Ka Nupepa Kuokoa, Volume XXXI, Number 11, 12 March 1892 — Page 4
| This text was transcribed by: | Nadine "alohatita" Samorano |
| This work is dedicated to: | Aunty Linda Tavares |
Ka Nupepa Kuokoa
KE KILOHANA POOKELA NO KA LAHUI HAWAII.
Ka Nupepa Kuokoa
ME
Ko Hawaii Paeaina i Huiia
No ka Makahiki. $2.00
No Eono Mahina 1.00
Kuike ka Rula.
HOOPUKAIA E KA
HAWAIIAN GAZETTE CO.
H. M.WHITNEY, Luna Nui,
J. U. KAWAINUI, Luna Hooponopono.
POAONO, MARAKI 12, 1892.
KULA SABATI.
Mar. 20. Na pomaikai mai ka Euanelio mai. Isaia 40:1-10
E HOOMAHA aku, e hoomaha aku oukou i ko'u poe kanaka,
Wahi a ke Aka@ o oukou.
2. E olelo hoomaha aku i ko Ierusalema,
E kahea aku hoi iaia, ua pau kona kaua ana,
Ua Kalaia hoi kona hal@;
No ka mea, ma ka lima o Iehova,
Ua loaa papalua ia ia no na hewa ona a pau.
3. Ka leo o ka mea e kala ana, ma ka wanoahele.
E hoomakaukau oukou i alanui no Iehove,
E hoopololei hoi ma ka waoakua,
I kuamoo no ko kakou Akua.
4. E hoopihaia ana na awawa a pau,
A e hoohaahaaia ana no mauna a pau, a me na puu;
E lilo no ka mea k@k3@ i pololei,
A me kahi puupuu i laumania.
5. E hoikeia mai no ka nani o Iehova,
A e ike pu aku no na kanaka a pau;
No ka mea, na ka waha o Iehova i olelo mai.
6. I mai la ka leo, E kala aku.
I aku ia ia, Heaha ka'u e kala'i?
He mauu no na kanaka a pau,
Ua like hoi kona nani a pau me ka pua o ke kula;
7. Mimino ka mauu, a mae wale ka pua,
Ke pa mai ka makani o Iehova maluna ona;
He oiaio no, he mauu keia poe kauaka.
8. Mimino ka mauu, a mae wale ka pua;
Aka o ka olelo a ko kakou Akua, e kupaa mau loa no ia.
9. E ka mea hai i ka olelo maikai no Ziona,
E pii aku oe i luna o ka mauna kiekie;
E ka mea hai i ka olelo maikai no Ierusalema,
E hookiekie oe i kou leo me ka ikaika;
E hookiekie hoi, mai makau;
E olelo no i na kulanakauhale o ka Iuda,
Aia hoi ko oukou Akua!
10. Aia hoi, e hele mai ana ka Haku, o Iehova me ka ikaika,
No kona lima no e malama ia;
Aia hoi, me ia pu no kana uku mai,
A o kana uku hana hoi ma kona alo.
PAUKU GULA.
Isaia 40:5. E hoikeia mai no ka nani o Iehova, a e ike pu aku no na kanaka a pau.
MANAO NUI. E hauoli me ka hoike ana aku ia Iesu ka Mesia.
OLELO HOAKAKA.
Ma keia mokuna 40 ua hoomaka o Isaia e hooluolu i ka Iseraela ma ka hoike ana aku i ka lokomaikai hou o Iehova. Aole hiki i ko kakou mau hewa ke hoopau loa i kona mau manao aloha. Nolaila ua hoolana ke kaula i na manao o kona lahui e makaukau no ke au hou a lilo i poe kupono no ka pomaikai uhane mai ka lani mai.
