Ka Nupepa Kuokoa, Volume XXVIII, Number 44, 2 November 1889 — Page 1
| This text was transcribed by: | Jason Laskey |
| This work is dedicated to: | In memory of William Makuakane |
Ka Nupepa Kuokoa
KE KILOHANA POOKELA NO KA LAHUI HAWAII.
HOOLAHA LOIO.
N@@@@@ M. LOWREY.
Not@r@ no ka Lehulehu,
@@@@A HE@@@@@
@@@@ Hana me W. R. Kakela Loio @@@@ aoao makai o ka Hale Leta, Ho@@@@ 2241-3y.
C@@@IL BROWN.
@@A HE KOKUA MA KE KANAWAI?
h@ @@@@a Hool@io Palapala no ka Mokupuni o Oahu
@@@@ HANA: Ma alanui Kalepa.
tf.
E (AIKUE HIKIK@@@).
@@@ A KOKUA MA NA MEA A PAU E
PILI ANA MA KE KANAWAI.
E ohi ia no na Hila Aie, me kaawiwi
HILO HAWAII. 2114.1yr.
GEORGE P. KAMAUOHA.
Ho Loio a he Kokua ma ke Kanawai.
A HE MEA
ANA AINA.
E @@@a no ma kohala Akau, Hawaii
2001-1y
WILLIAM C. ACHI.
I @@@ a kakaolelo ma ke kanawai @@@a o na Aha a pau o keia Aupuni, a @@ @@@ka ma na waiwai paa.
Keena O@hana, Heiu 36 Alanui Ka@@ Honolulu, Oahu.
2241-3m
HALEKUAI BIBI HONOLULU
(H@@@W n. McCanlles.)
@@@ O A@NAUI MOIWAHINE. MAKEKE
MA ULAKO EO.
N@ @@@ @@mona, Hipa, Puaa me Ia, na la@@@@@ eo.
@@@ kauoha a na ohana a me na moku mai @@@koke ia no me ka eleu a me ka hiki@@@.
On@ holoholona ola no na moku e hiki no k@ @@@@ koke ia.
@@@pone Helu 212 2185-tf
WR. KAKELA.
@@@ A HE KOKUA MA KE KANAWAI
He Luna Hooiaio Palapala.
tf
PACIFIC HARDWARE COMPANY
Na hope o Dilinahama Ma.
Mau Mea Kuai Lako Hao
Alanui Papu Honolulu
WILDER & CO. (WAILAMA.)
Mea Kuai papa a me @@ lako kukulu kai @@@@@o a pau, a me na @@@@ pono a pau o ka hale.
Kihi Alanui Moiwahine me Papu
JAMES M. MONSARRAT.
(MAUNAKEA.)
LOIO A HE KOKUA MA KE KANAWAI
He Luna Hooiaio Palapala.
E hana ia no na palapala Kuai, Palapala H@@@malima, a me na palapala pili kanawai e ae ma ka olelo Hawaii. Dala no ka hoaie ma ka moraki ma na waiwai paa.
KEENA HANA: Hale Pohaku hou ma ka aoao ma Waikiki o ka Halewai. Alanui Kalena.
No ke Kuai.
E kuai ia aku i na poe e makemake ana he hale a me ka pahale ma Iwilei, Honolulu. O ka nui o ka hale, he 3 rumi nui me 2 rumi hihi, rumi nui o waena a me luna.
He hale kuke me auau, hale lio me kaa, a ua hoopuni ia ka pa me na kumulaau o na hua-ai.
Kua@ ia aku e W.C. Akana mai a P@u k, ma kekahi palapala i kakau ia i Feb. 27, 1882, a i kope ia ma ka buke 73, aoao 266-7, a mai a Akana i kuai ia aku ia J.M. Monsarrat, ma ka la 9 o Aperila, 1889. O ka palapala i kope ia, aia ma ka buke 112, aoao 420.
Koho. $1900.
F. ninau ia
J.M. MONSARRAT.
(Maunakea.)
Alanui Kalepa.
2247 tf
KE KIU PAHAOHAO
KA
Ipo Aloha o Parisa
A O K@
Ahi Lalapa o na La Inea o Farani.
He Moolelo Eehia no ke Au Uluku o Europa.
Mokuna 1.
KA HALE O M. AKEFOTA.
