Ka Nupepa Kuokoa, Volume XXXII, Number 40, 7 October 1893 — Page 2

Ka Nupepa Kuokoa

KE KILOHANA POOKELA NO KA LAHUI HAWAII.

 

MA KE KAUOHA.

 

  Ua hookohu ia aku o J. W. KUAIMOKU EAQ. I keia la, i hoe no ka Papa Alawai o ka Apana Auhau o Kona Hema, Hawaii no ka manawa i koe i hookakahaka ia ma ka make ana o D. H. Nahinu.

            J. A. King, Kuhina Kalaiaina.  Keena Kalaiaina, Sept. 27, 1893.                2461-3

 

Kuai o ka Pa Aina ma Ainahou, Honolulu, Oahu.

  I ka hora 12 awakea o ka POALIMA, Okatoba 27, mamua iho o ke alo o ka Hale Mana Hooko, e kuai ia aku ai ma ke kudala akea, ka Pa Aina @ ma Ainahou e waiho ia ma Alanui Alakea, Honolulu, Oahu, nona ka ili he 5000 kapuni kuea oi iki aku a emi mai paha.

  Koho kiekie e hoomaka aku ai, he $2,500.

            J. A. King, Kuhina Kalaiaina.  Keena Kalaiaina, Sept. 27, 1893.                2461-3

                                                                                                            142-Sept. 28, 29 and Oct. 26.

 

Kuai o na Pa Aina Aupuni Elua Mahope aku o Alanui Nuuanu, Honolulu, Oahu.

  I ka hora 12 awakea o ka POALIMA, Okatoba 27, 1893, mamua iho o ke alo o ka Hale Mana Hooko, e kuai ia aku ai ma ke kudala akea na Pa Aina Aupuni iloko o ka aina e noho ia nei e T. Sorenson a me J. H. Paty, Alanui Nuuanu, Honolulu, Oahu.

  Pa Aina 1.  He 2700 kapuai kuea ka ili, oi iki aku a emi iki mai paha.

  Koho kiekie e hoomaka aku ai, he $100.

  Pa Aina 2.  He 472 kapuai kuea ka ili, oi iki aku a emi iki mai paha.

  Koho kiekieie hoomaka aku ai, he $20.

            J. A. King, Kuhina Kalaiaina.  Keena Kalaiaina, Sept. 27, 1893.                2461-3

                                                                                                            142-Sept. 28, 29 and Oct. 26.

 

KA NUPEPA KUOKOA – ME – Ko Hawaii Paeaina i Huiia

No ka Makahiki          $2 00

No Eono Mahina         1 00

Kuike ka Rula

NA PUKA ANA        1 Pule  2 Pule  3 Pule  4 Pule  5 Pule  6 Pule

1 Iniha ..                      $1.50   $2.00   $2.50   $3.00   $3.50   $4.00

2 Iniha ..                      2.00    2.75    3.50    4.00    4.50    5.00

3 Iniha ..                      2.50    3.50    4.50    5.00    5.50    6.00

4 Iniha ..                      3.00    4.00    5.00    6.00    6.75    7.50

5 Iniha ..                      3.50    4.75    6.00    7.00    8.00    9.00

6 Iniha ..                      4.00    5.50    7.00    8.00    9.00    10.00

 

  O na Olelo Hoolaha a pau e hoouna ia mai ana no ka Hoolaha maloko o keia Nupepa, e hoouna pu mai me ka auhau, a ina aole, aohe hookomo ia.

 

 

 

HOOPUKAIA E KA HAWAIIAN GAZETTE CO.

H. M. WHITNEY, Luna Nui.

J. U. KAWAINUI, Luna Hooponopono.

No Honolulu, Oahu, Lakou a pau.

 

POAONO,  - - - OKATOBA 7, 1893.

 

Ua Ike mai o rusia i ke Aupuni Kuikawa o Hawaii.

  Ua loaa mai nei ma ke Keena o ka na aina e, ka palapala mai ke Kuhina nui mai o Rusia, oia o De Giers, e hoakaka mai ana ai Peresidena Dole, ua ike mai o Rusia a ua hooia mai a me ka hoapono i ke Aupuni Kuikawa, oia ke aupuni oiaio no Hawaii.

  O keia no ka mua o na palapala oia ano mai kekahi aupuni mai ma Europa.  O Amerika Huipuia, ua ike mua mai oia, ma ka hoouna ana mai i ke Kuhina Blount.

  I ka nana aku, ua hana o Rusia mamuli o kona kuka mua ana me kona makamaka nui me Amerika Huipuia.  Ke kokua like nei laua mahope o keia Aupuni Kuikawa.

 

No ka Ninau Hawaii ma Wasinetona.

