Ka Nupepa Kuokoa, Volume XXXIV, Number 24, 15 June 1895 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

KA

NUPEPA KUOKOA

 

Ko Hawaii Paeaina i Huiia

            o ka Makahiki                         $2.00

            No @ Mahina                           1.00

Kuike ka Rula

HOOPUKAIA @ KA

HAWAIIAN GAZETTE CO.

GEO. H. PARIS,        Luna Nui

J. U. KAWAINUI, Luna Hooponopono

No Honolulu, Oahu, Lakou a pau

POAONO,                                                                  Iune 15, 1895

 

KULA SABATI.

HAAWINA XIII.    IUNE 30.

HOIKE KAPAHA

            PAUKU GULA.  Hebera 12:2. E nana aku ana hoi ia Iesu, i ka mea nana i hookumu, nana hoi e hoohemolele ko kakou manaoio.

            Heaha na kumu hana, na pauku gula, na manao ano nui, na mahele ekolu ma kela a me keia haawina no keia hapaha makahiki?

            Pehea i kipa o Iesu ma kona komo ana ia Ierusalema?  Heaha ka olelo nane e pili ana i na kahuna o ka lahui Iudaia, aole nae i malama pono ia?  Heaha ka uku hoopai no ka hoohana ia Iesu?  Heaha kekahi hana no kela a me keia mea manaoio e malama pono ai?  Heaha kekahi ahaaina a Iesu i kukulu ai?  Heaha ko Iesu olelo ao e pili ana i ko kakou malama mau ana i keia ahaaina? Heaha ko Iesu olelo hoohilahila i kana poe haumana ma Getesemane?  Heaha kana pule ia wa?  Owai ka mea alakai i ka poe makai i hopu ai ia Iesu?  Heaha ka hoailona e maopopo ai Iesu?  Heaha ka hana o na makai? Heaha ke ano lawehala i olelo ia ma ka hoopii ana ia Iesu imua o ka ahahookolokolo?  No keaha la ua lawe ia aku o Iesu imua o ke kiaaina Roma? 

Heaha ko Pilato olelo hoike e pili ana ia Iesu?  Heaha ka olelo hooho o ka aha kanaka Iudaio oiai ua makemake o Pilato e hookuu wale ia ai?  Heaha ka olelo hoike inoa maluna o ke poo o Iesu ma ka laau kea?  Heaha kekahi hana kupaianaha oiai o Iesu i kaulia ma ke kea?  Heaha na olelo hope loa o Iesu? I ka la hea o ka hebedoma ua kaulia o Iesu ma ke kea?  I ka la hea ua ala hou o Iesu mai ka make mai?  Heaha ka olelo o na anela i na wahine ma ka hale kupapau o Iesu?  Ia wai ka mua o Iesu i hoike ai Iaia iho?  Heaha ko Iesu olelo i na haumana elua ma ke alaloa i Emausa?  No keaha la aole ike lakou Iaia?  Owai na mea ehiku i ikemaka ai ia Iesu ma ke kapa o ka lokowai o Galilaia?  Heaha kana hana mana i hanaia malaila?  Heaha ko Iesu kauoha hope loa ia Petero?  Heaha ka hana kupaianaha he mau la kanaha mahope o ko Iesu aloha ana?

Hoike Hui o na Kula Sabati o ka Mokupuni o Kauai.

            E hoike hui ana na Kula Sabati o ka mokupuni o Kauai ma ka luakini o Lihue ma ka la 30 o keia mahina Iune 1895, hora 10 kakahiaka.  Eia na haawina:  Ka haawina o Ianuari, Kula Sabati o Anahola, haawina o Feberuari, Kula Sabati o Koolau; haawina o Maraki, Kula Sabati o Kilauea; na Manao Nui, Kula Sabati o Waioli; na Manao Pili, Kula Sabati o Kapaa; haawina o Aperila, Kula Sabati o Lihue; haawina o Mei, Kula Sabati o Koloa; haawina o Iune, Kula Sabati o Hanapepe a me Waimea.  Nolailo e makaala na Kula Sabati apau i keia mau haawina.  E lawe ma na mea ano nui, aole me ka hookua nui wale aku.  E ku makaukau oukou me ka paio aku i ka paio maikai no ka pono o ka inoa o Iesu Karisto.

