Ka Nupepa Kuokoa, Volume XXXI, Number 45, 5 Nowemapa 1892 — Page 3

Ka Notepad Kuokoa

KE KILOHANA POOKELA NO KA LAHUI HAWAII.

 

KA HUI ALAHAO ME AINA O OAHU

MANAWA HOLO.

Mai a Mahope aku o Okatoba 1, 1892.

NA KAA AHI

                                                A.M.    A.M.    P.M.    P.M.

HAALELE IA HONOLULU . .       6:15*   9:45     1:45     4:35**

HIKI I HONOULIULI . .                 7:20*   9:57     2:57     5:35**

HAALELE IA HONOULIULI . .    7:36*   10:43   3:43     5:42**

HIKI I HONOLULU . .                    8:35*   11:55   4:55     6:50**

NO MANANA WALE NO.

HAALELE IA HONOLULU . .       ....        ....        5:10     ....

HIKI I MANANA . .                                     6:55*   ....        5:49     ....

HAALELE IA MANANA . .            7:30*   ....        ....        ....

HIKI I HONOLULU . .                    ....        ....        ....        ....

            * N@na Poaono wale no.

            ** K@na la Sabati.

             @ Poaono.

                        2409-q

 

NU HOU HAWAII

            Nui na kamaaina i hoi mai ma ka mokuahi Australia o ka Poakolu iho nei, mai ka Ripubalika mai o America Huipuia.

 

            Ua makana ia mai o John Kaimi @ kana wahine i ke ahiahi Poalua nei, Novemaba 1, he kaikamahine ma Kalia Honolulu nei.

 

            Ua haule kekahi keiki Pukiki mailua iho o ka lanai or ka halekula o Kahehuna i ka Poakahi nei, a ua haiia kekahi wawae.

 

            O ka Loio Kuhina i pau W.A. Whiting, oia aku nei ka hope loio kuhina i holo aku la i ke kau kaapuni o Waimea e malama i na hihia ma ko ke aupuni aoao.

 

            O ka Halepai Elele i hookoene mauleule iho nei, ua hoolaha ia mai nei, e kuai kudala ia aku ana mamuli o ka hiki ole ke hookaa i ka moraki i hauhoa ia ai.

 

            Ua hoounaaia e hoopaahao i Kawa ma ka hana oolea no ewalu malama kekahi kanaka Hawaii i ka Poa@olu nei, no ka hewa aihue wati pakeke nona ke kumukahi he $12. Pokeokeo no.

 

            He ahaaina kemu ko lalo o ka ululaau kohai o Manana, Ewa, i ka ponei na ka Hui Waapa Healani o keia kulanakauhale, a o na pomaikai e loaa mai ana, no ke kapili ana i hale waapa no lakou.

 

            Ma ka Iwalani o ke kakahiaka Sabati nei I hoomaha pokole mai ai ke Kiaaina o Kauai ma ke kulanakauhale nei, a ma ke ahiahi Poalua nei i huli hoi aku ai no i kona mokupuni.

 

            Ua hala aku ka Moiwahine Kanemake Kapiolani no ka aina ua kaulana o Hilo maluna o ke Kinau o ke ahiahi Poalua nei, me ka manao e hoomaha he anahulu ma Hilo, alaila pii i ka lua Pele; a malaila aku e hoohiki ai i Kau.

 

            Ua hopuia e ka Hope Makai nui W. Wond a me kona mau makai ma Ewa, he ekolu manuwa holo mahuka o ka manuwa Bosetona i ke kakahiaka Poaha nei, a ua lawe ia mai lakou ma ia kakahiaka no Honolulu nei.

 

            Ua aua loa ia ka mokuahi Waila a ahiahi loa o ka Poalua nei no ke kali i na eke leta o na mokupuni o Maui a me Hawaii.  E hali loa ana i ko Hilo mau eke leta.  E mahalo nui ia ka Hui Mokuahi o Waila no keia hana makamaka.

 

            U holo aku o Lunakanawai Dole o ka Aha Kiekie, maluna o ke Kinau i ka auina la Poalua aku nei, e noho kahu no ke kau kiure kaapuni e malama ia ana ma Waimea, a ua ukali pu aku o Mrs. Dole ma ia huakai.

 

            O na make o ka apana o Honolulu nei iloko o ka malama o Okatoba i hala, he 51 pau loa, a penei ka mahelehele ana:  Na Hawaii, 31; na Pake, 9; na Pukiki, 6; na Beritania, 2; na Amerika, 2; na Iapana, 1.  Mailoko o keia heluna make, he 13 make i lapaau ole ia.

 

            Ua haalele awiwi loa iho ka Hon. Paul Neumann ia Honolulu nei a holo aku la ma ka  mokuahi Gaelic o ka hora 9 o ka po Poakolu nei no Kapalakiko.  Ua lohe lauahea wale ia ae, i holo aku nei oia e haha i ka ona miliona o ke Kulaokamaomao.

 

            Ua laweia mai e na mokuahi Gaelic a me Oceanie no ko kakou Hale Leta he 6,787 palapala a me 6,140 nupepa.  Maluna mai o ka Auseteralia i ka Poakolu nei ua lawe mai oia he 1,688 palapala a me 2,000 nupepa.  O ka huina nui o na palapala i hoouna ia aku no Iapana a me Kina ma ka mokuahi Oceanie he 8,764 a he 184 nupepa, a ma ka mokuahi Gaelic no Kapalakiko he 3,667 palapala a me 1,708 nupepa.

 

            Ua hoouna ia aku nei ke kauoha i ka hui hana Ogana o Hook a me Hastings o Bosetona, e kapili mai i ogana nui maikai no ka luakini hou loa o ka ekalesia o Kaukeano.  E hoolako ia ana keia ogana hou me 1568 mau ohe a me na hana ano hou loa o keia au naauao e hele nei.  O ka wa e hooko ia ai ka makemake o ka poe kuleana ia ogana, me he mea la e hiki mai aua i Maraki o keia makahiki ae.