  I ka Poalima i hala i ku mai ai ka “Alameda,” eia nae, aohe no he mau mea hou ma na nupepa no ko Kalivilana ma hooholo manao ma ka ninau o Hawaii, ua loaa nae ma na leta mai kekahi mau mea maopopo penei:

  Aole i hoike mai o Kalivalana, aole hoi o Gresham, i ko laua manao i na Elele o ke aupuni Hawaii ma Wasinetona, oia o Kakina laua o Alekanedero, he mumule pu wale no.  Ua loaa mai nae ka oiaio o ke ano nui o na mea e kuka ia nei mawaena o ke Kuhina Gresham laua o Blount.  Ua ano like no ka hapanui me kela olelo a ka Herald o ka la 8 o Sepatemaba, koe nae ka mea a ka poe anee ali i hauoli ai.  Aole e koho balota ana na kanaka a hooholo i ke ano o ke aupuni a lakou i makemake ai. Ua hoka loa ka poe anee alii ma kela mea.  Ua kukaawale loa ko Kalivalana ma manao mai ka ae ana aku e kukulu hou ia ke aupuni alii ma Hawaii nei. He kapulu ka hana o kela ano aupuni, aohe e loaa ka maluhia a me ke kuonoono mallaila. E kakoo ana o Amerika Huipuia i ke aupuni kuikawa, mamuli o ka maikai loa o kana hookele ana, a hiki i ka wa e hoolala ai i aupuni Ripubalika me na luna i kohoia e na kanaka kupono i ke koho.  Aole e haawiia ana ka mana koho balota i ka lehulehu.  E hoohaikiia ana ka mana koho i pono ai ke koho naauao.  Pela e loaa ai he aupuni ma Hawaii nana e hoomau i ka malama pono ana i na hana nui ma keia kiko waena koikoi o ka moana Pakipika, i ole ai e aui ae i na hana hupo a me ka pakaha wale e like me ka Loteri.

  Aia a kukuluia maanei ua aupuni hou la, alaila, na Amerika e koo aku i kela aupuni, i ole e hookahuli ia e na hoohau naele kuloko.  Aole nae o Amerika e hokai mai ana ma kona mau hana kuloko.  Ma na mea kuwaho nae e hoomalu ikaika ana o Amerika, a iaia wale no ka hooholo ana no na hana me ko na aina e.

  Pela na manao e hoolala ia nei e Gresham laua o Blount no ke kukulu ana i aupuni hoo maluia ma Hawaii nei.  Aia a maopopo ka laua mau manao hoolala, a hoapono ka Peresidena, alaila, e waihoia kela manao imua o na elele o ke Aupuni Kuikawa, a i ole ia, imua o na poo aupuni ma Honolulu nei, a aelike mai ke aupuni Hawaii e hana i kuikahi ma ia ano, alaila, ma o ka hooholo loa na o ka Aha Senate ma Wasinetona, e mana ai ua kuikahi la.

  Aohe o makou kanalua i ka pololei o keia wehewehe ana.  Malia aole paha no keia manawa e hooko ia ai ko makou makemake e hoohui koke, aka i ka hakilo ana nae, e loaa ana ke aupuni maluhia a me ka hookele maikai ia, e holomua ai o Hawaii ma ka maikai a me ke kuonoono.  Mahope aku, he lana ko makou manao, e ae ia ana o Hawaii e komo pu aku maloko o ka ohana hanohano o na mokuaina o Amerika Huipuia.

 

“He Omole ke Awa o Puuloa” wahi a Spreckels.

  O kekahi olelo lapuwale keia a ka Ona Miliona i kukala aku ai ma Wasinetona.  Ua like ke awa o Puuloa, ka mea a Amerika Huipuia i makaleho nui ai me ka omole.  Ina e komo aku kekahi aumoku nui o na aumokukaua o Amerika Huipuia iloko olaila, i ka wa kaua me Beritania, alaila, ua hiki no i ka mokukaua hao nui hookahi o Beritanica ke kalewa mawaho a papa loa ia lakou, aole e puka mai iwaho.  He umoki no ia moku Beritania e pani ai i ka nuku o ua omole la o Puuloa, nolaila, aohe waiwai o kela awa o Puuloa ia Amerika Huipuia.

  Pela no ua Speckels loea nei i ao aku ai i na Luna Kiekie o Amerika no ka lakou kuhihewa loa ia Puuloa he awa kuonoono iloko, akea a me ka maluhia e kupono ai e lilo i pukaua no ka lakou aumokukaua ma ka moana Pakipika.  Ua nana mai lakou me ke kau nui i kela wahi no na makahiki he iwakalua i hala.

  Ua hoouna mai lakou i na Generala kaulana, ia Schofield a me Alexander, na laua e makaikai, a ua hoapono aku.  Ua hoouna no hoi i na Adimarala Kiekie, na Kapena a me na Lutanela mokukaua akamai, ka poe ike lea i ke ano kupono o na wahi e maluhia ai na mokukaua.  Ua ana lakou i ka hohonu o ke kai mawaho a maloko o Puuloa.  Ua kaha i na kii akamai o na kai a me na kahakai a pau o kela awa.  Aohe mea i koe ia lakou i ka huli ole ia, a ua hoike aku i na mea a pau i na poo ma Wasinetona.

