Ka Nupepa Kuokoa, Volume XXXIV, Number 7, 16 February 1895 — Page 1
| This text was transcribed by: | Randy Tandal |
| This work is dedicated to: | Awaiaulu |
Ka Nupepa Kuokoa
KE KILOHANA POOKELA NO KA LAHUI HAWAII.
BUKE XXXIV.
HELU 7.
HONOLULU, POAONO, FEBERUARI 16, 1895.
NA HELU A PAU, 2533
Hoolaha Loio.
H.R. HITCHCOCK,
Notari no ka Lehulehu.
Apana Hookolokolo Kaapuni Elua,
Kaluaaha, Molokai.
2514-11
W. R. KAKELA,
Loio a he Kokua ma ke Kanawai.
HE LUNA HOOIAIO PALAPALA.
2370
ANTONE ROSA,
(AKONI.)
Loio a he Kokua ma ke Kanawai.
LUNA HOOIAIO PALAPALA.
Keena Hana ma Alanui Kaahumanu
2370-
ALLEN & ROBINSON,
NA MEA KUAI PAPA O NA ANO A PAU @K loaa no ma ka UWAPO O PAKAKA, Honolulu, make kumukuai makepono loa, no ka pomaikai o ka lehulehu e makemake ana e ku @uiu hale. E kipa mai a e ike kumaka.
2396-q
WILDER & CO. (WAILA MA.
Hea Kuai Papa a me na Loko kukulu hale o na ano a pau, a me na mea e ae a pau e pono ai o ka hale.
Kihi o Alanui Moiwahine me Papu.
2396-q
JAMES M. MONSARRAT,
(MAUNAKEA.
Loio a he Kokua ma ke Kanawai
HE LUNA HOOIAIO PALAPALA.
E hana ia no na Palapala kuai, Palapala Hoolimalima, a me na Palapala Pili Kanawai e ae ma ka olelo Hawaii. Dala no ka hoaie ma ka moraki ma na Waiwai Paa.
Keena Hana: Hale Pohaku hou ma ka aoao ma Waikiki o ka Halewai, alanui Kalepa.
2370
J. T. WATERHOUSE,
(WALAKAHAUKI.)
Halekuai o na ole Nani Panio!
LAKOHAO.
Na Lako Hana Mahiko,
A PELA AKU HE NUI WALE.
Alanui Moiwahine, - - Honolulu.
2396-q
Hoolaha Hooko Moraki.
MAMULI O KEKAHI MANA KUAI I HOIke ia maloko o kekahi palapala moraki i hana ia mawaena o N. F. BURGESS a me ANNIE J. BURGESS kaua wahine mare o Honolulu Mokupuni o Oahu o ka aoao mua, a me Charles F. Wall o Honolulu o ka aoao elua, ma ka la 30 o Iulai 1886, i kope ia ma ka buke98, aoao 343, a mamuli o ka uhai ia ana o na kumu aelike o kela moraki, ola hoi ka hookaa ole ia o ke kumupaa a ine ka ukupanee i ka wa e hookaa ai, nolaila, ke hoolaha ia aku nei e ka mea nona ka aoao elua o ua moraki nei, e hooko ana oia ia mana kuai.
A ke hoolaha hou ia aku nei, aia mahope aku o ua pale ekolu mai keia ia aku, alaila e hoolaha ia aku na elua i hoike ia ma ia moraki no ke kudala ana, ma ke Koena Kudala e Jas. F. Morgan ma Honolulu, ma ka la 25 o FEBERUARI 1895, hora 12 o ia la.
Aia ma kahi o W. R. KAKELA na olelo hoakaka no keia mea.
Hanaia i keia la 18 o Ianuari, 1895
CHARLES F. WALL,
Mea Moraki mai.
Penei na elua i moraki ia:
O keia pa aina me ka hale maluna iho e waiho la ma Alanui Beritania i hoailona Pa @aie 263 ma ke ana kahiko, oia ka Pa elua me ka hikina o Alanui Beritania, nona ke alo he 100 kapuai ma ia Alanui Beritania a pela no ka laula ma ka aoaomauka o ia pa, me ka hohonu o 150 kapuai mai Alanui Beritania aku.
