Ka Nupepa Kuokoa, Volume XXXIV, Number 24, 15 June 1895 — Page 2
| This text was transcribed by: | Ululani Victor |
| This work is dedicated to: | Ke Alii Pauahi & Ka Moiwahine o Liliuokalani |
Ka Nupepa Kuokoa
KE KILOHANA POOKELA NO KA LAHUI HAWAII.
MA KE KAUOHA.
O ka Poaha, Iulai 4, 1835, he La Kulaia Lahui ia, a e pani ia na hale oihana aupuni a pau o ka paeaina ma ia la.
J. A. KING,
Kuhina Kalaiaina.
Keena Kalaiaina, Iune 7, 1895.
2547-3
Ua hookohuia o Mr. Joseph K. Nahale i keia la i Notari no ka Apana Hookolokolo Kaapuni Apana Ekolu o ko Hawaii Paeaina.
J. A. KING,
Kuhina Kalaiaina.
Keena Kalaiaina, Iune 10, 1895.
2550-3
Ua hookohu ia o Mr. C. H. Bishop i keia la i Notari no ka Lehulehu no ka Apana Hookolokolo Kaapuni Elima o ko Hawaii Paeaina.
J. A. KING
Kuhina Kalaiaina
Keena Kalaiaina
Iune 3, 1895.
2549-3
Ua hookohu aku au i keia la ia Godfrey Affonso i Luna Pa Aupuni no ka Pa Aupuni ma Waiakea, ma ka Apana o Hilo, Mokupuni o Hawaii.
J. A. KING,
Kuhina Kalaiaina.
Keena Kalaiaina, Mei 28, 1835.
2548-3
Ua hookohuia o Mr. S. Lazaro i keia la i Notari no ka Lehulehu no ka Apana Hookolokolo Kaapuni Ekolu o ko Hawaii Paeaina.
J. A. KING,
Kuhina Kalaiaina.
Keena Kalaiaina, Mei 30, 1895.
2548-3
Ua hookohuia aku o Mr. John Creig i keia la i Notari no ka Lehulehu no ka Aha Hookolokolo Kaapuni Apana Ekolu o ko Hawaii Paeaina.
J. A. KING,
Kuhina Kalaiaina.
2548-tf.
KANAWAI 30.
HE KANAWAI E HOOKAAWALE HOU AE ANA I MAU HAAWINA NO NA HANA O KE AUPUNI KA REPUBALIKA O HAWAII.
E Hooholoia e ka Aha Hooko a me ka Aha Kuka o ka Repubalika o Hawaii.
PAUKU 1. O na huina dala mahope iho nei i hiki ka huina i ka Iwakalua Tausani Dala ($20,000) ma keia ua hookaawaleia mailoko ae o ka Waihona o ka Lehulehu, ma waho ae o na huina dala i hookaawaleia mamua aku nei, no na hana mahope iho nei, oia hoi keia:
KEENA NO KO AINA E.
Na lilo o kela me keia ano no ke kinai ana i ke kipi ana o Ianuari, 1895 $10,000.00
KEENA WAIWAI.
Na lilo o ka moku kiai oihana dute me holoholo kiai 10,000.00
$20,000.00
PAUKU 2. E mana keia kanawai mai kona la aku e hoolahaia ai.
Aponoia i keia la 23 o Mei M. H. 1895.
(Kakauinoai)
SANFORD B. DOLE,
Peresidena o ka Repubalika o Hawaii.
(Kakauinoaia)
J. A. KING,
Kuhina Kalaiaina.
Hoolaha i na Hui.
I KULIKE ai me ka Pauku 1441 o ke Kanawai Kivila, nolaila ke kauohaia aku nei na hui a pau i kukuluia malalo o na kanawai o ka aina, e hoike piha a pololei ae i na mea a pau i pili i ka lakou mau hana i ke Keena Kalaiaina, ma a mamua ae o ka la 31 o Iulai e hiki mai ana, oia no ka makahiki e pau ana i Iulai 1, 1895.
O na paihakahaka no ka mea pili i keia e hoolakoia aku no ke noi ia ae i ke Keena Kalaiaina.
I ka wa e hooko ole ai kekahi hui i ka waiho mai i ka hoike iloko o ka manawa i makemakeia, alaila na ke Kuhina Kalaiaina ponoi, a i ole na hookahi a oi aku paha mau Komisina i kohoia e ia e koi aku no ka lawe ana mai i na buke a me na pepa o ka Hui a e niele i kona mau luna no na mea e pili ana i kana mau hana no na mea e pili ana.
J. A. KING,
Kuhina Kalaiaina.
Keena Kalaiaina, Mei, 25, 1895.
2548-4
KOHO NO KE PAIAI.
