Ka Nupepa Kuokoa, Volume XXVIII, Number 28, 13 Iulai 1889 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

BUKE XXVIII, HELU 28.        HONOLULU, POAONO, IULAI 13, 1889.        NA HELU A PAU, 2241

 

HOOLAHA LOIO.

 

W R. KAKELA.

LOIO A HE KOKUA MA KE KANAWA

He Luna Hoolaiio Palapala.

tf

 

CECIL BROWN.

LOIO A HE KOKUA MA KE KANAWAI?

He Agene Hooiaio Palapala no ke Mokupuni o Oahu

KEENA HANA:  Ma alanui Kalepa.

tf.

 

E G. HITCHCOCK.

(AIKUE HIKIKOKI).

LOIO A KOKUA MA NA MEA A PAU E PILI ANA MA KE KANAWAI.

E ohi ia no na Bila Aio, me ka awiwi

HILO, HAWAII.

2114-1yr.

 

JAMES M. MONSARRAT.

(MAUNAKEA.)

LOIO A ME KOKUA MA KE KANAWAI

He Luna Hooiaio Palapala.

E Hana ia no na Palapala Kuai, Palapala Hoolimalima, a me na palapala pili kanawai e ae ma ka olelo Hawaii.

Dala no ka hoaie ma ka moraki ma na waiwai paa.

KEENA HANA:  Hale Pohaku hou ma ka aoao ma Waikiki

o ka Halewai, Alanui Kalepa.

 

WILDER & CO. (WAILA MA.)

Mea kuai papa a me na lako kukulu hale o na ano a pau,

a me na me na pono a pau o ka hale.

Kihi Alanui Moiwahine me Papu.

 

PACIFIC HARDWARE COMPANUY

Na hope o Dilinahama Ma.

Mau Mea Kuai Lako Hao

Alanui Papu Honolulu

 

GEORGE P. KAMAUOHA.

He Loio a he Kokua ma ke Kanawai.

- A HE MEA -

ANA AINA.

E loaa no ma Kohala Akau, Hawaii.

2001-1y

 

WILLIAM C. ACHI.

Loio a Kakaolelo ma ke kanawai imua o na Aha a pau o keia Aupuni,

a he Boroka ma na waiwai paa.

Keena Oihana, Helu 36, Alanui Kalepa,

Honolulu, Oahu.

2241-3m.

 

A ROSA. (AKONI.)

LOIO A HE KOKUA MA KE KANAWAI

He Luna Hooiaio Palapala.

KEENA HANA:  Ma alanui Kaahumanu.

 

OLELO HOOLAHA.

Ke hoolaha ia aku nei ma keia, e kuai kudala ia aku ana na Lako Noho Lio

kahiko o Kahamuile i waiho ia mai ia'u i Iune 25 1888,

no ka hoomaemae hou ana, ina e uku ole ia mai iloko o na la he 30

mai keia la aku o keia hoolaha.

GEO. W. YARICK,

Wailuku, Maui, Mei 1, 1889.

2234-tf

 

HALEKUAI BIBI HONOLULU

(Hope o Wm McCandles.)

HELU 6 ALANUI MOIWAHIE, MAKEKE MA ULAKO EO.

Na BNibi momona, Hipa, Puaa me la, na lako ai uhi & co.

O na kauoha a na ohana a me na moku mai e hooko koke ia ao me ka eleu

a me ka hikiwawe.

O na holoholona ola no na moku e hiki no ke hooko koke ia.

Telepone Helu 212.

2185-tf

 

Umeke Poi!

Umeke Poi!

Ua loaa mai he mau Bakeke Umeke Poi o ke ano hou,

i hawele ia me ke apo hao, a o ka ai e komo ana iloko o keia ano umeke,

oia ka helu ekahi o ka mikomiko, aala a me ke onaona.

E kipa mai ma kahi o

KAKELA ME KUKE.

Alanui Moi.

2331-3m

 

NEDE NIKONA

- KA -

Puuwai Haokila a Hooko Kauoha Poina Ole;

-A O KA -

Holapu Hope Loa

- A KA -

"ALABAMA,"

- KE -

Ahikanana a Puhipuhiahi o ka Moana Atelanika.

"Elua Kupueu o ka moana,

A na O-I a e makau nei;

O ka Alabama me ke Senedoa,

I ka uhai loloa mai mahope."

 

MOKUNA XX.

