Ka Nupepa Kuokoa, Volume XXXIII, Number 11, 17 March 1894 — Page 3

Ka Nupepa Kuokoa

KE KILOHANA POOKELA NO KA LAHUI HAWAII.

 

KA HUI ALAHAO ME AINA O OAHU

MANAWA HOLO

Mai a Mahope aku o Iune 1, 1893

NA KAA AHI

NO HONOULIULI

                                                            B                     B                     A                     D

                                                            A.M.                P.M.                P.M.                P.M.

HAALELE IA HONOLULU                        8:45                 1:45                 4:35                 5:10

HAALELE IA MANANA                9:30                 2:30                 5:10                 5:56

HIKI I HONOULIULI                      9:57                 2:57                 5:36                 6:22

NO HONOLULU

                                                            C                     B                     B                     A

                                                            A.M.                A.M.                P.M.                P.M.

HAALELE IA HONOULIULI         6:21                 10:43               3:43                 5:42

HAALELE IA MANANA                6:55                 11:15               4:15                 6:10

HIKI I HONOLULU                         7:30                 11:55               4:56                 6:45

 

No na Poaono wale no.

No cela ame keia la.

Koe na la Sabati

Koe na Poaono

 

NU HOU HAWAII

            E haalele ana ka mokuahi "Australia" ia Kapalakiko i ka hora 2 P.M. o keia Poalua, Maraki 17, a holo pololei mai no Honolulu nei.

 

            Ua loaa aku i na poe kiai hale dute i ka Poaono i hala maluna o ka moku pea "C D Bryant," he 40 mau tini opiuma hapalua paona pakahi ua huna ia iloko o ka pahu puna.

 

            Eia ke pii mai nei ka eleu o ko makou haole kaha kii akamai, a e pai aku aku ana makou i keia mua iho i kana mau kii i kaha noeu ai no ka pomaikai o ko makou poe heluhelu.

 

            Eia ke hoolaha ia aku nei ma ka pepa pakui o keia nupepa, na poe hookaa ole i ko lakou mau auhau kino a waiwai o na mokupuni o Oahu, Maui Molokai a me Lanai, a me Kauai.

 

            Ma na palapala i loaa mai nei mai na Kona mai, i hoea mai ai na lono, ua hookohu ia aku nei o Mr. Thomas Wright i Lunakanawai Apana no Kona Hema, Hawaii, ma kahi o Mr. Haili.

 

            I ka wanaao o ka la 16 o Maraki nei, ua hala aku la i ka make o Samesona Palama, kekahi o na Kakauolelo Kope o ke Keena Kakau Kope o ke Aupuni, i ka 25 makahiki a keu iki o ke ola ana.

 

            Ma keia mua koke iho, e haalele mai ai o Mr. H. F. Glade, o ka Hui o H. Hackfeld & co. o keia kulanakauhale, a me kona ohana ia Honolulu nei a hoi aku e noho mau ma ka aina hanau ma Geremania.

 

            Ua haalele mai ia Honolulu nei i ka hora ahiahi o ka la Sabati aku nei i hala, ka manuwa Iapana a holo aku la no Hilo me ko Iapana Agena Kilo Aupuni ma Honolulu nei maluna ona.  E hoi koke mai ana no.

 

            Ua holo makaikai aku ia luna o ka mokukaua Beritania Champion i ka Poakahi iho nei o keia hebedoma, ke Kuhina Amerika Willis, i kaukoo ia e kana wahine.  A i ka hoi ana mai ua panee ia mai la ke kahiko hoohanohano mau o na Kuhina, he umi-kumamalima kani pu.

 

            Ua hoole loa na paahana Iapana he 103 o na haku paeli ko o H. P. Faye & Co., o Mana, Kauai, aole e hoi e hana me na haku.  Nolaila, ua hoopai ia lakou pakahi ma ka $15, a ua lawe ia mai inehinei he 43 o lakou e ia i Honolulu nei.  O ke koena, aia ma Lihue e paa la a lawe ia mai ianei.

 

            Ua hoi mai ke kapena a me ka wahine, o ka moku pea Hilo i ili ai ma Keauhou Kau maluna o ka Malulani o ka Poakolu iho nei mai Punaluu mai me kekahi mau waiwai ole i loaa mai o ka moku ili, koe wale no ka waapa a lakou i holo pu mai ai a pae ae i Punaluu a me ke panana holomoku.

 

            Ma ke noi a Rev. G. K. Kopa, akauolelo o ka Aha Ekalesia o ka mokupuni o Kauai, ke kukala ia aku nei, e halawai ana ia Aha ma ka luakini o Lihue ke hiki aku i ka Poakolu elua o Aperila e hoea mai ana.  Nolaila, e makaala ae na lala o ka Aha ma kahi a ma ka manawa i hoike ia mamua.

 

            Ua noi ia mai makou e ka Peresidena o ka Ahahui Opiopio Imipono Karistiano o ka mokupuni o Kauai e hoolaha aku, e noho ana ka halawai o ia Ahahui ma ka luakini o Lihue ke hiki aku i ka Poaha elua o Aperila aenei.  E hoouna ae i ko oukou mau luna nui a me na elele ma kah a ma ka manawa i hoolaha ia aenei maluna.

 

            Ua kii mai ka make i ka la 8 o Maraki nei, ma Hamakua, Hawaii, i ka Mr. a me Mrs. Charles Williams kaikamahine muli loa he hookahi wale no makahiki, a kaili aku la i ke aupuni uhane.  Aloha no ia uhane opiopio i ako e ia, aka "o ka mea a ke Akua i aloha ai make opiopio."

 

            I ka auina la Poakolu iho nei ua haawi ae o Mrs. S. M. Damon ma ko laua home hooluolu ma Moanalua, i ahaaina ai poi no ka hanohano o Mrs. Chas. Turner a me kana kane ma ke ahiahi o ko laua wa e liuliu ana no ka huli hoi aku i ka aina e, ke kahua palahalaha o ka laua hana mele.  Ua kanalima ka nui o ka poe hoaai i haiamu ae.

 

            I ka la 7 o Maraki nei, ma Kainaliu, Kona Waena, Hawaii, ua kii ia mai la e ka make o Moses Barrett, kekahi o na keiki papa o ka aina kai malino a Ehu a lawe ia aku la i ke aupuni uhane, ka pahu hopu o na mea ola kono a pau, a i ke 52 o na makahiki o ke ola ana ma ke aupuni hanu ola nei.  Aloha no ia keiki kamaaina heahea i lawe e ia aku la.

 

            I keia ahiahi Poaono, hora 7:30, e noho hou ai na poe kupono i ke koho balota o ka Apana Ekolu e kokua nei mahope o ke Aupuni, ma ka Hale Paikau o ke aupuni ma Alanui Halealii, no ke koho ana i na luna mau o ka Hui Uniona ma ia apana.  Nolaila, ke kono ia nei na poe makemake aupuni maikai a onipaa o ia apana, e hele nui ae ma ia wahi a ma ia manawa.

