Ka Nupepa Kuokoa, Volume XXXI, Number 15, 9 April 1892 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

Ka Nupepa Kuokoa

ME

Ko Hawaii Paeaina i Huiia

No Ka Makahiki,        $2.00

No Eono Mahina,        1.00.

Kuike ka Rula.

 

HOOPUKAIA E KA

HAWAIIAN GAZETTE CO.

H. M. WHITNEY, Luna Nui,

J. U. KAWAINUI, Luna Hooponopono

POAONO, -- APERILA 9, 1892.

 

HALAWAI A KA AHAHUI EUANELIO O HAWAII.

[Koena mai kela pule mai.]

@--Na ke Kakauolelo i heluhelu mai i ka hoike a E. W. Lyons e pili ana i ka hale kahu o ka Ekalesia o Waimea a aponoia.  Noi mai o Emekona e haawi aku keia aha i na hoomaikai i ke komite kukulu hale, a na ka Lunahoomalu a me ke Kakauolelo e pane aku ma ka palapala.

            Kumuhana 9—Ke Ola Kahu.  Na ka hapanui o na kahu i hoike mai ua pau pono ke ola kahu iloko o keia hapa makahiki i haia iho la, a ma kekahi mau ekalesia aole i pau pono.  Waiho mai o Kalaiwaa he olelo hooholo, penoi:  "Hooholoiia.—E kauoha aku keia Aha me ka ikaika i na Elele e hoike aku imua o na ekalesia o lakou, e hooko pono i ka hookaa ana aku i ka hanai kahu e like me ka lakou i hana ai ma ka palapala kahea, ina ma ka mahina a ina ma ka hapaha."  Ua aponoia ka olelo hooholo.

            Kumuhana 10—na hale kahu, na hale halawai a me na halepule.  Na Luhiau i hoike mai i ka pilikia o ko lakou luakini, a ua manao lakou he $100 na lilo; ua hiki ia lakou ke hoopiha i $50, a o ke koena aku na ka aha e noonoo.  Ma ka noonoo ana o ka aha, ua kauoha ia e komo hele aku oia iwaena o na ekalesia o keia aha e noi ai a piha ke koena dala.

            Waiho mai o D. K. Meheula i kona ae imua o ka aha no ka palapala kahea a ko Kekaha iala.  Koho ka lunahoomalu i Komite Ninaninau—O. P. Emekona, no ka Hoike Manaoio; S. L. Kiwini, no ka Palapala Hemolele; W. M. Kalaiwaa, no ka Hoiko Akua; S. W. Kekuewa no ka Hooponopono Ekalesia.   Ma ka ninininau la ana ua apono ke komite no kona makaukau e poniia i kahu ekalesia.  Waiho mai o S. W. Kekuewa i na inoa o Emekona a me Kalaiwaa i mau komite poni ia D. K. Meheula ma ke Sabati, Maraki 13, ma Kekaha.  Hooholoia.

            Waiho mai o S. L. Kiwini i ka hoike a ke komite e pili ana i ka hoike a ke komite @ pili ana i ka palapala hoopii mai Kohala Hema mai, e noi ana e hoohui me Waimea.  Ma ka noonoo ana o ke komite, ua manao lakou aole e ae aku i keia palapala noi, no ka mea aole i huipu mai na hoahanau o Waimea ma keia hoopii hoohui.  Ua aponoia ka hoike a ke komite.

            Noi mai o Kekuewa e waiho hou i keia palapala hoopii ma ka lima o kekahi komite hou, a e hui aku ia komite me ka Ekalesia o Waimea e kuka pu no kona ae mai e hui me ka Ekalesia o Kohala Hema, a na ia komite e hoike hou mai imua o keia aha i Sepatemaba, 1892.  Aponoia.  Kohoia o C. M. Kamakawiwoole, S. Kaili me D. Kahooio i poe komite.

            Kumuhana 11—na Kahukula Sabati Nui.  Noi mai o Kiwini e waiho ia kumuhana a noho ka Ahahui Kula Sabati.  Hooholoia.

            Kumuhana 12—na Kula Hanai.  Na Emekona, Kiwini me Kekuewa i hoakaka nui mai no keia kumuhana.  Ua hoike mai o Kekuewa he mau tausani dala ka aie no ke Kula Hanai o Kohala, a na Kalaiwaa i noi mai he mea pono i na lala o keia aha e hoi aku a hooikaika i na ekalesia e hoouna i na kokua i ka Papa Hawaii, i hiki ai i ka Papa ke kokua i na kula.  Hooholoia.