 

            Ua puka mai ka wai o ka luawai aniani hou loa a ua Hoahanau McCandles i eli iho nei ma Kamoiliili, i ka la 31 aku nei o Okatoba.  O ka hohonu, he 165 kapuai, a ua hoolako ia me ke paipu he 8 iniha ke anawaena.  O keia luawai, no ka Hon. G. C. Beekley, no ka hookahekahe ana i kona aina kanu kalo malaila.

 

            Ua ukuia ko Kikaha luhi o ka hooikaika koho balota kuikawa ana iho nei o ka la 4 o Okatoba ma Honolulu nei, mamuli o kona hookohu ia ana iho nei ma ka la 31 o Okatoba, i Makai nui no na mokupuni o Maui, Molokai, Lanai a me Kahoolawe.  E paa ana anei keia hookohu ana a ka Aha Kuhina i kipakuia?

 

            Ua hookohuia ae nei o Mr. Gardner K. Wilder e ka Loio Kuhina Creighton i kipakuia e ka Ahaolelo, i Hope Loio Kuhina i ka Poakolu nei, oiai ia ia no kona hoohiki ana mai i ka aina nei ma ka Australia mai ke kiko ana aku nei i kekahi o na pua hoomomoa a ko ke kulanakauhale o Rochester, Nu Ioka.

 

            He hana nui na ka Loio Kuhina i pau Creighton, ka noke hele ana i ka Poalua nei e imi ai i Hope Loio Kuhina e holo ai e malama i na hihia ma ko ke aupuni aoao ma ke kau kiure kaapuni o Waimea i noho i ka Poakolu nei.  He elua mau loio he mau hihia ka laua i ke kau, i hoopaa ia aku e lawe ia kulana, aka ua hoole like laua, a i ke kolu o ka loio, he loio kuhina mua no i pau akahi no a loaa.

 

            Ia Kale, he poola, e haua ana iluna o ka moku kiapa kalepa "J. C. Glad@" i ke kakahiaka Poalua nei, ua hemo mai la kekahi balaka oluna a haule pono iluna o ke kiipoohiwi akau, kapeke ka hookui ana o na iwi.  Ua nana ia e kauka Wahie a kauoha ia e hoihoi i ka Halemai Moiwahine; malaila e lapaau ia ai a palekana mai iloko o ka hebedoma paha a i ole he anahulu paha.  Ke upu ia aku nei e palekana oia i ka wa pokole.

 

            Ua ku mai ka mokuahi Australia ma Honolulu nei i ka hora 9 kakahiaka Poakolu nei, mai ke awa mai o Kapalakiko, mahope o ka haalele ana aku ia laila i ka hora 2 auina la o Okatoba 26.  Ua lawe pu mai oia ia 50 ohua kapena, 19 ohua oneki, 12 maui eke leta, he $75,000 ma ka lela America no ka Banako o Bishop & Co., a me na ukana e ae.  A ka hora 12 awakea o keia Poakolu aku, Novemaba 9, e huli hoi aku ai oia no ke awa kahi ona i holo mai ai, me na ohua,na eke leta a me na ukana mai keia awa aku.

 

            Ua hekau mai ma ku nuku o Mamala i ka hora 1:20 auina la Poalua nei, ka mokuahi Oceanie, iloko o na la holo 6 a me 23 hora a me 29 minute, mai Kapalakiko mai.  Ua lawe mai oia he 53 mau eke leta no keia awa, aka, aole ohua no ka hopohopo i ka hoomalu ia.  Ma ka hora 9 oia po no, ua naue loa aku oia no Iapana a me Kina, me ka hului pu aku ia 3 ohua kapena a me na ohua oneki he 206 mai keia awa aku, oia he 90 Iapana kane, 15 wahine a me 90 Pake kane, 5 wahine a me 5 kamalii.

 

            I ka hora 9 o ke kakahiaka Poalua aku nei, Novemaba 1, na hookohu mai ke Alii ka Moiwahine ia Hon. W. H. Cornwell i Kuhina Waiwai; Hon. Joseph Nawahi, Kuhina o ko na aina e; Hon. Chas. T. Gulick, Kuhina Kalaiaina; Mr. C. Crighton i Loio Kuhina.  A i ka noho ana o ka Ahaolelo i ka hora 10 oia kakahiaka, mahope o ka pau ana o ka moolelo i ka heluhelu ia a me ka hookohu o na kuhina, ua waiho koke ia mai no ka olelo hooholo hilinai ole i na kuhina e ke Alii Kakina.  A ma ka hora 12:30 auina la, ua kipaku ia aku la na kuhina.  Holo ka hana, pokole ka manawa o ka noho kuhina ana.  O ka makamua loa keia o na aha kuhina pokole o ka manawa ma Hawaii nei, a pela no ma ke ao holookoa apuni.  Ke hana moolelo nei o Hawaii e eo ai iaia ko ke ao apuni.

 

Ka "Hiram Bingham"

            Ua manao ia, e haalele aku ana is Kapalakiko i keia hebedoma, kahi mokuahi misionari uuku loa nona ka inoa Hiram Bingham, a holo mai no Honolulu nei a me ka Pae Aina o Kilipaki, malalo o ka noho kapena ana o Rev. J. Walkup.  Ua kapili ia keia wahi mokuahi uuku no ka holoholo ana mawaena iho o na mokupuni o ka Pae Aina o Kilipaki e aloalo ai i na misionari.  O ka loihi o keia wahi mokuahi, he 50 kapuai, he 14 kapuai ke akea a he 6 kapuahi ka hohonu.  Ua kokoke e pau o lalo o ka moku me he wahi moe wale ia no e like me ke ano o na keena hope o na moku.  O kona enegini mahu na ka aila gasoline e hooniniu i kona mau mea hana.  Ua kapa ia ka inoa o Rev. Hiram Binamu o Honolulu, ka misionari i ko Maikonisia mamua, a eia i Nu Ioka o hooponopono ana i ke pai ana o ka Baibala ma ka olelo Kilipaki.

 

AHAOLELO O 1892

            LA HANA 115, Oct. 31, 1892.