                                                                                                            J. KANOHO

            Kahu Kula Sabati Nui o Kauai Kemohana.

Ka Wai o Waiolama

            Heluhelu iho la makou i ka nupepa Makaainana o ka la 27 o keia mahina, a ma kekahi o kona mau kolamu, ike iho ia au he manao e pane ana ia Kaanapono, ka mea hoi nana i kakauinoa na manao ma na apana pepa i hoolaha ia aku i na la i hale ae nei.  Ua heluhelu makou ua ka iho, a hooholo, o ka hana pono wale no, o ka imi aku a loaa o Kaanapono, a e hoike aku iaia, ua hamama na kolamu o ka makou nupepa, i na he manao kona e pane aku i ka mea nana e kamailio mai nei iaia maloko o ka nupepa Makaainana, a eia ka pane i loaa mai ia makou, a ke hoolaha nei e like me ka puana ia ana mei. 

            J. U. Kawanui, Lunahooponopono o ka nupepa KUOKOA aloha oe a nui.  Ua loaa mai ia’u kau makana i kekahi e na kolamu o kau nupepa Kuokoa no ka pane aku i na manao kalai i olelo ia he pane ia Kaanapono maloko o ka nupepa Makaainana.  Ke haawi aku nei au i ka mahalo piha me kou mikiala mau i na kumu e loaa ai i kou poe heluhelu na pomaikai o na kike olelo mawaena o kakou na kanaka Hawaii, aka ke minamina nei au i ka hoike aku ia oe e kuu makamaka, aole au i ike i kekahi kumu a’u e pane aku ai i ka mea kakau o ka Makaainana.  Ina ia e kukala mai ana ua hewa au ma o kau e noi nei a e poloai nei i na kanaka Hawaii e hoohiki malalo o ke aupunj Repubalika o Hawaii, a me ka’u koi ia lakou e kokua i ke kumuhana Hoohui Panailike, alaila e ka makamaka, ua loaa ia’u ke kulana e pane aku ai iaia.  Aka no ka pane aku iaia no na ano kulana aupuni lehulehu,  aole au i kuleana i kona manao a me kona lunaikehala.  Nolaila e kuu makamaka, aia ma kahi a’u e hoahewa la ai no ka’u mea i hana ai a i kamailio ai, malaila au e hoike aku nei ia oe me ka makaukau mau e pane aku.

            Kou haahaa me ke aloha.

                                                                        KAANAPONO

            Honolulu, Mei 29, 1895.

E ka Lahui Hawaii, e Hoopau i ka Manao Paakiki Kuhihewa he Aupuni Alii Hou aku no Koe ma Hawaii Nei.

(Koena mai kela Pule mai.)

            No ko ke Akua hoopai koke ole mai ia Aberahama, a o ka haina he kanaka pono oia, a ua hooko pono i na kauoha a pau a ke Akua, kauoha mai ke Akua e kau aku i kana keiki iluna o ke kuahu a e mohai aku ia Isaaka na Jehova, ae aku o Aberahama aole kanalua, o ka nui o na makahiki o ko Aberahama ola ana, he 175.

            Heaha ka pili o na olelo hoopomaikai a Iakoba ia  Iuda ma ko’u kukulu manao ana, e ka lahui Hawaii e nana aku oukou ma Kinohi Mok. 49:10, a e nana pu i ke kuauhau o Iesu Kristo, Mataio Mokuna 1:1-15.  No Davida ka makuakane e ka lahui Hawaii, aole au i olelo ma ka’u kukulu manao ana he kanaka maemae loa o Davida, e nana ma ka nupepa Kuokoa Helu 13, ua olelo au he popopo a polopolona ke aupuni alii o Davida a me kana keiki o Solomona. nolaila ua mahele ke Akua i ko laua aupuni a lilo ka hapanui ia Ierepoama, oia hoi na ohana 10, he 2 ohana wale iho no ia Rehopoama, ke keiki a Solomona.   Pehea la i hoopau ole ia mai ai kona nohoalii ana?  Ua hoopau hoi ke Akua ia Solomona, ua make oia i kona mau la ui i ke 58 wale no makahiki.  Ua manao paha o Makani Kona o na makahiki he 17 i nohoalii ai o Rehopoama e hoohui aku ia me na makahiki o Solomona he 58 piha aku la ia Solomana he 75 makahiki o kona nohoalii ana, alaila paha hoopai mai la ke Akua, nui ka hupo o ka poe anee alii.  Ma ka buke moolelo hea la kakou i ike ai; haina ma ka baibala, e nana ma 1 Nalii 2:14 – 43; 2 Oihanalii 9:29-31, aole ko’u he lohe puahiohio e like me Makani Kona, ka hihi o kaunoa hihi i Mana, aloha wale ia laau makua ole.

