Ka Nupepa Kuokoa, Volume XXVIII, Number 30, 27 July 1889 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

BUKE XXVIII, HELU 30.

HONOLULU, POAONO, IULAI 27, 1889.

NA HELU A PAU, 2243

 

HOOLAHA LOIO-

 

NELLIE M. LOWREY.

Notari no ka Lehulehu.

 

:A HE:

 

            Luna Hoolalo Palapala a me na Palapala Moohihi

            Keena Hana me W. R. Kakela Loio ma ka aoao makai o ka Hale Leta, Honolulu

            2241-3y.

 

CECIL BROWN,

 

LOIO A HE KOKUA MA KE KANAWAI?

no Agena Hoolalo Palapala no ka Mo

aupuni o Oahu

KEENA HANA: Ma alanui Kalepa.

tf.

 

E G. HITCHCOCK

(AIKUE HIKIKOKO).

 

LOIO A KOKUA MA NA MEA A PAU E

PILI ANA MA KE KANAWAI.

 

E ohi ia no na Bila Aie, me ka awiwi

HILO, HAWAII        2114.1yr.

 

JAMES M. MONSARRAT,

(MAUNAKEA.)

 

LOIO A HE KOKUA MA KE KANAWAI

 

He Luna Hoolalo Palapala.

 

            E hana ia no na Palapala Kuai, Palapala Hoolimalima, a me na palapala pili kanawai e ae ma ka olelo Hawaii. Dala no ka hoaie ma ka moraki ma na waiwai paa.

            KEENA HANA: Hale Pohaku hou ma ka aoao ma Waikiki o ka Halewai, Alanui Kalepa.

WILDER & CO. (WAILA MA.)

 

Mea kuai papa a me na lako kukulu hale o nu une a pau, a me na me na pono a pau e ko hale.

 

Kihi Alanui Moiwahin me Papu.

 

PACIFIC HARDWARE COMPANY

 

Na hope o Dilinahama Ma..

 

Mau Mea Kuai Lako Hao

 

Alanui  Papu  Honolulu

 

GEORGE P. KAMAUOHA.

 

He loio a he kokua ma ke Kanawai.

 

A HE MEA

 

ANA AINA.

 

E loaa no ma Kohala Akau, Hawaii.

2001-1y

 

WILLIAM C. ACHI.

 

            Loio a Kakaolelo ma ke kanawai imua o na Aha a pau o keia Aupuni, a he Boroka ma na waiwai paa.

 

            Keena Oihana, Helu 36, Alanui Kalepa, Honolulu, Oahu.

 

2241-3m.

 

A ROSA. (Akoni.)

 

LOIO A HE KOKUA MA KE KANAWAI

He Luna Hoolale Palapala.

KEENA HANA:       Ma alanui Kaahumanu.

 

OLELO HOOLAHA.

 

            Ke hoolaha ia aku nei ma keia, e kuai kudala ia aku ana na Lako Noho Lio kahiko o Kahamuile i waiho ia mai ia'u i Iune 25, 1888, no ka hoomaemae hou ana, ina e uku ole ia mai iloko o na la he 30 mai keia la aku a keia hoolaha.

 

 

GEO,. W. YARICK,

Wailuku, Maui, Mei 1, 1889.

2234-tf

 

HALEKUAI BIBI HONOLULU

 

(Hope o Wm. McCandles.)

 

HELU 6 ALANUI MOIWAHINE, MAKEKE

 

MA ULAKO KO.

 

            Na Bibi momona, Hipa, Puaa me la, na lako ai ulu & co.

            O na kauoha a na ohana a me na moku mai e hooko koke ia no me ka eleu a me ka hikiwawe.

            O na holo@olona ola no na moku e hiki no ke hooko koke la.

            Telepone Helu 212.     218@-tf

 

Umeke Poi!

            Umeke Poi!!

