Ka Nupepa Kuokoa, Volume XXXIII, Number 1, 6 January 1894 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

me

 

Ko Hawaii Paeaina I Huiia

No ka Makahiki. - - - $2.00

No Eono Mahina - - - $1.00

Kuike ka Hala

 

Hoopukala E Ka

Hawaiian Gazette Co.

H. M. Whitney, Luna Nui.

J. U. Kawainui, Luna Hooponopono.

@ Honolulu, Oahu, Lakou a pau.

 

Poaono, - - - Ianuari  6, 1894.

 

KULA SABATI.

I.          1.  Jan. 7, 1894.  Ke kanaka mua.  Kinohi 1:26-31: 2:1-3.

I iho la ke Akua, e hana kakou i ke kanaka e ka ia kakou ma ka like ana me kakou iho, a e hoalii iaia maluna o na ia o ke kai, maluna hoi o na manu o ka lewa, maluna o na holoholona laka, a maluna hoi o ka honua a pau, a maluna no hoi o na mea kolo a pau e kolo ana ma ka honua. 

  27 Hana iho la ke Akua i ke kanaka ma kona ano iho, ma ke ano o ke Akua oia i haua ai iaia; hana mai la oia I kaue a i wahine.

  28 Hoomaikai mai la ke Akua ia laua i mai la hoi ke Akua ia laua.  E hoohua ae olua, e hoolaha hoi, e hoopiha i ka honua a e lanakila maluna, a e nohoahi maluna o na ia o ke kai, a me na manu o ka lewa, a me na mea a pau e kolo ana maluna o ka honua.

  29 I mai ia ke Akua, aia hoi, ua haawi aku no na olua i na launahele a pau e hua ana i ka hua maluna o ka honua a pau, a me na laau a pau iloko ona ka hua o ka laau e hua ana i ka hoa:  he mea ai ia na olua. 

  30 A na ka poe holoholona a pau o ka honua, me na manu a pau o ka lewa, a me na mea a pau e kolo ana ma ka honua, na mea e ola ana, na lokou, ka nahelehele a pau i mea ai. a pela io no.

  31  Nana iho la ke Akua i na mea a pau ana i hana ai, aia hoi na maikai wale no.  A o ke ahiahi a me ke kakahiaka o ke ono ia o ka la.

1   A pela i paa ai ka lani a me ka honua i ka hanaia, a me ko laila poe mea a pau.

2   A i ka hiku o ka la, hooki iho la ke Akua i ka hana aua i hana ai, a hoomaha iho la oia i kana a pau ana i hana ai

3   Hoomailkai mai la ke Akua i ka hiku o ka la a hoano iho la, no ka mea, hoomaha iho la oia ia la i ka hana a pau a ke Akua i hana ai.

Pauku Gula

  Kinohi 1:27.  Hana iho la ke Akua i ke kanaka ma kona ano iho. 

  Manao nui.  E pono ke hoohalike ia ko kakou ano imipono me ko ke Akua hana pono.

  Na Mahele ekolu.  Ko ke kanaka ano like me ko ke Akua, 26, 27.  Ko ke Akua oleleo hoopomaikai, 28, 31.  Ko ke Akua Sabati, 1-3.

  Ka Olelo hoakaka.  Ma keia hapamua o ka makahiki ke huli pu nei kakou i na haawina ao ma na palapala elua o Kinohi a me Pukaana.  Ua kakau o Mesia i ka buke o Kinohi, oia hoi ma ka olelo Helene, na makamua; ma ka Baibala Enelani, Genesis.  Ua hoomauia ko Mose wa ola, M.K.  1571-1451.  Ua loaa iaia keia mau olelo hoike mai ke Akua mai mai na kupuna mai, mailoko mai o na palapala kahiko no hoi.  Ua hoike ia mai ke ano hana ma ko ke Akua hookumu ana i kela ao, na lani a me ka honua.  He mau mahele eono o na wa hana.  Ma ka wa mua, ua hanaia ka malamalama, elua, kaawale na lani; ekolu, ka aina a me na mea ulu, eha, na hoku, elima, na ia a me na manu, eono na holoholona a me ke kanaka; ehiku, ka la Sabati, oia no ka wa hoomaha.