  Ua hooholo kela poe mamuli oia huli akamai ana, a o Puuloa no hoi ke awa makee loa ia no Amerika.  Aka no hoi, he lalau loa no a me ke kuhihewa ko lakou noonoo ana!  Ua hele aku nei o Spreckels ma Wasinetona e kuhikuhi aku i ka lapuwale o kela awa o Puuloa, he omole wale no ia, e hiki ai ke pani wale ia ka nuku, e puka ole ai na moku a e paa loa ai maloko.

  E hu loa ana paha ka aka o ka poe luna Senate loea ma Wasinetona ke lohe lakou i na olelo pupule a Spreckels, ke kanaka ike ole i na loina o ke kaua.  He mea maopopo loa i na mea a pau, ua oi aku ka ikaika o ka moku maloko o ke awa ma kahi kai malie i ke kipu ana, mamua o ka moku kalewa wale ma ke kai kupikipikio, e hiki ole ai ke kipu pololei no ka onioni.  Aole no hoi e nele ana o Puuloa i na pukuniahi nunui e hoolele ai i na poka pahu i na mile 5 a 10 paha ka mamao, a poha mapuni kuikawa no keia kumuluna o ka moku o ka enemi e hookokoke mai ana.

  He mea keia e hauoli ai ka aoao hoohuiaina, i ko Spreckels hoike wikiwiki ana i kona ano naaupo imua o na Luna Senate noeau hanohano ma Wasinetona, e hoohenehene ai lakou iaia.  Aole lakou e maliu ana i na olelo o ke kanaka e hoike pupuahulu ano ole loa ana pela i ka haiki o kona noonoo ana.

 

Ka Kakina Palapala Hamama ia Claus Spreckels.

  Ma ka la 21 o Sepatemaba, ua hoolaha ae o L. A. Kakina ma Wasinetona i kana palapala hamama ia Spreckels.  Malaila ia i hoahewa hou aku ai iaia no ka imi e hoopilikia i ke Aupuni Kuikawa ma ke koi hookikina ana i kana aie he $95,000 i hoaie ai i ke aupuni o ka Moiwahine.  Ua olelo no hoi o Kakina, ua hoonoho ia na koa e malama i na hale aupuni i pale ia aku ai o Spreckels a me na poe kokua e ae o ka aoao moi, i hiki ole ai ia lakou ke hooko i ka lakou mau mea e hooweliweli pinepine ai e hoihoi ae ana lakou i ka Moiwahine me ka lima ikaika.  Ua hoike aku o Kakina i ka hekau mau ana o ka maluhia a me ke ahua dala nui ma ka waihona, he mau hooia e akaka ai ka holopono o ke aupuni hou.  Ke hooia nei o Kakina no ka poe mahiko, ua makemake lakou a pau me ka aneane ole o kekahi mea e koe, i ka hapai ana i ko lakou mau ulia me ka nele i na limahana kepa ia, mamua ae o ka hoomanawanui ana e moe wale aku ai no malalo o ka hoomalu aupuni kapuli o ka wa i hala.  Ua ike lea o Spreckels, wahi ana, ua ike no hoi na poe mahiko e ae, a ua ike na kanaka o Amerika Huipuia, o ka loaa ana i ka poe mahiko o Hawaii o kela uku kaulele e haawi ia nei he elua keneta o ka paona, e komo mua ana ke kanaka waiwai iloko o ke aupuni o ka lani mamaua o ka loaa ana o ua uku kaulele la ia ka poe mahiko.

 

Ke Koho Balota ma Hawaii Nei.

  Ua lilo i mea kamailio nui ia ke koho balota ana no ke aupuni o na makaainana e makemake ai, a ke pu-a mai nei na leo olowalu mai o a o o ka aina.  Ke makemake nei makou e hoakaka aku imua o ko makou poe heluhelu, oiai, o Thoe. H. Davies, kekahi o na haole kalepa o keia kulanakauhale, ua hoahewa mai oia me ke kue ana i ko makou manao kuokoa, a e hoahewa maopopo loa ana i ka hoohui me Amerika me ke koho balota mua ole o na kanaka i ka aoao a lakou i makemake ai.  O kekahi manao ahewa ikaika loa o ua makamaka maikai la, ua ili ke koikoi o kona ahewa maluna o na Rev S L Desha, J Kauhane a me J. K. Iosepa, ua pono anei ka hoahewa ana o lakou anei ka poe nana i paipai i ka Moiwahine e kukala aku i kumukanawai hou?

  Ma keia manao hoahewa a ua makamaka la, aole paha oia i noonoo iho i ka hana a kona aupuni maluna o ke aupuni o Inia, he elua miliona a oi na kanaka maluna o ia aupuni, aole naie i ninauia ka hapanui o na makaainana, aole no hoi ma ke koho balota, aka, ua lawe ae ke aupuni o Beritania i panalaau nona me ka ui mua ole ia o ka manao o ka lahui, aka, me na poo aupuni wale no e noho mana ana ia manawa.

  O Irelani kekahi, ina e waihoia na ka lahui e koho i ko lakou makemake iho, he mea maopopo aole oia e komo iloko o ka hoomalu ana a ke aupuni o Enelani.

