Ka Nupepa Kuokoa, Volume XXVII, Number 51, 22 Kekemapa 1888 — Page 4
| This text was transcribed by: | Kaulu Luuwai |
| This work is dedicated to: | Kamana'opono Lu'uwai |
Ka Nupepa Kuokoa
KE KILOHANA POOKELA NO KA LAHUI HAWAII.
Nupepa Kuokoa.
No ka makahiki.............$2.00
No @ mahina................. 1. 00
KUIKE KA RULA.
Poaono, Dekemaba 22, 1888
Haawina Kula Sabati
HAPAHA EHA
HAAWINA XLI, Dek 30, 1888.
HAAWINA HAI HOPE.
Nawai i alakai i ka Israela a hiki i Kanaana? Owai ke pani hakahaka na Mose? Heaha ka ke Akua i hoohiki ai no ka Israela? Pehea e loaa i keia aina no lakou? Ke ole e hoolohe ana i ke Akua, a manaoio Iaia, a koa io, e loaa anei?
Pehea o Ioredane i ka wa a lakou i hele ai kela kapa? Owai @ai i hele mamua? I ke komo ana i ka muliwai pehea na wai?
A hiki aku ia huakai nui ma kela kapa, pehea na wai o Ioredane? Heaha kai lawe ia no loko o Ioredane? Mahea ke kukulu ana i keia mau pohaku? Mea aha keia kia hoomanao?
Owai ke kulanakauhale nui i lawe pio ia? Owai ka i launa mai me Iosua? Pehea ka hoopio ‘ana ia Ieriko? Heaha ka hana ma ka hiku o ka la? Pehea na pa o Ieriko? Owai kai hoolaia.
Owai ka lua o na kulanakauhale i kaua ia? Ua pio anei? Pehea ka Israela? Heaha ka Iosua hana iloko oia pilikia? No keaha ka auhee ana o ka Iseraela? Owai ka i hana hewa? Pehea ka hoopai ana? Ua lanakila anei maluna o A ma ia hope iho? Owai o Kaleba? Ua olelo maikai anei oia no ka aina i ka hoi ana? Owai kahi e lilo ana iaia? Ehia makahiki mai ka hookiki ana, a hooko ia; a lilo ia wahi nona? 45. owai ke kulanakauhale i lilo nona?
Ua hooko ia anei ka hoohiki no ka noho ana o ka Israela ma ka aina o Kanaana? Owai na ohana i kokua i na hoa i ka hoopio ana i ka aina? Ua hoihoi ia anei na koa he 40,000 i kokua ma ia hana nui ¿ nawai i hoomaikai ia lakou?
Heaha ka Iosua hana mamua o kona make ana? Mahea ka akoakoa ana? Heaha ka paipai ia lakou? E malama ia wai? Ua ae anei kanaka e hoomana i ke Akua? He nui anei ko ke Akua lokomaikai ia lakou?
Owai na alakai o ka Israela mahope o ka make ana o Iosua? Ehia makahiki ka noho ana malalo o na lunakanawai? 330. Pehea kanaka? Ua kupaa anei---a hoomau i ka uhai ana i ke Akua? Ua hoopai ia anei no ka hoomana kai ana? Ua hoopio pinepine ia anei lakou e na enemi, no ia kumu? Nawai i hoopakele ia lakou, i ko lakou mihi ana?
Owai o Gideona? Heaha kana hana? Pehea ka nui o kona puali koa? Heaha na mea kaua? Ua lanakila anei?
Owai o Samesona? Ua laa anei oia? Ua hoopakele ia ka Iseraela mai ka lima owai? Nawai i hoowalewale iaia? Pehea kona hoopai ana, no ka ae ana i ka Delila? Heaha ka hopee?
Mahea ka noho ana o Ruta? Owai oia? Ua haalele anei i kona aina hanau a me na akua kii? Pehea kana olelo? Ua pomaikai anei oia ma ia koho ana?
Hoole Waiona.
[Na ka Ahahui W. C. T. U.]
Ma Kaleleonalani, oia hoi o “Ema Hale” ma Honolulu.