  Ka wehewehe ana. (26) I iho la – pela ko ke Akua manaopaa.  Kakou – me he mea la ua kukulu pu ke Akua Kahikolu.  Ano – ka noonoo, ka hana pono, ke aloha oiaio.  Kol. 3:10. Ep. 4:24. (27) Hana – o ke kane kekahi, o ka wahine kekahi, he pa hookahi no loko mai o kela pa na lahuikanaka lehulehu, kaawale (29) Mea ai – aole he kauwahi lo, ia paha, mamua o ke kai a Kahinalii, Kin. 9:3.  (31)  Maikai – hemahema ole, hemolele loa.  (1) Poe – na mea paa, hehee, ulu, hanu, noonoo.  (2) Hooki – hoomaha, aole no ka luhi, aka nae no ka hoomalu ponoana.  (3)  Hoano – a kaawale ma ke ano e, ola hoi no na hana haipule a me ka lokomaikai manawalea.

I.  Mahele mua o na ninau, pp. 26, 27.  Owai ka mea nana i hana kum@ ai i ko keia ao a pau loa?  Heaha kona ano hana like ole ma ka hookumu ana i ke ano kanaka?  Ua hanala ke ano kanaka mamuli o ke ano owai?  Ua ano like anei ko ke kauaka kino me ko na holoholona?  Heaha ka mea i hanaia aku a lilo i ko ke kanaka kino?  Pehea i loaa ai ke kananka mua i ka wa mua loa kona ano noonoo?  Heaha ke ano pili o na kanaka i keia ao?  Heaha ke ano pili o na kanaka i kela ao?  No wai mai ke ano like ma ka hooponopono ana i na mea a pau?  Ua like a like anei na olelo hoike o ka poe ike akeakamai me ko ka Baibala?

  II.  pp. 28-31.  Heaha ko ke Akua olelo ma ka hoomaikai ana aku i ko keia ao?  Aia mahea kahi i noho mua ai ke kanaka mua.  Heaha kona hanalima mua i kauohaia aku nona e hooholo ai?  Heaha kana mau mea ai i hooponopono ia nona?  E pono anei i ke kanaka ke ai i ka io o na holoholona?  Heaha na mea ai no na holoholona?  Heaha ko ke Akua manao e pili ana i kona mau hana hookumu?  Ua loaa anei i na kupuna Hawaii kahiko mamua loa he mau wahi kaao e pili ana i ka makamua o keia ao?  Ua pololei anei na manao a me na olelo hoike o na lahuikanaka mawaho o na palapala Hemolele?  Ua kue anei ko ke Akua mau hana i ka olelo a ke Akua ma ka Baibala, a i ole ua hooikaika anei laua kekahi i kekahi?

  III. 2:1-3.  Heaha ko ke Akua ano hana, pau na wa hana eono?  Pehea i hoohanohanoia ai ka hiku o ka wa?  Heaha kona hoomaikai ana mai ia la?  Heaha kona hoano ana ia la?  Heaha ke kauoha eha o na kauoha umi?  Pehea e pono ai ia kakou ke hoano i ka la Sabati?  Heaha na hana i papaia ma ke kaueha eha?  Heaha na kumu hooiaio e hooikaika ai i ke ano kupono o ka malama ana i ke Sabati ma ke ano he la pule hoano e hoomaha ai?  Heaha na manao o ka poe Iudaio ma ko lakou malama ana i ke Sabati Iudaio?  Heaha ko Iesu manao i hoikeia e pili ana i ke ano hoano o ke Sabati?  Ua kupono anei ko kakou malama ana i ke Sabati karisetiano he la hoomanao i ko Iesu ala hou ana?

Manao Pili.

  1  Heaha kekahi mau ano o ke Akua oiaio hookahi?  2  Ua mau anei ka honua mai ka mua mai ma ke ano like me ko keia wa?  3 Ua ola anei na kanaka ma ke ano he mau pauku o ko ke Akua ano?  4  ua pono anei ia kakou ke hoolohe mau i ke Akua hookahi?  Ua malama anei oe i ka la pule hoano?

 

NA LETA

 

[Aole o makou makemake e lawe i ke koikoi o na hala no na manao i hoopuka ia malalo o keia poo e ko makou poe mea kakau.]

 

Ke Kulana o ke Aupuni Kuikawa.

  ALOHA OE: - Ke koa kaulana o ke Aupuni Kuikawa, e ae mai oe ia’u i kekahi wahi kaawale o ka kaua milimili o na la i hala, ka nupepa a’u i aloha ai.

  He mau mahina i hala ae nei, aole i kakela ka’u makapeni malluna o ke aiai o ke kanana no ka ono o ko kaua aina a me ke kulana o ke aupuni a kaua i hoohiki “pau pele pau nao ai.”  Ua makemake au e kamailio maluna o ke kahua o kela poo mano e kau ae la maluna.

  AKAHI. – He kulana paa a naue ole ko ke aupuni Kuikawa i keia wa, a he mau la helu wale no koe hiki aku i ka la i hanau mai ai o ke aupuni a kaua i hoopapau ai.  I loko nae o na la i hala ae nei, he nui kona mau enemi, he mea ole wale no ia ale i na hookele loea a na keiki Hawaii naauao, Peresidena S. B. Dole a me na Kuhina malalo ona.

