Ka Nupepa Kuokoa, Volume XXIX, Number 12, 22 Malaki 1890 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

BUKE XXIX, HELU 12.

HONOLULU, POAONO, MARAKI 22, 1890 NA HELU A PAU, 2277

 

HOOLAHA LOIO

 

NELLIE M. LOWREY

Notari no ka Lehulehu

@

@ Palapala a me na Palapala Hoohiki

Keena Hana me W. R. Kakela Loio @ ka Hale @ Honolulu 2241 3Y

 

CECIL BROWN.

LOIO A HE KOKUA MA KE KANAWAI?

He @ Hoolalo Palapala no ka Me aupuni o Oahu

Keena Hana: Ma alanui Kalepa.

@

 

E G HITCHCOCK

(AIKUE HIKIKOKI).

LOIO A KOKUA MA NA MEA A PAU E PILI ANA MA KE KANAWAI.

E ohi ia no na Bila @, me ka awiwi

HILO, HAWAII 2114 1yr.

 

A. ROSA.

(Akoni)

Loio a he Kokua ma ke Kanawai.

Luna Hoolalo Palapala.

Keena hana ma aianui Kaahumanu

 

GEORGE P. KAMAUOHA.

He Loio a he Kokua ma ke Kanawai.

--A HE MEA--

ANA AINA.

E loaa no ma Kohala @ Hawaii.

20@1 1y

 

W R. KAKELA

LOIO A HE KOKUA MA KE KANWAI

He luna Hoolalo Palapala.

@

 

JAMES M. MONSARRAT.

(MAUNAK@A)

LOIO A HE KOKUA MA KE KANAWAI

He luna Hoolalo Palapala.

E hana ia no na Palapala Kuai, Palapala Hoolimalima, a me na palapala pili kanawai e @ ma ka olelo Hawaii. Oala no ka hoaie ma ka moraki ma na waiwai paa.

KEENA HANA: Hale Pohaku hou ma ka aoao ma Waikiki o ka Halewai, Alanui Kalena.

 

ENOCH JOHNSON.

(Enoka.)

He Loio a Kokua ma ke Kanawai

@ o no Ahahookolokolo a pau o keia Aupuni.

Luna Hooiaio Palapala Kope no ka apana o Kona, mokupuni o Oahu.

Keena hana me Mr. P. Numana. Helu 44 Alanui Kalepa.

2203 1y

 

WILDER & CO. (WAILA MA.)

@ kuai papa a me na lako kukula hui o na mea a pau. @pono a pau o ka hale.

Kihi Ala@ Moiwahine @ Papa

 

WILLIAM C ACHI.

Loio a he Kokua ma ke kanawai imua o na Aha a pau o keia Aupuni

He Notari no ka Lehulehu a Boroka no na waiwai paa.

Keena Oihana, Helu 30, alanui Kalepa, Honolulu, Oahu

2262 @

 

J.T. Waterhouse.

(@)

Halekuai o na Lole Nani Panio

Lakohao.

Na Lako Hana Mahiko,

A PELA AKU HE NUI WALE.

Alanui Moiwahine, @ Honolulu

2262 1y

 

 

NANEA KAMAHAO

@

KEIKIALII ROMEALA;

KA Ui Kila Mageneti O Parameri

 

Ka Nani e haule ai ka Honua.

Ka Mahina Meli o Salaredina;

Ka La aloha o Mulisedera;

Na kulu Koke kamahao Ekolu.

 

Na Ui Hookelakela o ke Ao holookoa.

 

Na Nani Puuwai Uahoa o ka Honua nei @ Kila Mageneti o ke aloha “O Parameri no ia”

 

Ua malama pu ia he mau aha lealea like ole ma kela a me keia wahi o ke aupuni o Parameri, a i ka pau ana o na pule ekolu ua huli hoi aku na keikialii no ko lakou mau aupuni; a o ke aupuni hoi o Parameri, ua noho iho la oia iloko o ka haaheo, me ke kali ana o ka hoea hou aku o ua hoa hakau ona no ka paphi ana i ka inoa “Loea o ka Honua.”