            E ka lahui Hawaii, eia ka manao o ka mea i pee iloko o ke kino o ka makani.  Aole ka na ke Akua i hoopau ia Liliuokalani mai ka nohoalii aku o Hawaii nei,no ka mea aole o Iehova he Akua awiwi loa i ka huhu ma kekahi mea, nui ka lapuwale a me ka hupo o kahi mea i pee i kona inoa, a heluhelu baibala ole.  Eia ke kanawai o ke Akua, he Akua hii o Iehova, Pukaana 20:5; i ke kau ahaolelo hea i hoopau ia ai keia pauku 5 o ke kumukanawai o ke Akua i kukala ia ai e Mose ma ke kau ahaolelo nui ma ka manna o Sinai.  Ua ike anei kuu lahui i ke alanui e hele mai ai ko ke Akua huhu a hiki i ka hale o kana mea i huhu ai.

            I ka makahiki mua i nohalii ai o Rehopoama, aole oia i ike e hele mai ana o Sisaka ke alii o Aigupita e kaua iaia.  Heaha la kona ike ole?  Eia ke kumu, aole mea i ike i ke alanui e hele mai ai ko ke Akua huhu, e like me ka’u i hoakaka ai no ka popopo a polopolona o ke aupuni alii, ua lilo o Rehopoama i ka hoomanakii a me ka moekolohe.

            Nawai i kipaku ia Liliuokalani mai ka nohoalii ae?  Na ua keiki a kanaka i hapai i ka pu a hana i ka hana karistiano ole; nolaila, i ke kipaku ia ana o Liliuokalani mai ka nohoalii ae, ehia ola kino i make?  Aole loa, no ka mea aole loa ke Akua i huhu i ka lahui Hawaii, he hookahi no mea a ke Akua i huhu ai, a oia no kana i kii mai ai a kipaku ae, no ka mea aole ke Akua iloko o ka ikaika, aka aia ke Akua iloko o ke aheahe malie, a ma ia alahele i olepe ia ae ai o Liliuokalani.  Ua pane hou ia mai au no ke koi aku ka o’u i ka lahui e hoohiki i makaainana no ka Repubalika.

Ke pane nei au i ka lahui Hawaii, no ko’u minamina i kuu lahui i ka like me ke limu e lana hele ana maluna o ka ilikai, e lewa wale ana no, aole wahi e paa ai, ma kahi a ke au e lawe ai, malaila ka limu e hahai ai.  Aole o lakou kanikela, a ina e hele keia poe i na aina e a manao lakou e hoi mai i Hawaii nei ke nele i ke dala ole e hoi mai ai no keia kumu, aole o lakou kanikela ma na aina e aole no hoi o lakou mau pono kivila koho balota, ua ike no au ua onipaa ke aupuni.

            Ua kuhihewa loa ka au i ko’u koi aku i ka poe Moremona, no ko’u ike he liki ia poe i ka Palapala Hemolele; ua ike au he poe paakiki loa keia i ke koi e pii i Mauna Pohaku,  a hiki mai ka pilikia a manao e hoi mai i Hawaii nei, aohe dala e hiki ai ke hoi mai i ka poli o ka makua, ina e hoohiki ana ia poe i makaainana no ka Repubalike, a manao e hoi mai, ua hiki loa ke hoi mai me ke dala ole, no ka mea o ke kuhina Hawaii e noho ana ma ia aina ka mea nana e hoihoi mai.  Ina he mea wahi kope ka Makani, ina ua manao nui oia i ka hoohiaina, aka noka palaualelo, oia kona mea e kue nei.  Nolaila, me ka lana o ka manao e kuikahi pu ana kakou e ka lahui ma keia mau hoakaka moakaka lea ponalonaio ole. 