            Hoomaka na hana e like me ka mau.

            Hoike mai ka Peresidena, aole i loaa mai iaia he lono no ka hookohu ia ona Aha Kuhina.

            Noi mai ke alii Williams e kapae i na rula i hiki ai iaia ke lawe mai i kanawai e loaa ai ke dala no ka uku ana i na lilo o ke aupuni a hiki i ka la 31 o Okatoba.  Na ke Kuhina Waiwai i haawi mai iaia i ka bila.

            Pane ke alii Kakina, o ka mea nui o ka loaa ona Aha Kuhina, aole ona makemake e hoohele aku i na hana o ka Hale imua a hiki i ka wa e loaa ai na kuhina, nolaila ua noi oia e hoopanee ka Hale a hiki i ka la apopo.  Holo.

            LA HANA 116, Nov. 17, 1892.

            Hoomaka na hana e like me ka mau.

            Kauoha mai ka Peresidena i ke Kakauolelo e heluhelu i ka palapala mai ka Moiwahine mai e hoike ana, ua hookohu ia ka poe nona na inoa malalo iho i mau kuhina:  Hon. W. H. Cornwell, Kuhina Waiwai; Hon. Joseph Nawahi, Kuhina o ko na Aina e; Hon. Chas. T. Gulick, Kuhina Kalaiaina; Mr. Chas. Creighton, Loio Kuhina.

            I ka wa e heluhelu ia ana ka palapala maluna ae mai ka Moiwahine mai, ua komo mai la na kuhina hou a ku mahope o na kua o na noho kuhina iloko o ka Hale Ahaolelo.

            Alaila, ua kukala mai la ke kuhina Cornwell, ua oluolu i ka Moiwahine ka hookohu ana mai i keia kona Aha Kuhina.

            Ku mai ke alii Kakina a noi e kapae i na rula i hiki ai iaia ke waiho mai i olelo hooholo.

Noi mai ke Kuhina Waiwai i ke Alii e kali i hiki ai iaia ke lawe mai i b@ e uku ai i na lilo aupuni.

            Ninau ia ke noi e kapae i na rula a hooholo ia e na ae he 22 a kue he 10.

            Heluhelu koke mai la ke alii Kakina i ka olelo hooholo penei:  Hooholo ia, ke hoike aku nei ka Ahaolelo i ko lakou hilinai ole i ka Aha Kuhina hou.

            Ua kakoo mai ke alii Kakina i ka olelo hooholo me ka haiolelo loihi.

            Ua pakuikui olelo mai ke alii Peterson a pane pokole i ka wa i pau ai ke Kakina haiolelo.

            Noi o L. M. Kapahu e waiho i ka olelo hooholo ma ka papa.  Ninau ia na ae a me na hoole a hoole ia ka waiho ma ka papa, no ka mea, he 12 ma ka waiho ma ka papa a he 26 kue.

            Noi o L.M. Ashford e ninau ano.

            Noi ke Kuhina Nawahi e ae ia mai na paahao e pane.

            Ninau ia ke noi ano a haule.

            Pale ke Kuhina Nawahi me ka haiolelo a pau.

            Noi ka L. M. White e hoomaha ka Hale a noho hou i ka hora 1:30 auina la:  Hoole ia.

            Kamailio mai o L. M. Waipuilani ma ka aoao o ka olelo hooholo.

            Noi o L. M. White, e hoopanee loa i ka olelo hooholo.  Ua hoole ia ka hoopanee loa e 26 kue ia 13 ae.

            Noi o L. M. White, e hoomaha a halawai hou i ka hora 1:30 auina la.  Haule.

            Noi ke alii Baldwin, e ninau ano.  Holo.

            Ma ke noi, ua kakau ia na ae a me na hoole no ka hooholo loa i ka olelo hooholo.

            Poe ae e hooholo loa i ka olelo hooholo hilinai ole i na kuhina:  Ena, Cummins, Williams, Hoapili, Marsden, Young, Baldwin, W. Y. Horner, Walbridge, Anderson, Thurston, G. N. Wilcox, Kanoa, Dreier, Wilder, Ashford, Aki, Kauhi, R. W. Wilcox, Bush, Kamauoha, Waipuilani, Kaluna, Iosepa, Akina me Smith---26.

            Poe hoopaa kuhina:  Hopkins, Pua, Peterson, Maile, Hind, Pua, Koahou, Kaunamano, Kapahu, Nahinu, White, Kanealii me Edmonds---13.

            Poe hiki ole mai, Berger, J. Kaunane, J. M. Horner, Bipikaue, A. Horner me A. S. Wilcox.

            Hapai ia e noonoo hou ka olelo hooholo a haule.

            I ka ike ia ana ua pau na kuhina, ua noi mai o L. M. Kaunamano e hoopanee ka Hale a halawai hou i ka la 1 o Ianuari, 1893.  Haule.

            Noi o L. M. Kamauoha, e kakau poepoe ia ka olelo hooholo a na ka Peresidena e lawe aku imua o ka Moiwahine.  Holo.

            Ma ke noi a ke alii Kakina, ua hoopanee ka Ahaolelo a halawai hou i ka Poakahi Novemaba 7.

 

Pouli Piha o ka Mahina.

            I ke kakahiaka nui poniponi o ka Poalima nei i pouli piha ai ka mahina a ua ike ia ma Honolulu nei.  Ua hoomaka ka pouli ana ma ka hora 2 me 40 minute; hui aku ka pouli me ke aka malamalama i ka hora 3:37, a pouli loa i ka hora 4:51, a pau i ka hora 5:35.  O ka poe i ala kakahiaka nui ka i ike.

 

NA LETA

            Aoie o makou makemake e lawe i ke koikoi o na hala no na manao i hoapaka ia malalo e keia @ e ko makou poe mea kakau.

He Manao Akea.

            Mamuli o na hoolaha mau a ka nupepa Holomua a me knoa Lunahooponopono hou, ua "kipe" mau ia na lunamakaainana, oia ke kumu o ko lakou koho ana ma ka hapanui o ka Ahaolelo, a me ka lawe mau ia o na lunamakaainana e "hoahaaina mau ia" oia kekahi kumu i puni ai na lunamakaainana.