Farani! Iloko o na popilikia a me ka ehaeha kuhohonu!! Parisa! Iloko o na uluku manaonao o na kipona o ka poino!!
Iloko o Parisa e hookahua ia ai ka kakou moolelo.
Iloko o ka manawa pokole loa, ua hala aku la ua kaa nei, a komo aku la kela mau kanaka iloko o ka paa pani mai la i ka puka: a he mau minute mahope iho, ua ike ia aku la he kukui ma kekahi o na rumi - he kukui ulaula, a lele aku ia ka malamalama a hiki i kekahi aoao o ke alanui, aole no nae i huliua, ua pio koke iho la no.
I ka pio ana o ua kukui nei, ua puka aku ia he wahine i aahu ia me ka lole eleele, mailoko aku o ka hale o M. Epona. Hele aku la ia a hoea i ka puka, a luliluli ae la i na kaola me ka ikaika. Ua holo hou aku la he wahine okoa a loaa kela wahine mua, a pane aku la me ka leo mama:
"E akahele, e akahele e Madame, o lilo na mea a pau i mea ele!"
Ua ike hou ia aku la ke kukui mai ka hale iluna loa o kahi i kapaia o Le Rebou. He kukui bolu a pio koke iho la no.
MOKUNA II.
KA HALE O M. EPONA
Iloko o ka mahele o luna loa o ka hale o M. Epona - oia hoi ka rumi e huli pono ana ma kekahi aoao aku nei i ka rumi o Dolana Re - a iloko o ia rumi, he mau hana okoa kai ike ia i ka manawa a Pilipi De Vina i komo aku ai iloko o ko Dolana Re ma rumi.
Iloko o ia rumi, e holoholo pi-oo ana kekahi wahine, a ua punia ia ka uluku o kona mau noonoo maluna o kehaki mau leta ekolu ana e paa ana iloko o kona mau lima; a iloko o kona pihoihoi, e hoao ana ia e heluhelu i na manao o ua nfau leta nei ekolu i ka manawa hookahi: a mamuli o na mea ana i heluhelu ai iloko o ua mau leta la ke kumu i hoopioo ia ai o kona manao.
He wahine keia i hiki aku kona mau makahiki ma kahi o ke kanaha, o ke ano wahine nae e hoomaka aku ai ka ike ia o ka mohala a me ka hoomaka ana mai o ka ui a me ke kilohana o ke kino ke hiki aku i na makahiki o ka wahine makua. He wahine kino loihi a palahalaha kona umauma, a kilakila hoi ke kulana - he kapa Pelekane a hapa Paniolo kona koko - he wahine i noho ia e ka ui me na maka eleele ooi na lehelehe melemele pilipono, kelakela kona poo a maloeloe hoi kona mau keehina kapuai wawae - o keia mau mea a pau, e hoike mai ana aia iloko o kona puuwai ka manao paa, a he noonoo hoi i kuluma a i kamaaina i na ano loina lehulehu o na ouli o ka nohona o ke ao nei, a me ka mana o ka ikaika o ka manao.
O keia ae la mailuna a lalo, a mailoko a waho, ke kulana a Helene Vakala, ka wahine hana keaka kaulana i kamaaina ia e ka poe hanohano o Enelani a me Farani, a i makahehi ia hoi e ko Geremania a me na wahi e ae o Europa a puni.
He elua makahiki mamua ae o keia po a kakou e kamailio nei nona, ua hiki ae la ia ma Parisa, a i kona hiki ana i ua kulanakauhale kamahao nei, ua hoolimalima iho la ia i ua keena nei o luna o ka hale o M. Epona; a iloko o ka makahiki i hala ae, ua hoopahaohao ia ke ano o kana mau hana, kona hele ana mai ia keena aku no kekahi mau la, a hoi hou ae la, he mau mea i nune ia no ke ano e, i hoomaopopo ole ia hoi e na mea a pau, koe wale no kona wahine kauwa, nona ka inoa o Anete, ka mea nana e malama ua keena la ke nalowale kona haku wahine me ke ano pahaohao.
