Ka Nupepa Kuokoa, Volume XXXI, Number 19, 7 May 1892 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

Ka Nupepa Kuokoa

ME

Ko Hawaii Paeaina i Huiia

 

                                                                                                            No ka Makahiki …………..   $2.00

                                                                                                            No Eono Mahina………….      1.00

Kuike ka Rula.

 

HOOPUKAIA E KA

HAWAIIAN GAZETTE CO.

H. M. WHITNEY, Luna Nui,

J. U. KAWAINUI, Luna Hooponopono.

 

POAONO,………………      MEI 7, 1892.

 

KULA SABATI.

 

II Mei 22. Daniela a me kona mau hoaloha. Daniela 1:8 - 21.

     8  Ua paa ko Daniela manao aole e hoohaumia ia ia iho ma ka ai a ke alii, a me ka waina ana i inu ai:  a noi aku la oia i ka luna o ka poe i poai i hoohaumia ole oia ia ia iho malaila.

     9  Ua haawi mai ke Akua ia Daniela i ka lokomaikai a me ke aloha nui ia mai imua o ka luua o ka poe i ponia.

     10  Olelo mai la ka luna o ka poe i poaia ia Daniela, Ua makau au i kuu haku i ko alii, ka mea i kauoha mai i ka oukou ai, a me ka oukou mea e inu ai.  Pehea ia auanei e ike mai ni ke alii i ko oukou mau maka ua inoino mamua aku o na maka o na kamalii me oukou pu?  Malaila, e hoohewa ai oukou i kuu poo i ke alii.

     11  I aku la o Daniela i ke kuene, ka mea a ka luna o ka poe i poaia i hoonoho ai maluna o Daniela, a me Misela, a me Azaria.

     12  E hoao mai i kau mau kauwa i na la he omi, a e haawi mai oe na makou i ua laauikiai e ai, a me ka wai e inu.

     13  Alaila e ikeia'i imua ou ko makou mau maka, a me na maka o na kamalii ka poe i ai i ka ai a ke alii; a e like me kou ike ana, pela no o hana mai ai oe i kau mau kauwa nei.

     14  A ae mai la no oia i ka lakou ma keia mea, a hoao iho la ia lakou i na la he umi.

     15  A i ka hope o na mau la ia he umi, ua ikeia ko lakou mau maka, ua maikai, na momona ka io mamua o ko na kamalii a pau i ai i ka ai a ke alii.

     16  Alaila, lawe aku la ke kuene i ua ai la a lakou, a me ka waina i haawiia mai i mea inu, a haawi ia lakou i ka laauikiai wale no.

     17  A o keia mau keiki eha, haawi mai la ke Akua ia lakou i ka ike, a me ko akamai ma na moa a pau i palapalaia, a me ka naauao; a o Daniela, ua ike oia i ka hoakaka i na akaka a pau a me na moe uhane.

     18  A i ka pau ana o na la a ke alii i olelo ai i alakaiia mai lakou, alaila, alakai aku la ka luna o ka poe i p[oaia ia lakou imua o Nebukaneza.

     19  A kamailio pu ke alii me lakou; aole nae i loaa iwaena o lakou a pau kekahi mea e like me Dauiola, a me Hanania, a me Misaela, a me Azaria.  A ku aku la lakou imua o ke alii.

     20  Ma na mea naauao a pau loa, a me na mea e akamai ai a ke alii i imi ai ia lakou, naauao mamua o na magoi a pau, a me na kilo ma kona aupuni a pau.

     21  Ola ae la o Daniela a hiki i ka makahiki mua o ko Kuro alii ana.

     Pauku Gula.  Daniela 1:8.  Ua paa ko Daniele manao aole e hoohaumia iaia iho ma ka ai a ke alii, a me ka waina ana i inu ai.

     Manao Nui.  E kupaa ma ka hoole ana i ka waiona.

OLELO HOAKAKA.

