Ka Nupepa Kuokoa, Volume XXXIII, Number 40, 6 October 1894 — Page 3
| This text was transcribed by: | Leilani Lindsey-ka'apuni |
| This work is dedicated to: | Lily Leimomi Wilson Lindsey |
Ka Nupepa Kuokoa
KE KILOHANA POOKELA NO KA LAHUI HAWAII.
E HOOLOHE.
O na poe lawe a pau i ka nupepa KUOKOA i hookaa ole mai i ka uku pepa no ka hapa e pau ana i Dekemaba 31, 1894, ke komo ia nei lakou e uku koke mai, ma ke dala maoli a ma ka bila kikoa Hale Leta paha. A i hookaa koke ole mai oukou, e hoopaa ia ana na pepa aole e hoouna ia aku. Nolaila, e makaala mai oukou i mau ka ike ana i na mea hou a pau a makou e hanai mau aku nei.
KA HUI ALAHAO ME AINA O OAHU
MANAWA HOLO.
Mai a Mahope aku o Iune 1, 1893.
NA KAA AHI
NO HONOULIULI
B B A D
A.M. P.M. P.M. P.M.
HAALELE IA HONOLULU……………..9:46 1:46 4:35 5:10
HAALELE IA MANANA………………..9:30 2:00 5:10 5:56
HIKI I HONOULIULI……………………9:57 2:57 5:26 6:22
NO HONOLULU.
C B B A
A.M. A.M. P.M. P.M.
HAALELE IA HONOULIULI…………….6:32 10:42 3:48 5:42
HAALELE IA MANANA…………………6:56 12:15 4:15 6:10
HIKI I HONOLULU……………………….7:30 11:55 4:55 6:45
1. No na Poaono wale no.
2. No kela ame keia la.
Koe na la Sabati.
Koe na Poaono.
NU HOU HAWAII.
E ku mai ana ka mokuahi Australia i keia kakahiaka, mai Kapalakiko mai.
Ke hoi mai nei na keiki o ka hoa@ i keia mau la, me ka hoowali ana i ka lepo o na alanui a hakukele pii ka he‘a iluna.
Ke upu ia aku nei, e ku mai ana iwaena konu o keia malama, ka mokuahi hou loa o ka Hui Hooholo Mokuahi Pili Aina, mai Kapalakiko mai.
I ka la 29 o Sepatemaba i hala, ma keia kulanakauhale, ua hanau mai ka wahine a Theodare Richards kumuluna o ke Kula Kamehameha, he keikikane.
E noho ana ke kau kiure kaapuni o Kohala i keia Poakolu ae, a ua hala aku na kokua ma ka aoao o ke aupuni ma na hihia hewa ma ke Kinau onehinei.
O ke kumukuai o ke kopaa ma ka lono hope loa ma ka mokuahi Oceanic i ku mai ai ma ka la 2 iho nei o Okatoba, he 3¼ mau keneta o ka paona hookahi.
Ua pae palekana aku o Hon. German D Gilman, ko ka Repubalika Hawaii Kanikela nui ma Bosetona Makesuketa ma ka home oiwi a ma ke kahua o ka hana i ka la 12 o Sepatemaba iho la i pau.
A hiki i Sepatemaba 29, o ka nui o ka poe i hoopaa i ko lakou mau inoa no ke koho balota Senatoa a me Lunamakaainana i ka la 29 ae nei o Okatoba, ma ka mokupuni o Oahu nei wale no, he 1629.
He 5 wale no keneta a ua kaa nunui loa o F. Kamika e kau nei maluna o ka ohua hookahi e holo ana mai Honolulu aku nei ahiki i Waikiki. He emi maoli kela e kohu ole ai ke u iho.
Ma keia Poalua iho e halulu mai ai ka mokuahi City o Peking mai Kina me Iapana mai, ma kona ala e huli hoi ana no Kapalakiko. Ke upu ia aku nei, e hali mai ana oia he heluna pake lehulehu no keia awa.
He kinipopo ko na haumana kula o Kamehameha i keia auina la hora 3, ma ke kahua o ke kula. No loko ae no o na haumana o ke kula ka poe e paani ana, a ua noa i ka lehulehu ka makaikai ana aku.
Ua ku mai ka mokuahi Arawa i ka hora 9 o ka po Poaha iho la, mai Kikane loa mai, me 3 ohua kapena no Honolulu nei a me na wahi ukana uuku. A ma ke awakea onehinei i niau loa aku ai oia no Vanekouwa.
He lea kai malamaia maloko o ka halepaikau ma Manamana i ka auina la Poalua iho nei no kekahi hana pili manawalea hoomana Katolika Roma a ua loaa mai na dala he $1,223.70 mahope o ka lawe ia ana aku o na hoolilo.
Ua hoi mai ke Kuhina Amerika a me ka ohana mai ka hoonanea loihi ana ma na aekai o Waikiki a eia i ke kulanakauhale nei, oia hoi ua lawe aenei oia i ka hoolimalima i ka hale noho nui akea o ka Hon. A. Young ma Alanui Alii, ma Waikiki iho o Tamaki Kuea. O keia ke Kuhina o na nupepa @ alii i noke iho nei i ka hoolaha ua hoopau ia, a ua lilo iho nei i kahi paulalo iho, aka e like me ka lehulehu o ka lakou mau alapahi i na makahiki kokoke e elua i hala, pela no keia i @ ai i ka oiaio.