2531-4
Hoolaha Hooko o ka Moraki a me ke Kuai.
KE HOOLAHA IA AKU NEI KA LOHE I na mea a pau, i kulike ai me ka mana kuai i hoike ia maloko o kekahi moraki i hana ia e A. W. HAALILIO a me MAMANA kana wa hiue mare o Waipio Hamakua, Mokupuni o Hawaii, ia Samuel Parker ma ka la 6 o Augate 1896, a i kopeia maloko o ke Keena Kakau Kope o ke Aupuni, Buke 100 aoao 304, 305 a me 306, a i hoolilo ia aku e ua Samuel Parker la i ka Hui o @ M. G. Irwin & Company Limited, he Hui i kukulu ia malalo o na Kanawai o ko Hawaii Pae Aina, ma ka la 23 o Augate 1895, a i kopeia ina ke Keena Kakau Kope, Buke 100, aoao 3@@, ke manao nei e hooko aku i ua moraki la, no ka uhuki ia o ka aelike iloka o ua moraki la, oia ka hookaa oie ia o ka ukupanee a me ke kumupaa i ka wa e hookaa ai.
Ke hoolaha hou ia aku nei ka lohe i na mea a pau, o ka waiwai a pau i hoopaa ia maloko o ua moraki la, e kuai ia ana ma ke kudala akoa ma ka Hale Kudala a Chas Williama ma Honokaa Hamakua Hawaii, ma ke POAONO, MARAKI 2 1896, hora 12 awakea o ia la.
O ka waiwai i hoopaa ia maloko o ua moraki la, oia keia:
1. Hookahi hapalua i mahele oia ia o kela apana elua e waiho ia ma Honolulu Hamakua Hawaii, i kuhikuhi ia ma ke Kuleana Helu @ @@, nona ka ili he @ 16 100 mau eka.
2. Kela apana aina a pau e waiho la ma Waipio, Hamakua Hawaii, a oia ka apana aina Helu @ i kuhikuhi ia ma ka Palapala @ Nui 717@, Kuleana Helu 16861, nona ka ili he 12-16 eka.
3. Ka hale noho o A. W. Ilealilio ma Waipio Hamakua Hawaii.
4. Kela apana aina a pau e waiho ia ma Kahaili, Hilo Hawaii, i hooko ia ia Kaumiumi, ma ka Palapala Sila Nui Helu @, nona ka ili he 78 mau eka.
5. Hookahi hapalua i mahele ole ia o kela apana elua e waiho la me Alakahi, Hilo Hawaii i kuhikuhi ia ma ka Palapala Sila Nui Helu 2883, nona ka ili he 5 62-100 mau eka.
Dala kuike: Na uka hana palapala i ka mea a @ ai.
No na mea i koe e ninau ia
CHAS. WILIAMS.
Kekauia me Honokaa, Hamakua. Hawaii, Ianuari 30 1895.
W@. G. Irwin & Company, Ltd.
Ma e CHARLES WILLIAMS
Ko lakou Lole.
HE MOOLELO WALOHIA
NO NA UI
Makua Ole Elua.
LA FOSA
Ka Makona,
-A ME-
Pia Fosa,
KA MEA I PIHA I KE ALOHA.
DE WODISE,
Ka Naita Puuwai Piha Hamama a me ka Olu Waipahe.
MOKUNA II.
KA MAKUAHINE ME NA KEIKIKANE ELUA.
"Manao wau, e hiki koke mai ana no oia," wahi ana me ka hooiaio e ke kamailio ana. I wahi mea e hoopoina ai ke kaikamahine makap i keia mau manao no ko laua pone, ua pane aku la o Heneriata, "E Luisa! Nani maoli o Parisa! Auwe oe e kuu kaikaina pilikia, ina no hoi paha he hiki ia oe ke ike, ina ua ike oe i keia nani nui, aloha maoli au ia oe e kaina."