KEENE O KA PAPA OLA
Honolulu, Iune 1, 1895
Ua makemakeia na koho no ka hoolawa ana i ke Kahua Ma'i Lepera ma Molokai, mai ka 500 a hiki i ka 1000 paiai o ka pule e lawe ia a waiho ma ke awapae ma Kalaupapa, e like me ke kauoha a ka Luna Nui, e waihoia mai na koho ma keia Keena mamua ae o ka hora 12 o ke awakea, Poakolu, Iulai 3, 1895.
I iwakalua-kumakahi (21) paona io o ke paiai i wa-hi pono ia me ka la-i, a e hoolawaia ma ka pule. Ua makemakeia na koho kaawale no ka manawa he elua makahiki, ekolu makahiki, a i ole no ka eha makahiki mai ka la 20 aku o Augate, 1895.
Mamua o ka hoopaa ana i ka aelike e waihoia mai he bona i emi ole malalo o $1000.00 me na hope i apono ia e ka Papa, no ka hooko pololei ia o ka aelike.
E kakau mawaho o ka wa-hi "Koho Paiai."
Aole i hoopaaia ka Papa Ola e ae aku i ke koho haahaa loa a koho e ae paha.
Ma ke kauoha a ka Papa Ola.
WILLIAM O. SMITH,
Peresidena.
2548-4
Hoolaha Hui Halekuai.
E NOHO ANA KA HALAWAI NUI O PAUwela Store Co. Ma ka Poaha la 27 o Iune, A.D. 1895, ma ka hora 10 a.m. Ke kauoha ia aku nei na hoa a pau o keia Hui e akoakoa mai ma ia la.
P. KEAUPUNI,
Kakauolelo Pauwela Store Co.
Pauwela, Maui, Iune 7, 1895.
@@@@-tf
KA NUPEPA KUOKOA
MA
Ko Hawaii Paeaina i Huiia
o ka Makahiki $2.00
No Eono Mahina 1.00
Kuike ka Rula.
PUKA 1 2 3 4 5 6
ANA Pule Pule Pule Pule Pule Pule
Iniha $ 1.50 $ 2.00 $ 2.50 $ 3.00 $3.50 $ 4.00
2 Iniha 2.00 2.75 3.50 4.00 4.50 5.00
3 Iniha 2.50 3.50 4.50 5.00 5.50 6.00
4 Iniha 3.00 4.00 5.00 6.00 6.75 7.50
5 Iniha 3.50 4.75 6.00 7.00 8.00 9.00
6 Iniha 4.00 5.50 7.00 8.00 9.00 10.00
O na Olelo Hoolaha a pau e hoouna ia mai ana no ka Hoolaha maloko o keia Nupepa, e hoouna pu mai me ka auhau, a ina aole, aohe hookomo ia.
HOOPUKA IA E KA
HAWAIIAN GAZETTE CO.
GEO. H. PARIS, Luna Nui.
J. U. KAWINUI, Luna Hooponopono.
No Honolulu, Oahu, Lakou a pau
POAONO, IUNE 15, 1895
Na Aha Kau Kanawai.
I ka hora 12 ponoi o ke awakea o ka Poakolu, Iune 13 i hala hope iho la, i wehe ia ai mamuli o ke kukala a Peresidena Dole, na Aha Kau Kanawai mua loa o ke Aupuni Repubalika o Hawaii, a o na hooia hoi no ke kaalo ana aku o ke kulana mana hana kanawai mai ke kahua o ke Aupuni moi a i ke kahua o ke Aupuni makaainana. Mawaena o na mea kaulana a me na loli kamahao i ike ia mawaena o na lahui naauao apau o ka honua nei iloko o keia kenetoria e nee nei, me he la, o ka mea i ike ia a i hana ia ma ka la i Poakolu maloko o ke Kapitala o ko kakou Paemoku, kekahi i helu ia ma ke ano he hana kaulana a kamahao, a e lilo aku ana ka la 12 o Iune 1895, i la e moolelo ia ai e ka kakou mau pulapula a e ka lakou mau mamo ma keia mua aku.
Ua wehe ia maloko o ke keena Aha Kuka, o ka Hale Mana Hooko, ka Aha Senate a me ka Aha o na Lunamakaainana e ka Peresidena imua o kekahi anaina nui o ka lehulehu o na lahui like ole, mai na luna Aupuni a na makaainana i akoakoa ae e makaikai i na hana i lawelawe ia no ka manawa mua loa iloko o ka moolelo o Hawaii nei. A ia makou e hui pu ana iloko o ia anaina, aia hoi ua hoihoi ia aku la ko makou mau hoomanao a i na la wehe Ahaolelo o ke au i ke Aupuni Moi, a hoomaopopo iho la i ke kaokoa loa o na hana oiai i ke poholima a i na makemake wale no o ka moi ka mana, a me ko keia, i ka manawa i weheia ae ai ia mana mai na umii o ka mea hookahi a kaana ia no ka lehulehu.