He halawai i kela me keia POALIMA hora 7:30 o ke ahiahi.
He halawai Hoole Waiona, o ka Ahahui o ka Lipine Bolu o Honolulu.
Ke kono ia aku nei na kanaka, kane, wahine, keiki, na mea kiekie, na mea haahaa, ka poe waiwai, ka poe ilihune, ka pae hoole waiona, ka poe kanalua, na mea a pau, e akoakoa ma ia hale i kela me keia pule. Pela no me na malihini mai na mokupuni e mai, e komo, a hui me makou ma keia hana kuonoono, “No ke AKUA a me ka HOME, a me ka AINA HANAU.”
KE KEIKI KUPAA.
He poino weliweli ma ke alanui ma Ilinoi mamua aku nei, a penei kekahi ike i hai ia mai: I ka lohe ana no ka poino o na kaa ahi, ua holo aku me ka mama e kokua i ka poe pilikia.
He wahi keikikane, he umi ona mau makahiki, i loaa iaia-aia kona makuahine e moe ana ma kona aoao- ua make. O kekahi oloolo wawae o ua keiki nei, ua pepe loa, o kekahi lima, ua haki, a o kekahi maka ua poalo okoa ia. Aole i lohi ia he leo uwe he hamau wale no ia iloko oia eha weliweli
Mahope o ka hooikaika loihi ana, ua lawe ia mai ko laua kino mai waena mai o na kaa i nahaha. Aia a Kaawale iki aku, ua i aku ke keiki, e hookuu no ia’u maanei, a e hoi hou no e kokua i kela poe e u@ @ ana.
Mahope mai ua lawe ia he wahi barani nana, me ka manao e hoolana iki paha iaia ma ka inu ana: pani paa oia i kona waha me ka i ana aku, aole loa au e inu i kela- he hoole loa au i ka waiona, he kinai paa au i ka rama.
I ka lawe ana i wahi kope nana, ua huli ae a nana i kona makuahi aloha e mae mai ana, me ka i ana “aole, aole ona makemake ia’u e inu ia mea.”
Hu ae la ke aloha no ua keiki nei, pino no hoi ka naau i ka mahalo iaia, no ka onipaa loa o ka manao, a hiki ole i ka eha a me ka make ke hoololi ae.
Auhea na koa e like me keia waena o na opio, na ui, ka poe kino ikaika o kakou.
Na me keiki @uku auanei e alakai ia kakou.
Na Ekalesia.
Malao o keia poo, e hoopuka mau aku ai makou i ka moolelo e pili ana i na Ekalesia apuni ka Pae Aina. E kakau ma na mea ano nui, a e hoopuka ia aku no.
KA MOOLELO O KA AHAHUI LUNAKAHIKO O MAUI.
[Koena mai kela pule mai.]
IA HANA 3.
Halawai hou ka Aha ma ka hora 9, malamaia ka hapa hora haipule. Heluhelu ia ka moolelo a ua apono ia.
Noi mai o A. Pali e lawe hou ka Aha a e noonoo i ka hoike a ke Komite o na Palapala Kahea, ma ke kumu ekolu. Hooholoia, ma ka noonoo ana o ka Aha ua apono loa ia kela uku he $150,00 me ka wehe ia no oluna, e like me ka palapala kahea.
Helu mai ke Kakauolelo i na Palapala Hoopii, elua mai a Rev. S. Kaili mai, no ka aie o ka Ekalesia o Waikapu, a me kona pili ana no keia Aha, a e hoohui aku iaia me ka Aha Eianelio o Hawaii. Waiho ia ma ka lima o kekahi komite a na lakou e hooponopono, a me ka ae aku e hookuu ia W. P. Kahale, O. Nawahine, A. Pali komite.
Palapala hoopii a ko Keanae, e noi mai ana i ka Aha e noonoo i ka pono e uku aku ia S. Kamakahiki i $40,00 no keia makahiki, no ka mea he Ekalesia ilihune o Keanae. Hooholo ka Aha he $20,00’i ka Ekalesia, a he $20,00 i ka papa Hawaii.