PAKELE MAI POINO.

     Ku malie iho la ko Davida puwai, a holopuni ae la na noonoo awiwi iloko o kona poo.

     "E eli ana keia poe i luakupapau, a no wai?  Aohe mea e aku no Nede wale no.  Ua pepehi iho nei ka paha lakou iaia?  O kela pane a Winslow ka mea nana i hoawiwi i na enemi e hooko i ka lakou mau olelo."

     A oiai keia e nana ana me ka pee, ike aku la oia he ekolu kanaka i ka puka ana mai, a pani aku la i ka puka a ki hou aku la mawaho nei, a pane ae la kahi mea o lakou:

     "E paa he elua me na kipikua a me na kopala, a o ke kolu me ka ipukukui hele po."

     Hoomakakiu pono aku la o Davida ia lakou me he popoki la, a i ko lakou hiki ana ma ke kihi akau-hikina o ua pa nei, ia manawa oia i alu hope aku ai a loaa kona poe kanaka, a kuka ou iho la lakou:

     "O ke ki o ka ipuka ka mea nui," wahi ana i kona poe.

     Ke hoomaka ia mai la e eli ka lua kupapau o Nede Nikona, a ke pana ikeika nei ka puuwai o na kanaka Ame rika me ka piha i ka hae a me ka wela inaina.

     Me ka nehe malie ua Davida nei i kokolo aku ai me kona mau ukali a ko koke ike moakaka aku la lakou nei i ua poe nei.

     "ia'u ka mea me ke kukui," wahi a Davida, a mai hoopakele oukou i kekahi mau kanaka iho; o ka lanakila o Nede a me ka molia i ko kakou ola e kupaa no ko kakou aina, oia ko kakou hoku hoolana. Imua e na hoa!"

     Me he mau tiga ala lakou i lele aku ai me ka mama a me ka ikaika, a iloko o ka imo ana a ka maka, e waiho ana na kipi i ka honua; ua loaa aku la ia lakou na haawina e waiho ai iloko o ka maule no kekahi manawa.

  O ka mea mua loa a Davida i hana ai, oia kona huli ana i ke ki o ka hale iloko o ka pakeke o ke kanaka nana i pani ka puka a ke aku ai mawaho nei, a pane ae la:

     "Kamahao ko kakou lanakila e na hoa; aka, eia aku o ka hana nui koe.  E hauhoa kakou i keia poe a paa i ke kaula a hoolei aku ia lakou iloko o ka lua a lakou i eli iho nei no Nede."

     I ka puka ana o ka olelo kauoha a Davida, ua hooko koke ia aku la ia me ka eleu, me ka hahao ia o na waha i na apana welu i hiki ole ai la lakou ke kahea ae.

     "Ano, e hele kakou i ka hale, a me he la, ilaila e ki ai ka kakou mau pu, a ke haawi au i ke kauoha, alaila, e hoomaka e ki i ka oukou mau pu me ke kaulua ole, a e hoopololei i ka oukou mau poka mai hoohala."

     Hele aku la lakou no ua hale nei, a wehe malie aku la o Davida i ua puka nei, a me ka ipukukui hele po i loaa mai la ia lakou, hoomaopopo iho la keia he rumi pouli, a eia hou aku no ua rumi, hele aku la alkou a loaa ka puka o ia rumi, aohe laka o ia puka, he kilou wale iho no ka mea i paa ai.

     I ko lakou hiki ana i keia puka, ku malie iho la lakou a hoolohe.

     "Aole e nele ana ka lelele o Kapena Winslow i ka huhu a me ka nuha ke lohe aku ua hooko kakou i ka kakou mea i olelo ai," wahi a kekahi leo i pa e mai ai mai ua rumi nei.  "He mea maopopo nae e li ana oia ia Fale."

     "Pele ia no ka hoi paha; e li ana oia ia Fale," wahi a kekahi.

     A ninau aku la lakou i ka elele, pehea la ko Winslow ano i kona wa i halawai aku ai me ia.

     "Ua like me kekahi iona hae," wahi a ua elele nei.

     "O ko Kapena Winslow ano iho la no ia.  Aohe manao ana ae e ola o Fale.  He makehewa ko kakou kali ana a ka hora 10 o kakahiaka.  Ua makaukau ka lua o kahi Amerika, i aha ai ke kali ana.  He hana ka kakou o kakahiaka," wahi hou a kekahi.