            E Mr. Lunahoponopono, maanei au e ku ai maluna o ko’u kahua, a e nou aku ai i na poka hao mawaena o ke kowa o na niho o ka Lunahooponopono o ka nupepa Holomua.  No’u iho oiai, owau kekahi lunamakaainana mai ka Apana mai o Hana, aole au i ike iki i kau mea e hoolaha lalau nei.  Aole loa he poe o ko’u poai i hele mai a kipe ia’u me na dala i mea no’u e huli ai a kokua aku ai lakou.  Aole no ma ke ano kokua mai ma ke ano manawalea i mea e pono ai ko’u noho ana ma Honolulu nei.  Aole no e hiki ia oe ke hooiaio mai imua o kekahi mea a mau mea paha, a aole no hoi lakou i hana iki i kekahi papa ahaaina a kahea mai ia’u e hele aku e ai a e inu elike me ko’u makemake, aole loa.

            E Mr. Lunahooponopono, eia ka’u mea i ike pono, i na la maka mua loa o ka Ahaolelo mai ka mahina o Iune a me Iulai, e lawe mau ia ana makou na lunamakaainana e ke Dute o Waikapu ma ka Hotele Hawaii e ai ai, e inu rama ai kekahi mau hoa.  Ekolu ponoi o’u hele ana ilaila, a mahope iho, no ka manao ia o ike wale ia auanei ka uahi a ka moe, hoolewa hou ia makou mauka iho o ka Hale Leta, he hale aina ia no ka Pake, hinu na nuku o makou ilaila, he pailaka okoa ka mea nana makou i hookele ilaila.  Heaha ka puana oiaio a ka moe?  Eia he kipe, he mea no makou e kokua ai i ka Aha Kuhina.

            Oia ai anei a me ia i-a ka mea e lilo ai ko’u pono koho?  Aole loa.  Ua hoohulihuli ia mai au.  Ke ninau nei au:  Owai na hiki mua ma ke kipe ana i na ahaaina?  O ka aoao au e pai nei, aole o ka aoao hoomaemae, ka aoao kahi a’u i hele mai ai.  Ua kai hele ia na lunamakaainana e paina luau ma Waikiki, ma ka Hale Waapa, e kai ana i na hoa Hawaii e kokua i na Kuhina.  Eia nae, ke lili nei oe i ka Luna Helu nui no ka holo ana o kekahi poe i Ewa i ka ahaaina, manao iho la oe ua kipe ia, ina paha ua kipe io ia, aole au i ike, a aole no oe i ike.  Aole hiki ia oe ke hooiaio ia mea, a mai hoolaha oe i ka mea au i ike ole o pa ko poo i ka hauna laau a Kawelo.

            Ma ia ahaaina ilalo o Ewa, aole au i hiki ilaila, he kanaka hele ole au ma ia mau ahaaina, malaila na mea hanohano, oia na mea i hai ia mai ia’u e ka mea a’u i hilinai ai, a oia keia:  Na Luna o Wailuku Hema, Hilo Waena, Kau, a me ko Molokai.  Pehea, ua huli anei lakou ma ka aoao hapanui o ka Hale?  Aole loa.

            Nolaila, e ka makamaka, mai noho eo a hoolaha lalau, ina hoolaha oe he pono ia oe ke hoolaha i ka mea au i ike pono, alaila, hoolaha ae i ka inoa ponoi o ua Lunamakaainana la i ike pono ke apana kahi naua oia i hoouna mai, aka, mamuli o kau hoolaha e hoonui ana oe ia makou a pau iloko o ia hana haumia a lapuwale, ka mea a ko’u mau pukaihu i pipika loa ai.  Ua hele mai au ma ka aoao o ka pono a’u i ike ai, aole no i koi mai kekahi haole ia’u elike me Noble H. P. Baldwin, Hon. W. O. Smith a me Noble L. A. Thurston.  Ninau mai iakou i ko’u manao, pane aku au ia lakou i ka mea oiaio, pau; aole lakou i haawi dala mai na’u a hiki i keia hora.  Eia au me ka’u mau keiki e noho nei, ua lako i na mea a pau, aole a’u mea e hoohalahala ai ina e noho keia Ahaolelo a hala hookahi makahiki aole au e pilikia ma na ano a pau.  Pau ko’u pane ana ia oe ma ke kipe, e pane aku au ia oe ma ka hoohui aina, a me ko makou kipaku ana i ka Aha Kuhina, a malaila oe e ike ai, owai la o kaua ke aloha alii, aloha aina, aloha lahui, a hakihaki ole i na kanawai o ka aina?  O na kanaka Hawaii noonoo ekekei elike me oe e houpupu nei no ka hoohui aina, oia ke ae i kau, o na kanaka Hawaii noonoo pono, aole e puni i kau.

            J. K. Iosepa,

            Lunamakaainana o Hana.

 

Na Mea Hou o Hamakua Nei.

Mr. Lunahooponopono:

            Ua kaulana o Hamakua nei i na makahiki i hala no ka pepehi kanaka, a i loko hoi o keia mau la, ua puka ino o Hamakua nei, oia hoi ua pau ka ilihune kauka, oiai ua lawa ka makemake a ua pau ka pilikia, he elua kauka haole a he elua kauka Hawaii.  O na kauka haole, he haawi laau ka kekahi a he huki niho hoi ka kekahi.  O na kauka Hawaii hoi, ke kekahi o laua, oia o W. Keeaumoku, he hele ma na hale no kw wehwehe ana i ka hai waiwai, a o ka kekahi hoi, oia o Napeha, he haawi laau, naua ouli ma na kaha lima, wehwehe moeuhane, a pela aku.  O na kauka haole he laikini ko laua, a o na kauka Hawaii hoi, aohe o laua laikini.  Aole anei keia he haihai kanawai?  He nui a lehulehu wale na poe i hele aku ma ko laua hale me kahi punua pee poli.