Aka, a hala ae la nae he mau la lehulehu wale, aole loa he mea i hiki aku i Parameri e hoao ai me Romeala, no ia mea, hooholo iho la ua Hao Kila Mageneti nei, e hele oia i ka makaikai ma na aupuni a pau o ka honua, no ka huli ana i hea hoopapa nona.

I ka holopono ana o keia manao o ua keikialii la, ku ae la oia a hele aku la e hui pu me kona makuakane, a i ka lohe ana o ka moi Homelina i na manao o kana keiki, ua kulou iho la kona poo ilalo no kekahi mau minute, a i kona ea ana ae, ua pane mai la oia –

“E kuu keiki, ka hua hookahi o ko’u puhaka, ke hookuu aku nei au ia oe e hele ke piha ka makahiki hookahi mai keia la aku a kaua e kamailio nei, a i ka la hope loa no hoi o ka makahiki e hoea hou mai ai oe i ko kaua aupuni nei.”

No keia mau olelo a ka moi Homelina, ua lilo ia he mea maikai i ka manao o kana keiki, e kali oia no ka manawa a kona makuakane i hai mai ai. Nolaila, ua noho iho ua Romeala nei me ka noonoo ana no kana hana e kaulana loa ai kona inoa ma ka moolelo o ke ao nei “Ka Haku alii hoowalewale iwaena o na keiki a kanaka.” A i ka hope loaa iho la iaia ka hana, a wahi a ua Romeala nei i puana ae ai-

“E kapili au i kekahi moku no’u no ka lawe ana aku ia’u ma na wahi a pau a’e i makemake ai, a nona hoi ka nani a me ka lua ole ma ke ao holookoa, i hiki ole hui i ka naauao o na keiki a kanaka ke hana; a aole hoi iwaena o na kupua o ka lewa.”

I ka holopono ana o keia manao o ke keikialii Romeala, ua kaha iho la oia i ke kii o kona moku me ka noeau nui, a e mahelehele ana hoi i ka nui o na keena a me ko lakou mau mea hoonani e like me ka nui o na aupuni o ka honua.

I ka pau ana o na hoolala ana a ua keikialii nei ma ke kaha ana i ke kii o kona moku, ku ae la oia iluna a puana ae la i keia mau hualolelo kaena, “Ua hana o Romeala, ka hao kila mageneti o Parameri, i ka mea i hana ole ia mai ka hookumu ia ana o ke ao nei a hiki i keia la,” a noho iho la oia ilalo me ka akaaka ana iho.

Maanei e na hoa heluhe’u, e hoalu iki iho ko kakou kamailio ana no ke Kila Mageneti, a e huli ae kakou, a nana aku no na keikialii e huli hoi la no ko lakou mau aupuni.

I na poe keikialii la @ hoea aku ai i ko lakou mau aupuni, kukaia aku ia lakou ua ha@ie pio lakou i ka Hao Kila Mageneti o Parameri. A wahi a lakou i hoike aku ai, “Aohe loea e kupaa imua ona no elima minute, a e haule no oia malalo o ua loea nei o Parameri.”

I ka lohe ana o na moi o ua mau aupuni i na olelo a ko lakou mau keikialii, haalulu iho la lakou me ka maka’u nui, a hoouna hou aku la i na elele no ke aupuni o Parameri me ka huaolelo hookahi i ka umauma, “Na Ui hookelakela o ke Ao-Na Nani Puuwai Uahoa o ka Honua.”

O keia mau hoa lealea e aa nei e hoohaule i ka noeau o ke keikialii Romeala, he mau ui lakou no ka aoao palupalu (kaikamahina alii), a ko lakou mau aupuni i lana haakei ai na manao no ko lakou ui a me ka waipahe naue ole o ko lakou mau puuwai, e wawahi a hoolilo ia Romeala i mea ole, aka, aole paha lakou i manao o ka huluaa ia o keia keiki.

Nolaila, o ka mea heluhelu, e waiho iki iho kaua i ua poe loea nei o ka aoao palupalu, a e nana ae hoi kaua no na elele a me ka lakou huakai no ke aupuni o Parameri.

I na elele i hoea aku ai i ke aupuni o Parameri, waiho aku la lakou i ka lakou palapala poloai imua o ke keikialii Romeala a me ka inoa o ko lakou mau aupuni.

