela, a uwe no ka poe holookoa, a huhu aku ia Mose, a makemake e hailuku ia laua, ke ole ke ahi mai ke keena kapu mai e hoopakele ia laua, Nah. 14:10. 31. KANAKA,--he umi, oi aku ka helu nui, emi loa ka manao paulele. 32. HOOPAU,--no ka mai lepera paha, no ka hewa nui o na kamaaina ma ka noho huikau ana, moe kolohe, a pela'ku. Aole pili ka hewa i ka aina; he wahi nani loa ia. 33. UHINI,--he olelo haanui keia, e hoopaewa ana, e hoolauwili ana, e hookekee ana i ka olelo oiaio. HE olelo hoike keia e alapahi ai i ka aina, Nah. 14:36. Ua hoopoina lakou i ko Iehova mana, a lulu lakou i na anoano o ka haohao, kuipehi, kanalua.
I. KE KAUOHA I KA POE MAKIU, 17-20. Heaha ko Iehova kauoha ia Mose? Ehia mau kiu i waeia? Heaha ko Mose kauoha ia lakou? Heaha na mea pohihihi e pili ana ia kamaaina? Heaha na pohihihi a lakou i hoomoakaka ai e pili ana i na kamaaina? a me ko lakou ano noho? Heaha kekahi mau mea a lakou e lawe mai ai? Heaha ka mahele o ka makahiki ia wa? Heaha ke kumu no ko lakou hoounaia ana, Kn. 1:19-23? Ina paha ua paulele pono e ka Iseraela ia Iehova, ua makemake anei lakou i kauwahi olelo no na makiu mai? Ua loaa anei i ka Iseraela he wa kupono e komo ai i Kanaana? Ua hoomakaukau anei ke Akua i na mea kupono no keia hana?
II. KA HOI HOU ANA MAI O NA MAKIU, 23-27, Heaha ka hana o na kaiu? Ua maalahi anei keia hana? Heaha ka nui o ka aina a lakou i makaikai ai? Ehia mau la no ko lakou kaahele ana? Heaha kekahi mau hua a lakou i lawe mai ai? Heaha ke ano o ka aina nona mai keia mau hua? Heaha ka olelo hoike e pili ana i ka momona o Kanaana? Mahea o Esekola? Heaha ke ano o ka inoa? Heaha ke ano o na hua nia ua a waawa la? No keaha ko lakou auamo ana i ka huiwaina, no ke kaumaha paha, no ka pale ana aku i wahi poino paha? Heaha ko kakou hooilina e loaa ai? Heaha ko oukou olelo hoike e pili ana i ka pomaikai o ka poe manaoio? E pono anei i ka poe manaoio a pau loa ke hoike aku i na pomaikai i loaa ai ma ke ano haipule, na hana hoomana, ka ike oiaio? Heaha ke kahi mau hua maikai, Gal. 5:22, 23?
III. KA MAKAU O NA MAKIU, 28-33. Heaha ka olelo hoike o na makiu e pili ana i na kamaaina ma Kanaana? Heaha na inoa o kekahi mau ohana lahui a lakou i hoike mai ai? Heaha ke kumu o ko lakou makau? Heaha na mea kue a lakou i hoike nui ai? Heaha na mea kokua a lakou i hoopoino loa ai? Ua ike anei oe i na inoa okeia mau makiu he umi? Owai na kaiu elua no lau aka olelo hoike kupono? Heaha ke kumu no ko laua olelo hooikaika? Heaha kekahi mau pilikia imua o ka poe manaoio, Ep. 6:12; Iakoba 1:2? Heaha na koa hiape imua o kakou? He kumu anei keia mau pilikia no ka hoole ana i na olelo paipai o Iesu? Heaha kekahi mau kumu no ko kakou paulele ana ia Iesu, ko kakou mea alakai i ka pomaikai lani? Pehea e hiki ana ia oe ke hoolaha aku i ka olelo hoike alapahi e pili an ai ka pomaikai o ka manaoio?
