Ka Nupepa Kuokoa, Volume XXX, Number 27, 4 Iulai 1891 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

Ka Nupepa Kuokoa

me

Ko Hawaii Paeaina i Huiia

No ka Makaiki...$2.00

No Eono Mahina...$1.00

Kuike ka Rula.

 

            O na Olelo Hoolaha a pau e hoounaia mai ana no ka Hoolaha maloko o keia Nupepa, e hoouna pu mai me ka auhau, a ina aole, aohe hookomo ia.  O ka uku he $1.50 no hookahi puka ana o ka Olelo Hoolaha hookahi iniha ke akea, a he 50 keneta no na puka ana pakahi mahope aku.

 

HOOPUKAIA E KA

HAWAIIAN GAZETTE CO.

H.M. WHITNEY, Luna Nui, J.U. KAWAINUI, Luna Hooponopono

POAONO...IULAI 4, 1891

 

KA ALANA IA ANA O KA PUNEE ALII NO KA MOIWAHINE

            Mahope iho o ka pili ana o Liliuokalani maluna o ka Noho Alii o Hawaii i ka la 29 o Ianuari, 1891, a mamuli no hoi o ko ke Alii ike mau ia he hele pule oia no na anainapule o Kawaiahao, ua komo koke iloko o ko Mrs. A.A. Haalelea noonoo he mea pono i na hoahanau wahine o ka ekalesia o Kawaiahao ku lele dala a kapili i punee no ke Alii ka Moiwahine.

            Ua ui aku hoi oia i ka noonoo o kona mau hoa'loha e like me na madame Samuel Parker, S.C Allen, J.H. Coney, J.I. Dowsett Sr., H.R, Macfarlane, T.R. Foster, A. Rosa, C. Bush, H. Townsend, J.U. Kawainui, S. Mahelona a me kekahi mau lede hoa'loha e ae, a ua lokahi lakou i ka apono ana.

            Nolaila, ua kahea ia he halawai o na hoahanau wahine o Kawaiahao i akoakoa ai me keia poe a pau maluna ae, a ua hoomaka i ka hana me na olelo hookahua i haku a heluhelu ia mai e Mrs. Haalelea, no ke kapili ana i punee alii.

            Ua hooko koke ia ka hana ma ke koho ana i na Luna mau penei: Mrs. A.A. Haalelea, Peresidena; Mrs. S.C. Allen, Puuu; Mrs. J.U. Kawainui, Kakauolelo.  Ua koho pu ia he Komite Imi dala, oia o Emma Mahelona, H.I. Nolte, C. Brenig a me Ahia.

            Ua hooikaika no ka poe e hele mau ana i na halawai a me ke komite huli dala a hiki i ka loaa ana o na dala he $431.00 mai na makamaka, na hoa'loha a me ka lehulehu.  O Mrs. S.C. Allen nae ka oi loa aku o na kokua.  Ua haawiia ka hana ana o ka punee ia Mr. Peter High, a pela no ka noho o na ukali.  ua hana ia me ka maiau i ku i ka hanohano a paa.

            A ma ke awakea Poalima, ua komo aku ke komite o na lede maluna ae, iloko o ka Halealii ma ka ae ia ana mai, a hookipa ia aku la e ke Alii ka Moiwahine.  O ke kuu o keia kmo ana, oia ka alana ana aku i ka punee alii no ka Moiwahine nana e noho, me keia mau huaolelo mai ka Peresidena aku:

            I ke Alii ka Moiwahine

                        LILIUOKALANI,

            "Ke aloha me ka mahalo:--O makou kau mau kauwa haahaa, ke Komite o ka Ekalesia o Kawaiahao, i lawe mai nei i ka lohe imua o Kou alo Alii, oia kela.

            Ua hoomaemae ia i Punee Alii iloko o ka Luakini Makuahine, na na lima noeau i lawelawe iho nei a ua paa, ke waiho nei ua makaukau e hookipa aku i ke Alii.

            Ma ka inoa o na Hoahanau wahine o Kawaiahao, na lede a me na makamaka puuwai hamama o ke kulanakauhale nei, ka poe hoi i kokua ma keia hana hoopunahele alii, ke makana aku nei makou i ka Punee Alii a me ka noho mamua iho i paa i ka paehumuia no ko ke Alii poe ukali.

