Ka Nupepa Kuokoa, Volume XXXII, Number 40, 7 October 1893 — Page 4
| This text was transcribed by: | Rachel Gonzalez |
| This work is dedicated to: | Awaiaulu |
Ka Nupepa Kuokoa
KE KILOHANA POOKELA NO KA LAHUI HAWAII.
Ko Hawaii Paeaina I Huiia
No ka Makahiki… $200
No Eono Mahina…100
Kaike ka Kula
HOOPUKAIA E KA HAWAIIAN GAZETTE CO.
H.M. WHITNY, Luna Nui
J. U. KAWAINUI, Luna Hooponopono.
No Honolulu, Oahu, Lakou a pau.
Poaono,…OKATOBA 7, 1893.
KULA SABATI
IV. 3,. Oct. 15. Ka hoopono ia ala maka manaoio, Roma 5:1. 11.
NO IA mea, i haoponoia mai kakou ma ka manaoio, he malu ko kakou me ke Akua, ma ko kakou Haku o Iesu Kristo:
2 Ma o na la hoi i loaa mai ai ia kakou ka hookipa ia ma ka manaoio, iloko o keia hoopomaikai ia, kahi e ku nei kakou, a e hauoli hoi me ka manaolana i ka nani o ke Akua.
3 Aole ia wale no, ke hauoli nei no hoi kakou i na pilikia; ke ike nei, e hana ana ka popilikia i ke ahonui;
4 A o ke ahonui i ka hoao ana ; a o ka hoao ana i ka manaolana:
5 A o ua manaolana ia aole ia i hoohilahila, no ka mea, ua nininiia mai k aloha i ke Akua iloko o ko kakou mau naau e ka Uhane Homolelo, i haawi ia mai ia kakou.
6 No ka mea, a ia kakou i nawaliwali ai, a i ka wa pono, make ino la o Kristo no ka poe pono ole.
7 No ka mea, aneane hiki ole i kekahi ke make no ke kanaka pono, malia e hiki paha i kekahi ke make no ke kanaka lokomaikai.
8 Aka, ua hoakaka mai ke Akua i kona aloha ia kakou, no ka mea, i ka wa e hewa ana kakou, make iho la o Kristo no kakou.
9 Nolaila hoi, ke hoapono ia mai nei kakou e hona koko, he oiaio no, e hoopakele ia mai kakou e ia i ka inaina.
10 No ka mea, in a i ko kakou wa e enemi ana i hoolaulea ia ai kakou i ke Akua ma ka mak ana o kana Keiki, he oiaio no , a laulea kakou, e hoola io ia hoi kakou ma kona ola ana.
11 Aole o keia wale no, ke hauoli nei no hoi kakou i ke Akua ma ko kakou Haku ma Iesu Kristo, ma ka mea i loaa mai ai ia lakou ka hoolaulea ia.
Manao Nui. E pono ke imi i ka hoapono ia ana, aole mamuli o ko kakou kulana maikai, aka nae mamauli o ko Iesu mana kalahala.
Pauku Gula. Roma 5:8. I ka wa e hewa ana kakou, make iho la o Karisto no kakou.
OLELO HOAKAKA
Ma keia haawina Baibala ua hoike ia kekahi mea maikai o ko kakou hoapono ia ana, in a paha ua loaa ia kakou ko Iesu kalahala. 1. Ua hoolaulea ia kakou me ke Akua. 2. Ua maopopo loa ko ke Akua aloha nui ia kakou. 3. Ua lanakila kakou maluna o na poino o keia ao: 4. Ua lilo ka hoola i mea paa.
1. Malu- lokahi, aole kue kakou i ke Akua, aole hoopai ke Akua ia kakou. Iesu- oia no ka Mea Hoola, aole ko kakou manaoio. 2. Ku-ua loaa i ka poe manaoio he kulana hou, oia hoi ke ano noho o ka poe i huikalaia imua o ke Akua. Nani- oia hoi ka pau pono ana o kana hana hoola. 3. Hauoli- oia no ka hoialona kupono loa o ko kakou hoapono ia ana. Ahonui- aole papauaho kakou in a paha e nui ana na mea kue. 4. Hoao- olohe, akamai, loea, ma ka hooko ana i ka manao a ke Akua. 5. Manaolana- e pili ana i ka lanakila i ka wa hope loa. 6. Nawaliwali- aole hiki ke hoola ia kakou iho. 7. Make- o ka hoilona ano nui keia o ke aloha palena ole, ko kakou hoolilo ana aku i ko kakou ola kino i mea e ola ai kekahi makamaka. Lokomaikai- aole lawa ke ano hoopono no ka hoeueu ana i na manao aloha o hai. 8. Hewa- aole pono, aole lokomaikai, aka hoi ua make o Iesu no keia poe hewa. 9. Hoopakeleia- aole mamuli o kona mau hana aloha.
