Ka Nupepa Kuokoa, Volume XXXIII, Number 6, 10 February 1894 — Page 3

Ka Nupepa Kuokoa

KE KILOHANA POOKELA NO KA LAHUI HAWAII.

 

 K @  HUI ALAHAU ME AINA O OAHU

MANAWA HOLO.

  Mai a Mahope aku o Iune 1, 1893.

NA KAA AHI

NO HONOULIULI.

                                                    B               B             A       D

                                          ....... A.M.         P.M.         P.M.    P.M.

HAALELE IA  HONOLULU...8:45         1:45         4:35     5:10

HAALELE IA MANANA........9:30         2:30         5:10     5:16

EIKI 1  HONOULIULI.............9:57         2:57         5:35     6:22

 

NO HONOLULU.

                                                      C               B          B          A

                                                    A.M.         A.M.      P.M.    P.M.   

HAALELE IA HONOULIULI...6:21                   10:43       3:43     5:42

HAALELE IA MANANA..........6:55                     1:15       4:15     6:10

EIKI 1 HONOLULU..................7:30                    11:55       4:55     6:45

            No na Poaono wale no.

            No keia ame keia la.

            Koe na la Sabati.

            Koe na Poaono.

 

NU HOU HAWAII.

  Ua hoi mai o Hon C R Bishop i ka Poakahi aku nei maluna o ka mokuahi "China" mai Kapalakiko mai.

 

  Ua palekana ke Aupuni Kuikawa ko Hawaii Pae Aina, aole e hoolele ia mai ana na koa o Amerika Huipuia iuka nei o ka lepo o Hawaii e hoihoi i ke aupuni alii.

 

  O ka Poakahi e hiki mai ana, Feb 12), oia ka la punahele a na @ee alii a pau o Hawaii nei malalo o ke au o Kalakaua.  E hoala mai ana anei lakou 1 keia kupapau make?

 

  E haalele aku ana ka mokuahi "Monowai"  ia Kapalakiko i ka Poaha iho nei, a ina pela e hoea mai ana oia i keia Poaha ae me na mea hou o na aina mamao a puni ke ao nei.

 

  Ua make ma Waikane, Oahu nei, i kekahi la aku nei o keia hebedoma, he elemakule nona ka inoa o Mahoe.  Ua loaa aku keia elemakule ua make he mau la mamua aku, oiai ua noho hookahi oia a make me ka ike ole ia.

 

  Ua hiki mai nei maanei mai na Panalaau mai o ka Hema ma ka Alameda o ka Poaha i hala iho la, ka Puukani Hawaii kaulana nona ka inoa i paanaau i ko makou poe heluhelu o Mere Kuke, i ukali ia e kana kane o Mr. Chas. Turner, a eia laua ke noho pu nei me Mr. C.M. Cooke.

 

    O ka nui o na dala maoli e waiho ana ma ka waihona o ka lehulehu ma ka la 7 o Feberuari, he $336,318.19, i mahelehele ia ma na waihona okoa penei:  Ma ka Hale Banako Hale Leta, he $30,507.63; ma ko na Papa Alanui, $42,488.01; ma ko ka Papa Hoonaauao, $9,145.48; a ma ka waihona dala ponoi he $254,177.07.

 

  Mamuli o kekahi mau lono nupepa i loaa mai i Honolulu nei, aia ke hoala ia la ma Vanekouwa, Canada, kekahi pualikoa a e holo mai ana i Hawaii nei e kokua ai 1 ka hoihoi ae ia Liliu i ke aupuni, a ua komo pu ka inoa o Mr. T.H. Davies iloko o ia paipai ana.  Ua kauohaia o Mr. Davies e ka Loio Kuhina e hele ae imua ona, a ua ninaninau ia no keia mau lohe.  Ua hoole loa oia, aole i komo kona inoa iloko o ka poe ohumu ino, kumakaia a pela aku.

 

  O ka la 22 ae nei o keia malama e hiki mai ana, he la hoomoamoa mau ia na ka lahui o Amerika Hui puia e hoomanao ai, no ka mea o ka la hanau ia o Keoki Wasinetona, "ka mua iloko o ke kaua, ka mua iloko o ka maluhia a me ka milimili mua loa iloko o na puuwai o kona lahui, a o ka mea hoi i kapaia ka Makua o kona aina."  He mea maopopo, oiai e hekau ana na mokukaua o ke aupuni ana i kukulu ai ma ke awa o Kou, e kipu alohaia ana kona la hanau ma ke awakea o ia la, eia nae ua hala kahiko oia i ka make, aka ke mau nei no nae ka makamaka o kona hoomanao ia ana e kona lahui.

 

  Mamuli o ka hookaa waleia ana ae nei o ka oihana Peresidena o ke auni kuikawa o ko Hawaii Pae Aina mai ka paa pu ana i ka oihana o ko na aina e, nolaila, ua hakahaka ka oihana hope.  Aka, o kekahi no nae ia o na oihana koikoi iloko o ke aupuni o keia wa, oiai e paaua ana kakou no ke kumuhana maikai.  Ke kau aku nei na maka o ka lehulehu noonoo maikai o keia anaina maluna o ko ka mana hooko kono aku ia Mr. F.M. Hatch, kekahi o ko kakou mau alakai wiwo ole iloko o na la opio o ka hoao ia ana o ke aupuni, a ke lana nei ko makou manao e ae mai ana no oia i ka wa e noi ia aku ai.  Aole mea hoohalahala i kona inoa ke ae oia, no ka mea ua kupono oia ma na ano a pau no ka hana nui.