            Noi mai o Emekona e hoopanee ka aha a noho hou i ka hora 9 A.M. apopo.  Hooholoia.

            Hoike mai ka Lunahoomalu i ke kumuhana o ka halawai e malamaia ana ma ka hora 7:30 o ia po, "Ka manaoio o ka wahine Kanaana" ma Mataio 15:21-28.  Na L. K. Kalawe me S. L. Kiwini e malama ka halawai.

            Hoopanee ka halawai me ka pule a O. P. Emekona.

 

LA HANA 2.

            Maraki 12.  Noho hou ka aha elike me ka hoopanee ana.  Malama ia ka hora haipule.  Kahea ia na lala o ka aha.

            Heluhelu ia ka moolelo o ka halawai i hala a aponoia me na hooponopouo.

            Kumuhana 13—na wahi i hai ole ia ka Euanelio.  Na Emekona a me na hoa e ae i hoakaka nui mai i na wahi i hai ole ia o ka euanelio.  A ua waiho mai o Kalaiwaa he olelo penei:  "Ma ke kuka maikai ana o ka aha no kahi i hai ole ia o ka euanelio e like me Lanai, a no ka ike o ka aha he kumuhaan pili keia i na aha mokupuni o keia Pae Aina,nolaila e waiho aku i kela kumuhana i ka Ahahui Euanelio o ka Pae Aina."  Hooholoia.

            Kumuhana 8—na ekalesia kahu ole.  Ua hoomau ia o S. L. Kiwini i komite no Onomea me Haka@au, o Ka@ino no Kohala Hema, a o Waiau no Kaohe me Milolii.  Na ka aha i koho ia Kiwini me M. C. Kealoha i komite nana e kuka a hoopau i ke kuee mawaena o na hoahanau e noho ana ma Olaa me ko lakou kahu L. K. Kalawe, a e hoike mai imua o ka aha iloko o ka malama o Sepatemaba.

            Noi mai o S. W. Kekuewa, he pono e kauoha aku keia aha i na Revs. J. Kauhana me G. W. Waiau e hiki mai imua o na halawai o ka aha mokupuni, a i ole e hoouna mai i ka laua hoike.  Aponoia.

            Kumuhana 14—kulakaula a me na keiki a keia aha.  Na S. H. Mahuka i hoike mai ia James A. Kaleo oia ke keiki a ka aha  Noi mai o Kiwini e lawe ka aha i keia keiki a hiki i Sepatemaba, ia wa e ninaninau pono ai ka aha no kona kupono e komo i ke kula kahunapule.  Aponoia.

            Kumuhana 15—na heluhelu haawina.  Noi mai o Kiwini e waiho na haawina a hiki i Sepatemaba.  Hooholoia.

            Kumuhana 16—na elele i ka aha ma Honolulu.  Na ka Lunahoomalu i koho ia J. W. Keahi, E. Kaoo, P. Kaaekuahiwi, J. Manu, C. K. Kapa a me S. Kailipua a hooholoia.

            Kumuhana 17—kahi a me ka manawa e noho ai ka aha.  Noi mai o Keahi ma Puula e halawai hou ai keia aha.  Hooholoia.

            Waiho mai o Kiwini he olelo hoohooholo e haawi aku keia aha i na hoomaikai i na hoaloha a me na makamaka no ko lakou kokua ana mai i na mea e oluolu ai ke ola kino o na laia o ka aha, a aponoia.

            Ma ke noi ua heluhelu ia ka moolelo o ka halawai.

            Hoopanee ka aha a noho hou ma Puula, Puna, i ka malama o Sepatemaba me ka himeni a me ka pule a S. L. Kiwini.

D. KAHOOIO,

kakauolelo.

 

NANEA KAMAHAO

O KE

KEIKIALII

ROMEALA

--KA—

Ui Kila Mageneti

O PARAMERI.

Ka Nani e haule ai ka Honua;

            Ka Mahina Meli o Salaredina;

                        Ka La Alohi o Mulisedera;

                                    Na Kulu Koko Kamahao Ekolu.

 

Na Ui Hookelakela.

O KE AO HOLOOKOA.

