Ka Nupepa Kuokoa, Volume XXVIII, Number 4, 26 Ianuali 1889 — Page 1
| This text was transcribed by: | Jon Yasuda |
| This work is dedicated to: | Ronald Yasuda |
Ka Nupepa Kuokoa
KE KILOHANA POOKELA NO KA LAHUI HAWAII.
HOOLAHA LOIO
W R. KAKELA
LOIO A HE KOKUA MA KE KANAWAI
@ Luna Hoo@ Palapala
WILDER & CO. (WAILA MA.)
Mea kuai papa a me na lako kukulu hale @ na ano a pau, a me na @ pono a pau no ka hale.
Kihu Alanui Moiwahine me Papu
CECIL BROWN.
LOIO A HE KOKUA MA KE KANAWAI
HE Agena Hoo@ Palapala no ka Mokupuni o Oahu
KEENA HANA: Ma alanui Kalepa.
A ROSA (AKONI.)
LOIO A HE KOKUA MA KE KANAWAI
HE Luna Hoo@ Palapala
KEENA HANA: Ma ke Keena Loio @
JAMES M. MONSARRAT.
(MAUNAKEA.)
LOIO A HE KOKUA MA KE KANAWAI
He Luna Hoo@ Palapala
E hana ia no na Palapala Kuai, Palapala Hoolimalima, a me na palapala pili kanawai e ae ma ka olelo Hawaii. Dala no ka @ ka moraki ma na waiwai paa.
KEENA HANA: Alanui Kalepa
VOLNEY VAILLANCOURT ASHFORD
AKEPOKA
He Loio, Hoakaka, Pale ma ke Kanawai, Kakauolelo, Lunahooponopono a me na hana ana i na Palapala Hoolilo.
LAWELAWE ILOKO O NA AHA A PAU O KE AUPUNI.
E hana ia no na palapala pili Kanawai a pau.
Keena Hana Helu 21, Alanui Kalepa, Honolulu Hale. (2150 @)
WILLIAM C. ACHI
Loio a he kokua ma ke kanawai imua o na Aha a pau o keia Aupuni.
He Mea Ana Aina a he Boroka ma na waiwai paa.
Keena Hana, Helu 15, Alanui Kaahumanu Honolulu, oia ke Keena mua iho nei o Ki@ m P@ 2114-y
E.G. HITCHCOCK.
(AIK@E HIKIKOKE).
LOIO, A KOKUA MA NA MEA A PAU E PILI ANA MA KE KANAWAI
E ohi ia no na Bila Aie me ka awiwi
Hilo, Hawaii
2114@
GEORGE P. KAMAUOHA.
HE Loio a he Kokua ma ke Kanawai
A HE MEA
ANA AINA
E loaa no ma Kohala Akau, Hawaii
2091@
JOHN MAHIAI KANEAKUA.
LOIO A HE KOKUA MA KE KANAWAI.
HE MEA UNUHIOLELO MA KA OLELO
BERETANIA A ME KA OLELO HAWAII
Keena Hana, maluna ae o ka @
HALEKUAI BIBI HONOLULU
(HOPE o @ McCAN@es
HELU 6 ALANUI MOIWAHINE, MAKEKE MA ULAKOHEO
Na Bibi momona, Hipa, Puaa me Ia, na @ai ulu & @
O na kauoha a na ohana a me na moku mai @ hooko koke ia no ma ka eleu a me ka hikiwawe
` @ na holoholona ola no na moku e hiki no ke hooko koke ia.
@elepone Helu 213 2185@
PACIFIC HARDWARE COMPANY
Na hope o Dilinahama Ma.