 

            Ua loaa mai he mau Bakeke Umeke Poi o ke ano hou, i hawele ia me ke apo hao, a o ka ai e komo ana iloko o keia ano umeke, oia ka helu ekahi o ka mikomiko, aala a me ke onaona.

            E kipa mai ma kahi o

                        KAKELA ME KUKE.

            Alanui Moi.     2221-3m

 

NEDE NIKONA

 

KA

 

Puuwai Haokila a Hooko

Kauoha Poina Ole;

 

A O KA

 

Holapu Hope Loa

 

A KA

 

"ALABAMA,"

 

KE

 

Ahikanana a Puhipuhiahi

o ka Moana Atelanika.

 

"Elua Kupueu o ka moana,

A na O I a e makau nei;

O ka Alabama me ke Senedoa,

I ka uhai loloa mai mahope."

 

MOKUNA XXII.

 

KUKAEPELE ME KE KAULA UWIKI

 

PAUDA.

 

            A iaia e nauki ana iloko iho ona, lohe aku la ia i ka pa o ka hoe iluna o ka ilikai a hoomaopopo koke iho la oia he waapa keia. Maopopo pu iho la no hoi iaia ua hoohoka ia oia, ua nele kana mea i iini a i ake nui ai.

            O kona make koke no ka hopena ina oia e loaa aku ana i kela waapa, a ike aku la ia i ka hauliuli ana mai o ua waapa nei, a o kona wa no ia i moe malie iho ai me ka hookuu ana i kona kino a pau iloko o ke kai, a koe wale ae no kona poo; a nana aku la ia a kaa lo ae la ua waapa nei a hala loa aku la imua me ka ike ole mai iaia nei.

            "Ano, o ka Alabama ka hopu," wahi ana; "a ke hoea mai ka manawa e paio ai, e hoike aku ana au e uku aku ana o Fale i kona poe enemi me ka hao.

 

MOKUNA XXIII.

 

KE KAUA MOANA.

 

            Ua pakele aku la o Pilipi Fale mai ka ike a na maka o ka poe o luna o ka waapa i alualu ai iaia, a ua au aku la ia no kahi o ka Alabama i ku ai, a he manawa mahope mai, ua hehi hou aku la ia iluna o ka oneki o ka Alabama.

            O kana hana hope loa no ka poino o ke Kearsarge, aole i ko; aka, ua lilo ia i mea nune iloko ona, pehea la i pahu ole ai kela rumi pauda, oiai, ua a ke ahi a ua holopono na mea a pau.

            Me he la, aia iloko o ia manawa, ua nana mai la na maka o ka palekana a ua hoopakele ae la i ka moku nona ka hae hoku me na molina kahakahana.

            Ua au aku o Pilipi Fale a mamao mai ka moku aku ana i hoao ai e hoopoino, ua maalo ae la kekahi o na luina ma ke ala olowi e hiki aku ai i ka rumi pauda, a iaia malaila, ua ike aku la kona mau maka i ke ahi e a ana ma kahi kokoke i ka rumi pauda, a lele aku la ia imua me ka mama a me ka piha pihoihoi a me ka leo nui oia i hooho ae ai me ka weliweli, a loaa aku la iaia ka uwiki pauda i waiho ia iho e ke kipi e a ana, ua kokoke e kaa ma kekahi aoao o ka puka, a ina e hala he elima minute i koe, ina la ua nalo ke Kearsarge mai ka ilikai aku; aka, aole nae pela ka mea i manaoia.

            He sekona wale no, ua loaa aku la ua uwiki nei i ka luina a kinai ia iho la a ia wa no hoi i holo ae ai ka lono ma na wahi a pau o ka moku me ka hikiwawe no keia mea weliweli, a ua holo aku la kela me keia no ko Fale wahi i hoopaa ia ai, aka ua lele aku la ka manu.

            "Ua lele aku la iloko o ke kai! E kuu koke i waapa a e hahai aku a hoihoi mai i ka lapuwale!" wahi a Kapena Winalow.