Iloko o ia mau la o ke au mana moi, ua nui na hoohiwahiwa a me na hoohinuhinu, me ka hee o na pilali a me ke kalaihi o na papale mahiole, a ua kauhola ia ke kapu e na leo o ka poe hookiekie, aole e ae ia ka makaainana haahaa a ilihune ke hele aku a hookokoke aku ma kahi o ka poai kapu, koe wale no ka poe i kono ia ka poe hanohano a waiwai hoi. Ua hoomanao makou i neia mau hana hookae o ia au, a pela pu paha me na makamaka e ae.
Aka, aia i ka la i wehe ia iho la ka aha kau Kanawai mua loa o ke aupuni Repubalika o Hawaii, ua nalo aku ia mau ano hookapukapu. Ua kuu akea ia kela a me keia e hele i hoomakaukau ia no ka lehulehu, a ua ike ia aku ka noho pu ana o ke kanaka haahaa me ke kanaka kiekie, a o ke kanaka ilihune hoi me ke kanaka waiwai, aole i kau ia kekahi mea ana kulana, aka ua like wale no na mea apau. Ua lawelawe ia na hana ma ke ano kuio o ke kanakamakua makemake hana me ka oiaio, aole hoi me na hookapukapu hoohinuhinu kamalii i makemake wale no ma na mea hoikeike me ka manao nui ole i ka hana.
Ma na mea apau i lawelawe ia ma ua la nei, ua hoike mai no ia i ka haina maopopo o ke ohohia ia mamuli o na helehelena eleu a hauoli o ke anaina, no ka mea, he anaina, he anaina kaulike no ka lehulehu, aole hoi i kapakahi no kekahi poe wale no a wae ia, a maluna ae o na mea apau, he anaina o ke aupuni no na makaainana o na makaainana.
Lokahi.
He mea ku i ka hauoli ka hoomaopopo ana ae, aia iloko o na kulaia nui lehulehu o ka Poalua la 11 iho nei o Iune, aole loa i ikeia kekahi kula o ke ano kuee mawaena o na poai e kapaia nei he aloha aina a me ka Repubalika. Ma Kapiolani Paka, he tausani a oi i hiki ae o na poai a ielua, e huikau ana iloko o na pioo a me na ulumahiehie, hookahi wale no mea i ike ia, oia no ka hui lokahi ana o na mea a pau iloko o ka hauoli oluolu pu ana. A pela no maloko o ke kulanakauhale nei, iloko no o na huikau a me na hoohilala, aole loa he mea i ikeia o kekahi ano kuee pili kalai aupuni. He hoike keia no ka helehelena maikai o ke kulana noho'na o ka lehulehu, a he mau hooia hoi, ke aneane aku nei ka wa e kanu a nalo loa ia ai ke koilipi o na kuee a o ka lokahi ka hopena.
Kohuole.
Ahea la pau na hakuepa ana a na nupepa anee alii? Ke noke mau nei i ka imihala i ke aupuni ma na ano apau, me ka hoao mau e hoonaukiuki i ka lahui e kue i na luna aupuni. He nui nae ka maalea, heaha la ka mea hoopuka ole mai i ka manao io maoli me ka hoao ole e aloalo a e haupeepee? Nui ka waha i ka walaau, me ke kuhi nae ia hai lakou iho he mau aloha aina, a o ka mea maopopo nae, ina iloko o ko lakou mau poholima ka aina pau kahiko i ka moraki ia a lilo i kudala ia. E haawi aku ia lakou i mau mea ala me ke kii o kela holoholona pepeiao loloa, alaila kupono ke kau o ko lakou mau kii i na umauma.
Lilo i mea Kukahaleke.
Ua lilo i mea kukaheleke no na nupepa anee alii ka hele ana o Col. McLean o na Pualikoa Kiai Lahui Hawaii a me Kauka Cooper, e ike kino ia Mrs. Liliu Kamakaeha Dominis ma kona wahi e hoopaa ia nei maloko o kekahi keena o ka Hale Mana Hooko, a ninau ponoi aku no ka mea pili i kona kulana ola kino i keia wa, oiai kona kauka ponoi ua hala i Kaleponi. Ua pane mai ka paahao aupuni, maikai no kona ola kino aole he omaimai, a ua hoolako ia me ka laau a kona kauka ponoi. Pehea la, ina i noho pu wale ka mana koa nana e kiai nei i ke pio a ulia ka loaa i ka ma'i i ka wahine paahao, aole anei o ua mau nupepa anee alii la ka oi loa aku o na poe leo nui loa no ka nana pono ole ia o ke ola kino? Heaha iho la ka pilikia o ko ke Aliikoa kiekie nona na koa nana e kiai nei i ke pio hele ana e ninau pono? A i ka pane ia ana mai no, aohe pilikia alaila o ka pau ae la no ia. I ka hoomaopopo aku, ua hele ke Kolonela, e ike i ka paahao ma ke ano o kona oihana, no ka mea eia ke poo o ka mana koa nana e kiai nei ia Liliu. Aole ma ke kulana he hele e ike ma ke ano he mea hou, a i ole oia ka mea nui nana e hookele nei ke Aupuni.