M@ Mea Kuai Lako Hao
Alanui Papu, Honolulu
OLELO HOOLAHA
E ike auanei na kanaka a pau ke nana mai i keia owau o ka mea nona ka inoa malalo ke hoike aku nei au , o ka mea a mea paha e loaa ana @ mau Lio elua, oia hoi keia: 1 lio (k) ulau@ae kea, eha wawae keokeo, hao 1 lio (k) hakeakea, hao like me keia a he @ ekahi hao ma ka a-i. E hoihoi mai a lo@ au ma Kaalaea Mill, Koolaupoko, a i ole, @ ka Hale Wili Raiki o Aki ma Ewa, e uku @ au 1 lio he $6@
AKANA PAKE,
Kaalaea Mill, Koolaupoko.
Dec @, 1888 @
MOLOKAI SOPON
LEO - @
Kono ae o loko e ike no
I ka nani o kuu Kaulu,
Kuu wehiwehi e ui ai
Molokai Sopon Nanai.
Hui- E keia puuwai e kapalili nei,
E akakuu kou apoapo ana,
E nawe, a nihi kou pana ana,
Molokai Sopon Aramas.
Maeele ke kino a kaanini hoi,
Pupue hoonanea i ka o-hu ale,
Kani ka hoe, he piina pali
Molokai Sopon Ununu@.
Ua mawehe ka pawa pili o ke ao,
E ianei e moe hoonuhanuha nei,
Pahee i ka welowelo adeiu hoi,
Molokai Sopon good morning.
KIM WAI-LU KU@.
Lutanela Roge
KE
Kiu o ke Kaikuono
O MOBILE.
Ke Kiu a Adimarala Faragata i hoouna ai e Ana a e huli i na Topido ma ka Papaku o ke Kaikuono o Mobile.
He Moolelo iloko o ke Kaua Kuloko o ka Akau me ka Hema
"He hiki au ke lawe aku ia oe imua o Mekia Noutana, ke hoao hou mai oe e hoohaahaa i ka hanohano o ka inoa o na Mokuaina Kuikahi Hui o ka Hema," wahi a Lutanela Balea i pane aku ai ma ka hila o kona kamaa me ke ano hooio.
"E hana koke oe, ina e makemake," wahi a ke kaikamahine kupaa i pane aku ai. "Ua ahona au e pepehi ia no ka hanohano o ka hae kahiko mamua o ka lilo ana i wahine mare nau. Ea, he manao anei kou o ka noho loihi ana iloko nei o ko'u hale me kou haalele ole nou iho, a i ole, e kahea paha au i kekahi kokua, he kanaka i papalua ia kona ikaika mamua o kou?"
Ua emi hope aku la o Edita no ka ipuka o ka rumi o hope, pane hoi aku ia o Lutanela Balea i keia mau olelo o ka hoike maopopo ana i kona aloha,-
"E hoolohe mai oe ia'u i hookahi manawa i koe. Aole o'u makemake e lawe mai i kau@ulu wale ana no ia'u, ke ole oe e hooholo koke i kou ae, - e lilo oe i wahine mare na'u, alaila, aole au e kaualako aku ia oe imua o Mekia Noutana!"
Ua pane ia aku na haina o keia noi a Balea e ke kaikamahine, ma o kona wehe ana ae i ka ipuka o kela rumi a puka mai ana kekahi kauwa negero nui a ku ana iloko o ka rumi hookipa nui, me na helehelena o ka wiwoole a me kona mau lala o ka ikaika, pane mai la i keia mau olelo-
"Kela kauwa Josh oe Misa Edita, hiki no iaia keia rumi keia manwa," wahi a ua niga nui la i pane aku ai me ka alawa ana aku ia Lutanela Kikane Balea i ke ku mai i ka ipuka komo o ka rumi.
"Pehea Masa Edita? Kela aliikoa makemake wau kiola iaia mawaho kela ipuka-pa, he?"
"E kali iki oe e Josh," wahi a ke kaikamahine i pane mai ai i kana kauwa hoolohe, a huli hou aku la ia Balea a pane me keia mau olelo,-
"Aole anei oe e haalele mai ana i ko'u hale me ka malie a me ka maluhia, a i ole, e kauoha au i ko'u kauwa hoolohe nei e kiola koke ia oe mawaho o kela ipuka-pa?"