  Ma ko makou ike, ua maluhia kela mau aupuni i kaa malalo o na hoomalu ana a ke aupuni o Enelani, eia nae ke kue ino loa nei oia ia makou no ke kokua ma ka aoao hoohuiaina me ke aupuni o Amerika, ua ike makou i ka manao o ua makamaka la e kue nei i keia aupuni i ka hoohuiia me Amerika, a ina paha me ke aupuni o Enelani, ina la aohe hana a ua makamaka la.  Ke kuhihewa nei ka lahui mai o a o e koho balota no ka hoihoi hou ae i ke alii, ka moi i kipakuia, aole loa pela, no ka mea, aole loa he poe naaupo ko ke aupuni o Amerika e like me ka hapanui o na kanaka iloko o keia aina, e hele mai ai lakou a lima kakauha mai, a i ole, kaili ku ae i ka hooponopono aupuni kuloko ana o ka poe e noho mana nei.

  E kuka ana lakou me ke auhana ano nui, aole me ke alii i kipakuia, ke hoolohe wale nei ka lahui i na hoolaha lalau oiaio ole, o ka poe naauao maoli, ua ike lakou i ka oiaio o keia mau hoakaka ana, a o ka poe i ike ole o lakou ka poe puni wale.

 

Claus Spreckels ma Wasinetona.

  Aia kela Ona miliona hoomaemae kopaa ma ke kulanakauhale poo o Wasinetona Amerika Huipuia.  Ua hele oia ilaila e pekapeka ai a me ke ao aku ia Peresidena Kalivalana a me kona mau Kuhina, a me na luna kiekie e noho pu ana ma ka aha Senate.  E kuhikuhi ana ua Ona miliona nei i kela poe hanohano i ka lakou mea pono e hooholo ai no Hawaii nei, aole pono ia lakou e hoohui aku, aka e hoihoi aku no ia Liliuokalani maluna o ka nohoalii.

  He kanaka waiwai nui no o Spreckles, he ike no i na hana maamaalea e hoahu ai i ke ahua dala a nui.  He maamaalea no hoi i ka hoomaemae kopaa a me ka piepiele aku i ke kopaa. Eia nae kona hemahema o ke ao aku i kela poe koikoi a kiekie ma Wasinetona, ka poe oi loa ae maluna ona ma ka hanohano o ka noho ana a @ ka mahalo ia e kanaka. He nui ka poe Senate, i oi loa aku ko lakou ike.  He poe loea ka hapanui o lakou, aka o Spreckels he hapa kona ike, aole i ao nui ia ma na buke.  He i’a nui no paha kela ma Kaleponi ma kona kiowai uuku, e au-u pu ana me kana mau pua i’a liilii malalo ona, hiki aku nae i Wasinetona, he i’a uuku o Spreckels, oiai he lehulehu na i’a nunui e a-u pu ana ma ua loko la.

  Akahi no o Spreckels a hele i Wasinetona e ao aku i kela poe kiekie.  I kona hoomaka ana e hoopuka i na olelo e lu helelei wale ia aku ana na olelo hoohenehene a lakou iaia.  Nolaila, ua ko ka makemake o ka aoaao hoohuiaina, e hele kino ana ko lakou enemi imua o Kalivalana ma, a e ike maka ana lakou i kona ano akena wale a me ka naaupo.

 

Ke Hailiili nei o Holomua ia Alapaki.

  He nui na olelo ma ka Holomua o ka la 2 o Okatoba, e hoino wale ana ia Lunakanawai Alapaki Kauka, he hoopilimeaai i ka Moiwahine mamua, a i keia wa he kue iaia.  O kana hana hoopilimeaai i olelo ia, oia no kona ao ana aku i ka Moiwahine i kona manawa i noho mua ae ai ma ka noho alii, e hoopau i ka Aha Kuhina mua, a e koho i Aha Kuhina hou.

  Eia ka pane no kela mea:  O Lunakanawai S. B. Dole kekahi i kokua pu me ka Lunakanawai Kiekie ma kela manao, i ka wa ihooholo ai ka Aha Kiekie pela.  O Makale wale no ka lunakanawai kue.  Ua ike lea nae na mea a pau aole he anee aliee o Dole, aka he kanaka kuokoa loa.

  Eia no ke ano maopopo loa o ka Lunakanawai Kiekie, e like me kona makua o Kauka i make, he aloha mau i na alii a me ka nohoalii o Hawaii nei, pela no ke keiki, he makee loa e hoomau i ka hanohano a me ka maikai o ke aupuni Moi.   Aka, i ka la 14 o Ianuari, 1893, ua ike oia e like me ka ike o pa poe naauao a pau, ua hele ka Moiwahine a hehena loa ma kana mau hana.  Nana iho no i hookahuli i kona noho alii, aohe mea nana e hoopakele ae.  Nolaila, hookahi wale no mea i koe e pono ai o Hawaii, oia ka hana a ka poe aloha aina oiaio a pau e pono ai, o ka imi i ka malu malalo o na eheu o ka Aeto lokomaikai o Amerika Huipuia.