Hoike na Kula Kamehameha.
E hoike ana keia mau kula ano nui i kukulu ia no ka hoonaauao ana i na keiki Hawaii, aole wale ma ka ike palapala, aka ma ka ike hana kekahi i ao ole ia ma na kula hanai mamua ma ke ano laula e hoomaa ia ai ke keiki e loaa iaia kona pomaikai no ka hele ana aku imua o ke ao ke maamaalea oia ma ia ike e hanai ia nei. O ke Kula Kaikamahine, e hoike ana ma ka hora 7 a me hapa o ka po Poaono, Iune 22. A o ka hoike hui hoi o na Kula Keikikane Hanalima a me Hoomaamaa, aia ma ka auina la Poakahi, Iune 24, e hoomaka ana mai ka hora 2 a me hapa a hiki i ka hora 5.
Ke kono ia nei na makua, na kahu keiki, na makamaka a me na hoa'loha o ka naauao, e hakinua nui ae e ike i keia hoike o na keiki a kakou, ka io a me ka iwi o ka lahui Hawaii. Ua hoomaunauna o Pauahi i kona waiwai nui no ka hoonaauao ana i na keiki oiwi o kona lahui, a he mea pono ia kakou ke mahalo nui aku i kana mau hana ma ka hoolau kanaka ae ma keia mau la hoike, a e ku hoike hoi kakou e ka poe e ola ana ma ka hooho ana, aole i poho kona waiwai e hoolilo ia nei no keia mau kula.
Na Lealea ma Kapiolani Paka.
He la lealea keia Poaono, Iune 15, no ka Hui Hooikaika Kino o Honolulu ma ke kahua heihei o Kapiolani Paka, oia na heihei kaa hehihehi wawae, kukini, lelele a pela aku. He umikumamaono ka nui o na mea lealea e hoikeike ia ana ma ia la.
O ka hora 2 a me hapa ponoi o ka auina la ka manawa e hoomaka ai na lealea hooikaika kino. He hapalua dala ka uku komo o na mea a pau e hele ana e ike kumaka. Ke upu ia aku nei, e hewa i ka wai ana ka poe e pau ana i ka hele ilaila.
Mahalo.
E MR LUNAHOOPONOPONO: -- E lokomaikai mai oe e hoike aku au ma kau nupepa i ko'u mahalo nui ia Kapena R. P. Waipa, oiai oia ma Kapiolani Paka i ka la 11 iho nei. Mamuli o kona mikiala a me ka malama pono i loaa ai ka maluhia i na lede a me na kamalii mai na olelo pelapela a me na hana lapuwale a na kamalii Pukiki e kakau ana maluna o ka pa o kahi heihei lio. Ina aole ke Kapena malaila, ina ua nui na hana pelapela i ike ia a lohe ia e na kamalii liilii kupono ole e ike a lohe ia mau mea.
MAKUAHINE KEIKI.
Ahaolelo Mua o ka Repubalika.
NA HANA O KA WEHE AHAOLELO ANA.
Ka Haiolelo a Pelesidena S. B. Dole.
Ua hooaiha ia ke Keena Halawai o na Aha Kuka a me Hooko maloko o ka Hale Mana Hooko me kekahi anaina nui makolukolu ma ka hora 12 awakea o ka Poakolu, Iune 12, ka la hoi i kuahaua ia ai e ka Peresidena no ka akoakoa ana mai o ka Ahaolelo o ka Repubalika e lawelawe i na hana o ka lehulehu.
Mamua ae o ke ku pono ana o ka la i ka lolo poo, ua hoonoho ia ma ka aoao akau o ka awai ka wahine a ka Peresidena a me na lede a na Kuhina a me na Lunakanawai o ka Aha Kiekie, na Kuhina Hatch, King, Damon a me Smith, Lunakawai Kiekie Judd a me na Kokua Bickerton a me Frear, na Lunakanawai Kaapuni Whiting a me Cooper, ka Elele a me Kuhina Mana Piha Hawaii hou i Amerika Huipuia, ka Ilamuku a me ka wahine, na poo o na buro aupuni o ka Hale Dute, Hale Leta, Luna o na Hana Hou, Anaaina nui, Luna Kakau Kope a me na luna aupuni e ae.