     "Alia - e pepa mua kakou a pau keia kemu," i pane hou ae ai kekahi.

     Maopopo iho la ia Davida ma, e pepa ana ka ua poe nei, a ke lohe nei e olelo ai, aole nae o lakou nei ike lihi aku i ka poe o loko.  He mea hiki ole ia lakou ke hoomaopopo aku i ka nui o ka poe o loko, aka, aole ia he mea nui; ua hele aku lakou no ka hoopakela ana ia Nede, ina o ko lakou make ka hopena.

     Pau ae la na kamailio ana a ua poe nei no Nede a me Kapena Winslow, a hoomaka aku la ka pepa ana.

     O na kamailio e pili ana i ka pepa ka Davida ma e lohe aku nei.  A hala ae la he manawa liu wale, lohe aku la lakou nei i ka nakeke o na noho, a he hoike hoi ia ua pau ka pepa ana a ua poe nei.

     "Hooholo ia aku ke kaula iloko o kela puka o luna o kaupoku," wahi a kekahi leo kauoha; a na'u e kii ae i ke pio.

     Lohe ia aku la na kapuai wawae, a hoomaka aku la na kanaka o Davida e koi iaia e komo aku iloko o ua rumi nei.

     "E hoomanawanui e o'u mau hoa, na'u e haawi aku i ka hoailona ke hoea mai ka manawa kupono," wahi a Davida i hawanawana aku ai.

     Hala ae la he mau minute, halulu mai la na kapuai wawae o ka mea i kii aku ai i ke pio, a komo mai la iloko o ka rumi a lakou i hoomakaukau ai i ke kaula.

     "Ua hana hookano a hoowahawaha mai nei ko kapena i ka makou palapala." i lohe aku ai o Davida me kona poe ukali i kekahi leo.

     "A ua paa ko makou manao e hooko aku i ka makou mea i hooholo ai.  E li ia ana o Fale mamua ae o ka hora 10 o kakahiaka, he mea ia i maopopo e like me ka puka ana mai o ka la i ke kakahiaka, he mea ia i maopopo e like me ka puka ana mai o ka la i ke kakahiaka.  A e Nede Nikona, ua hoea mai kou manawa.  E molia ana makou he ola no ke ola.  ua makaukau anei oe?"  wahi hou a ke kanaka nona keia leo kamailio a Davida ma e hoolono nei.

     Aole loa i hookaulua ia iho ka Nede pane, aka, i ka wa i haawi ia mai ai ka ninau, o ka wa no ia i loaa koke aku ai o ka pane: a wahi a ua Nede nei:

     "ua maopopo mua no ia'u, aole loa e hiki i ka oukou mau hooweliweli ke hoaui ae ia Kapena Winslow mai ke alanui o kana oihana," a hoomaopopo aku la o Davida ma i ka leo koa me na huaolelo i piha i ka wiwo ole a Nede Nikona.  "Ua hauoli au ina e li ia ana o Pilipi Fale; a no'u iho, ua makau kau au e halawai me ko'u hopeno.  ua piha au i ka hauoli me ka haaheo e make mamuli o ka hae o ko'u aupuni.  O ke kanaka aloha i kona aina hanau, aole ona maka'u i ka mako.  Na kona kulana e hapai iaia maluna ae o ka makau a me ka hohe wale Hookahi wale no a'u mea e minamina nei," wahi a Nede.

     "A heaha ia mea?" i ninau ae ai kekahi.

     Oia ko'u ola ole i ike aku ai i ke piholo a..a o ka moku lapuwale-o oukou," wahi a ka pane.

     "Ina oe e ola no hookahi makahiki, aole loa oe e ike ia mea."

     Ike no wau, ua kamaaina au i ke kulana o ko'u moku a me ko'u kapena.  Ua ike au a kamaaina i ka ikaika o kona mau pu," wahi hou a Nede.

     Meha iho la na kamailio ana mahope o keia mau olelo a Nede. 

     "Ina ua makaukau oe, ua makaukau makou.  E hoike aku ana makou ia Kapena Winslow, ua hana paani oia me kanak makua E hoomakaukau i ke kipuka o ke kaula," wahi a ka leo o ke alakai o na kipi.

     Ia manawa no i lalau iho ai o Davida i ke kilou o ka puka.

     "Makaukau" wahi ana i kona mau ukali.  Na ka meha ana i hoike mai iaia ua makaukau kona mau ukali.