            Ina i oluolu i ke Alii, e kipa ae i ka halawai kakahiaka Sabati o keia pule ae, a hoolaa i ka noho a ka lehulehu i ohohia nui ai nou.

            E kau mai maluna iho ou ka hoomaikai nui o ko kakou Makua iloko o ka lani."

E ola ka Moiwahine Liliuokalani i ke Akua.

Poalima, Iune 12, m1891.

            Ua oluolu i ke Alii i ka Moiwahine ka pane ana mai i na lede Komite penei:

            "Ia oukou e na Lede i hele mai nei i keia la me na manao maikai a waiho mai hoi imua o'u i ka oukou makana nani a makamae he Punee Alii iloko o ko kakou luakini makuahine oia o Kawaiahao, ke haawi aku nei au i ko'u hoomaikai ia oukou a pau a me na poe a pau i kome pu a haawi mai i na kokua no ka hoolawa ana e nani a e oluolu ai ua punee alii nei, no ka mea ua maopopo ia'u ua noonoo nui oukou ia'u a me ko'u noho ana oluolu.  Aole no hoi au e poina ana i na wa a pau a'u e komo ai iloko o ke kakaou luakini ka hoomanao ana i ka Mea Mana Loa, a me ka poe nana i hana mai i keia hana lokomaikai ia'u.  Aole no hoi e poina i na ao ana maikai a ko kakou makua oia o Rev. H.H. Paleka no ka pono o kakou."

 

NA LETA.

Aole o makou makemake e laew i ke koikoi o na hele no na manao i hoopuka ia malalo o keia poo e ko makou mau mea kakau.

Ko Kauai Kula Hana Mikiala

            Ua hoike keia Kula maluna ae ma ka hora 9 kakahiaka o ka la 19 o Iune, me 25 mau haumana a me 4 mau kumu.

            Eia na makaikai i hiki ae, na Hon. F S Lyman, J Hardy a me G N Wilcox, Dr. J K Smith, J K Farley, S R Hapuku, Rev. J B Hanaike, L W Doyle, E M Perry E Kaaloa, Rev. J Niau, O M Davis a me na madame W H Rice, S W Wilcox, C H Bishop, M F Maroni, H Isenberg, G Goodacre a me na Missee M Hoody, J Smith, Bailey, Alhoegen, L Fredenberg, G Goodacre am e E Blake.

            Penei na mea i loaa aku i kou mea kakaou:--

            Papa 1--Physics, malalo o ke alakai ana a Mr. Speer.  He nani a maemae na mea i hana ia, eleu na keiki ma ka pane ana i ka haina o na ninau.

            Papa 2--Oihana palapala, malalo o ke alakai ana a Mr. Andrews ke Kumu nui o ke kula.

            Papa 3--Alimakika, malalo o ke alakai ana a Mr. Andrews

            Papa 1--English me Astronomy, malalo o ke alakai ana a Miss Kenwill.

            Papa 3--Oihana kamana, malalo o Speer.

            Papa 2--Helunaau, malalo o ke alakai ana a Andrews.

            Papa 2--Oihana ao kanaka, malalo o Miss Kenwill.

            Papa 1--Technology, malalo o ke alakai ana a Andrews.

            Papa 2--Ma na mea ike kamana, malalo o Speer.

            Ua pane mai na haumana me ka eleu i na haawina i hai ia ae la maluna, a ua nui ka mahaloia e na makaikai i hiki kino ae malaila.

            Pau na hana ua panee ia mai he papaaina i luuluu i na mea ai e na kumu, ua noho iho la na makua e ai a lawa i na mea ai i panee ia mai imua o makou.

            Ke haawi nei au i ka hoomaikai nui i na kumu no ko lakou ikaika ma ke ao ana i na keiki.  A pela pu no paha me ka poe makaikai i hiki kino ae malaila ka haawi ana i na mahalo i na kumu a me na haumana

            MAKAIKAI.

Koloa, Iune 20, 1891.

 

HE HOIKE OIAIO LOA.