HE MAU NIELE.
I. Ka hoaponoia ana ma ka manaoio, 1-5. Heaha ka mea i manao ia ma ka mamalaolelo "no ia mea?" Heaha ko ke Akua hoapono ana i na kanaka hewa? Heaha ka hua maikai i olelo ia, p. 1? Heaha keia malu? Pehea i loaa ai, Pilipi 4:7,9? Ma owai la, Epeso 2:14? Heaha ka lua o ka hua maikai? Heaha ke kuleana hou o ka mea manaolo? Ina paha ua loaa ia oe keia kulana, heaha ke ano o ka pomaikai? Heaha ke kolu o ka hua maikai, Pilipi 4:4? Pehea e hiki ana i ka poe manaoio ke hauoli no ka nui o ko lakou mau pilikia? Heaha na hua maikai o keia popilikia i olelo ia, pp. 3-5? Heaha ke ahonui, Halelu 11:6, 7? Heaha ka hoao ana, Halelu 42:11? Heaha ka manaolana, 2 Tesaloni 2:16. Heaha ka ke Akua nani, 2 Korineto 3:!8? Pehea i nininiia mai ai ko ke Akua aloha ma ko kakou mau naau? Hiki anei ia oe ke loaa keia aloha i niniia mai, Ioane 20:22?
II. Ka hoolaulea ana aku i ke Akua, 6-8. Heaha ka eha o ka hua maikai e ka hoapenoia ana? Pehea e hoomaopopo ai ke ano onipaa o ko kakou hoolaia ana? Pehea i hoike ia mai ko ke Akua aloha i ka poe manaoio? Heaha ko Kristo make ana no ka poe pono ole? Pehea i hoikeia ke ano nui o ko ke Akua aloha? Heaha ka mea oi, ka peno paha, ka lokomaikai paha? Pehea ke ano o ko oukou mau manao aku i ke Akua, aloha paha, makau paha? Ua komo anei oe i ko ke Akua maluhia? Ua hiki anei i ke Akua Hemolele ke hoomalimali i ka poe hewa? Heaha ko ke Akua makemake e pili ana i ka mea hewa? Ua laweia aku anei ke ano lawehala? Lana anei kou manao e lilo i hoa hui ma na kulea o ko ke Akua nani, Ioane 17:24? Heaha ko Paulo manao e pili ana i ka mana oi o ko Iesu koko? Heaha ko kakou aie i ke Akua, ka make paha, ke ola paha. Ina mau ke kuleana o ka poe manaoio ma ke ola, heaha ka hana kupono e pili ana i ko lakou oia kino? Heaha kekahi mau pomaikai ano o ko kakou hooia ia ana? Heaha ko kakou hoolaulea ia ana? No wai mai keia mau pomaikai a pau loa? Pehea ko ke Akua hoike ana i ka ikaika o kona kue ana i ka hewa, Iakobo 1:15, a me kona hoapono ana i ka mea imi pono? E hiki ana i ka manaolana e ka mea manaoio ke hoohoka iaia? I ka wa a kakou e ku ai imua o ko ke Akuanohoalii heaha ke kumu pale hookahi wale no no ka poe hewa? heaha ko Iuda (p.p. 20:21) olelo paipai i ka poe manaoio? Ma o kakou auei kekahi kumu no ko ke Akua aloha ana mai ia kakou? Ina paha ua lanakila kakou ma ko Iesu make ana, heaha ko kakou pomaikai ma ko Iesu ola mau ana?
MANAO PILI.
1. Ua hauoli anei oe ma kou ola Karistiano?
2. Ua lanakila anei oe maluna o ka hewa?
3. Ua ahonui anei oe ma kou mau poino?
4. Ua pookela anei kou aloha aku i ke Akua?
5. Heaha kou manao e pili ana i ko Iesu make ana no ka pono o ka pae hewa, a me kona ola mau ana no ka pomaikai o kona poe manaoio?
Moolelo o ka Ahahui Euanelio o ka Mokupuni o Hawaii.
La Hana 1- Halawai ka Ahahui Euanelio o ka mokupuni o Hawaii, ma ka luakini o Kalahikiola, Kohala, 1 Sept 2, 1893, hora 10 a.m. e like me ka hoopaneeia ana. Rev Jne. Kalino ka lunahoomalu mua ma ka noho, weheia na hana me ka himeni a me ka pule a ka luna hoomalu, a hoomaopopoia na lala o ka aha i hiki mai.