1. Ko'u poe kanaka - oia na poe manaoio i hoikeia ma na hana aloha he nui. 2. Ierusalema - ka Ekalesia oiaio ma na wahi a pau. Ua pili laula keia wanana i ka poe manaolo. Kaua - ke ano kahiko o ka hoomana me na mohai lehulehu, a me na kapu i hookaumaha ai. 3. Leo - o Ione Bapetite kekahi. Mataio 3:3. Hoomakaukau - e lawe aku i na mea e keakea ai. Ua nui ka ino o na alanui ma na aina hikina. 4. Hoopihaia - mamuli o ke ano o ko keakea, pela no ke ano kupono o ka hoomakaukau ana i ka lanakila o ke aupuni o Iesu. 5. Hoikeia - i ka wa e makaukau ai ka lahui, ia wa e ikeia ai ko ke Akua lokomaikai hou. Na kanaka a pau - aole ka lahui Iudaio wale no, Luka 3:6. 6. Mauu - nawaliwali maoli ke ano o kanaka. 8. Kupaa - pela maoli ke ano o na mea Akua. 1 Petero 1:23-25. 9. Siona - ua konoia ka mea nona ka pomaikai e hai lea aku. Isaia 2:3. 10. Haku - e lanakila loa ana maluna o ko ke ao a pau. Halelu 72:7.
HE MAU NIELE.
Ka olelo paa no ka hoomaha. 1,2. Heaha ka oihana kupono no na kahunapule no ka poe kaumaha? Heaha na manao e oluolu ai ka poe kaumaha? Owai na poe i olelo ia ko Ierusalema? Heaha ke ano o ka olelo "Ua pau ke kaua?" Heaha ke ano o ka olelo "Ua loaa papalua iaia no na hewa ona a pau?" Pukaana 22:9. Ua loaa anei ia Ierusalema ka uku hoopai kupono a oi aku paha? Ehia makahiki o ka noho pio ana o ka Iuda? Ieremia 25:11, 12. Ua hooko ia anei na wanana e pili ana no ka hoi hou ana? Exera 1:1-4. E hookoia ana anei kekahi manao ano nui o ke Akua e pili ana i ka hooia ana i ke ano kanaka holookoa? Isais 9:6,7. Roma 11:25-27.
Ke alahele i haomakaukau ia imua o ka Mesia, 3-8. Heaha ka olelo kukala ma keia mau pauku? Ia wai i hoopiliia ai keia wanana ma ke Kauoha Hou? Mareko 1:3.
Ua pili anei keia wanana i ka wa o Iesu i hoi hou mai ai i ka honua nei? Heaha na hana kupono no ka hoomakaukau ana i na kanaka no ka halawai ana me Iesu? Ia wai e hoideia ai ka nani o Iesu? Heaha ka oiaio e hjooikaika ai i ka manaoio? Heaha na mea elua i hookupuia? Owai na leo kukala i keia wa? E lanakila ana anei ke ano haipule, aole paha? Heaha na hana kupono na kakou e hapai ai i mea e makaukau ai no ka launa mau ana me Iesu? He mau mauna anei ko na hewa e hoopau ai? Ua hoomakaukau anei na misionari i ka holopono ana o ke aupuni o Iesu, aole paha?
Na elele me ka lono maikai, 9, 10. Ua hiki anei i na kahunapule wale no ke hai euanelio? Ua pili anei keia oihana i na hoahanau a pau? Ma na haawina manawalea i ka Papa Hawaii ua kokua anei kakou i ka oihana hai euanelio? Hiki anei i ka poe manaoio a pau ke lilo i poe ahailono e hoike ana i ka pomaikai e loaa ana ma o Iesu Karisto la? He nani anei ka lanakila o ka oihana misionari ma kela me keia aina? E pono anei ke waiho wale i na kanaka me ka hoike ole ana aku ia lakou i ka lono maikai e pili ana ia Iesu ka hoola? Ua hoomakaukau anei ke Akua i ka lanakila o ka pono ma keia a me keia aina? Ua hoopauia anei i keia wa na manao ino o na kanaka?
HE MAU MANAO PILI.
1. Ua mahalo anei ka Baibala i ka oihana misionari?
2. Ua kulike anei na olelo hoike o na hana o ka poe misionari me na wanana o ka Baibala?
3. Ua pono anei i na mea manaoio a pau e hapai i ka oihana misionari ma ke kokua ana i ka poe naaupo, holona, lalau?
4. Oi aku anei ka pomaikai mai ka oihana misionari mai mamua o na pomaikai e ae?
5. E hoolahaia ana anei na pomaikai o ka oihana misionari maluna o keia honua holookoa?
HOIKE HAPAHA.