"Haawi koke mai kela kauoha Masa Edita, wau keia manawa kiola koke iaia lele maluna kela lewa, haule mawaho kela pa," wahi a ka negero i hooonioni ae ai i kona pauku kino, hoomalo i kona oloolo wawae a @ i ka palule o kona mau p@ ha@ iluna i ka @ona o ka @.
I ka wa a Josh i pane ae ai i kela mau olelo, ua nana inoino mai la na maka o kahi aliikoa iloko o kona huhu nui, me ke kilohi ana mai i ke @ulana makaukau o ka negero mai ke poo a hiki i na wawae, a me kona mau manao o ka hohe wale, puka aku la i waho o ka lanai a pane mai la i kana mau olelo hope-
"Ke lawe nei au i kau mau hoino haahaa loa, ia'u a me ka hae hou o na mokuaina o ka Hema, a e ike ana oe iloko o kekahi hora o keia po, e hae ana ke kulanakauhale holookoa o Mobile i kou koko e kona wahine kipi."
Ua haawi ae la ke kaikamahine i kekahi akaaka hoohehehehe aku i kahi aliikoa makau wale, a oia ka wa a Josh i lele aku ai a ku mawaho o ka lanai, ike mai la o Balea i kona halulu ana aku me ka manao e alualu ana iaia, ua @u koke aku la oia i ka holo e like me ka mama i loaa iaia a puka iwaho o ke alanui, huli mai la a pane me kekahi mau olelo ino loa, i ke kaikamahine a me kana kauwa hoolohe Josh.
"Bai Gole, Misa Edita. Pehea oe aole haawi koke kela kauoha kiola kela aliikoa hele maluna kela lewa, mahope lawe iaia ma kela halemai lapaau, noho malaila like pu aono mahina, aole iaia hele hou maanei, pau no kela kaua, olioli no kela aoao Akau, a lanakila no pau loa niga hele kela alanui aole pilikia."
He mau leo o ka mahalo ka ke kaikamahine i pane aku ai i kana kauwa hoolohe a me ka piha eleu, a puana hou ae la i keia mau olelo-
"He hiki au ke hoohoka ia oe e Kikane Balea ma na ano a pau o kau misiona o ka huli wahine, a o ka wa e ike maopopo ia ai ko'u oiaio ma ka hae kahiko, ua kokoke loa ia manawa e hiki mai mamua o ka wa e hooko ia ai kou mau manao o ka hohe wale e Mr. Balea."
He oiaio, iloko o ua po la, a mamua hoi o ka hoomaka ia ana o ke kipoka @ papu Mogana a me ke kulanakauhale o Mobile e na aumoku kaua o Faragata, ua hoouna koke mai la ua Adimarala wiwo ole la i kekahi aliikoa ma ka waapa, e holo iuka a lawe mai i ke kaikamahine iluna o ka moku Hakapoka, no ka hoopakele mua ana mau iaia mamua o ke kipoka ia ana aku o ke kulanakauhale iloko o na hora pokole.
O na hoike a Roge ia Faragata no na mea e pili ana ia Edita ma na hana kokua i kana mau huakai kiu i na poopoo o Mobile, na ia mea i kono mai i ua Adimarala wiwo ole la e haawi aku i na hoopakele ana i ua kaikamahine la maluna o kona moku mamua o ka hoomaka ia ana o keia kaua.
O na lono kaua e pahola ana ia mau la, a me kela huakai noi wahine a Kikane Balea, ua maopopo mua i ke kaikamahine, e hiki hou mai ana no oia me na koa no ke kaualako ana aku iaia imua o na mana kaua o Mobile, nolaila, i kumu e pakele ai kona ola, ua ae aku la oia i ke kona a Adimarala Faragata e holo iluna o ka moku Hakapoka, oiai, e hoomaka ia ana ke kaua i kekahi hora o keia po.