Ua kono mai o Rev. G. L. Kepa, ke Kakauolelo o ka Ahahui Euanelio Mokupuni o Kauai i ko makou oluolu e poloai aku i na lala a pau o ia Ahahui, e noho ana ka halawai mau o ia Aha ma Waimea, ke hiki aku i ka Poakolu elua o Okatoba nei. Nolaila, e makaala ae na lala o ka aha ma ka manawa i hoike ia ae la maluna.
Nui ka mahalo a me ka hoomaikai o na lala o ke Kula Sabati o Kalapana ma Puna, i na hoaloha maikai J. H. Waipuilani, J. K. Kekaula a me Palohau, ma o ko lakou hookipa a malama maikai ana ia lakou, mai ko lakou wa i hiki ai ma Waiohinu a pau nui wale no i ka hoi aku i ka aina kaulana nona ka niu hiolani.
Ua hookohuia o Rev. John Leadingham, no ke Kula Kahunapule mai o Oberlin, he hoa kumuao me Kauka Hai ma ke Kula Kahunapule o ka Pakipika Akau. Ua konoia na keiki hou a me na haumana aole i puka, e akoakoa ae ma ka halekula ma ka la 8 o Novemaba, e pae mai ana o Mr. Leadingham ma keia awa ma Nov. 3.
I ke kakahiaka Poakolu iho nei, ua hoi mai ka mokuahi Kinau mai na ua kaulana mai Kanilehua a me Paupili, me 28 mau ohua kapena, he 6 o lakou mai Kilauea mai, 48 mau ohua oneki a me na ukana mama. Mahope iho o ka hora 2 auina la onehinei, ua kukini hou aku ua aliiwahine aukai la no na awa no i maa mau iaia i ka aloalo ehukai ia o Maui a me Hawaii.
Ua hikilia ma ka heiau o ka mare i ke ahiahi o ka la 1 o Okatoba nei, e Rev. Dr, Hutchins, kahu o ka ekalesia o Kaukeano, na puuwai opiopio o William White, puuku o ka Malulani me Miss Adeline Bruns, ma ka hale noho o na makua o ka wahine ma Peleula, i lamalama ia a nani na hoohiwahiwa. O laua a elua, he mau keiki kamaaina nae wale no i ko Honolulu nei anaina.
Eia o Kamala, kela hookele kaa lio hoolimalima i pepehi hoomauhala ia ai he mau hebedoma i hala ma Kalihi-kai he wahi kanaka ole, o kela Pukiki o Souza ka inoa, ke hoopii poho nei i $300 no kona hoopoino ia ana. Ua hoopai mua ia keia Pukiki na ka hihia hoeha, aka no ka hoihoi ia ana o Kamala iloko o ka halema‘i e lapaau ia ai he mau hebedoma aenei, nolaila oia e koi nei i keia poho e uku ia aku iaia.
O keia ka la hope loa no ka hoopaa ana i ka inoa o ka poe kupono i ke koho balota mua loa malalo o ke Kumukanawai o ka Repubalika Mokupuni o Hawaii, ke anuu kiekie hou ae a na moku kanu o keia paeaina i lele ae nei a ku i ka nuu. Nolaila, o ka makou keia, a o ka oukou aku koe o ka ike i ka mea pono, alaila hana aku, aole ka hoohalike me na manu piheekero pono kivila ole a me na aluka kekake e noke ai i ka ho.
Ma ka helu moa pepeekua o ka Makaainana o ka Poakahi iho nei, ua noke mai keia pepa i ke pahenehene pilikino i na lala o ka Hui o na Opio Hawaii i kukuluia iho nei. Aole i maopopo i na Lunanui o ka Hui ke kumu o ko Hoke hookeekee ana, oiai ua ai oia i na hau kalima a ukauka ka waha. O kona leo nunulu ka i lohe ia aku maluna o ko na mea a pau e hae mai ana e loaa koke aku ona hau kilima me na meaono iaia, me ka nana ole mai i na makamaka lede mamua ona. * *
Ua make iho nei ma Honolulu nei ka makuahine o ka Lunakanawai Kaapuni H. E. Cooper, oiai oia aia i ka aina e ma ka huakai hoomaha aku nei. Ma ke ahiahi o ka Poakolu iho nei, ua manela ia aku ke kino wailua o ka makua palupalu mai ka halepule Bihopa aku a huna ia ma ka ilina o Maemae. He nawaliwali no ko keia makuahina i ka wa o ke keiki maanei, a aole no hoi i manao ia e hele e ana. Aka ina e hoi mai ana ke keiki aohe ka makua, malia e hoehaeha loa ia ana ka naau o ke keiki i ka ike ole i ka lele ana o ka hanu hope.
HOOMAIKAI.—Ke pahole piha aku nei ke Kula Sabati o Kau ma o ke Komite la, i ka makolukolu o na hoomaikai i na poe apau i haawi manawalea mai i na kokua ana, e pili ana i ka Hoike Kula Sabati Nui mai Kona ahiki i Puna i malama ia ma ka la 16 o Sepatemaba 1894 ma Waiohinu Kau, oia hoi ka Hui mokuahi Pili Aina, (The Inter-Islands Steamer Co.,) Hutchinson Sugar Plantation Co., D. Waiau o Hionaa, Jeo Record o Waiohinu, P. Malumalu, na hoahanau o ka ekalesia Moremona, a me na ekalesia Kakolita, Roma a me ka poe e ae i hui pu mai ma keia hana maikai. J. H. Waipuilani, J. K. Kekaula, J. N. Kapahu, P. H. Kahula a me J. A. Waipuilani.