Maraki, 27. Heaha na kumu hana o na haawina? Heaha na pauku gula? Heaha na manao nui?
Ehia mau makahiki ma ka moolelo i noonoo ia? Owai na moi o Iuda? Owai na kaula? Heaha na hana ano nui i olelo ia? Heaha na wahi kaulana i olelo ia?
Heaha ke kulana o Isaia? Owai na moi i noho alii ai i koua wa ola? Heaha ke ano o kana mau wanana?
Heaha ke kulana o Ieremia? Heaha kana oihana? Heaha ka poino ana i wanana ai a ike ai? I ka aina hea i lawe ia aku ai oia?
Ma hea ko Ezekiele wahi noho? I ka wa hea i lawe pio ia ai oia? Heaha na ano o kana mau wanana?
Ehia mau haawina ma ke ano wanana? Ehia mau haawina ma ke ano moolelo? Ehia mau makahiki mamua o ko Ierusalema lukuia ka lukuia'na o Samaria? Heaha ke ano koho a Iuda mamua o ko Nebukaneka luku ana ia Ierusalema? Owai ka pukaua a Nebukaneka i kauoha ai e lawe pio ia Ierusalema? Heaha ke kulana o ka moi Iudaio hope loa? Owai ka moi Asuria i hooauhee ia e ka hana mana a Iehova?
Heaha ka poino i wanana ia e hiki mai ana ia Eperaima? Heaha ka olelo hoahewa ano like ia Iuda? Heaha ke ano noho ma ke aupuni o ka Mesia? Heaha ka pomaikai i wanana ia no ka poe manaoio?
Heaha ka hana a Hezekia i ka lohe ana i kekahi palapala hooweliweli mai ka moi Asuria mai? Heaha ka hana a Iehoiakima i kona wa i lohe ai i ka palapala hooweliweli mai ia Iehova mai? Heaha ka olelo pane mai ia Iehova mai i ka Hezekia pule? Heaha ka olelo hoahewa mai ia Iehova mai i ko Iehoiakima maha ai?
Owai ke kaula i loaa ka popo berena nana i kela a me keia la la mamuli o ke kauoha a ka moi. He aha ka olelo kahea mai ka Haku Hoola mai i ka poe makewai a me ka pololi. Heaha ka berita hou i olelo ia mai e Iehova mai ma ka waha o Ezekiela? Heaha ka berita hou i hana ia e ke Akua Hoola ma ka ahaaina a ka Haku?
Hiki anei i na kanaka ke hele i ke ala o ka hewa me ka haule ole ana iloko o ka lua o ka poino? Heaha kekahi mau olelo ao mai ke Akua mai ma na hua ino o na hewa o Hai? (Haawina ekolu) Heaha kekahi palekana i haawila. (Haawina eha) Heaha kekahi hoola i wanana ia? (Haawina elima) Heaha kekahi olelo poloai mai ke Akua mai? (Haawina eono.)
Ua hoka anei na kaula o Iehova? Ua hooko ia anei ka lakou wanana? Heaha kekahi mau olelo hoopomaikai i pili ai ia kakou? Heaha ka kakou hana kupono ma ka lohe ana i ka Iesu mau olelo ao a me kana mau olelo hoopomaikai?
He maluhia anei kd hewa? He palekana anei mai ka hewa mai i ka poe i hoomau ai i ka hana hewa? Heaha ke kumu no ka loloahili ma ka hoopai ana i ka poe hewa?
NANEA KAMAHAO
O KE
KEIKIALII
ROMEALA;
KA
Ui Kila Mageneti
O PARAMERI.
Ka Nani e haule ai ka Honua;
Ka Mahina Meli o Salaredina;
Ka La Alohji o Mulisedera;
Na Kulu Koko Kamahao Ekolu.
Na Ui Hookelakela
O KE AO HOLOOKOA.