 

  Pii ke kai o ka Puuku o "Ka Makaainana" i ka Poakahi iho nei, no ko ka lunahooponopono hoopuka koke ana i ka pepa me ke kali ole a ala mai kona hiamoe. - Leta haule.

 

  Ua huro ae ka nupepa Washingtona Star o Ianuari 17 aku nei i hala, no ka piha ana o ka makahiki hookahi o ke ku ana o ke Aupuni Kuikawa o Hawaii mai ke kipaku ia ana aku o ke aupuni alii.

 

  Ua ku mai ka mokuahi holo loa "China" e kakele nei ma ka moana Pakipika i ka hora 8 a me hapa o ka Poakahi aku nei i hala, iloko o na la 5 a me 16 wale no mau hora mai Kapalakiko mai, ma kona ala e holo loa ana no Iapana a me Honokaona.  A ia ahiahi iho no, ua kikihi loa aku oia no ia mau awa.

 

  Ua hiki kino mai o Ioba Kahili i o makou nei i ka auina la Poalua iho nei, me na maewaewa e kiheahea ana, a ua hoike mai ma na olelo lehulehu wale, ua kui ia oia e Ailuene Buki, ke kahunapule o ka hoomana Poahiku.  O na kumu, o laua no a elua kai maopopo, a o Pamawaho ka hoike,  No na mea i koe, na Kahili ia e wehewehe pono aku a ku i ke kanawai.

 

  He mea kupanaha maoli keia i ka ike ana, o Keoki Wasinetona ka Peresidena mua loa o Amerika Huipuia, aohe ana keiki; a o Sanford B Dole, ka Peresidena mua loa o Hawaii, aohe ana keiki.  Aohe anei keia he paa kupanaha loa no keia mau kanaka.  O ka mua, ma ka loea kaua kona, a o ka lua ma ka loea kilo aupuni.

 

  O kela haole elemakule kakau nupepa o ka Nu Ioka "Herald" nona ka inoa Kale Noadofa, ka enemi maka welawela o ke Aupuni Kuikawa ma kana kumuhana, i holo mai ai ianei, a i hoolilo ia hoi e Ailuene Buki a me na anee alii i akua e hoomana ai, ua haalele i ke kokua ana e hoihoi i ka moiwahine i kipaku ia, a ua hoike aku oia i kona manao i ke akea, e hookuu aku ia Hawaii e hookele nona iho ma keia mua a mai komo hou aku o Amerika Huipuia e hokai.  Hoi paha auanei ke akua o Ailuene Buki e ai i ke kahu.

 

HE ALII HAWAII OMO KOKO!

E Oki ia na Poo!

E Kahe Hilihili na Koko o na Alakai o Hawaii!

A E HAO WALE IA NA WAIWAI!

Ka Hana a na Pegana!

 

  I ko ka ala kuhina wa e hoi mai ae, e hoike mai lakou i ka hopena o ko lakou hui kuka ana me ka moiwahine, alaila hui na halawai e noonoo a hooholo like.  Maia koho ana e waiho ia ai ka hooko ana o na mea i apono ia maloko o na lima o na kuhina, hoopanee ka halawai a akoakoa hou i ka wa e kahea hou ia aku ai e ka aha kuhina, a o lakou na hoa kuka e haawi lakou ia lakou kino pakahi iho iloko o na lima o ka mana hooko no na kauoha a no na kuka i makemakeia e lakou.

  Ua hoomakaukauia keia mau papakuhikuhi mamua aw nei no ka manawa a ke aupuni o Amerika Huipuia, ma o kona mau luna aupuni la, e hiki ai e kono aku i ke Aupuni Kuikawa e haawi pio mai me ke ano ole, a lawelaweia ka hoihoi ana i ko ka moiwahine aupuni a like me ko ka manawa ma ka la 17 o Ianuari, 1893, malia paha ma ke noi a i ole ma ka hoomaikeike aku no ka hooluolu mai a ahonui ma ka inoa o ka poe i komo kino maoli iloko o ka hookahuli ana i ke aupuni o ka moiwahine ma ia la.

  I ka wa e hooko io ia ai keia hoihoi aupuni alii, a i mea hoi e hooholo lea ia ai na hoononono hana ana, a e haawi ia ai na hooia ana e malama ia ana ke kanawai a me ka maluhia, a ua kukulu hou ia ke aupuni kumukanawai o ke Alii ka Moiwahine Liliuokalani maluna o ke kahua oiaio, alaila, e lawelawe ia keia mau hoonohonoho hana ana, oiai hoi ma la manawa hookahi e haawi ana na hoolohe ana i na noi e hoolulu ai a ke Aupuni o Amerika Huipuia.