I ka loaa ana aku o ka palapala ma ka lima o ke keikialii Romeala, heluhelu iho la oia me ke akahele, a i ka hope loa o kana nana ana i ka palapala, kunou mai ia oia imua o na elele i panai pu ia mai e na huaolelo minoaka o ka waipahe: “E hoi aku no ko oukou mau aupuni iho a hoike aku, ua hamama na ipuka o Parameri no lakou i na wa a pau, a ua akea hoi kona mau palena no ka hookipa ana mai i ka honua holookoa ina oia ke alahele e ike ia ai.”

Lalo o Maka-ukiu

Ka ike aulana o Aukaki.

I ka hooki ana iho o ke keikialii Romeala i kana mau olelo, haawi hope mai la na elele i ko lakou aloha i ke Kila Mageneti o Parameri, a huli hoi aku la no ko lakou mau aupuni.

Ia lakou i hoea aku ai i ko lakou mau aupuni, hoike aku la lakou me ka akena ana i na olelo a ke keikialii Romeala, a i ka hope loa o ka lakou hoike ana, puana ae la lakou, “O Parameri ka helu ekahi ma na ano a pau.”

I ka pau ana o ka hoike a na elele, pihoihoi ae la ka manao o ko lakou mau moi a kahea awiwi ae la lakou i halawai no ka hooko ana i ka mea a lakou i hooholo lokahi ai. Emoole, pahola ae la ke kuahaua alii, a maloko o ua kuahaua la e olelo ana penei

-:Kuahaua:-

“Iloko o na la he umikumamalua mai keia la aku, e haalele iho ana na kaikamahine alii i ko lakou mau aupuni nei, no ke aupuni kaulana o Parameri, ka poe hoi a makou e haaheo nei, na ui hookelakela o ke ao holookoa, a he nani uahoa hoi no ka honua, na lakou e wawahi a weluwelu liilii ka Hao Kila Mageneti o ua aupuni la, malalo o ka hana ka hookelakela ana i ko lakou loea a me ka naauao.”

Ikea ma ko makou Halealii: Kakauinoaia: Na Moi na Aupuni Hui Hookelakela.

Ua hio na la o ke kua@ua alii e pahola ana i mau la uluaoa no na kanaka o ua mau aupuni la, a ua ku ae kela a me keia kanaka a hooholo iho la i kona manao e ukali aku mahope o ka meheu o na ui hookelakela o ka honua (oia hoi na ui aoao palupalu o ko lakou mau aupuni), no ka makaikai ana i na hana hookelakela a ua poe kaikamahine alii la me ka mea a lakou i lohe wale ai no i ke kaulana, oia ke keikialii Romeala o Parameri.

I ka hoea ana mai o ka la e haalele iho ai o ua poe kaikamahine alii loea la, liuliu ae la lakou ia lakou iho no ka haalele ana iho i ko lakou mau aupuni no ka aina e kahe ana ka walu a me ka meli.

No na hoea pokole wale no i hala ae, aia ka huakai alii e kamoe ana ma ke ala e hoea aku ai i ke aupuni o Parameri, a mahope aku o ka huakai e moe ana kaoo a ka menehune i na kanaka o na mau aupuni, a no na ia hele lehulehu hoea aku la lakou i Parameri, a ua hookipa @ ia aku lakou e ka umauma lahalaha o ka moi Homelina a me ko na lahui. (Aole i pau.)

 

 

HE KAAO

-NO-

HAPAIKALA-Kapaikamahina

 

KA HUA OHIA NANI

I LOAA MA KA

Piko Mauna o Farani

 

Ka Ui nana i Kakele ke

Aupuni o ka lihlihi o na Manu.

Kokua ia e UULUPAINA kona Pokii.

 

Unuhi ia e Moss Ma’u

 

Ia manawa, pane aku la ua moi nei, o keia lei gula i loaa ia oe, no kuu kaimahine keia, nolaila, ke haawi aku nei au i ko’u mau hoomaikai he nui ia oe no kou huli ana i ka lei o kuu kaikamahine a loaa.

