Ka Nupepa Kuokoa, Volume XXXII, Number 50, 16 Kekemapa 1893 — He Moolelo Hawaii [ARTICLE]

He Moolelo Hawaii

A pii aku la lakou, a hoi mai la me ka laau ala he nui loa; o ka laau nunui a me ka liilii. A ike oia i ko lakou kua pu ana i ka laau liilii a lawe mai, alaila, i aku la oia ia lakou, “No keaha lakou i lawe mai ai i ka laau ala liilii?” I mai la lakou, "Ua elemakule oe a ua kokoke hoi e make, a nawai la ia laau ala? Aole makou i ike i ka mea nana ia laau ala mahope aku?" I aku la o Kamehameha la lakou, “Aole anei oukou i ike i ka'u poe keiki, a o lakou no ka poe, nana kela laau ala liilii mahope aku." A pela no oia i papa aku ai i ka poe kapili manu Oo. I aku la, “Ina e loaa ia oukou ka manu ea, mai uumi oukou, ma ka hulu no oukou e lawe mai ai, a hookuu aku no ka manu i nui ka hulu." I mai la lakou, “'Nawai aku ia manu e hoola ai, oiai ua elemakule oe?" I aku o Kamehameha , "Na ka'u poe keiki ia manu mahope aku.” A ma keia mau ano i maopopo ai ko Kamehameha aloha i kana mau keiki. A kuai iho la na haole me Kamehameha i ka laau ala, a loaa ia Kamehameha he ekolu mau moku kiakahi nunui a me eono mau moku liilii. A ku mai la kekahi moku, kuai aku la oia no ia moku i ka laau ala a lilo ia moku iaia. Kapa aku la oia i ua moku la o Kalaholile ka inoa. A mahope iho, kii hou ia mai la ua moku nei e kuai, a lilo no. KO KAMEHAMEHA HOI ANA I HAWAII A ulu mai la ka manao iaia e hoi i Hawaii, alaila, kauoha ae la oia ia Kaoleioku kana hiapo e noho no oia i Oahu, a ae mai o Kaoleioku. A hoonoho pu ia me Kaleimoku i pukaua nona, a kiaaina. A hoonoho ia o Kaikioewa i kiaaina no Kauai; o Keeaumoku ko Maui kiaaina.

I ka M. H. 1812, hoi aku o Kamehameha i Hawaii; ma na moku lakou i hoi ai. Maluna o kona mau moku kiakahi nunui ekolu kona mau aialo a pau, a me ia pu. O Uinihepa, o Laholoa, a me Keoua na inoa o ua mau moku la. A ma na monu liilii, a ma na auwaa no hoi kekahi poe. Ua kapaia ka inoa oia huakai aumoana, o Kamaukani. Holo aku o Kamehameha a Lahaina, a hoonoho ia Keeaumoku ilaila i Kiaaina, a mailaila aku, ku i Kawaihae, a mailaila hou aku, ku i Kealakekua. He mau la iho, holo hou o Kamehameha i Molokai; a mailaila mai, ku hou i Lahaina. A noho iki ia mau la e ai i ka waiwal a Keeaumoku ana i kuahaua ai i ko Maui. A he mau la iho, hoi loa aku oia i Hawaii, a ku ma Kealakekua; a malaila aku a Kahaluu.

Iaia malaila, wi iho la lakou i ka ai ole; aole nae oia i ike i kona pilikia, a kii wale aku e ohi, a uhuki wale aku i ka ai a na makaainana. Aka, mahiai maoli aku oia a me kona aialo a pau i ai na lakou ponoi iho; a ua kapaia ka inoa oia mala ai, o Kuahewa no ka nui launa ole. Aia no ma Kailua, Kona. A mahope iho, ia makahiki no, hana ia ka pa-pohaku o Kiholo, a paa i kahi makahiki ae, 1813. Ua oleloia ma ia makahiki, 1813, I hanau ai o Kauikeaouli ma Keauhou, Kona Akau,, i ka la 11 o Augate; pela ka hoike a Emilia Keaweamahi, ke kahu hanai wahine o Kauikeaouli. O ka Kaikioewa wahine ia, ke kiaaina o Kauai. Aka, he like ole no, olelo kekahi poe i ka la 11, a 17 hoi ka kekahi poe o ka malama o Maraki, 1814. I ka 1813, pii nui aku na kanaka i ke oki laau ala iliahi ma ke kauoha a Kamehameha, mahele aku oia i kona kanaka e like me ko lakou luoi ana, a kuai aku lakou me na haole, a kuai aku hoi o Kamehameha i kona iho; a ike oia i ka nui o ka waiwai o ka laau ala, alaila, hookapu oia nona wale no. O ka hana nui iho la ia ia mau la. Ua lawe mai oia i na mea a pau mai na haole mai ma ke kuai, me ka ale ole i kekahi mea. Aole ona imi i mea e hihia ai oia a me kona aupuni; a e hookaumaha wale aku ai i kona mau makaainana. Ma ka M.H. 1816 ae, a i ka 4 hoi