NA NANI
Puuwai Uahoa o ka Honua nei
A O KE
Kila Mageneti o ke Aloha - "O Parameri no ia"
Aole i hala pono ae kela mau olelo a ke kulu koko ekolu haukawewe aku la ka ihu o na kamaa o ke keiki alii Romeala i na pani puke ekolu o Raianapo, a e like me kana i haulani ai i na ipuke komo elua i hala pela no i keia, koe wale iho no ua olali ia e ua loea nei he eono maka pahi kaua i ka wa hookahi me ka manuheu ole iho o kekahi lihi o kona kono.
I ua alii opio la i kaalo aku ai ma kela aoao o ka mana o na koa kiai, huli ae la ia kilohi i ka nani o ka aina a e like no me ke kulana mua ana i ike ai pela no keia, a o ia kana i hoomaopopo iho ai, ua oialo na olelo a kana kauwa hoolohe i hoike mai ai. "He wahi aina uuku keia, aka, he oi aku nae a ka holo a me ka panee imua.
I keia ipuka i hala ae ai me kona nani, komo hou aku la ia no ka eha o na ipuka, a ia wa i hoike mai ai ke kulu koko ekolu, ua hala ka malamalama o ka la, a eia lakou iluna o ka hora o ka po e hele nei.
No keia pane a ke kulu koko ekolu puana ae la o Romeala. E hoomaha kakou i ka kakou hana o keia la no ka mea o ke kakahiaka a me ke ahiahi, o ka la mua ia o ko kakou haaheo ana iloko o na aupuni pahaohao o raianapo. Ia Romeala i hoopuka ae ai i kela mau olelo ia wa i uhi koke mai ai ka mana o ke kulu koko elua ma ka huna ana ia Romeala oiai hoi ke kulu koko ekahi a me ekolu e kiai ana me ka makaala no ka pono o ko lakou haku opio malalo o na pulama ana a Ludiona ke kamahao.
Hala aku la ka po a hoea mai la ke kakahiaka, aia ua mau kauwa hoolohe la ekolu o Bagesara e ku makaukau ana maluna o ke kahua o ka lakou mau hana, a i hakalia wale no i na olelo a ko lakou haku opio i ka pane aku. A i ka wa i loaa aku ai o ke kauoha no ka hele ana imua ia wa i kuehu koke iho ai ke kulu koko ekahi i kona mama holo i oi pa=ha aku i ko ka makani huhu, a no na sekona pokole wale no komo aku la ua loea nei o ke ao no ka elima o na ipuka komo, imua ponoi o o ka oi o na maka pahikaua he 10.
E like me ka ua loea nei i haaheo ae la ma ka elima o na ipuka komo pela no oia i olali aku ai no ka eono o na puke iwaeua o na maka pahi kaua uahoa a na kiai o Raianapo, a ma ka olelo pokole ana ae no kaua e ka mea heluhelu, ua haulani ia e Romeala iloko o ke ehuehu na puka komo he 82 iloko o na la hele he 13, a o kona hoea ana mai no hoi la i ka palena hope o ke aupuni ekahi malalo o na hoomalu ana a na ki huahelu pohihihi he 13 o ka haka.
Ma keia wahi i hoomaha iho ai ka loea o ke ao i kona maluhiluhi o keia huakai hele loihi, a i ka wehe ana mai o ka malamalama o ka la, hoomau hou aku la oia ma kona alahele no ka lua o na aupuni e kiai a hoomalu ia ana e pa ki huahelu he 13 o ka Peki. O ka haaheo a me ka hiehie i loaa i ua loea nei o ke ao, o ia kana i lawe hou mai ai ia mau minute o ka ulumahiehie a ku hou aku imua o na kiai maluhia o Raianapo, me na manao lana e kaili hou mai ana no ia i ka hanohano o ka la no ka manawa elua e like me ia i loaa iaia no ka wa mua loa. He puahiohio ana me he makani la, he maalo ana me he aka kino wailua @a aia ua loea nei o ke ao ua hamare aku la i ke panipuka ekahi o ke aupuni eluu o Raianapo me na huaolelo moakaka o ke kauoha.
