Ka Nupepa Kuokoa, Volume XXVIII, Number 31, 3 ʻAukake 1889 — Page 1
| This text was transcribed by: | Sally Vrana |
| This work is dedicated to: | for William Makuakane, makuakane o Patrick |
Ka Nupepa Kuokoa
KE KILOHANA POOKELA NO KA LAHUI HAWAII.
BUKE XXVIII, HELU 31. HONOLULU, POAONO, AUGATE 3, 1889.
NA HELU A PAU, 2244
HOOLAHA LOIO-
NELLIE M. LOWREY.
Notari no ka Lehulehu,
a he:
Luna Hooiaio Palapala a me na Palapala Hoohiki
Keena Hana me W. R. Kakela Loio ma ka aoao makai o ka Hale Leta, Honolulu 2241-3y.
CECIL BROWN.
LOIO A HE KOKUA MA KE KANAWAI?
he Agena Hooiaio Palapala no ka Mok
kupuni o Oahu
KEENA HANA: Ma alanui Kalepa.
tf.
E. G. HITCHCOCK,
(AIKUE HIKIKOKI).
LOIO A KOKUA MA NA MEA A PAU E
PILI ANA MA KE KANAWAI.
E ohi ia no na Bila Aie, me ka awiwi
HILO, HAWAII.
2114.1yr.
JAMES M. MONSARRAT.
(MAUNAKEA.)
LOIO A HE KOKUA MA KE KANAWAI
He Luna Hooiaio Palapala.
E hana ia no na Palapala Kuai, Palapala Hoolimalima, a me na palapala pili kanawai e ae ma ka olelo Hawaii. Dala no ka hoa@e ma ka moraki ma na waiwai paa.
KEENA HANA: Hale Pohaku hou ma ka aoao ma Waikiki o ka Halewai, Alanui Kalepa.
WILDER & CO. (WAILA MA.)
Mea kuai papa a me na lako kukulu hale o na ano a pau, a me na me no pono a pau o ka hale.
Kihi Alanui Moiwahine me Papu.
PACIFIC HARDWARE COMPANY
Na hope o Dilinahama Ma.
Mau Mea Kuai Lako Hao
Alanui Papu Honolulu
GEORGE P. KAMAUOHA.
He Loio a he Kokua ma ke Kanawai.
a he mea
ANA AINA.
E loaa no ma Kohala Akau, Hawaii.
2091-1y
WILLIAM C. ACHI.
Loio a Kakauolelo ma ke kanawai imua o na Aha a pau o keia Aupuni, a he Boroka ma na waiwai paa.
Keena Oihana, Helu 36, Alanui Kalepa, Honolulu, Oahu.
2241-3m.
A ROSA. (AKONI.)
LOIO A HE KOKUA MA KE KANAWAI
He Luna Hooiaio Palapala.
KEENA HANA: Ma alanui Kaahumanu.
OLELO HOOLAHA.
Ke hoolaha ia aku nei ma keia, e kuai kudala ia aku ana na Lako Noho Lio kahiko o Kahumuile i waiho ia mai ia’u i Iune 25, 1888, no ka hoomaemae hou ana, ina e uku ole ia mai iloko o na la he 30 mai keia la aku o keia hoolaha.
GEO. Y. YARICK,
Wailuku, Maui, Mei 1, 1889.
2234-tf
HALEKUAI BIBI HONOLULU
(Hope o W@ McCandles.)
HELU 6 ALNAUI MOIWAHINE, MAKEKE
MA ULAKO KO.
Na Bibi momona, Hipa, Puaa me ia, na lako ai ulu & co.
O na kauoha a na ohana a me na moku mai e hooko koke ia no me ka eleu a me ka hikiwawe.
O na holoholona ola no na moku e hhiki no ke hooko koke ia.
Telepone Helu 212. 2185-tf.
Umeke Poi!
Umeke Poi!!
Ua loaa mai he mau Bakeke Umeke Poi o ke ano hou, i hawele ia me ke apo hao, i hawele ia me ke apo hao, a o ka ai e komo ana iloko o keia ano umeke, oia ka helu ekahi o ka mikomiko, aala a me ke onaona.
E kipa mai ma kahi o
KAKELA ME KUKE.
Alanui Moi. 2221-3m
NEDE NIKONA
ka
Puuwai Haokila a Hooko
Kauoha Poina Ole;
a o ka
Holapu Hope Loa
a ka
“ALABAMA,”
ke
Ahikanana a Puhipuhiahi
o ka Moana Atelanika.