            Ua hoopaiia iho nei o Hoomana no ka pepehi ana ia Akui pake, pehu na maka, puka ke poo, a he ku maoli no i ka manaonao ke nana aku.  Ua hoopii ka Pake, a ma ka Poaono nei ka noho ana o ka Aha, a ua loaa na palahaku he $20 me ke koina, a e aho nae hoi ia hoi luuluu i ka pali o Waipio.  O ka ekolu iho la keia o ua na kanaka pepehi Pake o Waipio, elua i laweia aku nei i ka hana alanui o ka lua o Pele a hookahi i kapi ia i ka paakai a Huakini me ka ikemaka o ka mea e kakau nei.

            He nui ka hana hia uwiuwi ma Waipio mailoko mai o ke ki i hoomoaia a hoawaawaia iloko o ka pahu, a ua nui ka poe ona.  Aia la ihea ua lima lawelawe o ke apuni?

            Me ke ahiahi Poaha, hora 7, ua haule mai la kekahi kuaua koikoi ma ua aina nei, a ua ola ka makapehu wai ua aloha mai o iala, ua wehe ae la i ke pani o Kulanihakoi.

            IKEMAKA.

            Hamakua, Oct. 20, 1892.

 

Ka Pii Mahuahua ana o ka Naauao a me na Ou’i o ka Manawa.

            Daniela 12:4.  Aka, e hoopaa oe e Daniela i na olelo, a e hoopiii i ka buke a hiki i ka hope:  he nui ka poe e holo i o a i o, a e mahuahua ana no ka ike.

            Elua mau mahele koikoi malalo o keia kauoha a ke Akua, ma o Daniela la kana kauwa.  Akahi.  Ka pii mahuahua o ka naauao o na hoomana.  Alua.  Ka pii mahuahua o ka naauao akeakamai o ke ao nei, a he mau ouli ia o ka hopena o keia ao.

            O ka mua, mai ka A. D. 538 a hiki i ka 1798, ua like me 260 ka nui o na makahiki i umii paa ia ai ka malamalama o ka ke Akua olelo malalo o ka mana o ka pope.  Aka, iloko o ia umii paa ana a ka enemi o ke Akua i ko ke ao e noho iloko o ka pouli a ke diabolo, aia no ke Akua ke kiai makaala mai la i kana kauoha paa naue ole; a hookaawale ae la oia ia Luthra i ka A.D. 1388 i mea nana e hoomaka ka unuhi ana i ka Baibala mai ka olelo Hebera, Helene me Latina a i ka olelo Geremania, ka olelo ponoi hoi o kona aina hanau a kue ikaika aku la i ka hoomana Pope.  Iloko o ia au kupilikii o ka ke Akua olelo, ua kuai aku o Nikolasa i buke Kauoha Hou nana i ka A. D. 1429 no na dala he $225, oiai nae he hapalua wale no i keia wai.

            I ka A. D. 1780 i hookahuaia ai na Ahahui Pai Baibala ma Enelani aole nae i paiia iloko oia mauawa.  I ka la 7 o Mei, 1804, hoomaka hou ke kukulu ana o ua ahahui la a he 300 ka nui o na lala ma Ladana kahi i kukuluia ai.  Ua paiia ma ka olelo Enelani he 68,000,000 ka nui o na buke o keia ahahui, a oia ka makamua loa o ka laha ana ma Beritania.  Ma ka la 8 o Mei, 1816, hoala ia ka Ahahui Pai Baibala ma Nu Ioka, Amerika Huipuia.  Ua paiia e keia Ahahui he 29,982,000 buke baibala iloko o na olelo like ole he 60, a hoomau ia aku la ke pa'i ana ma na olelo Iapana, Pake, a pela aku.  I ka A.D. 1801 i hoomaka ia ai ka hoolaha ana i ka nupepa eaanello o Elia Smith ma Portsmouth, Nu Hamesire, Amerika Huipuia, a he mau miliona i hoopuka ia i kela a me keia hebedoma.  O ka inoa o ua nupepa la, The Herald of Gospel Liberty, -- oia hoi ma ka kakou olelo "Ka Euanelio i Kakala e ia."  Emoole, holo awiwi ae la ka naauao hoomana a puni ke ao nei, o na aupuni nui i haalele aku i ka ke diabolo mau alakai ana.

            O ka lua, ka pii mahuahua ana o ka naauao akeakamai.  I ka A. D. 1798, hana ia ka baluna mua loa, ke kukui ea gas ma Enelani.  1800, ka palau hao kila ma Nu Ioka.  1803, ka peni makakila e Wise o Enelani.  1807, ka mokuahi mua loa e Robert Fulton.  1811, ka papapa'i nupepa mahu mua loa ma Enelani.  1818, ka pupanapana mua loa e Elia S. Kolia.  1823, ka peni mak-gula mua loa e Jno. P. Hawkins o Amerika.  1825, ke alanui hao kaamahu mua loa.  1829, ke ahi koe kukaepele.  1830, ke kaa-mahu kinaiahi, o kapaia nei, kaawai.  1837, ka uwea telegarapa moana.  1846, ka mikini humuhumu.  1876, ka uwea telepona e kamailio ia nei.

            O ka holo ana o na kaa hale maluna o na ala kaa mahu ma ke ao nei i ike ku maka ia e kakou, he mea ia na ke Akua i hoomakaukau mua no ka hopena o ke ao nei, pela i hoike ia ma Nahuma 2:3-5.  O ko lakou hele ana, ua pili loa ia i na kaamahu, ua hiki ole ma ka helewawae ana.  O na kulanakauhale o Babulona me Ninewa i wananaia ma ka Baibala, he mau ouli ia no kekahi manawa; pela i hoike ia ma 2 Petero 1:19,20.  Mataio 24:15.  Hoikeana 1:3.

            W.A. KIHA.

 

HOOLAHA PAPA HOOPII AUHAU.

E NOHO ANA KA AHA HOOPII AUAHU o ka mokupuni o Hawaii, i keia A.S. 1899, ma na apana lehulehu malalo iho:

            Kohala Akau, ma ka Hale Hookolokolo, POALIMA, Novemaba 18, hora 9 a.m.