Ua hamama ae ua ipuka ekahi la me kona mau koa kiai e ku makaukau ana no ka hopu pio ana mai ia Romeala, aka, o ka mana a me ka eleu o na kauwa hoolohe ekolu o Bagesara, na ia mea i kaili palanehe aku i ua loea nei no kekahi aoao o ka puka komo. I ua loea nei i pakele aku ai mai ka inaina aku o na ko@kiak, leha ae ia kona mau maka ma kela a me keia aoao, a haawi ae ia ia i na mahalo ana no ka nani a me ka hihiu o keia aupuni i oi ae i ko ke aupuni mua.
Ae e ka mea heluhelu he nani a me ka mahiehie na nanaina o keia aupuni, a maluna ae o na mea apau he nani wale no ia i ka ike a ka maka o kamahele kaahele honua o ke aupuni o Parameri. E moani kupaoa mai ana ke ala nohea onaona a na pua, a o ka oi loa aku o ke kupaoa imua o na aa lole ihu o ka loea o ke ao, o ia no ke onaona aala o ka pua Honesakala a no ua pua la ka Romeala i haawi iho ai i hookahi muki honi hoomau ana me ka puana malia ana ae i keia mau olelo.
I keia aupuni mua i hala aku la he nani kona i piha mne na ea aala e hoopoluhi ia ai na noonoo o ke kamahele e maalo mai ana ma kona mau palena aka aole nae i oi aku ke kuhinia o kona mau ea mamua o ko keia. Ae e ka pua Honesakala, he nani kona a'u i hoomaikai ai ina nae ua like aku ka ula ohelohelo o kona mau papalina me na papalina o ko oukou haku a'u e koho kuhi hewa ole nei aia no he mea e noho hoomalu ana maluna o keia mau aupuni.
Nou hoi e ka pua o ka Honesakala ke haawi aku neiu au i na hoomaikai ana he nui nou, me na manaolana mahiehie e loaa like i kou haku he hanu aala kupaoa e like me kou. Ano e aloha auanei a huli hoi hou mai au.
Me keia mau olelo a ua loea nei, hoomau hou aku la oia i kona ala hele no mua e hoea aku ai i kahi o ka puka elua. Emoole aia ua puka elua la ua kaalo hope ae la me ka hikiwawe, a o na hiohiona o ka aina ana i ike mua ai i na sekona aku i hala o ia no keia e maalo nei imua o kona mau kiionohi. --
Me he moena pawehe ia ia'u,
Ke kula o Mokuleia i ka lai.
[Aole i pau.]
NA LETA.
[Aole o makou makemake e lawe i ke koikoi o na hala no na manao i hoopuka ia malalo o keia poo e ko makou poe mea kakau.]
Pane ia S. Kaniuohele.
Aloha oe:-Ma ka la 20 o Februari helu 8 o ke KUOKOA, ua ike iho au i ka hoolaha hoopunipuni a S. Kaniuohele, e hoolaha ana i ko'u ona i ka rama a waiho wale ko'u kino, he mau olelo hoopunipuni wale no ia au e S. Kaniuohele. I mea e hoomaopopo ia ai kou hoopunipuni imua o ka lehulehu, o kou huna i kou inoa oiaio a hoike ae nei imua o ka lehulehu i kou inoa hoopunipuni. Ua makemake au e hoike ae oe i kou inoa oiaio, oiai oe e hoolaha hoopunipuni nei ia'u i ko'u eku i ka lepo. E hoike aku au ia oe i ka mea oiaio, a imua hoi o ka lehulehu, aole au i ona i ka rama a waiho wale ko'u kino, a eku i kalepo au e hoolaha nei i ke akea. Oia nae paha ua makemake loa oe e lilo oe i makai ma ko'u wahi. Ua lili oe i kuu lilo ana i makai, aole na'u i noi i keia oihana, aka, nana no i apo mai ia'u. Aole e like me oe ke noi oihana a hoi nele mai me ka hoka.
Na ole iho la ko lili ia'u hilikau aenei oe maluna o M. Puulei, ka mea i koho ia i Jure hanohano no ke kau no Feb. M. H. 1892. Ina no hoi pela kou wahilaki, aole he oki loa ino oe.