Mamua o kona haalele ana i kona home, ua ohi ae la oia ma na wahi lole hiki ke paa iloko o ka puolo hookahi, a waiho aku la i na mea hoonani hale a me na mea no a pau o ka home, i mea hao wale ia iloko o keia mau minuke o ke kupilikii. O keia ke ano o ke kaua, - a oia ka haawina e loaa pu i na ohana ma ka hoopilikia ia o ke ola a me ka home.
Ua kakau iho la oia i kekahi palapala na Kikane Balea a waiho maluna o ka papakaukau, a me ke kukui no e ana iloko o ka hale, ua puka aku la o Edita me kana kauwa hoolohe Josh iwaho, e holo ana no ko laua pakele iluna o na aumoku kaua Amerika o Faragata.
Ia laua nei i hiki aku ai ma ke kihi alanui e holo la i kai o ka uwapo, ua nana hou aku laua nei ihope a ike i kekahi mau mahele koa e hoopuni ana i ka hale o ke kaikamahine, oia ka Josh i puoho ae ai, -
"Bai-Keoki@ Kaua laki hele koke, keia manawa Sidane Balea pii mai hoopuni no kela hale!"
(Aole i pau.)
NEDE NIKONA
KA
Puuwai Haokila a Hooko Kauoha Poina Ole;
A O KA
Holapu Hope Loa
A KA
"ALABAMA,"
KE
Ahikanana a Puhipuhiahi o ka Moana Atelanika
"Elua K@p@eu o ka moana,
A na O I'a e maka nei;
O ka Alabama me ke Senedoa,
I ka uhai loloa mai mahope."
KA NIUHI HOLAPU MOANA.
MOKUNA IV
KO NEDE LANAKILA MUA LOA
"Pela io e ke Kapena?" i ninau aku ai o Nede me ke ano pihoihoi.
"Pela io no. Akahi oe a ike i ka mea nana i kolohe ka enegini o kakou iluna o ka Natila. O ua kanaka la ka mea i hai ia Semisa no na kaimana, he mea maopopo ia. He elima paha minuke i hala ae nei, ua lohe aku nei au i ka hauoli o ua kanaka nei no ka lilo o ua mau daimana nei ke hiki aku kakou i Bahia."
"Pela io anei? Mahea?" wahi a Nede i ninau aku ai.
"Aia malalo iho o kahi o ka waapa e kau mai la. O lakou no a pau ehi' o ka oi o na poe lapuwale i ike ia ke pelukua kipi mailoko aku o ka poli o ka Akau. Ma ka'u hoomaopopo aku i na olelo a ua wahi kanaka nei, o kona kumu ka i hana ai i keia mea, i mea hoonaaikola ka ia Ruta," wahi a Belodina.
"No ke aha?" wahi a Nede, me ke ano kahaha.
"O kahi hoi ia i hiki ole ia'u ke hoomaopopo, " i pane aku ai o Belodina.
Kulou iho la o Nede i kona poo ilalo me ka noho mumule, a liuliu, pane ae la:
"He mea hiki ole ia'u ke hoomaopopo iloko o ko'u noonoo i ke kumu o kona enemi i kela kaikamahine. Aole paha au i ike mua i kela kanaka. Ihea kona wahi i kepa mai ai me oe, e Kapena Belodina?"
"I Bomabe," wahi a Belodina.
Puiwa ae la o Nede i keia huaolelo pane a kona hoa kamailio hawanawana.
"He eono la mamua ae o ko kakou holo ana mai, ua hele mua mai kela ia'u a hoopaa iaia iho. He kanaka kamaaina a makaukau i na mea a pau e pili ana i ka moku. Mamua nae o ko kakou holo ana mai, no kekahi mau manawa, ua haohao ia au, a ua manao iho he ano kiu oia, aka, i keia manawa, ua pau ko'u kuhihewa; he kiu kipi oia: ke keu nae o ke akamai a me ka maalea ma kana mau kamailio a me na lawelawe ana," wahi a Belodina.
"Owai kona inoa?" i ninau aku ai o Nede.