"Hahai mai hoi oe ia'u i kau mau mea e ike mai. Aia i hea kaua?" i ninau mai ai o Luisa me ka olioli nui.
"Aia kaua iloko o kekahi kuea ma ke kae o kekahi uwapo nani," i pane mai aku ai o Heneriata me ka nana ana a puni, me kekahi kii pohaku mabala nani a ka launa ole mai iwaenakonu.
"O ka Pont Neuf aku la kena," wahi a Luisa iaia i hoomanao ae ai i ke kii a Heneriata i hoike aku ai. "O ke kii keua a papa e kamailio mau ai?"
"A ma kela aoao ke ike nei au he elua mau puoa kiekie," i hoomau aku ai ke kaikamahine ui iaia e hoike nei i kona kaikaina aloha. "O ka Notre Dama paha."
"Notre Dame," i pane aku ai o Luisa me ke kaumaha nui, iaia i ku ae ai mai kona noho ae. Makemake maoli au ina he mea hiki ia'u ke ike aku. Ma kela wahi, owau, he wahi pepe makua ole i waihoia ai e make. "I ke kaikamahine makapo e noonoo ana i na mea i hala, helelei wale mai la no kona mau waimaka, me ka huli pono o kona mau maka ike ole ia wahi, a keia mea hilahila a aloha ole e huna noi kona mau make, i keia mau waimaka aloha e hiolo nei, kahi ona i waihoia ai e make i ke anu a me ka pololi. A ilaila hoi au i loaa ai i kou makuakane maikai. A ina aole oia, ina ua make au-ina paha-ina paha ua oi aku ia o ka maikai," wahi ana me ka leo i piha i ka ehaeha me ka nui o ka walohia ke hoolohe aku.
"E kuu kaikaina ka'u mea aloha e oe!" wahi a Heneriata, "heaha ia kou mea o ka olelo ana pela?"
"No ka mea," wahi a Luisa, me ka leo ehaeha, "aehe hoihoi o ke ola ana loa e lilo i makapo aole loa e hiki ke lealea."
"E Luisa, mai olelo oe like me ia!" wahi a Heneriata iaia i puliki aku ai ka lima o kona kaikaina. "O ko kaua mau makua aloha, ua aloha like mai laua ia kaua--o oe ka laua punahele a pee ka laua mea nui, a me ka loaa ana ia laua ka makamua loa o ka ehaeha i ka manawa a na @ i pani mai ai i ke ike a kou mau @."
"Eia na ulia o ke pakalaki ke uhai mau nei mahope o'u, e kuaana," wahi a Luisa me ka maikai ole o kona noonoo, "a ke hahai mau nei no ia'u a hiki i ka manwa i haalele ia ai kaua he mau keiki makua ole, me na kokua ole a me ka hoaioha ole"
"Aole! aole e kuu Luisa aloha!" i pane koke aku ai o Heneriata, "ua kuai hoi au i na wahi poono o kaua iloko o ke dala, a eia kaua iloko o keia kulanakauhale nui o Parisa i keia wa, kahi e loaa ai e ke kauka akamai loa nana e hoihoi hou mai ka ike o na maka o kuu Luisa a i kona mau ano mamua," a aia iloko o ko Heneriata leo kuoo ka mea nana i haawi aku i kona kaikaina i ka manao hoihoi no ka loaa iaia ka maha.
"Na na lani kiekie e haawi mai i ka manaolana no ko'u pono," wahi a Luisa me ka manaolana hoihoi. A no ka pau ole o ka noonoo no ko laua kulana i keia manawa, ua ninau aku la oia:
"A, ai hea la ka hoi ka Monasiua Matini? Heaha la ka hoi kona mea o ka hiki ole ana mai nei?"
No kekahi mau minute ko Heneriata palaka ana no ko laua kulana e ku nei i keia manawa, a haupu ae la oia no laua. Iloko o Parisa me ka hoaloha ole, aole loa hoi ka makamaka, a ina aole e hiki mai ka ohana a laua e manao nei e hiki mai ana, a heaha la ka laua mea e hana ai?