  Ina aole mea e hoohihia ai i na olelo hoonaauao mai ke aupuni makua mai, alaila e noi aku ke aupuni o ka Moiwahine i ka Alihikaua nui o na puali koa o Amerika Huipuia, e lawe mai i kona mau puali koa a e hoonoho ia ma na wahi i hookaawale ia no lakou a hiki i ka wa e kukulu paa ia ai a maopopo ua ku maluna  o ke kulana maikai e malama ai i ke kanawai a me ka maluhia; a lua paha aole e hoohihia i ka ke Kuhina mau kauona mai ke aupuni mai, alaila e noi aku ke aupuni o ka Moiwahine iaia nana, e kauoha aku i kahi a me ka manawa e haapio mai ai ke Aupuni Kuikawa a me kona mau puali koa iaia, a o na puali koa o ke Kuhina e hiki ae ma ka hora 10 kakahiaka - la - o - M. H. 1893, ma ke Kuea Halealii, kahi o ke Aupuni Kuikawa e haawi mai ai malalo o kona malu i ke aupuni a me kona mau hale, na hae waihona, a hookuu mai iloko o kona lima i na pu a me na lako kaua i haawi ia aku ai ia lakou ma ka la 17 o Ianuari, 1893 e ke aupuni o ka Moiwahine a me na lako kaua e ae a pau i loaa ia lakou mahope mai nei, a e haawi pio aku he aliikoa a me na koa ia lakou malalo ona ma ke ano he mau pio a mai iaia aku e haawi ia ai i ke aupuni o ka Moiwahine, a e hookolokolo ia na pio e kekahi aha i koho la no ia hana; a e haawi pu ia mai na pu a me na lako kaua a me na pio, a pela aku, e ke Aupuni o Amerika Huipuia i ke aupuni o ka Moiwahine.  Penei na hoonohonoho ana.

  1.  -  Kuahaua no ka Moiwahine no kona hoi hou ana e noho mana ma ke aupuni.

  2.  -  Koho ana i Alihikaua nui a me na ukali.

  3.  -  Kuahaua ana i ke kanawai koa a me ke kapae ia o ka pono o ka palapala kuu kino.

  4.  -  Kahea ana i na kanaka manao lokahi a pau mahope o ke aupuni alii o kakau i ko lakou mau inoa ni ka hookauwa ana na ke aupuni ma ke keena; ka hoopaa ana i mau koa pualu.

  5.  - Ka haawi pio ana mai o na pu a me na lako kaua iloko o na lima o na kanaka malu a me ka papa ana i ke kuai aku o na pu a me ka hoohikihiki ana o na pu a me na lako kaua malalo o ke kuhikuhi ana a ka alihikaua nui.

  6.  -  Ka lawe ana mai i na hale aupuni a pau a me na wahi e ae i kupono i ko ka Moiwahine mau puali koa a hoonoho aku i mau kiai maloko olaila.

  7.  -  Kuahaua e papa ana i ka puka ana aku o na moku holo pili aina a me na moku e ae i ka holo ana aku i na mokupuni e ae.

  8.  -  Ke koho hou ana i na luna aupuni a me ka hoopiha ana i na hakahaka.

  9.  -  Ka hopu ana i na poe a pau i komo a i pili i ka hookahuli aupuni.

10.  -  Ka paa mai a me ka malama ana i na paahao a pau i hopu ia malalo o ka mana ma na pauku maluna ae a me ka poe i haawi i mai e na puali koa o Amerika Huipuia.

11.  -  Ka apo ana mai i na pu a pau a me na lako kaua a me na waiwai e ae o ke aupuni i haawi pio ia i na puali koa o ke aupuni o Amerika Huipuia e ke Aupuni Kuikawa.

12.  -  Ka hoouna ana i na moku i na mokupuni e ae e kuahaua aku i ka hoihoi ia ana o ka Moiwahine a me ka hanai na hoololiloli a me ka hopuhopu ana."

  Ua hooikaika au e loaa oia (o C B Wilson) a e kipa mai ia auina la hookahi, aka aole oia i loaa.  I ke kakahiaka mahope iho, ua loaa aku oia ia Mr. Mills i ka hora 10, ka mea a'u i kauoha ae e huli aku iaia, a ua olelo mai oia, e hele koke mai ana o Mr. Wilson e ike ia'u a ua hele mai no ke keena kuhina.  Aole nae oia i hiki mai i ka hapalua hora.  O ko'u manao, ua kipa e aku oia e kukakuka me kekahi poe mamua o kona hele ana mai i ke keena nei.  I kona hiki ana mai, ua malama ia ke kamakamailio, a oia iho keia:

  Ninau. - Maloko o ka pepa au i waiho iho ai me a'u inehinei, ua olelo ia he poe kekahi e kono ia aku ana i kou aha kuka.  Aole oe i waiho mai i papa inoa?

  Pane.  -  Eia no ka papa inoa iloko o kuu pakeke.

  N.  -  Ua manao anei oe e waiho mai me a'u i kela la aku nei?

  P.  -  Aole.

  N. -  He hoohalahala anei kou i ko'u heluhelu ana?

  P.  -  Aole.

  (Heluhelu ia) - Keikialii David, Keikialii Cupid, S. Parker, C Iaukea, J H Boyd.

  N.  -  Owai o J H Boyd?

  P.  -  He Kakauolelo iloko o ke Keena Kalaiaina.

  (Heluhelu aku la) - J Richardson, A Fernandez.

  N.  -  O Mr. Richardson ane i Maui?

  P.  -  Ae.  Ua wae ia o Richardson a me Fernandez.  E kahea ia aku ana laua e noho mai (aia no ka hoailona V. e pili ana.)

  N.  -  Alaila, mawaena o ka poe e kahea ia aku ana e hiki kino mai ma na halawai o Richardson a me Fernandez kekahi?

  P.  -  Ae.

  (Heluhelu aku la) - J F Colburn, C White, Hon Alex. Robertson.