     He keiki alii o Daniela i lawe pio ia i Babulona ma ka makahiki eha o ko Iehoiakima au e alii ana, M. K. 606.  Ua wae ia oia me na keiki e ae i aoia ma na kula hoonaauao o na kahuna ma Babulona, i mea e lilo ai i mau mea lawelawe kupono no ka moi.  O ke ao kilokilo kekahi haawina hana ano nui ma ua mau kula la.  He ea laelae ko Babulona, a nolaila, ua hiki i na kamaaina ke ike pono i ke ano holokaa o na hoku.  He mau makahiki 16 ko Daniela, i ka wa o keia apana o kona moolelo.  Ua mau kona wa ola a hiki i ka wa o keia apana o kona moolelo.  Ua mau kona wa ola a hiki i ka M. K. 534.  Ua ike maka oia i ka pau ana o ka noho pio o ka lahui Iudaio, aole nae i hoi hou aku oia ia Ierusalema.  8.  Hoohaumia, no ka mea, ua maa mau ka moi o Babulona e hoano e i kana mau mea ai ma ke ano he mohai i kona mau akua hoouoho.  Nolaila ua lilo keia ai i mea hoohaumia i ka oe Iudaio, Kanawailua, 12:23 - 35.  Oihana 12:20 - 29.  I Korineto 10:18 - 21.  10.  Hoohewa, a poino nui paha.  11.  Kuene, oia no kona ohana, aole kona inoa maoli mamuli o ka Baibala Enelani, Melzar.  12.  Laau ike, aole i haawiia keia mau mea i na Akua e, Wai, maikai ae keia mamua o na waiona, like me ka raiki, uala, kalo, papapa.  18.  Keiki oo, opio, no lakou na makahiki he 16 - 20.  18.  La, na makahiki ekolu i olelo ia ma ka pauku eono Ku, lilo lakou i mau alii aialo.  20.  Magoi, oia he elemakule naauao loa.  21.  Kuro, oia hoi M. K. 536.

HE MAU NIELE.

     I.  Ka olelo paa, aole waioua pp. 8 - 10.  Heaha ka Daniela manao paa?  Heaha ke kumu o ke ano haumia o na mea ai ma ka pakaukau a ka moi?  Heaha ke Daniela noi i mua o ke Akua?  Heaha ke ano o na manao o ka Puuku e pili ana ia Daniela?  Ua aloha anei na kahu a pau loa i ka lakou mau keiki hanai?  Heaha la ke kumu o ka hoole ana mai o ka Puuku mai ia Daniela mai?  Heaha kekahi mau kumu maa mau no na keiki e ae aku ai i na olelo hoowalewale o na hoaiauna?  Ua iini nui anei na keiki e hana like me na kanaka mkua?  Heaha kekahi mau kumu kupono a Daniela e wae ai i ka oihana lawelawe no ka moi hoomana kii, oia ua hoole o Moso i ka oihana lawehana no ka moi o Aigupita?  Heaha kekahi mau hoailona o ko Daniela oihana kaula i kona wa opio?  Heaha kekahi mau me ano like me ka moolelo o Daniela a me ka moolelo o Iowepa?  Ua manao anei ka moi e hoopau i ko Daniela pili pu ana i ka hoomana Iudaio?  Ua kupono anei e hana hewa mamuli o ke kauoha a ka haku hana?  Ua kupono anei ka hoole ana i kekahi haawina manawalea mai ka mea kiekie mai?

     II.  Ka hoeo ana i ka ikaika o ka poe hole waiona, pp. 11 - 16.  Heaha ke noi hou a Daniela i ke kuene?  Ua hoole anei ke kuene i keia noi hou ana?  Heaha ka hope o ka hooe waiona, ke kino nawaliwali paha?  Heaha ka hana a ke kuene ia wa aku?  Ua hiki anei i na laau ike ke hoikaika i ke kino a me ka noonoo mamua o ka ai io pipi, puaa paha?  Ua paulele anei o Daniela i ka ikaika o kona mea ai, a i ole paha ka mana a ke Akua ana i hoomana ai?  Ua loaa anei ia lakou kekahi kokua ma ke pale ana aku i na hoowalewale?  Iakoba 1:1 - 3.  Hebera 4:15.  Heaha na kumu a Davida i kupaa ai ma ka pono?  Ua pomaikai anei na opio ma ka pale ana aku i na onou, ma ka ae ana aku paha?  Heaha ka mea e hooikaika ai i na opio e hoomaemae i kona naau?  Ua lawa anei na la he umi no ka hoopau ana i ke kanalua e pili ana i ke ano waiwai o ka hoole waiona, ka inu rama pahaz?  Ua paakiki anei o Daniela, nuha paha me ke ku e ana i ko ka moi hooponopono ana?