     He sekona mahope iho, huki mai la o Davida i ka puka me ka ikaika a hamama mai la, a me kona poe kanaka mahope ona, holo aku la lakou me ka ikaika e like me kekahi kikiao makani nui iloko o ka rumi.

     He mau leo puoho weliweli me ka hikilele kai puoho ae mai ka poe o loko, a kuiemi hope aku la na powa i ka lohe ana mai i na olelo kauoha a Davida i ka pane ana mai:

     "Ilalo me ka oukou mau mea make!  Eia makou imua o oukou no ka luku ana i na kipi a pau e hapai ana i na lima a e kahea ana paha i ka leo kokua E kau pono i ka oukou mau pu e o'u mau hoa.  I ko lakou manawa e hoao ai e kue mai, e haawi koke aku i ka ukana o ka oukou mau pu panapana.  E paio kakou no ka Akau ma na wahi a pau e loaa ai ka envim."

     I ka pau ana o keia mau olelo a Davida, hele aku la ia a wehe ae la i ke kipuka kaula e paa ana ma ko Nede a-i, a oki ae la i na hipuu kaula e paa ana i kona mau lima ma ke kua.  Ua hana ia keia mau mea iloko o ka imo ana a ka maka.

     Nana ae la ia a ike aku la, e paa ana kona mau kanaka he pu ma kela a me keia lima o lakou - he palua pu a ka mea hookahi - a ua kau ia i ka umauma o na powa; a pane aku la imua o ua poe nei:

     "Aole keia he nanaina koko no ke koko a he ola no ke ola.  E li ana o Kapena Winslow ia Fale, a e lawe pio ana i ka moku o oukou.  E haawi aku i ko makou aloha kakahiaka i ke kapena o oukou, a ke halawai pu kakou ma ke kahua mokomoko, e haawi aku no makou iaia i na mea oi aku o ka maikai o luna o ko makou home aukai."

     Aole i manao o Davida he manawa kupono keia e lawe pio ai i na powa, oiai, aole oia i makaukau no ia hana, a nolaila, ua hoomakaukau oia e huli hoi aku.

     Ua pakele iho la o Nede iloko o ka manawa o kona make, a ua ko hoi na kauoha a kona kapena.

     Me ke kau no o na pu i na powa, hoomaka aku la lakou e kuemi hope, a i ka puka ana iwaho, ua pani ia mai la ka puka o waho loa a paa ae la i ka laka iai.

     "Ano e na hoa, imua no na waapa," wahi a Davida.

     Me ka mama i lele ia aku ai ka pa mea kanu a haule aku la lakou mawaho, a e like me ka mama o ke dia pela lakou i holo aku ai a hiki i kahi o ka waapa e lana ana.

     Iloko o ka hoaa a me ke pihoihoi o na kipi, ua ulolohi loa lakou, a ua hala he mau minute, hoomaka mai la e alualu mahope; a i ko lakou hiki ana i kai o ka uwapo, aia ka waapa o Davia ke hoopuka la mai ke awa aku, a mai na kileo ae o kona muu kanaka i hooho ia ae ai na leo huro o ka hauoli a me ka haaheo.

     "Ke haawi aku nei au i ko'iu hjoomai kai ia oe e Davida no ka pakele ana o ko'u ola," wahi a Nede, me ka ialau ana aku i na lima o kona hoa a lulu iho la me na umii ana.

     "Ua hoomaka au e hooholo i ko'u manao no ka hoopakele ana ia'u iho, a aole nae hoi au i manao e hooko koke ana na kipi i ka lakou hana i keia po.  Nolaila, ua aie au no kuu pakele ana ia oe e kuu hoa wiwo ole," wahi hou a Nede.

     Huki aku la o Davida i kona lima me ke ano akahai, a pane mai la:

"Na ke kauoha a ke kapena a me keia mau kanaka, aole na Davida i hoopakele ia oe e kuu hoa."

     Ke niau haaheo nei ua waapa nei no ke Kearsarge, kahi hoi e hana ia mai la kekahi mea weliweli.

     A nolaila, e nee aku kakou a hiki i ko lakou hehi hou ana iluna o ka oneki o ua moku kaulana nei o ka Akau.

     (Aole i pau.)

 

HE KAAO

- NO -

HAPAIKALA-

Hapaikamahina

KA HUA OHIA NANI

I LOAA MA KA

Piko Mauna o Farani

Ka Ui nana i Kakele ke Aupuni o ka Lihilihi

o na Manu.