Ma ka aoao hema hoi e huli aku ana i na Kuhina a me na Lunakanawai, ua hoonoho ia ke Kuhina Amerika A. S. Willis a me ka lede; ke Kanikela Kiekie o Potugala A de S. Canavarro; ke Kuhina a me me Kanikela Beritania A. G. S. Hawes; ke Kanikela Kiekie o Iapana Mr. Shimizu; ke Kokua Komisina Farani W. M. Giffard, ke Kanikela Amerika Nui E. Mills; ke Kanikela Italia F. A. Schaefer ame ka wahine; ke Kanikela Mekiko H. Renjes; ke Kanikela o Peru Bruce Cartwright a me ka wahine; ka Hope Kanikela Amerika W. P. Boyd a me ka wahine; ka Hope Kanikela Beritania T. R. Walker; Kokua Kanikela Denemaka F. W. Macfarlane; na Agena Kalepa Pake Goo Kima a me Kwon Wai; Kakauolelo a ke Kanikela Kiekie Iapana; Adimarala Beardslee a me na aliimoku o na manuwa Amerika Piladelapia a me Bennington.
Mamua ponoi aku o ke alo o ka awai, na Sanatoa a me na Lunamakaainana no lakou na inoa malalo iho.
NA SENATOA.
Hawaii -- J. Kauhane, F. L. Lyman, F. Northrup a me Notley.
Maui -- A. Hocking, H. P. Baldwin a me W. Y. Horner.
Oahu -- Cecil Brown, J. A. McCandless, Henry Waterhouse, H. W. Schmidt, W. C. Wilder a me J. N. Wright.
Kauai -- W. H. Rice a me G. N. Wilcox.
NA LUNAMAKAAINANA.
Hawaii -- E. E. Richards, Robert Rycroft, E. C. Bond a me G. P. Kamauoha.
Maui -- W. P. Haia, A. Pali a me E. M. Hanuna.
Oahu -- A. G. M. Robestson, D. L. Naone, J. C. Cluney, James Davis a me L. K. Halualani.
Kauai -- W. McBride.
Mahope aku o na hoa o na hale elua, ka lehulehu makaainana i okomo ia e na kama elua.
Ma ke kuene pono ia ana o na mea apau, ua iho mai la ka Peresidena mai kona keena mai, komo mai la ma ka puka aoao. Ua hoohanohano aku ke anaina ma ke ku ana iluna i ka wa a ka Peresidena i komo mai ai a hele loa ae la a ku ma ka awai i hoomakaukau ia nona ma ka aoao mai mauka huli i kai nei. Ua kunou ae la ka Peresidena ia Rev. A. Mackintosh e pule, alaila ua hoomaka mai la oia i ka pule no ka hoopomaikai ana i ka Repubalika, ka Ahaolelo, ka Peresidena a me ka lahui. A i ka amama ana o ka pule ua noho iho la ke anaina i lalo a ua heluhelu mai la ka Peresidena i kana haiolelo i lawe ia mai e makou ma ke ano nui malalo iho:
Ua kahea ia ka ahaolelo i kukulu ia ai ka mana kaukanawai oiaio o ka Repubalika, hoopauia na aha kaukanawai no ka mauwa, ka hana ana i mau kanawai no na aina aupuni a me ka hoomoe waeaolelo mawaena o Hawaii a me Amerika Akau.
Ka hana a ka mana hooko no ekolu malama mahope o ke Aupuni Kuikawa a me eono malama mua o ke ku ana o ka Repubalika.
Ka nui o na Aupuni i ike mai i ka Repubalika mai Iulai 4, 1894 mai a me ka noho launa oluolu ana me lakou. Eia ko lakou mau inoa e like me ka loaa ana mai o na palapala e ike mai ana, oia hoi o Amerika Huipuia, Farani, Helevetia, Mekiko, Rusia, Italia, Belejuma, Guatemala, Beritania Nui, Geremania, Iapana, Netalana, Kili, Peru, Berazilia, Kina, Suedena me Norewai, Auseturia, Sepania, Potugala a me Denemaka.
Na hana kuloko o ka aina aia ma ke kulana maluhia a holopono, koe wale no kahi hoala kipi o Ianuari i hala, nona na lilo i uku ia aku ma ke $90,000 a oi.
Ka maikai o ke kulana malama ola o ka aina.
Ke kumuhana a ke Aupuni, oia ka hoohui ia Hawaii me ka Repubalika o Amerika Huipuia, ke mau nei ia manao paa.
E hooikaika e hana ia ona mau kanawai aina e loaa ai i na poe uuku mai o kahi loaa i makemake i aina mahi, aole wale no na kamaaina, aka i kumu e kono aku ai i ka poe i makemake ia e hele mai a hookamaaina maoli iho. Oiai o na pake he lahui lewa wale no ia, nolaila aole e hiki ke hilinai ia ma o lakou la e loaa ai ona lahui hoolaupai noho paa maluna o ka aina.