Na Kahu Ekalesia
Haili Hilo, aole kahu; Onomea, aole kahi; Hakalau, aole kahu; Lau pahoehoe, D Kahooio; Hamakua hikina, C M Kamaka; Hamakua waena me komohana, D Kahooio komite; Waimea, Jno Kalino; Kohala akau, S W kekuewa; Kohala komo hana, S C Luhiau; Kohala hema, Jno Kalino, komite; Kekaha, D K Meheula; Kailua me Healani, W M Kalaiwaw; Kona waen, D K Meheula komite; Pukaana, aole; Kaohe, aole; Milohi, D K Meheula, komite; Waiohinu, aole; Kalapana me Opihikao, aole; Puula, L K Kalawe.
Na Elele Ekalesia.
Haili, HIko, E kaeha; Onomea, aole; Hakalau, aole; Laupahoihoi, D K Makuakane; Hamakua hikina, J Waiohinu; Hamakua waen me komohana, aole; Waimea, Z Paakiki; Kohala akau, J H. Kawainui; Kohala komohana, E Kikalaeka; Kohala hema, T. S. K Nakanelua; Kekaha, D Kaninau; Kailua me Kelani, S Kailipua; Kona waena, J J Keohi; Pukaana, aole; Kaohe, aole; Milolii, aole; Waiohinu, aole; Kalapana me Opihikao, T S Piihonua; Puula, S K Kenoi.
Koho ka aha i na luna nui a na Kalaiwaa i waiho mai i ka inoa o Kamakawiwoole i lunahoomalu a aponoia ma ka balota; a me Kalawe i Kakauolelo mau. Koho ka lunahoomalu i na komite imi hana; Kekuewa, Kalaiwaa a me Kalino na komite. Na komite imi haawina, Kahooio, Kaeha, Waiohinu.
Noi mai o Kailipua e lilo na kahu kula sabati nui me apana a me na elele i mau hoa kuka no keia aha, aponoia. Ua ku mai ke komite imi hana a hoike mai la:
1 Hapalua hora haipule.
2 Hoike o na kihapai.
3 Na palapala hoopii.
4 Heluhelu haawina.
5 Ke ola o na kahu.
6 Hoike o na komite.
7 Oihana kuwaho.
8 Oihana kuloko.
9 Na Ekalesia kahu ole.
10 Hooponopono ekalesia.
11 Na keiki a ka aha.
12 Na luakini a me na hale kahu.
13 Na kula hanai
14 Na ahahui kokua.
15 Na kahu ekalesia ole.
16 Komite hoeue no na ekalesia nawaliwali.
17 Komite i ka aha nui ma Honolulu; komite o na ekalesia a me ke komite o na aha.
18 Kahi e hui hou ai ka aha, apono ia ka hoike a ke komite, a noi mai o Kekuewa e hoopanee ia kela aha, a noho hou i ka la 4 o Sept. aponoia me ka pule a ka lunahoomalu.
La Hana 2. Sept. 4, 1893.-Noho hou ka Aha ma ka hora 10 a.m. Rev. C. M. Kamakawiwoole ka lunahoomalu ma ka noho; weheia na hana me ka himeni a me ka pule a Timoteo; malama ia ka hapalua hora haipule; heluhelu ia ka moolelo o ka halawai i hala, a apono ia me na hooponopono.
Hapai ia he palapala mai ke Kakauolelo ku i ka wa mai o ka Papa Hawaii REv. S. E. Bihopa ma o ka lunahoomalu ia, no ka hoolauna ana mai ia Timoteo i hoa kuka pu no na hana a pau o keia Ahahui Euanelio, a ua aponoia.
Na ke kakauolelo i ko Hamakua Hikina; na Kahooio (komite) i ko Hamakua waena a me komohona; na Kalino i ko Waimea; na Kekuewa i ko Kohala Akau. Noi hou mai o Timoteo, e waiho ia na hoike kihapai a pau ma ka lima o kekahi komite, a na ia komite e noonoo i na mea kupono ma ka hooponopono ekalesia ana, aponoia. Kohoia o Timoteo, Kalaiwaa, Kalino i komite.
Na Luhiau i ko Kohala Komohana, noi mai o Kalaiwaa, e waiho ia keia hoike kihapai a noonoo pu me ke kumuhana 10, e pili ana i ka "Hooponopono Ekalesi,' aponoia.
Na Kalino (komite) i ko Kohala Hema, na Meheula i ko Kekaha; noi hou mai o Timoteo, e waiho pu hou ia keia hoike kihapai a noonoo pu me ke kumuhana 10 aponoia.
Na Kalaiwaa i ko Kailua me He lani; noi mai o Kalino, e waiho ia keia hoike kihapai a nooonoo pu me ke kumuhana 5, aponoia.
Na Meheula (komite) i ko Kealakekua me Kona waena; noi mai o Kalaiwaa e hoopanee ia keia halawai a noho hou i ka hora 9 a.m. o ka Poalua, aponoia. Hoopanee ia na hana me ka pule a ka luna hoomalu.
La hana 4- Halawai hou ka aha e like me ka mau, lunahoomalu ma ka noho, weheia na hana me ka himeni a me ka pule, hapalua hora haipule, heluhelu ia ka moolelo o ka halawai i hala a aponoia.