            Kohala Hema, ma ka Hale Hookolokolo, POAKAHI, Novemaba 21, hora 9 a.m.

            Hamakua, ma ka Hale Hookolokolo, POALUA, Novemaba 22, hora 9 a.m.

            Hilo Akau, ma ka Hale Hookolokolo, POAKOLU, Novemaba 23, hora 9 a.m.

            Hilo, ma ka Hale Hookolokolo, POAHA, Novemaba 24, hora 9 a.m.

            Puna, Hale Hookolokolo, POAONO, Novemaba 26, hora 9 a.m.

            Kau, Hale Hookolokolo, POAHA, Dekemaba 1, hoomauia mai Novemaba 30 mai.

            Kona Hema, Hale Hookolokolo, POALUA, Dekemaba 6, hoomauia mai Novemaba 30 mai.

            Kona Akau, Hale Hookolokolo, POALIMA, Dekemaba 9, hoomauia mai Novemaba 30 mai.

                        F. S. Lyman,

            Lunakanawai Kaapuni o ka Mokupuni o Hawaii.

            Hilo, Hawaii, Oct. 17, 1892                                                    2412-3t

 

HOOLAH A KA LUNA HELU A ME LUNA AUHAU O HILO.

E HIKI ANA KA LUNA HELU A ME KA Luna Auhau ma keia mau wahi i kuhikuhi ia malalo iho:

APANA O HILO.

            Hilo Kaona, Novemaba 3, 4, 5, 10, 11, 12, 14, 15, 16, 17, 18, 19, 26, 29 a me 30, a mai Dek. 1 a hiki 13.

Papaikou, Nov. 1 mawaena o 11 a.m. me 2 p.m.

Pepeekeo,  "  7    "    10  "  "  12 m.

Honomu,   "  8    "    2 p.m.  "  4 p.m.

Hakalau,   "  9    "    8 a.m.  "  12 m.

APANA O HILO AKAU.

Honohina,  Nov. 21  maw.  10 am. me 12 m.

Papaaloa    "  21  "  3 p.m.  "  5 p.m.

Laupahoehoe "  22  "  12 m.  "  5 p.m.

Ia me Nov. 23 a pau.

Ookala, Nov. 22  maw.  8 a.m. a me 10 a.m.

            E hoopii koke is na auhau e koe ana sole i hookaa ia ma ka la @ o Dekemaba me 10 keneia pakeu.

            O na ilio a pau e loaa aku ana aohe metala no 1@ mahope aku o Dekemaba 15 e luku ia no.

                        N. C. WILLFONG.

            Hope Lunahelu me Auhau o Hilo a me Hilo Akau.

Aponoia

            H.C. AUSTIN,

            Lunahelu Nui Apana 3.                       3412-4

 

Hoolaha Hou.

 

MUTUAL 76 – NA TELEPONE – BELL 179

C. E. WILLIAMS,

KA POE HOOKOMO MAI, KUAI AKU A ME

HANA PAKA O NA HOONANI HALE

MAIKAI O NA ANO A PAU ME KA MEKEPONO

ME NA Piano i Hanaia Me ke kupeno i keia ea, Aole Mu e komo.

E LOAA NO Na He Kupapau Na Pokaku Mabela@e wae ai a ka Makemake Lawe.

MAANEI E LOAA AI

NA LAKO KANU KUPAPAU, KAA

A me na Pono Ia-loa i ke kino o ka mea aloha.

HELU 103, ALANUI PAPU . . . . HONOLULU

2396

 

Ka Halekuai Laau Lapaau Hou

HUINA O NA ALANUI PAPU ME MOI.

            Ke hoolako mau ia nei me na laau lapaau oi loa o ka maikai ma Honolulu nei a ke kuai ia nei me ka emi loa.

Ka Laau Kunu maikai,

Ka Laau Hoomaemae Koko Saseparila,

Na Hua-ale maikai,

Na Hua-ale ma'i fiva maikai,

Na Paakai pipii maikai,

Na Paakai hoonaha maikai,

Na Sopa a me na Waiala maikai,

Na Aila Niu hamo lauoho maikai.

            E hoomanao i ka inoa a me kahi o

HOBRON a me NEWMAN,

            Huina o na Alanui Papu me Moi.                    2396

 

Olelo Hoolaha Ahahui Kula Sabati Nui o na Mokupuni o Maui.

            E NOHO ANA KA AHAHUI NUI O NA KULA o Sabati o Maui, ma ka Luakini Hoole Pope o Wailuku, Mokupuni o Maui, ke hiki aku ma ka hora 10 A. M. o ka Poakahi, Novemaba 7, 1892.

            Nolaila, ke kauoha ia nei na poe a pau i kuleana i ua Aha la, e hiki ae lakou ina kahi, a ma ka manawa i hoike ia maluna.

            Me ke kauoha a ka Ahahui:

                        SAM'L E. KAIUE,

            Kakauolelo Ahahui Kula Sabati Nui e na Mokupuni o Maui.

            Wailuku, Maui, Oct. 8, 1892.             2412-3

 

Hoolaha a ka Lunahooponopono Waiwai.

            OIAI, ua hookohu pono ia mai ka mea nona ka inoa malalo iho i Lunahooponopono no ka waiwai o CHONG FOOK a inoa e ae CHONG YUN FOOK o Honolulu, Oahu, i make, nolaila ke hoolaha ia aku nei ka poe a pau he mau koina ka laokou i ka waiwai o ua Chong Fook la, e waiho koke mai me na hooioio kupono i ka mea nona ka inoa malalo iho, iloko o eono malama mai keia la aku, a i ole ia e hoole mau loa ia aku no.  A o ka poe a pau i aie i ka mea i make, e hookaa koke mai ma kuu keena hana ma ka Halekuai o Goo Kim & Co., Alanui Nuuanu, Honolulu.

                        GOO KIM,

            Lunahooponopono Waiwai o Chong Fook a inoa o ae Chong Yun Fook.     2412-5t

 

Hoolaha Hooponopono Palena ina.