NUHOU KUWAHO
KE KAUA MA COREA!
Na Iapana me na Pake!
Ka Iapana Hoolala Kaua Nui!
No ka Hele ana Imua o ke Kulanakauhale o Pekina!
Ma ke ku ana mai o ka mokuahi Oceanic ma kela awa i ka hora 1:30 auina la Poalua iho nei, iloko o na la holo 6 a me hapa mai Kapalakiko pololei mai, ua loaa mai ia makou na mea hou malalo iho, a oia keia e panee ia aku nei:
KO NA PAKE AOAO MAU LONO.
Iokohama, Sept. 24.—Ke olelo mai nei kekahi palapala mai Tientsin Kina mai: Ua hoolele aku ke aumoku Pake ia 7000 mau koa ma na kapa o ka muliwai Yalu me ka nana ole i ke kaua mai o ke aumokukaua Iapana. Ua pau e na lako poka a na mokukaua Pake ma ke kaua moana ana, a nolaila ua kauoha aku o Koronela Hannekin e holo aku na mokukaua Pake e hou i na mokukaua Iapana, eia nae ua lohi loa ke kauoha, oiai na mokukaua Iapana ua hoemi e aku i hope.
Ladana, Sept. 24.—Ma kekahi lono waeaolelo mai Sanahai Kina mai o keia la, ua olelo ia: O ka nui o ka pualikoa Pake ma ka muliwai Yalu, ua koho ia he 2,800, aka he lehulehu wale o lakou he poe hou loa akahiakahi, a ua hemahema maoli ko lakou hoolako ia ana me na mea kaua. Mamuli o ka pau ana i ka lilo o na pukuniahi kahua kaua nunui, na pu raifela a me na lako kaua ma ke kaua ma Ping Yang, ua hoopilikia loa ia ka Oihana Kaua o Kina. Ua hoomaopopo ia e hoouka ia aku ana ona kaua ma Yalu, a ke hooikaika ino loa la na Pake e hoopau ae i ka pilihua o kela poino nui ma Ping Yang.
Ua hoomaopopo ia, aia ke aupuni o Manchuria ke houluulu la i kona mau koa Pake a pau i ohi ia ma ua okana aina la ma Mukden, a ma ke alanui e hele ai i Waju, ke kukulu ia la na hoopuupuu lepo keakea aku makena wale. O ka poe i ohiia mai na Pake kino puipui mai o ka akau a he mau poe kaua maikai loa maoli, aka aole i hoolako pono ia me na mea e kaua ai, he 4000 wale no o lakou i lawa me na pu raifela maikai. Aia nae ke awiwi ino ia la na lako kaua hou aku e hoea ae mai na hale hana lako kaua mai o ka hema o Kina.
KAHI IKAIKA LOA O NA PAKE.
Ke olelo mai nei kekahi mea kakau nupepa mai Chemuipo, Corea mai, ua ku aku he umikumamakahi mau mokuahi halihali koa a hoolele ia 7000 mau koa malalo o ka malama ana a elima mau mokukaua Iapana. Ke hoea mai nei na lono mai ka okana mai o Ping Yang kahi e upu ia aku nei oia aku ana ke kahua kaua nui o keia mau la iho, aia malalo o na Pake ka mana piha, a ua a-e aku la ma kela kapa o muliwai Yalu na koa Pake i hiki aku maluna o ka 20,000. He lehulehu o keia poe, he poe hou haalele loa mai Manchuria mai, aka oiai aohe mau puali kaua lio a na Iapana, nolaila aole i manao ia e hiki ana i na Iapana ke hoopoino nui aku i ka wa e puiwa ai a pioo no ka wa mua e kani ai na pu kaua maoli ma ka hoohana ana a na pukuniahi wili o keia wa hau.
Eia ka olelo a kekahi haole Europa i hiki i Chemuipo he mau la ae nei i hala mai Ping Yang mai, ua holopapa ia kela okana aina e na pake, aka he kakaikahi loa na hewa i hana ia e na koa Pake mamua ae o ka na Iapana. Ua oke ia na poo o elua mau koa Pake no ka aihue, aka ua ae ia na koa Iapana e hana aku i na hana ino loa aku.
MAI KE KAHUA KAUA MAI.