     III.  Ka pomaikai i loaa ai i ka poe hoole waiona, pp. 17 - 21.  Heaha na pomaikai mai ke Akua mai no keia poe keiki eha?  Pau ke kula, heaha ka pomaikai hou?  Ehia mau makahiki o ko Daniela noho hanohano ana?  Heaha ka pomaikai o ka hoole waiona e pili ana i ke kino, ka noonoo, ke kulana?  Heaha kekahi mau kumu kupono no kakou e hoole waiona ai?  No hea mai ko Daniela lanakila?  Ua huli mau anei o Daniela i ka naauao?  Heaha kona mau ano maikai e pono ai ia kakou ke hoomahui?  Ua hilahila anei na kanaka Hawaii e hoole waiona?  O wai na lahui lanakila, ka poe hoomana kii paha, ka poe manaoio paha?

HE MAU MANAO PILI.

     1.  E kokua anei kakou i ke kakau ana i ka palapala hoohiki hoole waiona?

     2.  Ua kanalua anei kakou e pili ana i ka pomaikai oi o ka hoole waiona?

     3.  Ua kue anei ke Akua i ko kakou imi naauao, imi pono, imi loaa?

     4.  Ua kupono anai ke ae wale aku i na mea ku e?

     5.  Ua makau wale anei kakou i ka poe hoomauhala?

 

Ahahui Euanaelio o ka Mokupuni o Oahu ma Kaumakapili.

[Hoomauia mai kea pule mai.]

     Ma ka la 24 o Maraki, 1892, ua oluou i ke Akua Mana loa ke kii ana mai a ou ae la i ka liko aloha mua loa mai ko olua puhaka aku, oia hoi o Daniela Kekahuna Ua nalohia kona mau maka mai o kakou akui nei.  Nolaila, ke komo pu aku nei keia Ahahui Euanelio Mokupuni o Oahu me olua ma keka kumakena nui ana.  A ke hauoli nei hoi makou ua moe oia iloko o Kristo, a e aia mai ana ma ka la mahope, oia hoi ke ala ana o ka poe ola hou ma o Iesu Karisto la.

     Na E. S. Timoteo i hoike mai i ko Waialua, S. Kapu i ko Hauula, A. Kaulia (elele) i ko Kaneohe.

     Ma ke noi a S. Kapu, ua kapaeia na rula o ka aha no ka manawa, no ka hoolohe ana i ka hoike a ka hapanui o ke komite e pili ana i ka Palapala Kahea Kahu o Kaneohe.  Ua apono keia aha i ka hoike a ke komite.  Waihoia ka palapala kahea ia Mose Kuikahi, a ua ae mai oia imua o ka aha.

     Ma ke noi a J. Naukana, ua koho ka Lunahoomalu i komite ninaninau penei:  C. M. Hai, O. P. Emekona, S. Kapu.  Ma ka ninaninau ana, ua hooholo ke komite ua kupono o M. Kuikahi i kahu ekalesia.

     Koho ka Lunahoomalu i na komite poni:  C. M. Hai, E. S. Timoteo, O. P. Emekona.

     Kumuhana 5, Oihana Kuwaho. - Na ka Lunahoomalu i koho i mau komite nana e noonoo ka mea e holomua ai keia kumuhana, penei:  O. P. Emekona, C. M. Hai me E. S. Timoteo.

     Heluhelu mai o C. M. Hai ke komite poni i ka papa hoonohonoho hana penei:

     1  Haipule mua a me heluhelu himeni ia Rev. J. M. Ezera.  2  Heluhelu Baibala me ka pule ia Rev. C. M. Hai.  3  Haiolelo ia Rev. S. Kapu.  4  Pule hoolaa ia Rev. J. Waiamau.  5  Oleloao i ke kahu me ka lima akau ia Rev. E. S. Timoteo.  6  Olelo paipai ia Rev. O. P. Emekona.  7  Pule hookuu ia Mose Kuikahi.  Aponoia ka hoike.

     Noi mai o S. Kapu, o ke Sabati mua o Mei ka wa e poni ai.  Pakui mai o C. M. Hai, ina e loaa he keakea no ka manawa, alaila na ka Lunahoomalu a me ke Kakauolelo e hoolaha ka manawa e noho hou ai.  Hooholoia.

     Hoopanee ka aha a noho hou ma ka Poaha, hora 9 a.m. Pule o S. Kapu.

     (Aole i pau.)

 

NA LETA.

(Aole o makou makemake e lawe i ke koikoi o na hala no ua manao

i hoopuka ia malalo o keia poo e ko makou poe mea kakau.)

Na Mea Hou o Hanalei.