 

            Ma ke awakea o ka la 7 aku nei i hala o keia malama, ua hookui aku ke kila o ka mokuahi Likelike ma kekahi wahi o ke awapae o Pepeekeo, Hiko, oiai oia e holo aku ana e hooili kopaa.  Ua paa iho oia no ka wa pokole maluna o ka pukoa a na ka aui nalu i hapai ae a hookuu aku iaia i ke kai hohonu.  O ka pilikia i loaa iaia ma keia ili ana oia ka akaa pu ia ana o kekahi mau kapuai he umi paha o kona kamaa ae olalo.  Ke kali ia aku nei oia o ka hoi mai i Honolulu nei.

 

            Ua noonoo ka Hui Hooholo Mokuahi Pili Aina a hooholo e kapili i mokuahi e pani ai i ko ka mokuahi C. R. Bishop wahi i ili ai a nahaha ma na kapakahakai o Kauai.  Nolaila, e hoouna ia ana ke kauoha no ke kapili i mokuahi hou, a e paa ma Okatoba aenei o keia makahiki, no na lilo i koho ia he $37,000 lawa.  No ka mea, mamuli o ka ili ana o ka Bishop, ua ano lelepi loa mai ka hoohana ia ana o na mokuahi i koe iho no ka hoolawa ana i na halihali ukana oiai he kau kopaa keia.

 

            E haawi ana na luina o ka mokukaua Adimarala Amerika Piladelapia i aha mele keaka maloko o ka Hale Mele hou i keia po Poaono, a o na loaa a pau o ia po mahoe o ka uku ia ana o na lilo mau, e panee ia aku no ia no ka pomaikai o ka wahine kanemake a ka makai Kimo Kauhane i make a me ka makai Kaouli i ku i ka pahi a e kaa mai nei i ka maewaewa a na moku pahi a ka haole Paniolo omo koko puuwai eleele e paa mai nei i ka hale paahao no ke kali i kona hookolokolo  ia

 

            Ua lilo mai ia Mr. Samuel K. Aki o Honolulu nei, kekahi o na ipu-olelo kamahao o na aina e mai e hoikeike ia nei i ko Honolulu nei poe no ka $400, a eia ke hoohonehone ia nei kona mau leo mele ma ke kahua o ka Lio Poniniu ma Waikiki iho o ka Nekina, no ka hapaumi wale no o ka hoolohe ana.  E lawe hele ia aku ana keia ipu-olelo me kona mau leo mele hou loa i hoopihapiha ia iho nei, ma na awa kumoku a ma na kulanakauhale mawaho aku o Oahu nei i keia mau la iho, i ike ai na mea a pau i keia mea kamahao.

 

NA LETA

            Aole o makou makemake e lawe i ke koikoi o na hala no na manao i hoopuka ia malalo o keia poo e ko makou poe mea kakau.

 

O ke Kanaka i Kupaa no ka Pono o Kona Aina a me Kona Lahui, ua Kapae ia, he Lauwili a he Lolelua.

Mr. Lunahooponopono; Aloha oe:

            Nani ka hoi ka puʻiwa o koʻu hiamoe, oia ala no ia la a ike i kekahi mau manao i hoopuka ia maloko o na nupepa KA OIAIO a me KA LEO o na eepa, i hoea mai nei i o makou nei i ke kakahiaka Poalu i hala, Feberuari la 20, a o ua mau manao la i hoopuka ia maloko o ua Mau nupepa piha welu nei, he mau manao ia e hiki ole ai i koʻu pulima ke a@ʻa mai, a e aho au e hookuu aku i kaʻu makakila e inu i ka wai eleele o ka inika a me ke aiai o ke kanana, ae e hoike aku imua oʻu mau hoa Hoohui Aina.  Malalo o koʻu kalaiaina e ku nei he Hoohui Aina oiaio au mai luna a lalo, mai loko a waho, a iaʻu nae hoi i kaulona pono iho ai me na ike a koʻu mau maka, ike iho la ua i ka inoa o ke koa Kavalia kaulana o Maui Hikina.

            Ke kiai naue ole o ke kau Ahaolelo o ka M. H. 1892-3 hoehaa, ke kupaa o na kupaa, a me ka luli ole o na luli ole, ka Hon. J. K. Iosepa, ka paleumauma kila a liona haniu mehehu pololei o ka apana o Hana, e kakoo nei no ka pono o kona aina, a me kona lahui, aʻu hoi e kapa aku ai he puuwai wiwo ole imua o kona mau enemi, a ka nupepa KA OIAIO a me kona LUNAHOOPONOPONO e hoino aku nei i ke kanaka hewa ole, a e hapala aku iaia me na huaolelo i ku ole i ka maemae.  Oiai ua ike au i ua mau manao ala i hoopuka ia maloko o ua mau nupepa waha kole nei, aole i hana ia kela malalo o na kalai manao maikai ame na kulana o ka poe naauao, ua hana ia kela ma ke ano lili pili kino, aka, aole wale i ua k@ puuwai hopo ole iaHon. J. K. Iosepa ua Lunahoponopono nei e kipehi aku nei me keia mau huaolelo maemae ole, aka, ke hauhili a e nai ka aweawe o ka hee pilikua a lakou o ka loteri maluna o ka poai hoohuiaina mai Hawaii a Kauai, me ka huli o ke poo o ua hee nui nei iuka o ka aina, nana na maka i kahaone o ke ku mai a ka poai hoohuiaina iuka, a luai aku la i na huaolelo hu-a kai awahia mai kona waha aku, poe hupo oukou, hoopilimeaai; aloha ole i ka aina, aloha ole i ke alii, poe kipi oukou.  A no keia nui o ka leo walaau o ua pilikua nei, puoho mai nei na iʻa liilii oloko o ka lua, u-wa hoi kiapapali, a pane aku la.  Kupanaha no oe e ke kupunakane o ka loteri, kai no o oe ke aloha ole a me au mau moopuna, o ko kuakahi alii la, pakele mai kipaku mua ia mai ka noho alii aku i ka malama o Mei, o ka makahiki 1892, e au mau moopuna no o ka poai Hui Liberala, a i ka la 27 ae o na malama ala no he Poalima ia, kaʻi auna ia ae i ke ala malalo o ka hewa he ohumu kipi.