NA NANI

Puuwai Uahoa o ka Honna nei,

--A O KE—

Kila Mageneti o ke Aloha—"O Parameri no ia."

 

            E ke kanaka hookano, e haliu hope aku i kou alo a huli hoi aku no kahi au i hele mai nei.  Aole anei oe i ike o ke aupuni kapu ilihia loa keia o Rainapo nei, kahi hoi aole loa i ae ia na kanaka e like me oe ke ano.  He komohewa oe a he wawahi maluhia hoi, nolaila, o ka lohe kou a hooko, a ke ole pela, alaila ua makaukau au e haawi aku i ke kauoha maluna o na koa apau o Raianapo nei, no ka hopu pio ana ia oe a hoopaahao aku iloko o ka halepaahao pouli o Raianapo i uku panai no kau mau hana hookiekie.

            O keia mau olelo pane okalakala a kahi koa kiai kuapuu, ua lilo ia i mea mahalo loa na ke keikialii Romeala, a oia kana i pane ae ai i kana mau kauwa hoolohe, me keia mau olelo.  Ea—ke ike nei oukou i ka oiaio o na mea i olelo ia no keia lahuikanaka liilii e paio ana lakou a hiki i ke kanaka hope loa, aka heaha hoi ia mau olelo, aole anei ua alo ia e kakou na make he nui ma ko kakou alahele, a e alo hou aku ana no kakou imua oia make i oi pa tausani aku i keia no ka hopena o ka kakou huakai kaahele i ka honua no kela inoa hanohano a kaulana hookahi a ko ke ao ne e ake la e loaa ia lakou.

            Ua huli hou ae o Romeala maluna o ke koa kiai a pane aku la; e ke kiai maluhia o Raianapo nei, ua loaa ia oe na mahalo ana he nui no kou hooko piha i ka hanohano o kau oihana, aka o kau mau olelo hope o ka hohe wale, ke hoole nei o Romeala ia mea, ua a-a kona puuwai e hele imua no ka hanohano o ka oihana hookelakela me ko ka honua holookoa.

            Ae—e ke koa kiai, ua a-a au e pale i kau mau olelo kauoha o ka hohe wale, no ka hoike ana aku i ko Raianapo holookoa, aole anei na'u i hoohaule ka mana a me ke kapu o kona mau paia hao no ka wa hope loa, a i keia la, eia au i kahi a'u e koi aku ai ua eo na aupuni o Raianapo ia'u.  Ina aole o Romeala e ae ia mai ana e ike aku i ke panihao paakiki loa o Raianapo, oia ke kahua a me ka mole o ka'u huakai, a ke haule au imua ona i keia la, alaila e lilo auanei na Raianapo e lei ka inoa hookelakela o ke ao @ hiki i ka wa a kekahi loea e ae e kaili aku ai ia mea mai iaia aku, nolaila e ke koa kiai, e hoomanao oe no ka ipuka hao paakiki o Raianapo nei ka'u huakai o keia la, a o kahi o ua panihao paakiki la, aia no ia i ke aloalii o kou Moiwahine.  O ka maluhia ka'u e lawe aku nei, aole o ka mokuahana a me ke kue, a ina o ke kue a me ka uluaoa ka Raianapo i makemake, alaila e hewa ole auanei au ke olelo ae:

            Nani wale kou hiolo ana

            E ke kulanakauhale hookiekie,

            Ua like oe me Babulona,

            Ka mea i ai i ka weuweu

            A me ka hau.

            Ano e ke kiai maluhia, ua lohe aku la oe i ka'u mau olelo, a e wehe ae i alahele no'u e komo aku ai.

            Aole loa! wahi a ke koa kiai, me ka oniu pu ana ae i kana pahikaua, me ka luai hou ana mai i na olelo oolea:  O ka'u olelo mua o ke kauoha i hai aku ai la oe, o ia kau e keia komohewa e hooko ai, a ke hoolohe ole mai oe i ka'u alaila e hookala no aunei au i ka'u pahi me ke kauoha paa au e poina ole ai.—

            Hahau ka hamare

            Oiai ka hao e wela ana.

            Ano e ke kanaka wahahee, ua lohe mai la anei oe i ka'u mau olelo?  Alaila e hooko anei oe e like me ke kanoha a ko Raianapo nei kiai maluhia?