     E Nupepa KUOKOA:

     Ma ka la 25 o Aperila, na kui iho la kekahi hekili nui a ikaika ma Naueikekai ma Haena, mamua pono o ka hale o G. Titcomb.  A i loko o keia hekili pamalo i poha iho ai, ua puiwa o George a me kana wahine a me ka bebe, a ua ano pono ole ko lakou manao, a ua kau mai na lia maeele ia lakou apau loa, a mahope o ka pau ana o ko lakou ano e, ua puka aku lakou mawaho, a ike aku la i kekahi o ka laua kumulau moa, a me na keiki e waiho oni ole ana i ka moe kau moe hooilo, ua lele ke aho ia ole pau.  A ua make loa, a i ko Keoki hele ana aku e nana, aia hoi, ua moku pu ke kani ai, a ma kahi o ka moku, he puka ke poopoo ana, ua hele e hohonu, oia na hana a keia hekili, i waiho iho ai ma keia ili honua.

     He mau la hana mau loa keia o na pakaua o ua aina nei, ke hele la a hakukele.  Nui ka wi o makou nei i ahona i na poe kalepa ai, he kanakolu paona hookahi dala a emi mai a oi aku i kekahi wa. 

                                                                        E. K. NANIU,

                                                                        Hanalei, Aperila, 27, 1892.

 

Aole Maluhia ma Pahala

     MR. Lunahooponopono;

     Ma ka la Sabati Aperila 24 o keia mahina iho nei, ua ike aku kou mea kakau i ka haulani ana ae o ka ihu o na lio e holo mai ana me na kino uhane maluna iho o ko lakou mau kua, e hio ana io aia nei.  I ka nana aku ia lakou, he mau helehelena o ka ona rama a me na leo nui ano ole e kue ana i ka maluhia o ka la a me ka maluhia o ke kanawai o ke Aupuni.  O ke kumu, aohe makai ma keia apana, ua hoopau ia me ke kumu ole, a ke huli nei i mea kupono ma ia wahi aohe loaa.  He mau kumu ole, a ke huli nei i mea kupono ma ia wahi aohe loaa.  He mau mahina ae nei ka waiho wale ana o keia wahi aohe makai, Haule iho la kekahi kanaka iloko o ke tabu wai a nahaha ka uwati; o ke kumu no ka ona mai no ia.

     I na pela ka waiho wale o keia apana aohe makai, alaila pehea la ke kulana o na kanaka "ona" ma keia wahi?  Ke manao nei au e komo aku ana na kanaka ona rama i loko o ke kulipolipo o ka ona a me ka haihai kanawai.  Na ka Makai nui o ka Mokupuni a me ka Hope Makai Nui o ka apana e nana no ia hemahema.

                                                                        D. K. KAIOONI

                                                                        Pahala Kau, Apr. 27, 1892.

 

Aloha oe e S. K. Kauakahi.

     MR LUNAHOOPONOPONO;

     E ae mai ia'iu no ka manawa hope loa, i hiki ai ia S. K. Kauakahi ke hoomaopopo i ka'u e makemake nei.  I mea e hoopokole ai, a i ole ai e hoopiha wale la ka nupepa me keia mau pane hoopau manawa ana, ua makemake wau ia oe e S. K. K. e hele ae oe ma ke keena oihana, a e loaa wau ia oe malaila a e hana kaua i olelo Aelike na kaua, ina oe e manao na'u e hana, aole e lilo ko wahi kenikeni kuai palaoa a ka beka.  Penei e hana ia ai, he olelo Aelike na kaua, e koho ia i ekolu lala o ke komite nana e kaupaona a haawi i olelo hooholo no ka aoao o kaua i pololei, oia hoi, o kalai a e papa leo pu kaua i mua o ke akea, a i mua hoi o ke anaina o na ma'i ma kekahi la e ku mai ai ka moku halihali paiai.  E koho kaua i kekahi kanaka kupono nana e paa i na dala a kaua, e waiho ae oe i $5 a pela hoi au ma ka poho o ka lima oia kanaka a kaua e koho ai.