“Elua Kupue@ o ka moana,
A na O I a e makau nei;
O ka Alabama me ka Senedoa,
I ka uhai loloa mai mahope.”
MOKUNA XXIII.
KE KAUA MOANA.
Mahope o ka ike ia ana aku o ka Alabama e hoopuka mai ana, ua hoomaka aku la o Kapena Winslow e hoopuka i kona moku a i ka hala ana o na moku elua he mau mile mawaho aku o ka palena i hookapuia no ke aupuni kuikawa, a ua halawai iho la na moho ke alo a he alo.
Ua hiki mai la ka manawa a Nede Nikona i iini nui ai, a ua ike iho la ia i ke kapalili o kona puuwai, me ka hauoli, no ka mea, ua loaa iaia na manaolana piha no ka lanakila.
Ua hoohiki oia e hoopiholo i ka Alabama, a e uku aku ia Kapena Semisa no kana mau hana ino, a ano, ua hiki mai ia manawa, a o kana hana wale no oia ka hooikaika e ko.
Oiai na moku elua e hoopuka nei, ua hoohuli ae la o Kapena Winslow i kona moku a holo pololei aku la no ka enemi; a aia no hoi o Kapena Semisa ke nana mai la, a i ka hiki ana aku o ke Kearsarge ma kahi o ka umikumamalua haneri i-a mai kona moku mai, ua kauoha ae la ia e haawi ia aku ka ukana o kona mau pu o kekahi aoao, a ike ia mai la ke ku ana o ka likini o ke Kearsarge.
I keia ki ia ana mai o na pu aoao o ka Alabama, aole loa i pane aku ke Kearsarge me kekahi pu hookahi; aka, ua hoomau mai la no oia no ka holo pololei ana no kona enemi, me he la e koi mai ana i ka Alabama e hui a e kaua he lima a he lima.
Aole nae i ike aku o Kapena Semisa i na kanaka o Kapena Winslow e kuku ana ma ka aoao o na pukuniahi, me ka makaukau a me na maka hulili, e ake ana e haawi mai ko lakou kapena i kana mau olelo kauoha e ae aku ia lakou e panai aku i na pu a ka enemi; aka, ua ku iho la ua liona aukai nei me ka pane leo ole, a me ka haka pono o kona mau maka i kona enemi.
Holo aku la ke Kearsarge a hiki i ka wa i kau like ai na moku a ielua he aoao a he aoao, a ma kahi o eiwa haneri kapuai ko laua kaawale, ia wa i lohe ia aku ai ka leo kauoha o Kapena Winslow, a owaka aku la na pu o ke Kearsarge me ka inaina nui.
I keia manawa i haehae ia ai ka lewa e ka leo o na pu o na moku a ielua e pehi ana na poka me ka ikaika i kela a me keia minute. Aole loa i kaohi iho ke Kearsarge i kona holo, aka, ua hoomau aku la no me ka ikaika, a hiki i kona kaalalo ana mahope mai o kona enemi, a ia manawa i hoomaopopo aku ai o Kapena Semisa i ka mea i manaoia a i makemake ia e kona hoa paio.
Ua hoao iho la o Kapena Semisa e alo ae i na hana akamai a kona hoa paio, aka, aole nae e hiki, a i ke kaa ana o ke Kearsarge mahope pono o ka Alabama, ua luai hou mai la ia i kona mau pu a naueue ae la na papahele o ka oneki o ua Alabama nei.
O ka manawa keia o ka hahana o ka paio, a ua maopopo iho la o ka hoomaka ana keia o na ai a ka ui e hiki ai i kahi o ka make a me ka poino o kekahi o laua, a i ole o ko laua poino pu ana paha.
He mino aka kai paani ae ma na papalina o Kapena Winslow i kona ike ana aku e kaapuni ana ka Alabama iloko o kekahi poai, a he ehiku haneri i-a ke kaawale mawaena o laua. I kela manawa he elima mile ke kaawale o ka Alabama mai @a aina mai, a ke noke mau nei ke Kearsarge i ka haawi i ka ukana o kana mau pu me ka nui o ka poino o kona hoa paio.