  Ua kukulu ia ke aupuni Kuikawa maluna o ke kahua o na kanawai o ka noho ana lahui o ke ao nei, e hiki ole ai i kekahi aupuni ikaika me kona mau aumoku manua me na koa he 2,000,000 ke lele kaua mai i ke aupuni Kuikawa, a na anee alii e kuhihewa nei e hiki ana ia Amerika ke hoihoi i ka Moiwahine i kipaku ia mai ka noho alii aku me ka ikaika o na koa.  A maluna o keia kahua e hiki ole ai ke hoonaueue ia ke aupuni e ku nei i keia wa.

  ALUA. – O ke aupuni e ku nei i keia wa, aia iloko o na lima o ka poe pono a me na haipule.  Ke hoino nei na hoomaloka, na aia, na haomalau, he poe pakaha keia i ka aina, he poe haipule ole, aole loa he kahua o keia mau hoino ana, oiai aohe lakou i ike i ka lakou mea i kamailio ai.  Ua olele mai o Paulo, “aole e hiolo ka olaio i ka nui o ka poe hoomaloka.”  Nolaila, o ka poe nana e hookele nei i ke aupuni, ua kukulu lakou maluna o ka oiaio, a maluna o ka pono karistiano i hoolaha ia ma Hawaii nei.  Aole loa e naue i na enemi e kue nei.

  O kekahi enemi nui o ke aupuni Kuikawa, oia ka Peresidena o Amerika Huipuia a me kana Komisina i hoouna mai ai, oia o J. H. Blount, ua hoouna ia mai oia e ka Peresidena ponoi, aole na ka Aha Senate. I kona hiki ana mai i Hawaii nei, eia ka he Loio oia no ka aoao o ka Moiwahine, oia wale no ka na i hiki mai ai i Hawaii nei, o ka hooko i ka kona haku i kauoha ai iaia.  Aole ola i ninau a kakau i ka hoike a ka poe e kakoo ana i ke Aupuni Kuikawa o na poe naauao a koikoi o ka aina, aole i nana ia ka lakou hoike imua ona, i na kumu i auhulihia ai ka noho moi ana o Liliuokalani puni wale, malalo o ke alakai ana a W. White, J. Nawahi, J K Kaunamano a me J. E. Bush lalau.

  O kekahi o na kanaka Hawaii iloko o ke kau Aha Ahaolelo o ka M. H. 1892, o Hon. J. Kauhane, J. K Iosepa, J. H. Waipuilani a me A. Kauhi, aole loa keia Komisina i kakau i ka lakou ike, a o ka hopena o ka hana a keia Komisina, he mea pono e kiloi aku ka Aha Senate i kana hoike mawaho o na puka aniani o ka Ahaolelo o Amerika, oiai, aohe i ike ka Aha Senate, a aohe no hoi i apono ia aha i kona hookohu.  Nolaila, o ka Peresidena o Amerika, eia oia iloko o na kamaa kahi i ku haaiulu ai, a me kela loio maalea o ka Moiwahine, a no ka maka’u o ka Peresidena, ua hoouna awiwi mai oia i ke kuhina hou e hoihoi ae i ka Moiwahine ma ka nohealii, a me keia moku hou ana i hoouna mai nei, mamua ae o ka weheia ana o ka Ahaolelo Lahui o Amerika, i noho mai ka Ahaolelo Senate a me ka hale o na lunamakaainana, ua hookoia kona makamake, ua hoihoi ia ka moiwahine i alakai hewa ia maluna o ka nohealii alaila, ua lanakila oia maluna o na hale ahaolelo elua, aole he mea e hana aku ai.

  He hana maalea nui keia a ka Peresikena me ke apuka, malolo o na kanawai a me ke ke kumukauawai o Amerika Huipuia.  Ua manao paha ka Peresidena o Amerika, he poe hupo loa na poo o ke Aupuni Kuikawa o Hawaii nei, e ae wale aku ai i kana alakai lalau mawaho ae o na kanawai a me ke kumukanawai o Anerika, kahi nana i kaikai ae iaia iluna o ka hanohano, a lilo oia i poo a i alakai maluna o na huina kanaka o kanaonokumamalima miliona a oi.  Ua manao paha ua Peresidena la, he hana maala@ na ka poe anee alii, ke kii ae i ka Moiwahine a hoihoi ae i ka Moiwahine e hiki ai ke hookoia kona iini palaualelo.  Aole! aole! aole loa!