Noi ia mai e hoomoe ka aha a e noonoo i ka hora 1.
Nono hou mai ka Aha e like me ka hoomaha ana, ua pane mai na haiolelo i ko laua ae i na palapala kahea.
Koho ka Aha i W. P. Kahale, Bikanele, A. Pali, H. Manase, O. Nawahine i Komite ninaninau. Hooholo ia.
Kumuhana 4. Heluhelu mai o Kamakahiki i kona haawina ma ka wehewehe i ka pauku Rom. 7:9. Pela no o Kalapapela Rom. 8:37. Me Keaupuni Dan. 2.45.
Kumuhana 14. ua nele keia Aha aohe keiki no ke Kula Kahunapule.
Noi mai o Adamu Pali i keia manao e haawi aku keia Aha i Palapala Haiolelo no Z.W. P. Kanealii, ma ka noonoo ana ua hooholoia, a na ka lunahoomalu a me ke kakauolelo e haawi aku.
O ka noi a W. P. Kahale e ninaninau i na haiolelo ma ka hoomaka ana ma ka la apopo. Hooholoia.
Kumuhana 6. Na S. Kamakahiki i malama ia Keanae, a me Nahiku na Kahale ia Wailuku a Waikapu, na Keaupuni ia Huelo a Honuaula, na Manose ia Halawa a Pelekunu, no O. Nawahine ia Lanai.
Kumuhana 7. Na ke komite e lawelawe i ke ola Kahu.
Kumuhana 10, 11. Misiona kuloko a kuwaho. Ua hooholoia.
Na kela me keia Kahu a Lunakahiko e koho i ko lakou mau haawina malalo iho:
No ka Ekalesia o Hana, - - $50 00
“ “ Wailuku, - - - 30 00
“ “ Honuaula, - - 10 00
“ “ Waikapu, - - - 10 00
“ “ Waihee, - - - - 50 00
“ “ Kahakuloa,- - 10 00
“ “ Haiku, - - - - - 14 00
“ “ Keanae, - - - - 10 00
“ “ Honokohau; - 5 00
“ “ Kaanapali, - - 12 00
“ “ Lahaina, - - - -60 00
“ “ Olowalu, - - - 14 00
“ “ Kaluaaha, - - - 50 00
“ “ Halawa, - - - - 65 00
“ “ Wailau, - - - - -25 00
“ “ Kaupo, - - - - - 10 00
“ “ Huelo, - - - - - 10 00
“ “ Pelekunu, - - - ------
LA HANA ^
Halawai hou ka Aha i ka hora 9 a.m. Malamaia ka hapa hora haipule, heluhelu ia ka moolelo. Aponoia.
Noho ka Aha ma ka mimamimau ana i na haiolelo, na Kahale e ninau i ke kummu o ka makemake ana i keia oihana kahuna, a me ka makaukau olelo i na mea pili i ke Akua; Na Pali e ninau i ka haipule io ana; na Bikanele e ninau i ko ke Akua ano; no Manase e ninau i ko Kristo ano Akua, a ano kanaka hoi; na Nawahine hoi i ka moolelo o ka Ekalesia, a me ke ano o ka hooponopono ana ia aha. Hooholo e hookuu ia Inaina a me Kaholokai.
Kohoia o pali, Hihio, J@. Kamakahiki i komite, a e hookuu ia o Kaholokai no Honuaula. Aia O. Nawahine, Keaupuni, Kuio, S. Kamakahiki ia J. P Inaina no Huelo.
Hoomaha ka Aha a noho hou i ka hora 1 me 30 minute.
Hoike a ke Komite imi haawina.
1 He oiaio anei, he mai ola ole ka lepera? aole anei e hoola ia ana? Pehea e hana ai a ole?
L. W. Kanealii.
2 O ka pule nui ana i ke Akua, oia anei ka mea e ola ai ka mai, a o ka laau lapaau paha? I ole oia mau mea elua paha? J. P. Kuio.