O ka hoomoe ia ona waeaolelo moe moana e hiki ai ia Hawaii ke launa kamailio me na aina kuwaho, oia kekahi mea nui, a ke ole e loaa ona waeaolelo moana ia Hawaii, alaila e mau ana kona ku hookaawale ia e like me ia i keia wa. Ua loaa i ke Aupuni na ike apau, a i na e hana ia i kanawai, alaila hiki i ke Aupuni ke hoonee aku imua no ka hana.
E waiho aku ana ke Kuhina Waiwai he bila haawina pakui no na lilo aupuni a e kono ia ana ko oukou noonoo.
He hana na kela a me keia Hale pakahi o ka Ahaolelo ke koho ana i elima hoa o ka Ahakuka o ke Aupuni, a e pono ke lawelawe ia me ka hoapaapa ole, no ka mea ua pau iho la ka Aha Kuka, a o ka lakou mau hana ke hoomoamoa ia nei he moolelo no ke Aupuni Kuikawa a me ka makahiki mua o ke au o ka Repubalika.
Halawai mua a ka Aha Senate o ka Repubalika o Hawaii.
Mahope iho o ka pau ana o ka haiolelo a ka Peresideno maloko o ke Keena Halawai o na Aha Kuka a me Hooko, ua hoi aku na Senatoa a maloko o ke Keena Oihana o ka Peresidena i ka hale iluna o ka Hale Mana Hooko, a ua kahea ia e hoomalu e Hon. H. P. Baldwin, lunahoomalu no ka manawa, a ua lawelawe mai o Mr. J. F. Clay ma ke ano kakauolelo no ka manawa.
Ma ke noi, ua koho ia na Hon. J. A. McCandless, G. N. Wilcox a me Cecil Brown i komite no ka nana ana i na palapala hookohu o na Senatoa. Ma ko lakou nana ana i ia hookohu e waiho ana ma ke Keena o ke Kuhina Kalaiaina, ua hoi mai lakou a hoike hoapono i na hookohu o na apana koho Senatoa lehulehu penei:
Apana Ekahi -- J. Kauhane, Chas. Notley, F. S. Lyman a me F. Northrup.
Apana Elua -- H. P. Baldwin, A. Hocking a me W. Y. Horner.
Apana Ekolu -- Cecil Brown, H. Waterhouse, W. C. Wilder, J. A. McCandless, H. W. Schmidt a me J. N. Wright.
Apana Eha -- Geo. N. Wilcox a me W. H. Rice.
Ma ke noi, ua apono ia ka hoike a ua hookuu ia ke komite.
Oiai ka Lunakanawai Kiekie e noho ana ma ke ano makaikai i ka halawai a ka Aha Senate, ua noi ia oia e hoohiki i na Senatoa a ua hooko koke ia.
Ua hoomaka ia ke koho i Peresidena no ka Aha Senate, a ma ke noi ua koho lokahi ia o Hon. W. C. Wilder. I ka lawe ana o ka Peresidena i ka noho, ua haawi mai la oia he mau olelo hoomaikai i paipai ia. Ua koho ia o Hon. J. Kauhane i Hope Peresidena me kekahi kue ole.
No ke kakauolelo, ua koho lokahi ia o J. F. Clay.
No ka Makai o ke Senate, ua noi mai o Senatoa Baldwin e lawelawe pu ia luna i ka hana a ka elele a ua hooholo ia. Waiho mai o Senatoa Wright i ka inoa W. A. Wright a ua koho lokahi ia.
No ke kahunapule, he wahi hoopaapaa ko na Senatoa. Noi o Senatoa Brown, na kekahi hoa no e pule. Hoololi mai o Sentoa McCandless, na kekahi mea mawaho e pule. Hooholo ia ka hoololi. Waiho mai o Senatoa Brown i ka inoa o Rev. J. Kauhane, a o Senatoa McCandless i ka inoa o Rev. H. W. Peck. Ma ka balota, ua kohoia ka inoa hope.
Noi o Senatoa Baldwin e kohoia la i komite no na Rula i ekolu lala a e hoike mai i ka wa e makaukau ai. Koho ka Peresidena ia Rice, Brown a me Baldwin.
Ma ke noi, ua kauoha ia ke Kakauolelo e hoike aku i ka Hale Lunamakaainana ua makaukau ka Aha Senate no ka lawelawe aku i na hana imua.
Ma ke noi, ua hoopanee ke Senate a ka hora 10 A. M. apopo.
Moolelo o ka Hale Lunamakaainana o ka Repubalika Hawaii.
I ka hookuu ana o na hana wehe ahaolelo a ka Peresidena, ua noho iho na hoa o ka Hale Lunamakaainana e halawai maloko o ke Keena nui o ka Hale Mana Hooko.