     E kamailio ana kaua ma ke ano naauao imua o ke akea, ina nae oe he kanaka i hoonauao maikai ia, e hookumu ia ka kaua kamailio ana maluna o ke kahua au i hoolaha ai ma ka nupepa, oia ko hoolaha mua i ka hoomaka ana, a e lawe pu ana hoi au i ka'u mau kumu pale e kue ana i ka oiaio o kau hoolaha, e ike me ka'u i pane ai ia oe ma ka nupepa, a e lawe pu mai ana wau i mua o ke komite he mau hooiaio ana ma ko'ui aoao, a pela hoi oe.  Aka hoi ina ma ka pau ana o ka kaua mau kalai olelo ana, a ina haawi ke komite i ka olelo hooholo ma kou aoao ka lanakila, alaila o ka'u mau dala elima e lilo, a koe no kau, a e makana pu aku ana wau ia oe i ko'u bila alualu nona ka waiwai io, he elima dala, he manuahi keia ia oe, a manao ae oe ua ola ka noho ana o keia aina.  A ina hoi e lilo ma ko'u aoao ka lanakila, alaila, o kau mau dala elima ke uku ae na na komite.

     A no na mea i koe, na kaua ia e hooponopono a hooholo pu hoi.  He ole hoi ka lealea kalakalai, he manumanu ka loaa, e aho ia, ike pu ia ae ke au nui a me ke au iki.  Nolaial, e lohe oe e S. K. Kauakahi ma ka inoa oiaio o S. Kaui Kauakahi, a hoomanao ae i keia leo poloai.  Ke hooki nei au i ka'u maka peni.

                                                                        W. K. MAKAKOA,

                                                                        Kalaupapa, molokai, Apr. 29, 1892.

 

KA'U PANEIA HUNA INOA.

     E MR. Lunahooponopono,

     E oluolu mai kou ahonui e hoike ae i ke ia mau hua e kau ae ia maluna i ike mai ai ka lehulehu a me lakou la e hilinai la i ka muku.  A oia keia:

     Ua ike au ma kou helu 16, buke 31, o ka ia 16 o Aperila, ma ka aoao ekolu koiamu elua, ma kahi o ka Nuhou Hawaii, i ka hoolaha a huna inona, nona ke poo manao "mai Hanalei Kauai."  Ke hoike aku nei au me ka oiaio, o kela inoa o J. S. Kahea i hoolaha ia ai, e pane ana ia J. M. Naeole aole na'u ia, aka na ka enemi i aahu i ke koloka o ka hookamani, a apakau ae la na lima i ko hai inoa me ka makau ole, ua ike no pahja he makau wale, a-a keia i ka hoolaha me na lima i maa i ke kolohe i ko hai waiwai.

     E huna inoa, pehea la oe i lawe ai i kuu inoa a hoolaha, a me kou lili oihana, i mea anei i kapaia mai ai ia oe he makaala i na mea hou, me ka manao ia he oiaio, eia ka he hoopunipuni i oi aku i mua o ka Nahesa.  Nolaila, e popoki huna inoa, manao anei oe o ko hoolaha ana i ko'u inoa i kumu no J. M. Naeole e huhu mai ai ia'u a pau ko maua launa aloha ana.  Ke hoike aku nei au ia oe o J. M. Naeole, o ko'u hoa aloha oiaio ia ma na ano a pau, aole o oe e ka lima lewalewa malalo o ka La, e ole ka pohai manu Piheekelo manao ae ke ola o ka noho ana.  E kuhi ana au ia oe e huna inoa he haipule, eia ka he pegana, kuhiau i ka poe pololei o ka waha i ka haiolelo he oiaio, eia ka he hookamani.

     No na kumu a huna inoa i hoike ae nei ma ke akea, Akahi, no ke kumukula, he makemake loa o huna inoa e lilo oia i kumukula ma kahi o J. M. Naeole, a he palapala hoopii aku nei ka lakou i ka Papa Hoonaauao e hoopau ia o Naeole, a e noho o hunainoa i kumukula, pehea la e noho ai ka hupo ma ia wahi, i kumu ao nae paha i na haumana i ka hoopunipuni.  Alua, ke kue nei oia i na hana Kula Sabati, he hoopunipuni ino loa keia a huna inoa.  Ke hoike aku nei au i mua o ke akea, o J. M. Naeole ka mea nana i hookumu ke Kula Sabati o Wainiha a me Haena, aole o huna inoa o Wainiha a me Haena nahoike o ko Naeole hana ana a ku ke Kula Sabati a holomua ma na hoike ana a pau.