Chemuipo, Corea, Sept.—Ma ka mea i lohe ia maanei, eia ka na Iapana papa hoonohonoho kaua, o ka onou aku i Mounkden, ma Manchuria, a ke loaa i na Iapana he hoouka kaua lanakila nui ma Ping Yang, a wahi e ae paha ma ka akau o muliwai Tatung. Aole he Pake iki ma ka hema o kela muliwai, aka o ka nui o na pualikoa Pake, aia ke houluulu la mawaena o na muliwai Yalu a me Tatung. Mai Ping Yang a hiki i muliwai Yalu, ua like ka mamao me umi mau la e hele wawae ai, a ua upu ia e ku hou ana ona wahi hoomoana malaila, no ka mea, ua haawi ia aku nei na kauoha e hoolele i na koa Pake ma muliwai Yalu. Ina e auhee ana na Pake ma keia muliwai, alaila e emi hope aku ana lakou ma Mounkden, he wahi ia i lako pono i ma papu. Ina e lilo pio ana keia wahi, alaila ua auhee maoli loa na Pake, a ina aole e hoi koke mai ka wa ino, ua hiki no ke hookekena ia kekahi pualikoa e kai pololei a hiki i ke kulanakauhale o Pekina iloko o ka malama hookahi. O keia iho la ka hoolala kaua a na Alihikaua Iapana i makemake ai, no ka mea aole nui o na keakea e hiki mai ana i ka hoohikihiki ana ia 30,000 mau koa mai ka waha ‘ku o muliwai Yalu a hiki i Taku, a me ia pualikoa nui, he palaueka loa na mea e hopohopo ai no ke kai ana kai ana aku mawaena aku o ia aina mai Taku a hiki i Pekina. He 460 mau mile ka mamao mai Ping Yang a hiki i Pekina. Ina ma ko na Iapana nana ana ua oi hewahewa loa aku ka mamao o keia pualikoa Iapana, alaila ua hiki wale no ke hoohana ia na mokuahi hoohikihiki koa no ka hali ana i pualikoa nui a hiki i ke kapakai a kokoke aku la i Taku. E puhee aku ana ka ohu mai ke Kaikuono aku o Peehili i ka malama o Okatoba, a ua hiki loa i na Iapana ke hookahakaha i na malama o Okatoba a me Novemaba ma ka onou ana e awiwi e hiki i Pekina, malia o ke kumu ia e pau koke ai ke kaua a hoapaapa hou ole aku.
Puali Keaka Hoolealea.
Ua uniki iho nei ke anaina keaka hoolealea mua loa a ka puali o Dailey i ka po Poaono aku nei i hala maloko o ka Hale Mele Hou; me ka piha kaiamu ia e na inalua puni keaka o Honolulu nei. He puali keaka keia i aelike ia ko lakou manawa e paani ai maanei no umikumamawalu wale no mau po. Ua hoomau mai lakou i ka paani i ka po Poakahi mai, a pela no i ka po Poaha iho nei. I keia po aku ana no kekahi a lakou e hehiku mai ai i ka lakou kawa i lele ai a opu. Aohe no he hala o na po keaka i ka poe i punihei i keia puali keaka waipahe.
Aelike Pauma Wai Aupuni.
Ua haawi ia aku nei i ka Hui Hana Hao o Honolulu e ka Repubalika, ka aelike no ke kukulu ana i pauma wai nui hou loa i mea e pakui aku ai i ka hoolako ana aku i ka wai no na luawai aupuni nana e hoolawa nei i ke kulanakauhale, aka aole nae i lohe ia mai ka nui o ka puu dala, oiai aole i makaukau ke Kuhina Kalaiaina e hoike mai i ka lehulehu. Ua lohelohe wale ia, aia ka like ole o na koho a ka Hui Hana Hao o Honolulu a me ka W. T. Garratt & Co. ma kahi o ka $10,000, oia hoi he lele oi loa ka nui o ke koho a ka hui mua i ko ka Hui hope.
NA LETA.
[Aole o makou makemake e lawe i ke koikoi o na hala no na manao i hoopuka ia malalo o keia poo manao o ko makou poe mea kakau.]
Ua lalau loa ia ka lehulehu i ka noho ana mawaho aku o ka panipuka mamuli o ka hoolohe ana aku i na kumu hoike a na wahi nupepa anee alii e hoike mau ana i ka wa e hoihoi ia ae ai ka moiwahine Liliuokalani ma na hoike i na wa e hoihoi hou ia ai a ua loaa ka huina 120 ina paha o Noa ina ua hookoia.
Ua hoopau kekahi mau nupepa no ia mau kohokoho ana a ke ai oleha mai nei ka ai ana i ka lakou mau wanana ana no Baala.
Eia ke kokolo mai nei ma ka aoao e hoike aku ana ua hiki ole ke hoihoi ia ae ka mea i kipaku ia a ua koe wale no ka Buki nupepa hoino i na mikanele.
Ua hoomahuahua aku o Buki i kana wanana e hiki aku ana ka huina hoike o kana mau wanana hoihoi ia Liliuokalani i ka umi lau loaa ka huina nui o ka mano, aka, o ka lehulehu ke nana nei i ka manao hakukole a me ka lapuwale oia na mea e pono ai lakou. Aia ka pono i ka hou o ka lae mai loko ae o ka hana a ka lima oia auanei ke aloha alii a me ka aina hanau, aole i ke kakani waha wale no ke aloha i ka aina a me na manao alakai o ka hana e powa i ko hai mau waiwai mamuli o ko kakou mau aelike ana i ke kumukanawai a Kalakaua i haawi mai ai ma ka la 7 o Iulai, 1887, a ka lima no o Liliuokalani i hawahawa ai ma ka la 29 o Ianuari, 1891 ana i manao ai e hiki, me ka hana malu ma ka la 14 o Ianuari, 1892, me ka ike ole no o ka lehulehu i ka pono a me ka holomua o ka aina. Aia no ia i ko oukou kaana ana, a ua hala ole nae ka poe e noi aku nei ia oukou e ka lehulehu e komo mai iloko o ka Repubalika o Hawaii nei a e hui no ka ea pu ana i ke kuka ana no ka holo maluna o keia moku nani me ka maikai.
Imua e na hoa o ka Repubalika Hawaii a haule mai na lani.
R. R.
Honolulu, Okatoba 3, 1894.
Moho Holo Balota o 1894.