  N.  -  Heaha ke ano o ka hoailona poepoe e pili mai la i ka inoa?

Aole i pau.

 

OLELO PANE A PERESIDENA DOLE.

He Hoole Keonimana ana i ka Peresidena

Cleveland Noi.

 

[Hoomauia]

  Aole i loaa iki mai i keia aupuni ka lohe no ka noho ana o kekahi aha e like me ia, a aole no hoi he manawa i loaa mai e hiki ai ke waiho aku i na olelo hoike no kona mau pono.  Ina o na nienlele aua iho nei a Mr. Blount kekahi hapa o na lawelawe ana a ia aha, aole i ike keia aupuni ia mea a aole pu no hoi i hai ia mai keia aupuni ia mea; he oiaio, e like me ka'u i hai ae nei maluna, aole makou i ike, a hiki wale i ka wa i hoolahaia ai ka ke Kuhina Gresham palapala i ka Peresidena Cleveland, i kela mau pule i hala aku nei, ua loaa i ka mana hooko o Amerika he kahua kalai  aupuni hoonioni kue mai ka noonoo ia ana.

  A ina no i maopopo ia makou ua haawiia ka mana ia Mr. Blount i Komisina e lawe ai i na hoike ma ka ninau e hoihoi hou ia ai ka moi wahine i pau, alaila, o ke ano o kana lawelawe ana ma kana aha ninaninau, e olelo aku au, aole i kupono no na imi ana o ia ano a no na imi ana no paha a pau e pili ana i ke kulana o kekahi kino kanaka e hookolokolo ia ai.  E like me ka lohe i loaa mai ia'u mai kahi e hiki ai ke hilinai ia, ua wae oia i kana mau hoike a ua ninaninau ia lakou ma kahi malu e haawi holookoa ana i na ninau alakai me ka haawi ole i kuleana e hiki ae ke ninau hoohuahualauia, a i kekahi manawa me ka ae ole no e hoakaka mai na hoike e loke me ka lakou mea i makemake ai no ka lakou mea i makemake ai no ka lakou mau olelo hoike i unuhila mai e ia mailoko mai o lakou.  He mea makehewa wale no paha ia'u ke olelo ae malalo o ia ano ninaninau, e lilo ana kekahi poe hoike i mea nawaliwali noa iloko o ka lima o kekahi loio akamai, a e kauo ia aku ai no hoi e olelo i kekahi mau mea i lilo ai i hapa - oiaio a ke ku hookahi iho ia olelo ike lilo i kumu e alakai hewa ai a e ano hoopunipuni ai no paha i ka nana aku.  He hiki anei ke manao aku, o na imi ana i hana ia e like me keia ano e loaa ana na olelo hoike ewaewa ole, piha a oiaio no ka hihia e ku nei?

  He mea oiaio paha aole e hoolilo ia ana ka hopena o kekahi aupuni i noho makamaka mai, oia hoi ina kakou e ae ana he mana io no i loaa e hookolokolo kuikawa ai, e hoopau wale ia mamuli ninaninau aoao hookahi wale no me ke ano malu a i hana pu ia hoi me ka ike ole o ua aupuni la a me ka manawa ole i haawila iaia e hoolohe ai, a i ole o ike ai paha owai le na hoike.

  Ua hele mai o Mr. Blount ia nei me ke ano malihini a ua hoomaka koke no e lawelawe i kana hana.  Ua hoolilo oia 1 kona manawa i ka hana o ka hoakoakoa ana i na ike e haawiia aku ana, ma ka ninaninau ana i na ike a me ka hoakoakoa pu ana i na papa hoike waiwai a me ka nohona o keia aina a me na moolelo palapala e ae, a ua hana oia me ka hooikaika a me ka mikiala, me ka haawi ana i kona manawa holookoa no ka hooko ana ia apana hana.  He mau malama uuku wale no kona i noho iho ai, a iloko no o ia manawa ua paa mau kona manawa me keia hana a ua uuku ka manawa me keia hana a ua uuku ka manawa i loaa iaia e hiki ai ke ike i ke kulana maoli o na hana, a e loaa pono ai la mawaho mai ma o ka launa laula ana me na kanaka o ka aina a me na launa kamaaina pilikino ana me na ohana kamaka lehulehu me na oihana hoonaauao a oihana mikiala i hoala ia.  Ua ike wale no oia i ka aina mai kona hale noho aku e ku ana ma ke kikowaena o Honolulu, mai na makamaka aku o ka hapanui o na hoike ana i ninaninau ai.

  Nolaila, malalo o keia mau helehelena he mea maopopo anei e hiki ana i ke kanaka ina no i oi loa kona ikaika ma ka imi ana ke hana i mau olelo hoike e hiki ai ke hilinai pololei ia i kahua no kekahi olelo hooholo ma ka ninau pili i ke kulana o kekahi aupuni?  Nolaila, mamuli o ka nana ana i na kumu oiaio a pau e pili ana i ka ninau no ka mana o ka Peresidena e komo mai ai e lawelawe kue mai, a i pili pu hoi ma keia hana na lala o ka Mana Hooko, ka poe hoi i lawelawe hana maoli a lilo i poe hoike i ikemaka, no ia kumu, ua hiki ia'u ke hooiaio aku i kou hanohano aole mamuli o kekahi hana a keia aupuni ma ka la 17 o Ianuari i hala aku la, aole hoi mahope mai nei i loaa ai i ka Peresidena o Amerika Huipuia he mana e komo mai ai e lawelawe kue iloko o na hana kuloko o keia aina, ina no ma na hana i ikeia a hoopukaia paha e keia aupuni me ia ka manao.