O ko Helene Vakala hoolimalima ana i keia keena ma kekahi mahele o ke kulanakauhale o Parisa i ike ia he mau kuono i noho ia e ka pelapela a me ka haumia o ka poe ilihune a kulana haahaa, ua lilo ia i mea nune a kamailio ia e kekahi poe lede e ae o ka oihana keaka; no ka mea, he wahine oia no ke kulana hanohano, ua nui a lawa ke dala iaia, a he mea hiki wale no hoi iaia ke hoolimalima i kekahi mau keena nani o kekahi o na hotele nui o ke kulanakauhale - aka, mamuli o kana mau hana ano e o ka hoi ana e noho ma kela kihi o ke kulanakauhale ua nanakee mai la lakou iaia, ua ano hookae mai la iaia, a aole hoi i kipa aku e ike iaia ma kona wahi noho.
Aka, na keia kumu hookahi no nae i nono ia Helene Vakala e hookaawale aku iaia ma kela wahi, a noho ai iloko o ka hale o M Epona.
He mau hana okoa kai loko o kona noonoo, aole hoi o ke kakaolelo wale ana me kona mau makamaka; ua kamoe ia kona mau noonoo a pau maluna o kekahi hana a kona puuwai i hooholo ai, mahope o ka waiho ana iloko o kona umauma no umikumamawalu makahiki, a i keia manawa, ua hoomaka ka a ana o ke ahi a ua wela hoi o loko ona.
Ua lehulehu ka poe i haohao no kona nalowale, ka ike ole ia hoi imua o ka lehulehu, no ka mea, he wahine kaulana o Helene Vakala a he noeau hoi ma na mea hana keaka, a he ui hoi i makahehi nui ia, a ua makaukau mau ka poe haku hale keaka e uku iaia me na puu dala nui no ka hele e keaka iloko o ko lakou mau hale keaka, ina o ka hoopuka wale ia no o kona inoa o ka piha koke no ia o ka hale keaka.
Pela iho la i noho mumule a mehameha ai o Helene Vakala mai ka lehulehu aku, no ka aneane e hookahi makahiki.
Aka, no kela mau leta ekolu, no hea mai a heaha hoi ko lakou ano? O keia mau leta ekolu kakou e ike nei ia Helene Vakala e heluhelu ana i loko o ua po eehia la o ka mahina a Aperila, ua loaa aku iaia i ka wa o ka la e napoo aku ana, ma ia ahiahi, mai kekahi kukini i hoouna ia mai i hoolimalima ia e ka poe na lakou i hoouna mai - hookahi mai Rovena mai, hookahi mai Vaseila mai a hookahi mailoko ae no o Parisa.
E ku ana o Anete, ke kauwa wahine ma kekahi kihi loa o ke keena, e nana pono ana me ka malie i kona haku a me kana mau hana. Ua maopopo pono iaia ka manao o loko o ua mau leka la, a nolaila, aole oia i hoohuoi a puiwa no ko Helene Vakala mau pihoihoi a ano uluku. Penei na olelo o ka palapala mua:
Rovena, Aperila -
Helene Vakala.
"Ua hauoli au i ka olelo aku ua holopono ka'u mau hana. He eha la i hala ae nei, ma Hanare o Vitoa Beremota - a i nehinei ma Rovena. Ano ua hala oia. Mamuli o kekahi palapala a'u i lawe malu mai ai kona pakeke ae oiai oia iwaena o kekahi puulu kanaka, e hoomaopopo iho ana oe o Parisa kona pahu hopu. Eia iho ua wahi palapala la:
Parisa, Dek - 18 -.
"E loaa ana ia Vitoa Beremota kana manu ma Parisa, ma ka helu -. Ru de Lataieta.
"O keia paha kau mea i makemake ai. O ko'u manaolana ia. A oiai e kali aku ana no na kauoha hou aku, owau no. Signo."
E alawa ae e na makamaka heluhelu i ka haiolelo Keneturia Makahiki a ka Rev JK Iosepa no ka piha ana o hookahi haneri makahiki mai ka hanau ana mai Rev H Binamu.
HE KAAO
-NO-
HAPAIKALA-
Hapaikamahina
KA HUA OHIA NANI
I LOAA MA KA
Piko Mauna o Farani
Ka Ui nana i Kakele ke
Aupuni o ka Lihilihi
o na Manu.
I Kokua ia e HULUPAINA kona Pokii.
