Ka Nupepa Kuokoa, Volume XXXII, Number 14, 8 April 1893 — Mako i Aloha Nuiia. [ARTICLE]

Make i Aloha Nuiia.

E Mr. Lunahooponopono Aloha oe:- E oluolu mai ko lunahooponopono o kou papa pa'i e hookomo iho ma kahi kaawale o kou mau kolamu i keia wahi puolo a ke aloha e panee ia aku nei i kou keena. A nau hoi ia e hoike ae i ke akea i ike mai ai na ohana e noho ana ma kela wahi keia wahi o ka aina. A oia hoi keia wahi moolelo walohia malalo iho nei: Ua hanau ia o Sam. Kaaihue (Keka) Ianuari 1879. Make i Feberuari 6, 1893, ka nui o kona mau la ma keia ola ana, he 14 makahiki me 20 la me 8 hola ma keia ao a hala aku la oia ma kela aoao mau o ka honua a haalele iho la ia maua kona mau makua ma keia ao, na pokii, na kupuna a me ka ohana no a pau e noho ana ma Onomea nei a ma na wahi no a pau o ka aina me ka minamina paumako i ke aloha nona ma keia aoao aku o ka muliwai eleele o ka make. Ua hoonaau ia oia i ke Kula Hanai o Hilo iloko he 2, hoomaha mai ke kula, me ko'u manao ia hoi e hoouna loa i Lahainaluna, eia nae, ua kii e ia mai la e ka make a kaili ia aku la oia ma kela ao. Ua haule oia i kahawai nona ke kiekie he 75 kapuai a haule loa aku la oia ilalo o ke kahawai, aole i haki kona mau lala ma keia haule ana, pela ka ike a ke kauka a me ka aha koronelo. He keiki aloha makua, he oluolu a me ke akahai, he hookipa i kona ohana a me kona mau hoa kula, a ina e hooikaika aku ka maua mau olelo, kulu iho kona mau waimaka, na kana mau hana i hoehaeha mai i ko maua manao kaumaha iloko o keia mau la me ka luuluu no ka nalohia ana o kona mau maka mai o maua aku. Na ke Akua no i haawi mai a na ke Akua no i lawe aku kana o ka uhane, a no ka nui o ko maua aloha iaia, ua haku iho maua i wahi kanaenae kanikau

nona: He uhane aloha keia nou e Sam Kaaihue (Keka) Nou paha ka uhane Hele o ke awakea Ma Nuumealani Kukulu o Kahiki, O ka paepae kapu O ke alohi Lani, O ke aweawe ula Welo ana i Lehua, O ka nu a ka ua Ma ke aweawe lani, Kahiko ka honua I kou kanikau, E uwe na lani Ko kino wailua, Ua ike ka opua

I kou hele ana, E ola ka uhane Noho i ke ao uli, Ma ka poli laahia O ka Makua Mana Loa, Haina ka puana Kuu lei rose ua hala. Hakuia e Mrs. Makakehau G.B. Keka. Me na keiki ulele hua medala ko'u welina no keia kupulau. Kou oiaio. G.B. Keka. Niniu ka mikini oki poo o na hooponopono aupuni o keia mau la, ke oki pu ia mai nei na poo o na mano liilii o ke Aupuni o Kaahupahau. "Mihi paha auanei la i ka hune e na pokii." wahi a Kawelo. He He hoike ana mai ia i ke onipaa o keia Aupuni hou.