Aole o Heneriata ia ae i keia mau manao e komo iloko ona, a i mea hoi na kona kaikaina e hoihoi ai ua hoohole iho la oia e hele e imi a nana ia Monasiua Matini, ike aku la oia he wahine o na makahiki he iwakalua paha i ke komo ana mai ma kekahi wahi hamama mamua o ka hale inu rama, a ku iho la me ka nana ana i ke kahe mai a ka wai o ka muliwai me ka ikaika, he nanaina kaumaha kona.
He helehelena kona e hoike ana, he wahine ui oia mamua, a e alualu ia nei hoi e na ehaeha a me ka inea o keia ola ana, ua kahikoia oia me kekahi lole maikai a me na mea hoonani ole hoi, a e leha ana hoi kona mau maka ma o a maanei, no ka hoopoina ana hoi i kona mau manao e haluku ana iloko ona.
E ku ana oia iluna me ka onioni ole, e like me kekahi kii pohaku a laau paha, me kona mau manao aloha me ke ino e hakoko mau ana, no ka nui loa o na manao ino e haluku ana iloko ona, ua hoike a maka mai ia mau manao ma kona helehelena.
Ia Heneriata i hoi mai ai imua o kona kaikaina, me na hoike no ka loaa ole ana o ko laua ohana, a me kona hiki ole mai, a ia manawa pu no hoi i lohe ia aku ai o kekahi mau leo nui akaaka, me ka leo o ka pila e kani ana mai ka puka mai o ka hale inu rama, ka mea nana i pale aku i ka wahine auwana mai ka lohe ana i ka leo a me ka hiki ana mai o Heneriata.
Iwaena o na leo e lohe ia nei mai ka helu inu rama mai, o ka leo oolea huhu, hoomakaukau o Keeku Fosa kekahi, a i ka manawa i lohe ai o ua wahine auwana nei, puiwa ae la oia e like me ka mea i kiki ia e ka moo.
"Ae, o kona leo kela," wahi ana, iaia i huli aku ai a ku pono kona alo i ka puka o ka hale inu rama, "e himeni ana oia me ka akaaka. Ahe, o ka ona a me ka inu kau mea makemake, ea; poino oe i ka mea naha ka puuwai ea! Lealea ia, ia'u hoi ka mea malalo o kou mau kupuai, au hoi i hana ino ai, ke hele nei oia e imi i kahi palekana i haawiia mai nona-make! Eia ka muliwai ua kokoke, hookahi lele ana a o ka panina hope loa ia. A o keia mau leo make hoi o ka hilahila ino o'u, e lawe ia aku a hiki i kou mau pepeiao, ke hoohiki paa nei au aole e poina i kau mau kana ino lapuwale!"
A iloko o kona huhu nui ua wahine auwana nei i holo aku ai imua no kona makemake e make. A me keia mau manao ino e lauwili nei iloko ona, ka wahine i hoehaeha ia e makemake nei e pauaho mai i keia ola ana a hoi aku i ka mea nona i hana mai, me kona mau hewa, me ka hoopoina ana i na mea o keia honua a me ka hoakaka mai iaia no keia hana maikai ma o.
KA MAKAIKIU
LEONE AKA
---:A O:---
KA OPIO PUUWAILIONA
---:A O KA:---
Hopo ole Nana i uekaa na Hana Pohihihi a ka Poe Haihai Kanawai.
ONA HOI NA MAKA OOI I LIKE. ME KA UWILA, A ME NA LALA WIKANI KOHU KILA MAGENEKI
MOKUNA IV.
Hoomaikai aku la keia i ke kupakako, a me ka hookaulua ole iho, ua hoi pololei mai ia oia no kona keena, me kona papa mea ana aku nae i na kupakako la, aohe make hai aku i ua lede la, ua hele aku oia ilaila e niele ai nona.
Wehe ae la oia i kona aahu hoanoe a komo mai la oia i kona aahu ponoi, a iloko o ia wa, o Leone ke kaekaea i kela wa.