3 Heaha kau i hana? 1 Sam. 13:11. S. Kamakahiki.
4 He hoapono no anei ke Akua i na hoahanau e noho ana au ma ke ekalesia? J. K. Josepa.
5 E wehewehe ia N@lii 18:44. hapa waena. Kaholokai.
6 E wehewehe ia Esetera 4:14. hapa hope. O. Nawahine.
7 Ka aie o ka ekalesia i ke Kahu, he hewa make anei ia ke hookaa ole ia? Hihio.
8 E lapuwale, Mat. 5:21. hapa hope. Ia’a anei ka hewa ku i ka make? S. K. Kamakahiki.
9 E wehewehe ia ia Ioba 2:4. H. Manase.
10 Heaha ka bapetizo o ka uhane Hemolele a me ke ahi. Mat. 3:11 J. Kaalauahi.
11 E wehewehe ia Mat. 6:33. G. W. Kolobabela
12. Heaha ka pili ana o ka Makua, ke Keiki, ka Uhane Hemolele i ka hookama ana, a heaha ka pomaikai i loaa ana i ka mea hookama ia. Na J. P. Inaina.
13 Heaha ka hookuina mawaena o ka make me ke hewa? P. Keaupuni.
Kumuhana 12. Hooholoia o ka mahina o Dekemaba, oia ka mahina e koho ia ai na lunakahiko o na ekalesia.
Hapai hou mai o Kahale, e kauoha aku i ke kakauolelo ia S. Kaili e holo mai e hui me ke komite ma Waikapu. Hooholoia.
Kumuhana 16. No ka ona rama, e hoi aku na kahu a me na luna ekalesia, a kinai nui aku i keia hewa. Hooholoia.
Kumuhana 17, 18. O ka pule mua o Ianuari, oia ka hope komo o na ekalesia, a o ka Poaha hope oia ko na kula. Hoomauia na ke komite hoeueu.
Kumuhana 20. Ma Wailuku no e hui hoi ai keia Aha, ma ka Poalua mua o Mei, 1889.
Na P. Keaupuni he olelo hoohole. Ke haawi aku nei keia Aha i ka hoomaikai i na hoahanau o nawaieha, a me ka lunakahiko Mr. J. haole, no na kokua oluolu ana i na noa o keia Aha.
E hoopanee ia keia Aha a hui hou ma Wailuku, me ka pule a Rev W. P. Kahale.
O. NAWAHINE.
Kakauolelo o ka Aha Lanakahiko.
Waihee Nov. 30, 1888.
MAI LAHAINA MAI.
Ke hoomakaukau nei na Kula Sabati o Lahaina no ko lakou hoike makahiki hou, a ma ia lano hoi e lulu ai no ke kia hoomanao ola o Laiana O ke kula Sabati o Paauhau kai hookomo e mai nei he $35 ma ka waihona, a ua makemake ia na kula Sabati a pau o ka paeaina nei e hoouna mai i ko lakou haawina ma ka lima o ka Peresidena. O ka puka o keia mau dala no na keiki ma na kula ilihune, e like me ke kula Kamehameha a me kekahi mau kula e ae, no ka pono no o na keiki a ka poe ilihune a koe no ke kumupaa ma ka waihona e like me ke kauoha a ka A. H. K. Sabati Nui.
H. Waterhouse.
Peresidena.
Huelo, Dec. 11, 1888.
H. H. Paleka.
Aloha Kaua,
Eia ka manawa pono a’u e kau wahi leta aku ai ia oe, a oia iho keia:
O ka’u hana ma ka ekalesia o Huelo nei, he nee malie no ka’u mau hana imua. Ua poni ia au i kahu ekalesia no Huelo nei i ka la 25 o Nob. Iho nei a ua hiki mai o Rev. O. Nawahine, Rev. P. Keaupuni, Rev. J. P. Kuia, na kahu nana i hoonoho ia’u
Me ke aloha.
Rev. J. P. Inaina.
Waimea, Kauai.