Ma ke noi a Mr. Robertson, ua koho ia o Mr. E. E. Richards i lunahoomalu no ka manawa, a o W. L. Wilcox i Kakauolelo no ka manawa.
Ma ke noi, ua koho ia o Robertson, Naone a me Bond i komite e nana i na palapala hookohu o na hoa.
Ma ke noi, ua hoopanee ka Hale a noho hou i ka hora 3:30 auina la.
HALAWAI AHIAHI.
Hora 3:30, ua kahea ia ka Hale e hoomalu e lunahoomalu no ka manawa E. E. Richards.
Ua hoike mai ke komite o na Palapala Hookohu, ua pololei na hookohu o na hoa i koho ia o keia Hale penei:
Apana 1. E. E. Richards, R. Rycroft.
Apana 2. E. P. Bond, G. P. Kamauoha.
Apana 3. E. M. Hanuna, A. Pali, W. P. Haia.
Apana 4. D. L. Naone, E. C. Winston (aole i hiki mai), A. G. M. Robertson.
Apana 5. J. C. Cluney, James Davis, L. K. Halualani.
Apana 6. Walter McBryde, S. K. Kaeo.
Ma ke noi ua apono ia ka hoike.
Kahea ia ka inoa o na hoa a ua pane mai lakou a koe o E. C. Winston.
Koho ka lunahoomalu ia Kamauoha, Robertson a me Halualani i komite e kii aku i kekahi lunakanawai e hele mai e hoohiki i na hoa. Hiki mai o Lunakanawai Frear a hoohiki i na hoa.
No ka ninau pili i na rula, ua pane mai ka Loio Kuhina, ua hoomakaukau ia he mau rula no na hale elua ma na olelo Beritania a me Hawaii, a ua waiho hewa ia mahea la. Ua hoomakaukau ia he mau rula hou, ke pai ia nei a malia o makaukau ma ka Poalima. E pono no e hapai i ke koho ana o na luna malalo o na rula maa mau.
Mahope o ka hoopaapaa wale ana no na mea pono e hana aku ai, ua hooholo ia e hoomaha ka hale no hapalua hora hou a e noonoo o na hoa wale iho no ma ka wae ana i ka lunahoomalu mau a me na luna e ae, a e noonoo no na moho e holo ana ma ia mau wahi.
Hoomaha i ka hora 4:30 a noho hou i ka hora 5:45 mahope o ke kukakuka ana o na hoa wale iho.
Noi o Kamauoha e kapae i na rula, a e koho ia na rula mau o ka hale. Holo.
Waiho mai o Hanuna i ka inoa o D. L. Naone i lunahoomalu a ua koho lokahi ia. Hoike nui ka lunahoomalu i koho ia i kona hoomaikai me ka olelo mai, aohe oia i makaukau ma keia hana, a ua makemake oia i na kokua ana o na hoa.
Koho lokahi ia o W. L. Wilcox i maheleolelo, ma ka waiho ana mai a Kamauoha i kona inoa.
Waiho ia mai ka inoa o Jas. N. K. Keola, a me Archi Smities i kakauolelo, a ua koho ia o J. N. K. Keola.
Ma kahi o ka Makai a me ka Elele o ka Hale, ua koho ia o P. Bruce.
Ma kahi o ke kahunapule no ka Hale, ua koho ia o Rev. J. Waiamau.
Ma ke noi ua koho ia o Robertson, Bond a me Richards i komite no na rula o ka Hale.
Ma ke noi ua kauoha ia ke Kakauolelo e hoike aku i ke Senate, ua kukulu ia a ua makaukau ka Hale e lawelawe aku i na hana e hele imua.
Ua heluhelu mai ke Kakauolelo he palapala mai ke Kakauolelo mai o ke Senate, e hoike mai ana i na luna o ke Senate. Ae ia.
Ua kauoha ia ke Kakauolelo e hoike aku ia Rev. J. Waiamau no kona koho ia ana i kahunapule no ka Hale.
Hora 6 ahiahi, hoopanee ka Hale a noho hou i ka hora 10 A. M. Poaha.
SENATE.
LA HANA 2. IUNE 13, 1895.
Halawai ke Senate i ka hora 10 kakahiaka. Peresidena Wilder ma ka noho. Pule ke kahunapule Peck. Kahea ia na inoa a ua pane mai na Senatoa a pau.
Heluhelu ia he palapala mai ka Hale Lunamakaainana mai e hoike ana, ua koho ia ko lakou mau luna a ua makaukau no ka lawelawe i ka hana.
Heluhelu ia ka moolelo o ka la i hala a aponoia.
Hoike mai o Mr. Richards ma ke ano komite hookahi lala mai ka Hale mai, he Olele Hooholo Hui Helu 1 e koho ia i komite hookahi lala mai na hale pakahi mai no ka hele ana aku e hoike i ka Peresidena, ua makaukau ka Ahaolelo e apo mai a hookipa aku i na palapala mai a ia mai.