E huli ae kakou a e nana aku hoi ia Nede Nikona, ke kanaka opio nana ka olelo hoohiki e ukali oia i ka Alabama a hiki i kona piholo ana. Aia oia i keia manawa ke ku nei mahope o kekahi o na pukuniahi nui, a i na wa a pau o kana pu e kani aku ai, ua palau aku la ka poka me ka hoopoino nui ana i kona enemi, a ua hamama mai la na aoao me na hakahaka nunui.
“Eia mai na ukana o kuu kupua ke lawe aku la i kuu aloha ia oe e Pilipi Fale,” wahi a Nede Nikona me ka leo hauoli. “Ke lawe aku la na leo nakolokolo o na pu o ke Kearsarge i ka lono hauoli a lohe o Ruta, oiai oia e kali ana no ka hooho ae i ka leo hauoli o ka lanakila,” wahi hou ana.
O ka noonoo ana ae o Nede no Ruta, oia no ka mea nana i hoopiha ae i ko Nede puuwai me na pana o ke koa a me ka wiwo ole.
O ka hahana keia o ka paio ana, a he mau minute wale no keia no ka hoomaopopo ana i ka hopena—owai la? Ia wa, ua lele aku la he poka umikumamakahi iniha ke anapuni mai ka pu aku a Nede a pahu ae la iluna o ka oneki o ka Alabama, a luku ia iho la na mea a pau e kuku kokoke mai ana, a ia pu no hoi i hapai ia ae ai o Kapena Semisa a paki ia aku la me ka ikaika i ka palekai o ka moku mamuli o ka ikaika o ke olai o ke pahu ana ae o ua poka nei.
I kona ala ana ae, ua ninau koke ae la ia—“Auhea o Fale?”
“Aia ma ka aoao o kekahi o na pu,” wahi a ka pane.
“E hoouna mai iaia ianei,” wahi a ka pane a Semisa.
Maluna o na hiohiona o ua kipi nei, e kau ana na kukuna o ka inaina i piha i ka enaena.
Aole i liuliu hoea mai la he kanaka i hele a uliuli na maka me ka uwahi a ua wahi ia kona poo me kekahi hainaka, a ku iho la imua o Semisa.
“O Fale anei keia?”
“Ae, owau o Fale,” wahi a ua kanaka nei.
No kekahi mau minute i kau aku ai na maka enaena o ua Kapena la ia Fale, me he la e olelo aku ana mamuli o kana mau hana i kau aku ai keia poi no maluna ona, a pane mai la:
“O kau mau mea i hoike mai ai ia’u no ke kulana kaua o ke Kearsarge he wahahee; ua hoopunipuni oe ia’u no kekahi kumu lapuwale,” wahi a ua kapena nei.
“Aole, e Kapena Semia; ua kupaa au no ka aoao hema—“ wahi a Fale.
“Kupaa oe no na hana lapuwale,” wahi hou a ke kapena.
“E Lutanela Kela,” wahi hou a ke kapena, “e lawe aku oe i kela kanaka ilalo a e ki iaia me ka pu a make.”
Hikilele ae la ua o Fale a haalulu iho la.
“O ka’u kauoha paa ia e Kela; he mau hoike kana i piha me ka maalea. E lawe aku iaia,” wahi a ua kapena nei.
Hele mai la o Lutanela Kela e hooko i kana hana, a iloko o ia manawa ua lele hou mai la he poka mai ka pu mai a Nede a komo mai la me ka ikaika, lele liilii ae la na apana papa ma o a maanei, a iloko o ia minute, ua nui ka poino a me ka weliweli manaonao; aka, iloko o keia mau haawina, ua pakele aku o Kapena Semisa me kona lutanela me ka eha ole, a i ka mao ana ae o keia mau uluaoa, ua nana aku la laua i kahi a Fale i ku ai, aole nae oia, ua nalo.
“Ke ake nei au ua lawe aku la ka make a ka poka a ka Amerika i kona hanu hope loa,” wahi a ua kapena nei.
Ia wa ua hoomaopopo iho la o Semisa ua hala ka lanakila i ke Kearsarge, kauoha aku la ia e lu ia kekahi mau pe’a, a huli aku la ka iho o kona moku no ka aina.
HE KAAO
NO
HAPAIKALA-
Hapaikamahina
KA HUA OHIA NANI
I LOAA MA KA
Piko Mauna o Farani
Ka Ui nana i Kakele ke
Aupuni o ka Lihilihi
o na Manu.
I Kokua ia e HULUPAINA kona Pokii.