            A oiai o ka hoi ana mai la no hoi ia o Nede mamuli o ka hoopakele ia ana e Davida ma, ua kau hou aku la iluna o ka waapa a alakai aku la i ka poe i wae ia no ka hahai ana ia Fale; a hala ae ia he hora, ua hoi mai la lakou me ka loaa ole o ka mahuka

            "E oluolu e na pomaikai, e loaa aku oia a e hopu ia a paa ke piholo ka Alabama ia makou," o na huaolelo keia a Kapena Winslow i puana ae ai.

            A e piholo io ana anei ka Alabama iaia? E hiki io mai ana anei ia manawa? E waiho aku kakou na ka mooelo o ia paio moana e puana mai i ka haina.

            E hoomanao ae ana ka mea heluhelu, aia ma ka palapala a Kapena Semisa ia Kapena Winslow, e aa aku ana e paio, ua olelo aku oia e makaukau ana oia e kaua mahope koke iho o kona hoomakaukau ana i kona moku. Ua paa ko Kapena Semisa manao no ke kaua. Mamuli o kona hilinai piha i na olelo kuhikuhi a Fale no na mea e pili ana i ke kulana o ke Kearsarge, ua helu mua iho la ia no kona lanakila, a e loaa ana iaia he kulana paiena ole o ka hanohano.

            Ma ko Kapena Winslow aoao hoi, aohe ana mau hoomakaukau ana, no ka mea, ua makaukau mua oia, he mau mahina mamua aku, me ke ake e loaa ka Alabama iaia, a ano ua loaa, a nolaila, o ka paio wale no kana i ake nui ai.

            I kumu e pale ia aku ai ka poino o na poka a ka enemi mai ka aoao aku o ke Kearsarge, ua uhi iho la o Kapena Winslow i na aoao o kona moku me na kaulahao, a ua lilo ia i mau pale. Ua hana mua ia keia mea e Adimarala Faragata no ka hoopakele ana i ka ipuhao a me ka enegini o na moku, a ua hoohalike aku la o Winslow me ka hana a ka Adimarala.

            Mawaho mai o na pale kaulahao, ua uhi hou ia mai me na apana papa, a ke nana ia mai, aole e ike ia ke kaulahao, a ua kukala ae o Kapena Semisa he moku hao ke Kearsarge, me kona ike no aole he oiaio o ia mau olelo.

            O ka Kapena Semisa hoi i hana ai i mea e poino ole ai kona mau ipuhao, ua hoopiha oia i na aoao o kona moku me ka lanahu, he elua haneri me kanalima tona, a ke hui pu me na tona i kau mua iluna, ua komo iho la ka moku a haule haahaa iho la ilalo o ka ilikai

            Oiai keia mau hoomakaukau e hana ia nei no ka paio mawaena o keia mau moku, ua lawe ia aku la ka lono iuka o ka aina, a ua naholo mai la na tausani kanaka iloko o ke awa o Kebuga, a he mea hoi nana i hoopiha aku ia lakou me na manao pihoihoi.

            He kanalima mau makahiki i hala hope aku, ua hookui kaua hahana ae na aumoku o Farani me Enelani ma ia wahi, a ano, e halawai ana kekahi mau moku ikaika o na aoao kuee o Amerika no ka paio ana a hiki i ke piholo ana o kahi o laua, a i ole, o laua no a ielua.

            Ua puka mai la ka malamalama o ka la ma ke kakahiaka o ka la 19 o Iune, 1864, a pahola ae la me ka laelae malie maluna o ka aina me ka ilikai. He kakahiaka laahia ia, no ka mea, he Sabati ua la nei, a e kani poloai ana na bele o na halepule i ka lehulehu hele pule e akoakoa ae.

            Ua nui na kaamahu i lawe ae i kekahi poe lehulehu mai Parisa, a ua holo mai kekahi poe ma na moku mai kekahi mau wahi e ae no ka ike ana i keia kaua moana.