"Ua kepa mai oia malalo o ka inoa Pilipi Fale, aka, aole nae ia o kona inoa ponoi. He umi minuke i hala hope aku la, e ku ana au ma kekahi wahi i hiki ai ia'u ke ike moakaka i ua mau lapuwale nei eha malalo iho o ka waapa. E hoao ana au e hoolohe i ka lakou mau olelo, A oiai au malaila, ua lohe aku la au i ka puoho ana ae o ka leo o kekahi o lakou i ka pane ana ae-"e hoao no au e loaa ia kakou pakahi i na pine daimana o ua ona miliona nei; a ke ole, a laila, aole o Gae Galoka ko'u inoa" - a i kuu nana pono ana aku , ike aku la au me ka moakaka loa, o Pilipi Fale ua kanaka la nana i pane ae i kela mau huaolelo," o keia na hua olelo a Belodina nana i hoopiha ae ia Nede me ka wela o ka puuwai.
"O Gae Galoka ka?" wahi a Nede. "He inoa malihini kela ia'u; malia o Ruta ka i lohe mua. Ua makemake o Mr. Ferguesona e ike ia oe e Kapena Belodina, no kekahi mea ano nui, pela ko ' u noonoo wale. Ina oe e iho aku ana ilalo, alaila, e hoomakakiu ae hoi au i keia poe lapuwale."
Iho aku la o Kapena Belodina ilalo e ike ia Fergusona, a koe hookahi hou iho la o Nede, ke kanaka Amerika opio puuwai aloha aina ma kona wahi i hoo@a malie ai. Ua kawa loa oia mai kahi mai a ua poe nei i kamailio a i ohumu nui ai. Maluna ae o ko ianei wahi e noho ana he luina me ka ohenana po i kona mau maka a e kiai ana ia ma na kihi a pau no ka ike aku i kekahi mea maluna o ka ilikai. No ka mea, no ka Alabama wale no na manawa a pau: e like me ka makaala o ka tiga no ka lele aku a poi iho i na holoholona liilii i mea e hoomaona ai i kona opu hakahaka, pela no ka makaala mau o Kapena Semisa no ke poi ana aku a lawe pio ae i na aumoku kalepa o kona enemi i mea e hoopoino aku ai ia aoao, a e hoopomaikai ai hoi i kona aoao, a e hooi aku ai i ka heluna o kana mau pio i pulumi ai mai luna aku o ka ilikai.
Nana aku la o Nede i ua kanaka la e noho kiai ana, e noonoo ana i ka manawa hea la e hoohauoli hou ia ai ko Kapena Semisa mau pepeiao me ka leo hooho "kelo! he moku!" mau ua kiai la, a i kona huli hou ana ae e nana i ua poe kanaka nei eha ma kahi a lakou e ohumu nui ana, aole lakou ma ia wahi, ua nalo nui iho la.
Ua pau emoole loa iho la ka lakou mau kukakuka ana, a ua haka pono aku la ko Nede mau maka ilaila, aole nae lakou i hoi hou ae.
Aka, aole no nae i liuliu ko ianei hoomakakiu ana, aia hoi, ike aku la keia i ke kino o kekahi mea e hele mai i o ianei. E like me ka popoki e kali ana i ka iole, pela iho la o Nede iloko o ia manawa; no ka mea, ua ano kokoke mai la ua kanaka nei i o ianei, a ua ike aku la keia malalo o ke aka o ke kukui o Pilipi Fale no ua kanaka nei, me kona aahu i like ole ke ko na luina o ka Alabama.
"Aha, loaa oe ia ' u," wahi a ua Nede nei iloko iho ona. "Heaha kau mau hana maalea e hoomaka ana e Pilipi Fale? He mau hana kipi omo koko anei?" Me ka leo hawanawana oia i puana ai i keia mau mapuna olelo.
Ke hele mai la ua kanaka nei a kokoke loa iaia nei, a ike moakaka aku ia, o ke kanaka no keia a Belodina i hai mai iaia nana i kolohe ka mekini o ka Natila; a iloko o ia manawa ua pii ae la kona inaina a ua wela.