            Ke hoomanao nei no paha oukou e ka lahui i ka wanana a kekahi kaula Hawaii oia o Keopulupulu, oi ai ka make a ke alii a hookau aku ana maluna ona, eia kana huaolelo hope i kana keiki, “E kuu keiki, i nui ka mama a pa ka ili i ke kai, no ke kai ka hoi ka aina.”  Nolaila, ua lilo mua ka aina i ka haawi ia, a i nohoalii wale iho nei no o Kalakaua a me Liliuokalani mamuli o ke kakoo o na haole, a oia keia, “I alii makou i ka haole, aole i kanaka.”  Eia hou.  Ekolu no keiki a Noa, o Sema, o Hama a me Iapeta, i ka wa i ona ai o Noa i ka waina, hoomaewa o Hama, o Iapeta a me Sema uhi laua i ke kapa, hookahi no ili o keia poe keiki he ili ualaula.  Nolaila o Iapeta ka ke Akua i pena keokeo ai, a o Hama, pena eleele ia oia, o Sama hoi o kona ano mua no

he ulaula.  Eia ka hoopomaikai a @.  E komo mai no ka Iapeta a e lawe wale aku i ka Sema, oia hoi na waiwai a me na hale lewa o lakou, a o Kanaana kaua kana kauwa.  Nolaila ke maopopo pono la ia oukou e ka lahui Hawaii, ua komo mai nei ka Iapeta a lawe aku i ka Sema me ka hookahe ole ia o ke koko, a o Hama hoi he kauwa io no ia na Iapeta, oia ka nika.

            Nolaila ma ko’u kukulu manao, aole ia i nukee a pilinakeke e like me na pane a ka mea hohe wale, huna inoa.  O hai auanei i ka inoa,  ike ia loaa ka mea a  D.H. Aukai e kaniu ai i ka lae kahi ka pohue, ke ano mau ia o ka mea lawaia i ke kai papau he papai ka ia e hoi ai, he hewa mai ka ka lawaia i ke kai hohonu he kuu aku i ke aho loa he ulua ka ia e hoi ai.

            @                                                                                D. H. AUKAI

            Kula, Maui, Mei 31, 1895

Haina o na Ninau Baibala a ke Keiki Wawahi Pali o Kauhako.

            Haina o na ninau Baibala a ke keiki wawahi pali o Kauhako.

            Ninau 1.  Ina aole ka Palapala Hemolele e hai mai ia kakou he Akua ka mea nana i hana na mea apau, pehea la e maopopo ai he Akua ka mea nana i hana?

            Haina 1.  Ma ka hoike ana mai a ke Akua i kahi kanaka ana i makemake ai e hoike, e like

me Mose, ua hoike mai ke Akua ina mea apau ia Mose i kona noho ana ma ka aina o Midiana.  Mamua aku o ko Mose kakau ana i ka buke o Kinohi.

            E nana ma Oihana 7:37 a me ka pauku 50, a e heluhelu ia mokuna holookoa apau, a ua hoike ia no ma ka buke Kauoha Kahiko, a ia kekahi ma Luka 10:22.

            Ninau 2.  Heaha ka ke Akua mea i hookaawale ai i ka lani a me ka honua?

            Haina 2.  I ike ai na kanaka apau o ke ao nei aia ke Akua i ka lani, Oihana 7:49.  He haina okoa ae no kekahi oia ko ke Akua hookaawale ana i kekahi wai mai kekahi wai ae i hoike ia ma Kinohi 1:6,7,8, aole o’u hilinai oia ka haina pololei.

            Ninau 3.  Heaha ka hana oi a ko Akua i hana ai mawaena o ke Akua a me kanaka?

            Haina 3.  Oia kona hoonuu ana mai i kona uhane Hemolele e hoohapai ia Maria ka wahine puupaa i ike ole i ke kane. 

            E nana ma Makaio 1:18-19,20,21,22,23,24,25.  Eia ka rula, aole e hiki i kekahi wahine ke hapai i ke keiki ke ole e ike aku kana kane iaia.  I mea hoi e maopopo loa ai ka ke Akua hana oi, o kona hoolilo ana i kana keiki i hunahuna materia a hookomo aku iloko o ka opu o kekahi wahine puupaa i ike ole i ke kane.  Mamua aku o ka hookumu ana o ke ao nei, o ka Logou no

kekahi me ka Akua i Kinohi, Ioane 1:1, ekolu no mea like iloko o ke Akua a ua olelo ke Akua penei:  E iho kakou ilalo e hana i ke kanaka e ku ia kakou, Kinohi 1:26, 27, nolaila ke ike aeia kakou i ka hana oi a ke Akua, a i hoike ia ma Daniela 3:25.  He nui aku na hana oi a ke Akua i hana ai mawaena o kanaka, ua piha ka palapala Hemolele, a o ka’u hana oi nae kela i hilinai ai.