Unuhi ia e Moss Ma'u
I ka lohe ana o kana moopuna i na olelo a kona kupunakane ua pane aku la oia:
E kuu kupunakane palupalu, ka makua hoi o kou lahui ponoi, ke olelo aku nei au ia oe me ka oiaio loa, mai makau oe no kekahi mea e hoopoino mai ana i kou aupuni a me oe, oiai, o na poino a pau loa e hiki mai ana ma kou aupuni nei, ua hiki ia'u ke ike a ua hiki ia'u ke kokua ia oe a me ke au puni, oiai owau ke kakoo ma konaoao a hiki i ka wa e lawe ia aku ai kou hanu ola e ke akua mana loa, a nolaila, mai kanalua a hopohopo nou iho, oiai, owau pu me oe i na wa a pau.
I ka pau ana ae o na olelo a ke koa opio, ua ku mai la ka olomana a pane mai la i kana moopuna, o ka wa hea la kou wa e haalele mai ai ia'u a me ko kaua aupuni?
Ua pane aku la ko koa opio, he elua o'u mahina i koe alaila o ko'u wa ia e haalele mai ai ia oe a me ke alo alii a me ke aupuni, a ia wa pu no hoi i hoo kuu ia ae ai ka walea ann o ke aloalii, a hoi aku la ke koa opio no kona home kakela.
A i ke kokoke ana mai o ka manawa a ke koa opio e haalele mai ai i na aekai o Perusia, a ia wa hoomakaukau mai ai na aumoku kaua no ka ukali ana aku hoi i ka huakai aumoana a huakai huli hoi a ko lakou haku alii no kona one hanau, a ua malama pu ia ae no hoi he maa papaaina hoohanohano no ka ike hope ana ia ke koa opio.
A i ka hiki ana mai i ka la e huli hoi ke koa opio, he la piha lealea ia no ke aupuni holookoa o Perusia, a ua hiki pu oe la hoi ke kaa alii ma kahi o ke koa opio i ukali pu ia e na pualikoa mahope.
I ka pau pono ana o na kahiko o ke koa opio i ke komo, ua hele aku la oia a kau iluna o ke kaa alii a naue aku la ka huakai no kai o ka uwapo kahi a na aumoku kaua e ku ana.
A i ka wa i hiki pono aku ai ke kaa alii i ka uwapo, ua haawi ia mai la he meu leo huro mai na makaainana mai, a oia hoi ka ke koa opio i wehe ai i kona papale a kunou aku la imua o na makaainana.
Ia wa i lele iho ai ke koa opio ilalo mai luna iho o ke kaa alii a oia noho i pii pu ae ai na hae iluna o ka huini o na kia moku, a e welo haaheo ana i ka ilikai ko lakou mau waihooluu like ole a pau.
Iloko o ia wa i naue aku ai ke koa opio a kau iluna o kona moku i ukali ia e kona kupunakane a me na lii.
A i ka pau ana o ka ike alii ana, ua huli hoi aku la na lii no ka uwapo a haawi mai la i ko lakou aloha no ke koa opio.
. I ka holopono ana o na mea a pau, ua haehae ia ae la ka lewa e ka leo o na pukuniahi e hai aku ana i ko lakou aloha i ka aina, a ia wa no hoi i naue palane@@ aku ai ka halelana o ua koa opio nei e oki ana hoi ka ihu o na moku i na ale ahiu o ka moana a he mau minute pokole wale no mahope iho @a nalo aku la ka halelana o ua koa opio nei iwaena o ke ehu o ke kai.
Oiai na aumoku o ke koa opio e nee ana imua a oia hoi ka ehiku o ka la, a i ke kakahiaka nui poniponi o ka ewalu o ka la, ua ike ia aku la na kuahiwi o Farani.
A i ka hookokoke ana aku o na au moku ma na aekai o Farani, ua ike ia mai la lakou e ke kulanakauhale holookoa
I ka hiki pono ana aku o na aumoku iloko o ke awa ia wa no i nakolokolo ae ai ka leo o na p@kuniahi no ka haawi ana aku i ke aloha ia uka o ka aina a na panai mai no hoi ka leo o ko uka mau pu i ko lakou aloha.
Me ka maopopo ole i ko uka poe heahu la ke ano o keia mau aumoku kaua nui hewahewa e komo aku nei iloko o ko lakou awa, e kii aku ana paha e kaua, a ua nui ke pihoihoi o na alii a me na makaainana.
