Ka Nupepa Kuokoa, Volume XXVII, Number 5, 4 February 1888 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

BUKE XXVII, HELU 5. HONOLULU, POAONO, FEBERUARI 4, 1888.

 NA HELU A PAU, 2166.

 

HOOLAHA KUMAU

 

GEORGE P. KAMAUOHA.

He Loio a he Kokua ma ke Kanawai.

--A HE MEA--

ANA AINA.

E loaa no ma Kohala Akau, Hawaii.

2091-ly

 

VOLNEY VAILLANCOURT ASHFORD,

AKEPOKA.

He Loio, Hoakaka, Pale ma k Kanawai, Hahauolelo, Lunahooponopono a me ka hana ana i Palapala Hoolilo.

LAWELAWE ILOKO O NA AHA A PAU O KE AUPUNI.

E hana ia no na Palapala pili Kanawai a pau.

Keena Hana Helu 21, Alanui Kalepa, Honolulu Hale.           (2150 ly)

 

A ROSA. (AKONI.)

LOIO A HE KOKUA MA KE KANAWAI.

He Luna Hooiaio Palapala.

KEENA HANA: Ma ke Keena Loio Kuhina.

tf.

 

CECIL BROWN.

LOIO A HE KOKUA MA KE KANAWAI?

he Agena Hooiaio Palapala no ka Mokupuni o Oahu

KEENA HANA: Ma alanui Kalepa.

tf.

 

WILLIAM C. ACHI.

Loio a he kokua ma ke kanawai imua o na Aha a pau a keia Aupuni.

He Mea Ana Aina a he Boroka ma na waiwai paa.

Keena Hana. Helu 15, Alanui Kaahumanu Honolulu, oia ke Keena mua iho nei o Kini me Peterson.          2114-y

 

JOHN MAHIAI KANEAKUA.

LOIO A HE KOKUA MA KE KANAWAI.

HE MEA UNUHIOLELO MA KA OLELO BERITANIA A ME KA OLELO HAWAII.

Keena Hana, maluna ae o ka Banako o Bihopa ma.

1yr.

 

S. K. MAHOE,

LOIO A HE KOKUA MA KE KANAWAI.

He Agena Hooiaio Palapala Kope no ka Mokupuni o Oahu.

He Luna Hooiaio Palapala Kepa Poahana no ka Apana o Waialua, Oahu.

E loaa no ma Waialua, Oahu.              2128-1y.

 

JAMES M. MONSARRAT.

(MAUNAKEA.)

LOIO A HE KOKUA MA KE KANAWAI

He Luna Hooiaio Palapala.

            E hana ia no na Palapala Kuai, Palapala Hoolimalima, a me na palapala pili kanawai e @e ma ka olelo Hawaii. Dala no ka hoaie ma ka moraki ma na waiwai paa.

KEENA HANA: Alanui Kalepa.

 

KAMIKA, KAKINA, a me KINI,

LOIO, LOIO, LOIO.

KEENA HANA: Helu--Alanui Papu, Honolulu.       tf.

 

W R. KAKELA.

LOIO A HE KOKUA MA KE KANAWAI

He Luna Hooiaio Palapala.

tf

 

M. THOMPSON,

LOIO MA KE KANAWAI.

Keena Hana, aia iluna o ka Hale Pohaku o Kimo Campble, kihi o na alanui Papu me Kalepa, Honolulu.

HE LOIO IMUA O NA AHA.

            Ina i makemakeia, alaila e haawi no oia kona manao kanawai ma ke kakau ana ma ka pepa, no ke ano o ka hihia e manaoia ana e hoopii maluna o na olelo ike e waiho ia mai ana e ka mea nana ka hihia.                    2121-1y.

 

WILDER & CO. (WAILA MA.)

Mea kuai papa a me na lako kukulu hale na ano a pau, a me na me n@ pono a pau no ka hale.

Kihi Alanui Moiwahin me Papu.        tf

 

E G. HITCHCOCK.

(AIKUE HIKIKOKI).

LOIO, A KOKUA MA NA MEA A PAU E PILI ANA MA KE KANAWAI.

E @hi ia no na Bila Ai@, me ka awiwi

HILO, HAWAII

2114-1yr.

 

HOOLAHA.

G. W. A. HAPAI.

He Luna Hooko Mare.

--A HE--

AGENA HOOIAIO PALAPALA.

E loaa no ma Hilo-taona, Hawaii, ma na manawa a pau.        2152-1y

 

WILLIAM McCANDLESS.

HALEKUAI BIPI O WILIAMA MA KALALENA ma Ulakoheo. Na ano Bipi a me na Ia a pau o ka makeke no na kumukuai oluolu. Uala Kahiki a pela'ku.

290@-1y.

 

HE MOOLELO

--NO--

NAPOLIONA I.

EMEPERA O FARANI.

KA HUAKAI ILOKO O KA PUUWAI O AIKUPITA.

KA HOOUKA KAUA MA NA PURAMIDA.