            Ninau 4.  O ka hapa hea la o ke Akua kai lilo mai i kanaka.

            Haina 4.  O ka hapakolu o ke Akua, wehewehe ana, ekolu mea like iloko o ke Akua, 

1 ka makua, 2 ke keiki, 3 ka uhane hemolele, o keia mau mea ekolu hookahi no ia, nolaila ua koe aku i ke Akua elua hapakolu, ua lilo mai i kanaka ka hapa hookahi hapalua o ke Akua, Ioane 1:14.

            Ninau 5.  O ka uhane hea la kai lawe ia Iesu i ka waonahele.

            Haina 4 O ka uhane manu nunu, wehewehe ana, i ko Iesu pii ana mai ka wai ae ike aku la oia i ka lani ua hamama, a i ka uhane me he manu nunu ala e iho mai ana a kau iho la maluna ona.  Mareko 1:10 a me 12.

            Ninau 6.  Owai la ka inoa o ka Ekalesia a Iesu i kukulu ai ma ka honua nei.

            Haina 6.  O Iesu Karisto no ka inoa e Mr. Lunahooponopono e hoomanawanui mai oe ia’u no keia ninau a me ka’u haina, ma keia haina maluna ae e loaa ana ke kanalua i kekahi poe e noho hoahanau nei iloko o na Ekalesia he lehulehu wale e holo nei maluna o ka ili o ka honua.  E like me ka nui o na Ekalesia, pela no i kapa ia ai ko lakou mau inoa ma o lakou iho.  E like me ka Ekalesia Moermona, no Moremona no ia Ekalesia aole no Iesu Karisto, Kaona, Maunaloa a me Kekipi a me kekahi mau Ekalesia e ae i like ole na hoonohonoho ana o na oihana Ekalesia e like me ko Iesu ekalesia ana i kukulu ai maluna o ka pohaku o ka hoikeana a ke Akua ia Petero, i hoike ia ma Mataio 16:17.  Aka nae, ma ka pauku 18, na olelo o Iesu.  O oe no o Petero a maluna o keia pohaku ke kukulu nei au i Ko’u ekalesia, a ma keia wahi e ike ai kakou ua kulukulu no o Iesu i kona ekalesia a na kapa no ma kona inoa iho no.  Aole ma ka inoa o kekahi o kana mau haumana, oki loa aku hoi o Petero ka mea iaia na ki o ke aupuni o ka lani, a ka ekalesia Kakolita e olelo nei oia ka ekalesia o Iesu Karisto, no ka mea, aole pili iki o na lawelawe ekalesia ana me ka Iesu i kona manawa me kana mau haumana.

            Mahope iho o ko Iesu hoi ana i ka lani, ua kukulu no na haumana i mau ekalesia ma ka inoa no nae o Iesu ma na wahi no nae apau.  Ekalesia ma Asia, ma ko Iesu inoa no nae aole ma ka inoa o kekahi mea e ae.  A pau loa na Lunaolelo i ka make a mahope mai oia manawa ua nalowale ka ekalesia o Iesu Karistio, nalo wale pu me ka inoa o ka ekalesia.  E nana i ka buke Moeuhane a Ioane i kakau ai ma ke aupuni o Patemosa Hoikeana 12:6, a o na mea apau i kakau ia ma keia buke moeuhane oia ka pee ana o ka ekalesia o Iesu ma ka waohahele, a ma ka waonahele no o Iesu i hoowalewale ia ai e Satana, Mareko 1:12.  He nui aku na hooiaio i koe, ke hooki nei au, no ka mea no hai ka moku.

            Ninau 7.  Make o Iesu Karistio, a ihe aku la oia i ka po, heaha kana hana.

            Haina 7.  Eia kaua hana, e ao aku ina uhane e noho ana ma kahi  paahao,oia hoi ka poe hoomaloka mamua ina ia o Noa, 1 Petero 3:19-20.