E Mr. Lunahooponopono o ka nupepa KUOKOA a me PAEAINA i Huiia.

Aloha oe:--

            Ma ka la 19 o Iune, 1891, maloko o ka nupepa ka Oiaio, ua ike iho au i ka pane a S.W. Mahiai Kawelo, a e pee ana malalo o ka inoa o Makakoa me ka manao e nalo.

            Ua ike iho au i ka manao ninau a S.W. Mahiai Kawelo, i huna hoi i kona inoa ponoi a malalo o ka inoa kapakapa oia i ninau mai ai, o ka maikai hea la ka'u e manao nei e maikai loa.

            Eia ka maikai, o ka hooko aku i ka manao o ke kanawai a me na rula o ka Papa Ola, aole hoi o ke kue a me ka hakihaki i na rula o ka Papa Ola.  Aole hoi e like me keia au e ike nei i ka hana ia e like me ka hana ana a kamalii.  E hoomanaooe i ka wa e noho Luna nui ana o A. Hutchinson, aole ia e hana e like me ka hana ana a kamaihi, ua hana oia e like me ka hana ana a ke kanaka makua, aole hoi e hoopili mea'i wale aku.

            Eia ka lua, mai ka wa a o W.T. i hiki mai ai a hiki i keia la, aole paona pono ia o ko pai ai, e like me ka wa ia A. Hutchinson a me J.T. Evans ka makaala ia aku o ka manawa e ku mai ai o ka moku e kaupona i na pai ai, me ke ao aku ia J. Gasier ka hope o W.T. a me W.T., aole e pono e apuka i ke ola o na ma'i.  Nolaila ma ia ao ana a Hutchinson ia J. Gaiser a me W.T. akahi no a hana pono ia mai, aole hoi e like me ka S.W. Mahiai Kawelo e pai nei.

            Eia ke kolu, e manao mai ana oe e ao mai ia'u i ka pono, o wau o kaua ke ao aku ia oe e hana i ka pono.  Aole au e like me oe ka huna i ka inoa a i inoa hoopunipuni ka inoa e hai ai imua o ka lehulehu i mea e nalo ai kau mau hana ekaeka.  Aole anei ou manao he kanawai ia ka hoike hoopunipuni i ka inoa o kekahi.

            Eia keia, i kekahi mau la o ka pule i hala aku nei, ua hele ae na makai e papa i na ma'i aole e hookuukuu wale i ka wai.  Eia nae ka mea apiki, ma ka pa luakini o na Katolika a me ka pa o na Wilikuina e noho nei, ke hookahe ia nei ka wai e like me ko lakou makemake, aohe he papa ia aku e na makai, o na ma'i hoi ka mea nona ka aina a me ka noho ana ka na makai e papa mai ai.  He maikai iho la ia ia o ka hana kapakahi.

            Nolaila, auhea oe e Kawelo ke kanaka hoi i pee malalo o ka inoa o Makakoa, mai hono hou oe e huna i kou inoa a keke mai hoi ka niho i kahi e, a hoohalike hoi ia oe e like me ka ia i ku i ke o a pii ae ka hiu iluna e kapeku ai.

            Nolaila, ke ao aku nei au ia oe mai hoike hoopunipuni oe imua o ka lehulehu me ka huna i kou inoa ponoi, a malalo hoi o ka inoa huna oe e apuhi ai ia hai.  E hana oe me ka pololei, e like me ka Iohova i olelo mai ai "mai hoopunipuni oe i mea e hewa ai kou hoalauna."

            Ma ka mahina o Aperila i hala aku nei, ua hoopau ia ko John Puoina noho luna haawi ai ana na na ma'i, a ua hoonoho ia aku o P. Kalawaia ma kona wahi e W.T. iluna haawi ai.  Eia nae ka mea apiki, iaia nae e pii ana iuka o Kalawao i ka haawi ai, a iaia i hoi mai ai a hiki i ka hale oihana, eia ka pane a W.T. nawai oe i ole e pii iuka i ka haawi ai, aole oe e hele hou ma keia hope aku.  Nolaila ua waiho aku o Kalawaia i ka hana ia ia, a ma ia la no, ua hoouna ia ka makai e kii ia M.K. Makaena i luna haawi ai, a ma ke ahiahi no oia ia ua hoopau ia o Makaena, a haawi ia aku ka hana ia Kamakakini.  He hana maikai aenei keia?