            Ae e ke kiai, ua lohe au i kau kauoha, aka o ko'u hoolohe a hooko ana i ua kauoha la, ke hoole nei au ia mea.  E like me kou hoole ana mai i ka'u noi, pela wau e hoole pu ai i kau kauoha, a i hooiaio no ka'u mau olelo eia au ke hele aku nei imua a hiki i ka nohaha a weluwelu liilii ana o kela panihao paakiki loa o Raianapo.

            Me kela mau olelo a ke keiki alii Romeala hoouna aku la oia i kana mau kauwa hoolohe no ka hele ana imua malalo o na kanawai o ke aupuni o Bagesara a o ia no hoi ka wa a na kauwa hoolohe ekolu i hao koke ae ai i ko lakou mana no ka puka o ka halealii ka pahu hopu.

            E like me ka hikiwawe a me ka eleu o na haawi ana a ke keikialii Romeala i ke kauoha maluna o kana mau kauwa hoolohe ekolu, pela no hoi ka eleu a me ka makaala o kahi koa kiai kuapuu i puhi koke ae ai i kana o-le kukala kipi a me ke komohewa no ke kahea ana aku i kona mau hoa kiai maluhia.

            Emoole aia na wahi a pau o ka halealii ua hele a—

            "Luuluu Hanakahi

            I ke one o Ohele"—

            Ae e ka mea heluhelu ua unu ia mai la na koa kiai maluhia o Raianapo a hewa i ka wai ua mea he nui, me he piha kanaka la no ke kaha o Waialua.  E nu ana ko lakou mau leo hae ahiu o ka inaina a o ka lakou mau pahikaua, ke halaoa ala ia mao a maanei, a ina aole e paa ka loea o ke ao malalo o na kiai ana a kana mau kauwa hoolohe ekolu ina la i keia la aohe Romeala i koe ua kau ia i ka lele.

            E like me ke ano mau o ka lahui nalo meli ka puahia a me ka pulupuluahi, me ke ake ana e loaa ka enemi i ka wa e hoao ia ai ka lakou waihona momona e hanaino, pela okoa iho la no keia poe, aka, o ia mau kukahalake ana nae, he mea waiwai ole, oiai aia ka mana huna o ke kulukoko elua, a o ka mea hoi i olelo ia o ka "Papale ooma kupaianaha: ke huna ala i kona haku, a aia ua loea nei o ke ao ke minoaka mai la maluna o ua poe koa kiai maluhia la o Raianapo.

            Oiai na koa e haluku ana io a ia nei ua holo aku la ka halulu o keia mau nakeke a lohe ka moiwahine Raianapo, a o ia ka ua moiwahine la i huli ae ai maluna o kona aloaliii a ninau aku la i ke kumu o keia mau nakeke, a me ka hauwalaau ana o na kanaka.  O ka pane i hai ia mai i ua moiwahine la, aia he kipi a he komohewa i loko o na palena o kona aupuni.

            Owai ia kipi, a maihea mai nei oia?

            Aole makou i ike, a aole hoi i kona mau helehelena aka, o ka mea wale no ia a makou i lohe mai nei mai ka lehelehe mai o kou mau koa.

            He mau helehelena o ka hookuekue maka nui ko ka moiwahine Raianapo no keia pane a kona aloalii, a ia lakou iloko o ia mau minute o ke pohihihi, aia hoi hakui iho la ka leo nakolokolo o ka hekili, olapa ae la ka ula ahi o ka uwila, a i ke kamumu o ke aheahe malie ike ia aku la e na mea apau o ke keena e kau mai ana ma ka paia ke kii hooleleaka o kekahi kanaka opio ui a ua lahui la o Raianapo i mahalo aku ai i ka nani a pau ke aho.

            E aahu ana ua kanaka opio la i kekahi lole nani a lakou i ike ole ai i ka lua, a ma kona umauma a me na kipoohiwi, e luhiehu ana na hoku alii o ka noho kalaunu o kona aupuni, a ma kona aoao e lewalewa ana ka makia o kona aupuni i hoopaa ia me kekahi kaei gula i okomo ia me na pohaku makamae.

            No ke aloalii o ka moiwahine Raianapo, aohe a lakou mea e ae e kamailio ai o ka akena wale aku no i ka nani, aka no ua moiwahine ala hoi, iaia i ike aku ai i kela kii hooleleaka, ua palulu ae la ia i kona mau maka, alaila luai ae la ia i keia mau olelo me he la ua hoopailua a hoowahawaha oia no ka mea nona kela kii.