            O keia aela na haina a ke keiki nona ka moto.  “Moekokolo ka uhai o Kula i ka lawe a ke kehau.”

            A i pane ia mai au no ke kulike ole o ka haina i ka ninau.  Alaila ua makaukou au e lumai i ka mauna o Haleakala iloko o ke kai.  O wau iho no ka naita o ka maka sila o na kakai pali nihoniho o Lauulu.                                                 D.H. AUKAI

He mau ninau Baibala.

            Ia Ioane e pupue hookahi ana i ke kuehu ia e na hunakai o Patemosa Island, hihio iho la oia i ka moeuhane, a iaia e kokoia ia ana kona noonoo e ka hiamoe kapu o Niolopua, lohe aku la oia i ka leo hone o ke telepone i ka hawanawana ana ino.  Owau no ka Alepa a me ka Omega, ka mua hoi a me ka hope, ka mea hoi au i ike ai e palapala iho oe ma ka buke, a e hoouna aku ina ekalesia ehiku ma Akia, ma Epeso, Semurena, Peregamo, Tuateira, Sanedeisa, Piladelapia a me Laodikeia.

1.       Eia ka ninau.  Owai iho la ka mea nana i lawe keia buke a haawi aku ina ekalesia ehiku ma Asia?  He ninau moeuhane keia umi@ ko hanu i naio.

He hewa iho oe i ke telepone

Honehone malie i ka pili poli.

            Ia Ioane e holoholo ana ma na lae kahakai o Patemosa Island, lohe aku la oia i ka hone a ka leo o ke Kolohala i ka po lai.  A penei ka hooheno ana, e haawi no au na ko’u mau mea hoike elua, a e ao aku no laua me k aahu ia i ka lole inoino a hala na la hookahi tausani.

            Oia no na Oliva elua a me na ipukukui e ku ana imua o ka Haku. 

            Eia ka ninau.  Owai kela mau Oliva elua?  He ninau moeuhane.

                        Kuu oliva ku kahakai

                        A he opuu no i mohala

                        E ani ka makani e pa mai nei

                        Me he moani ala o Kahala.

            A o woi hoi na ipukukui?  Kuu ipukukui pio ole i ka makani he Kauaula.

            He ma’u ia wahi mau hua panini o Kula e poke ai i ka wauwau a luhi ke kino, aia ka pono a kalele na lima i ka lae.  Me ka lana o ka manao e okaoka mai ana keia mau puniu i ka wawahi ia e ua olohe huli Baibala.  Ia’u e kakau ana i keia Episetole, ei ae ka Malulani ke palau mai nei ina eka ale o ke kai holunape o Kamaalaea.

                                                                                    D. H. AUKAI

                                                Kula, Mei 26, 1895.

Kela me Keia

            Ke manao ia nei, e hoouna ia aku ana ka mokuahi misionari “Hokuao” ma kana huakai makahiki mau i na paeaina o ka Pakipika Hema ma ka Poakahi hope o keia malama.

            Ua ae ia aku i ka Poakahi iho nei o keia hebedoma o Geo. A. Davis, he Nova Scotia ma ka hanau ana, e lawelawe ma ka oihana loio imua o na aha hookolokolo apau o ka Repubalika.

            He elua mau hihia ano nui o ke kau kiure kaapuni o Maui i hoahewa ia e na kiure, oia ka hihia pepeni kanaka o Kuhelemai ma ke degere elua, a me ka hihia kipe o Young Hee pake i na luna aupuni.

            Ua hookiekie ia ae o Mr. W. H. Wright i Hope Lunahelu a me Auhau no ka Apana o Kona Oahu nei ma kahi o Mr. W. C. Weedon i waiho mai no ka lawe ana i kekahi kulana iloko o kekahi kulana iloko o kekahi ha’e kalepa o Honolulu nei.

            Ua hoi mai o Kauka J. K. Smith o Koloa ma ka mokuahi hope mai nei mahope o kona ao hoopau ana i ka ike lapaau ma kekahi kula kauka o Amerika Huipuia.  A ua huli loa aku oia i ka hoi no ka home oiwi ma ka “mokupuni kihapai.”