            Ma keia ke hooki nei au i ko'u manao, a ina he manao kona no ka pane mai, ua makaukau no au i na wa a pau e pane aku.

            J.K. KAINUWAI.

 

Ka Aha Kuhina Lahui, o ka Lahui ka Lu@@hi

            Ua ninau aku kekahi i ke kulana o ka noho mahiai ana o kela poe mahiai ma Ualakaa, Makiki, ua hoike ia mai ka mea oiaio.  I ka wa ia Bihopa ka aina o Makiki, ua ae ia na kanaka e hoolimalima no ka hookahi dala o ka makahiki i kapalena ole ia.  OIa hoi i na no ka pau o ke ola o ka mahiai ana, he hookahi dala wale no ia manawa loihi, aka i keia, manawa ke hoolimalima nei ke Kuhina Kalaiaina i ka poe mahiai nei me ka hooluhi pu ia he hookahi ia hana i kela am e keia pule, oia hoi o na Poakahi a pau.  Aole anei he hana hookaumaha keia a ka Aha Kuhina Lahui.

            O kekahi wahine, ua noho loihi ma Makiki, a no kekahi manawa ua noho oia ma ke kaona nei a make ke kane, hoi aku nei no Makiki me ka ae pu ia mai e kukulu i kona hale ma Makiki, kahi ana i noho loihi ai me kana kane, a i kona hoomakaukau ana e kukulu i ka hale, ua papa koke ia aku e ka poe nana e kiai nei o Makiki, ka poe hoi a ke Kuhina i hoonoho aku ai e kiai.  No keia mea hele mai la ka wahine e ninau i ke Kuhina, mahope a mamua, oia kana i pane aku ai.  "E hoi oe a e noho, aohe he hoolimalima, no ka mea, o oe ka lahui o ka aina--i na he Pukiki, Iapana a me ka Pake, e uku no i ka hoolimalima.  Hoomaka hou aenei no ua wahine nei e kukulu i ka hale, hele hou aku nei no ka mea e kiai nei i ka aina a papa aku nei, ina e kukulu ua wahine la i ka hale, alaila e hele ka poe o loko o ka hale a o ka wahien wale no ke noho.

            Pehea la keia hana a ka aha kuhina lahui o ka Moiwahine, he ike anei keia i ke kanaka nui a me ka iki, ka waiwai a me ka ilihune?  E hiki anei i ka nupepa maunu puhi e kakoo ae i kana mau punahele Kuhina.

            HAWAII IMI LOA.

 

He Leo i Kuu Lahi Oiwi.

I ka Lunahooponopono o ke KUOKOA me PAEAINA i Huiia, Aloha oe:--

            Ke hoolauna nei au imua ou me ka oluolu ia mai e kou lokomaikai a me kou ahonui hoi, e pahola aku oe me ka opu i piha i ke aloha i ka lahui oiwi o na kupuna o kaua ma na pea eha e hoopuni ia ana e na kai ewalu.

            O keia mea e kakau aku nei, he pio oia na ka nawaliwali mai loihi no na makahiki he umi i hala ae nei.  Ua laweia imua o ka Papa Ola me ka manaoia o ka haawina hookaawale ohana, a ua hoole na kauka, a ua noho au me ke kaumaha nui ma kuu home me ka manaolana ole i koe, koe ko ke Akua aloha ia kakou i ka poe i piha i na hala a me na hewa.

            Ma ka la 11 o Aperila, 1891, i hoea malihini mai ai o W.H. Kahumoku ma kuu home e waiho ana me ka popilikia, a oia ka ka Buke Hemolele i olelo mai ai: "O ke kanaka i hanau ia e ka wahine, ua piha kona mau la me ka popilikia, a he hapa hoi kona mau la."