A i ke kaalo pono ana ae o ka moku o ke koa opio mamua pono o ka pa pu i awa no i ike lea ia mai ai ka hae o ke koa opio.
No ka ike pono ia ana mai o ka hae o ke koa opio, nolaila ua hoohakui hou ia mai la ka leo o na pukuniahi, a i ka ka hookuu ana iho o ka leo o na pu kuniahi ua lohe pu ia aku la ka leo o na mea kani e uwe hone ana i ke kulu aumoe, me he la e i ae ana o ka haku opio o kakou ua hiki mai.
Ua holo loa aku la ka lohe a imua o ka moi ke aikane hoi a ke koa opio, a ua kauoha ae la oia i kona alihikaua e hoomakaukau ia ke kaa alii a holo aku no kai o ka uwapo, a e hoomakau pu hoi me na pualikoa no ke kii aku i ke koa opio.
Emoole ua makaukau ae la lakou a pau a naue aku la no kai o ka uwapo kahi a ke koa opio e kali mai la i kana aikane.
I ka hiki ana aku o ke kaa alii i kai, ia wa i lele iho ai ka moi ilalo a pii aku la oia iluna o ka moku ma kahi a ke koa opio e ku mai la.
Oiai ua moi nei i hiki ai iluna ua haawi ae la na aloha lulu lima o kamaaina a me ka malihini aukai.
I ka pau ana o ka ike ana o na alii ua iho aku la laua ilalo, a i ka ike ana mai o na makaainana ua haawi mai la lakou he mau leo buro, a ua haawi pu aku no hoi ke koa opio i kona mau makaainana a kau la no luna o ke kaaalii me kana ai kane a hao aku la ka ihu o na lio no ka paalii ka pahu hopu.
Ua malama ia ae he anaina ike alii i ka hiki ana aku o ke koa opio, a ua hala he mau hora o ka hoonanea ana no ka hai ana aku o ke koa opio i ke ano o kana huakai a me kona huli hoi ana mai.
I ka pau ana o na kamailio ana a ke koa opio, ia i ku mai ai ka moi a pane mai la.
Ia oukou e na makaainana, a ka la apopo alaila oukou ike i ke alii o oukou.
No ia mea, ua huli hoi aku la na makaainana no ko lakou home.
I ke koa opio e hoonanea wale ana no ua hu ae la kona aloha no kona mau makua.
Mahope iho o keia kani mai la ka bele aina a naue aku la na mea a pau maloko o ka rumi aina a haupa iho la i na mea a pau i hoomakaukau ia e na kuene.
A i ka piha ana o ka lua o ka inaina ua hui aku ia lakou maloko o ka rumi hookipa a nanea iho la a hiki i na hora o ke aumoe.
Ua hookuu ia ae la ka nanea ana a hoi aku la kela a me keia ma ko lakou mau rumi iho a pela no hoi ke koa opio i hoi aku ai ma kona rumi a hiolani aku la me Niolopua.
A i ke koa opio e hiolani ana, ia wa no i ike aku ai oia'i kekahi mau makani elua e paio ana i ka lewa a ia wa no hoi i puiwa ae ai oia no keia hana kupanaha i loaa ma kona wa e moe ana.
No keia mea kupanaha, ua kii aku la ke koa opio i kana pahu daimana, a wehe ae la a lalau iho la i kahi puke iloko o ua wahi pahu nei kahi e waiho o kona mau kokua, a pane iho la oia penei:
E ka ilio kupua Buhonabapela, ua makemake au ia oe e puka mai i keia manawa.
Ka Haiolelo Keneturia
A KA
Rev. J.K. Iosepa.
O HANA MAUI HI@, MA
Ka Luakini o Kawaiahao.
OKATOBA 30, 1889. NO KA 100
MAKAHIKI @
Rev. H. Binamu
E na hoahanau o ka Ekalesia o Kawaiahao a me Kaumakapili kahi a Rev H Binamu i ao aku ai i ka olelo a ke Akua, aloha oukou.