            Ua hoi mai ka Loio Kuhina mai kana huakai aku nei i ka Aha Kiure Kaapuni o Maui maluna o ka mahimahi o na Kona ma ke ahiahi Poalima o ka pule i hala, a ma ia mokuahi pu no hoi i pau mai ai i ka hoi na loio Neumann, Magoon a me Kahookano.

            Eia ke ku nei he pahu hae mamua o ke alo o ka Hale Akala maloko o ka pa Hale Mana Hooko, a ke huki mau ia nei he hae Hawaii ma ia pahu hae ma na la apau.  Aia no hoi maloko o ia hale ko keK@lonelo wahi e noho ai a e moe nei i na wa apau.

            Aohe mokuahi kuloko holo iki i na la Poakahi a me Poalua iho nei o keia hebedoma, no ka mea ua hoololohe lakou apau i ka noho e ike i na lealea o ka la hanau o Kamehameha, Iune 11, no ka pomaikai o na aliimoku o me na luina.  A ma ka Poakolu mai, ua pau nui aku na mokuahi i ka holo i ko lakou mau awa ku mau.

            I kekahi hookele kaa hoolimalima e kaena palepale paani ana me kekahi hookele kaa e aku ma alanui Moi i ka la hanau iho nei o Kamehameha, aia hoi ma kona kui ana aku a ale ae ia kona hoa paani, ua kimo loa aku la ua hoa nei a hookui ana ke poo i ka pale o ke kaa, puka pu ke poo a kahe mai la koko.  Kai no hoi ua lawa iho la, eia ka auanei e miki mai ana na makai a hoopaa ia i ka hale hoopaa lawehala.  Papalua ka hoi ka poino.

            He ahaaina nui kai haawi ia i na haumana Kula Sabati o ka mokupuni o Oahu nei i ka Poaono i hala ma Kawaihao malalo o ka hooponopono ana a ka Mea Hanohano D. L. Naone, a ua ai a lawa.  Aka, ua apa loa ka hanai ia ana o ko na pili hauliuli mau keiki mamuli o ka piha e o na pakaukau i na kamaaina o Honolulu nei, ma o ka hookomo e ia ana la o na huluhulu i ka pukaihu e kekahi mau iaia o ke Komite ahaaina.  Ua olelo ia ala ma ke tausani ka nui o ka poe hoaai i hoolako ia ai na mea ai.

Ka Hawaiian Gazette

He Nupepa Namu Elua Puka ana o ka Hebedoma ma na

POALUA a me POALIMA

e hoopuka ia nei e ka Hui

HAWAIIAN GAZETTE COMPANY.

            O ka Nupepa Kuloko Alakai keia ma ka Olelo Beritania e hoolahaia nei maloko o ka Paeaina a hala loa aku i na Aina E a ke heluhelu ia nei e na mea a pau ma na oihana na Halekula a komo loa iloko o na ohana.

Ka Uku Pepa Laulaha.

No ka Malama                                     $  50

No ka Makahiki Kuloko                       5.00

   “               “      Kuwaho                     6.00

Keena Hana Helu 318.

                                    Alanui Kalepa.

Pahu Leta O.    Honolulu Oahu

                        2531 – tf

Na Hua Kuni Inoa

Eia ka Hui Hawaiian Gazette Co., ke hana paka maoli nei i na Hua Kuni Inoa o kela a me keia ano, nui a liilii e like me ka iini a ka manao.

            O keia mau Hua Kuni Inoa, ua lawa ia no ke kahakaha ana ma ke kanana a pepa e ae e hoailona ai i ka Inoa a kohu maluna o kekahi mea i makemake ia e kuni a kaha paha.

            He like ole na uku o na Papa Kuni Inoa, no ka mea aia no ke kau ia o ka uku a maopopo ke ano o ka Papa Inoa au i makemake ai, he nui a he liilii paha.  Aka he oluolu ka uku a he waipahe na kuka ana.

            E kipa kino mai e nana i ike kumaka, a i ole ia e hoouna mai i na kauoha ma ke

eena Hana  Maika I Halepai HAWAIIAN GAZETTE, Helu 318 Alanui Kalepa, Honolulu

                                                                                                            2c31-tf

Halepai Hawaiian Gazette.

 

O keia ka Halepai Nupepa Alakai o ke Kulanakauhale o Honolulu nei.  Ua lako i na Hua Kepau

o na ano a pau a ka makemake e ui ae ai.