Unuhi ia e Moss Ma’u
A eia ka’u olelo ia oe, ina oe i hele i Perusia a i hiki oe ilaila, a i manao oe e hoi mai i keia po, mai hele oe no kekahi wahi okoa o loaa ia oe kekahi poino ma oe e hookuli i ka’u olelo.
Pane mai la ua keikialii nei i ka ilio, o kaua pu no hoi ha ka hele i Perusia?
Pane aku la ka ilio, owau o kaua ke noho e kiai i ka hale nei, oiai, mahope hoahewa mai kuu haku opio ia’u ke haalele i ka halealii nei, oiai, ua kauoha mai oia ia’u e noho e malama i keia wahi pahu uuku mahope aihue ia e kekahi poe.
Oiai, ua nui ka poe e makemake nei e kii mai i keia wahi pahu e kaili aku mai ke alo aku o kuu haku opio, aka, aole e hiki ke kii mai, oiai, eia no wau kana kauwa hoolohe ke malama nei i kana wahi pahu.
Nolaila, e hele oe i pau kou kuhihewa i ka’u mau olelo ia oe.
Iloko o ia wa i hele aku ai keikialii a noho pono iho la iluna o ka noho paipai a paa iho la kona mau lima ma ka aoao o ka noho a kahea iho la oia penei:
E ka huelo o Bulionababela, ka mea hoi i lilo i noho lele, e lawe oe ia’u no Perusia kahi hoi e noho ana kou haku opio a e lele malie kaua, a ua makemake au e hui maua me kou haku i keia po.
I ka pau ana o na olelo a ke keikialii o Inia, iloko o ia wa i pii malie ae ai ua noho nei a lele aku la i waho.
I ka ike ana o ke keikialii o Inia i keia noho lele, ua nui loa kona makemake, no ka mea, akahi no oia a ike i keia mea ano hou.
Ua lele aku la ke keikialii i ka lewa, iloko o ka pouli nui e aaki paa ana, a aole hoi i maopopo iaia kona wahi e hele nei.
Iloko o na hora elua, ua hiki aku la ke keikilii i ka hale kakela o ka kakou koa opio a e hoonanea ana hoi oia i ka heluhelu nupepa maloko o kona rumi hookipa.
Ia wa i hele aku ai ke keikialii a ku ma ka puka o ka rumi hookipa kahi a ke koa opio e noho ana.
I ka wa a ke keikialii i ku aku ai ma ka puka, ia wa koke no i ike mai ai ke koa opio i keia keiki e ku ana me na kahiko alii a kahea mai la ua koa opio nei e komo aku.
Komo aku la ke keikialii a hiki iloko me kona noho lele e paa ana ma kona lima a pane mai la ke koa opio.
Ia wa, ua haawi mai la ke koa opio i kekahi noho no ke keikialii a akahi no oia a ike pono mai o kona hoaloha no ka keia ke keikialii o Inia, a haawi mai la oia i kona aloha i ke keikialii a pela no hoi ke keikialii i panai mai ai i kona aloha.
A ia wa no hoi i pane mai ai ke koa opio penei:
Mama hoi keia huakai au e kuu alii, heaha ka pilikia o ka hiki ana mai imua o ke alo o kau kauwa nei, ina he huakai no ka pilikia, alaila, ua hiki no ia’u kauwa ke kokua aku ‘a oe ma na mea a pau loa au i makemake ai, a ina no hio aole he pilikia, oia iho la no hoi aohe kamaiao hou ana aku.
Ia wa i olelo aku ai ke keikialii o Inia, aohe pilikia i hiki ae imua o’u, a no ko’u makemake e ike pono i ka oiaio o kau mau olelo ia’u, a no laila hoi au i hele mai la.
Nolaila, ua ninau au i ka ilio keokeo a kaua i na mea e pili an ia oe, a ua hoike mai oia me ka oiaio no na mea a pau loa e pili ana ia oe, ‘a he alii kiekie loa oe maluna ae o ko’u kulana alii, a nolaila, mai hoolilo mai oe ia oe i kauwa na’u, a owau ke lilo i kauwa nau a mau loa aku, a i ole, e lilono oe i hoaloha no’u a hiki i ko kaua hopena na ka make e hookaawale ia kaua, oiai aole o’u makemake e lohe hou mai loko mai o kou waha e olelo ana, he kauwa oe a he alii wau, aole pela.