            Ninau mai la oia i kuu inoa a ua hai aku ia au, oello mai la oia ia'u ia oe ko'u manao i hoea mai nei ke oluolu oe, a ke ike mai no hoi oe i ka pono, a ae aku la no hoi au; a ua ninau hou mai la no oia ia'u, he kauka no paha kou, hoole aku la au me ka i aku, aohe kauka, no ka mea aohe wahi o ka pono e manao aku ai.

            Ua hoao ia na laau hemo a na kauka, koe ka laau inu, a ke hamo aku o ka pii mai la no ia, a pela iho ia au no na makahiki he umi i hala ae nei.

            Olelo mai oia ia'u, e oluolu anei oe e lapaau ia e kekahi kauka, a ua pane aku la au, o ke dala no ka mea e hiki ole ai, i mai la oia me ka naau i piha i ke aloha, mai hopohopo oe no ke dala, a o ka'u e noi aku nei o kou ae mai, a na'u e hoi a kamailio pu i ke kauka, a ua ae aku la au, a ua olelo mai oia ia'u ma ka hora 7 o ke ahiahi o ka la 13 o Aperila, e hiki ai oe a me kau kane ma ka hale kauka o Kobayashi, ma Alanui Papu, he kauka Iapana.  A hoomanao ae la au i ka hana aloha a ke kanaka Samaria i ka mea i loohia i ka poino o na pua a Levi.  O ka'u noi e hoopiha mai ke Akua i ka mea i aloha mai me ka pono a me ka pomaikai.

            Ma ia manawa i hai ia ae la, ua hoea aku au a me ka'u kane a loaa aku la o W.H. Kahumoku ma ka rumi kauka, a ua hoolauna aku la oia ia'u i ke kauka, a komo aku la makou ma ke keena nana, ke kauka, Kahumoku a owau no hoi, nana ke kauka ia'u a hai mai la i ke ano o ko'u mai, he mai kumu mai ko'u mau kupuna mai a me ko'u makuakane.

            O ke kumu i pii koke mai ai no kou inu i ka rama, wahi a ke kauka, a ua ae aku la au, a ua haawi mai oia elua ano laau, he laau inu a he laau hamo.  A no na mahina elua a oia ke mamao aku nei keia pilikia mai ia'u aku.

            Nolaila e ku mai e kuu lahui me ka puuwai aloha a apo ia Kauka Kobayashi e lapaau i ka haawina hookaawale ohana.  Ua ninau au iaia i ka hiki ke lapaau i keia haawina, a ua ae mai oia.

            Ke manao nei au, he mea kupono i ka lahui ke noi i ka Papa Ola e hoihoi i Kalawao mamua o ka poe aole i mahele i keia ano mai.  E ku a e kipa ae, a na oukou e kaana no oukou iho.  Kupono kana mau laau a pau i haawi ai ia'u.

            Me ke aloha nui i na paahana o kou keena.

            A. LEWAINA NAHOLAELIMA.

            Honolulu, Iune 16, 1891.

 

Hoeueu Moho Peresidena no James G. Blaine.