Hapaiia ke kokua o na hoike kihapai. na ke kakauolelo i ko Pukaana, noi mai o Timhteo e lawe i keia hoike kihapai a noonoo, apono ia; noi mai o Kekuewa, na ke kakuolelo o keia aha e pane aku iaia ma ka hoouna leta ana, aole pono e hookomo i na mea pili aupuni ma na hoike kihapai, aponoia.
Na ke kakauolelo i ko Kahoe, na Meheula i ko Milohi, na ke kakauolelo i ko Kalapana a me Opihikao, noi mai o Kekuewa e laweia keia hoike a noonoo, aponoia, a ma o ke kuka ana o ka aha, he mea pono no i keia aha e ao aku ma o ke kakauolelo la i ke kahu ekalesia o Kalapana me Opihikao, aole e lawe palua hou mai i na hoike kihapai no Kala paua a me Opihikao ma keia mua aku e pono ke hoohui i hookahi e like me ke kauoha mau o ka aha. Na Kalawe i ko Puula, noi mai o Kalino e waihoia keia hoike a noonooo pu me ke kumuhana 12.
Hapaiia ke kumuhana 3. 1 No Hamakua hikina mai, e noi ana e ae aku ka aha i ko lakou komite Waiohinu e komo aku ma na ekalesia o keia ahahui, no ko lakou pilikia aie hale kahu, he $80 wale no, noi mai o Kekuewa e lawe a noonoo i keia palapala hoopii, aponoia, a ua apono loa la aku ke noi, e komo aku no ia pilikia ma na ekalesia o keia mokupuni. Hapaiia ke kumu hana 4, ma ke noi hou a Kekuewa, e kapaeia ka noonoo ana i keia kumuhana a hiki i ka wa e noonoo hou ia ai, aponoia, a ua noi mai o Kalino e hapaiia ke kumuhana 5. Na Makuakane ka elele mai Laupahoehoe mai i hoike mai no ke ola o ko lakou kahu, a ma ke noi a Kekuewa, ua kohoia o Kamakawiwoole i komite hoeueu no ke awa kaulana o Laupahoehoe. Me ke ola o ke kahu o Kohanaiki, ma ke noi a Kalaiwaa e lilo o Kalino i komite no ia hana i kokoua pu ia aku e ia, aponoia. No Kealoha o Onomea, ma ka noonoo ana o ka aha, ua noi mai o Kekuewa e kauoha aku keia aha euanelio i ka Pap Hawaii e hoomau mai i ka hoouna ana i na dala e $100 no Kealoha, iloko o kela a me keia makahiki, aponoia. Nana hou no, e palapala aku i ka puuku o ka Papa Hawaii, e haawi mai ia mau dala, aponoia.
Waiho mai o Kalino he olelo hooholu, a ua hooholoia, oia hoie e kokoua na laila kahu o keia aha kekahi i kekahi, no na pilikia i loaa i ko lakou mau hoa kahu, a e oluolu na ekalesia aole e keakea i ko lakou mau kahu no ia mea, aponoia. Hapai ia ke kumuhana 6, aohe hoike. Hapaiia ke kumuhana 7 a me 8. Hoakaka mai o Timoteo i na mea e pili ana no ia mau oihana, a he nui no na mea e ae i hoike ia mai e na hoa, a he mea pono no e hooikaika na ekalesia a pau no ka waihona o ka Papa Hawaii aponoia.
Kumuhana 9. E hoomau ia no na komite i koho mua ia ma na ekalesia kahu ole. Kumuhana 10 He nui na mea i hoakaka ia no Luhiau a me kona ekalesia, a ma ke noi a Timoteo, he mea pono no e haawi ia no Luniau i ka makahiki i elua haneri dala, ($200) mai ka waihona ae o ka Pap Hawaii, aponoia.
Noi mai o Kekuewa e hoopanee ia keia aha a noho hou i ka hora 1 p.m. aponoia.
Noho hou ka aha e like me ka hoopanee ana, pule o Luhiau. Hapai ia ke kumuhana 11. Aohe keiki. Kumuhana 12. Na Luhiau i hoakaka i kona hale kahu; Kahooio i kona, Meheula i kona; a ma ke noi a Kalino, S. Kaumuloa a me Kaninau kona hope, na komite e hele aku ai e noi i na dala aie hale kahu o lakou iloko o na ekalesia o keia mokupuni, aponoia. Na Kalawe i Kona, a ma ke noi a Timoteo, e koho ia i komite e hele aku e paipai i na hoahanau ma Puula no ka hale kahu, aponoia. Koho ia o Kekuewa i komite apono ia.