  Ua hoike ae oe ma kau palapala, "mahope iho o na nana hoomananui ia ana o na hoike a Mr. Blount ua lawa i ka manao o ka Peresidena, o na hana i lawelawe ia e kue ana i ka Moiwahine, ina no aole i paipai ia, aka nae, ua kokua ia a kakooia ua hana la e ka Luna Nui o keia aupuni e noho ana ma Honolulu; a ua haawi mua oia i kana ae hoopaa e kokua i kona mau enemi ma na hana e hookahuli ai i ke Aupuni Hawaii, ae kukulu hou i aupuni hou mamuli o ka ikaika ma kona hakahaka, a ua hooko ola i kana olelo hoopaa ma o ke kauoha ana e hooleleia kekahi mahele o na koa mailuna mai o ka Bosetona ma ka la 16 o Ianuari, 1893, a ma o ka ae a ike ana aku i ke Aupuni Kuikawa ma kekahi ia ana ae, oiai no nae he nawaliwali loa ua aupuni ia me ka hiki ole ke malama iaia iho, a oiai pu hoi ke malama iaia iho, a oiai pu hoi ke Aupuni Kumukanawai e hiki loa ana ke kakoo me ka lanakila i kona mau mana ke kue ia mai e kekahi mana ikaika mawaho ae o ko Amerika Huipuia mana kaua i hoolele mua ia."

  Me ke komo ole aku e hoopaapaa keia mau kumu, eia kau pane, ua hiki ole ia'u ke hoomaopopo i ka pololei o ka Mr. Blount hoike, i loaa ai i ka Peresidena na kahua o ka olelo hooholo, oiai, aohe manawa i loaa ai ia'u e makaikai ai i kana hoike.  Aka, ke makemake nei au e hoole pololei aku me ka leo ikaika i ka oiaio o na kumu pakahi a me na kumu no a pau i hoike ia iloko o ka olelo hoakaka maluna ae la; aka nae , oiai hoi ua loaa iho la i ka Peresidena ka manao paa iloko o kona naau no keia mea, e kamailio aku ana au mai kana kahua paio mai.

  Ma ke ano pokole eia maoli ko'u kahua:  Ina na na koa Amerika i kokua kanawai ole ka poe hookahuli aupuni ma ke kukulu ana i ke aupuni Kuikawa, alaila, aole maluna o keia aupuni ke koikoi o ka lakou hana hewa ana.

  He hana ponoi maoli ia e pili ana i ka hoopai aku no na hana kue mawaena o ke aupuni o Amerika Huipuia a me kona mau luna aupuni.

  Ke olelo nei au, aole loa he mau kumu alakai mua ma na kanawai mawaena o na Aupuni no kela kahua manao mamuli o ia mea i hanaia e na koa Amerika, alaila, ua ili aku la maluna o Amerika Iluipuia ka mana maluna o na hana kuloko o keia aupuni.

 

1894

HE - MAKANA - HOU !

HE WATI KOLUMEBIA !!

 

E makana ia i ka mea e hoouna mai ana i Umi Dala ($10) no ka Nupepa KUOKOA o ka M.H. 1894.

E heluhelu i ka hoolaha hou ma ka Pepa Manawalea.

E ninau i ka

HAWAIIAN GAZETTE CO.,  HONOLULU.

 

  I ka wa e nakulu ai oloko o ka opu me ka eha, a hele moku ka lepo, alaila, e hoao i ka CHAMERLAIN'S COLIC, CHOLERA a me DIAI ROEA REMEDY laau lapaau a e oi aku ana kou mahalo ke ike oe i kona hopena.  He oluolu, palekana a puhili a e.  He oluolu, palekana a puhili ole,  He 25 a me 50 keneta o ka omole, a e kuai ia no ma na halekuai lapaau a pau.  BENSON SMITH & Co., na Agena ma ko Hawaii Pae Aina.                                   tf.

 

  "O ka oi ma ke ao holookoa."  Oia ka W.D. WOODRING o BORDLY KENETUKE, e hookaulana nei no ka Chamberlain's Cough Remedy (Laau Kunu).  Ke kamailio nei oia ma kona ike ponoi iho i ka inu ana, oiai o kona a me ko kona ohana ola ana mai nei no la mai ka loaa ana i ke kunu koikoi loa a me ke anu, a ua hooholo oia o keia laau lapaau ka oi ma ka honua nei.  E kuai ia no ma na Halekuai Laau Lapaau a pau.  O BENSON, SMITH & Co., na Agena ma ko Hawaii Pae Aina.                                                                                                        tf.

 

Hoolaha Hou.

 

 ILOKO o ka Aha Kaapuni, Apana Hookolokolo Ekahi o ko Hawaii Paeaina.  Ma ka hana o ka waiwai o D.H. NAHINU, o Hookena, Kona Hema, Hawaii, i make kauoha ole.

  Ma ka waiho ia ana mai o ka palapala noi a John F. Hackfeld kekahi o na lala o ka Hui Kalepa o H. Hackfeld ma, a ua aie ka mea i make i ua hui la, e hoike ana ua make kauoha ole o D.H. Nahinu i ka la - o Augate, 1893, a e nonoi ana e hookohu ia kekahi mea kupono i lunahooponopono no ia waiwai, nolaila.