            Nolailo e Mr. Lunahooponoponi, o na hana ekaeka a pau loa e kue ana i ka poai hoohuiaina aia ia maluna o kela aloha aina ole wale a me pili alii a lakou e kuwo mau nei i na wa a pau maloko o ka lakou maunupepa, aloha makou i ka aina, aloha makou i ka lanui, aloha makou i ka Moiwahine.  Nolaila, ke ninau nei au, auhea ke aloha aina oiaio iloko o lakou?  Aole, aole loa.  Ua like me ka omole, hinuhinu mawaho he oi oloko.  A aia nae maloko o ua mau nupepa waha kole nei, ke ao kula mau mai nei lakou i ka lahui, i kela pule me keia pule, i kela malama me keia malama, mai ka hoomaka ana o ke Aupuni Kuikawa a komo i keia makahiki, me ka hoopuka ana i keia mau hopuna olelo a ka aoao anee alii hoi e hoopaanaau mau nei, oia keia.  O amea a keia malama ae, a keia mokuahi aku.  O keia ae la na hopuna olelo a lakou e kula mau mai nei i ka lahui e pili ana i ka hoihoi ia ae o ka Moiwahine ma ka noho alii, eia nae aohe wahi mea a hoi ae, kaukai aku nei ka pono o na ohana nei i ka imi haku alii a lakou o Amerika, Kalivalana, oia like pu no paha auanei, ka hoi nele i ke kula o Malama.  Pololei wale ka Iesu i olelo aku ai imua o na kanaka maluna o ka mauna, Mataio 7:15, 16.  E malama hoi ia oukou no ka poe Kauia hoopunipuni ke hele mai io oukou nei me ka aahu hipa, aka maloko he poe ilio hihiu hae lakou.  Ma ko lakou hua e ike aku ai oukou ia lakou.  Nolaila, ua ike ia ka hua o ka lakou mau hana pono ole, a ua kuiai ia aku ka ana hooko wahine o ke aupuni moi a me kona mau paalalo mai ka noho alii aku, a ua apo ia aku ke aupuni e na mamo a na misionari a paa ma ka poho o ko lakou ima, a eia ke hookele ia nei e ka poe ike i nei mea he hookele ana o ke aupuni, e ka poe ike i nei mea he hookuonoono ana i ka waihona o ka lahjui a me ka hooholomua ana i ke aupuni ma kahi o na pomaikai kaulike, a aole hoi e like aku me lakou la ae, ka poe ike i nei mea he hooponopono aupuni ole wale, i ke au o Kipikona ke kupunakane o ua ohana lu ka heleli nei, ka iho o ka akau a hiki i Samoa maluna o ka waa peleleu Kaimiloa, a oia puu dala nui o $20,000 a makou a ka lahui i auamo ai, a eia ke moe lolii mai nei malalo o na pukoʻa nui o ka moana Pakipika.  Nolaila, pololei wale na haole e olelo nei, aole e hiki i kanaka Hawaii ke hookele i ke aupuni, no ka mea, he noho na manao lapuwale iloko, o ka hanohano a me ka waiwai, ke ake oihana a me ka puni dala, oia ka palaoa ono loa ia, ka lahui nae noho mai no nana aku i ka lakou mau hana uhaai palea ole, a aia ma kahi o na puu dala nui hewahewa oia ka mea i makemakeia i hele kela a pehu like na pakeke o lakou ia ma, a oia paha ka Kawelo i paha aku ai ia Kauahoa:

Pehu ka ha ka limu o Hanalei

Eha i ka ua

Pehu ka lulu ai i ka maka o ka opua

Hai hewa ka lima i ke kaua kamalii

Ei aku ka ke kauwa i ka hope waa

Ea Kauahoa Kameeui o HJanalei

Huhuhuʻe a kaua moe i ke awakea

Kapae ke kaua e ka hoahanau

Aole hoi na o kuu pili makamaka

Kuu hoa hele o ka wa Kamalii,

Hoa kui lei lehua o Waikaeee,

Lehua a lakou ia e ku nei,

Me ua Haku alii la o lakou la,

Me Kuini Liliuokalani,

Lilo o Waolani lilo ia lakou la,

Lilo Hawaii nei hui me Amerika.

            Mihi paha auanei o Buki ma la i ke anu, no ka mea, aohe kanaka aia i Mana, ua hao ia e ka i-a iki a nolaila o makou a pau a me ka makou mau koa kaulana e-ha, ka poe e ku nei ma ka aoao hoohuiaina, he makemake loa makou i nei hooponopono aupuni e ku nei a ke ike aku nei makou ke hookele ia nei ke aupuni me ka maikai a me ka maemae, me ka hoike pu ia mai o na loaa o ke aupuni i kela manawa a me keia manawa, e like me ka hoike a ka nupepa Puka La KUOKOA o ka malama o Sepatemaba 19, 1893 helu 136, a eia ka hoike ana: O ka $250,710.51 e waiho ana ma na lua pao o ke Aupuni Kuikawa ma ka la 13 o Sepatemaba, he $103,845 o ia huina ma na leio o Amerika Huipuia, nolaila o keia puu heluna nui o na loaa o ka waihona o ke Aupuni Kuikawa, he mea ia i ike ole ia i ka wa o ke aupuni moi, oiai lakou ia aku e noho ana i ka oihana ia wa ma ke ano, na papa kuhina ai dala o ke aupuni moi, a eia mai ka hope loa, o ka pau ia i lohe oe ka Oiaio a me Ka Leo.

            O ka mole o ke Aupuni Kuikawa, ke paa ia la e Kamalamailalo, o ka welau, ke paa ia ala e Kalamainuu, aole e naue, he oi na Hawaii na ka moku nui.

HOOHUIAINA OIAIO.

Kauai o Mano.

 

Ua Kuu ka Luhi

            Ma Makanalua, Kalaupapa, Molokai, Feb. 23, 1894, hora 7 p.m., ua haalele mai la i keia ola ana o Jno. Laioha Adamu, mahope iho o ka hoomailo ana a ka mai maluna o kona kino.  O Holualoa, Kona Akau, Hawaii kona one oiwi.  Ua hanau ia mai oia na Iosepa Adamu a me Mele w, i ka M. H. 1858, a na piha iaia na makahiki he 36 ma keia ao, ua mare oia i ka wahine a ua loaa hookahi hua mai ko laua puhaka mai, a eia oia ma ke Kula Kaikamahine o Kainaliu, Kona, Hawaii.  I ka 1886, i Honolulu nei oia, a oia kekahi o na makai ku huina o ke kulanakauhale nei malalo o ka noho Ilamuku ana o Jno. K. Kaulukou, aneane paha elua makahiki o kono noho makai ana.  Ua waiho oia i ka hana a huli hoi aku la no ke "Kai Malino a Ehu."  I ka 1889, ua hoike mai la na hoailona a ka maʻi maluna o kona kino.  I ka 1893 aku nei, i ka mahina o Augate ua lawe ia mai oia a me kona luaui makuahine i loaa ia haawina hookahi a noho ma ka halemai o Kalihi, a ma ka la 12 o Sept. mai, ua kau aku oia me kona makuahine a me kekahi poe e ae he 25 maluna o ka mokuahi Hawaii, no Kalaupapa Molokai, a malaila oia i noho ai a hiki wale i ka wa a ka anela o ka make i kii mai la i kona hanu hope loa.  Ua haalele iho oia i kona makuahine e noho @ aku nona ma kela aina makamaka ole, a me kona kaikuahine i aloha nui ia Mrs. Julia Keawehawaii e noho nei i ke kulanakauhale nei a me ko laua papa aloha Joseph adamu a me ka ohana a pau e noho mai la i ka aina hanau o

"Kona kai opua i ka lai

Opua hinano ua malie

Hiolo lua na wai naoa a ke kehau

Ke nau la kamalii

Ke kohi la i ke kukuna o ka la

Pumehana wale ia aina.