Hapaia ke kumuhana 13. Na Kekuewa i hoakaka mai no ke Kula Hanai o Kohala, ua maikai ma na ano a pau, aohe mea pilikia. Na Kalaiwaa, no na dala i hooholo ia ai no na keiki eha a ka Ahahui i ke Kula Hanai o Hilo, ua haawi no kekahi mau kula sabati, a koe no kekahi.
Ma ke noi a Kalaiwaa, ua hapai hou ia ke kumuhana 19. Ua nui no na mea i hoakaka ia mai, a ma ne noi hou a Kalaiwaa. He mea pono no i ke kahu o Kekaha, e hoi aku oia a noho ma kona kihapa me ka haalele ole, aponoia.
Kumuhana 14. Aohe mea i kamailio no ia kumuhana. Kumuhana 15. Ua nui na kuka ia ana, a ua kauoha pu ia na komite a me na ele, e hoi aku a paipai i na ekalesia no keia mea. Kumuhana 16. Aohe mea i kamailio na kela. Kumuhana 17. Na ka luna hoomalu i koho i na kemite. Kalino, komite no na ekalesia o keia aha; Kalawe, komite no na hana o keia aha. Kumuhana 18. Hooholo ia ma Kalapana, Puna, Hawai, i ke kau o March, 1894, e hiki mai ana.
Hapai nou ia ke kumuhana 4. Na ke kakauolelo i heluhelu i ka Kalino kumumanao ma Luka 19:40.
Na Timoteo ka luna hoomalu o ke komite i hooike mai i ka lakou hoike e pili ana i na hoike ihapai, a na aponoia. Na Kekuewa i noi mai, e hoouna ia keia hoike komite ma ka nupepa KUOKOA, hooholo ia.
Hapaia ka hoike a ke komite Imi Haawina. Ma ke noi a Kalino, e hoopau loa ia keia hana, haule. Na Nakanelua i waiho mai he olelo hooholo. Olelo Hooholo- Hooholo ia: Ke haawi aku nei na lala o ka Ahahui Eunalio o ka Mokupuni o Hawaii i na hoomaikai piha i na makamaka a me na hoa o ka ekalesia o Kohala Akau, make kokua ana mai i na mea e oluolu ai na ola kino o na lala o keia aha, aponoia.
Noi mai o Kalino, e hoopaneeia keia halawai a noho hou ma Kalapana, Puna, Hawaii, hooholo ia.
Noi mai o Kahooio, e heluhelu ia ka moolelo, aponoia.
Noi mai o Kalino, e hoouna ia keia moolelo ma ka nupepa KUOKOA, aponoia.
Hookuula na hana o ka aha me ka himeni a me ka pule a ka lunahoomalu
L. K. KALAWE
Kakauolelo o ka Ahahui Eunelio o ka Mokupuni o Hawaii.
Koae, Puna, Haw. Sept. 15,1893.
HE MOOLELO
Hooniua Puuwai
-: NO:-
OLANDO KAAKA
Ka Opio Noho Waonahele.
KA HIAPAIOLE O KA PU RAIFERA.
Ka Puuwai Waipahe.
-: NONA:-
Ka Umauma i Lalapa ia e ke Ahi o ka Wiwo Ole, a o ka Ui Kaili Puuwai Hoi.
MOKUNA. III
HE HOALOHA KUPAINAHA.
HE HOALOHA KUPAIANAHA
Ae, e hahai ana no au ma na wahi a pau au e alakai ai ia'u, aka, ke nonoi aku nei nae au ia oe, he mea maikai e hele mua mai oe e ike i ko'u mau makau."
"I kou mau makua," wahi a ka opio i puana ae a i ma ke ano hikilele a me ka puapuai ana a e a ka ula ohelohelo ma na papalina nohea o ka opio kanaka ui.
"Ua maopopo ia'u kou manao, aka, mai hopohopo oe no laua. Ua nui loa ko laua aloha i ka laua keiki kamakahi, a aole loa laua e ae ana e ike ia'u e na-u ana no kekahi mea, a oiai no hoi he kaukaulii ko'u makuakane, eia nae, he hoowahawaha loa kona naau i ka poe hookapukapu ia lakou iho, a maluna no hoi o na mea a pau, pehea auanei laua e hoole ai ia oe no ka lilo ana i kane na'u ka mea hoi nana i hoopakele i ka laua lei hookahi mai ka luakupapau mai o ka lokoino? Aole, aole loa a'u mea e hopohopo ai mai ia laua mai," wahi a Ada i kamailio aku ai me ke koo o kana mau huaolelo.
"Ina pela e kuu aloha, alaila, e ae ana no hoi au me ka paulele maluna o kau mau olelo hooeha puuwai, aka no keia manawa nae, ke nonoi ae nei au i na lani e kiai mai ia oe e kuu aloa me na hoopomaikai ana mai ia oe a me a'u no ka wa e hiki mai ana," wahi a ka opio hahai holoholona.