H. H. Paleka.
Aloha oe,
Ua hiki mai au ma Waimea nei a me ko’u ohana, he oluole ma ka holo moana ana a ua halawai au me na kamaaina o keia aina a he oluolu lakou a hookipa ia’u ma na mea o ke kino, a ua kuhikuhi ia au i kekahi kanaka luna kahiko elemakule, ua halawai me ia a ua ninau mai kela ia’u i ka’u hana, ua hai aku au a ua pane mai kela ia’u, eia ka aina ua maloo, he papaa la mai, aole ka wai o ka uhane hemolele, e mahi oe, a e hoomanawanui hoi.
Mahalo nui au i kana olelo. E hoomanao aku i ke Akua no ka mea, nana no ka hana; e hai aku i ko’u aloha i na hoa hana a pau o Kawaihao ma ka Poakolu. I keia mau la ua mahuahua ka poe he@e mai i ka pule me ke Kula Sabati. Me ka oiaio.
G. L. Kopa.
Hanalei Kauai, Nov. 29, 1888.
Rev. H. H. Paleka.
Aloha oe.
Eia no au i Hanalei nei e noho nei i keia mau la me ke ola kino maikai
Ma ke S Bati iho nei i hala ua noho ka ahaluna Sabati o Hanalei nei e hooholo ia’u i h@olelo no lakou, a ua hooholo lakou ia’u e haiolelo. Ua hoike aku au i ko’u manao imua o lakou aole kupono ia’u ke lawelawe koke i ka hana, oiai ua hele auwana ka’u wahine olelo mai lakou ia’u, ua hiki no ia’u ke lawelawe i ka hana, no ka mea, aole oe i hana i ka hewa aole makou e kue aku ia oe ma ia mea.
O ka mea nui a makou i makemake ai o kou noho mai me makou, i ola ko makou uhane, no ka mea aole he kahu no na hipa ma keia kihapai. A ma ia Sabati iho nei i ha’a la 25 ua hooholo lakou a me ka lakou kokua ia’u he $25 o ka mahina.
Ma keia apana a’u e ike nei i keia mau pule, aole au i ike i na kamaaina o keia apana e ona ana ua nui ka maluhia mamuli o ke kue o ka luna makai o keia apana oia o John Kakina a me na makai, ke makaala loa nei lakou i na ukana e hooili ia mai nei maluna o na moku, no na waiona a pela no me ka poe puhi opiuma a pepa pili waiwai no hoi pela no me na hana lealea e ae, ua nui ko’u mahalo no ke kue loa ia o keia mau hana ino.
Ma keia la e hookolokolo ia ai kekahi pake ha’ekuai, no ka loaa ana he pahu lama i na makai.
Ke malama ia nei no na hana haipule ma keia kihapai me ka maikai.
Oia ae la na mea hou ano nui a’u i hoomaopopo ai. E haawi iho oe i ko’u aloha i na hoa hana o ka ekalesia o Kawaiahao a me na hoaloha a me na lala o ka ahahui opiopio.
J. Kanoho.
Paauhau, Aug. 2, 1888.
Rev. H. H. Paleka.
Aloha oe.
Ua hiki mai au a me ko’u ohana ma Paauhau Hamakua Hikina nei, a hui pu me na kamaaina o keia aina.
Ma ka la 20 a me 21 o Iulai aku nei oia ko’u mau la i komo kauhale ai i ka apana o maunohoano a me Kaala, me ka haipule no keia kaahele ana.
Ma ke Sabasi la 15 nae, ma Paauhau ko’u pule mua, Sabati la 22 ma Kaala i ka hora 9 a.m. ka hora 12 a.m. ma Maunahoano hora 4 p.m., Sabati la 29 ma Paauhau hora 11 a.m. hora 3 p.m. no Honokaa.
Ma keia mau anaina i malama ia ua piha no ke anaina a ua maikai no na hana, ua eleu na luna a me na hoahanau o ka ekalesia a pela no hoi na makua ma ke kanawai ma keia apana oia ka Lunakanawai J. P. Miau a me ka Ilamuku R. A. Lyman, ua komo no kekahi poe o keia ekalesia i ka hoomana Moremona, ua lulu no hoi keia ekalesia i na dala he $31.75 no’u.
Ke aloha aku nei au i na hoahanau a pau o Kawaiahao, a o ke aloha no ko oukou a pau loa.
