Ka Nupepa Kuokoa, Volume XXVIII, Number 16, 20 ʻApelila 1889 — UA HALA. [ARTICLE]
UA HALA.
Ma ka la 10 o keia malama, ua hala aku la ma kela aoao iloko o ke 44 o na makahiki, o Rev. S. P. K. Nawaa. O Kona, Hawaii, kona one hanau, a ua noho kumu oia na ka Papa Hawaii ma na mokupuni o Maikonisia mai ka 1877 a 1881. Mahope mai o ia manawa, ua hoi aku oia a noho kahu no ka ekalesia o Ewa a hiki i kona hookuu ana mai la i keia ao. Ua hoao ia na lapaau ana no kona ola, aka, ua ikaika loa nae na hakoko ana mai a ka enemi maluna o kona kino. Me ka ohana a me ka wahinekane make ko makou aloha. Ma ka mokuahi Kaleponi i hala, ua loaa mai ka lono o ka make ana o Mele Hao, kaikamahine muli loa a Kakina Makua i noho kumu ai ma Kailua, Kona. He wahine o Mele Hao i kamaaina nui i na kanaka Hawaii a he hoaloha maikai hoi no na poe a pau i hoolauna aku iaia. Ua make mua kana kane he mau makahiki i hala ae nei, aka, he mau keiki e noho mai la i Kapalakiko i keia la me na hoomanao i ka haalele ana iho a ko lakou makuahine.