            Ha! wahi a ua moiwahine nei, o na debolo kela o na diabolo ka mea hoi a'u i hoowahawaha a hoopailua loa ai.  O Tubelo kela, kela anela kipi nana i aloko i ko ke ao nei iloko o ka hoino ia; a, ana paha i manaolana a haakei ai e hoea mai i o'u nei no ka hoohalike ana e like me kana i hana ai i ko ka honua kela wa mua loa i kinohi ka logou, ka, ha, ha, hele pela, aole loa e hiolo na pani o Raianapo ia oe a hoea mai ka hope o ke ao.  E kupaa ana au no ka wa pau ole, e luli ole hoi no ka wa mua loa.  A—e Raianapo e ku maluna o kou kahua oni ole no ka wa hope loa.

            Me keia mau olelo a ua moiwahine la o Raianapo, hina aku la oia i hope o kona noho alii, me kona mau maka e paa ana no i ka palulu, a no ua @i hoohie la paha keia mau owili lei ahihi.

            Palulu ka opua i ke ao

            Ua leha iki maluaka i ka wai

            E hooko mai ana ia'u e moe

            E moe no au—ke aloha—huli mai.—

Aole i pau.

 

He Moolelo

--NO—

NIWELA!

--KE—

Kanaka Hana Pu o Mosekao

--KA—

Weli o ka Makakila.

Waladimira ka Moneka.

KE AUPUNI O RUSIA MALALO O PETERO KA NUI.

Ka Weli o ke Keneturia Umikumamahiku

MOKUNA X.

LIMAKOKO—UA IKE IA—RULEKA IMUA O DAMONOEA.

            Ma ia ahiahi, oiai o Ruleka e noho ana no iloko o ke keena o ka mea ma'i, ua komo malie aku la ke kahunapule Savotano a noho ma kekahi noho, alaila aloha aku la ia Rleka.  Aole laua i launa kamailio iki mamua, aka nae ua ike no kela maalea nui ia Ruleka a he hoouhiuhi wale no ia ana e hana la.

            "Ke ole au e kuhihewa, he malihini oe ma keia wahi," i pane aku ai o Savotano.

            "Ae; he malihini io no au ma keia hale, a he kamaaina hoi ma keia aina.  He hoaloha au no ke kauna," wahi a Ruleka.

            "A-he!" wahi a ua Savotano la i pane aku ai me ka maalea nui.  "He nui ko'u kaumaha i keia ma'i o ke kauna, a ke hooikaika nei makou e kaohi i ke ola iloko ona, aka na ke Akua e kokua mai."

            Ku ae la ua Savotano la iluua a nana iho la i ke ano o ka ma'i o ke kauna; ike iho la oia ua ano e ko ke kauna ma'i, aole e like me kana i hoolala ai e make ana ia ahiahi.  Ua hoike mai kona mau helehelena i kela wa i ke ano kaumaha, ua koho iho la no hoi oia ua ike ia kana mea i hana ai.  Hoolalau wale iho la no oia a puka aku la me ke aloha hookamani ana mai ia Ruleka.

 

MOKUNA XI.

KE ALAKAI ILOKO O KA POINO—NOHO I KA HALE MAKAMAKA OLE.

I KA HALA ANA AKU O UA Savotano la, na ike maopopo aku la o Ruleka i na hiohiona o ka pepehi kanaka maluna o na wahi kahuna kuapuu la, a ua maopopo no hoi iaia ua inaina kela kahuna kuapuu no ke ahuwale ana o kana mau hana puuwai eleele.  Ua he@e iki iho la hoi ka Ruleka aka no kona hauoli, me kona manao ole ae aia he pilikia nona ke hoolala ia mai la e ua wahi kahuna kuapuu la.

            Ua komo mai la ke kauka mahope o ia manawa, a hoike aku la o Ruleka i na mea a pau ana i ike ai, a me na olelo a kahi kuapuu.  Aole i liuliu iho, ua ala ae la ke kauna mai kona hiamoe ana a ike iho la ua ano oluolu maikai oia, a ua nalowale ka eha mala iloko ona.