I Kokua ia e HULUPAINA kona Pokii.

Unuhi ia e Moss Ma'u

     I ka pau ana o ka hulahula, ua hoi aku la na mea a pau loa maluna o ko lakou mau noho e hooluolu ai no ia manawa hou aku e hulahula ai.

     I ka noho ana iho o na mea a pau, ua ku mai la ua keiki malihini nei a pane mai la:

     Ia oukou a pau loa e ka poe hanohano i akoakoa mai, ke ninau aku nei wau ia oukou, owai kekahi mea iwaena o oukou e aa mai e hookuku ma ka hulahula ana me a'u ma ke kumu pili ana e koho ai.

     I ka lohe ana o na mea a pau loa i na olelo a ua keiki nei, aole hookahi mea nana i aa mai e hookuku hulahula me ia, a no ka ike pu hoi kekahi o ka lehulehu i ke akamai o keia keiki ma ka hulahula.

     Ua nui na olelo ana a ua keiki nei, a aole nae he mea hookahi i ku mai iluna no ka hookuku ana me ia.

     A iloko o ia wa i ku mai ai ke koa opio iluna a pane mai la penei:

     Ia oe e ke keiki akamai ma ka hulahula, owau ka i aa e hookuku ma ka hulahula Aole o'u ike i ka hulahula, aka, ua makemake au e ike i kou akamai e akena ia nei e na mea a pau i ike ia oe.

     Iloko o ia wa kahea mai ai ua keiki nei i ke koa opio e hele aku e hookuku me ia.

     A iloko no hoi o ia wa i ku ae ai ke koa opio iluna a hele anku la mawaena o ka lehulehu e nonoho ana, a ku ana imua o ua keiki nei, a pane mai la ua keiki nei imua o ka kakou koa:

     Auhea ka hoi kou hoa e hulahula ai?

     Aole o'u hoa e hulahula ai, oiai he malihini wau; a ina paha he mea oluolu i kekahi o keia poe maka palupalu e nonoho mai nei i hoa hulahula no'u, ke ae hoi lakou i ka'u noi.

     A ia manawa no hoi i lohe aku ai ke koa opio i ka leo o kekahi kaikamahine opio i ka pane ana mai:  Owau ka mea i ae e hulahula pu me oe.

     I ka manawa i lohe ai ke koa opio i kela leo, ua hele aku la oia a lalau aku la i na lima palupalu o ua puukani la a kuikui hele ae la imua o ke anaina.

     A ia manawa pu no hoi i kii aku ai ua keiki malihini nei i kona hoa hulahula, ke kaikamahine hoi a ke kuhina kaua a kuikui hele ae la.

     I ka manawa a ka kakou koa opio e holoholo ana mawaena o ke anaina, ke nana pono mai la ka moi i keia keiki opiopio ana i ike ole ai mamua, a wahi ana iaia iho:

     Ua hele kaapuni ia e a'u na aupuni a pau, aole nae au i ike i kekahi keiki ui e like me keia, a ua hiki hoi ia'u ke olelo ae, aole hookahi ma ka honua nei a ma ka lewa paha e hiki e uhai aku a loaa kona nani, a ia manawa i huli aku ai oia a ninau i kana mau keiki a me kona ohana, i ka i ana aku:

     Ua ike mua no anei oukou i kela keki nona na hiohiona nani a'u e ike nei?

     Huli like mai la ka ohana alii a pane mai la

     Aole makou i ike, no hea la kela keiki, me he la paha he keiki oia na ka poe waiwai.

     Ma keia wahi e na makamaka heluhelu, e waiho kakou i ka ohana alii e nune ana, a e huli ae kakou a nana aku no na hana hulahula.

     Oiai lakou nei i hiki pono aku ai i kahi i hookaawale ia no ka hulahula, ua ulele iho la ke keiki malihini i ka hulahula me kona hoa, a ua nui ka mahalo o na mea a pau loa ia laua.

     A o ka kakou koa opio hoi, eia no oia ke ku nei me kona hoa, a oia kana i ninau aku ai i kona hoa, ua ike mua paha oe i ka hulahula?

     Ua hoole mai la kona hoa, aole au i ao mua.