  Ma ia mau la no o Lunakanawai Alapaki Kauka i hoike lea ae ai i kona makemake i ka hoohuiaina, ka mea ana i hoole loa ai mamua.

  Ua mau no hoi kona hoike ana i kela manao me ka huna ole, no ka mea, he kanaka kupaa ia o ka manao.  Ma ia mea e maopopo lea ai ka hele ino loa o ka aoaoa Moi i ka make, ma ka haalele ana a kona hoaaloha oiaio iaia, aole hiki ke hoomanawanui hou aku i kiona mau hana kapulu a me ka pupule.

  He makamaka aloha loa o Alapaki Kauka no na kanaka Hawaii, he kanaka noeau no hoi, a ua maopopo iaia, o ka pomaikai o ka lahui Hawaii, aia no ma ka hoomalu aloha ia mai e kona makamaka ikaika a me ka lokomaikai, oia o Amerika Huipuia.  Aohe wahi mea iki i koe e hiki ai ke hilinai hou aku i ke aupuni Moi.  Ua hele kela a ua popopo.

 

Na Manao Hoohui o Kekahi Mau Nupepa Amerika.

  Me he mea la ua hilinai piha ia ke Aupuni Kuikawa ma Honolulu e ka lahui kanaka.  O ka hoolilioia ana o na Bona Aupuni ma ke kumuwaiwai io maoli, he hoike oiaio ia o ka ikaika. E anoi la aku ana na mea maloko o ka hoike a ke Kuhina Blount.  Eia nae he mau kanalua nui ana no ke ano maoli, aka, aole e nele ana kona hilinai ma ka aoao hoohui.  Aia nae ke kau la maluna o ko na Hawaii kaunu ana, e hina ana oia ma ke aupuni hoomaluia, malia paha aole ia e kaawale loa aku mai ka oiaio.  – Nupepa Angeles Express.

 

  He kileana pono kilo aupuni ko na Iapana ma ka ninau o Hawaii, no ka mea e hauoli ko lakou aupuni ke liko ia lakou ka mana o na Paeaina o Hawaii.  Ua maopopo i na Pake ina e hoohui ia mai o Hawaii, alaila e paa ana lakou malalo o ka umii ana a ko kakou mau kanawai hoohaiki pake.  He kuleana ko kela lahui e keakea aku ai i ke kaheawai ana o na pake iloko o kela mau mokupuni ano nui o ka Pakipika e moe mai nei ma o aku o ka nuku o ka Ipuka Gula.  O ko keia poe kue ana i ka hoohui mai ia Hawaii, ua lawa loa ia kumu ma ona iho no kakou e pono loa ai e apono i ka hoohui mai.  --  Nupepa S. F. Bulletin.

 

  Ke pauaka loa ia nei ka mana hooko o Amerika Huipuia ma ko Iapana la nee ana ma Hawaii.  Mai loaa ole loa ia Iapana he manawa e nee ai malaila, o ka Kalivalana kumuhana apa wale no.  Eia oia ke ohi nei i ka hua o kona hokai wale aku no ma ka apana hana i okioki ia a liilii nana e hoopau aku ai.  –Nupepa S. F. Belletin.

 

  Ua lohe wale ia mai, ua kamailio ae o Claus Spreckels ma ke ano puhau wale e kuhikuhi aku ana oia ia Mr. Kalivalana i ka mea e hana ai no keia mea – oia ka mea e pili ana i ka ninau no ka hoohui ia Hawaii.  Mamua o ka hoomaka ana aku e komo ma kana huakai hoonaauao he mea pono ia Spreckels ke kukakuka me kekahi poe kilo aupuni ano koikoi i hiki ke lawelawe hana me ka Peresidena ma ka lalani o ia ano like me ia.  – Nupepa Washington Star.

 

  O ka ea o ko Hawaii Pae Aina, he maikai e hauoli maoli ai, a nolaila, he nui wale na haole Amerika lako i holo ilaila no ka hooluolu, a i ole no ko lakou ola kino.  Aohe o makou kanalua iki he mau umi ana o na tausani o na Amerika e pau ana i ka holo makaikai i ua mau pae aina “hoinaunau mea ipo la” i kela makahiki keia makahiki, ina e welo hou ana ka hae aeto maluna o lakou, a kukulu paa ia ko Amerika kuokoa maloko o lakou, a o ke kanawai Amerika, oia ke kanawai o ko lakou ku ana.  – Nupepa New York Sun.

 

Ke Kulana Ka-ha o ka Waihona Aupuni.

  Ma ka hoike hebedoma a ke Kuhina Waiwai Damon o ke Aupuni Kuikawa i heluheluia imua o ka halawai o na Aha Hooko a me Kuka i ka Poaha aku nei i hala, ua hoikeia mai ke kulana kaha o ka waihona aupuni ma ka la 27 o Sepatemaba, mahope o ka unuhiia ana aku o na hoolilo, penei:  Na dala e waiho nei ma ka pahu o ke Keena Wawai, he $150,886.92; ma ka waihona o na Papa Alanui, $52,752.83; ma ka waihona o ka Papa Hoonaauao, $46,434.78; ma ka waihona o ka Banako Hale Leta, $22,039.92.  Huina dala nui a pau, he $272,094.45.  Mawaho ae o keia, he $284,000 maoli e malama loa ia nei no ka hookaa ana aku i na dala pepa aupuni e laha nei hoi mawaena o ka aina.