  Ina ua manao ua Peresidena la o Amerika, a me ka loio maalea ana i hoouna mai ai, e hoihoi i ka Moiwahine ma ka nohoalii, he mea pono ia laua e holo mai i Hawaii nei, a e kahea ae i na anee alii mai Hawaii a Kauai e holo aku i Honolulu e hoihoi ae i ka moiwahine, alaila hiki.  Aole loa e hiki i ka Peresidena, ke Kuhina Amerika a me ka Adimarala ma Honolulu ke hoolele mai i na koa o ka Piladelepia iuka o Honolulu, ke ole e ae mai ka Ahaolelo Senate o Amerika, a i ole ia, o ke Aupuni Kuikawa e noho mana nei i keia wa ma Hawaii nei.

  Ma kuu kilo a nana ana i ke kulana o ke Aupuni Kuikawa, ua oi aku kona paa e hiki ole ai i kona mau enemi ke hoohiolo – Oiai, he aupuni kuokoa keia, aole keia he panalaau malalo o Amerika e hiki ai i ka Peresidena, a i ole ia, i kona Ahaolelo ke kauoha e hoihoi i kona moi i kipakula mai ka nohoolii aku.

  Malalo o ko’u manao wehewehe no keia ninau o Hawaii nei, he hookahi wale no mea nui a oia keia:  O ka Hoohui Aina, a me ka hoomalu mai o Amerika.  A ina hoole ka Peresidena a me na Ahaolelo elua o Amerika no keia ninau, ua lawa a ua pau ko lakou mana, aole he mana i na lima huluhulu o ka Peresidena a me kona Ahaolelo ke komo a hokai mai iloko o na hooponopono au uni o Hawaii nei.

  A ke hana ka Peresidena pela, kona Ahaolelo e kauoha i kona mau kaa e kaua no ka pono o ka Moiwahine ana i aloha ai.

  Alaila, ua aa aku oia e kukala kaua i ko ke ao holookoa.

  Eia maluna o keia mau kahua i kukulu ke Aupuni Kuikawa, a e noho poo nei o Peresidena S. B. Dole.

  O ka pulakaumaka a me ka inaina maka welawela J E Bush a me na haole aeahaukae o Honolulu e hoaa hele la ma na huina alaunui.  E noko wale no i ka hoino i na keiki a ka poe pono a me na mikanele, aole e hiki ua mole iloko o ka lepo o Hawaii, o ka pule a ko lakou mau makua i ke Akua no ka lakou mau keiki, aole e hiki i ka poe hookohukohu Akua o Honolulu e like me J E Bush hookamani, ke mawehe ae i ka uwepa kuniahi o ka manaoio e na makua o ka pono i moe aku la iloko o ka lepo aloha o Hawaii.

  O ka’u pule i ke Akua e ku ke Aupuni Kuikawa a hiki i ka mau loa e kokua i na poo aupuni, a me ka Ahaolelo o Amerika i alakaiia ko lakou noonoo no ka pono o keia aupuni a me ka lahui holookoa mai o a o o ka paeaina holoo koa.

KANAKA I HOINOIA NO KA HOOHUI AINA

Maui o Kama, Dek. 23, 1893.

 

Na Anoai o Kauai.

 

Mr. Lunahooponopono;

Aloha oe:

  E oluolu oe e hookipa aku ma kekahi kolamu kaawale o ke kino lahilahi o kau nupepa wiwo ole, a nana ia e ahai aku me ka mana nui e like me ka uwila e anapa ana ma kahikina, a holo aku kona malamalama ma na kihi eha i ike iho ai ko kaua mau makamaka heluhelu mai ka la hiki ma Kumukahi a hiki aku i Lehua kaili la.

  He nuhou nui, a e hookahaha ai i ka noonoo o ka poe a pau aahu ana i ka nani o ka inoa karistiano oiaio, a e lilo auanei keia nuhou i mea na lakou e minamina iho ai iloko o ko lakou mau luna ike hala pakahi, a i kui hoi nana e houhou aku ai i ka naau o ke kanaka i hilinai maluna o ke kulana karistiano oiaio maoli.

  Ma ka la 8 o Dekemaba nei, M. H. 1893, ua hana iho la o G. B. Meheula i kekahi hana kupono ole iaia e hana, ina e like me kona ano e noho nei he kulana o ke kanaka karistiano oiaio maoli i ike ia iloko o na moolelo o na Ahahui Mokupuni a pau.  O ka hana ana i hana ai, oia no kona wawahi ana i ke kuauna o kekahi aina i lilo kona hapalua i ke kuai ia mai e ko’u haku, a no kona oo ole ma ke kanawai, ua hookohu ia mai au i kahu nona, a pela au e noho nei ma ke ano he kahu waiwai no ka mea i oo ole, aka o ka G. B. Meheula i manao ai, e wawahi a e hoonalowele i ke kuauna, me kona manao e lawe aku i ka pono o ko’u haku.