MR. LUNAHOOPONOPONO:
Aloha oe;
Ua lohe ia e holo moho lunamakaainana ana o Samuela Kauhane, no Kau, Kona a me Kohala. O ka‘u wale no e koho me ka lokahi ia Samuel Kauhane, he moho nau e hopohopo ole ai, he kuokoa, he hoopono, he naauao, he keiki no i hanau iloko ou a nui iho la no i ke alo, he kaawale mawaho o na hana aupuni, he ola ma ka hana lima i hookele pu ia me ka noonoo. E koho iaia me ka lokahi; imua e ka Ua Haao a lanakila i pakele o Hawaii a me ka lahui.
Nana e holoi kou noho i kapulu ia e na L. M. au i hoouna mai ai mamua aku ona, he noonoo hohonu a kanaka makua o na ninau ano nui, he noonoo ai pakiko ma na hoolilo ana, pomaikai ka aina ke nui na kanaka e like me kau L. M. o ka Ua Haao. E koho ia Samuela me ka lokahi.
No Kona kalopua i ka lai ua lawa no oe ia G. P. Kamauoha a me Rev. Kalaiwaa, imua o na Kona o ka mea o laua e puka ana he mau pukuniahi no a elua, he mau koa kupono no ke kahua kaua, he kaokoa mai na oihana aupuni ae ua pipili ke aloha ia Hawaii. Pehea mai oe e Kohala makani apaapaa, eia na ulu i paki kepau koho ia mai, ua like wale no a like me ke kalukalu o Puna. He mau Hawaii oiaio wale no aohe mana o ke kipe e hiki aku, ua hoohiki i ke kumukanawai o ka Repubalika o Hawaii ke aupuni i kukulu ia maluna o ke kahua oni ole.
NAPELA.
Waiohinu, Kau, Sept. 27, 1894.
I mau Moho no ka Mokupuni o Kauai a me Niihau.
E ka Nupepa KUOKOA e;
Aloha oe:—
E nonoi aku ana au i kekahi o kou mau kolamu, e ahai mama aku oe i kekahi o keia mau moto, i ike mai ai ko‘u mau hoaloha oiaio i loaa ka mana koho balota i na Senate a me na lunamakaainana. Ua oluolu au e waiho aku imua o kakou i na inoa kupono loa e lilo i mau Senate a me na lunamakaainana no kakou, a oia iho keia.
Hon. G. N. Wilcox, Hon. C. A. Knudsen. O laua na Luna Senate no kakou.
Hon. A. S. Wilcox, Hon. W. H. Rice, laua nei na Lunamakaainana no kakou.
Nolaila o ka‘u wale no e noi aku nei ia kakou i ka poe i loaa ka mana koho balota, e koho like kakou me ka manao lokahi a me ka makemake ponoi maoli no kakou iho, ua kupono maoli no ko kakou koho ana ia lakou nei, he mau kanaka Hawaii maoli no lakou e like me kakou, koe paha ko lakou keokeo ana, aka ma ka hanau ana, ua hanau ia lakou maluna ponoi o ka lepo o Hawaii.
He poe keia i piha i ke aloha i keia lahui kanaka, aola lakou he poe e nana maka wale aku ana i ke kanaka ilihune a nele, a he mau keiki lehulehu paha ka kekahi kanaka, e kokua ana no lakou. Ke manao nei au aole paha he kanaka Hawaii e noho ana ma ka mokupuni o Kauai a me Niihau i ike ole i ka lakou mau hana maikai a me na hana aloha.
Nolaila ke noi ia aku nei ka oluolu o na mea a pau i loaa ka mana koho balota e noho ana mai ka Wailiula o Mana a hiki aku i ka haka lewa o Nualolo, e apo me ka lokahi i na balota o ko kakou mau kaikuaana i olelo mua ia maluna. Imua kakou me ka lokahi a lanakila.
Owau no
J. M. KEALOHA.
Hoolaha Hooko o ka Moraki a me ke Kuai.
KE HOOLAHA IA AKU NEI KA LOHE I na mea a pau, i kulike ai me ka mana o ke kuai i hookomo ia iloko o kekahi moraki i hana ia i ka la 18 o Ianuari A.D. 1887 e A. P. WAAHIA, ULAKAHINA (w) a me KALAWAIAHAKUOLE kana kane, PAHIA KALOI, HOOPII (k) PAHIA (w) a me KAULU, o lakou a pau no Hana Mokupuni o Maui, ko Hawaii Paeaina, ia Henry Smith, Kahu Malama o Fred Aug. Wenner, kope ia ma ke Keena Kakau Kope ma Oahu, Buke 101 ma na aoao 472, 473 a me 474, a no ka uhaki ia o ka aelike maloko o ua moraki la, oia ka hookaa ole ia o ke koena o ke kumupaa a me ka ukupanee i ka wa e hookaa ai, ke manao nei ka mea e paa nei i ka moraki e hooko aku.
Ke hoolaha hou ia aku nei ka lohe, o na pono a pau, na pomaikai a me ke kuleana o ka poe nana i moraki mai iloko o ka aina a me ka waiwai iloko o ua moraki la, e kuai ia aku ana ma ke kudala akea ma ka Hale Kudala o James F. Morgan ma Alanui Moiwahine, Honolulu, ma ka POAONO, la 29 o Sepatemaba A. D, 1894, hora 12 awakea.
O na waiwai e kuai ia aku ana, oia keia malalo iho:
1. O kela mau aina a pau i kuhikuhi ia iloko o ka Palapala Sila Nui Helu 3206 ia A. P. Waahia, he 5 75-100 mau eka ma Kakio, Hana, Maui.