o na makahiki i hala e o ko Kamemeha noho ana ma Hawaii, lohe iho la oia i ka hiki ana mai o na haole i Oahu mai Rusia mai, a me ko lakou olelo ana, e lilo o Oahu ia lakou. He oiaio, ua holo mai keia poe haole Rukini a ku ma Kauai i ka 1815 aku, a kukulu lakou i ka papu kaua maloko o ka pa kaua ma Hanalei, a ma Waimea, malalo o ke alakai ana a Dr. Sheffer. A i ka 1816 ae, holo mai lakou i Oahu a kukulu papu, ma ke kahua a Kaleimoku i hoolala ai. A ua paa hoi ko lakou manao e lawe io no ia Oahu. I ko Kamehameha lohe ana i keia lono, alaila, hoouna aku oia ia Kaoleioku kana keiki hiapo o na la opio a me Kaleimoku, Ulumaheihei, Naihe, Kaeaaumoku, aKaikioewa, a me na kanaka he nui loa, e kii e kaua me ua poe haole Rukini la. A hiki lakou i Oahu, hookuke aku la i ua poe haole la, alaila, kukulu ihola lakou i ka pa kaua. Ma ia wa, make iho la o Paulo Kaoleioku, ko Kamehameha hiapo, O kona mau la opio, i ke 60 o kona mau makahiki. Ma ia wa no. ika mahima o Novemaba 21, 1816; ku mai la he wahi moku manuwa Rukini uuku, o Rurick ka inoa; o Kapena Kohzebu, ma Kealakekua oia i ku mua ai, a holo loa mai i Oahu, a komo i ke awa o Kou, Honolulu. O keia ka moku manuwa mua loa i komo i ke awa o Honolulu; a haawi ae la oia i kona aloha ma ka hoonakolokolo ana i kona mau pukuniahi nunui. A i ka la 14 oDekemaba, haalele oia ia Honolulu. A ma ia wa no hoi i hookumu mua ia ai ka Hae Hawaii i hae no ka lahui.

A i ka 1817 ae, 1 ka malama o lanuari, paa loa ka pakaua a Kaleimoku ma i kukulu ai, i kapaia o ka Papu.

A mahope iho, kua laau ala iho la o Kaleimoku i Oahu a me na alii a pau; a kuai aku la i lole no lakou a nui ko lakou waiwai ma Oahu. A pela no hoi o Kamehameha ma Hawaii; a ma ia wa i kuai ai oia i kela moku i kapaia, o Kalaholile

Ua hoomau o Kamehameha i ke kuai laau ala ana, a pau na makahiki 7 kona noho ana ia Hawaii, mai kona hoi ana mai i Oahu aku. A make oia. A kua ia no ike kau ia Liholiho, a ia Kauikeaouli. A o ka pau loa ana no ia o ka laau ala; o ka laau liilii ala ole wale no koe. KO KAMEHAMEHA I. MAKE ANA. A hala na makahiki ehiku o ko Kamehameha noho ana ma Hawaii, mai kona hoi ana mai Oahu mai, make iho la ia i ka ia 18 o Mei, 1819, ma Kailua, Kona akau, Hawaii. I ke 82 a oi o kona mau makahiki, ina nae he oiaio ka oleloia, ua hanau ia oia i ka makahiki 1836 ma Kopoiki, Kohala-akau, penei ka moolelo: I ka nui loa o ka mai o Kamehameha, a aneane hiki ole i na kahuna ona ke hoola iaia< alaila ulelo mai la kekahi iaia, <l E aho e kukuiu i haie no kou aku, no Kukailimoku, i ola oe." Kokua pu mai la na alii i ka olelo a ua kahuna nei, a kukuiu io iho ia i heiau, a paa no ia la, a kapu iho la*l ke ahiahi.

Wawa wale ae la he lono olelo na ke kahuna a me na alii, e pue ana lakou ia Kamehameha e noi i kanaka no ua heiau nei. E pau iho ana na kanaka i ke auhee i kahi e pee ai, no ka makau i ka make; a he kakaikahi ka poe i koe iho i ke alo alii. Kakali mai la na kanaka ma kahi. a lakou i pee ai, a owa ke kauwila, hoi mai lalakou; a ua pau ae la ka wa e make ai.

Aole no paha i ae o Kamehameha i keia manao o na lii a me na kahuna, aka, ua lohe ia nae kana olelo, “i kanaka na ke alii. O ko na lii wa no hoi ia i olelo al ia Liholiho, a pela i holo ai na kanaka. A noa ia pule nui loa iho la ka mai o ke alii; aole hiki ke oni no ka nawaliwali loa. A hiki hou mai ka la e kapu hou ai ua heiau la, alaila, olelo hou aku la oia ia Lihoiiho kana keiki, "o hele i ka pule a kou akua hulu, ia Kukailimoku, , a o ka mea malama no ia o ke akua." Mahope iho, kukulu ia iho la he elua mau wahi hale, a malaila e noho ai, me na kahuna ona me ka lapaau ana. A Poakolu pu iloko o ua mau wahi hale nei, nawaliwali loa iho la ke alii, a pau ke komo ana o ka ia. A ike iho la kana mau wahine a me na keiki, a me na kaikamahine, a me na lii a pau malalo ona, ua nawaliwali loa la, hoihoi ae la lakou iaia i kona hale. A po ia la, hapai ia mai la imua e ai, hookahi no wahi oolo pu ai me kahi muolo wai iki i komo. Olelo aku la na lii iaia, “i huaolelo kauoha na makou.” Aole kela i ekemu iki ae, a hapai a aku la i ka hale moe. A kokoke paha i ke kau, oia paha ka hora 10 o ka po, hapai hou ia no i imua e ai. Aole i pau.