            UA WAIHO IA MAI HE NOI E HOOPONOpono i na palena o ke Ahupuaa o Kaupalaoa, Apana o Kohala Akau, Mokupuni o Hawaii, e W. G. IRWIN, ka ona aina i keia wa.  Ke hoolaha ia aku nei ka lohe i na mea a pau i kuleana, oi loa aku nae i na ona o na aina e pili ana, oia o Makeanehu, Kaiholena, Kipi a me Kehenai.  E hoolohe ia ana ua noi ia ma ka Hale Hookolokolo o Kohala Akau, i ka POAONA, Novemaba 19, 1892, hora 9 a.m.

                        F. S. LYMAN,

            Komisina, Palena Aina Mokupuni o Hawawii.                       2412-3t

 

Hoolaha Hooko o ka Moraki a me ke Kuai.

            KE HOOLAHA IA AKU NEI KA LOHE I na mea a pau, i kulike ai me ka mana kuai i hookomo ia iloko o kekahi moraki i hanaia e JAMES L HOLT o Honolulu, mokupuni o Oahu, ia James B Pakele, ma ka la 24 o Iune, A. D. 1892, kopeia ma ke Keena Kakau Kope, Buke 139 a ma na aoao 113 a me 114, ke hoike ia aku nei, ke makemake nei ka mea e paa nei i ka moraki e hooko aku, no ke kumu ka uhaki ia o ka aelike, oia ka hookaa ole ia o ke kumupaa a me ka ukupanee i ka wa e hookaa ai.

            Ke hoolaha hou ia aku nei o ka waiwai i paa maloko o ua moraki la e kuai ia aku no ma ke kudala akea ma ka hale kudala o J F Morgan ma Honolulu, ke hiki aku i ka POAONA, la 19 o Novemaba, A. D. 1892, ma ka hora 12 awakea o ia la.

            O ka papa o na waiwai lewa i paa maloko o ua moraki la, oia keia:

            2 moe BW; 1 pahuume BW mabela oluna; 1 pahuume BW; 1 pakaukau mabela BW; 1 pakaukau BW; 1 kau pa holoi maka mabela BW; 1 kau pa holoi maka BW; 2 mau bela moe uwea lauoho; 2 mau bela moe uwea; 2 mau noho BW; 1 noho paipai BW; na lako rumi hookipa, 1 punee lauoho, 7 apaua noho, 1 noho paipai lauoho; 1 pakaukau poepoe BW; 1 pakaukau ai uwai BW 12 kapuai; 1 pahuaniani i ku mabela; 6 noho; 1 punee; 2 noho paipai; na lako kala a me aniani.  1 kapuahi a me na lako; 1 pahu waiho pipi; 1 pahu waiho hau pua; 1 pahu waiho buke; 6 kii nunui; 1 kaa lio ohana; 1 kaa huila lua; 1 lio keokeo; 1 lio kea ulaula; 1 kaa hehihehi waewae; 1 hale noho a me 1 hale lio.

            O keia mau waiwai a pau, aia ke waiho nei ma kahi noho o ka mea nana i moraki mai ma Kalihi, Honolulu.

            No na mea i koe o ninau ia J. B. Pakele, a i ole ia

                        J K KAHOOKANO;

                        Loio no ka Moraki

            Honolulu, Oct. 20, 1892.                    2412-3t

 

Hoolaha Lunahooponopono Waiwai.

            E IKE AUANEI NA KANAKA A PAU.  O KA poe a pau, he mau koi ana ka lakou i ka waiwai o Wong Foon (ch) o Makawao, Maui, i make kauoha ole, e haawi mai lakou i ka lakou mau bila kupono o oiaio iloko o eono mahina mai keia la aku, i ka mea nona ka inoa malalo nei, a i ole pela. e hoole mau loa ia aku.  A o ka poe i aie i ka waiwai i olelo ia, e hookaa koke mai lakou i ka mea nona ka inoa malalo nei.

                        AWANA.

            Lunahooponopono o ka waiwai o Wong Foon.                      2409-8

 

Hale Hana Kopa o Honolulu.

            Ua paa aenei ka Hale Hana Sopa Mahu Hou o ka poe no lakou na inoa malalo iho a ua makaukau lakou e hoolawa aku i ka poe piepiele i na

Kopa Maikai loa Maoli

I hookomo ia iloko o na Pahu 100 paona mai ke 42 a 56 auka Kopa pakahi.

Ke hooia nei makou i ka oi o la MAIKAI o ka makou KOPA mamua o na Kopa o waho mai.

            Ua kuni ia mawaho o ko makou mau Pahu me ka hoailoa "HONOLULU SOAP CO.," a e

Kuai ia e na Halekaui Liilii a Pau.

HUI HANA KOPA O HONOLULU

            M.W. McChesney & Sons,

                        Na Eigena.                  2396

 

Hoopanee o ke Kuai o ka Moraki.

            I KULIKE AI ME NA HOOKO ANA O KEkahi moraki i hana ia e C. K. KAUPULE, o Paia, Maui, mamua, a me TUUA kana wahine, ia C. Afong, ma ka la 25 o Okatoba, 1890, kope ia ma ke Keena Kakau Kope ma Honolulu, Buke 129 a ma na aoao 36, 37, 38, a i kulike ai me ka hoolaha e hooko ana a me ke kuai aku ma ka la 9 o Maraki, 1892, ma ka hale kudala o Jas. F. Morgan, ma Honolulu i ka hora 12 awakea e ia la, a o ua kuai la ua hoopanee ia.

            Ke hoolaha hou ia aku nei, o ua waiwai la i paa maloko o ua moraki la, e kuai ia aku ana ma ka hale kudala o Jas. F. Morgan, Honolulu, ke hiki aku i ka POAKAHI, la 14 o Novemaba, 1892, hora 12 awakea o ia la.

            No na mea i koe e ninau ia la J. A. Magoon, Loio ma ke kanawai.

            Kakau ia Okatoba 15, 1892.