  Ma ka la 9 ae o ka mahina i hai ia ae la maluna, ua hele aku au me ka pipi hana no ka halo ana ma ke ano e hoiliwai like i ka lepo o ka aina.  Ia manawa no, ua lele mai la o G. B. Meheula e ho a i ka pipi me kona hili ikaika ana i ka oo kalai maluna o ua pipi nei, me ka hahana ikaika o na olelo a pau i hooili kaua ia i kela manawa, nolaila ua kaawale ke kulana o ke keonimana a me ka pono karistiano oiaio mai a ia aku, a eia oia ma ke kulana o ke kanaka hupo a me ka pekaua e ku nei, no ka mea, o na hana a G. B. Meheula a i ano kanaka kana i hana iho la, a ua haalele maopopo no hoi oia ia i kona kulana oiaio i ikeia.

  A o ka makee a me ka anunu waiwai oia ka mea e ike ia nei ma kana mau hana, a ua like no ia me ka omole, ke nana aku mawaho, pahee a hinuhinu, a ina e naha kela omole, aia maloko kona oi e moku ai.  Pela no o G. B. Meheula.  O na hana a ka Haku ma kona mau lehelehe, aka, maloko o ka anunu a me ka makee waiwai.  Nolaila, oia ka ka Buke Nui i olelo mai ai.  Ua kokoke mai oukou i o’u nei me ko oukou mau lehelehe, aka he mamao loa ko oukou naau mai o’u aku nei.

  Nolaila, ke ku aku nei au a hoike me ka oiaio i na mea a pau i hana ia e G. B. Meheula, me ko’u mau maka i ike pono a me ko’u waha i kamailio pu ai me ia he alo a he alo, aole no hoi ma ke ano he kaikuaana au a oia ko’u mea e huna ai i ka oiaio o na mea i hana ia ai, aka, na ka waiwai nana i mahele a hookaawale ae nei i ko maua pili ma ke koko o na makua, a na ka waiwai no i poke aku i na haawina o ka hanohano maluna ona.  Oia no keia he luna no na ekalesia hui o Koolau a me Anahola, a he Kahukula Sabati Nui no Kauai hikina, a he elele iloko o ka hui nui o ka Paeaina, a me he la, ke mokalakala mai la na maawe o ke kaula i hoopaa ia aku ai o keia mau haawina maluna ona.

  Ke hoopau nei au i ko’u manao maanei, a ua makaukau no hoi au e pane aku, ke pane ia mai no ka elua o ka manawa.  Nolaila, me na keiki oniu hua medala ko’u anoi.

  Owau me ka oiaio,

       S. Keaupuni.

  Anahola, Kauai, Dec. 15, ’93.

 

Ka Ninau o ka Manawa.

 

  O ke kipaku Moi, oia ka ninau oolea kupanaha ou e Hawaii e ku nei i keia manawa.  Na keia ninau i mahele i ka noonoo o ka lahui.  O ka noonoo o ka hapa io, oia hoi na Auee Alii, eia iloko o na aahu eleele o ke kumakena o ke kanikau, e kuhi ana ka manamana lima, a keia mokuahi ae, a kela mokuahi aku, alaila, hoihoi ia ae ka Moiwahine i kipaku ia, a ua hiki io mai ma o na Elele Kuhina la o Amerika.  Kupanaha keia makahiki, alua Elele Kuhina o Amerika i Hawaii nei, a he hookahi no nae haawina, he ike mai me ke ohaoha i ke Aupuni Kuikawa, a puka aku iwaho pau ae la no, aohe hilinai i ke Aupuni, huli aku la na alo i na Anee Alii a me ka Moiwahine i kipakuia, o lakou aku la na hoa e kuwiliwili a e kaukaunu ai ma ua ninau nei o ka manawa.  Ma ka hoike a kekahi, e kuhi kalaikii ana na ke Kuhina Kivini ka hewa, a o ka ianei ae hoi e noho pu mai nei me kakou, o ke kipaku mai i ke Aupuni Kuikawa e ku a hele pela, a e waiho iho i ke Aupuni no ka Moiwahine i hoopauia.  Kupanaha io ka ninau, ma kahi malu kahi i u hoohiki ai pau pele pau mano, me he hoohiki ana la a na ipo, a imua nae o ke poo o ke Aupuni kahi i hai aku ai ua hoohiki mai ka Moiwahine i kipakuia e huikala ana oia i ka hala o ka poe na lakou oia i kipaku.  Kupanaha io no ka ninau, aohe i kiko ka hua, koho e no he moa kane ke keiki, eia ka he huaaelo aohe e kiko ana, hala e nae ka hoohiki imua o ka Mea Mana Loa.