MANAO PILI. 1. Ua ike anei oe i mau hua maikai o ka manaoio? 2. E pono anei ia kakou ke pai aku i na mea kue mamua o ka loaa ana ia kakou o ka pomaikai uhane? 3. E pono anei ia lakou ke makau i ka nui o na pilikia imua o kakou? 4. E hele aku anei oe i Kanaana a i ole paha e hoole ana oe i ko Iesu olelo paipai? 5. Heaha ke ano o kou olelo hoike e pili ana i ka pomaikai o ka poe manaoio?
--
Dr. LIERIG & CO.
NA KANAKA Na Kauka no na mai
Kulema Nalu a
________________ me Kuulala.
O ka Dr. Liebig Iaau hooikaika kino oia ka laau lapaau hoola maikai loa no ka nawaliwali, ka emi o ke ano noonoo kanaka makua a me na mai malu, ka hoopio awiwi ia mai a me ka hoomakaukau no na hana o ka noho ana mare, ka oluolu a me na koikoi. He hookahi omole $1 hoao e haawiia mai ai a e hoouna ia aku paha me ka uku ele i kela a me keia mea e hoike mai ana i na hiohiona mai. E kipa a i ole e leta mai @@@ 409 Geary St., puka komo 4@5 Manson St. San Francisco. 25@7-1y
HE MOOLELO WALOHIA
--NO NA UI--
Makua Ole Elua.
--
LA FOSA,
Ka Makona,
-- --
--A ME--
Pia Fosa,
KA MEA I PIHA I KE
ALOHA.
--
DE WORDISE,
Ka Naita Puuwai Piha
Hamama a me ka Olu
Waipahe.
--
MOKUNA XIV.
KA IKAIKA O KE KANAWAI.
Aole he hana ano nui na ka naita o ka ninau ana i keia manawa i ke Kauaase de Linire i ka hele ai a e ike i ka mea ana e lia mau nei, no ka mea ua palupalu kona naau i keia manawa iaia, a mahope iho o kona haawi ana aku i ka palapala kahi a Heneriata e noho nei, a me ka loaa ana mai iaia ka pane no kona hiki aku ilaila mahope o ka pau ana o ka pule, haalele iho la ka naita i ke Kaunase e hoopakaa wili ia ana kona noonoo e na mea o ke au i hala, a iaia hoi e hele la e imi i kona wahi pono ma ka launa pu ana me Heneriata, a i hoohauoli ia ai oia malalo o na olinolino o ka la e ka mea ana i aloha ai.
O ke kauwa a De Wodise i hoouna ai imua o De Linire no ka haawi ana kau i kekahi kokua iaia, ua loaa aku i na kauwa la ke Kauna iloko o ke kulana pioo nui, i hooulu ia mai hoi mamuli o ka hana a kana keiki.
E kii koke oe i ke kakauolelo nui wahi a De Linire i ke kauwa.
I ka maanwa i kome mai ai o ke kakauolelo nui, ua hoohikilele ia oia ma o ka ike ana aku i kona haku iloko o ke kulana kupikipikio; a ma ke ano o kana kamailio ana, i hoomaopopo loa aku ai ke kakauolelo, ua oi aku ai ke kakauolelo, ua oi aku mawaho o ka mea kupono kana mau olelo, a ma na ano a pau, aole oia iloko o ka noonoo maikai.
E hele koke oe e imi me ka hikiwawe loa i kahi o ka naita De Wodise e hunakele nei i ke kaikamahine ana i lawe mai ai ma o ka malapua ae o Bele Ea!
I kukauolelo hoi e noke wale ana no i ka oni i o a ianei e like no hoi me ke ano o ka poe hana keaka i kona haku e waiho a make ana iluna o kona noho, a oili aku la oia iwaho e like me ka wili ana a ka puahiohio.
A iloko o na minute helu wale no ku hou ana no ua kakauolelo nei.
Aia ka wahine opio i Paupou Sana Honole kahi i noho ai, wahi ana me ke ano hoolea o ke kamailio ana.
AKa he mea pohihihi ia'u ke olelo ae, ke lu wale nei ka naita opio i kana dala no ke malama ana i ua wahine opio nei.