Ua nana hou iho la ka opio Olando i na helehelena ui o ka lede opio, a haawi iho la he honi hoomau ma kona mau lehelehe palupalu, a huli ae la ia a hele aku la no ke kae o ka muliwai, kahi hoi a kona wahi waapa e lana malie ana, a mamua no hoi o kona ee ana aku iluna o kona wahi waa, ua huli hou ae la oia a nana aku la i hope, a ike aku la oia i kana ipo aloha e ku nana mai ana no iaia, nolaila, ua haawi aku la oia i kona aloha hope ma ke ani ana aku me kona lima, Ia wa, ua kau aku la oia ma kona wahi waa a hoe aku la me ka piha o kona puuwai me na manao hauoli no ko laua wa e hooliloia ai he kane a he wahine.
MOKUNA V.
KA HULI WAIWAI OLE ANA.
I ka wa a ka opio i hiki aku ai ma kahi ana e waiho mau ai i kona wahi waapa, oia no hoi ka wa a ka la i napoo aku ai malalo o ka ilikai o ke kukulu komohana, a no ia mea, ua awiwi iho la oia no ke ake e hoea i kauhale mamua o ka uhi e ana mai o na eheu o ka po maluna ona iloko o kona alahele pouliuli maloko o na ululaau loloa meameha. Mahope iho o kona kau-o ana i kona wahi waa a kau iluna o kona wahi mau, ua hoko ae la oia i kana mau ilio hookolo meheu, a auamo ae la i kana pu raifela ma kona poohiwi, ua hoomaka aku la oia e hoi no kona home noho kuahiwi. O kona alahele nae e hoi aku ai he ano inoino no, a ua hoopouliuli mau ia e na lala laau loloa i hele a kuuwelu ilalo, a nolaila, na hiki ole iaia ke ike aku ia mau me ka maopopo.
Ua hala paha iaia hapaha mile, aia hoi. ua hoohikilele ia kona naau mamuli o ka have ano kupinai ana a kana mau ilio, a i kela a me keia wa, e holo mai ai lana me ke ano kapalili a honi mai la i na wawae o ko laua kahu opio. Nolaila, a mamuli o keia mau hana anoe a kana mau ilio ua liuliu ae la ka opio i kana mau mea kaua, a ua paa ae la oia i kana pu raifela ma kona mau lima, a ua hoomau aku la oia ma kona alahele me ka makaala loa, Aole paha i hala iaia he elua kaulahao mai kela wahi mai, ua lohe aku la kona mau pepeiao i ke kani papalua ana a e o ke kiko o kekahi pu, me he mea la ma kona aoao ponoi no.
I kela wa, ua huli koke ae la oia, a nana aku maloko o ka aoao o kahi ana i ku iho ai, aia nae, he pouli mai nae o kela pouli, ua ike aku la kona mau maka ooi i kekahi mea me he weli ala a ke kukae-pele a e huila ana maluna o ke kano o kana pu raifela i kaulona pololei ia mai i ke kino o ka opio.
Me ka hikiwawe ka opio i hapai ae ai i kana pu, a iloko o ke sekona hookahi, ua kani mua aku la ka pu a ka opio a lohe aku la oia i ka uwe kapalili ana mai kekahi leo. Ia wa, ua hele koke aku la ka opio naau maemae e ike kumaka heaha la ke ano o ka mea i poino i kana pu ahailona ole o kela ululaau.
Wehe ae la oia he ahikoe mai kona pakeke ae a hoomalamalama. I kona ike ana iho he Ilikini, ua manao mua iho la oia, o keia no kekahi o na Ilikini i hahai ae i ka lede opio, a hoohoka ia ai e ia, a ua hele mai hoi e panai i ko lakou inaina.
Ia wa, ua kukuli iho la ka opio ma ka aoao o ka Ilikini poino, a nana iho la ma na helehelena o ka Ilikini, a hoomaopopo iho la oia e ola ana no ka Ilikini, oiai e nunulu ana no oia e nunulu ana no oia me he puaa la. Ia wa, ua huli ae la ka Ilikini a nana ae la i ka opio, a me ka leo ehaeha ua pane ae la oia:
"E make ana ka Ilikini! Ua make hoi i ka pu a ka opio a ka opio hahai holoholona lima eleu loa."
Unuhi koke ae la o Olando i kekahi wahi omole mailoko ae o kona poli, a holokiki aku la oia ma ke kae o kekahi wahi kahawai e kahe ana ma kahi kokoke, a hoopiha ihola oia i kekahi wahi kiaha uuku me ka wai huihui o ke kahawai a hoi koke mai la, a hoohainu iho la i ka Ilikini me ke kiaha wai i paipu ia me ka waiona mailoko mai o kahi omole uuku. Mahope ihoo ka inu ana o ka Ilikini i kela mea, ua ano akakuu mai la kona eha, a ua hiki pono iaia ke kamailio mai.