A no ko’u makemake e ike pono i kou kulano, nolaila, ua noi aku au i ka ilio a kaua e haawi mai i alanui no’u e hiki mai ai imua o kou alo, a ua hooko mai no ka ilio a kaua i ka’u noi iaia, a oia kela noho e waiho mai la, o kana alanui ia i haawi mai nei ia’u e hele mai e ike ia oe a pehea no la oe i huna ai imua o’u ua hele ae oe e hoomahua ia’u me kou kahiko weluwelu, a e hoike ana hoi kou wahi kahiko weluwelu imua o ko’u alo, he keiki oe na ka poe ilihune loa, pehea la oe i hana ai me ia, a ina paha he mau olelo lapuwale ka’u imua o kou alo, heaha la kau mea e hana mai ai maluna o’u.
I ka lohe ana o ka kakou koa opio i na olelo a ke keikialii, ua pane aku la oia penei:
Aole wau i manao e hana aku i kekahi mea pono ole imua ou, oia kuu kumu i komo ai i ka lole weluwelu o ka poe ilihune, a no kuu hilahila i kuu hoike aku i ko’u kulana imua ou, oiai, he alii oe, a no ia mea huna ai au i ko’u kulana imua ou.
Iloko o ia wa, akahi no a hoomaopopo ke keikialii o Inia i na olelo a ka ilio keokeo iaia maloko o kona halealii a ninau hou mai la ke koa opio i ua keikialii nei:
Auhea ka ilio keokeo a kaua me kahi pila?
Pane aku la ke keikialii, aia aku nei no laua a ielua i Inia, a o wau wale no kai hele mai nei e ike ia oe, no ko’u lohe ana i kou moolelo piha mai ka kaua ilio hoopono mai.
Ia wa, ua noho iho nei laua hoonanea a hiki i ke kani ana o ka hora umi o ka po, a pane aku la ke keikialii o Inia i ke koa opio i ka pane ana aku penei:
E oluolu oe e hookuu mai ia’u e hoi i ke aupuni a kaua, oiai, ua kani ka hora 10 o ka po i keia manawa.
Ia wa no, ua ae mai la ke koa opio i ke noi a ke keikialii o Inia.
Iloko o ia wa i haawi aku ai ke keikialii Henry Omeda i kona aloha i ke koa opio, a pela no hoi ke koa opio i naawi mai ai i kona aloha i ke keikialii o Inia.
I ka pau ana o ka laua kukai aloha ana, ua kau ae la ua keikialii Henry Omeda nei maluna o kona noho a pane iho la:
Ia oe e ka huelo o Balionababela, e lawe oe ia’u a hiki i ke aupuni o Roma i ike aku ai au i na makua o kuu wahine i nalowale.
I ka pau ana no o kaoa olelo ana, ua hao aku la ka mana o ka huelo o ka ilio kupua, a iloko o ka hora hookahi keia lele ana aku o laua, hiki aku la laua ma ka lanai o ka halealii o Roma.
Ma keia wahi e ka mea heluhelu, akahi no kakou a ike i ka hookuli o ke keikialii o Inia i ka olelo kauoha aka ilio iaia, oiai oia e hoomakaukau ana e hele no kana huakai i Perusia e like me ka mea i hoike ia ma ka helu mua e pili ana no kona poino ma oia e hele no kekahi wahi e aku, a na ke au hoi o ka manawa e hoike mai i kona hope na poino.
I ke ku ana o ua keikialii nei ma ka lanai o ka halealii, ua hele aku la oia aku ma ka puka o ka halealii, a e ala no hoi kona mau makuahonowai a me ka onana alii a pau.
Iloko o ka wa i ike mai ai na mea a pau loa i ke keikialii o Inia e ku ana ma ka puka, a he mea haohao loa hoi ia ia lakou.
Ia wa, ua komo aku la ke keikialii me kona noho lele a panee mai la kona makuahonowai i kekahi noho no kana hanona a noho iho la ua keikialii nei ma kona noho.
I ka noho ana iho o ke keikialii, ua hele mai la ka ohana alii e lulu lima pu me ke keikialii o Inia, a oia ka la kou i ninau mai ai:
I ka hora ehia ke ku ana mai nei o kou moku i ka uwapo?
Olelo aku la ke keikialii, aole o’u moku i holo mai nei.
Ninau mai la ka moi i ke keikialii o Inia, a pehea ka oe i hiki mai nei i Perusia nei?