E kahea koke i na koa no ka hoomakaukau ana no ka hele pu ana me a'u. Na'u a owau no ka mea nana e hopu i keia kaikamahine.
Aole he nanaina kahaha maluna o kona helehelena haahaa malalo iho hoi o kona haku, a he mea oiaio aole io no he kahaha maluna on a, a in a ua komo io kekahi iloko on a, aka haalele iho la oia i ka lumi no ka hele ana e hooko i ka makemake o ke Kauna.
Ua makemake au e ike e nalowale aku keia manao pupule aloha lalau o kuu keiki mai kona poo aku wahi a De Linire me he mea la e kamailio ana no laia iho. O keia kaikamahine, e pono oia e lawe ia i La Sapetire, a o ka naita iho e hooluolu oia i kona mau manao oiaiu iloko o Pasetile a hiki i ka hoi hea ana mai o kona mau noonoo maikai.
A pela iho la ka manao ana o keia kanaka hilahila ole ke kuhina o na makai i manao ai e hookaawale i ke aloha kupouli o na ui opio mai ka hui hou ana aku, a i loaa ai i kekahi o laua ka manao kue no kekahi.
O kona mare hoi, he mare ia i hoowahawaha ia e kona mau makua, ama ka nui o ka iini o kona puuwai no ke ake koko ai ii a me ka inoa hanohano, aole hoi oia i hoomaopopo i ke ano o ke aloha kupaa lioko o ke kanaka.
Aole i pau.
HE MOOLELO
--NO:--
Frank Reade Opio
Ka Mea Nana i Hana ka Moku Lele ma ka Lewa-lani--Ka Mea
Nana i Kaapuni na Wahi a pau o ka Lewa--A mai ke
Kukulu Akau a ka Hema--A mai ka Hikina a ke Komo-
hana--Ka Mea Kupaianaha o ke Keneturia Umikuma-
maiwa---Ka Naauao Kelakela o ke Kanaka--Ka Haa-
wina Makamae a ke Akua i Haawi mai ai.
KA "POAI LEWA."
MOKONAII.
I kela wa, ua hao mai la ke anu me kona ikaika a pau, aka ua lilo ia i mea ole i na ea hoopumehana o loko o ka Poni Lewa, a ua lilo hoi i mea ole i na aahu hulu holoholona i hoomakaukau mua ia e ka opio noonoo akahele, a aohe he mau hemahema i koe.
I ke ao pono ana ae, ua ala mai la o Pomp a me Keoni, a hoomakaukau koke iho ia ka opio no ka hoemi ana iho i ka Poai Lewa ma kekahi wahi ano palahalaha maikai o ka aina, eia nae, aohe wahi waiho wale o ka aina, oiai ua paa wale no i ka halii paa ia e ka hau paakiki, a ma kekahi mau wahi, ua like ke kiekie o na puu hau, me he mau kuahiwi ia. Nolaila, ua hoemi iaiho la ka Poai Lewa mawaenakonu o kahi mokupuni, a ma kahi hoi e lululu ai mai na kikiao makani mai.
He la ano malamalama ua la la, oiai, o ke ano o ko ka la hele ana ia wahi, aia wale no maluna iki ae o ka ilikai, a pela iho la e poai puni ai no aneane elima mahina, a o na mahina i koe ehiku o ka makahiki, aole loa he ike ia o ka la, aka aole nae he pouli loa e like me ko kakou mau po nei, aka he ano malamalama no e like paha me na po mahina piha malaelae loa; a oi iki no paha. O ka mea wale no e maopopo ai o ke ao mai ka po mai ma kela wahi, ala wale no mamuli o ka uwati, a pela iho la o Frank ma i mahele ai i ke ao a me ka po. Hoemi malie ia iho la ku Poai Lewa a pili i kahi paa, a hoopaa pono ia iho la me kona mau heleuma nunui, a i ka ike ana o Frank ua paa pono ka moku lele a mahope hoi o ke ala ana mai o na poe a pau ua paina iho la ko lakou aina kakahiaka, a i ka pau ana, ua hookuu aku la o Frank ia Pomp, Keoni a me ka luina malihini e hele alkou e makaikai i ka mokupuni, a e hahai holoholona hoi e like me ko lakou makemake.