 

Ke Poo o ka Oihana Makai.

  Mahope iho o ka hora 9 kakahiaka o ka Poalua aku nei, maloko o ka pa o Kuapapanui, Honolulu nei, a imua o na poo a me na makai o Honolulu nei, ua hoolauna ia ae o Poo kapena makai Lorena A. Anaru imua o ka puali makai o Honolulu nei.  He mau huaolelo Hawaii kupono kai kahoahoa ia ae e ia i mua o ka puali e noi mai ana e kokua pu aku iaia oiai oia akahi no a komo mai me lakou ma ka oihana, a malia o ulia mai he mau kuia i ka hoomaka ana, aka me ka lana o ka manao e hoopau ia no na hemahema i ka nee ana o ka manawa.  Oiai oia ko lakou poo, aka ua noi mai no nae ia no ko lakou hoolohe aku iaia.

 

  E pau ana na hana hou a na poe kamana moku i ka mokuahi “Malulani” i na la hope o keia hebedoma, a e kuu ia mai ana mailuna mai o ke Alahuki Moku.  E hoi hou ae ana oia e paaua ma kona wahi, a e hoomaka i ka holo hou no Maui a me Hawaii ma ka la 20 o Okatoba.

 

He Palapala Makamaka Mai Amerika Huiia Mai.

Na ke Kamahele Hawaii, John K. Waiamau.

            GOOMAN HOTEL, Chigaco, Sept. 12, 1893.

Dear Walter:

  Eia wau i Kikako nei.  Ua hoea mai au i ka Poaha i hala aku la. Haalele ia Kapalakiko i ka Poalima o kela pule i hala, a hala ianei nei iloko o eono la. Noho au i Reno i ka Poaono kakahiaka a ahiahi haalele iawahi no Ogden.  Haalele ia Ogden i ka hora 3 auina la, hiki i Denver i ka hora 8 o ke ahiahi. Ke kaa ahi o keia wahi he keu ka nui; ka huila o ke kaa ahi, ua like no me ke kiekie o ke kanaka.  E holo ana ke kaa i kekahi manawa he 60 mile i ka hora a emi mai.  Haalele au ia Denver ia ahiahi no, a hoea i Kansas City i ke ahiahi o kekahi la ae, hora @.

  Ua manao wau e noho i Denver e ike ia Miss Knapp, aka, ua kaupalena ia ko’u kikiki.  Mai Kapalakiko mai a hiki i Ogden, he @ wale no.  Piha ke kaa i ke @ aohe hiki pono ke h@ ae; iloko o elima minute ua paapu ko @ leop; kahilihili ae oe o ka piha mai la no ia.

  O ke kaa ahi e holu nei mawaena o Kapalakiko a me Denver, aia iluna o ka puu he 12,000 mau kapuai ke kiekie mai ka ili@ mai. Ua hele wau ma ia alanui, aka, aohe wahi mea a ka maka e nana aku ai, he one wale no.  Aka, hala mai oe mahope o Denver, alaila ike oe i ka nani o ka aina.  Ulu ia e ka huita, bale, kulina, laiki a pela wale aku, no na mile he loihi.

  Mamua aku o Denver holo mai oe mai Reno mai, a i ole mai Ogden mai, he hiki ia oe ke nana ma na wahi a pau loa me kou ike ole i kekahi kuahiwi no ma mile he nui.  Palahalaha ka aina.

  I Kansas City, pilikia wau no ka manawa wale no.  Hoea ilaila i ke ahiahi hora 5, noho ilaila me ka manao e moe ilaila a kakahiaka ae alaila haaleie. Hele aku nei wau me kuu wahi aikane e imi hotele.  Ia hele ana aku, ae ia mai nei kuu wahi hoa a hoole ia wau.  Aohe ae o kuu wahi hoa e noho ilaila ke ole lakou e ae mai ia’u.  Imi aku nei mana i hotele hou, he umikaumamalima paha ka nui, oia ano no.  I aku nei au i kuu wahi hoa, e hoi no wau iloko o ka halau hoolulu o kekaa ahi a e hele oia i ka hotele e noho ai! Hoole mai kela a i mai ina no aole lakou e ne ia’u e noho iloko o ka hotele nie ia, alaila e aho no kona moe pu ana me a’u iluna o ka noho a ao ia po iloko o ka halau hoolulu kaa ahi.  Mea aku nei au e hele hou maua e hoao hou i ka hotele mua a maua i hele ai.  Ae mai la kela.  Hele hou aku nei maua.  Ninau ia mai nei no hoi a hiki i ka manawa i olelo mai ai lakou he nika wau, a pela aku.  Akaaka aku nei no hoi au i ko’u kapa ia he nika.  Hahai aku nei no hoi au he kanaka Hawaii maoli au a hiki wale i ka ae ana mai ia’u e noho, no ka ike ana i ka pololei o kuu lauoho.  Ma keia wahi aohe ae ia o ka nika e noho i ka hotele o na haole.  He hotele no ko na nika, he pelapela nae.  He nui ka nika o keia wahi, nui ka aihue a me ka pepehi kanaka.  Ilaila maua lohe he elua a ekolu mea i ki ia i ka pu a pepehi ia ia ahiahi.