Akolu, aole e lulu no ke ola Kahu, he keu aku no a ka opu keemoa i piha me ka inaina, a hamama ae la ka waha i ka makani a hau ae la i ka mea oiaio ole.  Nolaila, o kela hoolaha, e pili ana no J. M. Naeole.  Oiai o wau a me ka lehulehu o Wainiha a me Haena na hoike ma ko Naeole aoao, a o Popoki hunainoa a me kona mau puali, ua piha ko lakou mau waha i ka hookamani.

     O keia ka'i pamne ia huna inoa a me ona mau puali.  A i pane hou mai oe ua makaukau au i ke ahi kao Helene i mea nana e hoopouli i ou mau maka a haha poeleele oe i ke one pua rose o Mahamoku.

                                                                        J. M. KAEHA,

                                                                        Hanalei, Kauai, Aperila 22, 1892.

 

No "na Hono a Piilani," Maluna o ke Celaudina.

     Me ka Poalua la 12 o Aperila hora 5:30 P. M. haalele ia Honolulu na na Hono a Piilani.  Elua moku e hoopuka ana mamua ia hora no, Waialeale a me Mikahala.  I ka ue i ka oni, hookahi no kope'na haalele ia kela mau moku mahope, he malie keia holo ana, lana malie ke kai o Hauola.  Aole kokoke mai kela huaolelo maa mau i ka poe holo moku, o-a (luai) kupono io no ka olelo ia ana he mahimahi no Maui, oia no oe i ka waikahe e ko ana i ke au i Halae.  Hora 8:30 kaalo ana i ka lae o Kalaau hora 10:30 iho ana ka Likelike a me Kinau, mawaho ae o ka lae o kaena, hora 2 A.M. komo i ke kai holu o Kahului, lele po no i uka, ua pau e na kaa hoolimalima i ka poe lele mua, kau kahi paiki i ke kua pekipeki wawae i ke one o Kahului a hiki i Waihinanoakapoipoi.  Loaa mai i na lio e kai ia mai ana, motio pololei no Wailuku a hoohiki loa i ka ua-hoeha-ili o Waiehi i ka hoara 8 A.<. oia ka la 13 o Aperila, he oluolu no keia aina, no ke kokoke loa i na mauna o Eeka e iho mai ana ma ke alo pali me ka hui iniki i ka ili.

     Na mea hou o na Waieha, he mahi ko ka hana e loaa ai o ke ola i na kamaaina; o ka poe mea aina, he mahi kalo no hoi ka lakou.  Poaona 16, hui me ka Hon. J. W. Kalua, ka Peresidena o ka Ahahui opiopio o Wailuku ma kona home oluolu, lulu lima pu hoi me ka Hon. J. Iosepa L. makaainana o ka ua-kea o Hana, ma ia moku like laua i huikau like mai ai no Wailuku, Rev. Kuia a me Rev. S. Kapu hoi ko maua holo pu ana me ka lede oluolu hoi o ka home.  He makua maopopo ke Ahi o Wailuku me kana lede no na malihini, he hookipa heahea, he ike mai i ke kiekie a ka mea haahaa.  He haiolelo na ka ahahui o I. K. o Wailuku ma ka makeke i ka hora 4 P.M. nui ka mahalo o ka malihini maikaikai i ka maikai o na hana a ia poe opiopio.  O ke ahi o na Koolau o Oahu nei ke alakai ma ka Himeni Euanelio, he maluhia ka poe kuai, aole like me koonei ka waha-a, hoolohe no na pepeiao kuai no ka ia.  O keia ke koo ikaika o ka Ekalesia o Wailuku nei, mamuli o ka noho poo ana o ka Hon. J. W. Kalua.  O ka mea kakau kekahi i haiolelo ma kona ano he kakauolelo no ka Ahahui I. P. K. o ka Pae Aina, ma ke Sabati ae, i ka Makani Kiliopu o Waiehu ka'u pule.  He Sabati ahaaina keia he uuku na hoahanau i helu ia ma kauna i nui iki i na keiki, o ka Rev. O. Nawahine ke kahu, hui hou me S. Maule Hope Luna Duke Awa o Kahului, Kaleikau, Napulou, me na makua o ia aina e malama ana i ka pono, he nui ka wela o keia mau aina, like no me Honolulu.