 

Eia ma keia Halepai e pai ia nei ka Nupepa KUOKOA, a me Nupepa HAWAIIAN GAZETE PACIFIC COMMERCIAL ADVERTISER CHURCH CHRONICLE a me PLANTER’S MONTHLY.

 

Ua hiki loa i kela Halepai ke pai aku i na pepa nunui hoolaha alanui, na buke, na bila kikoo, na bila hookaa, na palapala poloai ahaaina a me na hana e ae a pau o ka oihana pai.

 

Eia maloko o keia Halepai he Keena Humuhumu Buke, kahi e humu ia ai na Buke, na pepa a me na mea a pau i pili i ka humuhumu ana i na palapala.  He oluolu ke kuka ana a he emi kupono na auhau.

 

Keena Hana, Helu 318 Alanui Kalopa, Honolulu i ka Hale@

                                                            2531-tf

Hoolaha Humau

(picture)

            Aole loa e maikai a oluolu ke ola ana o kekahi mea kino uhane ola ina he aaiole kona akepaa a hiki ole ke lawelawe i kana mau hana me ka hololea.  E hahai ana ka nalulu a me na nawaliwali e ae ma ka moali o ke ake ponalo.  He mea oiaio keia i hoolalo ia ma na wahi o na poai oluolu akau iloko o ka hapaha keneturia, o na

HUALE A AYERS.

oia wale no ka LAAU HOOLA AKE maikai loa i ikeia.  E hoola ana i ka lepopaa, ka nalulu eha, na ma’i oloko o ka opu, a ma ke ano LAAU OHANA aohe ona lua e like ai.

            O ka Ayers Sasaparila, oia ka Laau Hoomaemae Koko kilakila, e haawi ai i ka ikaika a me ka hooponopono ana ia loko o ke kino o ke o ka ili, e hoopau ana i na maluhilukanaka.  E pepehi a ulupa ana i na POHA, e hoola ana i na pohapoha hi o ke ola ana a e kipaku loa ai i na ano ma’i a pau.  O ka poe ma’i no ka wali pono ole e ka @, ka nawaliwali mau a ano ma’i e ae i ulu ae mai ke koko ino mai, he mea pono e inu i ka laau

SASAPARILA A AYERS.

He laau e hooikaika oi i ka nawaliwali, a e hoopuipui mai ai i ke kino.  Ma ka inu ana i keia laau, e hoonoono ia ai ka ai ana, oluolu ka moe ana a maikai ke ola ana.

O ka Ayers Cherry Pectoral laau, aohe loa ma ka hoola awiwi ana i na KUNU, ANU a me na PUU EHA.  E hoola ia na KUNU KALEA a me na ma’i poli i ke ake me ka hikiwawe loa.

O na Huaale a Ayers, na Sasaparila a me ka Ayers Cherry Pectoral, aia kahi e loaa ai ma ka Halekuai o ka

Hollister Drug Co. Lt.

            Na Agena ma ka Paeaina Hawaii.

                                    2514

KAKELA ME KUKE

Ka Halekuai Nui

o na

WaiWai LIKE OLE

NA MEA

HANA KAMANA AIPAU

Na lako pili hao kukulu hale,

            Na kepa,

                  Na lei ilio,

                        Na kaulahao ilio,

                              Na Pahi,

                                    Na Upa,

                                        Na kope hulu,

                                                Na Pulupulu.

PALAU LIO

                                                                        Na mea mahiai,

                                                                                Na au ho,

                                                                            Na au koi,

                                                                        Na kua bipi,

                                                                   Na lei bipi,

                                                            Na kaulahao bipi,

                                                    Na uwea pa,

                                            Na kaa palala,

                                    Na mea piula,

                        Na ipuhao.

Makau me Aho Lawaia

Na Iliwai

    Na kaula,

        Na helu pena,

              Na p@umi,

                   Na pena, me ka aila,

                        Na kope,

                              Na aila mahu

                                    Na pakeke

   Na pakeke hao,

            Na kapu hao,

                        Na pauda,

                             Na kuka@pele,

                                    Na uwiki, a me

                                          Na ipukukui.

Mikini Humuhumu Kaulana

Wilcox, & Gibbs Hookahi Lopi

ka Remington, Elua Lopi

            A me na ukana he nui loa, o kala@ a me keia ano.

Kakela me Kuke

@