Ka Nupepa Kuokoa, Volume XXXIII, Number 8, 24 February 1894 — Ka ili Ana o ka Manuwa Amerika "Kearsarge." [ARTICLE]

Ka ili Ana o ka Manuwa Amerika "Kearsarge."

Ua ili mai nei ma na kuaau o Roncador i ka la 3 Feberuari nei, ka mokukaua Amerika laau kahiko Kearsarge, oiai oia ma ke ala moana e hele ana mai Port-au-Prince Hayti e hiki ai i Bluefields, Nicaragua. O keia manuwa, he moku kaulana loa ia i ka wa kaua mawaena o ka Akau a me ka Hema o Amerika Huipuia, no ka mea na keia manuwa i kipoka a pihoio ai ka mokuakaua kipi Alabama mawaho mai o na kapakahakai o Farani, a ua hoola loihi ia mai oia i mea hoomanao. O keia Roncador, he wahi moku hapapapa haahaa loa. I ka ili ana, ua paa loa ka moku aole hiki e hemo hou. Eia nae, ua

pau no na mea a pau i ka pae iluna o ua wahi moku haahaa nei, me ke ola ole i poino. Ua hoouna ia o Lutanela Brainard maluna o ka waapa me kekahi poe luina e ahai aku i ka lono o keia poino i New Providence a mailaila aku i Colon, a pela iho la i lohe ia ai e ke ao nei.

Ke olelo ia nei, he kanakolu paha makahiki i hala hope aku, ua ili no ka mokupea Golden Rule ma keia kuaau hookahi me 500 kino uhane ola maluna o kona oneki, a o Mr. Curtis J. Lyons o Honolulu nei, oia kekahi o na olulo o ia ulia poino.

Iloko iho nei o ka wa ino o Hilo, ua kupai na eke kopaa he 33,000 e waiho ana ma Papaikou a me 15,000 mau eke kopaa e waiho ana ma Pepeekeo, mamuli o ka inoino o na awa a loaa ole aku i na waapa ke kii aku. Aka ina i hoi mai la ka malie e emo miminoia iho ana a ku olohelohe.