  Haalele ia wahi a hoea wale no ianei.  He kulanakauhale nui o Kikako mamua o Kapalakiko.  Elua a ekolu manawa ka nui.  O ka Masonic Temple o anei, he 22 hale ke kiekie.  Ke nana iho ilalo, ua like kanaka me ka naonao ka liilii.  Pili no hoi ke hele. O keia ka hale kiekie loa iloko o ka mokuaina.

  Hai au me Harry, George a me Fred Waterhouse i ka Poaono nei.  Hele makou i ka makaikai a puni, aohe nae pau mai kahi e hele ai iloko o ke Kahua Hoikeike.  Hele like makou i ka holo kaa side walk, oia hoi he alanui hele aoao.  Ke hele aku oe, he kau wale aku no kau, o kou hele aku la no ia no elua mile.  Ua hiki ia oe ke noho ilaila a po ka la no ka hapaumi wale no.

  I ka po iho, noho makou e nana i ke ahi kao.  Hora 8 e hoomaka ai na mea ahi kao, aka i ka hora 4 o ke ahiahi, ua like kanaka me ka naonao ma kahakai.  Hiki i ka manawa, ua like ka nui o kanaka ma kahi o ka eha a elima paha miliona.  Aohe hiki ia oe ke hele no iwakalua kapuai, he hookeke wale ia mai no ie a pilikia.  Nani no hoi na mea i hana ia ma ia po.  O keia Kahua Hoikeike ma na ano a pau he nani wale no.

  Ma ka Hale Hana Kamaa, aia ilaila kahi e hana ia ai ke kamaa.  Mai ka rumi hana ili mai no a hiki i ka rumi hoomaloo, komo i na mekini okioki, a humuhumu, kumeka, hoohinuhinu, humuhumu pihi, a kawele a hiki i ka rumi kuai, iloko wale no o na minute pokole.  O na hale nunui, he nui wale na mea a ka maka e nana ai a hiki ole ke hoomaopopo.

  He nani ke nana oe i ka wailele i ka po; i kahi manawa he ulaula ka wai a mahope, loli ae la a omaomao a uliuli ae la, a pau ulaula mai la.  Ua hana wale ia no me ke akamai a naauao.

  Ua ike au i kamalii himeni.  Hauoli i ka ike ana mai ia’u.  Ua lohe lakou e hoea mai ana au, ua noho nae au i Kapalakiko a loihi loa.

  O ka lua o Pele ianei nei, oia kekahi o na kii nani loa a’u i ike ai, aohe lua e loaa ai, koe wale no o ka lua o Pele wale no i Hawaii.  He ike aku no oe i ka huai mai o ka pele, e kahe ana ma o a maanei, ka ula weno no hoi o ke ahi ua like maoli no me ka pele maoli.

  Laki no hoi kamalii, e piha mau ia ana i na wa a pau.

  Hui au me na haole o Honolulu mai a hauoli like makou.

  I ka Poaono, i ka nana liona au.  Ua like ka liona i ka haole me he ia he ilio, kau ka liona iluna o ka @ alaila holo.  I kekahi manawa, he elima liona e hookuu ia mai ai e hooikeike iloko o ka hale uwea.  He hiki i ka haole ke hele a moe pu me lakou, huikau aku huikau mai, puliki aku puliki mai, hakaka aku hakaka mai, a pela wale aku.  He kupanaha maoli no.

  Eia wau i ka Hotele Gooman e noho nei.

  Eia no wau me ke ola maikai.  He keu ka wela o keia wahi, oi loa mamua o Honolulu.  Me ke aloha,                 JOHN K. WAIAMAU.

 

NUHOU KUWAHO

  Ma ke ku ana mai o ka mokuahi Alameda i ke kakahiaka nui o ka Poilima i hala, mai Kapalakiko mai, ua loaa mai ia makou na mea hou malalo iho:

  Aole i haalele ka mokuahi “Alameda” ia Kapalakiko i ka la i hoolaha mua ia ai, aka ma ka la  22 o Sepatemaba ka haalele ana mai.  O keia hoololi manawa holo, mamuli no ia o na noi maoli ana mai a na Luna Leta o Enelaui a me Nukilani.  Nolaila ma keia hooluliluli manawa holo hou, e noho ai na mokuahi hali leta mai o na Panulaau i ekolu hebedoma ma Kapalakiko a he elua hebe3doma ma Kikane, e hoomaka ana mai a Alameda aku.

HE DEMOCARATA KUE IA KALIVALANA.

  I ka la 2 o Sepatemaba, he h@olelo eha hora ma ka Aha Senate @ Luna Senate White, ke alakui o ka aoao Demokarata ma Keleponi, e hoahewa ino loa ana ia Kalivalanca, me ka olelo he pono iaia e haalele i kona noho Peresidena ana.