"E lawe ana paha ka opio helehelena haikea i ko'u ili poo?" wahia ka Ilikini i puana ae ai.
"Aole, aole loa, oiai aole loa au i makemake e hoopoino i i ke ola o ke kanaka ili ualula, aka, o oe nae ka i makemake e lawe i ko'u ola," wahi a Olando i pane aku ai me ka naka haalulu ana ae o kona kino.
"E huli iho oe iloko o kuu wahi eke ili, a wehe ae i na mea oloko," wahi a ka ili ulaula i kamailio ae ai ia Olando, me ke ano akakuu maikai o kona helehelena i ka maopopo ana paha iaia aole e oki ia ana kona ili poo.
Ua hooko ia ia manao on a e Olando a like me ke kauoha, a ua unuhi ae la oia he omole rama, a me lima dala ulaula Pelekane.
"Na kekahi kanaka ili keokeo i haawi mai i kela mau mea ia'u nei," wahi a ka Ilikini i puana ae ai me ke kaulono ana o kona mau maka maluna o ka omole a me na apana dala gula.
"Pehea, na ke kanaka i haawi mai i kena mau mea ia oe," wahi a ka opio, me ke ano hikilele a me kona hoomanao koke ana ae i na olelo a Karona ke kanaka malihini ana i hookipa ai ma ia la no.
"Ae, ua haawi mai kela haole ia'u makai o ke kulanakauahale." wahi a ka Ilikini.
"Owai ia mea, a owai kona inoa?" i ninau koke aku ai ka opio
"Aole e hiki ia'u ke hai aku i kona inoa, oiai aole au i ike i kona inoa. Eia wale no kana i olelo mai ia'u, e law au i keia mau mea, a e hele mai e ki ia oe a make aka ua oi aku nae ka hikiwawe o ka opio mamua o'u."
"Pehea kona ano, e hai mai ana oe ia'u? Ina oe e ike hou ana iaia, pehea oe e hiki ai ke hoomaopopo?"
"Aole loa au e ike hou ana iaia, no ka mea e make ana au."
I ka Ilikini i puana ae ai ia mau huaolelo, ua huila ae la kona mau maka, e hoike ana ua nui ka ehaeha i loaa i kona kino. Ua noke aku ka opio i ke koi aka, aole e hiki i ka Ilikini ke pane hou mai; a liuliu wale kona waiho ana, ua puana ae la oia: "E make ana au, a e popopo ana ko'u kino maluna o ka ilihonua, a e kaulai i a na ko'u mau iwi imua o na kukuna la."
"Aole loa oe e wahio ia ana pela. E kanu ia ana oe e a'u a e huna ia ana kou kino me ka maikai. Ke hoomaopopo nei au ia oe, oiai ua ike mua no au ia oe he Ilikini maikai, a ua maopopo no ia' aole oe i hana i keia me ka manao ino, aka ua hoowalewale ia oe e kekahi o na haole naau lili, nolaila, mai hopohopo oe no kou kanu ole ia.
"E oluolu oe e kanu ia'u a hohonu ilalo, a e hoohaliu i ko'u alo ma kahi a ka la e napoo aku ai, kahi noho hoi o ka uhane nui, e kala mai ia'u, eia au ke hele nei."
"Pela iho la ka e nalohia ai ka lahui ili ulaula," wahi a Olando i nalu iho ai, iaia e nanana pono ana maluna o ka heleheleno o ka mea make.
Mahope iho, ua kauo aku la ka opio i ke kino make o ka Ilikina a mamao iki aku iloko o kahi hihipea loa o na ulunahele. Ia wa, ua hoi hou mai la oia ma kahi a kona puolo e wahio ana, a me kana pu, a mahope o kona hoopiha hou ana i kana pu me ka pauda a me ka poka, ua hoomaka hou aku la oia e hoi no kauhale me na kapuai mama,. He nui na mea ano e i komo mai iloko o kona noonoo. Ua noonoo ae oia no Karona a me kana mau olelo iaia ma ia la no, a pela no hoi me kana mea i aloha nui ai, a na ia mau noonoo i hoomama ae i kona mau noonoo pioo.
Ua poeleele loa akahi no a hoea aku ka opio no kona wahi hale e kakali ana no kona hoe mai. Hoomaopopo aku la oia aole i luuluu loa ka manao o kona makuahine oiai ua apo mai la oia i kana keiki me ka minoaka malie, a hookipa aku la iaia no loko o ka hale, kahi hoi a kona paina ahiahi e kakli mai ana me ka makaukau. He lehulehu na wa a Olanda e ai ai me ke kau mau o kona mau maka maluna o kela pahu oka nui, a no ia mea, ua hooholo iho la kona maao e kuekaa i kela pahu ma ia po, a e huli oia in a he wahi huna io paha kekahi o loko o ua pahu la . He mea oiaio ua hilinai oia i na olelo a Karona, a in a paha e loaa io ana iaia, alaila he mea paha ia nana e hoopau i kona pohihihi no ka mea e pili ana i kona mau makua.