Aloha ino.

            He mea oiaio no ka ka Buke Nui i hai mai ai, "He mahu ke ola o ke kanaka i pu-a ae a nalo aku la."

            Walohia wale.

            MRS. J. POLIIHELELOA.

            Mana, Honolulu, Maraki 7, 1894

 

            I ka wa e nakulu ai oloko o ka opu me ka eha, a hele moku ka lepo, alaila, e hoao i ka CHAMBERLAINʻS COLIC, CHOLERA a me DIAIROEA REMEDY laau lapaau a e oi aku ana kou mahalo ke ike oe i kona hopena.  He oluolu, palekana a puhili ole.  He oluolu, palekana a puhili ole,  He 25 a me 50 keneta o ka omole, a e kuai ia no ma na halekuai lapaau a pau.  BENSON SMITH & CO., na Agena ma ko Hawaii Pae Aina.  tf

 

            "O ka oi ma ke ao holookoa."  Oia ka W. D. WOODRING o BORDLY KENETUKE, e hookaulana nei no ka Chamberlainʻs Cough Remedy (Laau Kunu).  Ke kamailio nei oia ma kona ike ponoi iho i ka inu ana, oiai o kona a me ko kona ohana ola ana mai nei no ia mai ka loaa ana i ke kunu koikoi loa a me ke anu, a ua hooholo oia o keia laau lapaau ka oi ma ka honua nei.  E kuai ia no ma na Halekuai Laau Lapaau a pau.  O BENSON, SMITH & CO., na Agena ma ko Hawaii Pae Aina.  tf.

 

Hoolaha Hou.

            AHA Hookolokolo Kaapuni Apana Elima o ko Hawaii Pae Aina.  Ma ka hooponopono waiwai.  Ma ka waiwai o MOLUHILANI k. o Kalihiwai, Hanalei, Kauai, i make kauoha ole.  Imua o ka Lunakanawai Kaapuni, ma ke keena.

            Ma ka heluhelu a me ka waiho ana mai o ka Palapala Noi a Hulukaalani w. o Honolulu, Oahu, e hoike ana ua make kauoha ole o Moluhilani k, ma Kalihiwai, Hanalei, Kauai, i ka 1893, me ka waiho iho he waiwai ma Hanalei, Kauai, kekahi o ko Hawaii Pae Aina i kupono e hooponoponoia, a e noi ana e hoopukaia ka palapala lunahooponopono waiwai i kou mea noi.

            Ua kauohaia o ka POAHA ka la 29 o MARAKI M.H. 1894, i ka hora 10 a.m. oia ka manawa i kahoia no ka hoolohe ana i ua noi la imua o ua Lunakanawai la ma ke Keena Hookolokolo o keia Aha ma Lihue, a ma ia manawa a ma ia wahi no e hele mai ai na mea a pau i pili e hoike mai i ke kumu, ina he kumu oiaio ko lakou e ae ole ia ai ua noi la.  A o keia olelo kauoha e hoolahaia ma ka olelo Hawaii i ekolu pule ma ke Kuokoa nupepa ma Honolulu.

            Kakauia ma Lihue, ko Hawaii Pae Aina, Feberuari 24, A. D. 1894.

JACOB HARDY,

Lunakanawai Kaapuni Apana Elima.  2488-3

 

Hoolaha Hou

            ILOKO o ka Aha Kaapuni o ka Apana Hookolokolo Ekahi o ko Hawaii Paeaina.  Ma ka Hana o ka waiwai o NAHOLOWAA (w) o Manoa, Honolulu, Oahu, i make.

            No ka mea ua waihoia mai i keia la he palapala i oleloia oia no ka palapala kauoha hope loa o ka mea i make me kekahi palapala noi e noi ana e hooiaio ia ua palapala kauoha la, a e hoopukaia ka palapala hookohu lunahooponopono ia S. K. AKI, o Honolulu i oleloia..

            Nolaila, ma keia ke kauohaia nei o ka POALIMA, la 23 o MARAKI, 1894, hora 10 kakahiaka o ia la, ma ka rumi hookolokolo o ua Aha Hookolokolo la, ma Honolulu, ia kahi a me ka manawa i kohoia no ka hoolohe ana i na palapala noi la a me ka hooiaio ana i na palapala kauoha hope la i oleloia, a malaila no e hele mai ai na poe a pau i kuleana malaila, a e kue i ka hooiaio ana ina paha he kue ka lakou.

            Na ka Aha;

            CHARLES F. PETERSON,

            Kakauolelo

            Honolulu, Feberuari 20, 1894   2482-3

 

Kuai a ka Hope Makai Noi o Kona Akau, Hawaii.

            MAMULI o ka mana i loaa iaʻu malalo o kekahi palapala ohi waiwai i hoopuka ia e ka Aha Apana o Kona Akau, Hawaii, ma ka la 17 o Feberuari, 1891, e kue ana ia Chas. Kaiaiki ka mea hoopii ia no ka pomaikai o Fukuda () he Iapana ka mea hoopii no ka huina o $76.

            Ua hoomalu ia e aʻu a e kuai aku ana hoi ma ke kudala akea ma ke alo iho o ka Hale Hookolokolo ma Kailua, Kona Akau, Hawaii, ma ka hora 12 awakea o ka POALIMA, APERILA 6, 1894, i ka mea koho kiekie i na pono a me na pomaikai a pau loa e pili ana i ke kuleana hoolimalima o Chas. Kaiaiki ka mea hoopii ia iloko o ka Hui Hoolimalima Aina o Kahaluu, Keauhou 1 me 2 ma Kona Akau, Hawaii, a me na holoholona i hoike ia malalo nei:

            1 Lio w ualula hao ano e uha hope akau mua

            1 Lio keiki ulaula hao ano e uha hope akau mua

            1 Lio keiki ulaula hao ano e uha hope akau mua

            1 bipi w me keiki hao ano e uha hope akau mua

            1 ekake w keokeo hao ano e uha hope akau mua

            1 ekake w keokeo hao kuni P uha hope akau mua

            Ke ole e uku ia mai ka olelo hooholo i hai ia ae la, ka ukupanee, me na koina o ka aha, a me na lilo a pau o ka ohi ana.