C. M. Kamakawiwoole.
Waimea, Hawaii.
Rev. H. H. Paleka.
Aloha oe.
Ua hoea mai au me ko’u ohana ma keia aina me ke ola kino oluolu, a eia ke lawelawe nei i ka hana a ka haku ma keia kihapai a ka maua Laiana i hala aku me ka maikai.
Ua hui iho nei au me na hoahanau a ua kuka me ka oluolu, ke nee malie nei no ka’u hana i keia mau la, lana ko’u manao no ka hana a ka haku aole mea nana e hookanalua. Ke hoala hou nei makou i ka ahahui opiopio i keia mau la, a e hoomaka ana ma keia Sabati iho.
E haawi oe i ko’u aloha a nui i na hoahanau ma ka halawai Poakolu a me ua lala o ka ahahui opiopio o Kawaiahao, e paipai aku no hoi ia lakou aole i poho ka manaolana o ko lakou koaopio no ka hana a ka haku, e hooikaika kakou.
Me ke aloha.
John Kalino.
LULU DALA HOOMAEMAE LUAKINI.
Ke hiki aku i ka la 23 o Dekemaba Sabati, e malama ana ka ekalesia o Ewa he lulu dala hoomaemae luakini.
Nolaila, ke kono ia aku nei na nunu lawe lau oliva na lakou ka hana, e hoi mai oukou me na lau oliwa, makia paha ua malo ka wai.
E huipu mai na haipule a pau ma ia la no ka pupu kahi ana ae no na mea i koe no ka uku o ka mea hamo pena.
Owau no me ka oiaia.
S. P. K. Nawaa.
MEA HANA LOLE.
Ua wehe ae nei o Mrs. M. B. CAMPBELL i ka oihana hana a me ka helehele ana i na lole, ma kona wahi noho ma ka helu 73 alanui Beretania, ma kekahi aoao o ka Hotele. O na kokua ana mai na lede maka hanohano mai ka mea i makemake nui ia, a e loaa no auanei ke ku pono o ka lole e like me ka iini. 2203-17
HE MOOLELO
NO KE
Koa o Kanahele.
A I OLE IA
Ka Naita o ke Kapa Kila Lahilahi.
A owai ua mea la nana i olelo mai? Wahi a U@.
O kou hoaloha kahiko a kumu ao. oia o Ligismund.
A mamua o ka hiki ana iaia nei ke pane aku, kani hou mai la ka o-le, a lohe pu ia aku la kaleo o ka moi e kahea mai ana:
E na keonimana, e kii i ka oukou mau lede a hahai mai ia’u, a auhea la ke kaikamahine alii.
Lalau aku la ke kaikamahihe i ka lima o ka naita a pane aku la: O oe no ka’u kavalia o keia po, a mai makau hoi oe; ua ae anei oe i keia?
Me kuu puuwai a pau, a e kupaa no au a hiki i ka make a o ka lei alii o ka maluhia ke kau maluna o ko kaua mau poo.
Ae, ae, i dane mai ai ka moi Louis i kona ike ana aku i ke kaikamahinealii e kui ia mai ana e ka naita eleele.
Ua hiki he waiwai makamae kau e U@ric, a e kau mai ana na maka o ka manao ino maluna ou, aka, o ka pono no kau e hana la, pela no au e makemake ai.
Hahai mai ia’u, a ma kou aoao e ai i ka papaaina.
O Lathaire a me Ekekela ka mua ma ka papaaina, a mahope mai o Karl, a aole nae me ia ke kaikamhinealii, a o ka nita no i hele pu mai ai me ia i ka nahelehele o Sir Pepin o St. Vith a me Sir Rupert o Mountyole.
Ua hele a haena kona mau maka, aole no ka piha wale i ka inaina, aka, no ka oi ae o na kiaha waima ana iinu ai, ua hala aku mawaho o ka mea pono, a mamua o kona noho ana ilalo, peahi aku la kona makuahine iaia, aole nae oia i hele koke mai, palua a pakolu kana hea ana akahi no oia a neeu mai.