                        S. M. DAMON, Hope no C. Afong, mea e paa nei i ka moraki.

            O na aiua i paa ma ua moraki la, penei e Kuai ia ai:

            Akahi.  Na eka 3 85-100, oia ka aina i kuhikuhi ia maloko o ka Palapala Sila Nui Helu 5171 Kuleana Helu 3432 ia Kula, e waiho la ma Waiehu, Maui.

            Alua.  Na apana 3 a me 4 o ka Palapala Sila Nui Helu 5047, Kuleana Helu @4 ia Pauanihi, nona ka ili he 39-100 a me 70-100 mau eka e waiho la ma Waiehu, Maui.

            Akolu.  He elua mau eka me 10 pereke e waiho la ma Paia, Maui, oia ka hapa o ka aina Hui o Hamakuapoko i hoolilo ia ai i ua C. K. Kapule la ma ka palapala kuai a C.N. Kane, i hoopaaia ma ke Keena Kakau Kope ma Honolulu, Buke 68 ma na aoao 15 me 16, a ma ka palapala kuai a Keanu i hoopaa ia ma ua keena la Buke 54 a ma na aoao 60 a me 61.

            Aha.  He aina e waiho la ma Kainapuaa, Kapalama, Honolulu i kuhikuhi ia penei:

            E hoomaka ana ma ke kihi hema hikina o ko I. D. Iaea, a e holo ana penei:  Akau 51 deg. 30 min. hikina 110 kapuai ma ko Iaea.  Hema 44 deg. 30 min. hikina 110 kapuai ma ko Kunuiakea.   Akau 44 deg. 30 min. komohana 48 kapuai ma ke alanui a i kahi i hoomaka ai He 5280 kapuai ili.                   2411-4

 

Hoolaha a ka Lunahooponopono.

            O KA MEA NONA KA INOA MALALO IHO nei, ua hoonohoia mai au e Hon. A. N. Kepoikai, Lunakanawai Kaapuni o ka Apana Elua, ma ka la 14 o Okatoba, 1892, i Lunahooponopono no ka waiwai o HAKALAAU (k) i make no Wailuku, Maui.  Nolaila, ke hoolahaia aku nei ka lohe i na mea a pau, ina he mau aie ko ka mea i make ia lakou, e waiho mai i ka lakou mau koi me na bila i hooiaioia iloko o na mahina he umi mai keia la aku, o hoole ia auanei.  A o ka poe i aie i ka waiwai o ka mea i make e hookaa mai ia'u, a o ka poe e paa ana i kahi waiwai o ka mea i make, e hoihoi mai ia'u.  E loaa no au ma Wailuku, Maui.

                        WILLIAM NAWAI.

            Lunahooponopono Waiwai o Hakalaau (k) i make.

            Wailuku, Maui, Oct. 15, 1892.                       2412-4t

 

Hoolaha Hookapu Aina.

            KE PAPA A HOOKAPU LOA IA AKU NEI ka holo ana o na holoholona o'u ma Piihonua a me ka hapa mauka o Humuula, Hilo, Hawaii, a ke kauoha ia aku nei e hoonee aku i na holoholona me ka hookaulua ole, a i ole, e hoopii ia no e like me ke kanawai.

                        J.T. BAKER

            Hilo, Hawaii, Mar. 31, 1892.              2388-tf

 

Hoolaha Hookapu Komohewa.

            KE HOIKE IA AKU NEI KA LOHE I NA Ona a pau o na holoholona e helehewa la maluna o ko makou mau Aina ma HUMUULA a me ka hapa mauka o Piihonua, Hilo, Hawaii, e lawe koke aku ia lakou me ka hookaulua ole, a i ole ia e hoopii ia no e like me ka piha o ke kanawai.

            HUMUULA SHEEP STATION COMPANY

                        Na ARMIN HANEBERG

            Kalaieha, Apr. 8, 1892.                       2389-tf

 

HOOLAHA.

            E ike auanei na kanaka a pau ma keia, owau o ka mea nona ka inoa malalo iho nei, ke hoike aku nei i na poe a pau i aie mai ma ko'u HALEKUAI MA HILO, HAWAII, e pono e hookaa, koke mai i ko lakou mau aie mua maloko o na Mahina-Ekolu mai keia la aku; a e oluolu ia ana no na poe e hookaa pau mai ana ia mau aie, e aie hou mai.

            O na waiwai o ko'u halekuai ma keia mua aku, e kuai ia aku no ma ke KUMUKUAI OLUOLU a makepono no hoi, a e hoopiha ia no hoi me na WAIWAI ANO HOU LOA i oi ae mamua o ko na au i hala aku, a he emi iho na kumukuai ina Ke Dala Kuike Owau no me ke aloa,

                        C. Y. AIONA.

            Hilo, Hawaii, Aug. 26, 1892.              2405-9t

 

KAUKA LEONG KEN TONG,

(L. AKINA.)

            E IKE AUANEI NA ANO LAHUI A PAU, E noho ana ma ke Aupuni Hawaii, mai na kane, eahine a me na keiki; i loaa i na ma'i o kela a me kela ano, e naue mai i ko'u keena hana, a na'u e hoopau aku i na ehaeha a ka ma'i maluna o oukou e na makamaka, he hiki ia'u ke lapaau i na ano ma'i a pau:  ma'i iloko o ka opu, hu'i ke kino, aki iloko o ka iwi, eha o ke poo, ma'i wahine, a pela aku.  Mai hoololohe aku e na hoa, a he hiki ia'u ke lapaau i ka ma'i hookaawale ohana.  Hele mai hookahi, hele mai elua, hele mai no a pau loa; he oluolu ka auhau, ke hui me ia  ma na kukai olelo ana; ua makuakau au e pulama mai i na kono ana mai mai na Mokupuni mai, me ka eleu me ka hikiwawe loa, he makamaka a he hoaloha maikai no oukou e na Hawaii oiaio.

                        DR. L. AKINA,

            Helu 40, Huina o na Alanui Kamika a me Hotele Honolulu.             2405-ly*