            Ia wa ua haawi aku la o Ruleka i ke kauoha i ka wahine malama e makaala i ka wa e hoea mai ai o kela kahuna kuapuu, alaila haawi ae la ke aloha mawaena o lakou a huli hoi aku la o Ruleka no ka hotele, kahi ana i haalele aku ai i kona kaa.

            Iaia e kuoe malie ana ma ke ala, i ka wa hoi a na ehe malumalu o ka po e halii ana a me ka uhi ana i ka ili honua, ua lohe ae la oia i ke pahupahu mai o na kapauai o kekahi mea mahope ona, a i kona kokoke ana e hoea aku ma ka huina alanaui, ua pa-e mai la he leo mahope ona i ka pane ana mai, "O oe anei o Ruleka Niwela?"

            "Ae, owau ia," wahi a Ruleka i pane mai ai me ka huli ana mai e nana i ka mea nona ka leo.

            "Ua hoouna ia mai nei au e kii ia oe, oiai ua lohe ia i kahi oe o ke kauna, nolaila ua hele awiwi ae nei au malaila, a ike mai nei au la oe e oili mai ana mailoko mai a loaa mai la oe ia'u.  Ua makemake ia oe e hele koke aku e ike la Alarika, no ka mea ua halawai oia me kekahi poino mamuli o kona haule ana i ka lio, a aia oia iloko o kekahi hale hookipa ma o koke ae nei no.  Nolaila, e ukali mai ia'u e Niwela a na'u e alakai aku ia oe."

            Ia wa me ka pane leo ole, ua kaha aku la ua kanaka la ma kekahi alanui pouliuli, a mamuli no hoi o ka pahee o kana mau olelo ua ukali koke aku la o Ruleka mahope ona.  Ua hoomau laua i ka hele ana pela a hoea ma kekahi ala olowi a ma ia wahi aku a hoea i kekahi hale ano kahiko a mehameha no hoi.  Ia wa ua wehe aku la oia i ka puka a ike aku la o Ruleka he wahi hale ano pepepe ke ku ami ana, a aole loa oia i ike i kekahi hoailona o ke kukui, i kela wa akahi no oia a haupu ae he hana apuhi wale no keia iaia.  Ninau aku la oia:

            "Heaha ke ano o keia wahi au e lawe nei ia'u?"

            "Heaha ananei hoi, o ke kua keia o ka hale, a ke haohao nei paha oe i ke ano mahameha ea!"  wahi a ua kanaka la.  No ke ano kuoo no hoi, a ano maikai o na olelo a ua kanaka la ua hoopau koke ia no ka manao hopohopo o Ruleka, a o kekahi no hoi, he makemake ole oia e ike mai kela kanaka he wahi lihi makau kekahi iloko ona, nolaila ua ukali aku la keia mahope o ua kanaka la a hiki i ko laua nei ku ana mawaho o ka puka o ka hale, kikeke aku ia ke kanaka a hemo mai la ka puka, a ku mai la he kanaka ano aoo me ka ipukukui ma kekahi lima a pane mai la:

            "O Ruleka Niwela anei keia?"

            "Ae," wahi a ke kanaka.

            "E oluolu hoi ha oe e ukali mai mahope o'u e Niwela, aia ka lutanela ke kali mai la ia oe maloko o ke keena moe.  Ua loohia ia oia me kekahi poino uuku.  E ukali mai."

            No keia mau olelo maikai a ano keonimana no hoi o kela mau kanaka, ua hoopau ia ae la na manao kuihe iloko o Ruleka.  Alaila me ka manao aloha kuio i ka hoaloha ua ukali aku la oia mahope o ke kanaka aoo a hoea ma ke poo o kekahi alapii e iho ai ilalo, a iho aku la no keia mahope o ke kamaaina a hiki iloko o kekahi keena nui, alaila pane mai la ua kanaka la me ke kuhi ana o kona lima:

            "E komo aku maloko o kela keena, aia iloko o laila kou hoa'loha."

            Anehe aku la keia e komo aku, aia hoi ua ike aku la keia he elima a eono paha mau kanaka e puka mai ana mailoko mai o kekahi keena e aku ma kekahi aoao mai me na helehelena inoino a ku i ka pepehi kanaka.

            Ia wa a ianei i komo aku ai iloko o kela rumi, ua pani koke ia mai la ka puka, a lele mai la he poe kanaka lehulehu wale maluna o ianei, a ua paio aku keia me ka ikaika o ka liona opio, a i ka hoomaopopo ana paha o ua poe kanaka la e lilo ana lakou i mea ole i ka opio, ua hili mai la kekahi o lakou i ko ianei poo me kekahi pauku hao loihi a hina iho la keia ilalo o ka papahele.