2. O kela hapalua kuleana i mahele ole ia o Ulakahinau iloko o na aina i kuhikuhi ia iloko o ka Palapala Sila Nui Helu 1923 ia Puunui, he 27 mau eka, Hana, Maui.
3. O na kuleana a pau o Hoopii, Pahia, Pahia (w) a me Kaulu iloko o na aina i kuhikuhi ia iloko o ka Palapala Sila Nui Helu 2911 ia Kaloi a me Kaianui, he 50 87-100 mau eka ma Makaalae, Hana, Maui, oia he 24 eka pau loa.
4. O kela hapalua kuleana i mahele ole ia o Pahia Kaloi iloko o na aina i kuhikuhi ia iloko o ka Palapala Sila Nui Helu 5399 ia Ikua, he 11 mau eka ma Mokaenui, Hana, Maui, a i lilo mai i ua Pahia Kaloi nei ma ke kuai a Kaloi i kope ia ma ka Keena Kakau Kope o ke Aupuni Buke 68 aoao 9.
Kuike ke dala ma ka Gula o America Huipuia. Na uku hana palapala i ka mea e lilo ai.
No na mea i koe e loaa no ma ke Keena Loio o Carter & Carter.
Kakauia ma Honolulu, Sepatemaba 5, A. D. 1894.
HENRY SMITH,
Kahu Malama.
Ma o kona mau Loio la
2510-3 CARTER & CARTER.
Ua hoopaneeia keia kuai a ka la 15 o Okatoba, 1894.
Hoolaha Hou.
H. R. HITCHCOCK.
Notari no ka Lehulehu.
Apana Hookolokolo Kaapuni Elua,
Kalulaaha, Molokai.
2514-tf
Na Leta e waiho nei iloko o ka Hale Leta a hiki i ka la 30 o Sepatemaba 1894.
APUA—Mele Haelo w.
AALA—Ane Kaiwi.
AUWAIOLIMU—Kela liilii w, Kanekaaukai, Kaenemi Aho, Kahoo@.
IWILEI—Kukololani.
HONOKAUPU—Lock Kauwale.
KAPAUHI—Mrs Lahela, Kapika w.
HONUAKAHA—Mary Kahule.
KOULA—Kealoha w, S K Kaiuhi opio.
KAAKOPUA—Mahi (2), H Papaula, Kaia Kealaho.
KUNAWAI—Kahina w, Miss Kauhola, Mileka.
KAKAAKO—Maikui (2), T K Kailihune, S K Hanawahine, K N Kuaana.
KAWANANAKOA—Kaluna.
KAUMAKAPILI—Keoaipaloa k, Abraham, J P H Kanakaliilii, Kahuakai, S N Kamaki, Kaneiakama Hipa, Piilani, Ah Fah.
KIKIHALE—Luka Palea, Moehao w, Kahoanoku, Kalama, K Kaleilehua, Noholaehuna, Nohoaloha.
KULOLOIA—Hano.
KAOPUAUA—Ane Apua.
KAWAIAHAO—Mrs Kaainoa, Kaimo w, Miss L Kanakalawaia, Miss Kahuakainui, Kipela w, K Kekaulike.
KEPOHONI—Miss Leo Peka.
KAMAKELA—Kaaikaula, Lucy Nalole.
KAMANUWAI—Wm Kekipi (2), Mary Kinoiki, W Kaelemakule, Paulina Napunielua, Lolena w, Mary Haiku.
KAPUUKOLO—Maka, Lima Kekuni, Joe Lohiau, Kale Kaulia, Anna Keola, Miss Lydia Fish, Ane Manu.
KAHEHUNA—Akeneti Kapiioho, Mary Kalakuni.
KAULUWELA—Kaleialoha, S Kolomona.
KALIA—Kaeha Hiwauli w, Kukala k.
KUKULUAEO—P Paul Kaaua, Kalaiuli.
PAWAA—D W Kahalepohaku.
KAPALAMA—Julia Mahe, Meleana w, Naai Kaauwa, D Kaaiakamanu, Mrs H Kekuana, Keliiaumoana, Kawainui, Kaha, J W Kaaeamoku, Ananui Kahele, J H Kahiliua, Kamekona, Honuwaiawa, Wahinenui, Mikolia Nakoapapaki, J Kuluwaimaka, J Kahalepapu, Kamealani, Nahuina Hekekia, Mrs Kaulunae, Nahora Hipa, Haona.
KALIHI—D Kahanu Uaiwa, Manewa, Kamanao, Kahailiopua w, Kapuhili k, Weweiole, Mrs N Nawahie (2), P H Nawahie, Mariana Makolo, Kanekaluakini.
LELEO—Malie Kauhi (2), Hattie Frank, H Kali, Sam Kailianu, Matilda Tell, Meleana Kimo, Mrs Api.
MANAMANA—Miss H K Manase, Mary Moialii.
MAKAAHO—Pepehia w.
MAUNAKIEKIE—Ikaika Aiku, Ane Keola, L Nahale, Lika Likeke, Mrs H Mainaaupo.
PUULOA—Meleana.
PAUOA—Kamoani Lutera, Puhene (2).
MAEMAE—Mrs Kalua Haluapo.
PELEULA—Sam Kalua, Chas Iwalani, Pihenui.
NA ALANUI—C H Aki, Miss Apikaila, Mrs Popoloau, J K Kahaawai, Kaulakai.
WAIKAHALULU—S Kalili, Mrs Kaiu, W Meheula (2) K Hairam w.
