Ka Nupepa Kuokoa, Volume XXXIII, Number 9, 3 March 1894 — Auwe ka Waikahe e Kahe ana, ka hua Hekili e Hiolo ana ka Makani e Kulakulai ana. [ARTICLE]

Auwe ka Waikahe e Kahe ana, ka hua Hekili e Hiolo ana ka Makani e Kulakulai ana.

MR. LUNAHOOPONOPONO; Aloha oe: E oluolu oe e hookomo iho ma kahi kaawale o kou kino i keia mau hunahuna mea hou ma Kau nei. Feb. 15.—Ma na hora poniponi o ke kakahiaka o ka la i hai ia ae la, ua ike la e kau paapu ana na ao hakumakuma e alai aku ana i ka upoho lani, a he hoike ana mai ia he ino nui a hiki mai. Ma ka hora 6 a oi a. m. ua hoomaka ia ka wehe ia ana o na pani o kulanihakoi a oia ka manawa i haule mai ai o na paka ua me ke koikoi loa no kekahi mau hora i panai pu ia iho e na hua hekili e hiolo makawalu mai ana. No ka waihe, oiai ka ua e ua ana ua hoohiha ia na alu a me na hapapa, a aia hoi ma na kahawai a mena awawa, ua hoopiha ia i na wai e kahe ana me ka ikaika loa. Ma Pahala ua pulumi aku ka wai i kekahi mau eka ko L. Chong, he pake mahi ko a ma ke koho wale ia ana o keia poino he 4 eka ko i lilo aku i luahi na ka wai. PAKELE KE OLA. Ma ia wahi no, oiai kekahi kanaka e hooponopono ana i kekahi fiaau mea hana maloko o ka pa pine pipi o H. A. Co., a oiai oia e nanea ana me kona manao ole ae e hiki mai ana he pilikia, aia hoi ua hoopuni ia ae la oia me ka hikiwawe loa e ka waikahe ikaika, a oia kana i puiwa ae ai me ka weliweli a oia kona manawa i huli ae ai a nana aku la i kona hale, hu mai la ke aloha no ka wahine a me na keiki, a oiai oia ma keia kulana pilikia hooholo iho la oia me kona ikaika e hooikaika oia e hele aku a pili i ka pa a pela oia i hana ai e like me ia, i kona hana ana ua hiki aku oia ma ka pa, iloko o na hakoko ikaika ana me ka wai, a maluna o ka pa oia i kolo ai a loaa iaia ka apahu o ka puka pa a ma ia apahu oia i puiiki ai a hiki i ka wa i akakuu mai ai ka ikaika o ka wai a pela i pakele ai. I ka hua hekili iloko o na makahiki loihi i hala aku nei, aole i ike ia ia mea he hua hekili akahi wale no ma keia la. Ua lu ia mai keia mea kupanaha mai ka lewa mai a maluna o ka aina me na hale ua like ka nakeke o keia mau hua me he eke iliili la i lu ia maluna o na hale ma Moaula e ku ana me ke kilakila kekahi mau hale laau.

O kekahi hale laau hou i uhi ia me ke pili piuia a paa pono me ka malu loa i ka ua, aka, i ka wa a ka hua hekili e lu ana, ua hiolo mai kela mau hua mai waena mai o na pili piula a mokaki hulali ana maluna o ka moena, a he wa kupilikii ia o ka ohana, aka, o ka haku mea hale he ohohia hauoli mau no kona, no ka mea, i ka wa e mokaki ana o keia mau hua keokeo maluna o ka moena ua eleu ae oia e ohi mai a hookomo i keia mau hua iloko o ke kiaha aniani me kona manao i mea hoikeike, aka, i ka wa e waiho ana o keia mau hua iloko o ke kiaha oiai no oia e ohi ana ua hehee iho la a lilo i wai a i ka inu ia ana o keia wai ua like ka huihui me ka hau, nui ke kupanaha o ka hana a ka Haku. KA MAKANI IKAIKA. He ikaika ka makani e pa ana i keia wa a ka ua e loku ana e kulai ana i na laau, ma ka pa o ka hale noho o W. E. Fula, ua kulai ia e ka makani a hina 4 kumulaau nunui a he nui na laau o kekahi mau pa e ae i kulai ia e ka makani, e kulai ana a e wawahi ana a weluwelu liilii na pulumi lawe ko o ka hui o Pahala a me kekhi mau poino e ae, aka, aole nae he ola uhane i poino. Ma Hilea ua komo ia e ka wai ka hale inu kope o Aki pake a lawe aku i kekahi mau manukaka a me kekahi mau mea liiiii e ae. G. K. Kupa. Makaka, Kau, Feb. 17, 1894.