Ka Nupepa Kuokoa, Volume XXXII, Number 15, 15 April 1893 — Make i Ai i ka Oopuhue. [ARTICLE]

Make i Ai i ka Oopuhue.

I ka auina la Poakahi aku nei, ua pau nui aku na pake i ka lawaia ma ka aoao ma Ewa o ke awa o Kou nei ma ko lakou wahi mau no e lawaia nei. I ke ahiahi ana iho, ua hoi mai lakou me ka puni iʻa, a mawaena o na i'a i hei mai he oopuhue kekahi. Ua olelo mai kekahi o keia poe pake lawaia ua pololi loa ia oia, a nolaila ua lalau aku la oia i ua oopuhue la, kaha iho la i ka opu lawe mai la i ke ake, a o ke koena kiola ia. Ua hoolapalapa ia ke ake iloko o ka ipuhao a moa, ai iho la ua pake nei i kona paina ahiahi me kona poe hoa. I ke aumoe o ka po, ua hoomaka mai la ka eha o kona opu, a me ka ehaeha nui oia i kupaka ai a hiki i ka hora 6 o ke kakahiaka nui Poalua, make loa aku la. Aole i kii ia ke kauka a make wale aku la ka pake. Ua ike no ka pake he i'a make kela he oopuhue, aka manao nae ia aohe la he mea make ke ai i ke ake. Ua hoike ia keia make naaupo i ke keena makai, ua wae ia he kiure koronelo e noho e huli i ke kumu i make ai ka pake.