     Aole i ike i na halawai o na Aha O. I. o Waihee a me Wailuku no ka loihi o ko'u wahi noho, a no ko'u ano maimai hoi kekahi, ma kuu lohe mai nae, ua piha loa ka luakini Kaahumanu i na makamaka, o ka Rev. S. Kapu ka haiolelo kea-u la o Kev. S. Kapu i na kuauna loi, ke pii ala e pani i ka wai o Iao, ke hui ae la me na Mamona, ke huki mai la i na auana ke hoala ae la i na hiamoe, ke haipule pu la me ka poe mai, ke hoala aku la i na hoomaloka.  Holo ka hana, ikaika kupono ia kanaka opio no ia Ekalesia, he mama oluolu he maalea e huki mai i na aia.

     Poalima, 22 e paina ana makou ma ko makou hale kamaaina.  Aia la!  He naue!  he lulu!  he heana he olai ka mea i puka like ae mai ko makou mau lehelehe.  Ua hoolulu ia ka makou mau wahi aipu onioni na wahi pa, nakeke na wahi pola.  Hoomanao no ka mea kakau, ua ala paha ka hiamoe o ka mea kakau, ua ala paha ka hiamoe o ka elemakule Kaneluhonua, Poaono 23 hora 8:30 PM.  haalele ia Kahului no Honolulu, e like no me ka holo ana ka lai malino, pela no ka hoi ana mai hora 5 A.M. o ke Sabati pili i ka uapo, hiki hou i ka Ua-ku-kala-hale.

     Ke haawi iho nei ka mea kakau i kona aloha ia Hon. J. W. Kalua me kona Lede lokomaikai.

                                                                        I. P. IWA.

                                                                        Kaumakapili School, Aperila 22, '92.

 

Hunahuna o na Aina E.

     Ua hoouna aku o Cuba i na aina e iloko o na malama ekolu o keia makahiki (1892), mai kona mau awa kumoku aku a pau, he 1,128,170 mau eke a me 2,514 mau pahu kopaa, no lakou ke kaumaha he 179, 109 mau tona, oiai hoi iloko o ia manawa hookahi o ka makahiki i hala he 109,630 mau tona i puka aku.

     Ua koho wale ia, e loaa ana i ka Hui Kopaa Alunu o Nu Ioka na dala puka i oi aku mamua o ka $20,000,000 i keia makahiki.

     Ina e kahiko ana ka Moiwahine Victoria i kona aahu nani loa, aia wale no ka piha a komo pu oia i kona mau lako hoowehiwehi momi nona ke kumukuai he $750,000.

     O ka huina dala i hookomo ia e hoopukapuka iloko o ka oihana kuai laau papa o Amerika Huipuia, ua koho ia aia ma kahi o ke $75,000,000, a he 3,000,000 kanaka e paa nei i ka hana maloko o keia mau hui wili papa, oia hoi ma ka okioki ana a me ka hoohikihiki ana.

     E ia ma Geremania he 27,485 mau kamalii mawaena o umikumamalua a me ka umikumamaha makahiki i hoohana ia maloko o na hale hana i ka 1890.  Ma Enelani hoi, he 86,499 mau kamalii malalo iho o ka umikumamakolu makahiki i hoohana ia ma na hana.

     Mamuli o na hana kumakaia a Edward Holden o ka Puali Anaaina Papu Alii o Enelani, ua pau aku i ka ikea e Farani na kukulu a me na uhau papu ana a Beritania maluna o ka Mokupuni o Malta ma ke Kaiwaenahonua a ahuwale pu na wahi uhalu o na papu.  He keu aku o ka ukiuki o Enelani i keia ike ia ana.

  

HOOLAHA HUI.

 

     MA KA HALAWAI MAKAHIKI I HOOPANEE ia o ka Hui KONA COFFEE and FRUIT COMPANY i Kaupalenaia, i malamaia me ka le 21 o Aperila, 1892, ma ke Keena Loio o W. C. Achi, ma Honolulu, Oahu, ua kohoia na poo malalo iho i mau Luna Nui:

                                                            Col. J. H. Boyd………………………………………….      Peresidena

                                                            Hon. D. H. Nahinu………………………………………     Hope Peresidena

                                                            Hon. Abr. Fernandez…………………………………….     Puuku

                                                            W. C. Achi……………………………………………….     Kakauolelo

                                                            Enoka Johnson Esq………………………………………     Luna Hooia

                                                                                                            Papa Alakai.

     Hon. Abr. Fernandez, S. M. Kaaukai Esq., J. K. Kahookano Esq., Hon. A. Kauhi, H. Waterhouse Esq., Hon. A. Rosa a me Sam C. Dwight Esq.

                                                            T. K. R. Amalu……………………………………………   Luna Nui

                                                            W. C. ACHI,

                                                            Kakauolelo Kona Coffee and Fruit Company.