He mea e ka hauoli o ua poe kanaka la, i ka loaa ana ia lakou he manawa e hihi hou ai maluna o ka aina paa, a nolaila ua eleu koke ae la lakou me ka lakou mau pu ki holoholona, a pau nui aku la me ka hauoli.
I kela wa, ua kuka pono iho la o Frank me ke kauka aoo, no ka laua huakai no ka hele ana e huli i ua buke ia.
Nolaila, ua kamailio aku la o Frank ia Isabela a me kona makuakane e noho malie no laua iluna o ka moku a e hele ana hoi oia me kauka Yanadeka e huli i ka mea a kona naau i kau nui loa ai, oia hoi ka buke moolelo a kekapena pepehi kanaka.
Mamua mae o ko Frank in a haalele ana iho, ua aoao mua aku la oia i ka makuakane o Isabela i ke ano o ke ki an ai ka pu uwila, oiai wahi a ke opio noonoo nui wale, "aole i ike la aku na poino, nolaila he mea pono e maopopo mua ia olua ke ano o ke pale ana aku i na enemi. He mea oiaio no paha aohe no he mau enemi o keia wahi, aka aole nae i ike ia aku."
I ka pau ana o ka lakou mau kukakuka ana, ua haele aku la o Frank me kauka Vanadeka me ko laua lako pono me na pu, no ke pale ana aku i na hea in a paha laua o halawai aku ana me ia mau mea hiuhiu.
Hookolo pololei aku la laua e like me ke kuhikuhi a ka mea i palapala ia e ke kauka mai ka waha mai o ke kapena.
E waiho ae kaua e ka mea heluhelu ia laua e hele huli ana i kahi o ka buke i waiho ai, a e huli ae hoi kaua e nana ia Isabela a me kona makuakane maluna o ka Poai Lewa.
I ko Frank ma hala ana aku, ua hoi koke aku ia no ke keonimana aoo no ke keena hooluolu a malaila oia i hoonanaea ai i ka heluhelu buke, oiai ua hoolako mua ia e Frank na buke heluhelu o kela a me kela ano o ke ano maikai wale no a piha kekahi pahu aniani waiho buke. No Isabela hoi, aole oia i hoi koke aku, aka ua hoomau iho la no i ke ku ana ma ka oneki, me ka ohenana ma kona lima, a e hoomau ana no oia i ka nana ana i na mea i hele aku no ka huli i ka buke, a me ha umauma kapalili oia e kau ae ai i kana ohe a nana aku i ka hele o ka mea a kona puuwai i aloha ai. Ua hoomaopopo iho hoi oia, aole loa i loaa iaia keia ano aloha i kana kane mua a akahi no a loaa i ke keiki ui a kaeaea o Readestown, ka mea hoi nana i hoohoka na akeakamai o ke kulanakauhale nei.
Ua hoomau aku ua ui nohea nei ma ke kilo ana aku i kana ipo a hiki wale i ko laua nalowale ana makahi aoao o ua wahi mokupuni la a akahi no oia a hulihoi aku no ke keena nui kahi a kona luaui makuakane e noho ana.
I kona komo ana aku, ua ea malie ae la ke poo o kona makuakane, a me ka mino aka ana iho, ua pane mai la oia:
"Aole anei ou makau i ke anu e kuu aloha?"
"Aole, e papa," wahi a ka pane a ua ui la, me ka puapuai mai o ka ula ohelohelo ma kona mau papalina nohea.
Aole i pau.
--
I ka la 11 o Iulai, ma Waimea, Kauai, ua hanau mai na ka wahine a Rev. G. L. Kopa, kahu o ka ekelesia o Kawailiula, he keikikane ohaha no ka Repubalika o Hawaii.