Ma ke ahiahi ana, ua hele aku oia e ike i ka mea a kona puuwai i aloha ai, oia o Ewalina Gula. He mea e ka hauoli o na kamaaina i ka ike ana mai i ko laua hoaloha maikai. Ia wa no, ua hoike aku la oia ia laua e holo koke hou ana oia no Ladana maluna o kekahi mokuahi e holo ana ma ka hora 9 o ia ahiahi no.
Ua haawi aku no hoi oia i na manao lana maikai ia laua, e huli ohi koke mai ana no oia ma ia wa, ua hooholo ia iho la ka hoopalau mawaena o na opio. He mea hoi a ko Ona Miliona Mr. Gula i akenui loa ai, a ua hooko ia kona iini, a pela pu hoi me ko na opio. Mahope iho o ka puili aloha ana o na paa opio ui waipahe, ua huli hoi mai la o Leone, aka ua hele mea ae nae oia i kahi o ka Ilamuku, a hoike aku la i kana mau mea e hana aku ana, oia hoi, e kau koke ana oia ma ka moku a holo no Ladana, oiai aohe ona makemake e hopu i kela mau mea me ka paa mua ole iaia o kela kanaka, ka mea hoi nana i hana mua i ke ino, a oia no hoi ke kumu o keia mau popilikia a pau.
MOKUNA V.
I ke kani ana o ka hora 9 oia po, aia ka kakou hiwahiwa me kona kulana hiehie e ku ana maluna o ka oneki o ka mokuahi nui nani kulanakauhale o "Nui Ioka," a e okioki ana hoi kona ihu i na ale kawahawaha o ka moana Akelanika.
He elima la o ko lakou holo ana, a ma ka wanaao o ka eono o na la, ua hookomo aku la ka mokuahi mahimahi no ke awa ku-moku kaulana o Liwapulu.
Me ka hookaulua ole, ua kau koke aku la o Leone maluna o ke kaaahi no ke kulanakauhale o Ladana. He mau hora kakaikahi, ua hoea aku la ke kaeaea hanu meheu no ka huikau o Ladana. Mahope iho o kona hoomaemae ana iaia iho, na hele aku la oia e ike mua i kona poo ma ka oihana, a he keu hoi a ka puiwa launa ole o ke kanaka aoo i kona ike ana mai iaianei.
"Auwe! Hoi koke mai nei no ka oe?"
"Ae, oiai ua lele mai nei ka manu eia ianei nei kahi i hana punana ai," wahi a Leone me ka hoomakeaka.
"Heaha, ua maopopo koke mai nei no ia oe na mea e pili ana i keia hihia?"
"Ae, a ua paa ia'u ke kanaka nana e haua nei na hana ekaeka a na poe powa'ia, a aia oia iloko o kahi paa kahi i kakali ai no ka hoea aku o na hoa ona."
"He kiekie maoli no hoi oe a ka eleu. Ua kupono ka haaheo ana o Ladana."
I kela wa, ua hoohala laua ma ke kamailio ana no kekahui mau hora, a i ka pau ana, ua hoi o Leone no kona hotele ponoi, a malaila oia i hoomaha ai no kekahi mau hora.
I ka poeleele ana, mahope o kona paina ana i kona aina ahiahi, ua oili aku la oia me ka hoololi uuku ana iaia iho.
Hele aku la oia a hoea ma kekahi hotele inu rama malaila, ua komo aku la oia iloko. I loa no iaia a komo aku ma ka puka, ua haule aku la ka ike a kona mau maka maluna o kekahi kanaka e ku ana me kekahi mau hoa e ae mawaho aku o kahi inu rama.
Hoomaopopo koke aku la no oia, o ua kaikoeke la no keia o lakou, aka na anoe iki nae kona ano, oiai he umiumi loloa kona i keia wa, he mea hoi ana i kahiko ole ai i na la mamua.