I ka pau ana ae o ka ka moi mau olelo, ua pane koke mai la ke kaikamahine alii i ke koa opio, he nani ia ua loaa ae la kuu lei gula ia oe, nolaila e hoolilo aku ana au ia oe i moi nui no Kelemania nei, a e hoohui ia kaua ma ka berita maemae o ka mare, oia hoi owau kau wahine a o oe hoi ka’u kane, e like me ka mea i hoolaha ia ma na aupuni a pau, a e ike lihi ai hoi i keia

 

Aina nui palahalaha

E noke oe a luhi ko kino

 

he hewa ia la? Wahi a ua aina nui nei o Kelemania i pane aku ai imua o ke koa opio, me kona manao e hooko ia ana kana mau kuko.

I ka lohe ana aku hoi o ke koa opio i keia mau olelo a ka aina palahalaha i ike ia ae la, ua kani iki iho la kana wahi aka, a pane mai la i keia mau olelo i ke kaikahine ‘alii, he mea oiaio ia, mai luhi io no kuu kino i kena aina nui palahalaha, aole hoi e hihi, ua hooluhi mua ia nei wahi pauku kino i kela aina palahalaha mua, oia hoi, ua mare mua no au i ka wahine.

I ka pau ana ae o ka ke koa opio mau olelo ana, ua ku mai la ka moi a ninau mai la, ina he mea oluolu i kou hanohano, ka hai ana ma ii kou inoa, oiai, ua makemake makou e lohe i kou inoa.

Hai aku la ke koa opio, o ka Hua Ohia i loaa ma ka piko mauna o Farani ko’u inoa.

I ka Manawa a ke koa opio e hai ana ana i kona inoa, oia ka Manawa a kekahi kanaka e noonoo ana i kona wahi i ike ai i keia keiki, a oia hoi ka alihikaua o Kelemania, a i kona wa i hoomaopopo ai i kona wahi i ike ai, ua ku aku la oia imua o ka moi a pane aku la penei:

Ke ike nei au iaia nei, o ka moi keia o Farani: a o Hapaikala-Hapaikamahina keia, ka mea nana i pepehi ke keiki a Masekepa, a oia keia a’u e ike nei i keia manawa.

I ka pau ana ae o na olelo a ka alihikaua, ia wa i ku mai ai ke koa opio, pane mai la i ka moi, o ka’u noi ia oe, o kou aupuni nei, me a’u ia a o oe no ka moi, a owau nei ka moi nui maluna o na aupuni a pau.

Ua haawi aku la ka moi i kona ae no kela manao a ke koa opio, a ua lilo hoi ia he mea maikai i ka manao o ka moi, a me na mea a pau, a ku hou mai la ka opio a pane mai la.

He nani ia ua lohe ae la au i kou manao, nolaila, e hookuu mai oukou ia’u e hoi no ko’u aupuni, a ua ae no hoi ka moi a me na mea a pau, a hoomakaukau ae la ka opio no kona huli hoi aku i kona aupuni.

I ka makaukau ana o ke koa opio no kona hoi, ua puka aku la na mea a pau a ku iho la ma ka lanai, a ua wehe ae la ka opio i kana buke aniani a wehe pu ae la in a kui he @ i hoopaa ia ai o kona lio, a ia wa i oili mai ai oia me na pono a pau, a ua lilo hoi ia he mea hou i ka manao o na mea a pau e kuku ana.

Kau aku la ke koa opio maluna o kona lio a huli mai la a hoomaikai mai la imua o na mea a pau a pela no hoi ke anaina i haawi aku ai i ko lakou hoomaikai.

I ka pau ana o ka ike aloha ana mawaena o ke koa opio a me ka ohana alii, a ia wa i hoomalo mai ai oia i ke kaulawaha o kona lio a lele aku la i ka lewa.

He mau minuke pokole wale no i kaahope ae, halulu ana lakou nei no ka hale kakela, a hoi aku la keia a ma kona rumi a noho iho la, a haule aku la no hoi na holoholona a moe iho la, a ala hookah wale aku la no ka pio.