Ua mahele ia kahi hale iloko o eha mau keena, he ekolu ma ka papahele o lalo a he hookahi maluna ae, a o kahi keena uuku iluna, ioa ko Olando wahi moe, a o kekahi wahi keena o lalo malaila o Marion, a o kahi keena ma ke kua o ka hale, maliala kahi luahine aoo e moe ai.
Ua hoi koke no o Moriana e hiamoe e like no me kona ano mau, a pela no hoi me kahi kauwa paele. Nolaila, ua kaali iho la o Olando a hiamoe pono loa laua, ia wa oia i ala ae ai, a me na kapuai wawae palanehe, ua iho aku la oia aloko o keena paina kahi a ua pahu la e ku ana. Ia wa, ua komo aku la oia iloko o ke keena moe o kona makuahine a lawe mai la i ke ki o ka pahu. Hele hou aku la oia a wehe ae la i ke pani o ka pahu, a me ka houpo kapalili, ua hoomaka iho la oia e wehe malie ae i na mea a pau o ka pahu a hiki i ka waiho olohelohe ana o ka pahu. Ua hoomaka iho la oia e noii ma na wahi a pau oloko o ua pahu la me ke ake e loaa iaia o kekahi wahi hoailona e hiki ai ke mano ia aku he wahi huna paha kekahi, aka, aole loa he loaa iaia o kekah mea. Me ka nanaina kaumaha ka opio i hahao hou ai i na ukana oloko o ka pahu, a laka hou iho la oia. (Aole i pau.)
Hoolaha Kumau.
KA AYER SASEPARILA
Oia ka LAAU oi loa o ka maikai no na mai i hookumu ia mai ke koko ino mai. Ua oi loa ae hoi, no mea, o kona kahua i hookumui ai o ka
Honodorusa Saseparila Oiaio.
No ka mea, o ka LAU NAHELEHELE a me na mea a pau i maa i ka hoohuihui ia, oia na laau oi loa o ka maikai, a no ka mea hoi ua ike ia ka waiwai io ma ka Iapaau ana i ua MA'I o ke KOKO- ua oi ka
Ayer Saseparila
ma na mea a pau e hooikaika a e kukulu hou ai i ke kino i hoonawaliwali ia e ka ma'i a me ka eha.
Ua hoonoono ia ka ai, ua hoopau ia ka ma'i o ka waihoa hoowali ai, ua hooikaika ia ke Ake a me ka Puu Hoowali ai, a hoohana maikai ia na lala a pau o ke kino. Ua hookuke ia mai ke kino ae, ka laau make o ka ALAALA, ua hoola ia na EHA, na PUHA, na RUMATIKA, na MAIHEHE, na HUEHUE a me na ma'i ma ke poo kahi wale o ka hupe, a ma na wahi a pau ke hooia mai nei na Kauka alakai ka maikai o keia laau.
Ke hula nei la hai, a e hoola no hoi ia oe.
No ke KUMU a me ke ANU o ka
Ayer Cherry Pectoral
ka laau lapaau alakai o na ohana.
No ka NALULU, ka LEOPAA ka LENA a me kekahi mau mea inoino e ae o ka opu, e lawe i ka
AYER HUAALE GATHARTIC
E makemakenui ia nei e ko ke ao puni.
Hoomakaukauia e Kauka J. AYER & Co., Lowell, Maskeuseta.
HOLLISTER & CO.
Na Agena ma ka Paeaina Hawaii.
KAKELA
ME
KUKE
KA- HALEKUAI- NUI
-O MA-
WAIWAI LIKE OLE
NA MEA
HANA KAMANA A PAU
Na lako pili hao kukulu hale,
Na kepa,
Na lei ilio,
Na kaulaha ilio,
Na Pahi,
Na Upa,
Na kope hulu
Na Pulupulu
PALAU LIO
Na mea mahiai
Na au lio
Na au koi
Na kna bipi.
Na lei bipi
Na kaulahau bipi
Na uwea pa
Na kaa palala
Na mea piula
Na ipuhao
Makau me Aho Lawaia
Na Iliwai
Na kaula,
Na hulu pena,
Na pulumi
Na pena, me ka aila,
Na koppa
Na aila mau
Na pakeke
Na pakeke hao,
Na kapu hao,
Na pane
Na kukaepele
Na uwiki, a me
Na ipukukui
Mikini Humuaumu Kaulana
Wilcox, & Gibbs Hookahi Lopi.
ka Remington, Elua Lopi.
A me na ukaea he nui loa o kela ano a mea keia ano.
Kakela me Kuke