Ka Nupepa Kuokoa, Volume XXXIV, Number 16, 20 April 1895 — NA LETA. [ARTICLE]

NA LETA.

[Aole o makou makemake e lawe ke koi koi o na hala no na manao i hoopuka ia ma [ ] o keia poo manao e ko makou poe me kakau]

Ha Hou o Maikonisia.

I ka lunahooponopono o ke Kuokoa e aloha oe. Ke hoolauna hou aku nei au ia oe no ka elua o ka manawa ma ke ano he mea hoike mea hou o na aina pouli wale. Ua hiki mai ka manuwa Pelekane i-o makou nei me na kanawai i pai buke ia, i Iune 20 1894, a mamuli o keia kanawai ua ulu mai ka haunaele o ka aina, mamuli no o ka naaupo o kanaka, ma keia kanawai e kapu ana i na hana ino apau loa, a pela aku. Na hula:- Ke ulu hou nei ka hula iluna o ka aina mai kela poo a keia poo o ka aina. E ike me ka ikaika o ke au o ka moana e huki ana i na mea ola iloko o kona inaina, pela no ka holomoku ana o na kanaka iloko o ko lakou kuhihewa ma na hana hua ole o ka pouli. Nui ka la:- He nui ka la o makou nei i keia mau mahina e naue nei, o ka la paha ia ke maloo mai nei ka niu, ka hala, aohe wahi kulu pakaua, nolaila au i hoomanao ae ai i keia wahi mele a kahiko. Uwe kani a ka puniu i ka wela a ka la. Ka hana a ka Haku:- Mamuli o ka ulu hou ana o ka hula ua ike la ka nawaliwali i keia makahiki ke hoi hou nei na wahi hoahanau i ka hula, oia ka hana oi aku o ka makemake loa o na kanaka o keia mau Paeaina, olelo lakou ina e kapu ia ka hula nawaliwali ko lakou mau kino, ina e hula ikaika ko lakou mau kino. Nui ka hupo o na kanaka, o ka poe hapa manaoio no o lakou no kai hoi hope, a o ka poe no i koho ma ka oiaio, o lakou no kai koe mai. Na kula la:- Ua emi mai na kula i keia makahiki, ehiku kula, aole e like me kela makahiki i hala, he umi kula, o ke kumu ua emi mai ka hua niu a me ka ulu pu ana o ka hula. Marakei, Aug. 17, 1894:- ua hiki aku la i Marakei a lohe mai la i ka mea hou e pili ana i kela kaua i hana ia ma Marakei i ka makahiki 1893, ua noho ka aha hookolokolo a ke Komisina Pelekane me ke kapena o ka manuwa, o ka olelo hooholo a kela aha e ahewa ana i ke alii, a ua lawe ia ke alii i Piki e hoohana ai no elua makahiki, poohu ka lae o ka paakiki. D. Kaai, Apaiang, Dek. 28, 1894.