Ia wa, ua hele aku la keia a noho iho la ma kekahi noho ma ka aoao o kekahi wahi pakaukau, me kona hoolale ana ae i kekahi o na kuene e lawe mai i omole wai momona nona.
Aole i pau.
KE KOPE O KE
KANAWAI AINA HOU.
No ka Noho ia ana a me ka Hoowaiwai ana i na Aina Aupuni.
NA KULEANA HIKI OLE E HOOLILO IA.
E Noho Maluna o ka Aina no Eono Makahiki--Alaila Haawiia ka Palapala Hoolimalima Mau Loa--Na Hoakaka ana no ka hana ana i na Home--Kukulu ana i na Hale Noho Iloko o Ekolu Makahiki--Aole Kuai a i ole ia Moraki.
Pauku 5. Ina ua kupono a lawa na mea e kupono ai ka mea noi e like me ia i hoakaka ia mamua ae nei, kakauinoa ka hope akuna i palapala hoike i hana palua ia no ka noho ia ana o ka apana aina i noiia no ka mea noi e like me ke kumu i hoike ia ma ka papa B, a e haawi aku i kekahi kope i ka mea noi a e malama hoi i kekahi ma kona keena hana. Ua loaa i ka mea noi i ka manawa e loaa aku ai iaia o ka palapala hoike i oleloia ke kuleana e lawe malalo o kona mana a e noho noho ma ka aina i oleloia ma ia palapala a e ike ia oia ma ia manawa ma ke ano he mea noho, a oia no ka olelo ana no ka poe e noho iho ana ma ia hope ma o kona kuleana mamuli o ka palapala hoike no ka noho ana i oleloia. E loaa i ka mea noho ke kuleana e loaa iaia he palapala hoolimalima mau loa o kahi i oleloia i ka pau ana o na makahiki he eono mai ka la i hanaia ai o ka palapala hoike no ka noho ana, ina ua hookoia na kumu a pau ma ia palapala hoike e hana ia e ka mea noho ma ke ano nui. O ka lawe ana o ka mea noho i ka palapala hoike, oia no kona lawe ana a ae ana i na kumu a me na mea a pau i hoakaka ia maloko o ia palapala.
Pauku 6. O ke kuleana e lawe a paa i ka aina o ka mea noho, mawaho ae o na mea i hoakaka ia ma ka Pauku 14, malalo no ia o keia mau kumu i hoike ia mahope iho nei:
1. Mamua ae o ka pau ana o ekolu makahiki mai ka la i hana ia ai ka palapala hoike o kona noho ana, e kukulu oia i hale noho maluna o ka aina i olelo ia.
2. Mamua ae o ka pau ana o ekolu makahiki mai ka la i hana ia ai palapala hoike o kona noho ana, e hoomaka oia e noho maluna o ka aina i olelo ia.
3. E noho mau oia maluna o ka aina i olelo ia mai a mahope o ka pau ana o ekolu makahiki mai ka la i hana ia ai ka palapala hoike o kena noho ana, eia nae, e ka malama mau ia ana o kona hale maluna o ia aina ua lawa no ia me kona noho kino mau ole aku malaila.
4. Mamua ae o ka pau ana o eono makahiki mai ka la i hana ia ai o ka palapala hoike o kona noho ana, e mahi oia a e malama me ka mahi ia i ka manawa hookahi, aole emi malalo o umi pa-keneka o ka aina i olelo ia, a i ole ia e mahi a e malama me ka mahi ia i ka manawa hookahi aole e emi malalo o elima pa-keneka o ka aina i olelo ia, a e kanu a malama me ka ulu maikai maluna o ka aina i olelo ia aole e emi malalo o umi laau kupono i ka hana a i ole ia laau malumalu a hua ai paha no kela a me keia eka oia aina, ina he aina mahiai ia.
A i ole ia ina ua helu ia ka aina ma ka papa o na aina hanai holoholona, mamua ae o ka pau ana o eono makahiki mai ka la i hana ia ai ka palapala hoike no kona noho ana e pa oia i ka aina a paa i ka pa.
