Ka Nupepa Kuokoa, Volume XXXIII, Number 14, 7 April 1894 — He Moolelo Hawaii Papa Hoike Manawa o na mea Ano nui o Hawaii nei. [ARTICLE]

He Moolelo Hawaii

Papa Hoike Manawa o na mea Ano nui o Hawaii nei.

1530 1600—Ma ia wa i hiki mai ai o Paao ma mai Kahiki mai. 1555—Loaa o Hawaii nei ia Juan de Gayton ma kona alahele mai Sepania mai no Moluccas, a ua kapaia eia keia paeaina ma ka inoa Paniolo o Los Majos. 1555—Hanau o Kualii ka moi o Oahu ma Kalapawai, Koolaupoko, na Kauakahi me Mahulua. 1567—Hoomaka ka mama o Kualii i ke kukini, penei: Ho'a ia ke koi hua kukui hookahi a a, alaila holo oia mai Alala a hiki i Mololani a hoi mai, hookahi no ia hua kukui; a pela no mai Alala a Kalahupueo. 1583—Hoomaka ko Kualii koa ma Puuala ma Kahuku, mai Alala a hiki hou i Kailua, he 2 no hora. 1587—Make o Kauakahiakahoowaha, a lilo o Kualii kana keiki i moi no Oahu. 1620—Hiki mai o Kukanaloa ka haole mua loa me kona kaikuahine ma Napoopoo, Kona, i ke au o Keliiokaloa. 1664—Hanau o Kekaulike ka moi o Maui, na Kaulaheanuiokamoku k, me Papaikaniau w, ma Kamaniula, Honolua, Maui. 1669—Hanau o Peleioholani na Kualii k, me Kalanikahimakeialii w, ma Heleula, Koolaupoko, Oahu. 1700—Hanau o Kamehameha Nui (ailuau) na Kekaulike k, me Kekuiapoiwa Nui w, ma Paiki, Pakaalaneo, mauka o Nuu, Kaupo, Maui. 1706—Hanau o Kahekili ma ka po o Akua maluna o na ale kawahawaha o Alenuihaha, na Kekaulike me Kekuiapoiwa Nui. 1716—Hanau o Keaulumoku ma Naohuku, Kohala, he haku mele kaulana. 1716—Hanau o Kalaniopuu ma Niulii, Kohala, na Kalaninuiaiamamao me Kamakaimoku wahine. 1718—Hanau o Keoua Kalanikupuapaikalaninui ma Kawaihaekai na Keeaumoku Nui me Kamakaimoku. 1720—Hanau o Kameeiamoku me me Kamanawa, he mau mahoe kapu na Kekaulike, ma Apee, Maui. 1720—Halawai o Lonokahikini

me Kekuiapoiwa kona kaikaina ma Kiheipukoa. 1730—Make o Kualii i ka 175 o kona mau makahiki, a lilo o Kapiiohoakalani i moi no Oahu. 1734—Hanau o Kalanikupule ma Honokohau, Maui, na Kahekili me Kauwahine, a lawe ia i Hawaii e Kalola. 1735—Hanau o Kiwalao ma Kalapana, Puna, Hawaii, na Kalaniopuu me Kalola. 1736—Hanau o Kamehameha I ma Kokoiki, Kohala na Keoua Kalaninui me Kekuiapoiwa II. 1736—Hoonoho o Kekaulike i na mahoe i Hawaii i makua no kana keiki. 1736—Make o Kekaulike ma Halekuikukahua, Kapuhau, a lilo o Kamehameha Nui kana keiki hiapo i moi no Maui. 1736—Make o Kapiiohokalani ka moi o Oahu ma Kawela, Molokai, ia Alapai Nui a Kauaua ka moi o Hawaii. 1736—Pae o Alapai ma Oneawaa, a kaua me Kanahaokalani. 1737—Hoi mai o Peleiholani mai Kauai mai, a Kauai me Alapai ma Naonealaa i Kaneohe, o Naili ke kakaolelo nana i uwao a pau wale ke kaua ana. 1737—Make o Kanahaokalani, i ka-ia i ka pohaku. 1737—Hanau o Liliha Kekuiapoiwa III ma Paiki, Pakaalaneo i Kaupo, Maui, na Keoua Kalaninui me Kalola. 1737—Hanau o Keliimaikai ma Kokoiki, Kohala, na Keoua Kalaninui me Kekuiapoiwa II. 1737—Kipi o Kauhiaimokuakama ia Kamehameha Nui. 1738—Kokua o Peleioholani ia Kauhiaimokuakama, a hee no ia Kamehameha Nui. Ma ia makahiki no, kaua o Peleioholani me Alapainuiakauaua, o Kalaniopuu a me Keoua Kalaninui na pukaua. A hui o Alapai me Peleioholani ma Honolua, pau wale ke kaua, o Puunene ka inoa oia kaua. 1739—Loaa o Kauhiaimokuakama ia Holomahana a me Hikinaakala i Kaupopo, a ua pepehi hoomaewaewa ia i ke alaloa a hiki i Puhele ma Hana, a mo-ku ia i ke kai o Puhele, nona mai ka inoa o Kaleimoku. 1740—Wawahi a hana ino ia na kua-pa o Molokai e Peleioholani, a lukuia ka uluniu o Oneuli ma Honuaula, Maui. 1741—Loaa kekahi moku Manila o Galeona ka inoa, a pio ia Anesona ke kapena o ka mokukaua Beritania, a loaa iho la na palapala, ua like ka latitu i manao ia me Hawaii nei. 1849—Make o Keoua Kalanikupuapaikalaninui ma Wailoa, Hilo. Ma ia makahiki no, hiki o Kalaniopuu a me Puna, a kaua i Kalepolepo, Paieie a me Mahunaakaaka. 1750—Kaua o Kalaniopuu ia Alapai Nui, a hee ia Alapai. 1752—Kaua hou o Kalaniopuu me Alapai, a lilo o Kalaniopuu i alii no Puna a me Kau. Ma ia makahiki no, make o Alapai Nui ma Kikiakoi, Kawaihae, a lilo o Keaweopala kana keiki i alii no Hawaii. 1753—Kipi ia o Keaweopala e Keeaumoku a Keawepoepoe, a hee o Keaweopala, a mo-ku kohekohe i ka moana. 1753—Halawai o Keeaumoku me Kalaniopuu ma Kau, a haawi i ka aina. 1754—Make o Keaweopala ia Kalaniopuu ma Puako, Kohala Hema, a makia ia ke aupuni a pau o Hawaii iaia. 1754—E noho ana o Keoulumoku me Kahahana ma Maui. 1759—Holo o Kalaniopuu e kaua ia Maui Hikina, a lilo o Hana, Kipahulu, Koolau no Hawaii.