  O keia mau Loio Kuhina a elua mai ke alo mai o ka Mana Hooko o Amerika, ke ku hale nei, e uhi ana me he mea la na kipakuia ka Moiwahine me ka hewa ole.  Ua like a like laua nei me na Anee Alii o Hawaii nei, ka uhi i ka hewa o ka Moiwahine a kuhi kalaikii aku no ka haole ka hewa.

  Kupanaha io no ka ninau o keia mau Loio Kuhina a ka Mana Hooko i hoouna mai nei i Hawaii nei e huli i ka hewa i kipaku ia ai ka Moi he okoa loa ka laua nei mau kumu pale o ka kekahi na kona mua ka hewa, a o ka ia nei hoi he kipaku aohe hoi i lohe ia mai ia laua mai.  O ka hookahuli kumukanawai a ka Moiwahine he hana pono loa ia aole i hewa.  Pehea la ko laua manao i na e oili mai ka Mana Hooko o Amerika me ka haaheo a kukala mai, eia kou kumukanawai, e mahalo ana no laua nei, oiai eia hoi ke mahalo nei la Kamakaeha, ma keia lolelole o ke pale ana a ua mau loio anee alii nei a hiki i keia la, aohe wahi hiki iki i ka Moi ke hoi a aohe i hoi e like me ko laua akamai poholalo a o ka ninau ua lilo i ninau oolea nou e Hawaii, o ka pane a ke Aupuni, ua hala ma kahi moku lawe maunu, aohe mea i lohe ia pane ma kou koho wale he pane e puu ai ka lae kahi ke pohue.

  No ka mea, aohe o Amerika mana e kuhi lani mai ai a ao mai ia kakou na Hawaii e moe i ka aina iloko o ke kai e moe ai e like me nei a kakou e ike nei, o ka hale a ka haole i kukulu ai e noho ae ka ka eleele a nele iho la ka poe nana ka hale no kakou na hoohuiaina, e hauoli kakou a e olioli hoi no ka mea a ko lakou pohaku aole ia o ko kakou pohaku.

J. N.

 

He Moolelo Hawaii

 

  A halawai o Keopuolani me Liholiho kana keiki me ka waimaka e hiolo ana, a i aku la iaia, “Mai ike ole oe la’u, mai make mai nei au.”

  Ninau aku la o Kaleimoku, “Auhea o Kekuaokalani?”  I aku la o Keopuolani, “Eia ae no mauka mai.”

  Ninau hou aku la o Kaleimoku, “Pehea ka oukou kii ana aku nei?”

  I mai la o Keopuolani, “Ua pau ke kii hoahanau ana, o ke kaua wale no koe.”  A kena aku la o Keopuokalanai ia Kaleimoku e kii e kaua ia Kekuokalani, a ae mai la kela.

  A ahiahi iho, kapu iho la.  A kakahiaka ae, o ka hoomakaukau no ia o ke kaua; a i ka auwina la, hoonoho o Kaleimoku i na puali kaua.

  I ke kakahiaka nui ana ae, holo aku la o Kaleimoku ma maluna o na waa kaua 9, a hiki i Lekeleke; hoolana iho la na waa o lakou ilaila.  Papa aku la o Kaleimoku ia lakou, e noho malie, mai walaau.

  Alaila, hoolana aku la ola i ko lakou manao me keia mau huaolelo.

  “E ikaika kakou i keia la, a e koa hoi; e hele kakou imua, a inu i ka wai awaawa e na pokii.  Mai hoi hope mai, imua aku no a make, aohe hope e hoi mai ai.”

  A lohe o Kekuokalani i ko Kaleimoku hele ana aku, hoouna mai la oia i poe kiu.  A halawai ua poe kiu la me Kaleimoku ma, ki mai la ua poe kiu la i ka lakou pu a ku kekahi mau kanaka o Kaleimoku a make.

  Ia wa, ua hee aku la o Kaleimoku ma, a no ka uuku o ua poe kiu la, aole i hee loa, a hahai aku la o Kaleimoku ma i ua poe la, a halawai me Kekuokalani ma Kuamoo, o ka hooili kaua iho la no ia me ka ikaika loa ma na aoao a i elua, me kani mau ana o na pu.

  I ka auina la, hiki nui loa mai la na puali kaua mai Kailua mai me ka lako i na pu ma na auwaa mai a mauka mai, a poai puni ia o Kekuokalani me kona mau puali kaua.