            I ko ianei pohala ana ae, ike iho la kela ua paa kona mau lima i ka hauhoa ia me ke kaula.

            Ninau aku la keia, heaha la ka'u hewa i hana ai a oukou i hana ai ia'u e like me keia?

            "Aole au ninau, eia wale no, e ku ae oe iluna, a hahai mai mahope o makou."

            Ia wa nana ae la keia a ike iho la aole a ianei wahi e manao ai no ko ianei ola, nolaila ua lawe ia aku oia a hoopaa ia iloko o kekahi rumi pouli.  Ua noho iho la oia iloko o ia hale makamaka ole me ke kaniuhu, me ke noi ana i na mana lani e kokua mai iaia iloko o ia mau hora o ka ehaeha.

[Aole i pau.]

 

Na Hopena o ka Auhau Kuapapanui.

            Mamuli o ke kau ia ana o na auhau kiekie me ka nana ole ia o ka palena hiki ke auamo ia, pela i alako ia ai ka lahui Tureke iloko o ka ilihune, kekahi o na lahui ikaika loa iloko o Europa i ka wa kahiko, a i manao ia nana e holopapa ia hapa poepoe o ka honua.  Na ka auhau kuapapanui i hoilihune i ka lahui o Inia Hikina, ka poe iloko o na paewaewa kahiko a i aneane e helu ole ia kekahi hana karaima i hana na ka aha kanawai.  Na ia haawina hookahi i paopao o Sepanai, he lahui iloko o na kaana kuhohonu ana o ka oihana laa; pela ia Italia, ka mamo a panihakahaka o ka Emepera ikaika o Roma.  Ke paopao pu nei no hoi i na aupuni malamalama a pau.  Ina e hiki ana ia kakaou ke hoopakele i ka hale, pono e paa pio mua na kumu o kona popopo.

 

            Ma ka hora 5:30 o ke ahiahi Poalima, Aperila 1, ma kahi noho o kana mau moopuna Mr. a me Mrs. U@lama Chung Hoon, ua haalele mai la i keia ola ana o Kaulu Haaku (w) i ke 85 o na makahiki o kona hanu ana i na ea huihui o keia ao.  Ua manele ia aku kona kino kupapau no kahi mau o na mea a pau ma ka ilina o Makiki, a hoi aku la ka lepo i ka lepo a o ka uhane i kona mea nana i @ana ma ke kakahiaka Poaono ae.

 

            Eia ke hoolala nei ko makou mau keiki kukulu hua kepau i mau kii maemae na lakou e hoouna ai no ka hoikeike ana maloko o ka Hale Hoikeike o na Ike Akeakamai ma Kikako.  Eia ua makaukau kekahi o ka lakou kii i kaha noeau ia e Ka-li maluna o kekahi pepa manaonoa, a na Kanaulu a me Iakoba e hoohee aku ana me ke keleawe a me ke kepau.  O keia kii, oia no ke kii o na Hale a Limaloa.  He lua ole ka noeau o keia poe keiki ma ia hana.  Eia pu no hoi ke kaha ia nei e keia poe keiki na kii a Lualii i kiola ia ai iloko o ke kai i ke keneturia 13, paha.  E ano lil ana paha i keia poe keiki na medala kepau, keleawe a me ka laau.

 

            Ua kakau mai o Messrs. Cage & Sherman o Alexander, Tesaka ia makou, no ka mea i pili i ke ola ana o ka mai rumatica, penei:  "Ua kaa mau ia ka bela moe e ka wahine a Mr. Wm. Pruitt, ko onei Lunaleta, e ka mai rumatica no na makahiki loihi.  Aohe mea i loaa iki iaia e hoola iki ae ai.  Ua kuai aku makou iaia i ka omole o ka Chamerlain Laau Hoola Eha (Chamberlain's me Pain Balm), a ua hoola loa ia kona eha e kela omole hookahi.  Ke kuhikuhi aku nei makou i na mea a pau e ninau aku iaia no kona hooiaio mai i keia hoike."  He 50 keneta o ka omole hookahi, a e loaa i na mea kuai laau a pau, o BENSON SMITH & CO., Na Agena ma Honolulu.