  Ke kauoha ia nei o ka POAKAHI, MARAKI 12, 1894, i ka hora 10 o kakahiaka, ma ka rumi hookolokolo o keia Aha, ma Honolulu, oia kahi a me ka manawa e hoolohe ia ai o ua noi la, a o ka poe a pau i kuleana malaila, e hele mai lakou imua o kela Aha, a e hoike mai no keaha la e ae ole ia ai ke noi i hoikeia ae la maluna.

  Honolulu, Feberuari 8, 1891.  No ka Aha,

HENRY SMITH,

Kakauolelo.                                            2480-3t

 

  AHA HOOKOLOKOLO KAAPUNI, APANA Ekahi o ko Hawaii Pae Aina.  Ma ka hooponopono Waiwai.  Ma ka hana o ka waiwai o C. MANAOLE o Honolulu, Oahu, i make.

  O kekahi palapala i manao ia oia ka palapala kauoha hope loa a C. Manaole i make, ua waiho ia mai ma ka la 23 o Ianuari, A.D. 1894 i ua Aha Hooponopono Waiwai la, e Malaea Kealia Manaole, me kekahi palapala noi e hoopuka ia ka palapala lunahooponopono waiwai ia J.A. Magoon.

  Ke kauoha ia nei o ka POALIMA, la 9 o Maraki, A.D. 1894, ma ka hora 10 A.M. o ia la, ma ke Keena Hookolokolo o keia Aha, ma ka Hale Hookolokolo ma Honolulu, oia kahi a me ka manawa i koho ia no ka hooiaio ana i ua palapala kauoha la, a malaila a ma ia manawa e hele mai ai na poe a pau i kuleana e kue i ua palapala kauoha la, a me ka hoopuka ia ana o ka palapala lunahooponopono waiwai.

  Kakauia ma Honolulu, K.H.P.A., Ian, 23, 1894.  Na ka Aha:

GEO. LUCAS,

2478-3                                                               Kakauolelo.

 

  AHA HOOKOLOKOLO KAAPUNI, APANA Ekahi o ko Hawaii Paeaina, - Ma ka hana Hooponopono Waiwai.  Ma ka hana o ka waiwai o W.P. KAHALE, o Wailuku, Maui, i make.

  Ma ka heluhelu a me ka waiho ia ana mai o ka palapala noi a me ka papa hoike helu a William O. Smith, Lunahooko Kauoha o ka palapala kauoha a W.P. Kahale o Wailuku, Maui, i make, e noi ana e apono ia na hoolilo he $1,584.56, a e hoike ana o na mea i loaa iaia he $1,585,07, e nana a e apono ia keia mau mea, a e kauoha ia e mahele i na waiwai a pau e koe nei iloko o kona mau lima, a e hookuu ia oia a me kona mau hope mai ka noho lunahooko kauoha ana no ia waiwai.

  Ke kauoha ia nei o ka POALIMA, LA 9 o MARAKI, A.D. 1894, ma ka hora 10 kakahiaka, ma ke keena ma ka Hale Hookolokolo ma Honolulu, oia kahi a me ka manawa i koho ia no ka hoolohe ana i ua noi la a me na papa hoike helu i olelo ia, a o ka poe a pau i pili malaila, e hele mai a e hoike i ke kumu, ina he kumu kekahi e ae ole ia ai ua noi la, a malaila e hoike mai ai na hoike i na mea i kuleana iloko o ka waiwai i olelo ia.

  Hanaia ma Honolulu, K.H.P.A. i keia la 1 o Feberuari, A.D. 1894.  Na ka Aha:

GEO. LUCAS,

2479-3t                                                                  Kakauolelo.

 

Hoolaha a ka Lunahooponopono Waiwai.

  Oiai, ua hookohu pono ia mai ka mea nona ka inoa malalo iho i Lunahooponopono Waiwai no ka waiwai o Edward Kaaloa, o Koloa, Kauai, i make, nolaila, ke hoolaha ia aku nei ka poe a pau i aie mai i ka waiwai o ka mea i make, a hookaa koke mai , a o ka poe he mau koina ka lakou i ka mea i make, e waiho koke mai me na hooia kupono i ka mea nona ka inoa malalo iho no ka hooponopono ana maloko mai o eono malama mai keia la aku, a i ole ia e hoole mau loa ia aku no.

F. K. FARLEY,

  Lunahooponopono Waiwai o Edward Kaaloa i make.                                                 2480-3t

 

 

Hoomaka Kula Kamehameha.

E HOOMAKA ANA KE KULA KAMEHAMEHA

- MA KA -

POAKAHI, FEBERUARI 12, 1894

  O na noi no ke komo mai iloko o ke kula, e hoouna koke mai, me ka hoike pu i ka nui o na makahiki a me ke kulana o ka mea noi, i ke                      KUMULUNA.

2479-2

 

Hoolaha Hooko o ka Moraki a

me ke Kuai.