  A i ke ahiahi ana iho o ua la ala, make iho ia o Kekuokalani a me Manono kana wahine, no ka nui o kona alu ia, a ku laua i ka pu a make loa.

  A hoi mai o Kaleimoku ma mai ke kaua mai, alaila, ahaolelo iho la na alii, a hoouna ia o Hoapili e hele ma Waimea, e kaua me kela kaua makaaina a Kainapau.  Alaila, holo aku la o Hoapili me na kanaka kaua ona ma na waa, a pae ma Kawaihae, a pii aku la a kaua ma Waimea, a pau ua poe la i ka luku ia.

  O ka lanakila loa ana keia o ke kaua ai noa, a pau hoi ka ai kapu ana, a ua ai pu iho la ke kane me kana wahine a me na keiki.  Na ke Akua no i waele e i keia mau hihipea o Hawaii nei.

  A pau kela kaua ana, hoi aku la o Hoapili ma i Kona.  A ia wa, aia ma Kailua ka noho ana o ke alii nui, a malaila no hoi i hana ia ai ka oihana hooponopono o ke aupuni o Hawaii nei ia wa.  A mahope iho, ahaolelo hou iho la na alii, a hooholo lakou e la ia na kapu a pau, a ua ae mai la na alii a me ke alii nui.

  Alaila, kuipalu ia na kii akua, a ua hoopau ia na kapu o ua mau akua nei, a me na kapu o na alii, a ua hooulu lakou i na lealea he nui loa, no ka mea, aole he mea nana e keakea, oiai ua pau na kapu.

KO KE AKUA WEHE ANA I KE ALA NO NA MISIONARI E HIKI MAI AI.

 

  Ua ike kakou ma na mea i hoike ia mamua ao nei o keia moolelo o ko kakou pae aina nei, ua nui wale na aupuni Moi i kukulu ia, e kue ana kekahi alii i kekahi alii, aole i maluhia ka aina no ke kaua pinepine ana.

  Mahope iho, hoohua mai la ke Akua i Nimeroda puuwai Duke Hao, (Kamehameha I.) nana e hooko i ko ke Akua makemake, ma ka na’i ana i na aupuni a pau, a hoohui ia lakou iloko o ka mana aupuni hookahi malalo ona.

  Ina no i hiki mai na misionari i ka wa e lehulehu ana no na aupuni, aole no lakou e maluhia la manawa, no ka mea, ina paha e@noho lakou me kekahi alii, alaila, hoohuoi mai kekahi alii e ae, a kaua mai no, a lilo i mea e holo lea ole ai ka olelo maikai no ia mau ano kue.

  Nolaila, manao e ke Akua mamua a hana mai oia pela ma o Kamehameha I.  Ia, i hui ae na aupuni a pau o keia pae aina i aupuni hookahi.

  I ko Kamehameha kaua ana mai kona mau la opio mai a hiki i kona lilo ana i Moi lanakila maluna o na alii e ae a pau a hui i aupuni hookahi malalo ona, ua hookaawale aku ke Akua i ka make mai a ia aku.

  Koe nae ke kulu iki ulia wale ana o kona koko, aka, ua lilo ia kulu koko i mea mana e hoomalu ana i ke ola o kona lahui kanaka, ana i makia ai ma na paia o Hawaii nei.  “Mamalahoa Kanawai.”  A ua hahai aku kona mau kulu koko lani alii i na kulu koko o kona lani alii Iesu,

ke alii o na lii, aha i manao ole ai na ke Akua mai kona ikaika, i hookoia ai ko ke Akua makemake ma

  A pela e maluhia ai ka poe misionari i ko lakou hiki ana mai, a holo lea ka lamaku o ke ola ma kela pae aina.  Eia kekahi mea kupanaha, o ka manao ana o na lii e hoopau i na kapu a pau i kuluma mai kahiko loa mai i hoolaa ia maluna o lakou, mamuli no ia o ko lakou luhi i kela ma@ mea, a no ko lakou makemake i noa loa na mea a pau, a me na hana uahuha.

  Aole no ko lakou manao ana he mea pono io no ia, a e ao i ka noho ana maluhia me ke ano pono io.

  Aka, na ke Akua no i haawi mai pela, i hookoia ko ke Akua makemake ma o lakou la, a kaawale na mea hihia mamua o ka hiki ana mai o na misionari.

  Manomano ka hikiwawe o ka pau koke ana o keia mau hihia ma Hawaii nei oiai lakou e au mai ana i ka moana.  Ua like me ka Iesu olelo, “Ua ike au la Satana e haule ana e like me ka uwila mai ka lani mai.”  Eia hoi ku Paulo, “Ua wehe ia mai no’u ka puka nui hamama loa.”