 

Hoolaha @umau.

 

PAPA! PAPA!

AIA MA KAHI o

Lewers & Cooke

(LUI MA),

Ma ke kahua hema o Alanui Papu me Moi.

E LOAANO NA

PAPA NOUAIKI

O kela a me keia ano.

Na Pani Puka, Na Puka Aniani, na Olepelepe, na Pou, na O'a, Na Papa Hele, Na Papu Ku, me na Papa Moe he nui loa.

NA PILI HALE O NA ANO A PAU

A me na

WAI HOOHINUHINU NANI

o na ano a pau loa.

Na Balaki o na Ano he Nui Wale

Ke hai ia aku nei oukou e na makamaka a pau, ua makaukau keia mau makamaka o oukou e hoolawa aku ma na mea a pau e pili ana ma ka laua oihana no ka

Uku Haahaa Loa,

E like me ka mea e holo ana mawaena o Lana  a me ka Mea Kuai.

Hele Mai e Wae no Oukou iho.

2357-q

 

Ka Waiwai o ka Hilinai

Saseparila Ayer

AYER, Laau Saseparila, kai kaulana a hilinai nui ia no ka hoomaemae koko, ma na wahi a pau o ka honua, ne aneane 40 makahiki i hala ae nei, a ua lawelawe nui ia hoi iwaena o na oihana lanaau.  O keia

LAAU SASEPARILA, no loko ae ia o ke aa Saseparila Honedura maoli; ua loaa ka mana hoomaemae ma o ka hui pu ia ana me kekahi mau aa laau e ae, a me kekahi mau mea no loko o ka honua a me ka hao.

HE KOKO inoino a nawaliwali anei kou?  Ua awili pu anei me na ano mai ikaika?  A ua huipu anei me na wai awaawa hoopehu  Na keia

LAAU e hoomaemae ia mau mea ino a pau, a maikai.  O na kauka lapaau a pau o Amerika ike ke ano o ka Ayer Saseparila ua olelo lakou, aole he mea maikai e ae no ka hoomaemae koko ana mai na ma'i i awili pu ia, aka o keia wale no.  No ka

HOOMAEMAE ana i ke koko, a me ka hookahua pono ana i na mea a pau ma kekahi mau ano ma'i i ike ia, o ka Ayer Saseparila wale no ka laau nana e hoomaemae ae me ka hakalia ole mamua ae o kekahi ano laau e ae  O ke ano

KOKO ino hakuhaku, a nawaliwali hoi kona holopono ana ma ke kino, e hoomaemae ia a e hooikaika pu ia no hoi ma o ka ai ana i keia Laau Saseparila a Ayer.  He maalahi a he

MAUKAI loa hoi keia laau, aole no ka hoomaemae wale ana no i ke koko, aka, no ka hookaawale pu ana kekahi i na ma'i, hoomomona hou ana i ke koko ino, a me ka hooikaika pu i ka holopono ana ma na aa.  He lehulehu wale na hooia ana mai na wahi a pau o ke ao nei i hoohana mau i keia laau mamua o kekahi mau laau e ae.

A HILINAIIA no ka ikaika kupono o ke ola kino, ma ka maemae ana o ke koko, hoomake pu ia na ma'i, a pela aku.  He nui na laau, hoomaemae koko i hoolaha wahahee wale ia malalo o na inoa he lehulehu, aka, o na hilinai a me na hooia wale no a ke ao holookoa, maluna o ka

 

Ayer Laau Sasaparila

I HOOKAKAUKAUIA @

Kauka J. C. Ayer & Co., Lowell, Mass.

HOLLISTER & CO.

Na Agena ma ka Paeaina Hawaii.

Helu 100,        Alanui Papu, Honolulu

2357-q

 

Hoolaha @umau

Kakela me Kuke

KA-HALEKUAI-N@

--O NA—

WAIWAI LIKE OLE

NA MEA HANA

KAMANA A PA@

PAHI, UPA, PULUPULU

NA PENA

KAA-PALALA

@PUKUKU@

--A ME—

KA AILA@

PALAU@

A me na mea Mahia@

NA PAKEKE P@

Ipuhao, Iliwai.

Makau me Aho Lawai@

Mikini Humuhumu

MIKINI A WILCOX ME GIB@

Na Mikini a Remington.

Kakela me Kuke

2871-q