            Maluna o ka oneki o ke Kearsarge, e kuku ana kona poe, me na ohenana, a e kau ana ko lakou mau maka i kahi o ka Alabama e lana ana, a e puapuai ana ka uwahi mai loko ae o kona pu kauwahi, ua makaukau na mea a pau, a me he la, e kali wale ana no no ka Kapena Semisa kauoha.

            O ko kulana o keia mau moku elua oiai e lana haaheo ana i ka ilikai ia kakahiaka laelae, he nani a he kamahao, a me he la, aole he kaua kai upu ia, aka, aohe me e ae, oia wale no--he kaua aku ka hopena.

            A haiea ae la he manawa, ua ike la aku la ua puhipuhiahi nei e hoopuka mai ana, a mamua pono e holo mai ana he wahi moku kiakolu no kekahi haole Beritania o Lancaster kona inoa, a o keia kanaka, aia kona aloha a me kona mau iini ma ka aoao o ka poe kipi o ka Hema, a ua haalele aku oia i ua awa nei no kekahi hana i hoolapuwale i kona inoa mahope mai o ia manawa.

 

HE KAAO

 

__NO__

 

HAPAIKALA-

 

Hapaikamahina

 

KA HUA OHIA NANI

 

I LOAA MA KA

 

Piko Mauna o Farani

 

Ka Ui nana i Kakele ke

 

Aupuni o ka Lihilihi

 

o na Manu.

 

I Kokua ia e HULUPAINA kona Pokii.

 

Unuhi ia a Moss Ma'u

 

            Pane mai la ke kapena, e kali oe maanei a hiki mai au.

            Ua hele aku la ke kapena a hiki imua o ke keikialii, a hai aku la i na mea a pau a ke koa opio i olelo aku ai iaia.

            I ka lohe ana o ua keikialii nei, ua olelo mai la oia, e kii aku hol ha oe i ua keiki nei a hookomo mai iloko nei.

            Ae aku la ke kapena, a hele aku la oia a olelo aku la i ka kakou koa i ka i ana aku.

            Ua ae ia mai nei oe e komo, a e hahai mai mahope o'u a hiki imua o ko makou alii.

            Ua hele aku la laua nei a hiki ma ka rumi o ke keikialii, a ike mai la oia i ke koa opio, a haawi mai la i kona aloha, a pela no hoi ke koa opio i panai aku ai i kona aloha, a kaa e mai la ka ninau na ke kamaaina;

            Aia oe ihea o noho nei, a o hea kou aina hanau?

            Hoike aku la ke koa opio me ke ano hoopunipuni, aia ko'u wahi e noho nei ma kekahi aoao aku nei o kou aupuni, a o ko'u aina hanau, o Inia nei no.

            Pane aku la ke keikialii, ua kamaaina au i na mea a pau o ko'u aupuni nei, a aole hoi au i ike mua ia oe, he aupuni okoa paha kou e noho nei.

            Pane aku la ke koa opio, o kou mea i ike ole ai ia'u, no kuu hele kekahi i ka hana.

            Heaha kau hana, wahi a ke keikialii i ninau mai ai.

            O ka'u hana, he holo moku, a he sela moku au, a he holo ko'u moku ma na wahi a pau o ka honua.

            Ehia dala kou uku, wahi a ke keikialii i ninau aku ai i ke koa opio.

            O ko'u wahi uku, he elua dala o ka mahina, wahi a ke koa opio.

            Heaha ka loihi o kou holo ana iluna o ka moku, wahi hou a ke keikialii.

            Aole e hiki ia'u ke hoike aku i ka ka loihi o ko'u holo ana i ka moku, oiai he naaupo wau, aole hoi au i hoonaauao ia ma na mea helu, a o ka'u wale no i hoomaopopo ai, mai kuu wa uuku a hiki i ko'u nui ana ko'u hele ana i ka moku.

            A ua ano kuonoono paha oe i keia wa, i ninau hou aku a ke keikialii.