--
I ka haulelau o ka 1893, loaa iho la ke keikikane a Mr. T. A. McFarland, he haole kalepa ano maka hanohano o Live Oak, Sutter Co. Cal. i ka mai kunu koikoi loa. Mamuli o ka ikaika loa o ka eha ma ka umauma ua loohia i ka umii a me he mea ia e loaa ana i ka wela ma ke akemama. Ua hoohainu aku kona makuakane i na olopu nunui lehulehu o ka CHAMBERLAIN'S Luau Kunu, a pela i pau ai a oia loa ke kunu. Ke olelo nei o Mr. McFarland i na wa a pau e loaa ai kana mau keiki i ka nae e haawi ana oia ka CHAMBERLAIN'S COUGH REMEDY (Laau Kunu Ola), a he ola io maoli no. Ke manao paa nei oi he laau kunu oi loa keia ma ka makeke. E loaa no ma na Halekuai Lapau Lapaau a pau, a o BENSON, SMITH & CO. na Agena ma ko Hawaii Paeaina. tf
--
E heluhelu i keia malalo iho i lawe ia mailoko mai o ka palapala a Chas. M. Gutfifeld o Reedley, Fresno Co. Cal.
"Me ka huoli au e hoike aku nei ma ko'u inu ana no hookahi la i ka CHAMBERLAIN'S laau Kunu, ua hoola i ke kunu koikoi i loaa ia'u. Ua nalulu ino loa ia ko'u poo a hiki ole ke moe i ka po. Ke hoikeike aku nei au i keia laau laapau ola. Oke anu i kokoke loa e komo iloko o ke poo amahope hoohele aku i ka puu a me na ake. Ma o ka inu ana la i keia laau i ka wa koke e loaa ai i ke anu, e hoola koke ia i ka wa pokole a keakea ia ke komo loa ana aku iloko o na ake. E loaa keia laau ma na Halekuai Laau Lapaau a pau, a o BENSON, SMITH & CO. na Agena ma ko Hawaii Paeaina. tf
Ka Hawaiian
Gazette
He Nupepa Namu Elua
Puka ana o ka Hebedo-
ma, ma na
POALUA a me POALIMA
e hoopuka ia nei e ka
Hui
HAWAIIAN
GAZETTE
COMPANY.
O ka Nupepa Kuloko
Alakai keia ma ka Olelo
Beritania e hoolahaia nei
maloko o ka Paeaina a
hala loa aku i na Aina E
a ke heluhelu ia nei e na
mea a pau ma na oihana
na Halekula a komo loa
iloko o na ohana.
Ka Uku Pepa Laulaha.
No ka Malama . . . . . . . . .$ 50
No ka Makahiki Kuloko. 5.00
" " Kuwaho.. 6.00
Keena Hana Helu 318.
Alanui Kalepa.
Pahu Leta O. Honolulu Oahu
2531-tf
--
Na Hua
Kuni
Inoa
Eia ka Hui
Hawaiian
Gazette Co.,
ke hana paka
malli nei i na
Hua Kuni
Inoa o kela
a me keia
ano, nui a lii-
lii e like me
ka iini a ka
manao.
O keia mau Hua Kuni
Inoa, ua lawa ia no ke
kahakaha ana ma ke
kanana a pepa e ae e
hoailona ai i ka Inoa
a kohu maluna o ke-
kahi mea i makemake
ia e kuni a kaha paha.
He like ole nauku o
na Papa Kuni Inoa, no
ka mea aia no ke kau
ia o ka uku a maopopo
ke ano o ka Papa Inoa
au i makemake ai, he
nui a he liilii paha.
Aka he oluolu ka uku
a he waipahe na
kuka ana.
E kipa kino mai e
nana i ike kumaka, a
i ole ia e hoouna mai
i na kauoha ma ke
@@@@ Hana-Maika [Halepai HAW-
AIIAN GAZETTE, Helu 318
Alanui Kalepa-Honolulu
2c31-tf
--
Halepai
Hawaiian
Gazette.
O keia ka Halepai Nupepa Ala-
kai ke Kulanakauhale o Hono
lulu nei. Ua lako i na Hua Ke-
pau o na ano a pau a ka make-
make e ui ae ai.