O ke kanaka keia i hoopuka ae i na olelo awahua no Ruta; ua manaoino oia i kela kaikamahine nani a ui. Na keia kanaka i hana kekahi mea i loaa ai ke kuia o ko lakou ala huli hoi i Nu Ioka, a mamuli ona i paa ai o Ruta i pio malalo o Kapena Semisa.
Paila ae la ko Nede koko Amelika i ka manawa i holo awiwi ae ai keia mau mea a pau iloko o kona noonoo. Haka pono aku la kona mau maka iluna o ua kanaka nei a hiki pono ma kekahi aoao ona; a ia manawa koke no i lele aku ai o Nede me ka mama a paa aku la ka a-i o ua kanaka nei.
"Ke kipi lapuwale! Ano e hoolei ana au ia oe iloko o ke kai! Nau i kolohe ka mekini o ka Natila i lilo ai i pio na ka Alabama; o oe ka i kepa i Bomebe malalo o ka inoa Pilipi Fale, no ia kumuhana. Ua ike no au ia oe o Gae Faloka," wahi a Nede.
Me he la, na ka nui o ko Nede inaina i hooi loa aku i kona ikaika, a mamua o ka pau ana ae o ke ano hikilele o ua kanaka nei, ua hapai ia aku la oia a pili ma ka palekai o ka moku.
"O Gae Galoka io no, a na ' u no i hana ino ka enekini o ka Natila; a ma o na lani la, e ike ana kela kaikamahine he hiki no ia'u ke panai aku i uku nona. Ua oi aku ko'u ikaika i kou e Nede Nikona; e halawai ana oe me na ale puanuanu, aole owau!" wahi a ua kanaka nei, me kona hookuu ana i kona ikaika a pau maluna o kona manao e lanakila maluna o Nede.
Iloko o ia manawa, e aumeume like ana laua me ka ikaika i ano kulike ko kekahi me kekahi.
"Na'u e hoolilo ia oe e kena kipi i mea poina ia. Aole loa oe e lanakila. E hooko ana au i kekahi hana no ka pomaikai o ko'u hae, ina no e li o Kapena Semisa ia'u i ka puka ana o ka la," wahi a Nede.
(Aole i pau.)
Kau Lio Mazepa
A I OLE IA, KA
Noeau i ke Kii'na Kipuka-ili
Ke Kamahele ma na Kula Laula o Nubarasaka
I ka wa a ke kaikamahine i pane iho ai me kela mau olelo hope, ua opea ae la o ia i kana pila gita ma kona poli, puka aku la iwaho o ko laua hale, a hele ana no waho o ke alanui.
O ia wa ia o ke ano ahiahi e pahola iho ana i kona koloka pouli o ka po ma luna o ke kulanakauhale, a ua ho-a ia ae na kukui o na huina alanui, ua iho aku la ke kaikamahine nei ma kekahi o na alanui a hiki i kekahi wahi hale e kau ana he mau hoailona o na Agena haawi hoopukapuka dala, ua komo aku la oia iloko a ike koke aku la i kekahi mamo o ka Isaraela, e hoomakaukau ana oia e pani i ka ipuka o kona hale oihana, ua pane mai la oia me kona ano mau o ka hookalohe i ke kaikamahine,-
"A! e kuu aloha, - aloha ahiahi oe e Miss Patesona. Ua hauoli loa au no kou hiki ana mai nei i keia ahiahi."
Aole i pane aku ke kaikamahine no kela mau olelo a kahi Iudaio, aka, ua wehe malie ae oia i kana ukana makamae a waiho aku la maluna o ka pakaukau, a pane aku la me keia mau olelo-
"Ua kipa mai nei au i keia po, no ka moraki a kuai lilo aku paha i keia pila nei ia oe no kekahi kumukuai haahaa a holopono no ka akahi hapaha o kona kumu lilo."