            Pane aku la ke koa opio, ua ano ma huahua no ka'u mau wahi kala, a ua kuai aku au i kekahi mau dala a'u i wa hi lio no'u a me keia wahi pahu uuku, a o ke koena, ua hoomaopo wau, ua lawa ia mau wahi dala no ka malama ana i ko'u wahi ola a hiki i ko'u make ana.

            Heaha ka waiwai o kena wahi pahu? wahi a ke keikialii.

            O ka waiwai o keia wahi pahu a'u i kuai ai, he hiki iaia ke hoolealea i na mea a pau e lohe ana i kona kani, a i kokua ia hoi e ko'u mau manamana lima, a no ko'u ike ana kekahi i kau olelo hoolaha no ka nalowale ana o kau wahine, a ua manao wau ua lilo kou mau noonoo maikai i mea inoino a oia ke kumu nui nana i kono mai ia@a e hele mai imua o kou ihiihi e hoonana aku ana au i ka'u wahi pahu imua o kou alo, aole paha e hala he hookahi hora, ua pau kou mau hoomanao ana no kau wahine, a e hoi hou mai no kou mau noonoo maikai e like me mamua, wahi a ke koa opio.

            E hookani mai hoi ha oe i ike aku hoi wau i ka maikai e like me kau olelo, wahi a ua keikialii nei.

            Ia manawa no i hiipoi ae ai ke koa opio i kana milimili mamua o kona mau uha a lawe kikoni palanehe ae la kona mau manamana lima maluna o na kaula moliolio o kana pila, a me kona leo hoi e kikiko'u ana maloko o na paia o ua haiealii ala, a o kana himeni e himeni ana oia no ke mele lahui o Inia.

            I ka lohe ana o ke keikialii i ke mele lahui o kona aupuni, ua nui loa kona hauoli, oiai akahi no ia a ike i keia ano pila a akahi no hoi oia a ike i kekekahi keiki leo nahenahe i mele aku imua ona.

            I ke kuu ana iho oka leo kani o kana pila, a i ka maha ana, ua himeni hou aku la oia i ke mele lahui o Farani me ka leo kuu i ka nahe.

            I ka lohe ana o ua keikialii nei i keia mele hou, ua nui loa kona lealea, a iloko o ia wa i auhee aku ai kona mau hoomanao ana no kana wahine i nalowale.

            Ia wa olelo hou aku la ua keikialii nei i ke koa opio, heaha kou uku ke ao oe ia'u i ka hookani ana i kena ano pila?

            Pane aku la ke koa opio, aole wau e kaki aku ana ia oe e ke alii no ke ao ana ia oe, oiai, o ko'u kumu no ia i hiki mai nei imua o kou alo no ke ao ana ia oe i keia mea kani, a he mea hoi e hoopau ai i na manao uluku iloko ou.

            E ao mai hoi ha oe ia'u, wahi a ua keikialii la.

            Ua ae aku la ke koa opio a kuhikuhi aku la oia i ke ano o ka hookani a hiki i ke ahiahi ana, a noi aku la oia i ke keikialii e hoi, a ua au'a mai la ua keikialii la e noho no laua malaila a e lilo laua i mau hoaloha a hiki i ko laua hopena, a e poni ia ke koa opio i keikialii no ka papa ekahi a Inia.

            Pane aku la ke koa opio, aole wau i hele mai imua o kou alo e ke ali@ no ka manao i na pomaikai e loaa ana mai ia oe mai, aole hoi no kou uku mai ia'u, a e oluolu oe e hookuu mai ia'u e hoi a ka la apopo e hiki hou mai ai au imua o kou alo.

            Pane mai la ke keikialii, me a'u hoi ha kahi pila a kaua a hiki hou mai oe i ka la apopo.