Ia wa i kuhikuhi aku ai ke keikialii i ka noho paipai e waiho ana ma kona aoao, i ka i ana aku:
Maluna wau o kela noho i hiki mai nei i keia po, a o kela noho, he noho lele, ua hiki iaia ke lele ma na aupuni a pau loa o ka honua i ka po hookahi, oiai, he elua o’u hora i lele ae nei mai Inia a i Perusia, a he hookahi o’u hora i lele mai nei mai Perusia mai a hiki i Roma nei.
No ia mau olelo a ke keikialii, ua kaulona pono aku la na maka o ka oha naalii maluna o ka noho lele, a ua nui ko lakou mahalo i ka nani o ka hana ia ana, a ua manao hoi na mea a pau, he hoopunipuni na olelo a ke keikialii o Inia, oiai aole he eheu o ka noho e hiki ai iaia ke lele.
Mai a wai mai i loaa mai ai keia noho ia oe, wahi a ka nina@ a ka ohana alii.
Ia wa ua hoike aku la ke keikialii i na mea a pau e pili ana i ka noho a me kona loaa ana mai a me ka moolelo o ke koa opio mai ka mua a ka hope a me ka hiki ana aku o ke koa opio i Roma i ka po o laua i mare ia ai a me ka mea nana i aihue kana wahine a me kahi i noho ai.
I ka lohe ana o ka ohana alii i na olelo a ke keikialii, ua olelo aku la kekahi i kekahi:
Ua pupule ia paha ke keikialii i keia wa no ke aloha i kana wahine, oiai, he mau huaolelo olalau kana e hoopuka mai nei imua o kakou, ua like loa me ko Waolani poe.
No ia mea, pane aku la ke keikialii o Inia, ina aole oukou i hilinai i ka’u mau olelo i hoike aku nei imua o oukou, alaila, owai iwaena o oukou e hele a kau iluna o kela noho lele.
Iloko o ia wa i pane mai ai ka moi i ke keikialii, kahaha, mai ko’u wa i hanau ia ai a hiki i keia wa, aole wau i ike i kekahi noho lele i hiki iaia ke lele me kona eheu ole.
I ka lohe ana o ke keikialii i ka olelo a kona makuahonowai, ua pane koke aku la oia:
E hele kekahi o oukou a noho maluna o kela noho a’u i hoike aku nei ia oukou he noho lele, a e kauoha no wau iaia e lele kaapuni iloko o keia hale iloko o na minute elima, a ina oukou e ike i ka hooko ia ana o ka’u mau olelo, alaila, e manaoio mai oukou i ka’u mau olelo.
Iloko o ia wa i ku ae ai ke kaikunane ponoi o ka wahine a ke keikialii a noho iluna o ka noho a oia ka ke keikialii o Inia i pane @ ai i kona kaikoeke penei:
E paa ae a paa ma ka aoao o ka noho lele, a haule auanei oe.
Ua ae mai la kona kaikoeke a iloko o ia wa i kahea aku ai ua keikialii nei i kona noho.
Ia oe e ka huelo o Bulionababela, ka maua kauwa hoolohe hoi, ke kauoha aku nei wau ia oe e lele kaapuni oe maloko o keia keena iloko o na minute elima a hoi mai i pau ko lakou nei pohihihi nou, a e lele malie oe aole hoi e wikiwiki.
Iloko o keia manawa a ke anaina e noho nei, aohe wahi mea a puai wahi leo iki iwaena o lakou, a o ka leo o ke keikialii ka mea lohe ia, a e kali ana hoi lakou no ka oiaio o na olelo a ke keikialii.
I ka pau ana no o na olelo a ke keikialii, ia manawa no i pii malie ae ai ua noho nei a lele kaapuni ae la ia loko o ke keena o ka halealii a he mea pahaohao loa hoi ia i ka manao o ka ohana alii e noho ana.
I ka ike ana o ka ohanaalii i keia mea hou, ua hulo ae la lakou no ko lakou ike ana i keia mea kupanaha a lakou i ike ole ai mamua.
Ia manawa, akahi no lakou a manao io i na olelo a ke keikialii o Inia.
I ka pau ana o na minute elima, ua hoi mai la ka noho lele a pili ma ka aoao o ke keikialii o Inia.