"He pila maikai loa keia," wahi a ka Iudaio i pane mai ai me ka nana pu ana iho i ke ano o ke gita a pane hou mai la: "Heaha ke kumukuai au i makemake ai e kuai mai ia'u?"
"Ua manao au i kanakolu dala. O kona kumukuai i kinohi, aia no ia ma kahi o ka elua haneri dala."
Na kela mau olelo i hookunana i ka Iudaio, a pane aku la oia i kana kumukuai hoemi,-
"Ina pela, e haawi no au i umu dala no keia pila."
"E Mr. Iakoba, aole o ke dala ka mea nana e hookaawale i keia pila mai ia'u aku malalo o kekahi mau kumu, ina aole i loaa ka pilikia ia'u a me ko'u makuakane i keia mau minute."
Ua hoopuu ia ka leo o ke kaikamahine i ka wa i hoopuka ae ai i keia mau olelo, hoomaha iki iho la oia a pane mai la kahi Iudaio i keia mau olelo,-
"Ina pela e haawi hou au ia oe i elua dala i koe no keia pila."
Me na manao o ka hoopokoke i ka loloiahili a me na hoopaapaa ana, ua lalau aku la ke kaikamahine i kana pila a paa ma kona poli, huli ae la a puka aku la iwaho o kahi hale, ua kahea hou aku la kahi Iudaio iaia nei e hoi aku a haawi mai oia i kana mea i noi aku ai, aole ke kaikamahine i ku iho he hookahi minute, aka, ua iho pololei aku la oia ma ke alanui e holo la i kahi o na hale oihana lehulehu e ku ana o ke kulanakauhale.
"He huakau loihi keia a'u e iho ai," wahi a ke kaikamahine i puana ae ai iaia iho oiai e iho ana ma ke ala me ka awiwi. "Ua maopopo ia'u, ina e ike ana o Simeona i ko'u manao kuai i keia gita, e haawi mai no oia a oi aku mamua o kela Iudaio i haawi mai nei."
Ua hoomau aku la ke kaikamahine i ka iho ana ma ke alanui malalo o ka malamalama o na kukui e a ana, a hiki wale i ko ianei kaalo ana ae mawaho o kekahi hale pohaku nui a kiekie, nona hoi na kukui e hoomalamalama ana i na rumi a pau o ua hale la, a e nee ana na kino o na kane a me na wahine a puni ka rumi nui, a hoomanao ae la keia, he anaina hoolaulea kela a na Ahahui o ke kulanakauhale e haawi ai i kela me keia pule hope o ka mahina.
Ua lohe pu aku la keia i ka leo o kekahi poe haiolelo, e himeni ana, a e holoholo ana hoi kekahi poe, ua ku iki iho la ke kaikamahine mawaho o kela ipuka pa a puana ae la i keia mau olelo,-
Ua manao au, he poe kekahi iloko o kela hale lealea e kokua mai ia'u, ina e lohe ana lakou i ko'u pilikia, aka, he poe no kekahi o lakou i noho ia e ka maua a me ka pi, aole nae ia he mea e hoohuli ia ai ka puuwai o na poe a pau o ke ao holookoa e maua a e pi. A E hoao ana au i ko oukou mau puuwai me ka waianuhea o ka'u pila, ina he alakai ana keia e wehe ia ai ko kaua noho aloha pu ana e kuu gita."
Ua hapai ae la oia i kana pila mamua o ke alo a honi iho la, hooholo ae la kona mau manamana lima a paa na kaula o ke gita, komo aku la keia iloko o ka pa, a malalo o kekahi kumulaau e pa pono ia ana e ka malamalama o ke kukui mai kekahi ipuka aniani mai, pili ae la oia ma kona aoao a lawe kiani malie ae la oia i ka palanehe o na kaula o kana gita, a holo aku la ke kani hoolu e kapalili ai ka puuwai o kekahi mea banu ola, a oia ka wa i hoopuiwa ia ai o kekahi poe e noho kokoke ana ma na ipuka aniani, me ko lakou manao, he pila kapalulu keia o na alanui a me na kamalii auwana e kipa hele ai ma na kauhale, oia ka wa i lohe ia aku ai o ka leo o kekahi poe i pane ae ai-
"E kipaku i keia poe kamalii hookani pila iwaho o ke alanui."