            Ae aku la ke koa opio, a haawi mai la oia i kona aloha i ke keikialii a pela no hoi ke keikialii i panai mai ai i kona aloha i ke koa opio, a pane mai la ke koa opio:

            Eia ka'u wahi olelo kauoha ia oe e kuu alli:

            Heaha ia manao ou e kuu hoaloha, wahi a ke keikialii i ninau aku ai i ke koa opio.

            Eia ko'u manao, ina e hiki mai imua o kou alo nei i keia manawa kekahi ilio nui keokeo, mai makau oe iaia, he kokua ia nou, a o na popilikia a pau loa e hiki mai ana imua ou, ua hiki loa iaia ke kokua ia oe, a o kona inoa o Bulionababela, he ilio hoolohe loa ia i ka olelo.

            Ae mai la ke keikialii i na olelo a ke koa opio a hoi aku la ua koa opio nei no kahi a kona lio e ku ana.

            I ka hiki ana aku o ua koa opio nei no kahi a kona lio e ku ana, ua pai ae la oia ma ka pepeiao akau o kona lio a kahea aku la penei:

            Ia oe e Bulionababela ka ilio keokeo o ke kuahiwi o Lepanona, ua makemake wau ia oe e puka mai oe iwaho nei i keia manawa.

            Iloko no o ia wa i oili mai ai kana ilio a ku ana imua o kona alo a pane aku la oia:

            Ia oe e Bulionababela, ke kauoha aku nei au ia oe e hoi oe i keia manawa maloko o ka halealii me ke keikialii, a me ia oe e noho ai e malama i kuu pahu daimana, a o na kupua a pau loa e makemake ana i kuu pahu daima na, e paio no oe no ka make a me ke ola, a o na olelo a pau a kuu hoaloha, e hoolohe oe a mai pakike.

            Ua kunou ma@ia ke poo o ua ilio nei, a hele aku ia oia no kahi o ke keikialii.

            Ua kau ae la ke koa opio maluna o kona lio a hoi aku la no ke aupuni o Perusia a ua hiki aku la oia no laila iloko o ka manawa pokole loa, a hoi aku ia no kona rumi a pela no hoi kona lio i hoi ae ai ma kona wahi mau i loko o ka buke.

            Maanei e waiho kakou no ke koa opio a e huli ae kakou no ke keikialii o Ioia.

            I ka hala ana mai o ke koa opio, ua nune nui ke keikialii no ke akamai o keia keiki ma ka himeni ana a me ka hookani ana i keia ano pila, a me ka nani pu kekahi o kona mau hiohiona, a iaia no e nalu ana, ua ike aku la oia i keia ilio nui keokeo i ke komo ana mai, a ua puiwa ae la oia, me ka manao ana, ina e holo mai ana oia e nahu, aohe ona wahi e pakele ai, a aohe no hoi ana pu e pale ae ai i kona make.

            A ua hele mai la ka ilio a moe mai la malalo o na wawae o ua keikialii nei me ke nahu ple mai.

            I ka wa a ka ilio i moe ai malalo o na wawae o ke keikialii, ua hoomanao ae la ua keikialii nei i na olelo a ke koa opio, a ninau iho la oia i ua ilio nei:

            O Bulionababela no kou inoa, wahi a kana ninau.

            I ka lohe ana o ka ilio, ua kunou ae la kona poo.

            Iloko o ia wa i noonoo iho ai oia iloko ona, he ilio akamai no ka paha keia i ke kamaiho kanaka, i kuu ninau ana aku nei i kona inoa, kunou mai nei no, a ninau hou aku la no oia:

            O kou haku no kela keiki i komo mai nei iloko nei?

            Ia wa, ua kunou hou mai la no ke poo o ua ilio nei.

            Ua ike no oe i kahi e noho nei o kuu wahine, wahi a ua keikialii la.

            Ua kunou hou aku la no ke poo o ua ilio nei.

            Aia oia ihea kahi i noho ai, wahi a ua keikialii la.

            Ia wa no i aoa ae ai ua ilio la a hoonaueue ia ae lo hoi ka halealii e ka leo aoa o ua ilio la.