Maanei e ka mea heluhelu, e huli ae kakou a nana aku in a kupua o ka lewa a e waiho iki aku hoi kakou i ke koa opio a me kana mau holoholona e hoonanea ana.

Oiai o Kini Kula me kona hoa e hoho pu ana me Lopiana o Aina Ahi, a o ka hana a keia poe he imi i mea e make ai ke koa opio, a i ka holopono ana o ka lakou hana, ia wa i hoomaka ai o Lopiana e huli i ko lakou enemi, a i kona hiki ana mai Perusia, e hoho ana kona enemi ma ka home kakela o Meneki.

I ka hiki ana mai o Lopiana ma ka home o kona enemi, ua komo loa aku la oia iloko o ka hale, a ia wa i ike mai ke koa opio i keia keiki malihini e komo aku ana.

I ka ike ana o ke koa opio i keia keiki, ua ku ae la oia iluna a haawi mai la i kona aloha i ka malihini i haawi aku ai i kona aloha.

Mamuli o ka moe ana o na kiai o ke koa opio, oia ke kumu i ike ole ia ai o ke ano o keia keiki, i na paha e ala ana na holoholona a ke koa opio ina paha ua hiki ia laua ke hoike aku i ke koa opio, he kupua keia, o kahi iho la no hoi o ka poino.

I ka hui ana ae o kamaaina me ka malihini, ua hoi aku la laua iloko o ka rumi hookipa, a malaila laua i hoonanea ai, a liuliu, ninau aku la ke koa opio, n hea oe?

Pane aku la ua keiki nei, mai Aikupika mai au a i hele mai nei au e ike ia oe.

            Ua ae aku la ke koa opio me ka manao he maikai na hana a keia keiki, eia ka @ ole.

            Mahope iho o na hoonanea ana a laua, ua lawe aku la ke koa opio e hoomakaikai hele kana lihini ma na rumi a pau o kona kakela.

            A i ka hiki ana aku o ua keiki nei ma ka rumi o ke koa opio e moe ai, ua nana ae la oia ma o a maanei, a ike aku la oia i ka waiho mai o ka pahu daimana a ke koa opio, a hoomanao ae la oia e loaa ana kana mea i huli mai ai.

            I ka pau ana o ka moomakaikai ana a ke koa opio, ua uhoi hou aku la laua no ka rumi hookipa, a hoonanea iho la laua no kekahi mau hora, a i ka pau ana o ka laua hoonanea ana, ua uhoi aku la laua no ka hooluolu ana.

            Ua hoi aku la ka opio a ma kona rumi haule aku la hiamoe, a pela no hoi ka malihini i hoi aku ai no kona rumi, hoi aku la nae oia a ma kona rumi ala malie iho la no, e kali ana no ka hiamoe loa o ke koa opio.

            I ka ike ana o ua keiki nei ua hiamoe loa ke koa opio, ua ala ae la oia a hele aku la ma ka rumi o ke koa opio e moe ana, a ike pu iho la ua hiamoe loa na holoholona a ia wa i hou iho ai oia i kana mau kui e paa ana ma kona lima ma ke poo o ke keko, a hookahi ma ke poo o ka ilio, a ia ka holopono ana o ia mau mea ua komo loa aku la oia a ma kahi o ka pahu daimana e waiho ana a lalau aku la, wehe ae la oia i ke pani a ike iho la oia i ka buke a me ke eke kalena, a ua nana pono iho la oia i ke eke kalena, a hoomanao ae la i na olelo a Kini Kula, a ia wa i hoomaka ae ai oia e lele i ka lewa me ke eke kalena.

 

Gaberiela Lenoa

O KA

Puali Kahiko Imeperiela o Farani

 

Koa Opio iloko o na Ulia o ka Laki

 

Kukala Kaua a Perusia no kekahi Wahine

 

He Moolelo no ke Au-Weliweli Nui o Europa.

 

KE KOKOKE ANA I KE KAHUA KA@A

 

            I ka manawa a Gaberiela i ukali aku la ia Ilamuku Betia a mawaho o kekahi halelole, ua ku iki iho la oia mawaho a kali no ke kauoha.