J. K. NAHALE,

Hope Makai Nui o N. Kona, Hawaii

Hanaia ma Kahaluu, N. Kona, Hawaii, Maraki 7 M. H. 1894.  2485-4

 

Hoolaha Kuai a ke Kahu Malama

            I KULIKE ai me ke kauoha i hoopukaia no ke kuai no na pomaikai o ANA a me ALVINA, he mau keiki oo ole, iloko o kekahi waiwa paa ma Kohala, Hawaii, i hookomoia iloko o ka Aha Hookolokolo o Kaapuni o ka Apana Ekolu ma ka hooponopono waiwai, e kuai aku ana ka mea nona ka inoa malalo iho ma ke kudala akea, ma ka hale kudala o James F. Morgan ma Honolulu ma ka Poaono la 7 o Aperila, 1894, hora 12 awakea o ia la, ia elima hapa umikumamalua kuleana i mahele ole ia o ua Ana a me ua Alvina la iloko o na waiwai i kuhikuhiia malalo iho:

            1. Palapala Sila Nui Helu 514 ia Kuluehu, he 23 1/3 mau eka ma Ainakea, Kohala.

            2. Palapala Sila Nui Helu 1548 ia Mahina, He 15 85-100 mau eka, ma Kapaau, Kohala.     

            3. Palapala Sila Nui Helu 4908 Kuleana Hoona Aina Helu 9782 ia Helunanui nona paha ka 7 eka,

            O kela mau aina i oleloia ae la ua pili kekahi i kekahi, a o ke kuleana o na keiki oo ole e kuai aku ana me ka paa no i ka hoolimalima ia malalo o ka Hui Mahiko o Kohala no ka $5. o ka eka a he 14 mau makahiki i koe o ka hoolimalima.

            Kakauia ma Honolulu, Maraki 14, 1894.

HAN SAM,

Kahu Malama.  2485-4

 

Hoolaha Hooko o ka Moraki a mme ke Kuai.

            KE HOOLAHA ia aku nei ka lohe, i kulike ai me ka mana o ke kuai i hookomoia iloko o kekahi moraki i hana ia ma ka la 20 o Iune, A D 1892, e KALAWAIANUI (W) a me Cain D. Wiliokai kana kane, o Honolulu, Oahu, ia Rev. J. Kauhane, o Kau, Hawaii, kopeia ma ke Keena Kakau Kope o ke Aupuni, buke 139 ma na aoao 108, 109 a me 110,  ai hoolilo ia aku e Rev. J. Kauhane ia Bishop & Co. ma ka la 4 o Mei, A D 1893 a oia hoolilo ana ua kopeia ma ka buke 139 aoao 109, a no ka uhakiia o ka aelike, oia ka hookaa ole ia o ka ukupanee i ka wa e hookaa ai, nolaila, ke makemake nei ka poe e paa nei i ka moraki e hooko aku.

            Ke hoolaha hou ia aku nei, o kela aina a me na waiwai i kuhikuhiia maloko o ua moraki la, e kuai ia aku ana ma ke kudala akea ma ka hale kudala o James F. Morgan ma ka Poaono, Apreila 14, A. D. 1894, hora 12 awakea.

            O ka waiwai e kuai ia aku ana, oia keia malalo iho penei:

            O kela aina a pau i kuhikuhiia iloko o ka palapala sile nui helu 1618 nona ka ili he 1@5 hapa 1000 eka, e waiho nei ma Alanui Rikeke ma Honolulu, i hooliloia mai i na Kalawaianui la ma ke kuai e Maika ma ka la 18 o Maraki A d 1871 a kopeia ma ka buke 32 aoao 104.\

            Ma ke dala gula o Amerika Huipuia e hookaa ai.  Na uku hana palapala i ka mea e lilo ai.

            Kakauia ma Honolulu, Maraki 10, 1894.

BISHOP & CO.

Ma o ko lakou mau loio la Carter & Carter.

2485-4

 

He mau Aina Waiwai nui no ke Kudala.

            UA loaa mai iaʻu no hoonaauao ana mai a Cecil Brown Esq. mai, Kahu, e kuai aku ma ke kudala akea ma ka POAONO, MARAKI 30, 1894, ma kuu Hale Kudala i na waiwai i kuhikuhi ia malalo iho:

MA KA MOKUPUNI O OAHU.

1.-        O kela aina a pau e waiho la ma Waiau, Ewa, Mokupuni o Oahu a i kuhikuhi pono ia maloko o ka Palapala Sila Nui Helu 168 Kuleana Hoona Aina Helua 9,344 nona ka ili he 1 eka a me 8 41-100 mau kaulahao, a oia aina hookahi kai hoolilo ia mai ia Isaac D. Iaea ma ke kuai i kope ia ma ka Buke 142 aoao 483.

 2.-      O kela apana aina e waiho la ma Kalihi, Oahu, i olelo mua ia, a i kuhikuhi pono ia ma ka palapala hoolilo a J D Holt, Jr. ia Isaac D. Iaea i kakau ia i Ianuari 23, 1894, a i kipe ia ma ka Buke __aoao__.

3.-        O na pono a pau, na kuleana a me na pomaikai o na Isaac D. Iaea la iloko o kela apana aina ma Alanui Kamika ma Honolulu, i hoolilo ia mai e Kahalehoe a me kekahi poe e ae ma ka palapala, a i kope ia ma ka Buke 127 aoao 214.

4.-        O kela aina e waiho la ma Keana Apana o Koolauloa, Oahu, a i kuhikuhi ia iloko o ka Palapala Sila Nui Helu 6,247 Kuleana Hoona Aina Helu 4,329, i hoolilo ia mai i ua Isaac D. Iaea nei ma ka palapala e Kuapuu a me Kahinaaukea, a i kope ia ma ka Buke 127 aoao 79.

5.-        O kela aina a pau e waiho la ma Kahuku, Koolauloa, Oahu, a i kuhikuhi pono ia iloko o ka Palapala Sila nUi Helu 342 Kuʻeana Hoona Aina Helu 4428, i hoolilo ia mai ia ua Isaac D. Iaea nei ma ka palapala e Moses Puamana i kakau ia 1 Iulai 30, 1890, a i kope ia ma ka Buke _ aoao_/

6.-        O kela apana aina a pau e waiho la ma Kaupakulua, Makawao, Mokupuni o Maui, i kuhikuhi pono ia ma ka palapala hoolilo a J. Kaahiki, a i kope ia ma ka buke 127 aoao 417.

7.-       A me na pono, na pomaikai a me ke kuleana o Keahi ka wahine a Isaac D. Iaea, loko o kekahi mau apana aina e waiho la ma ka apana o Makawao ma ka Mokupuni o Maui, a i kuhikuhi pono ia iloko o ka palapala sila nui helu 3039 ia Kekaha, nona ka ili he 309 mau eka, palapala sila nui helu 1213 ia Haole, nona ka ili he 22 96-100 mau eke a me ka palapala sila nui helu 1838 ia David Maddox, nona ka ili he 108-9-100 mau eka.  O keia mau aina a pau maluna ae, oia na waiwai i hoolilo ia aku ia Cecil Brown e Isaac D. Iaea a me kana wahine ma ka palapala i kakauia i Ianuari 24, 1894, a i kopeia ma ka buke 146 a ma na aoao 71-72.