            Ia manawa, ua ano makau mai la ke keikialii i keia ano hana a ka ilio.

            A ia wa no hoi i hoomaka mai ai ua ilio nei e kamailio kanaka maoli imua o ke keikialii i ka i ana mai:

            O kahi e noho nei o ko wahine, aia no i ke aupuni o Roma, aia nae la i ke kuahiwi, ua lawe aihue ia e ke keikialii powa Vabine, a he hookahi wale no mea e hiki e hele i ke kuahiwi o Roma e kaili mai i kau wahine, oia no ko'u haku opio i lilo iho nei i hoaloha nou; he keiki ikaika loa ia, a aole he lua ma ka honua nei e hiki e hoohaahaa aku i kona ikaika a me kona akamai a kona makuakane i ao ai iaia.

            I ka lohe ana o ke keikialii i na olelo a ka ilio, ua haohao loa oia i keia ilio i ka hiki ana iaia ke kamailio e like me ke kanaka, a no ia mea ninau hou aku la oia:

            Owai ka inoa ponoi o kou haku, kuu hoaloha hoi?

            Pane aku la ka ilio, o Keahi ka inoa o kona makuakane ponoi, ke keiki ponoi hoi a Meneti, a ua poni ia mai nei hoi oia e kana moopuna ko'u haku hoi i moi no Perusia, a he elua aupuni i lilo mai malalo o ka ikaika o ko'u haku, oia o Sekotia a me Perusia, a ua lohe no paha oe i kona moolelo.

            I ka lohe ana o ke keikialii i na olelo a ka iho e pili ana no ke koa opio, ua hoomaopopo koke iho la ia i na olelo a ke kuhina waiwai o Roma i olelo aku ai i ka moi o Roma i ka po o laua i maie ia ai e like me na mea i hoike mua ia aku ai.

            Ia wa, ninau hou mai la no ke keikialii i ka ilio, pehea, ua hiki ae no anei kou haku i ka po o maua i mare ia ai?

            I ka po o olua i maie ia ai, ua hiki aku no oia malaila, a oia no hoi ka oi ma ka hulahula i hookuku ai me kela keiki i akena ai oia ke akamai ma ka hulahula, a ua lohe no paha oe i kana mau olelo a ua hoomaopopo no paha oe iaia, wahi a ka ilio i pane aku ai i ke keikialii.

            Ua ae mai la ke keikialii i na oielo a ka ilio me ka piha pahaohao.

            Ina ua ike oe i ke ano o ua keiki la, e hoomanao oe, o ka mea ia nana i aihue ko wahine, wahi a ka ilio.

            He keiki powa ia, a o kuu haku, no le oia i ike i ka aihue ia ana o kau wahine, oiai ua hoi mua oia no Perusia, a he nui wale aku na olelo a ua iho nei i kamailio ai me ke keikialii.

            A aia ihea i hoi aku nei kou haku, wahi a ke keikialii.

            Ua hoike mai la ka iho i ka ninau a ke keikialii, i ka i ana mai:

            Ua hoi aku nei no oia i kona halekakela i ke aupuni o Perusia.

            Pehea hoi oia i hiki e aku nei i Perusia, oiai, he mau mahina e holo ai ma ka moku alaila ku i Perusia, mai hoopunipuni mai oe ia'u, wahi a ke keikialii.

            Pane aku la ka ilio, aole ka hoi oe i lohe i ka'u mau mea i olelo mua aku nei ia oe, ne keiki oia i piha i ka mana a me ka ikaika, ua hiki iaia ke kaapuni i ka lewa a me ka honua iloko o ka manawa pokole loa, a ua hiki iaia ke hele mai Inia aku nei a i Perusia, iloko o na minute ekolu, a aia oia i keia wa iloko o kona lumi hookipa kahi i heluhelu nupepa ai, a oia no kuu mea i lilo ai i kauwa nana no kona ikaika, a ua hiki ia'u ke hooko i kana mau olelo e kamailio mai ai, a nana no hoi i kau oha mai ia'u e hele mai e noho pu me oe, a o kau mau mea a pau e olelo mai ai ia'u, e hoolohe wau, a oia kana olelo kauoha ia'u, a oia no hoi kou kumu i ike ai ia'u maloko o keia keena.