Noi o Senatoa Brown, e ae aku ke Senate i ka olelo hooholo. Apono ia. Koho ka Peresidena ia Senatoa Kauhane i komite.
Hoike mai ka Peresidena, ua loaa mai iaia na kope o na hoike a ke Komisina Paahana, ka Loio Kuhina, ke Kuhina Waiwai a me ka Papa Ola.
Ma ke noi, ua kauoha ia ke Kakauolelo e paiia ona mau pepa paihakahaka kupono a hiki i ka wa e koho ia ai ona komite pai.
Mamuli o ko ke Kuhina Kalaiaina omaimai, ua lawe mai ke Loio Kuhina i "Ke Kanawai e pili ana i na Aina Aupuni."
Ma ke noi, ua heluhelu mua ia ma ke poo a waiho ia malalo o na rula.
Hoike mai o Senatoa Kauhane ke komite hui me Lunamakaainana Richards, ua hele aku laua a halawai me ka Peresidena a hoike aku eia ka Ahaolelo ke noho nei ma ke Kau.
Hoopanee a ka hora 10 A. M. Poakahi.
HALE.
LA HANA 2. IUNE 13, 1895.
Akoakoa ka Hale ma ka hora 10 kakahiaka, Lunahoomalu Naone ma ka noho. Pule ke kahunapule o ka Hale Rev. J. Waiamau.
Heluhelu ia ka moolelo o ka la i hala a apono ia.
Noi mai ka Loio Kuhina e hoohola ia ona Olelo Hooholo Hui e koho ana i komite hookahi lala mai na hale pakahi mai, a e hele hui ia komite e hoike aku i ka Peresidena, ua makaukau ka Ahaolelo e lawelawe i na hana. Apono ia. Koho ka noho ia Lunamakaainana Richards i komite.
Hora 10:10, ua loaa mai he elele mai ka Aha Senate e ae ana i ka olelo hooholo a ua koho ia o Senatoa Kauhane i komite hookahi lala e hele pu ai me Lunamakaainana Richards.
Ua noi mai ka Loio Kuhina, mamuli o ke omaimai o ke Kuhina Kalaiaina, nolaila ua waiho mai oia i ka bila e pili ana i na Aina Aupuni.
Ma ke noi, ua heluhelu mua ia ma ke poo a waiho ia malalo o na rula.
Hoike mai o Lunamakaainana Richards, ua hele aku ke komite hui o na hale elua e halawai me ka Peresidena a ua hai aku iaia ua makaukau ka Ahaolelo e apo mai i na elole a pau e hoouna ia mai ana mai iaia mai, a ua makemake pu oia e ike i ka papa inoa o na hoa o ka hale a me na luna. Ae ia ka hoike a hookuu ia ke komite.
Ua hoike ae ke Kakauolelo, ua hoouna aku nei oia ia mau mea.
Heluhelu mai o Lunamakaainana Kamauoha he olelo hooholo e koho ka hale i na lala elima o ka Ahakuka o ke Aupuni.
Hoololi mai ke Kuhina Waiwai i ka olelo hooholo, e koho ia ona komite ekolu lala e wae i na inoa o ka poe kupono no ke kulana, aka aole nae ia wae ana he mea e papa ai i ka Hale i ka lawe ana i kekahi poe e ae. Hooholoia ka hoololi. Koho ka noho ia Robertson, Kamauoha a me Richards.
Hoolaha mai ke Kuhina Waiwai e lawe mai ana oia he bila e hana ai i mau haawina pakui no na lilo o ke Aupuni Repubalika o Hawaii no ka manawa elua makahiki e pau ana i Maraki 31, 1896, nona ka huina he $156,250.
Ma ke noi, ua ae ia aku e heluhelu mua ma ke poo a waiho ia malalo o na rula.
Hoolaha hou mai ke Kuhina Waiwai e lawe mai ana oia he bila e hana ai i mau haawina pakui no na hana o ke Aupuni Repubalika o Hawaii nona ka huina he $32,800.
Ma ke noi, ua ae ia aku e heluhelu mua ma ke poo a waiho ia malalo o na rula.
Ma ke nei, ua hoomana ia aku ke Kakauolelo e hoolako mai i na paihakahaka a me na lako kakau kupono no ka pomaikai o ka hale.
Ua komo mai o Mekia Potter, ukali o ka Peresidena, me ka elele palapala mai ka Peresidena Dole mai, a oiai e heluhelu ia ana ma ka olelo Beritania, ua noi mai la o Lunamakaainana Hanuna, e hoopau i ka heluhelu ana a pau i ka unuhiia ma ka olelo Hawaii a paiia.
Hoopanee ka hale a noho hou i ka hora 10 kakahiaka Poakahi.