HOOPONOPONO AUHAU DUTE.

  Ma ka olelo ia mai, he hookahi mahina i koe, alaila e lawe ia imua o ka Ahaolelo Lahui he bila kanawai hou no ka Hooponopono Auhau Dute.  Ua manao ia, aole e hoohemo nui ia ana na dute ano nui a Makinale.  He nui ka olelo kue o na kanaka o ka Hema.  Aole no hoi paha e hoopau ia ana kela uku kaulele maluna o ko kopaa elua keneta o ka paona, no ko kue ikaika o ka poe mahiko @ ka Hema.  He ikaika loa ka poe o ka Hema ma ka aoaoa Demokarata.

KUE NA PAELE I NA HAOLE.

  Ua ala mai he kaua nui o na Negero Matabele e kipaku loa aku i na haole Enelani, ka poe e komo nui nei ma ka aina Mashona ma Aferika Hikina Hema.  He aina nui wale kela o ke gula.  Ko hana ia nei ke alahao 250 mile ma kahakai mai.  E lunakila ana no na haole maluna o na paele.  Aka aole lakou i makaukau pono, a e nui ana no paha na haole e lukn ia.  He lehulehu na Matabele, a he wiwo ole ma ke kaua.

MAU ANOI A NO NUI.

  Ua make o Generala Mirabela, oia ka Alihikaua nui o na koa Farani.  Ua oluolu ka mai nui o Bisimaka, ke pohala hou mai nei kona ikaika kino.

KUILIMA FARANI ME RUSIA.

  E hele ana ke aumoku kaua Rukini i Toulan ma Farani, ma ke kaiwaenahonua, malaila e launa aloha aku ai a hoike i ke aloha kuikahai o ia mau aupuni a elua e kue ia Geremania.

HOOMANAO HOONOHO POHAKU KIHI.

  Ua malamaia ka la hoomanao ma Wasinetona no ka haneri makahiki o ka hoomoe ia ana o ka pohaku kihi o ka Hale Aupuni.  Na ka Peresidena Kalivilana ka haiolelo ana.  He maikai loa kona kino, he ola loa i ka nana aku, he ikaika ka leo a me ka eleu.  Ua kamiailio mai oia no ke aloha aina.

KA SPRECKELS LIKI PAU PAKA.

  Wasinetona, Sept. 18 – E ia o Spreckels a me Kuhina Kakina o Hawaii iloko nei o ke kulanakauhale, e hakilo ana no ma mea e hoea mai ana no ka ninau o Hawaii i ka wa e pau ai ka hana a ka Ahaolelo Senate no ka bila kanawai hoepau dala keokeo.  Ua kukala ae o Spreckels, mai pau i ka pulumi ia e na kanaka Hawaii ke Aupuni Kuikawa a nalowale, a mai huipa ia na luina a me na koa marina o ka Bosetona iloko o ka malama o Mei, aku e ole ka papa akea o ka Moiwahine i kipaku ia.  Ua ike lakou i ka hoopii ua like me ka hihia imua o ka aha hookolokolo, a nolaila aohe pilikia a hiki i ka wa e haawi ai o Amerika Huipuia i ka olelo hooholo hope no ka hoohuiaina.

HAWAII NO KALEPONI.

  Wasinetona, Sept. 20. – He wahi ahaaina ano kipapalale ole aku kai pahola ia ae ia Claus Spreckles e na paa Hoahanau Oxnard, ka poe ona ko nui.  Malaila pu ae na Luna Senate Allison, Hale, Gray, Hawley, White o Lousiana, Perkins o Kaleponi a me Gorman.  Ma hope o ka paina ana, hoopuka ae la o Perkins he manao malia he noonoo maikai ka hoohui ana mai i na Pae Aina o Hawaii, aole ia Amerika Huipuia ma ke ano mokuaina kaokoa, aka i ka mokuaina o Kaleponi i hoohui ai.  Ua hoohalike ae oia me na mokupuni he lehulehu mai ke kanakolu a hiki i ke kanaha mau mile ka mamao mai ka aina paa aku, a i hoohuiia, a nolaila oia i hoohalike ae ai, ina pela o Hawaii e hoohuila aku ai a na Kaleponi e malama iaia.

  Ua olelo ae o Allison, he manao kona e like pela no kekahi manawa aenei, a ua manao pu no o Gray a me Hawley no ia mea, a o kekahi noonoo o Perkins i kamailio ae ai, maila na na Ahaolelo Lahui e hooholo i kanawai e hoohui ai ia Hawaii no Kaleponi ke apono na ahaolelo mokuaina o Kaleponi ia kanawai.

  Me he mea la ma ka hoomaopopo aku, aohe wahi puai leo ae o Spreckels, aka oiai he aikane puna a ke onaona o Perkins na Spreckels, nolaila ua manao wale ia ua apono oia ina aole nana i hoomaikeike mai i kela manao.  Ke haka ia aku nei e puapuai mai ana na mea a pau.