                                                            Apr. 21, 1892.

                                                            2387-1t

 

Hoolaha Kumau.

 

PAPA!  PAPA!

AIA MA KAHI O

Lewers & Cooke

(LUI MA),

Ma ke kahua hema o Alanui Papu me Moi.

E LOAA NO NA

PAPA NOUAIKI

O keia a me keia ano,

Na Pani Puka, na Puka Aniani, na Olepelepe, Na Pou,

na O'a, na Papa Hele, na Papu Ku,

me na Papa Moe he nui loa.

NA PILI HALE O NA ANO A PAU

A me na

WAI HOOHINUHINU NANI

O na ano a pau loa.

 

Na Balaki o na Ano he Nui Wale

Ke hai ia aku nei oukou e na makamaka a pau,

ua makaukau keia mau makamaka o oukou e hoolawa aku

ma na mea a pau e pili ana ma ka laua oihana no ka

Uku Haahaa Loa,

E like me ka mea e holo ana mawaena

o Laua a me ka Mea Kuai.

Hele Mai e Wae no Oukou iho.

2357-q

 

Ka Waiwai o ka Hilinai

Saseparila Ayer

     AYER, Laau Saseparila kai kaulaua i hilinai nui ia no ka hoomaemae koko ma na wahi a pau o ka honua, he aneane 40 makahiki i hala ae nei, a ua lawelawe nui ia hoi iwaena o na oihana lapaau o keia

     LAAU SASEPARILA, no loko ae ia o ke aa Saseparila Honedura maoli; ua loaa ka mana hoomaemae ma o ka hui pu ia ana me kekahi mau aa laau e ae, a me kekahi mau mea no loko o ka houua a me ka hao.

     HE KOKO inoino a nawaliwali anei kou?  Ua awili pu anei me na ano ma'i ikaika?  A ua huipu anei me na wai awaawa hoopehu?  Na keia

     LAAU e hoomaemae ia mau mea ino a pau a maikai.  O na kauka lapaau a pau o Amerika i ike i ke ano o ka Ayer Saseparila u i olelo lakou, aole he mea maikai e ae no ka hoomaemae koko ana mai na ma'i i awili pu ia, aka o keia wale no.  No ka

     HOOMAEMAE ana i ke koko, a me ka hookahua pono ana i na mea a pau ma kekahi mau ano ma'i i ike ia, o ka Ayer Saseparila wale no ka laau nana e hoomaemae ae me ka hakalia ole mamua ao kekahi ano laau e ae.  O ke ano

     KOKO INO hakukaku a nawaliwali hoi kona holopono ana ma ke kino, e hoomaemae ia ana a e hooikaika pu ia no hoi ma o ka ai ana i keia Laau Saseparila a Ayer.  He maalahi a he

     MAIKAI loa hoi keia laau, aole no ka hoomaemae wale ana no i ke koko, aka, no ka hookaawale pu ana kekahi i na ma'i hoomomona hou ana i ke koho ino, a me ka hooikaika pu ana i ka holopono ana ma na aa.  He lehulehu wale na hooia ana mai na wahi a pau o ke ao nei i hoohana mai i keia laau mamua o kekahi mau laau e ae

     A HILINAIIA no ka ikaika kupono o ke ola kino, ma ka maemae ana o ke koko, hoomake pu ia na ma'i, a pela aku.  He nui na laau hoomaemae koko i  hoolaha wahahee wale ia malalo o na inoa he lehulehu, aka o na hilinai a me na hooia wale no a ke ao holookoa, maluna o ka

Ayer Laau Sasaparila,

i hoomakaukauia e

Kauka J. C. Ayer & Co., Lowell Mass.

HOLLISTER & CO.

Na Agena ma ka Paeaina Hawaii.

2857-q

 

Hoolaha Amauu

 

KAKELA ME KUKE

KA HALEKUAI NUI

- O NA -

WAIWAI LIKE OLE.

NA MEA HANA

KAMANA A PAU

PAHI, UPA, PULUPULU.

NA PENA

KAA - PALALA

IPUKUKUI

- A ME -

KA AILA.

PALAU!

A me na mea Mahiai.

NA PAKEKE POI

Ipuhao, Iliwai.

Makau me Aho Lawaia

Mikini Humuhumu

MIKINI A WILCOX ME GIBBS.

Na Mikini a Remington.

Kakela me Kuke

2371-q