            Ma ka la 11 o Iune, ua malama halawai malu iho kekahi poe kuonoono a koikoi o ka Aoao Ripubalika ma ke kulanakauhale o Kkako, no ke kukakuka e ana i o la honua i na moho oi o ka makemake ia no ka holo Peresidena i Novemaba o ka 1892 ae nei.  Oiai ua hele ko Indiana poe i keia halawai me kam anao e onou i ka inoa o Lunakanawai Gresham me ke kupaa maluna o ia inoa ahiki i ka haiolelo ana a Col. A.L. Conger penei: Ua hoouna aku au he palapala ninaninau i na manao o kela a me keia, oia hoi ka hopena o ke kukakuka ana me ka poe koikoi mawaena o ka aoao Ripubalika, o ka hapa nui o lakou he mau lala no ke Komite Lahui a i maopopo ke ko-ko ana o ka manao o ka aoao Ripubalika, o John C. New wale no o ke Komite Lahui ka mea e hoomau nei i ka makemake ia Harrison e holo hou i moho.  E hoomanao a ua maopopo ia oukou ka moolelo o ka ahaelele o Kikako nana i wae ia Harrison i moho.  O na helehelena o ka aoao Ripubalika ia wa, aole he ohohia, no ka mea, ua lawelawe o Cleveland i kana hooponopono ana i ka oihana hooko me ka maemae a maikai i mahalo ia e ka lehulehu o kona aoao.  No ia kumu, ua paakiki a ua ikaika maoli ka hooikaika ana a ka aoao Ripubalika, a i kela wa no hoi, ua nawaliwali ko Blaine mau lala kino a ua hiki ole ke lawelawe i na hana o ka holo moho ana.  Mahope mai ne, ua hoi mai kona ikaika kino a ke hooia aku nei au, o kona mau manao a pau aia pu ia maluna o kona mau hoaloha ma ka nee ana e hookiekie ae ai iaia no ke kulana a kekahi America e ae e hoopiha aku ai me ka lawa kupono ole.  Ua komo kino nui loa au iloo o na hana mikiala o ka mokuaina o Inidana, a ma ke kulanakauhale au o Inidianapolio i ka wa i olelo ia ai e hoolilo ana au i na dala he $100,000 i mea e wae ole ia o Harrison i moho, ma ka hana pili i ka hana mikiala o Inidiana.  Ua paina awakea o Mr. Fairbanks me a'u ma Beti Hale, aka o ka maua mau kamakamailio wale no nae no na mea pili hana wale no.  Aole au i ike i kekahi mea mai Mikigana mai, aole hoi o kekahi mau mokuaina e ae mai, koe wale no o Gen. McNuita, aole hoi au i kamailio me kekahi mea kakau nupepea maluna o kekahi ninau kalai aupuni.  Ua pono nae ia'u e pakui aku maanei, eia he kue ikaika loa ia Harrison ma Indiana.  Aole au e hoouhiuhi iho ana i ka mea oiaio, he kanaka au mahope o Blaine a pela aku ana au i ka 1892.  Ina o Blaine ka kakou moho, e loaa auanei he kanaka nana e haawi mai i mana hooko e like me ka makemake o ka aina.

            Ma keia haiolelo, ua pau aku i ka huli ka poe i hele mai me ka manao mahope o Gresham, a ua pau aku mahope o ka hoolokahi ana i hookahi inoa o Blaine.

 

He Aelike Maikai.

            Ma kekahi halawai hoole waiona, ua nui ka poe i hoike no lakou iho ma ke ano o ka ona, mahope ua ku mai he kanaka Irelani o ke ano noeau me ka mino aka, he paa kamaa hou loa kona a he maikai hoi, a maanei i hoike mai ai oia i kona moolelo, penei:

            "He hookahi pule mahope iho o kuu kau ana i kuu inoa maluna o ka palapala hoohiki hoole waiona, ua halawai pu iho la au me kekahi o ko'u mau hoa o na wa i hala, ua olelo mai la oia ia'u "maikai maoli kou mau kamaa buti.  Pela io ea, wahi au, a ma ia hoailona hookahi no, na ka mea nona ka hale inu kuai rama i haawi mai ia'u."

            "Pela ea!  lokomaikai mali no ka hoi," wahi a ka hoaloha.

            "He oiaio no," wahi au, aka he wahi aelike ka'u me ia i hana ai, nana no e malama i kana mau waiona, na'u no e malama i kuu mau dala.

            "Noloko mai o kuu mau dala i loaa mai ai keia paa kamaa buti maikai ia'u, a e hoopaa ana hoi au ma ia aoao hoopomaikai," wahi au i kuu hoa'loha.

            W.C.T.U.

            Honolulu

 

            Ua puka mai ke Kula aku o Kamehameha i ka la 23 o Iune, 1891 nei ka papa ekahi o ke Kula, no lakou keia mau inoa molalo iho.  No Oahu nei, Robt K. Pahau, John K. Waiamau a me William K. Rathburn.  No Kauai, William O. Crowell a me Charles Blake.  No Maui, Samuel Keliinoi a me Charles E. King.  No Hawaii, Samuel Kauhane, Thos. Neil Haae a me Enoch W. Brown.  Ua haawi pakahi ia i keia poe haumana maluna, na palapala hoomaikai.  He eha mau keiki o keia papa hookahi maluna ae, no lakou na inoa F.W. Beckley, Solmon Hanohano, Mose Kauwe a me Wm. Chas. Manaole, ua hoolohe lakou e noho hou i ke kula no hookahi makahiki i koe.  No keia kumu, ua hoopanee ia ka haawi ana i ko lakou mau palapala hoomaikai a pau ia manawa.