Pauku 7. Ina i ka pau ana o ekolu makahiki mai ka la i hana ia ai ka palapala hoike e kona noho ana, ua ike ia aole i hooko ka mea noho i ke kumu ekahi, a i ole ia elua i hoakaka ia ma ka pauku mamua ae nei, e pau kona kuleana iloko o ka aina i olelo ia, a e lilo ka palapala hoike o kona noho ana i mea ole.
A ina i ka pau ana o eono makahiki mai ka la i hana ia ai ka palapala hoike o kona noho ana, ua ike ia aole i hooko ka mea noho i ke kolu a me ka ha o na kumu i hoakaka ia ma ka pauku mamua ae nei, e lilo kona kuleana iloko o laila a me kona kuleana e loaa iaia kekahi palapala hoolimalima mau loa oia wahi e like me na olelo o kona palapala hoi i mea ole, a e lilo ka palapala hoike o kona noho ana i mea ole.
Pauku 8. Aka ina i ka pau ana o na makahiki eono i olelo ia na iko ia ua hooko ka mea noho i na kumu a pau loa i hoakaka ia ma ka Pauku 6, a pela no hoi me na kumu i hoakaka ia ma ka Pauku 14, e hooiaio aku ka Agena o na Aina Aupuni i ka Peresidena no ia hooko ia ana, a nana e hana i palapala hoolimalima mau loa ma ke ano palua no ka pono o ka mea noho i hana ia ma ke ano nui e like me ka Papa C. no ka manawa o eiwa haneri me kanaiwakumamaiwa makahiki, a oia palapala hoolimalima e kakauinoa puia e ke Kuhina Kulaiaina. O ka mea noho i ka wa e loaa ai iaia oia palapala hoolimalima, e kapaia oia ka mea hoolimalima, a oia no hoi ka olelo ana o kekahi poe e ili aku ai kona kuleana malalo oia palapala.
Pauku 9. Hookahi kope o ka palapala hoolimalima i olelo ia e waiho ia ma ke keena hana o ka Agena o na Aina Aupuni, a e kekahi hope e haawi ia aku e ka Hope Agena i ka mea hoolimalima ma kona hookaa ana i kekahi uku o elima dala a e kakau ia ka hookaa ia ana oia mau dala maluna o ke kope i olelo ia e ka Hope Agena. Aole pono i haawi ia ma ia palapala hoolimalima aia wale no a haawi ia aku la e like me ia i olelo mua ia ae nei a me ka hookaa ia ana o ka uku i olelo ia, a o ka lawe ana o ka mea hoolimalima i ka palapala hoolimalima oia no kona lawe ana a ae ana i na kumu a me na mea a pau i hoakaka ia maloko o oia palapala.
Pauku 10. Ina ke kanaka i olelo ia he mea hoolimalima maloko o kekahi palapala hoolimalima maloko o kekahi palapala hoolimalima oia ano e hele kino ole aku ma ke keena o ka Hope Agena a e hookaa aku i ka uku i olelo ia a e lawe i ka palapala hoolimalima i olelo ia, a hala hookahi makahiki mahope iho o kona kauoha ia ana e hana pela o ka Hope Agena alaila e pau ke kuleana oia mea e loaa iaia ka palapala hoolimalima a me na aina i olelo ia maloko, a o ka palapala hoolimalima i olelo ia a me ka palapala hoike o kona noho ana e lilo no ia i me ole.