He mau minuke pokole ia a ua kaikamahine nei i lawe kikoni ae la i ke kani palanehe o kana pila, ua poha aku la kona leo me ke kokua ana i kana gita me ka leo himeni, o keia ka manawa o na poe a pau o ua rumi nui la i pau ai na walaau a me na lealea ana, holo aku la lakou mawaho o ka lanai a me na ipuka aniani, a nana aku la i ke kino o kekahi wahine e pili ana ma ke kumulaau, a nona ka leo soprano kani oeoe e pohapoha lai malie ana i ka pii iluna a me ka iho ana i lalo.
Ua hoohala ia kekahi mau minute no keia himeni ana iho la, a i ka wa i pau ai, ua hoopihoihoi nui loa ia ke anaina kanaka nui o ka Ahahui Uniona i ka mea nona ka leo i himeni aku la, ua ao kumu maoli ia oia malalo o na haawina o ka huamele, a oia ka wa i hehihehi a paipai ia mai ai na lima o ka hauoli, me ka hoomau ana no kekahi mau minuke.
Aole i hookaulua iho ua kaikamahine la i ke kono a na leo paipai e kahea mai la iluna o ka hale, oia kana i haawi koke aku ai me kekahi leo mele hookani ma ke gita, me na pana ana o ke kaula e holo ai ke o a e hoomaopopo ia ai o ka huamele, ua lawe kiani malie ae la oia i na kikoni ana a e lawe lilo loa ia ai ka puuwai o kekahi mea, oia ka kekahi kanaka opiopio i hopu ae ai i kona papale a pane ae la imua o na hoa,-
"E na keonimana: Ua like ka waiwai io o ka himeni a me kela hookani mele ma ke gita, - me kekahi palapala komo o elima dala iloko o na Aha Himeni Opara. Ke hookauwa nei au ia'u iho ma ka hoomaka ana i ka iwakalua dala iloko o keia papale, a na'u ka ohi ana i na pomaikai no kela wahine himeni leo lea helu ekahi o ka puukani."
Ua wehe ae ua kanaka opio nei mai kona pakeke ae, he bila dala o iwakalua ka waiwai, hookomo iho la iloko o kona papale, a hoomaka aku la oia e hele ohi iwaena o na keonimana, a iloko o na minuke pokole, he hookahi haneri dala a oi i ohi ia oloko o ka papale, no laila, ua iho aku la ua kanaka opio nei ilalo, kahi a ke kaikamahine e hoomau la i ka hookani ana i kana pila.
I ka wa i pau iho la o ka ke kaikamahine mau kikoni ana ma na kaula o kana gita, @a poha hou mai la kona leo nanahe me kekahi o na leo himeni Farani eleu i ano maa mau iwaena o ka poai no na ahahui, a oia ka wa a ke kanaka opio i ku iho ai ma kahi kokoke i ke kaikamahine, kali malie iho la oia malaila a hiki i ka wa e pau ai o kana himeni ana
O ka malamalama o na kukui o loko o kela rumi nui, ua hoolei ia aku la iwaho o ka ipuka pa a me ke alanui, a ua ike maopopo aku ke kaikamahine i kekahi kino kanaka i ka maalo ana ae a ku iho la malaila no ka hoolohe ana mai i kana himeni. Ua kahiko ia oia me ka paikini o ak poe uhai holoholona, a he papale kaleponi laulau nui ke kau ana maluna o kona poo ua hoopinana ia mai o mua iluna, a he kaei ili ke hoopuni ana ma kona puhaka. O kona mau hiohiona ke nana aku, ua hoike maopopo mai kona mau helehelena i ka wiwoole, a o na lala hoi i ka wikani a me ka ikaika.