  KE HOOLAHAIA aku nei ka lohe i na mea a pau, mamuli o ka mana o ke kuai i hookomo ia iloko o kekahi moraki i hana ia i ka la 1 o Okatoba, A.D. 1887, e HENRY WILLIAMS o Honolulu, Mokupuni o Oahu, ko Hawaii Pae Aina, ia Mary S. Parker, WC Parke a me W O Smith, na Kahu o ka  waiwai o W C Parke a me W O Smith, na Kahu o ka waiwai o W C Lunalilo, hoopaa ia iloko o ke Keena Kakau Kope o ke Aupuni ma Honolulu, Buke 106 a ma na aoao lakou na inoa malalo iho na Kahu o ua waiwai la e hooko aku i ua moraki la no ka uhaki ia o ka aelike, oia ka hookaa ole ia o ke kumupaa a me ka ukupanee.

  Ke hoolaha hou ia aku nei ka lohe, mahope aku o ka pau ana o na hebedoma ekolu mai ka la aku o keia hoolaha ana, alaila e hoolaha ia aku no ka waiwai i paa maloko o ua moraki la no ke kuai ma ke kudala akea ma ka hale kudala o Jas. F. Morgan, ma Honolulu, ma ke POAONO, Feberuari 10, A.D. 1894, hora 12 awakea.

  Kulike ke dala.  Ka uku hana palapala i ka mea e lilo ai.

  No na mea i koe, e loaa no ia W O Smith, ka Loio no na poe e paa nei i ka moraki.  Kakauia ma Honolulu, Ianuari 12, 1894.

MARY S PARKER.

  WILLIAM O SMITH.

          HENRY WATERHOUSE.

     Na Kahu o ka waiwai o W C Lunalilo.

  O ka waiwai i paa maloko o ua moraki la e kuai ia aku ana, oia kela mau apana aina lehulehu i kuhikuhi ia malalo iho:

  1  - Kela pahale e waiho nei ma ka aoao akau o alanui Young ma Honolulu, a oia hoi ka pahale helu 230 ma ka palapala aina aupuni o ka apana o Kulaokahua, nona ke alo he 100 mau kapuai a me 116.7 mau kapuai ka hohonu, a i hoolilo ia i ua Henry Williams la e L Ahlo.

  2  - O kela apana aina nona ka ili he iwakalua paha mau eka e waiho la ma Kaaawa a me Makaua, Koolauloa, Oahu, i hoolilo ia i ua Henry Williams la ma ke kuai e Kapua, kope ia ma ke Keena Kakau Kope o ke Aupuni Buke 78 aoao 487.

  3  - Kela mau apana aina elua, nona ka ili he 1 7-100 mau eka a me 1 50-100 mau eka i kuhikuhi ia iloko o ka Palapala Sila Nui Helu 278 a me 1324, oia na aina i hoolilo ia aku i ua Henry Williams la ma la palapala i kakau ia i - 18, kope ia ma ke Keena Kakau Kope Buke - ma na aoao- - .                                                                                                             2477-4

 

Hoolaha.

  MA KEIA, ua hoomanaia aku o J.K. Nahale i hope no'u e nana a hana i na hana a pau loa me he la owau no, no na mea e pili ana i kela aina ma Puukala, N. Kona, Hawaii, i hoakaka ia na palena ma ka Palapala Sila Nui Helu 2410 ma ka inoa o Kuapuu, he 208.66 eka; a o na kofe a pau loa o ka M.H. 1893 a me 1894, ua hoomana ia o J. K. Nahale e ohi mai a hoopii paha ma ke kanawai i na poe a pau i kii i ke kofe.  A o na poe a pau e paa nei i ke kofe mai ka aina mai, he mea pono e hooponopono lakou me J.K. Nahale, a i ole, e hoopii ia no lakou ma ke kanawai.  Owau no,

LAU CHONG.

  Honolulu, Ianuari 23, 1894.                                                                                  2478-4

 

Hoolaha hou.

 

Olelo Hoolaha.

  UA MAKEMAKE ia na hooilina o AIAI (k) he lepera i make, no Hanapepe, Kauai mai, i lawe ia i Kalawao Iulai, 1884, o kii ae ma ke Keena Papa Oia i ke koena dala o na popo o ka mea i make me na hooia kupono o ko lakou kuleana.

WILLIAM O SMITH.

  2478-3                                                        Peresidena Papa Ola.

 

Halawai Makahiki.

  E MALAMA IA aua ka halawai makahiki o ka Hui HAWAIIAN FRUIT AND TARO COMPANY ma ke Keena Oihana o ka Hui ma Wailuku, i ka POAKOLU, la 14 o Feberuari, A.D. 1894, hora 10 A.M.

A.N. KEPOIKAI,

  Kakauolelo o ka Hui Hawaiian Fruit and Taro Company.

  Wailuku, Maui, Ianuari 23, 1894.                                                                             2479-2

 

Hoolaha a na Luna Hooko Kauoha.

  OIAI, na hookohu pono ia mai na mea nona na inoa malalo iho i mau Lunahooko Kauoha ma ka Palapala Kauoha a Maurice Goldberg, o Honolulu, Oahu, i make, ko hoolaha aku nei i ka poe a pau he mau koina ka lakou i ka waiwai o na Maurice Goldberg la, e waiho mai i na mea nona na inoa malalo iho ma ko laua wahi hana ma Honolulu, i hooiaio pono ia, ina paha ma ka moraki a ano e ae, maloko mai o na malama eono mai keia la aku, a i ole ia, e hoole mau loa ia aku no.  O ka poe a pau i aie mai ua waiwai la, ke kauoha ia nei lakou e hookaa koke mai.

T.C. POTTER,

E.D. TENNEY,

  Na Luna hooko Kauoha o ka Palapala Kauoha a Maurice Goldberg.