Pauku 11. Aole e hiki e hoolilo ia aku ia palapala hoike o ka noho ana, aole hoi ka palapala hoolimalima ma ke ano moraki a i ole ia ma kekahi ano e ae, a i ole ia e hooili ia aku, a i ole ia e hoomalu ia mamuli o kekahi palapala hoomalu a ohi paha a i ole ia ma kekahi hana banekarupa i hoepuka ia e kekahi aha hookolokolo mawaho ae o na hana no ka hoopau ana a hoolilo ana i mea ole e like me ia i hoakaka ia ma keia Kanawai; eia nae ua hiki no i kekahi mea noho a poe noho paha, a i ole ia mea hoolimalima a poe hoolimalima paha, e paa ana i ke kuleana a pau iloko o kekahi palapala hoike no ka noho ana a i ole ia palapala hoolimalima mau loa e hoihoi aku ia kuleana i kakau kupono ia maluna iho oia palapala a i kakauinoa ia eia imua o ka Hope Agena. O kekahi hoihoi ana oia ano, he mea ia e hookuu ia ai ka poe noho a hoolimalima paha mai ka hooko hou ana aku i na kumu i olelo ia maloko o ka palapala i hoihoi ia. Aka aole e mana kekahi hoihoi a kekahi mea oo ole malalo o 18 makahiki; a e hoomaopopo hou ia, ua hiki no i kekahi mau mea elua e paa ana i na palapala hoike o ka noho ana a i ole ia he mau palapala hoolimalima oia ano ma kekahi apana hookahi, aole hoi laua he mau mea i hooko ole i kekahi o na kumu i hoakaka ia maloko o ko laua mau palapala hoike o ka noho ana a hoolimalima paha, me ka ae no o ka Hope Agena a me ka uku ana aku iaia i hookahi dala pakahi, e hoolilo panai aku i ko laua mau palapala hoike o ka noho ana a hoolimalima paha i kekahi me kekahi, me ka uku dala a dala ole paha mawaho ae a kumu a ae paha e like me ka mea i hooholo ia e laua. Ina ua hana ia kekahi hoolilo panai o ia ano e kakauia ia mea e ka Hope Agena maluna o na palapala hoike elua o ka noho ana a hoolimalima paha, a e kaa no maluna o na mea noho a hoolimalima paha ka hooko ana i na kumu a pau i hooko ole ia o na palapala hoike o ka noho ana a palapala hoolimalima paha i loaa ia laua ma ia hoolilo panai ana, a e hookuu ia hoi mai ka hooko ana i na kumu a pau maloko o na palapala hoolimalima i hookuu ia e laua. Aka aole e hiki i kekahi mea noho a me kekahi mea hoolimalima e hoolilo panai aku kekahi i kekahi.
[E hoomau ia aku ana]
I ka wa e nakulu ai oloko o ka opu me ka eha, a hele moku ka lepo, alaila, e hoao i ka CHAMBERIAIN'S COLIC, CHOLERA a me DIAI RORA REMEDY laau lapaau a e oi aku ana kou mahalo ke ike oe i kona hopena. He oluolu, palekana a puhili ole. He oluolu, palekana a puhili ole He 25 a me 50 keneta o ka omole, a e kuai ia no ma na halekuai lapaau a pau. BENSON SMITH & CO., na Agena ma ko Hawaii Paeaina. tf
"O ka oi ma ke ao holookoa." Oia ka W. D. WOODRING O BORDLY KENETUKE, e hookaulana nei no ka Chamberian's Cough Remedy (Laau Kunu). Ke kamailio nei oia ma kona ike ponoi iho i ka inu ana i ke kumu koikoi loa a me ke anu, a ua hooholo oia o keia laau lapaau ka oi ma ka honua nei. E kuai ia no ma na Halekuai Laau Lapaau pau. O BENSON, SMITH & Co., na Agena ma ko Hawaii Pae Aina. tf
NA KANAKA
Dr. LIEBIG & CO.
Na Kauka no na mai
Kuluma Malu a me Kuulala.
O ka Dr. Liebig @ i hooikaika kino oia ka laau lapaau hoola maikai loa no ka nawaliwali ka emi o ke ano noonoo kanaka makua a me na mai malu, ka hoopio awiwi ia mai a me ka hoomakaukau no ua hana o ka noho ana mare, ka oluolu a me na koikoi. He hookahi omole $1 hoao e haawiia mai ai a e hoouna ia aku paha me ka uku ole i kela a me keia mea e hoike mai ana i na hoihoina mai. E kipa a i ole e leta mai ma 409 Beary St, puka korao @ Hano@@ St. San Fransisco.