Ia wa no i ku mai ai kona kaikoeke a kamailio mai la:
Laki maoli oe i ka loaa ana ia oe o keia noho lele, ua manao wau, ina he oiaio ka mea i kuhikuhi ia mai ia oe mai kou hoaloha mai e pili ana i kahi i noho ai o kou wahine, alaila, e pono paha kaua e hele e nana i kahi o k@u wahine i noho ai, a malia o ike aku ka ua iaia, ke hiki hoi kaua ke kau like maluna o ka noho.
Iloko ia wa i apono mai ai na mea a pau i na olelo a ke keikialii o Roma ke kaikoeke hoi o ke keikialii o Inia me ka lokahi.
I ka lohe ana o ke keikialii o Inia i na olelo a kona kaikoeke, ua pane aku la oia:
Aole paha kaua e hiki ana, aka, e hoao no paha kaua, ina he mea hiki, alaila o ka hooko ia ana no hoi ia o kou makemake a me a’u kou kaikoeke e ike i na helehelena o ka’u wahine, a ina hoi ha pela e hele oe e komo i lole nou a hele aku kaua.
Iloko o ia wa i komo aku ai ke keikialii o Roma maloko o kona rumi komo kapa a kahiko iho la i kona mau kahiko alii a pau.
I ka pau ana o kana kahiko ana, ua puka mai la oia a ku ana imua o kona kaikoeke, a pane mai la kona kaikoeke iaia nei:
Owau o kaua ke noho mua iluna o ka noho a maluna iho oe o ko’u mau uha e noho ai.
Ae aku la kona kaikoeke a hele aku la laua a noho iho la iluna o ka noho, a ia manawa no hoi i kahea iho ai ke keikialii i ka noho lele i ka i ana iho penei:
E ka huelo o Bulionababela, ua makemake au e lawe oe ia maua i ke kuahiwi o Roma nei i kahi o ka’u wahine e noho nei i keia wa.
I ka pau ana o keia mau olelo a ke keikialii, ia wa no i oili aku ai ka noho lele a lele aku la no ke kuahiwi.
Iloko o ka hapaha hora wale no keia lele ana aku o laua ua kokoke aku la laua i ua wahi nei.
Ia laua i hiki aku ai ma ka puka komo, ua lele iho la laua ilalo o hoomaka aku la e hele a ku ma ka puka, a no ko laua ano makau ua emi hou mai la laua i hope a kamailio iho la pehea la laua e hana ai i komo ai iloko.
Pane aku la ke keikialii o Roma i ke keikialii o Inia, o oe ke hele aku e kikeke i ka puka a ina e hemo mai ka puka, alaila, e hele mai kaua e kau iluna o ka noho a lele aku.
Ia wa i ae mai ke keikialii o Inia a pane mai la:
O kaua pu no hoi ke hele a kokoke i ka puka, i hemo mai no ia o ka puka, kau koke iho no kaua iluna o ka noho a lele aku kaua iloko, ina paha kaua e noho ana maanei, aole kaua e komo ana iloko, ike koke ia mai no kaua a o ke pani koke ia mai no ia o ka puka ia kaua.
I ka pau ana o keia mau olelo a ke keikialii o Inia, ua ae mai la kona kokoolua.
A keia pule ae e hoike aku ai makou i ke kii o ka lua huna o na powa.
(Aole i pau.)
HOOLAHA PALENA AINA.
Ua heluhelu ia a ua waiho ia ka palapala noi a ka Hui Mahiko o Onomea e noi ana e hooponopono ia na palena o ka Ahupuaa o Papaikou, ma Hilo, Hawaii, a ua waiho pu ia mai na hoakaka a me na kii o ke ana ia ana o ia aina.
Nolaila, ke hoike ia aku nei na mea a pau i pili, a i ka poe mea aina e pili pu ana, oia hoi, ka Hui Mahiko o Paukaa, na Kahu Malama Waiwai o Bernice Pauahi Bishop, na Komikina Aina Lei Alii, ia C. Afong, ka Hui Mahiko o Onomea, ia Enoka, Koko, a me ke Aupuni Hawaii, o ka
POAHA, AUGATE 15, 1889,
i ka hora 1 awakea, ma ka hale hookolokolo ma Hilo, Hawaii, oia kahi a me ka manawa i kohoia no ka hoolohe aku i ua noi la me na mea kue ke hoike ia.
F. L. LYMAN.
Komikina Palena Aina Mokupuni
o Hawaii, H. P. A.
Hilo, Hawaii, Iulai 18, 1889.
2242 3ts