JAS F. MORGAN,

Luna Kudala  2485-2

 

Hoolaha Hooko o ka Moraki a me ke Kuai.

            KE HOOLAHA IA AKU NEI KA LOHE I kulike ai me ka mana o ke kuai i hookomo ia iloko o kekahi moraki i hanaia ma ka la 14 o Mei, A. D. 1890, e KUKANA POAIMOKU a me KOPA kana kane a me S. W. KALAAUULA o Lahaina, Mokupuni o Maui, ia James M. Monsarrat o Honolulu, Mokupuni o Oahu, Kahu, kope ia iloko o ke Keena Kakau Kope, Buke 126 ma na aoao 64, 65, a me 66, ke makemake nei ua James M. Monsarrat la, Kahu i olelo mua ia, mea e paa nei i ka moraki, e hooko i ua moraki la, no ke kumu ka uhaki ia o ka aelike, oia ka hookaa ole ia o ke kumupaa a me ka ukupanee i ka wa e hookaa ai.

            Ke hoolaha hou ia aku nei ka lohe, o kela mau apana aina a pau, na pono hoaaina a me na pilikana iloko o ua moraki la i kuhikuhi ia, e kuai ia aku no ma ke kudala akea ma ka hale kudala o James F. Morgan, ma Alanui Moiwahine Honolulu, ke hiki aku i ka POAKAHI, la 2 o APERILA, M.H. 1894, ma ka hora 12 awakea o ia la.

            Penei ke kuhikuhi ana o ka aina i paa maloko o ua moraki la:

 1.-      O kela mau apana aina elua e waiho la ma Pulani a me Nuimalu, Kaupo, ma ua mokupuni la o Maui, a nona ka ili he 63.41 mau eka, a oia na aina i kuhikuhi ia iloko o ka Palapala Sila Nui Helu 2,183 ia Kekahuna ka makuakane o na Kukana Poaimoku la a me S. W. Kalaauula.

2.-        O kela apana aina e waiho la ma Nuimalu la nona ka ili he 7.88 mau eka, a oia ka aina i kuhikuhi ia iloko o ka Palapala Sila nui Helu 2623 Kuleana Hoona Aina Helu 6773 ia Kawahaokaia kupunakabna o ua Kukabna Poaimoku la a me S. W. Kalaauula.

            E hookoe ana a hookaawale ae mailoko mai o ia mau aina i na hapa i kuai ia aku ia K. Kaiaiki e ua Kalaauula la a me kana wahine ma ka palapala hoolilo i hana ia ma Dekemaba 24, 1883, kope ia ma ka Buke 86 aoao 188, nona ka ili he 23.77 mau eka, a ia S. Kaiaiki e ua Kukana Poaimoku la a me Kopa ma ka palapala kuai i hana ia ma Maraki 18, 1884, kope ia ma ka Buke 85 aoao 397.  He 3.94 mau eka iloko o ke Kuleana Hoona Aina Helu 6,773 a me 1 1/2 mau eka iloko o ka Palapala Sila Nui Helu 2183.

JAMES M. MONSARRAT, KAHU.

Mea e paa nei i ka Moraki.

            Kuike ke dala. Na uku hana palapala i ka mea e lilo ai.  No na mea i koe, e ninau i ka mea e paa nei i ka moraki.

Honolulu, Mar. 6, 1894           2484-1

 

Hoolaha Hou.

E Haawi i na Keiki Ai Waiu                           He Ai Hooulu Oi Loa

A ME NA POE OMAIMAI                          No ka hooulu Kamalii

            MELLINSʻS                                       Ka Hoopohaia mai ana

                                                FOR INFANTS AND INVALIDS.              Na Mai Ake Pau

                                                                        FOOD                                     Na Opu Aiwali ole.

                                                                        I ka Mea Ai.                            a me na elemakule loaa i na

                                                                                                                        Nawaliwali.

 

                                                                                                                        He AI MAIKAI LOA,

                                                                                                                        No na Polii Hanai Lima ia.

BENSON, SMITH & CO.

Na Agena wale no ma ko Hawaii Pae Aina

 

PALAPALA HOOKOHU HOPE

            E IKE auanei na kanaka a pau ke nana mai, owau o Wm. Kahalawailua, no Kealia, Apana o S. Kona Mokupuni o Hawaii, e noho nei ma Wailuku, Mokupuni o Maui, ke hana nei au a ke hookohu nei a ma keia ke hookohu nei au ia Pilipo Haae o Kealia, Kona-hema, Hawaii, i hope noʻu, no ka manawa aʻu i makemake ai iala, a iaia no ka mana e malama a e hooponopono i koʻu mau waiwai a pau loa e waiho la malaila a me kekahi mau mea e ae ma koʻu inoa.

            I hoike no keia, ke kakau nei au i koʻu inoa a hoopili i koʻu Sila i keia la 23 o Feb. 1894.

WM. KAHALAWAILUA.

Kahului, MAUI.                     2483-3

 

HE MAU AINA NO KE KUAI.

            I KULIKE ai me ka mana o kekahi Kauoha i hoopuikaia e ka Aha ma o ka Lunakanawai Kiekie Hon. A. F. Judd, ma ka hihia a William Watson a me kekahi poe e ae kue ia David Watson, nolaila e kuai ia aku ana ma ke kudala akea ma ka rumi kudala o James F. Morgan ma ka POAKAHI, MARAKI 19, 1894, Hora 12 awakea.

            O kela mau apana aina a pau e waiho la ma Kaneohe, Koolaupoko, Oahu, a i hoakaka pono ia e like me keia: Apana 1,3 80-100 eka; apana 2, 4 21 eka; apana 3, 37.96 eka; apana 4, 7 35 eka.  O keia mau apana a pauy, he mau hapa no ka Palapala Sila Nui Helu 174 ia Paulo F. Manini.  Apana 5, 20 eka; apana 6, 20 eka; apana 7, 20 eka; apana 8 54 50 eka; apana 9, 54.50 eka.  O keia mau apana aina a pau ua hooliloia aku e Kamehameha IV ia David Watson ma o kekahi palapala i hanaia Dekemaba 29, 1862 a i kopeia, Buke 16, aoao 127 me 128.  Maikai ke Kuleana.  Na ka mea kuai mai na lilo hana palapala.

            No na mea i koe e ninau ia William C. Aohi, Loio no ke Komisina, a i ole ia.

S. M. KAAUKAI,

Komisina.

Ua Hoopaneeia ke Kudala a ma ka la 4 o Aperila.

Honolulu, Feberuari 23, 1894             2483-3

 

Hoolaha Hooko o ka Moraki a me ke Kuai.