            Aole i loihi kana ku ana iho ma ia wahi, ua holo mai la kekahi kaa e huki ia ana e na paa lio elua, a ma ka ipuka ponoi o keia halelole, ku iho la malaila a kali no kekahi mea.

            I keia wa i ulu mai ai ka noonoo iloko o Gaberiela, e makaala loa ana oia i na ohua o keia kaa ke puka mai iwaho, e like me na olelo a ka Emepera i hai mai ai iaia, eia i ke kahua kaua nei kela lede hoohanohano o ka Emeperesa Iosepine, ma ke alahele no kona hoomale ia i ke kane me ke keikialii Posetama o Perusia.

            Oiai na manao o ke pihoihoi e lala we ana iloko o ko Gaberiela puuwai, ua puka mai la o Ilamuku Betia mai ka halelole ae me na lede elua ma kona mau aoao ua paa na maka i ka uhimaka, a komo aku la laua iloko o ke kaa, oia ka Betia i pane aku ai i kekahi o na lede,-

            “Ua malaelae ko olua alahele i keia ahiahi e ka Madame. O keia mahele koa, e ukali ana lakou ia olua, a o keia aliikoa Kapena Lenoa, oia ke kali i na kauoha a pau a olua e haawi aku ai oiai ma ke alahele. Ke haawi aku nei au i ke aloha ahiahi, - Fea-wele.- e na Madame.”

            Huli mai la o Ilamuku Betia ia Gaberiela a pane mai la i keia mau olelo o ka haawi kauoha,-

            “E lawe ana oe e Kapena Lenoa i ke alakai i keia huakai, a e hookuu mai oe i keia mahele koa i ko oukou wa e hehi ai maluna o na okana aina o Perusia. E haawi aku oe i keia palapala ia Kenerala Duroka, a e hai pu aku iaia, aia iloko o keia kaa-kaahele, o Madimosele Ineza de Rila, ka lede hoohanohano o ke aloalii o ka Emeperesa Iosepine, i ukali ia e ka Madame la Makuesa de St. Jina, ma keia huakai o ka hoohui i ke koko a me ka lima akau o ka noho aloha ana o na aupuni elua o Perusia me Farani, ma o ka Madimosele la me ke keikialii Fadinana o Posetama. Oiai oukou ma ke alahele, e haawi oe i ka manawa-ka hoolohe-a me ka hooko kauoha i kulike me ko laua hanohano, mai keia wahi aku a hiki i ko oukou komo ana iloko o ke kulanakauhale o Berelina. E hoomanao e Kapena Lenoa, -o ka hilinai o ka Emepera, aia maluna ou; a o ka hopena o Farani, aia maluna o keia huakai. Fea-wele oe e Kapena Lenoa.”

            I keia wa a Ilamuku Betia e haawi nei i ke kauoha ia Gaperiela a hoopuka ae la i kona inoa no ka manawa hope loa, ua wehe ae la ua lede hoohanohano la o ka Emeperesa i kona uhi-maka a kiei mai la mawaho o ka ipuka-aniani, oia ka manawa i hoohalawai hou ia ai o ko laua mau helehelena he alo a he alo, mawaena o ua kaikamahine opio ui la me Gaberiela.

            Ua like ko laua mau puuwai i kela wa, me he mea la, ua hoohaku’i ia e ke koikoi o kekahi mea kaumaha, a ua holu koke ae keia mau noonoo iloko o ke kaikamahine opio,-

            “O ke koa kiai no keia i hoike mai i ke ano hoomahie ia’u i kekahi ahiahi ma ka ipuka o ka halealii o Diana, a i lawe aku ai hoi i kela pua rose o ka hoao i kona kupaa ma kana oihana.”      O oe no keia e ua kaikamahine opio nei i haawi mai ai i kela nanaina oluolu o ka hoohie ia’u ma ka ipuka o ka halealiio o Diana,” wahi a Gaberiela i puana malie ae ai iaia iho. “Eia au ke lawe nei ia oe ma keia huakai no ka hoohui ia o kou lima akau me kela keikialii o Pesetama, ke kanaka au i makemake ole ai e loaa ia oe ka noho oluolu ana, a’u hoi e olelo ae ai, -o ko’u enemi ino loa ia maluna o ka ili honua. Mai keia hora aku, ke hooholo nei au ia’u iho, e hoao ana au ma na ano a pau ke kulike na ouli au i hoike mua mai ai ia’u, -e hoohoka loa aku ia Perusia i ka wahine ole.”