O ko kakou akoakoa ana i keia la, mamuli no ia o ko kakou hoomanao ana i ka la hanau o ka mea nana i hoomalamalama mua mai i keia lahui. Ua hanau ia oia ma Bennigton, ma ka mokuaina o Velemoneta, Amerika Huipuia, , ma ka la 30 o Okatoba, M.H. 1789, a hiki mai i keia la 30 o Okatoba, M.H. 1889, oia ka piha ana o ka hookahi haneri makahiki o kona hanau ana mai, na Mr. Calvin Bingham a me Mrs Ruth Post. Ua komo oia i ke kula nui o Middlebury College, M.H. 1813, a puka mai oia i ka M.H. 1816, a ma ia makahiki no, komo hou aku la oia i ke kula kahunapule o Andover a puka ma ka M.H. 1819, a ua poni ia oia no ka oihana kahunapule ma Sept. 29 o ia makahiki no. Ua mare ia oia me Mrs. Lydia Denton, ma ka la 11 o Okatoba o ia makahiki no.
E na makamaka, ua heluhelu oukou i ka moolelo o Henry Opukahaia a ma ona la i lohe ai o Rev H Binamu ma, o na paemoku o Hawaii nei ke noho nei lakou iloko o ka poeleele o ka naa po, aole i ike na kanaka i ke Akua ola, nolaila, ua ku ae o Rev H Binamu, Kakina a me Wini, a nonoi aku i ka papa Amerika, o lakou ke holo mai i Hawaii nei e hai i ka olelo a ke Akua, a ua ae ia mai lakou e holo mai. Ua haalele aku lakou ia Bosetona i ka la 23 o Okatoba, 1819, a kau ma ka moku kialua Theddeus, malalo o ka hookele ana a kapena Blanchard, a he mea pono e haalele aku kakou i kona moolelo ma keia wahi, oiai lakou e au mai ana i ke kai loa, a e huli ae hoi kakou e nana i ka moolelo o keia lahui ia wa. Ua heluhelu au i ka buke moolelo Hawaii i pai ia ma Lahainaluna, a eia no ia'u ia buke i keia wa, a ua lohe no hoi kakou i ka moolelo o keia lahui, no ka naaupo mai ko kakou mau kupuna mai he mui ka pouli o keia lahui, aole i ike i ke Akua ola ia Iesu Kristo ko kakou Haku. Ma ka hoohalike ana i ka poeleele o ia wa me ko keia wa, aole he like, ua like ka pouli o ia wa me ka ohu kokolo i ka mauna me ka nee e halii ana i ke kuahiwi. me ke kualau e uhi paa ana i ka moana, me ka po pouli nui i hele a aaki ka poeleele a nele i ke aiai ole o ka mahina, pela no ka poeleele o ka naaupo e uhi paa ana iluna o na paemoku o Hawaii nei, mai ke kanaka e noho ana iluna o ka paepae kapu o Liloa a i ka lopa haahaa loa e noho ana iloko o na hale pupupu e kani ai no ka i'e kuku, pela no ka noho ana o ko kakou iloko o ia au, "aohe no he loea i ka wai oopu," a me ke olowalu ana hoi o ka moa i ka wehena kai ao, mamua iho o ka moku ana mai o ka pawa o ke alaula o ke kakahiaka, a oili mai na kukuna wanaoa olinolino o ka la, pela no ka hiki mua ana mai o ka mea nona keia la a kakou e hoomanao nei, ma ka la 30 o Maraki, 1820, ma ke one o Kaiakekua i Kailua. Kona akau, ma Hawaii, ka aina i paa i ke mele ia e ko kakou mau alii, penei:
O Kona kai opua hinano ua malie
Hiolo na wai naoa a ke kehau
O kuu la koili i ke kai
Ke na'u la kamalii
Ke kohi la i ke kukuna o ka la
Pumehana wale ia aina
Aloha wale ke kini o Hoolulu.
A ma ka ae ana mai o Liholiho e noho lakou ma Hawaii nei e ao aku i na kanaka i ka ele@ a ke @@@ @@@ ia, ua ho@ @h@ ia o Ka@@a ma Kailua, ma Kona@@au Hawaii, a @ @@@@@ ma W@@@e. Kauai a o Rev H Binamu hoi ma Kawaiahao nei kahi a ka kou e akoakoa nei i keia la. Nolaila he mea pono ia kakou ke nana aku i hope i ka moolelo o ka lakou hana i hana ai iloko o na makahiki i @aahope aku nei.