            KE hoolaha ia aku nei ka lohe, i kulike ai me ka mana o ke kuai i hookomo ia iloko o kekahi moraki i hana ia ma ka la 20 o Maraki, A.D. 1888, e KAPIA (k) o Honolulu, Oahu, ia J. M. Monsarrat o ua Honolulu la, Kahu, kope ia ma ke Keena Kakau Kope o ke Aupuni Buke 110 a ma na aoao 135, 136 a me 137, a i hoolilo ia aku e J. M. Monsarrat, Kahu, ia Henri G. McGrew ma ka la 5 o Novemaba A. D. 1890, a oia hoolilo ia ana ua kope ia iloko o ke Keena Kakau Kope Buke 129 aoao 47, a no ka uhai ia o ka aelike, oia ka hookaa ole ia o ke kumupaa a me ka ukupanee, nolaila ke makemake nei ka mea e paa nei i ka moraki e hooko aku.

            Ke hoolaha hou ia aku nei, o kela aina a me na waiwai a pau i kuhikuhi ia maloko o ua moraki la, e kuai ia aku ana ma ke kudala akea ma ka Hale Kudala o James F. Morgan ma ka POAONO, APERILA 14, A.D. 1894, hora 12 awakea.

            O ka waiwai e kuai ia kau ana, oia keia malalo ino penei:

            O ka hapakolu i mahele ole ia o kela mau apana aina elua e waiho la ma Kumuhane a me Puea iloko o Kalaepohaku Palama mokupuni o Oahu, nona ka ili he 3 mau eka 3-34-100 kaulahao kuea, a oia na aina iloko o ka Palapala Sila Nui Helu 2,521 Kuleana Hoona Aina Helu 2,268 i hoopuka ia no Kupahu.  O ua mau aina la ua paa malalo o ka hoolimalima.

            Ma ke dala gula o Amerika Huipuia e hookaa ai.  Na uku hana palapala i ka mea e lilo ai.

            No na mea i koe, e ninau ia Carter & Carter,

            Kakauia ma Honolulu, Maraki 10, 1894.

CHARLES L. CARTER,

Kahu Malama o H. G. McGrew                     2485-4

 

Hoolaha Hooko o ka Moraki a me ke Kuai.

            KE Hoolahaia aku nei ka lohe i kulike ai me ka mana o ke kuai i hookomoia iloko o kekahi moraki i hanaia ma ka la 30 o Okatoba, A.D. 1890, e Kawawahimoku, Hiki a me Joseph Kaanaana o Waihee, Mokupuni o Maui ia James M. Monsarrat o Honolulu Mokupuni o Oahu, Kahu kope ia ma ke Keena Kakau Kope o ke Aupuni Buke 129 a ma na aoao 34, 35 a me 36, ke makemake nei na James M. Monsarrat la, Kahu i oleloia a mea e paa nei i ka moraki, e hooko aku i ua moraki la no ka uhaiia o ka aelike iloko o ua moraki la, oia ka hookaa ole ia o ke kumupaa a me ka ukupanee i ka wa e hookaa ai.

            Ke hoolaha hou ia aku nei ka lohe i na mea a pau, o kela mau aina a pau, na pono hoaaina a me na pilikana iloko o ua moraki la a i kuhikuhi ia, e kuai ia aku no ma ke kudala akea ma ka hale kudala o James F. Morgan ma alanui Moiwahine, Honolulu, ma ka Poakahi, la 19 o Maraki, A.D. 1894, hora 12 awakea o ia la.

            O ka waiwai i paa maloko o ua moraki la oia keia,

1.         O kela apana aina e waiho la iloko o ka ili o Nelu iloko o Waihee, nona ka ili, he 48-100 o ka eka, a oia no ka aina i kuhikuhiia iloko o ka Palapala Sila nui helu 5402 kuleana hoona aina helu 4405 F. F. ia Ku a i hooliloia aku ia Kaanaana ka makuakane o Kawawahimoku, Hiku a me Joseph Kaanaana e Kaawa ke cousini a me ka hooilina ponoi ma ke kanawai o ua Ku la ma ka palapala kuai i hanaia i Dekemaba 31, 1881, kope ia iloko o ke keena kakau kope o ke aupuni, Buke 73 a ma na aoao 88 a me 89.

2.         O kela mau apana aina ekolu e waiho la iloko o na ili o Pupouulu ame Kapaho ma ua Waihee la, nona ka ili he 1 1/2 mau eka, oia na aina i kuhikuhiia iloko o ka palapala sila nui helu 5357 a kuleana hoona aina helu 4296 ia Mahoe 3 ke kupunakane o Kawawahimoku, Hiku a me Joseph Kaanaana.

            Kuike ke dala, Na uku hana palapala i ka mea e lilo ai. No na mea i koe e ninau ia

JAMES M. MONSARRAT, Kahu

Mea e paa nei i ka moraki.

Honolulu, Feb, 20, 1894.                    2482-4

 

Hoolaha Hooko Moraki

            O KA mea nona ka inoa malalo iho, Ka Western & Hawaiian Investment Co., i kaupalenaia, he Hui, ke hoolaha aku nei, ke manao nei oia e hooko aku i ka moraki, no ka uhakiia o na olelo o ka moraki, oia hoi ka uku ole ia o ka aie i hoopaaia, ma kekahi moraki i haaeiia iaia e Gilbert Waller, i hanaia ma ka la 31 o Augate, 1888, i kopeia ma ka Buke 112 aoao 167-169, o ka aie i hoopaaia ma ua moraki ia, oia no he nota aie $12,000, e uku ia iloko o na makahiki ekolu mai ka la mai i hanaia ai ua moraki la. a e kuai kukala aku ana hoi oia ma ka rumi kudala o Jas F. Morgan ma Honolulu, ma ka POAKAHI, MABAKI 19, 1894, ma ka hora 12 awakea o ia la, i na waiwai a pau i hoopaaia ma ua moraki la.

            O ka waiwai i hoopaa ia ma ua moraki la ke waiho nei ma Kalihi, Oahu, e like penei:

1.         O keia mau aina a pau loa i hoakakaia ma ka palapala kuai a Joseph Pickford ia Gilbert Waller i oleloia, i hana ia ma ka la 10 o Aperila, 1871, a kope ia ma ka buke 33 aoao 22-28; he 289-1000 eka, a i hoakakaia hoi ma ke Sila Nui Helu3289;a me 7.51 eka i hoakaia na pelena iloko o ua palapala kuai la,

2.         O na aina a pau i hooliloia i ua Gilbert Waller la maka palapala kuai a W. L. Moehonua, i hanaia ma ka la 18 o Novemaba, 1876, a i kopeia ma ka buke 49 aoao 131 me 132; he 21 eka 8.10 ruda, a i hoakakaia ma ka paiapala sila nui helu 6846,

3.         O kela aina a pau i hooliloia i ua Gilbert Waller la ma ka palapala kuai a J. Mott Smith Kuhina Kalaiaina, i hanaia ma ka la 23 o Okatoba, 1877 a kopeia ma ka buke 52 aoao 340 me 341, he 9 2-10 eka, a he apana hoi o ka aina i hoakakaia ma ka palapala Sila Nui Helu 3546.