J. A. KAOPUA
Hanalei, Kauai, Feb. 25, 1892.
Pahaohao Au ia Oe e Byron Bay.
MR. LUNAHOOPONOPONO: Ma ka nupepa Ka Leo o ka ia 23 o Feberuari i hala, ua ike iho ia au i na manao i hoolaha ia e Byron Bay e pili ana no ke puhi ia ana o na ipu kukui i ka wa e malama ia ana o ke puhi ohe ma kahi o ke Kiaaina J. T. Baker. O ia hoolaha ana a ka mea nona keia inoa pahaohao a'u i ike ole ai me Hilo nei, he wahahee me ka puuwai eleele oia i hookahuli ano e i kona inoa pololei oia o Bay Rum. He kanaka manao ino oe e hapala wale ana i ka inoa maikai o ka Hope Makai Nui Geo. H. Williams o Hawaii.
O ka pololei, na Kapena Baraunu i kauoha mai ia'u e puhi i na kukui o ke keena o ka Makai Nui, a mamuli o ko'u lohe hewa ua puhi ia iho la e a'u na kukui o na huina alanui. Mai pololei ina oe i hoolaha e Bay Rum alias Byron Bay i ka ipukukui ma ka huina e kokoke ana i kahi o ke Kiaaina, ina la ua haule na hoku o ka lani ia oe. Ua hoolaha oe me ka manao ino. A ma ia hana ana au pela, e kala ia hoi ka ubnoa o ka Hope Makai BNui a mne ke Kapena, oiai ua lohe hewa au i ke kanoha.
I mea e pau ai kou pohihihi, e hoike ae oe i kou inoa ponoi ma ke akea, alaila e hui kakou he alo a he alo i lohe oe i ka mea oiaio.
C. KEAMOHOU,
Makai o ka Wati 1.
Hilo, Feb. 28.
KUU LEI GULA UA HALA UA WEHE I KA PUILI HOOKO-O IA LOKO.
Poalua, Feb. 16, 1892, hora 11 o ke kakahiaka, ua kii mai la na lima menemene ole o ka make a kaili aku la i ka hanu ola o Mariana Kalakini. Ua hanauia oia ma Kalawao, Molokai, ma ka la 14 o Feberuari, 1891, na Sam Qui a me Kikilia. Ua piha ka makahiki o kona hanu ana i na ea o keia ao. A no ka nui o ko'u aloha nona, ua haku iho au i wahi kanaenae i ike mai ai na kupuna ona e noho mai la i ka aina hanau, a me ka ohana no a pau:
Kou kaikamahine mai ka pihe kanaka la o Kalawao
Mai ka huikau lua hoi o Polapola
Aloha ia wahi a kana e noho ai
Noho aku kaua o ia wahi malihini
Nana aku ke ola i ka ihu o ka moku
Auwe kuu kaikamahine
Kuu kaikamahine hoi e--
Kuu kaikamahine mai ka pii'na o Mahulili
Mai ka uluhala la o Pohakuloa
Loa ka imi'na ia oe e kuu lei
Ka'u ia la e huli nei
E i aku nei paha oe me Hiku
Me ka wahine noho i ka uka
Auwe kuu kaikamahine
Kuu kaikamahine hoi e-
Kuu kaikamahine mai ke kula wela la o Koloa
Mai ke aio huli la i Waia@au
Me he hanau la ko aloha ke hiki mai
A hiki mai ko aloha ae uwe no au
Auwe kuu kaikamahine
Kuu kaikamahine hoi e--
MRS. KIKILIA MAKALIILII.
Kauikau aloha nou e Kalakini
Kuu kaikamahine mai ke ehukai o Puahi
Ua ahiwela ko aloha ke hiki mai
A hiki mai ko aloha e uwe no au.