WAIKIKI—Keakahiwa w, Kapahu Kaehu, Kelupaina w, Lucy Kila.
WAIALAE—Kuhau.
HONOLULU—Miss Amelia Kekula, Joe Fuller Kapahu, H Kaahawai, Lazaro Kalaaukapu, M K Manaki, Puhi Keliikuli, A Kamai, Waiholua, S Kaaea, Kaohi, Mrs Apikaila Liline, Kalauao, Kahele, Euneke, Mrs Kelalaina, Mary Aki, John Palea, D W Kainui Maunakea, S L Kauhola (2), Kala Opu, K Kmakahukilani, D Kaloi, Makalani, Kahelemauka, Keahi Kamai, Kamaka w, Mose Aalona, Theodora Mookini, Kaneaiaka, Kahiwahiwa, C K Akau, Eluene, S K Opu, Daniel Opio, Palaika, Mokuhiwa, S Kekui, Emily Kauka, Kanamu k, E W Waiau, Leialoha Paakaula, Aana, Kilohana, Nakaiewalu, A Hakea.
O na poe na lakou na leka maluna ae, e oluolu e ninau mai i na “Leka i Hoolahaia.”
J. M. OAT,
Luna Leta Nui.
Honolulu, Sept. 20, 1894. 2514
Hoolaha Hooko o ka Moraki a me ke Kuai.
KE HOOLAHA IA AKU NEI KA LOHE I na mea a pau, i kulike ai me ka mana o ke kuai i hookomo ia iloko o kekahi moraki waiwai lewa i hana ia ma ka la 30 o Maraki A. D. 1894 e CHARLES GIRLDER o Honolulu, Mokupuni o Oahu ko Hawaii Paeaina, ia James F. Morgan o ua Honolulu la no, kope ia ma ke Keena Kakau Kope o ke Aupuni, Buke 147 ma na aoao 453-455, a no ka uhaki ia o ka aelike maloko o ua moraki la, oia ka hookaa ole ia o na nota aie i kuhikuhi ia maloko, nolaila ke makemake nei ka mea e paa nei i ka moraki e hooko aku.
Ke hoolaha hou ia aku nei ka lohe i na mea a pau, ua lawe maoli aenei ka mea e paa nei i ka moraki i na waiwai e lawa ai ua moraki la a e kuai ia aku ana ma ke kudala akea ma ka Hale Kudala o James F. Morgan ma ka POAKOLU, Okatoba 17, 1894.
O na waiwai e kuai ia aku ana, oia keia e helu papa ia aku nei malalo iho ma ka olelo haole:
4 calico shirts, 2 prs corsets, 93 doz white Linen hdkfs, 79½ doz white cotton hdkfs, 2 doz colored cotton hdkfs, 58 11-12 doz lady’s hose, 3½ doz white dress shirts, 9-12 doz Regatta shirts, 7 Pajama suits, 2 black hats, 4½ doz lady’s asst straw hats, 60 doz Clarks crochet cotton, 15½ doz feather falows, 21 2/3 boxes Chadwick’s mending cotton, 7 pkgs Dutch linen braid, 1/3 doz pcs Dutch linen tape, 1 doz knittin sets, 9 boxes knitting silk, 4 boxes blabk silk Molair braid, 3 pcs colored silk elastic, 3 boxes Torchon laces, 24 pcs book muslin, 23 pcs white dress goods, 10 pcs satin checks, 3 pcs white table damask, 3 pcs hair cord muslin, 7 lady’s blouses, 6 lady’s chemises, 1 lady’s apron, 29 doz Brooks colored thread 6 doz spun mending silk, 7 2/3 doz machine spool thread, 5 1-6 G G bone buttons, 1 doz knitting silk, 10-12 doz silk twist, 1 doz dress preservers, 6 gro jet buttons, 5 gro silk buttons, 22 gro pearl button, 4 boxes pearl buttons, 3 cards button, 17 chemises, 3 wool shawls, 3 pcs insertion, 40 embroidery, 9 pcs flouncing, 13 pcs cotton Pongee, 15 pcs sateen, 5 pcs muslin, 3 pcs dress goods, 13 pcs brilliants, 4 pcs French cambrie, 1 pc sateen, 4 pcs spot muslin, 1 pc shirting, 6 pcs muslin, 1 pc zephyr, 117 doz Doylies, 4 doz and 1 pc silk elastic, 1 pc brown linen, 3 pcs India Twill, 95 gro coat and vest buttons, store fixtures, desk, counters and shelving, 4 chairs.
E uku ia na kumukuai ma ke dala Gula o America Huipuia.
Kakauia ma Honolulu, Sepatemaba 17, 1894.
JAMES F. MORGAN,
Ma o kona mau Loio la
2512-1 CARTER & CARTER
Hoolaha hou.
Hoolaha Hooko o ka Moraki a me ke Kuai.
KE HOOLAHA ia aku nei ka lohe i na mea a pau i kulike ai me ka mana o ke kuai hookomoia iloko o kekahi moraki i hanaia ma ka la 14 o Feberuari A. D. 1888 mawaena o Marcus R. Colburn o Honolulu, Mokupuni o Oahu, ko Hawaii Paeaina, ia Mrs. Annie Wagner o ua Honolulu la no, kope ia ma ke keena kakau kope o ke Aupuni Buke @ ma na aoao @ 499, a no ka uhakiia o ka aelike iloko o ua moraki la, oia ka hookaa ole ia o ke kumupaa a me ka ukupanee i ka wa e hookaa ai, nolaila ke manao nei ka mea iaia ka moraki e paa nei e hooko aku.