E Karl, heaha ke ano o keia, ua hoole mai anei o Constance ia oe.
Aole, aole nohoi au i noi aku, pakike mai ia ia’u, a ae aku au e kukuli imua ona.
E ka lani oia uo kai loaa ia’u iloko o ka nahelehele, ina ua noi aku iaia e kala mai ia’u oiai au e kukuli ana imua ona i kuu wa i ike ai oia no ia, aka hou mai la kana mau olelo a loko loa o kuu puuwai, nolaila aole e hiki ia’u ke ai i ka lepo ana i pehi mai ai ia’u, e kali oe a e hiki mai ana no ka hora, ina paha @ e kaa ana malalo o kou mana.
A na wai e lawe mai ana ke kaikamahine alii?
Malia paha na kahi koa e kapa ia nei e kanaka o Ulric, a ke hoomakaukau nei au i kaula hili no kona kua.
O, e na uhane o ka po, ua paa ia iau aole nae ia i ike.
E Karl, kuu keiki, me ka huki iho i ke poo o kana keiki ilalo, a pane mai la: e akahele oe i kau mea e hana nei, e akahele oe o kau mai no ia maluna o kou poo ponoi iho, ua loe au he nui kona mau hoaloa.
Hiki ia’u ke hoopuehu ialakou imna ou, e like me ka hoopuehu ana a na ilio hae i ka pu-a hi@a, mai kaumaha kou manao no’u.
A eia ae ka moi o Geremania, a ike pu ia aku la no e komo mai ana.
O ka moi mamua loa e alakai ana i ke duke wahine oDarmstadt a e ukali ana mahope ke kaikamahine alii, e alakai ia ana e ka naita o Cluny.
Ua nani a haaheo kona nanaina aole no hoi e hiki i kona mea nana e lawe ana ke huna iho i kona ano, oia pu kekahi i haaheo no ke kaa ana iaia ka hanohano o ka lowe ana i ke kaikamahine alii. Ua hoomaopopo mai ka lehulehu o ke kaikamahinealii ia, aole ma kona mau hoailona wale a me ka ukali koke mai mahope o ka moi, aka, ma kona ano maoli no ua hoike ke kapukapu o kona mau hiohiona iaia iho e hoike mai ana he alii ia.
Hopu ino mai la ke keikiahi i ka lima o kona makuohine me na huaolelo hailiili ma kona waha i pane mai ai:
E nana aku oe e kuu makuahine, o, e hoohaahaa aku ana au i kela poo ilalo, aole ia e haaheo hou e like me keia ke pono ka hana a kou mau ekena o kou po hope keia, a hoolohe mai oe e kuu makuahine me mera kou. A nana iho la keia i ka makuahine ua h@ikea kona mau helehelena, heaha keia ou, ua mai ia paha oe.
E hele oe ma kahi e, mai ninau mai oe ia’u.
I ko ianei ike ana aku i ka naita, ua ano e keia, komi iho la keia i ko ianei lima ma ko ianei umauma, a no kekahi wa, me he mea la ua make keia; a e ole ka pane ana mai a ke keiki akahi no a hoi hou iho ko ianei noonooo e nana pono ana keia i ka naita i ka wa a ke keikialii i haalele mai ai iaia nei.
Kakela a me Kike
HALEKUAI NUI O NA WAIWAI
E laa na paniolo, koi hole,
hamale, koi nui a me liilii, kila,
wili puaa, rula, apuapu, kui o na ano
@, kala kaa, hao hoopaa puka
pohaku hoana, kepa, lei ilio,
la hao ilio, pahi upa, pahi umiumi,
kalapu, kope hulu, pulupulu, oepa ki
lakala, lina hao, ami, keehi, a me
KAULA OPU.
Palau o na ano a pau,
Oo, ho kopala, pe, kipikua, hao kope, au ho a pea aku, kua bipi, lei bipi, kaula hao bipi, uwea pa, uwea keleawe, hao pili piula, kaa palala, ipuhao, ipu ti
PA-PALAI MAKAU MEKE AHO
Ili wai, papa holoi, kopa ala, kaula @uaina, hu
Akai, ehi wawae, hulu pena, a pela aku.