            Ma keia wahi o ko kakou moolelo e ka mea heluhelu, akahi no kakou a hoea pono mai i kahi a kela poo e kau ae la maluna-“Ke Kukala Kaua a Perusia no kekahi Wahine.” O keia ka wahine, a o keia ke kukala kaua e puka aku ana ma keia mau helu ae, a o Gaberiela Lenoa ke kanaka nana i hookahuli i keia papa kuhikuhi hoolala ke ua a Napoliona i ake nui ai e loaa iaia ka lanakila hiwahiwa ma@a@o o na pakaua o ke kulanakauhale o Viena.

O ka makemake nui o ka Emepera, o ka hoohui aku ia Farani me Perusia iloko o ke apo lima akau o hookahi koko, oia hoi ka mare ana o ka lede hoohanohano Ineza de Rila me kela keikialii o Posetama, i kumu e paa a e kohi ia ai kela mana lahui ihope a hiki i kona wa e lanakila ai maluna o Auseturia i keia kaua.

O ua keikialii la o Perusia, aia oia malalo o ke aloha pupule wahine i ua kaikamahine la, a e haawi no oia i ke kalauna o kona nohoalii i na mea a pau a Napoliona e kauoha mai ai, a pela wale iho la no ka Emepera i makemake ai e hooko koke ia keia mare mawaena o na aoao elua.

No ka hoole o ua kaikamahine la, aole loa oia e ae e mare i ua keikialii nei, ua kauoha ia aku ua kaikamahine la e ka Emepera e hiki kino aku oia maluna o ke kahua kaua, a oia keia e hoouna ia nei malalo o ka ikaika o na koa no ka hoomare ana i ua keikialii la o Posetama, ka hooilina kalaunu hoi o ke aupuni o Perusia.

 

KA HUAKAI NO BERELINA

 

Ua haalele iho la lakou nei i ke kulana hoomaha o na pualikoa Farani ma ke kahua kaua i ua ahiahi la, a ka@e aku la ka lakou huakai ma ke alahele no ke kulanakauhale o Berelina. O ka mahele koa ukali a hele pu nei, ua hoolaukanaka ia lakou oiai ma ke ala nui, a ua homau ia keia hele ana i ua po la a hiki i ke kakahiaka, komo aku la lakou iloko o ka palena o na okana aina o Perusia.

E like me ke ano mau iloko o ka wa kaua, ua hoonoho ia na koa kiai ma ke poo o na alanui e komo aku ana iloko o kela a me keia okana aina, pela lakou nei i halawai aku ai me kekahi mahele koa kiai, a oia ka ke kapena o ka puali i pane mai ai i ka olelo kauoha,-

“E ku aku malaila @ O Perusia keia, a aole i ae ia na koa Farani e hehi maluna o kona lepo.”

Ua kauoha koke ae la o Gaberiela i na koa ukali e ku, a hele aku ia oia e halawai me ke kapena o ua puali nei, me ka pane ana aku-

“No keaha mai ko makou kumu e ku ai? Aole anei he kuikawa na okana aina o Perusia?

“Eia au malalo o ke kauoha mai ka mea kiekie ka Moi o Perusia, e kipaku aku i na koa Farani a pau e hehi ana maluna o kona lepo, ma o ka Napoliona hana hoohaahaa i ka hanohano o ka mea kiekie ke keikialii o Posetama, ka hooilina o ke kalaunu.”

“A eia au malalo o ke kauoha no ka malama i ka maluhia o ke kino o ka wahine a ke keikialii o Posetama e male aku ai mai ka Emepera Napoliona mai,” wahi a Gaberiela i pane aku ai.

“Ina pela, he ano okoa ia e hiki ai ke hoololi ia ka mana o ke kauoha i keia manawa. E ae ia oe e komo mai iloko o Perusia nei me ka Madame, aole nae me keia kapa koa Farani ou e komo nei a me keia mahele koa ukali.” (Aole i pau.)