Ke hoolaha hou ia aku nei ka lohe ua lawe ae nei ka mea iaia ka moraki e paa nei a e kuai ia aku ana ma ke kudala akea ma ka hale kudala o James F. Morgan ma ka POAKOLU, Okatoba 17, 1894.
O ka waiwai e kuai ia aku ana, ua kuhikuhi ai malalo iho penei:
He 1 Kaa Kikane palua lio me ke kolo, 3 kaa kikane pakahi lio, 3 kaa kiola ukana, 1 paa ili palua lio a me 2 paa ili pakahi lio, 1 lio wahine waihooluu melemele, 1 lio kea ahinahina, 1 pipi waiu lerese, 1 pipi waiu hapa welo lerese, 1 pipi waiu hapa ekolu hapa lerese, 1 pipi waiu hapa Holstein.
E hookaa ia ke dala ma ke gula Amelika Huipuia.
Kakauia ma Honolulu, Sepatemaba 17, 1894.
ANNIE WAGNER
Ma o kona mau Loio la CARTER & CARTER
2512-t
Hoolaha Hooko o ka Moraki a me ke Kuai.
KE HOOLAHA IA AKU NEI KA LOHE I na mea a pau, i kulike ai me ka mana o ke kuai i hookomo ia iloko o kekahi moraki i hana ia i ka la 3 o Ianuari A. D. 1882 e KAWAHINE (w) o Hilo, Mokupuni o Hawaii ia J. M. Monsarrat o Honolulu Mokupuni o Oahu, kope ia ma ke Keena Kakau Kope o ke Aupuni Buke 139 ma na aoao 567-568, ke makemake nei o ua J. M. Monsarrat la, ka mea e paa nei i ka moraki e hooko aku i ua moraki la, no ka uhaki ia o ka aelike iloko o ua moraki la, ma ka hookaa ole ia o ka hapa o ke kumupaa a me ka ukupanee i ka wa e hookaa ai. Ke hoolaha hou ia aku nei ka lohe i na mea a pau, o kela mau aina a pau, na pono hoaaina a me pilikana iloko o ua moraki la i kuhikuhi ia, e kua ia aku ana ma ke kudala akea ma ka Hale Kudala o James F. Morgan, Alanui Moiwahine, Honolulu, ma ka POAKAHI, la 1 o Okatoba A. D. 1894, hora 12 oia la.
O ka waiwai i paa maloko o ua moraki la, oia keia.
O kela apana aina a pau e waiho la ma Puueo, Hilo, oia ka hapa o ka pahale 4 o ka Apana 2 o ka Palapala Sila Nui, Helu 23 ia S. Pitman, a i kuhikuhi ia na palena malalo iho.
E hoomaka ana ma ka huina komohana a holo H. 66 18 Hik. oiaio 37 kapuai, alaila H 7 32 H. oiaio 211 6 kapuai e pili la i ko Maria 1 pahale, alaila H. 78 21 Kom. oiaio 42 kapuai e pili la i ko Makaena pahale, alaila i 7 32 Kom oiaio 24 kapuai a hiki i kahi i hoomaka ai, nona ka ili he 11.129 kapuai kuea, a oia ka aina i hoolilo ia ai i ua Kawahine (w) la e ua J. M. Monsarrat la ma ke kuai i hana ia i Dekemaba 22, 1892, kope ia ma ke Keena Kakau Kope Buke 142 aoao 15 a me 16.
Kuike ke dala. Na uku hana palapala i ka mea e lilo ai. No na mea i koe e ninau ia J. M. Monsarrat.
J. M. MOSARRAT,
Mea e paa nei i ka moraki
Kakauia ma Honolulu, Sept. 4, 1894
2510-4
PAPA! PAPA!
AIA MA KAHI O
Lewers & Cooke
(LUI MA)
Ma ke kahua hema o Alanui Papu me Moi.
E LOAA NO NA
PAPA NOUAIKI
O kela a me keia ano.
Na Pani Puka, na Puka Aniani,
na Olepelepe, na Pou, na O‘a,
na Papa Hele, na Papu Ku,
me na Papa Moe he nui loa
NA PILI HALE O NA ANO A PAU
A me na
WAI HOOHINUHINU NANI
O na ano a pau loa
Na Balaki o na Ano he Nui Wa
Ke hai ia aku nei oukou e na
makamaka a pau, ua makaukau
keia mau makamaka o oukou e
hoolawa aku ma na mea a pau e
ili ana ma ka laua oihana no ka
Uku Haahaa Loa,
E like me ka mea e holo ana mawaena
o Laua a me ka Mea Kuai.
Hele Mai e Wae no Oukou iho.
2396-q
Hoolaha Hou.
E Haawi i na keiki Ai Waiu
A ME NA POE OMAIMAI
MELLIN’S
FOR INFANTS AND INVALIDS.
TRADE MARK.
FOOD
I ka Mea Ai.
He Ai Hooulu Oi Loa
No ka hooulu Kamalii
Ka Hoopohala mai ana
Na Mai Ake Pau
Na Opu Aiwali ole
a me na elemakule loaa i na
Nawaliwali.
—HE—
AI MAIKAI LOA
No na Pokii Hanai Lima
BENSON, SMITH & CO.
Na Agena wale no ma ko Hawaii Pae Aina