4.         O ka aina a pau i hooliloia i ua Gilbert Waller la ma ka palapala kuai a Ema Metcalf Beckley, i hanaia ma ka la 11 o Mei 1881, a kope ia ma ka buke 107 aoao 338 me 339, he 6 28-100 eka i hookaaia hoi ma ke kuleana helu 818.

5.         O na hale hoi, na pa, na mea hou, na enegini, na ipuhao, na pahu wai, na mekini o na no apau, a oia hoi na mea a pau e pili ana ai ka Hale Hana Bia o ua Gilbert Waller la i kukuluia ma ua aina la; a o na mea e ae paha a pau e pili ana me ua mau aina la ina paha ua hoohanaia me ua Hale Hana Bia la a ano e ae paha Dala Kuike.

            Na ka poe kuai mai e uku no na palapala.

            The Western & Hawaiian Investment Co., Kaupalenaia.

Ma o Kona Hope,

W. W. HALL              2482-4

 

Hoolaha Hooko o ka Moraki a me ke Kuai

I KULIKE ai me ka mana o ke kuai i hookomoia iloko o kekahi moraki mai a Kamoa mai a ia Mrs. S. S. Robertson, i kakauia ma Sepatemaba 21, 1891, kopeia ma ke keena kakau kope o ke Aupuni ma Oahu, Buke 131 aoao 311 me 12, a i hooliloia mai e la ia Meleana Keliikanakaole, ke hoolaha ia aku nei ka loke, ke makemake nei ka mea i lilo mai ai ka moraki e hooko aku, no ke kumu ka uhaki ia o ka aelike oia hoi ka hookaa ole ia o ke kumupaa a me ka ukupanee i ka wa e hookaa ai.  A ke hoolaha hou ia aku nei, mahope iho o ka pau ana o na hebedoma ekolu mai keia la aku, e kuai ia aku no ka waiwai i paa maloko o ua moraki la ma ke kudala akea, ma ka hale kudala o Jas. F. Morgan i ka POAKAHI la 26 o MARAKI, 1894, hora 12 awakea o ia la.

            No na mea i koe, e ninau ia

J. A. MAGOON,

Loio no Meleana Keliikanakaole, mea i lilo mai ai ka moraki,

Honolulu, Feb. 27, 1894.

            O ka waiwai i paa maloko o ua moraki la e kuai ia aku ana oia kela apana aiua e waiho la ma Kapalama-kai, i kuhikuhiia penei:

1 Loi a me Kula. E hoomaka ana ma ke kihi hik. o ka ap. 3 o ka kuleana helu 3144 no Ku a holo aku: Ak. 13.00 kom. 80.5 kap. e pili ana me L.C.A. 3144, ak. 69.00 kom 160 4 kap e pili ana me L.C.A 3144, ak. 27.30 hik 229 kap e pili ana me kekahi wahi o ke konohiki, hem. 48.30 hik  26 8 kap e pili ana me Apana C, hem 9.00 hik 12; 4 kap e pili ana me L.C.A. 8856, ak 77.15 hik 54 8 kap e pili ana me L. C. A. 8856, ak 42.00 hik 95.0 kap e pili ana me L. C. A. 8856, ak 64 30 hik 141 9 kap e pili ana me l.c.a 3856, hem 15.80 kom 66 kap e pili ana me ka auwai, hem 36 30 kom  96 4 kap e pili ana me ka auwai a mailaila aku ma kuauna a hiki i ka hoomaka ana.  Maloko o ia apana 1 3/6 eka, a oia ka aina i hooliloia ia Kamoa ma ka palapala kuai a na kahu malama waiwai e Mrs. Bernice Pauahi Bishop, i kakau ia ma Ianuari 1, 1887, kopeia ma ke keena Kakau Kope, Oahu, Buke 104 aoao 239-240.                2488-@

 

Hoolaha Lunahooponopono Waiwai

            O KA mea nona ka inoa malalo iho, na hoonoho ia mai oia i Lunahooponopono Waiwai no ka Waiwai o HANA HAELO KAPALI w. no Moanalua, Oahu, i make aku nei mamuli o ka olelo hooholo o ka Hon. Cooper, Lunakanawai Kaapuni o ka Aha Kaapuni Apana 1 i hoopuka ia ma ka la 19 o Ianuari, 1894.  Nolaila, ke kauoha aku nei oia i na mea a pau, ina he aie ko ka mea i make i kekahi e hoike mai i ka lakoubila aie me na hooia oiaio no ia aie iloko o na mahina eono mai keia la aku, ina hoike ole mai, e lilo ia mau aie i mea ole.  Ina ua aie kekahi i ka mea i make, e hookaa koke mai ke ole e hoopii ia.

D. KAPALI,

Lunahooponopono Waiwai

Honolulu, Mar. 10, 1894                     2484-4

 

Kuai a ka Ilamuku

            MAMULI o ka mana i loaa iaʻu malalo o kekahi Palapala Ohi Waiwai i hoopukaia e ka Aha Apana o Honolulu, ma ka la 10 o Feberuari, 1894, e kue ana ia Kamakau ka mea hoopiiia, no ka pomaikai o J. K. Kahookano, mea hoopii, no ka huina o $18.75 na hoomaluia e aʻu a e kuai aku ana hoi ma ke kudala mamua iho o "Ulakoheo" ma ka apana o Honolulu, Oahu, ma ka hora 12 awakea o ka Poakolu, la 21 o Maraki, 1894, i ka mea koho kiekie i na pono a pau, na kuleana a me na mahele a pau o Kamakau, ka mea hoopiiia maloko o kela.

            Waapa-lawaia me na lako peʻa, hoe (3) e waiho la makai o Ulakoheo, ke ole e uku e ia mai ka olelo hooholo i haiia ae la, ka ukupanee, na koina a me na lilo.

A. M. BROWN,

Hope Ilamuku.

Honolulu Feberuari 18, 1894              248@-4

 

PAPA! PAPA

AIA MA KAHI O

Lewers & Cooke

(LUI MA)      

Ma ke kahua hema o Alanui Papu me Moi.

E LOAA NO NA

PAPA NOUAIKI

O kela a me keia ano.

Na Pani Puka, na Puka Aniani, na Olepelep, na Pou, na Oʻa, na Papa Hele, Na Papu Ku, me na Papa Moe he nui loa

NV PILI HALE O NA ANO A PAU

a me na

WAI HOOHINUHINU NANI

o na ano a pau loa

Na Balaki o na Ano he Nui Wa

            Ke hai ia aku nei oukou e @ makamaka a pau, ua makaukau keia mau makamaka o oukou @ hoolawa aku ma na mea a pau e pili ana ma ka laua oihana no ka Uku Haahaa Loa, E like me ka mea e holo ana mawaena o Laua a me ka Mea Kuai.  Hele Mai e Wae no Oukou iho.

2896-q