I. Ka mana o ka Euaneho i hoolaha ia lakou, ma Hawaii nei iloko o ka makahiki 1820 a mahope mai.
II. Ka mahuahua nui ana o ka pono o ka Euanelio iloko o na makahiki i kaahope aku nei, a hiki mai i keia manawa.
III. Iloko o ka mahuahua nui ana o ka pono o ka Euanelio, aole e @ele kona mau enemi a me na mea e hoopi@ ana i kona malamalama.
IV. Na pomaikai i loaa mai ia ka kou mai keia Euanelio mai a Kristo a lakou i ao mai ai. E nana kakou ma ka manao mua, ka mana o ka Euanelio i hoolaha ia e lakou ma Hawaii nei iloko o ka makahiki 1820 a mahope mai.
Ua olelo ae nei au a e olelo hou aku ana no hoi, he au poeleele ko keia lahui mamua, mamua iho nae o ko lakou hiki mua ana mai, ua waele e ke Akua i ke alanui e komo ai kana olelo iloko o keia lahui, oia hoi, ua hoohui ia na mokupuni a pau malalo o ke alii hookahi oia o Kamehameha ka Napoliona o ka Pakipika, a mamuli o ka ae ana mai o Liholiho, oiai, ua make aku o Kamehameha kona makuakane, ua hoomaka aku lakou e ao i keia lahui ma ka pi-a-pa, a hiki ke heluhelu, ua ao ia aku keia lahui i ka Euanelio a ka Haku, o ka hoomaka no ia o na lii e huli i ka pono, a huli pu me na makaai nana, mahope mai o ka ainoa, ua ike oukou i ka moolelo o keia lahui i ke kaua ma Kuamooa make o Kekuaokalani malaila, o ka hoomaka no ia e hiolo na kapu Akua, na kapu o na kahuna na kapu o na 'lii, hiolo na kapu heiau, pau ko laila mau kii laau, ko ae la ka himeni a Rev H Binamu i haku ai, ma ka aoao 467 ma ka buke poepoe:
1
Auhea ka pono mau
E pono ai kakou
Auhea ka pono e ola ai
E imi pu kakou
I ke Akua mau
E pau na Akua wahahee
2
Na iala i hoopau
Ko onei mau kii laau
Pau pu na kapu o lakou
I keia wa maikai
Lohea ke kanawai
O ke Akua ola mau.
Aole me ka anoano o ka hua makeke, ka hua kulina, a me ka anoano o ka ipu haole kana i lawe mai ai, aka, me ka anoano o ka ke Akua olelo, i hoouna ia mai e ka mana o ka ua o ka Uhane Hemolele, i kanu ia iloko o ka naau o na alii, a me na makaainana o keia lahui, aole ma kona mana i huli ai keia lahui, aka, o kela mana o ke Keiki a ke Akua i kaulia ai ma ka puu o Kalavali, o kela hookahi wale no ka mana nana i hoohuli i ka mahakea o ka naau o na 'lii a me na makaainana. Ua ike oukou a o kakou no a pau, i ka haiolelo Iubile no ka Baibala a ko kakou Lunakanawai Kiekie, he nui a he koikoi ka lakou hana i ka unuhi ana i ka ke Akua olelo, he oiaio, he mana hana kai loaa ia lakou, a o ka holo o ka hana, aole, aia wale no i keia mana a'u i olelo ae nei, ua hooko lakou i ka olelo a ke Akua, oia hoi "e hele ae oukou e hoohaumana i na lahuikanaka a pau," a ua nana aku lakou i ka Solomona olelo "o ka mea hoohuli i na uhane, oia ke akamai, a o ka mea hoohuli i na lehulehu ma ka pono, e like auanei lakou me na hoku ia ao aku ia ao aku." Aole i pau loa na hoomana kii ia wa, aka, ua hoomaka nae e helelei a hiolo, a hiki mai nae i keia la, ua helelei a hiolo na kapu, a oia ka'u i hoomanao ae ai i keia mau wahi lalani mele:
Ua helelei hiolo ka pua o ka waimaka
Me he makamaka la no ka ua o Hilo
Ka hele no a kipa i Hanakahi
Akahi no la a ke aloha i hiki mai ai
Hiki mai ana i o kakou nei
Hookahi no luahi a ke aloha
O ko kakou hoomanao i keia la hanau o ka mea nana i hoomalamalama i keia lahui, aole lakou i manao nui no ko lakou pono wale iho no, aka, no ka
(E nana ma ka @@@ Eha)