Pena wali, kini nui a me liilii o na ano a pau, me ka pepa kuhikuhi, kena keokei, aila pena, aila hoomaloo, vaniki kaa, a me vaniki moe.
PENA HOOMALOO
a me aniani hale
aila mahu, aila mikini, aila hamo, aila kaa, inika kamaa.
PAUDA, KAKAEPELE, KIANA, PAUDA, UIKI H’UKUKUI O NA ANO HE NUI A LEHULEHU
LOLE MAKEPONO
E NANA
AHINAHINA. KALAKOA. KEOKEO. LEPONALO. HULUMANU. UWE-WAHINE. KUI HUMUHUMU A ME KA LOPI.
Ke kui@ e loaa no ia ma kahi o
Kakela & Kuke!
NA MEA PIULA
Mikini Humuhumu
Mokini a WHEELER a me WILSON
MIKINI A WIILOX MEGIBBS
NA MIKINI A
REMINGTON
He nui loa na mea hao me na ukana ae o na ano a pau, aole hiki ke kai pau ia aku, hewa i ka wai na maka ke ike
Laau Lapaau Kaulana Lo.
A DR. JAYNE.
LAAU HOOMAEMAE KOKO LAAU HOOPAU NAIO. LAAU KUNU. PUNIKILA HUAAI E
PAAKAI. LAAU HOOPAA HI.
@ ua Laau Hamo a Pela ‘ke
KAKELA & KUKE
Hale Hana Lole Nui
KE “PAIONIA O HONOLULU,”
Helu 17 Alanui Ema, Honolulu.
O ka mea nona ka inoa malalo iho, ua makaukau oia e hoolawa a ku i ka lehulehu me na aahu i maiau ia. E loaa no ke kuhikuhi no na ana lole ke ninau ae malaia.
Papale Keokeo, Paleili, Aahu Moepo, &c
E hana ia no na kauoha e like me ka makemake. A o na kauoha mai na mokupuni mai e hooko ia me ka eleu.
A. M. MELLIS.
Bele Telepone Helu 410 2202-@
B. F. EHLERS & CO.,
PAINAPA.
Poe Kuai i na Ano Lole a Pau.
Helu 99 alanui Papu. – Honolulu.
E loaa mau ana na lole hou o na ano a pau maluna o kela a me keia moku
Pahu Hale Leta 351 Bele Telepone 274.
KA AGENA OIHANA HAWAII.
No. 68 ALANUI PAPU KIHI O ALANUI KALEPA, HONOLULU, H.I.
HE AGENA OIHANA, A ME AGENA OHI DALA NO NA BILA A PAU.
KEENA OIHANA.
Na Waiwai paa-kuai a hoolilo aku, a me auhau uku ana.
Na Hale hoolimalima, Rumi, Keena, Aina e hoolimalima, a aelike e ohi i
Na uku hoolimalima o na ano a pau.
No Moraki e ae i ama na ano waiwai a pau.
Na Pepa kuleana aina, e kakau a hooponopono ia me na Pepa a pau e pili ana ma ke kanawai.
Kope a me ka Unuhiolelo ma nao lelo a pau iloko o keia aupuni.
Na Panihakahaka ola, Hale, a me na waiwai o na ano a pau i na Ahahui Pani
Hakahaka helu ekahi.
Na Malama ana i na Buke a me ka hooponopono ana.
E haawai ia no ka mikiala no na Ohi aie ana.
Na Gula, Kala me na Bila kikoo dala, kuai a hoolilo.
Na Hooponopono Hale Dute e pili ana i na waiwai mai ko na aina e mai.
Na Ukana o kela a me keia ano, e kuai a hoolilo aku.
Na Kauoha o na Mokupuni, e hooko ia no me ka eleu.
O na hana a pau a na makamaka e haawai ami ana no ka hooko aku i ke kauoha, e hooko ia no me ka eleu a me ka mikiala.
Agena Oihana Hawaii
1170 1yr. Mar.