     Olelo aku la he koa opio, o kahi mea hilahila ia ia kaua, o ko kaua ike ole i ka hulahula, e hoohenehene ia mai ana paha kaua, a heaha la hoi ka hewa e hoomanawanui kaua.

     Ia wa no hoi i kamailio malu iho ai ke koa opio i kana pahu daimana me ka lohe ole mai o kona hoa, i ka i ana iho:

     E kuu pahu daimana, e kokua ma oe i ko'u hoa ma ka hulahula ana, oiai, aole ona ike i ka hulahula, a na kou haku ka lanakila.

     I ka pau ana o ka ianei namunamu ana, ua lalau aku la keia i ko ianei hoa a hooniniu ae la, a ua hoomaka aku la laua e hoopokaakaa a puni o loko o ka rumi me ka hiehie o ke kulana. a ua nui no hoi ka mahalo o ka lehulehu, i ka hiehie o ke kulana, a ia wa no hoi i lawe mai ai ke koa opio i na kiina wawae helu ekahi o kana hana ike, i loaa ole hoi i ke keiki malihini, ke hele ala a kohu kulu pakaua no Kulanihakoi ka owe nehe malie i ka pili o ke ao.

     He mea hiki ke olelo ia, o ka kakou koa opio ka helu ekahi ma na aupuni a pau, a i na manawa a pau a ke koa opio e hoomaka ai e hulahula, e mahalo mau ia ana oia.

     A i ka ike ana o ke keiki malihini, ua haule kona akamai malalo o ke koa opio, uapiena ae la oia me ka iho ana iho o kana puna kepau kioe poi, a namunamu liilii iho la oia me ka lohe ole ia aku o kana mea e kamailio ana, eia nae, ma ka ike kupua a kou mea kakau ua lohe aku la no wau i kana kamailio ana iho, a penei no ia:

     Akahi wale no hoi keiki nana wau i hoohoka, ua kaapuni ia e a'iu na aupuni a pau loa, aole hookahi mea nana i hoohoka mai ia'u, nolaila, e like me kou hoohoka ana ia'u, pela oe e make ai ia'u ma keia mua aku, ua manao no hoi au e hooko aku i ka make maluna ou i keia po, koe wale no, he manao okoa hoi kekahi o'u, a aia a ko kuu makemake, alaila, kii mai au ia oe e pepehi.

     Iloko o ia w, i hookuu ia ae ai ka laua nei hulahula ana a ia wa no hoi i ku mai ai ke komite iluna a haawi mai la i na hoomaikai i ke koa opio i ka i ana mai:

     Owau ke komite i koho ia mai e ka hale, e nana i ka mea oi o olua mamua o kekehi, a ua hooholo wau, o ke keiki nona na helehelena nohea a'u e ike nei, oia ka helu ekahi, aole he kanaka ma keia ola ana e hiki e hoohaahaa i kou akamai a pela pu no hoi me ka nani o kou mau helehelena.

     I ka pau ana o na olelo a ke komite ua haawi mai la ke anaina i na leo huro, a o keia hana a ka lehulehu he mea ia e hooi loa aku ana i ka huhu o ke keiki malihini.

     O keia keiki a kakou e ike nei e ka mea heluhelu, he alii powa oia no na kakai mauna o Roma, a o Vabine kona inoa.

     I ka pau ana o ka hookuku ana a ke koa opio, ua puka aku la oia iwaho a wehe ae la i na kui he 12 i omau ia ai o kona lio, a oili ae la oia a ku ana iwaho me ka hiehie nui, a pane mai la.

     E kau mai malunao'u, a e hooko no wau i kou makemake.

     Iloko o ia wa i kau aku ai ke koa opio maluna o kona lio a hoi aku la no kona home, a e like me ka imo ana a ka maka pela laua nei i lele aku ai a ku ana ma ka ipuka o kona hale, a lele iho la ke koa opio ilalo a hoihoi ae la i kona lio ma kona wahi.

     Hoi loa aku la ke koa opio a ma kona rumi moe a haule hiamoe e hooipo ana hoi me Niolepua, a na ka hele aina kakahiaka i kono mai iaia e ala. a hele aku la keia e hoomaemae i ko ia nei maka, a hele ina loa aku la oia no ka rumi aina a paina iho la i kona aina kakahiaka.

     I ka pa uana o kana paina ana, ua hoi aku la oia a ma kona rumi hoona nea a heluhelu nupepa iho la.