            I ka lohe ana o ke keikialii i na olelo a ka ilio, ua pane koke aku ia oia:

            E hooko koke anei oe i ka'u mea e olelo aku ai ia oe e like me kau i olelo mai nei ia'u?

            Ae, wahi a ua ilio nei i pane aku ai.

            Iloko o ia manawa i pane mai ai ke keikialii, e kuhikuhi mai hoi ha oe ia'u i ke alanui e hiki koke ai i Perusia e like hoi me kau olelo a'u ua hoi aku nei kou haku opio i Perusia?

            O keia mau olelo a ke keikialii i olelo aku ai imua o ka ilio keokeo, he mau olelo ia e hoohoka ai i ka ilio, me kona manao aole he oiaio na mea a pau a ka ilio i hoike aku ai iaia

            I ka lohe ana nae o ka ilio i na olelo a ke keikialii, ua luai mai la oia he pahi daimana mailoko mai o kona opu a waiho ana imua o ke alo o ke keikialii.

            Ua olelo aku la ka ilio Bulionababela imua o ke keikialii o Inia penei:

            Eia ka pahi daimana imua o ko kaua alo i keia wa, e lalau mai oe i keia pahi daimana a e oki ae oe i kuu huelo.

            A ina e moku, wahi a ua ilio nei i pane hou aku ai, alaila, e waiho aku oe maluna o kela pakaukau i kuu huelo, a e hahau iho oe i keia pahi daimana maluna o kuu huelo, a e kahea iho oe me keia:

            O ka huelo o Bulionababela, ka ilio keokeo kupua o ke kuahiwi o Lebanona, ua makemake au e lilo oia i noho lele, alaila, e ike koke no oe i ka oiaio o ka'u mau olelo ia oe, a o kou alanui ia e hiki aku ai i Perusia, kahi hoi e noho mai la kuu haku opio.

            Iloko o ia wa i hooko aku ai ke keikialii o Inia e like me na kuhikuhi a ka ilio iaia, a me kona ano hoomaloka no oia i oki aku ai i ka huelo o ka il@ o keokeo, me ka olelo iho o ua keikialii nei penei:

            Ua pono ka moku ana o ko huelo ia'u, he hoopunipuni oe ia'u.

            I ka moku ana o ka huelo o Bulionababela, ua lawe aku la ua keikialii nei a hookau iho la maluna o ke pakaukau, a ha@au aku la oia i ka pahi daimana me ke kahea pu ana:

            E lilo ka huelo o Bulionababela, ka ilio keokeo kupua i noho lele.

            Iloko o ia manawa i ike aku ai ke keikialii i kekahi noho maikai loa ana i ike ole ai mamua, e like ke ano me ka noho paipai.

            Iloko o ia manawa i olelo aku ai ka ilio keokeo, o hele paha oe e komo i kou lole i keia manawa.

            Ae, aku la ke keikialii a komo aku la oia ma kona keena kapa, a kahiko iho iaia me kona mau aahu o ke kulana alii o Inia.

            I ka pau ana o kona kahiko ana iaia, ua puka mai la oia a ku ana imua o ka ilio keokeo.

            Olelo aku la ka ilio keokeo i ke keikialii, e hele oe a noho iluna o kela noho, a e paa oe a paa, a e kahea iho oe penei:

            E ka huelo o Bulionababela, ka mea i lilo i noho lele, e lawe oe ia'u i Perusia, a ina oe e makemake e wikiwiki a e hele malie paha, ua hiki loa iaia ke hooko, wahi a ka ilio.