  Pela ka ke Akua hoohiolo ana ia Satana, a me kona wehe ana i ka puka hamama loa a me na mikanele ma Hawaii nei.

MOKUNA XII.

Ka hiki ana mai o na Misionari ma Hawaii nei.

  I ka la 30 o Maraki, M. H. 1820, ku mai la he moku ma Kawaihae, o Brig Thaddens ka inoa;  o James Hannewell ke kapena.  A mai Kawaihae mai, a hoea ma Kailua, i Kona Akau, Hawaii; kalewa wale no, a i ka la 5 mai o Aperila, kuu ka heleuma.  Maluna o ia moku na makua Misionari mua loa mai ka papa Amerika A. B. C. F. M. mai, no lakou na inoa, Rev Asa Thurston Mika Kakina, Rev Hiram Bingham Mika Binamu a me ka laua mau wahine a me na kokua; Daniel Chamberlain, Kamelana; Samuel Whitney, Wini; Samuel Ruggles, Keiki; Thomas, Kamaki; Holmes, Holomeka, a me Elisha Loomis, Elika Lumla, a me 4 mau kanaka Hawaii, oia o Hopu, Honolii, he mau mea laua i loaa kekahi ike Baibala ma Cornwell Institute, Kanui, a me George Humehame, ke keiki o Kaimualii ke alii o Kauai. 

 

Hoolaha Kumau.

 

KA AYER SASEPARILA

 

Oia ka LAAU oi loa o ka maikai no na mai i hookumu ia mai ke koko ino mai.  Ua oi loa ae hoi, no ka mea, o kona kahua i hookumui@ a io ka

 

Honodorusa Saseparila Oiaio

 

No ka mea, o ka LAU NAHELEHELE a me na mea a pau i maa i ka hoohuihui ia, oia na laau oi loa o ka maikai, a no ka mea hoi ua ike ia ka waiwai io ma ka lapaau ana i na MA’I o ke KOKO – ua oi ka

 

Ayer Saseparila

 

ma na mea a pau e hooikaika a e kukulu hou ai i ke kino i hoonawaliwali ia e ka ma’i a me ka eha.

  Ua hoonoono ia ka ai, ua hoopau ia ka ma’i o ka waihoua hoowali ai, ua hooikaika ia ke Ake a me ka Pua Hoowali ai, a hoohana maikai ia na lala a pau o ke kino.  Ua hookuke ia mai ke kino ae, ka laau make o ka ALAALA, ua hoola la na EHA, na PUHA, na RUMATIKA, na MAIHEHE, na HUEHUE a me na ma’i ma ke poo kahe wale o ka hupe, a ma na wahi a pau ke hooia mai nei na Kauka alakai ka maikai o keia laau.

  Ke hoola nei la hai, a e hoola no hoi ia oe.

 

No ke KUNU a me ke ANU o ka

 

Ayer Cherry Pectoral

ka laau lapaau alakai o na ohana.

 

Io ka NALULU, ka LEPOPAA

 

ka LENA a me kekahi mau mea ino no e ae o ka opu, e lawe i ka

 

AYER HUAALE CATHARTIC

 

E makemakenui ia nei e ko ke ao puni.

  Hoomakaukauia e Kauka J. Ayer & Co., Lowell, Masekuseta.

 

 

HOLLISTER & CO.

Na A@@na ma ka Paeaina Hawaii

28

 

KAKELA ME KUKE

 

kA – HALEKUAI – NUI

 

O NA

 

WAIWAI LIKE OLE

 

NA MEA

 

HANA KAMANA A PAU

 

Na lako pili hao kukulu hale,

Na kepa,

Na lei ilio,

Na kaula@no ilio,

Na Pahi,

Na Upa,

Na kope hulu,

Na Palapala

PALAU LIO

Na mea mahiai,

Na au ho,

Na au koi,

Na kua bipi,

Na lei bipi,

Na kaulahao bipi.

Na uwea pa,

Na kaa palala,

Na mea piula,

Na ipuhao.

 

Makau me Aho Lawaia

 

Na Iliwai

Na kaula,

Na hulu pena,

Na pulumi,

Na pena, me ka aila.

Na kopa,

Na aila mahu

Na pakeke

Na pukeke hao,

Na kapu hao,

Na pau@a,

Na kukaepele,

Na uwiki, a me

Na ipukukui.

 

Mikini Humuhumu Kaulana

 

Wilcox, & Gibbs Hookahi Lopi,

 

ka Remington, Elua Lopi.

 

  A me na ukana he nui loa.  o kela ano @ me keia ano.

 

Kakela me Kuke

 

2396-q