     Maanei e waiho kakou e na makamaka heluhelu no ke koa opio, oiai ua walea aku la oia i kana hana o ka heluhelu nupepa, a e huli hou ae kakou i hope a nana aku i ke aupuni o Roma, oiai ua haohao lakou no ka naolwale honua ana o ke koa opio.

     A oia ka ke kekuhina o ke aupuni o Roma i huli ae ai a pane aku la.

     Me he la, o kela keiki i hulahula iho nei, ke manao nei au, o ke keiki no paha kela i lilo ai ke aupuni o Sekotia, ua like loa na helehelena o kela keiki, me ko ke keiki i paio ai me Roma @.

     A ua ike pono no oe i na helehelena o ua keiki la, wahi a ka moi i ninau aku ai.

     Ae, ua ike pono no wau, wahi a ke kuhina i pane aku ai.

     A pehea hoi ia i hiki mai ai i Roma nei, oiai, o Perusia a me Sekotia o na aupuni ia i koe aole i kono ia, wahi a ka moi.

     Pela paha, aole nae he pau o ko'u kanalua, wahi a ke kuhina i pane aku ai i ka moi.

     I ka wai i pau ai o na kamailio ana a ke kuhina, ia wa i lohe ia aku ai ka leo o kekahi ulili i ke kani ana mai.

     A i ke kuu ana iho o ka leo o ka ulili, ia wa no i halakika mai ai na ihe ioko o ka rumi a ku aku la na ipukukui e hoomalamalama ana ia loko o ka rumi holookoa a pau lia iho la na ipu kukui i ka pio.

     I ka ike ana o ke keikialii powa Vahnie ua pau loa na ipukukui i ka pio, ia wa no i hopu koke aku ai oia i ke kaikamhinealii o Roma ka wahine hoi a Henryu Omeda ke kuikialii o Inia i mare ia ai ma ia po, a lawe aku la oia a hoolei aku la iaia ma ka puka aniani a ike mai la na kanaka o na alii powa nei i ka owaka ana aku o kekahi mea hulali, a me ka haule ana aku o kekehi puolo, a hoomaopopo iho la lakou, o ka mea no ia oa ko lakou haku i makemake ai.

     Ia wa i holo mai ai kekahi poe a hopu iho la i ka puolo a hookau ae la mamua o ko lakou mau noho a hoomaka aku la lakou e holo no ke kuahiwi.

     O ka nui o na powa ke kali ia no i ko lakou haku o ka puka mai, alaila, hoi lakou a pau no ko lakou home kuahiwi.

     I ka ike ana o Vabine ua lilo aku ka na puolo ma ka lima o kona mau kanaka, ua wikiwiki aku la oia a puka iwaho, a ike mai la kona mau kanaka i ko lakou haku, ua haawi mai la lakou i kona lio.

     I ka wa no i loaa mai ai o ka lio i ke keikialii Vabine, ia wa no i kakele pololei aku ai oia i kona lio no kona home kuahiwi i ukali ia hoi e kona poe kanaka mahope.

     I ka hala ana aku o ke keikialii powa Vabine, ua ulu ae la kekahi haunaele a ua pioo ae la hoi na mea a pau, a no kekahi manawa loihi, akahi no a ho-a ia ae ke kukui.

     I ka a ana ae o ke kukui, ua ike ia iho la, aole ke kaikamahinealii, a ua noke ia iho la i ka huli a aole nae he wahi mea a loaa iki.

     I ka ike ana o keikialii o Inia ua hele huli oia ma na wahi a pau, aole nae he loaa iki.

     A no ia nele ana, ua hana ia iho la kekahi olelo hoolaha e olelo ana, penei:

     I na aupuni a pau loa o ke ao holookoa, ke kauoha aku nei wau, ina o ka mea a mau mea paha i ike i kuu wahine ma kekahi aupuni, e hoike mai oukou ia'u, alaila, e haawi no au i ka mea nana e hoike mai ia'u i kana mea e koho ai, oia hoi keia:  Ka noho moi o Inia, ka inoa keikialii, na hoku alii o Inia he 24, ka mare ana me ko'u kaikuahine ka hooilina kalaunu o Inia, a o keia mau mea a pau loa a'u i hoike aku nei, e lilo oia i kanawai a mau loa aku.

Henry Omeda.

Moi o Ini

Kakau ia ma ko'u halealii.  Ikeia e Bruce haku puuku o Inia.

     Aole i pau.