Ka Nupepa Kuokoa, Volume XXXII, Number 17, 29 April 1893 — Na Mea Hou o Kanai. [ARTICLE]

Na Mea Hou o Kauai.

Nui ka ua o Hanalei ma na Koolau. Ua hiki mai o Kapena J. Ross ke Komite o ka H. H. A. Aina, a ua kakauinoa aku kekahi poe mai ka elemakule a na keiki iluna ke alo ma o na makua la. He poe no kekahi i makemake i ka hoohuiaina, koe wale no ka maopopo ole ina e loaa a loaa ole paha ka pono koho balota i na makaainana Hawaii ke hui io. Ua malamaia he halawai e ka poe o ka aoao hoohuiaina ma Hanalei, a ua nui kamailio me ka holopono ole o na hana i lawelaweia. He nui no ko Kealia poe i makemake i ka hoohuiaina a ua kakauinoa kekahi poe, pela me ko Lihue, a o ka oi loa aku ma Waimea a me Niihau. Mahope iho o ka wehewehe pono ana o kekahi mea i ko Kalalau poe e pili ana i ka hoohuiaina, ua nui ko lakou kahaha no ke kakau ana malalo o ka Ross palapala hookamani. Elua la ona ma Kalalau me elua po, a he lawaia ulua ka hana. Maikai no ke komite o ka Hui Hawaii Aloha Aina.

No na olelo a ke komite aloha aina i ke kipakuia o na paahana e na haku hana o Kauai no ke kakauinoa ole malalo o ka hoohuiaina, he hoopunipuni wale no. E lawe ia Kilauea, Kealia, Lihue, a me Waimea, o na haku hana mea aina o keia mau wahi, ua waiho aku na na kanaka e hooholo no lakou iho. Ua pau ka wili ana o na mai hiko o Kilauea me Hanalei. Aole i pau ko Enoka Kahele lawe leta ana, e like me na laukua olelo he nui. Nana no i hoopiipii kai ae a malie wale iho no, ua hoole piha oia i ke kakauinoa i ka hoohuiaina no ke aloha i ka Moiwahine. Ke hoala nei he mau Hawaii o Hanalei i Hui Hana Kalo Palaoa me hana poi. Huliamahi nui na kanaka o Waimea i ke kanu ai a pela ko Kalalau me Hanalei. Aole e holopono na hana mahiai ke nele kakou i ka hoohuiaina. Kapalilauaeomakana

Ua pau ke kakani ana o na kanaka o ka Makeke, ua kakali aku nei i ka manuwa Beritania nana e hoihoi ae i ka Moi i ka nohoalii, aole nae he hoihoi la ae, aole makou e kala i hoonaauao aku ai i ka lehulehu. Ua mahuka i ka wanaao Poalima ka haole nona ka inoa Wm. Bruett, i ae i kona hewa no ka wawahi hale a aihue ai i ka $10 a me ka wati i ka po Poaono aku, a waihoia no ka aha maluna ae e haawi mai i ka olelo hooholo. Mailoko aku o Kuapapanui keia paahao i mahuka ai a nalowale. O ka wiliki haole e ku ana e malama i ka hale hoopaa lawehala, ua hopu ia a eia ke paa nei. Aka, o ka paahao, aole i loaa iki a hiki i keia la.