Eia ma keia Halepai e pai ia
nei ka Nupepa KUOKOA, a me
Nupepa HAWAIIAN GAZETE
PACIFIC COMMERCIAL AD-
VERTISER CHURCH CHRO-
NICLE a me PLANTER'S
MONTHLY.
Ua hiki loa i keia Halepai ke
pai aku i na pepa nunui hooiaha
alanaui, na buke, na bila kikoo,
ai ahaaina a me na hana e ae
a pau o ka oihana pai.
Eia maloko o keia Halepai he
Keena Humuhumu Buke, kahi
e humu ia ai na Buke, na pepa
a me na mea a pau i pili i ka
humuhumu ana i na palapala.
He oluolu ke kuka ana a he
emi kupono na auhau.
Keena Hana, Helu 313 Alanui Kale-
pa, Honolulu ka Hale iluna.
2531-tf
Hoolaha Kumau.
--
Aole loa e maikai e oluolu ke ola ana o kekahi mea kino uhane oia in a he aaiole kona akepaa a hiki ole ke lawelawe i kana mau hana me ka hololea. E hahai ana ka nalulu a me na nawaliwali e ae ma ka moali o ka ake ponalo. He mea oiaio keia i hoolaio ia ma na wahi o na poai oluolu akau iloko o ka hapaha keneturia, o na
HUALE A AYERS,
oia wale no ka LAAU HOOLA AKE maikai loa i ikeia. E hoola ana i ka lepopaa, ka nalulu eha, na ma'i oloko o ka opu, a ma ke ano LAAU OHANA aohe on a lua e like ai.
O ka Ayers Sasaparila, oia ka Laau Hoomaemae Koko kilakila, e haawi ai i ka ikaika a me ka hooponopono ana ia loko o ke kino o ke o ka ili, e hoopau ana i na maluhilukanaka. E pepehi a uiupa ana i na PUHA, e hoola ana i na pohapoha hi o ke ola ana a e kipaku loa ai i na ano ma'i a pau. O ka poe ma'i no ka wali pono ole o ka ai, ka nawaliwali mau a ano ma'i e ae i ulu ae mai ke koko ino mai, he mea pono e inu i ka laau
SASAPARILA A. AYERS.
He laau e hooikaika ai i ka nawaliwali, a e hoopuipui mai ai i ke kino. Ma ka inu ana i keia laau, e hoonoono ia ai ka ai ana, oluolu ka moe ana a maikai ke ola ana.
O ka Ayers Cherry Pectoral laau, aohe lua ma ka hoola awiwi ana i na KUNU, ANU a mena PUU EHA. E hoola ia na KUNU KALEA a me na ma'i pili i ke ake me ka hikiwawe loa.
O na Huaale a Ayers, na Sasaparila a me ka Ayers Cherry Pectoral, aia kahi e loaa ai ma ka Halekuai o ka
Hollister Drug Co. Lt.
Na A@@na ma ka Paeaina Hawaii.
251-4
--
KAKELA
ME
KUKE
--
KA - HALEKUAI - NUI
-O NA-
WAIWAI LIKE OLE
--
NA MEA
HANA KAMANA A PAU
Na lako pili hao kukule hale,
Na kepa,
Na lei ilio,
Na kaulahao ilio,
Na Pahi,
Na Upa,
Na kope hulu,
Na Palapala.
PAUALU LIO
Na mea mahiai,
Na au ho,
Na au koi,
Na kua bipi,
Na lei bipi,
Na kaulahao bipi,
Na uwea pu,
Na kuu palala,
Na mea piula,
Na ipuhao.
Makau me Aho Lawaia
Na Iliwai,
Na kaula,
Na hulu p@@,
Na palumi,
Na pena, me ka aila
Na kopa,
Na aila mahu
Na pakeke
Na pakeke aho,
Na kapu hao,
Na pauda,
Na kukaepele,
Na uwiki, a me
Na ipukukui.
Mikini Humhumu Kaulana
Wilcox & Gibbs, Hookahi Lopi.
Ka Remington, Elua Lopi.
A me na ukana he nui loa, o kela ano me keia ano.
Kakela me Kuke
@@@@ @