 

ANO NO I LOAA MAI AI IA

MRS. B.C. GOOD,

Na Lako Papale Hou Loa, Na Pua Papale, na Hulu Papale a me na anoi e ae i ike ole ia ma Honolulu

a me

Na Palemai Wawae Kane, Wahine a me na Kamalii, na pokaa Lopi Silika, a pela aku.

He mau waiwai hou loa wale no a pau, a e kuai ia aku ana me ka makepono loa

Alanui Papu, mauka iho o ka hale hana Wati o Wenner & Co.

2331-3ms

 

Hale Hana Kopa o Honolulu.

Ua paa aenai ka Hale Hana Sopa Mahu Hou o ka poe no lakou na inoa malalo iho a ua makaukau lakou e hoolawa aku i ka poe piepiele i na

Kopa Maikai Loa Maoli,

I hookomo ia iloko o na Pahu 100 paona, mai ke 42 a 56 auka Kopa pakahi.

Ke hooia nei makou i ka oi o la MAIKAI o ka makou KOPA mamua o na Kopa o waho mai

Ua kuni ia mawaho o ko makou mau Pahu me ka hoailona "HONOLULU SOAP CO." a e

Kuai ia e na Halekuai Liilii a Pau.

HUI HANA KOPA O HONOLULU

M.W. McChesney & Sons, Na Egena

2340 1-yr

 

J. HOPP & CO.,

Na Poe Hana ma na Lako Hale o na ano a pau!

Hana Moe, Na Uluna Pulu, Etc.

Noho no ka Hoolimalima ana, na Lako Hale me ke kumukuai emi.

Honolulu.        2831 tf

 

ALLEN & ROBINSON,

Na mea kuai papa o na ano a pau.  E loaa no ma ka Uwapo o Pakaka, Honolulu, ma ke kumukuai makepono loa, no ka pomaikai o ka lehulehu e makemake ana o kukulu hale.  E kipa mai a e ike kumaka.

@@@@ tf

 

Hoolaha @umau.

 

PAPA! PAPA!

AIA MA KAHI O

Lewers & Cooke

(LUI MA),

Ma ke kahua hema o Alanui Papu me Moi.

E LOAA NO NA

PAPA NOUAIKI

O kela a me keia ano,

Na Pani Puka, na Puka Aniani, na Olepelepe, na Pou, na O'a, na Papa Hele, na Papa Ku, me na Papa Moe he nui loa.

NA PILI HALE O NA ANO A PAU

A me na

WAI HOOHINUHINU NANI

O na ano a pau loa.

Na Balaki o na Ano he Nui Wale

Ke hai ia aku nei oukou e na makamaka a pau, ua makaukau keia mau makamaka o oukou e hoolawa aku ma na mea a pau e pili ana ma ka laua oihana no ka

Uku Haahaa Loa,

E like me ka mea e holo ana mawaena o Laua a me ka Mea Kuai.

Hele Mai e Wae no Oukou iho.

2331-3m

 

Ka Waiwai o ka Hilinai

Saseparila Ayer

AYER, Laau Saseparila kai kaulana i hilinai nuiia no ka hoomaemae koko ma na wahi a pau o ka honua, he aneane 40 makahiki i hala ae nei, a ua lawelawe nui ia hoi iwaena o na oihana lapaau.  O keia

LAAU SASAPARILA, no loko ae ia o ke aa Sasaparila Honedura maoli; ua loaa ka mana hoomaemae ma o ka hui puia ana me kekahi mau aa laau e ae, a me kekahi mau mea no loko o ka honua a me ka hao.