Kuu kaikamahine mai ka huikau lua o Kalaupapa
Aloha ia wahi a kaua e hele ai
E imi ai i ka pono o ka Haku
Auwe kuu kaikamahine
Kuu kaikamahine hoi e--
Kuu kaikamahine mai ka pihe kanaka la o Kanaana
Hoolohe aku kaua o ke kani mai a ke bele
E hea mai ana e liuliu
Auwe kuu kaikamahine
Kuu kaikamahine hoi e--
KANIKAU NO MARIANA KALAKINI.
Kanikau la he aloha
Nou no e Kalakini
Nou keia ilihia
E hiipoi ia aku nei
E kuu lei, e kuu lei
Kuu milimili e
Hoi mai hoi mai no kaua
E hiipoi pu i ko aloha
Pehea la e pau ai
Keia haawe kaumaha
Aole no e pau ana
No ka mea, he ukana luuluu
Ehia mea aloha
Ka makua o nei kamalei
Ua wehe mai nei i ka pili
Kaawale me ka makua
He uhane la he aloha
Nou no e Kalakini
Nou ka paha ka uhane
I niau palanehe iho nei
Aia paha ka uhane
I ka uka lipo o Waihanau
E walea ana i ke kui lei
Lei ahihi no ka wahine
Kahiko ka wahine i ka uka
Hooipo ana me ka lehua
Lia ana ka manao ilaila
I hoa noho no ia uka
Noho ana ka uhane hoolono
O ke kani a ka Iiwipolena
Hoohihi aku ana ka manao
I hoa noho no ia uka.
Kanikau la he aloha
Nou no e Kalakini
Haalele iho nei oe
I ka ukana nui he alohja
Hele hookahi aku nei oe
I ke ala hoi ole mai
Haalele mai nei oe
I ka pili ana me ka makua
Uwe helu mai o Kulia
Aloha ino kuu lei
Kuu luhi hoi ua hala
Me ka Makua Mana loa
Mahalo ia ka Makua
A he malu ma ka honua
Nana no i haawi mai
\ Nana no i lawe aku
MRS. JULIA I. KEOKI.
HE INO NO KALAKINI.
Nani wale ka liko o ka lehua
Ohaoha mai la i ka nahele
Kahiko ia no ka wahine
No Kalakini i ka iu ano
Onaona wale ia pua
Huihui ke hanu iho
Honi iho au a hoomau
I lei hoohie no kua kino
He halia aloha kai hiki mai
I lawea mai e ka moani
I lei kahiko no ke kino
No Kalakini i ka iu ano
E o mai oe i kou inoa
Lihilihi lehua i ka nahele
Ina o ka pua nani ia
O Kalakini no i ka iu ano
HE LEI NO KALAKINI.
Ko lei kaulana e Kalakini
Aia i ka lai o Kalaupapa
He lei kou ua kaulana
Ua lohe ia e ka nui manu
Manuahi ko aloha ke hiki mai
I ke kona ana mai e naue aku
Aohe makana i ko'u lima
He mohai na'u e ike aku ai
Hookahi mea nui a ka manao
Ko la lealea ua hiki mai
Pua lei nani oe na Kulia
A he pulakaumaka hoi i ke alo
Haina ko lei i ona ia
O Kalakini no i ka iu ano
Ko lei kaulana e Kalakini
Aia i ka lai o Waileia
Ke lomia ia mai la e ka palai
Ka nahele aala o ia uka
Ua like no ia me ka Vabine
Ka paoa aala i ke aumoe
Noho ana oe hoolono mai
Ka leo aloha o na makua
Pua lei oe na Kikilia
A he milimili na Akamukoi
Haina ko lei i ona ia
O Kalakini no i ka iu ano
He aloha kahi wai o Waikolu
Wai auau a kuu milimili
Mili ia ke aloha i ka umauma
Ka hua mua o nei aina
Aina malihini makemake ole
Hookahi makamaka o na lima
Elima mea nui a ka manao
Me he opuu daimana e anapa nei
Haina ka inoa i ona ia
O Kalakini no i ka iu ano.
MRS. KIKILIA MAKALIILII.
Kalaupapa, Mar. 3, 1892.
Hoolaha Kumau.
PAPA! PAPA!
AIA MA KAHI O
Lewers & Cooke
(LUI MA),
Ma ke kahua hema o Alanui Papu me Moi.