  Honolulu, Ian. 30, 1894.                                                                                         2479-4

 

Hoolaha Hooko o ka Moraki a me ke Kuai.

  KE HOOLAHA ia aku nei ka lohe i na mea a pau, mamuli o ka mana o ke kuai i hookomo ia iloko o kekahi moraki i hana ia i ka la 28 o Feberuari A.D. 1890, e MANUEL ENOS o Honolulu, Oahu, ko Hawaii Pae Aina, ia William O Smith, Mary S Parker a me Henry Waterhouse, na Kahu Waiwai malalo o ka Palapala Kauoha a W C Lunalilo i make, hoopaa ia maloko o ke Keena Kakau Kope o ke Aupuni ma Honolulu, Buke 123 a ma na aoao 151, 152 a me 153, ke makemake nei ka poe e paa nei i ka moraki e hooko aku no ka uhaki ia o ka aelike, oia ka hookaa ole ia o ke kumupaa a me ka uku panee.

  Ke hoolaha hou ia aku nei ka lohe, mahope aku o ka pau ana o na hebedoma ekolu mai ka la aku o kela hoolaha ana, alaila o ka waiwai i paa maloko o ua moraki ia e hoolaha ia aku no ia no ke kuai ma ke kudala akea ma ka hale kudala o Jas. F Morgan, ma Honolulu, ma ka POAONO, Feberuari 10, A.D. 1894, ma ka hora 12 awakea.

  Kuike ke dala,  Na uku hana palapala i ka mea e lilo ai.

  No na mea i koe, e loaa no ia W O Smith, ma alanui Papu.

  Kakauia ma Honolulu, Ianuari 12, 1894.

WILLIAM O SMITH,

MARY S PARKER,

HENRY WATERHOUSE,

  Na Kahu o ka Waiwai o W C Lunalilo i make

  O ka waiwai i paa maloko o ua moraki la, a e kuai ia aku ana, oia kela pahale me ua hale a me na mea e pili ana e waiho ia ma ka aoao hikina o alanui Makiki, e kokoke aku la i ala nui Waila, nona ke akea o ke alo he 120 mau kapuai a me ka hohonu he 370 mau kapuai, oia kekahi hapa o ka Palapala Sila Nui Helu 6305 a me ka hapa o ka aina i lilo i ua Manuel Enos la mai a Walter R Seal mai a i kakau ia ma Iune 27, 1881, kope ia ma ke Keena Kakau Koke, Buke 71 aoao 59.

2477-4

 

Kuai a ka Ilamuku.

  MAMULI o ka mana i loaa ia'u malalo o kekahi Palapala Ohi Waiwai i hoopuka ia e ka Aha Kaapuni Ekahi o ko Hawaii Pae Aina, ma ka la 2 o Ianuari, 1894, e kue ana ia Theresa Owana Cartwright a me R W Wilcox, na mea hoopii ia, no ka pomaikai o R W Holt a me W H Cummings, na mea hoopii, no ka huina o $296.35, ua hoomalu ia e a'u, a e kuai aku ana hoi ma ke kudala mamua iho o Kalakaua Hale, ma ka Apana o Honolulu, Oahu, ma ka hora 12 awakea o ka POAONO, la 24 o Feberuari, 1894, i ka mea koho kiekie, i na pono a pau, na kuleana a me na mahele a pau o Theresa Owana Cartwright a me R W Wilcox, na mea hoopii ia, maloko o kela aina e waiho ala ma Waikiki, Oahu, i hoakaka ia maloko o ka palapala kuai a John Kamakaia ia Theresa Owana Cartwright, i hana ia ma ka la 24 o Sepatemaba, 1890, a i kakau ia ma ka Buke Helu 127, aoao 77 koe nae ka apana hoi ia no ka aina i hoakaka ia maloko o ka Palapala Sila Nui Helu 3219, nona ka ili hookahi eka oi a emi mai paha, e paa nei nae malalo o kekahi palapala moraki i hana ia ma ka la 17 o Novemaba, 1891, e Theresa Owana Cartwright ia C Afong, no $1800.00-100, Buke Helu 182, aoao 388, ke ole e uku e ia mai ka Olelo Hooholo i hai ia ae la, ka ukupanee, ua koina a me na lilo.

  Dala Kuike:                                            E G HITCHCOCK,

                                                                                      Hamaku.

  Honolulu  Ianuari 19, 1894.                                                                                     2477-4

 

PAPA!  PAPA!

AIA MA KAHI O

Lewers & Cooke

(LUI MA)

Ma ke kahua hema o Alanui Papu

me Moi.

E LOAA NO NA

PAPA NOUAIKI

O kei a me keia ano.

Na Pani Puka, na Puka Aniani,

na Olepelepe, na Pou, na O'a,

na Papa Hele, na Papu Ku,

me na Papa Moe he nui loa

NV PILI HALE ONA ANO A PAU

A me na

WAI HOOHINUHINU NANI

O na ano a pau loa.

Na Balaki o na Ano he Nui Wa

Ke hai ia aku nei oukou e na

makamaka a pau, ua makaukau

keia mau makamaka o oukou e

hoolawa aku ma na mea a pau e

pili ana ma ka laua oihana no ka

Uku Haahaa Loa,

E like me ka mea e holo ana mawaena

o Laua a me ka Mea Kuai.

Hele Mai e Wae no Oukou iho.

2896-q