HE koko inoino a nawaliwali a nei kou?  Ua awili pu anei me na ano mai ikaika?  A ua hui pu anei me na wai awaawa hoopehu.  Na keia

LAAU e hoomaemae ia mau mea ino a pau a maikai.  O na kauka lapaau a pau o Amerika i ike i ke ano o ka Ayer Sasaparila ua olelo lakou, aole he mae maikai e ae no ka hoomaemae koko ana mai na mai i awili puia, aka o keia wale no.  No ka

HOOMAEMAE ana i ke koko, a me ka hookahua pono ana i na mea a pau ma kekahi mau ano mai i ikeia, o ka Ayer Sasaparila wale no ka laau nana e hoomaemae me ka hakalia ola mamua ae o kekahi ano laau e ae.  O ke

KOKO ino hakuhaku a nawaliwali hoi kona holopono ana ma ke kino, e hoomaemae ia ana a e hooikaika pu ia no hoi ma o ka ai ana i keia Laau Sasaparila a Ayer.  He maalahi a he

MAIKAI loa hoi keia Laau, aole no ka hoomaemae wale ana no i ke koko, aka, no ka hookaawale pu ana kekahi i na ma'i, hoomomona hou ana i ke koko ino, a me ka hooikaika pu i kona holo pono ana ma na aa.  He lehulehu wale na hooia ana mai na wahi a pau o ke ao nei i hoohana mai i keia laau mamua o kahi mau laau e ae

A HILINAIIA no ka ikaika kupono o ke ola kino, ma ka maemae ana o ke koko, hoomake pu ia na ma'i, a pela aku, He nui na laau hoomaemae koko i hoolaha wahahee wale ia malalo o na inoa he lehulehu, aka, o na hilinai a me na hooia wale no a ke ao holookoa, maluna o ka

Ayer Laau Sasaparila,

Hoomakaukauia

Kauka J.C. Ayer & Co., Lowell Mass.

HOLLISTER & CO.

Na Agena ma ka Paeaina Hawaii.

23@1-3m

 

Hoolaha @umau.

 

KAKELA ME KUKE

KA-HALEKUAI-NUI

O NA

WAIWAI LIKE OLE.

NA LAKO KAMANA!

E laa na Pahiolo, Koi Hole, Hamale, Koi nui a me liilii, Kila, Wilipuaa. Rula, Apupu, Kui o na ano a pau, Kala-koa, Hao Hoopaa Paka

Pohaku Hoana, Kepa, Lei Ilio, Kaulahao Ilio, Pahi, Upa, Pahi-umiumi, Kalapu, Kope-hulu, Pulupulu, Pepa Kalakala, Lina Hao, Ami, Kee@@ a me

Kaula Opu.

PALAU!

O na ano he nui @@@@

Oo, Ho, Kopala, P@, Kipikua, Hao Kope, @@ Ho, a pela aku, Kua Bipi, Lei Bipi, Kaulahao Bipi, Uwea Pa, Uwea Koleawe, HAO PILI PIULA Kaa Palala, Ipu Hao, Ipu Ti, PA PALAI

Makau me Aho Lawaia

Iliwai, Papa Holoi, Kopa Ala, Kaula Kuaina, Hu'akai, Ehi Wawae, Hulu Pena, Kopaholoi, a pela aku; Pena Wali, Kini nui a me liilii o na ano a pau, me ka Pepa Kuhikuhi, Pena Keokeo, Aila Pena, Aila Hoomaloo, Vaniki Kaa a me Vaniki Moe,

Pena Hoomaloo

A ME ANIANI HALE

Aila Mahu, Aila Mikini, Aila Hamo Ili, Aila Kaa, Inika Kamaa; Panda, Kukaepele, Kiano Pauda, Uiki Ipukukui o na ano he nui a lehulehu

NA PAKEKE POI

O KE

ANO HOU LOA!

Na Mea Piula!

MIKINI HUMUHUMU,

MIKINI A WILCOX ME GIBBS,

Na Mikini a Remington.

He nui loa na mea hao me na ukana e ae o na ano a pau, aole hiki ke hai pau ia aku, hewa i ka wai na maka ke ike.

LAAU LAPAAU KAULANA LOA A

DR. JAYNE

Laau Hoomaemae Koko, Laau Hoopau Naio, Laau Kunu, Penikala, Huaole, Paakai, Laau Hoopaa@@@ me

Na-Laau-Hamo,

A PELA AKU, A PELA AKU

KAKELA & KUKE.

2@@1-3mtf