E LOAA NO NA
PAPA NOUAKI
O keia a me keia ano.
Na Pani Puka, na Puka Aniani,
na Olepelepe, na Pou, na O'a,
na Papa Hele, na Papu Ku,
me na Papa Moe he nui loa.
NA PILI HALE O NA ANO A PAU
A me ua
WAI HOOHINUHINU NANI
O na ano a pau loa.
Na Balaki o na Ano he Nui Wale
Ke hai ia aku nei oukou e na makamaka a pau, ua makaukau, keia mau makamaka o oukou e hoolawa aku ma na mea a pau e pili ana ma ka laua oihana no ka
Uku Haahaa Loa,
E like me ka mea e holo ana mawaena o Laua a me ka Mea Kuai.
Hele Mai e Wae no Oukou iho.
2357-q
Ka Waiwai o ka Hilinai
Saseparila Ayer
AYER, Laau Saseparila kai kaulana i bilinai nui ia no ka hoomaemae koko ma na wahi a pau o ka honua, he aneane 40 makahiki i hala ae nei, a ua lawelawe nui ia hoi iwaena o na oihana lapaau O keia.
LAAU SASEPARILA, no loko ae ia o ke aa Saseparila Honedura maoli; ua loaa ka mana hoomaemae ma o ka hui pu ia ana me kekahi mau mea no loko o ka honua a me ka hao.
HE KOKO inoino a uawaliwali anei kou? Ua awili pu anei me ua ano ma'i ikaika? A ua huipu anei me na wai awaawa hoopehu? Na keia
LAAU e hoomaemae ia mau mea ino a pau a maikai. O na kauka Iappan a pau o Amerika i ike i ke ano o ka Ayer Saseparila ua olelo lakou, aloe he mea maikai e ae no ka hoomaemae koko ana mai na ma'i i awili pu ia, aka o keia wale no. No ka
HOOMAEMAE ana i ke koko, a me ka hookahua pono ana i na mea a pau ma kekahi mau ano ma'i i ike ia, o ka Ayer Saseparila wale no ka iaau nana e hoomaemae ae me ka hakalia ole mamua a@ o kekahi ano laau e ae. O ke ano
KOKO INO hakuhaku a mawaliwali hoi kona holopono ana ma ke kino, e hoomaemae ia ana a e hooikaika pu ia no hoi ma o ka ai ana i keia Laau Saseparila a Ayer. He maalahi a he
MAIKAI loa hoi keia laau, aole no ka hoomaemae wale ana no i ke koko, aka, no ka hookaawale pu ana kekahi i na ma'i, hoomomona hou ana i ke koko ino, a me ka hooikaika pu ana i ka holopono ana ma na aa. He lehulehu wale no hooia ana mai na wahi a pau o ke ao nei i hoohana mai i keia laau mamua o kekahi mau laau e ae
A HILINAIIA no ka ikaika kupono o ke oia kino, ma ka maemae ana o ke koko, hoomake pu ia na ma'i, a pela aku. He nui na laau hoomaemae koko i hoolaha wahahee wale is malalo o na inoa he lehulehu, aka o na hilinai a me na hooia wale no a ke ao holookoa, maluna o ka
Ayer Laau Sasaparila,
I HOOMAKAUKAUIA E
Kauka J. C. Ayer & Co., Lowell Mass.
HOLISTER & CO.
Na Agena ma ka Paeaina Hawaii.
2@57-q
Hoolaha Kumau.
Kakela me @@@
KA - HALEKUAI @@@
O NA
WAIWAI LIKE @@@
NA MEA HANA
KAMAMA APA @@@
Pahi,
Upa,
Pulupulu @@@
NA PENA @@@
KAA - PALAL @@@
IPUKUKU
A ME
KA AILA @@@
PALAU !
A me na mea Mahiai.
NA PAKEKE PO @@@
Ipuhao, Iliwai.
Makau me Aho Lawaii
Mikini Humuhumu
MIKINA A WILCOX ME GIBBS.
Na Mikini a Remington.
KAKELA & KUKE.
2371-Q