Ka Nupepa Kuokoa, Volume XXXII, Number 51, 23 Kekemapa 1893 — KA LA HOOMANAO O PAUAHI. [ARTICLE]

KA LA HOOMANAO O PAUAHI.

O ka Poalua iho nei, Dekemaba 19, oia ka la mau o ke Kula Kamehameha e kulaia ai no ka hoomanao ana i ka la hanau o ke Kamalei Haku Bernice Pauahi Bihopa, ke alii puuwai hamama nana i kukulu i keia kula kaulana i hea ia ma ka inoa o ka lalani alii nana i aimoku loihi o Hawaii nei. Ua akoakoa ae ma kahu waiwai Rev. C. M. Hyde a me Hon. W. F. Allen a me ka laua mau wahine, Rev. J. Waiamau, C. A. Brown a me na hoaloha Hawaii lehulehu o ka naauao na kumu a me na haumana o ke kula e noho nei a me kekahi poe i puka. Ua wehe ia na hana o ka la i ka hora 10:30 kakahiaka maloko o ka malumalu o ka lanai i kukulu ia no ia la, ma o ko Rev. C. M. Hyde, ke alakai o na hana o ka la, wehewehe ana mai i ka manao i kahea ia ai keia akoakoa ana mai, a me ka pule a Rev. Waiamau. Alaila, ua himeni mai ke kula i kekahi mele, a i ka hamau ana iho, ua ku mai la o Kauka Hvde a hoolauna mai la i ka haiolelo o ka la, oia o Mr. John William Kalua. O kana haiolelo, e loaa no ma ka aoao eha o ka pepa o keia la. Mahope aku ona, he mau haiolelo pokopoko na Samuel Kauhane a me J. Aea he mau haumana kula. Pau na haiolelo, alaila. ua mele ia o "Hawaii Ponoi" a hookuuia ke anaina e nee aku i ke kahua paani, no ka makaikai ana i ka paikau koa hookuku a na haumana, malalo o ke aliikoa Babb, a oiai hoi ka puali puhi ohe malalo o ke alakai ana a Prof. H. Berger e mele ana he He papaaina noa i na mea a pau kekahi i haawiia i ka poe i hiki aku, a he mau paani e ae.