 

HE MAU la elua keia maki ana o na puali kaua Farani ma ka waoakua one nonlu, ua ike ia aku la ka muliwai Nile mamua o lakou, e kahe mai ana kona wai aiai a haale ma kona mau kapa, oia ka wa i holo ae ai o ka huaolelo o ka hauoli--ua hiki mai lakou i kahi o ka wai e hoomaalili ia ai ka makewai o ko lakou mau puu. Ua holo aku na koa he kanakolu tausani ma kapa muliwai, a ua hoohala ia he mau hora no ka hoomaha ana o ka puali holookoa.

            I keia wahi i hui pu ai ka puali me na moku lawe ukana i komo mai ma ke awa Roseta, a koe aku la na aumoku kaua Farani e ku ana no i ke kaikuono o Abokia. Mai keia mau aumoku mai, ua loaa mai ko lakou mau lako ai a me na lakou kaua e ae, a maki aku la ka puali holookoa no ke kulanakauhale kahiko o Kairo.

            He ehiku la o keia maki ana ma ka aoao hema o ka muliwai Nile iloko o ka aina, ua hiki kokoke aku la lakou ma kekahi aoao o ke kulanakauhale o Kairo i ke ano liula o ke ahiahi o ka la ehiku, ua haawi ia ae la ke kauoha no ka hoomaha hou ana o ka puali no ka la apopo.

            Ua hoouna mai na Moi o Kairo i na kiu e hele makai mai i ka nee ana aku o na puali kaua Farani ma ka aoao hema o ka muliwai Nile, a ua haawi ia aku ke kauoha i na koa lia Arabia he umi tausani, e hele aku a hui me na pualikoa o Napoliona.

            I ua ahiahi la, ua ike ia aku la na kukui o ke kulanakauhale e owaka mai ana iloko o ka pouli o ka po, oia ka wa a Napoliona e hoomakaukau nei i kona kulana kaua ma kekahi aoao mai o ka muliwai. He po hana nui loa ia no lakou ka hoohikihiki ana i na pukuniahi ma na wahi keikei a me ko lakou kulana pale, a maua o ka poha ana mai o la malamalama o ka la 21 o Iulai, ua hookahaha loa ia ua mau Moi lo o Kairo, i ka ike ana mai i ke kulana a na puali kaua Farani e ku nei ma kahi kiekie, e loaa ai ia lakou he kulana maalahi e kipoka aku ai i ke kulanakauhale. O na puramida oioi o Aikupita a lakou i lohe wale ai, e ku mai ana ia ma kahi mamao me ka hiehie nui, a me ke kiekie kohu kuahiwi, oia ka Napoliona i haawi aku ai i na olelo hoolana i ka puali e like me kona ano mau--

            "E na koa--na kela mau huini oioi o na puramida e hoike mai, he kanaha keneturia makahiki i hala, no ka oukou mau mea e hana ai iloko o ka puuwai o Aikupita."

            O ka hauoli o na koa, ua palua ia me ka pihoihoi nui, e laa na olelo e like me keia--he kanaha keneturia makahiki e hala, pela ke kaulana o ka lakou mau hana wiwo olw i hele ai me ka hoomanawanui ma kela mau kula waoaakua one, a o Napoloiona wale no paha ke kanaka i makemake e hapai ia na hana nui me na miliona kanaka e kue aku iaia.

            O ke kula laula mamua o lakou, e waiho hamama mai ana ia mai ke kulanakauhale mai, a ua hiki ke ike ia aku ka hulali mai o na pu a me na pahikaua a no koa Arabia. E welo ana ko lakou hae me ka haaheo, i kinohinohi ia me na momi makamae loa ma ke poo. No lakou hoi na lio nunui i wae kuponoia, a o ka nanaina holookoa o ua poe lio la he umi tausani, me na papale hulu e kolili ana maluna o ko lakou mau poo, aole puali koa lio kaulana e ae o Europa e like me keia. Na lakou i lawe haaheo na kahua kaua mamua aku me ka enemi, aka i keia wa o lakou e hele aku ai e hui me na koa o Napoliona, ua like ia me ko lakou hele ana aku e hoo kui me ka papohaku.

            Ha mau minute keia no ka pihoihoi nui, a o ke kali ana a hiiki mai ia hora, oia wale no ka mea i koe i ua poe koa Arabia la, o ka haawi ae o na Moi elua i ke kauoha ia lakou no ka pii ana mai e huipu me na koa Farani ma kahi kiekie.

            He elima kuea kaua o Napoliona 1 hoonee ia aku ma ka laina e kupololei ana i na puramida, a he hoopakele ana hoi ia ma ke ana pololei 1 kau ia mai ai e ka pukuniahi a ka enemi. E nana hoomau ana o Napoliona i na pukuniahi a ka enemi i kahi i kau ia mai ai ia lakou, a ike aku la oia, aole i kau ia ka lakou mau pukuniahi maluna o na huila kaa, aka, ua waiho maoli ia no maluna o na pahu i hoomakaukau ia, a oia ka Napoliona i hooholo mua ai i kona manao, mamua o ka napoo ana o keia la, e haulehia ai o Kairo, ke kulanakauhale kahiko loa o Aikupita.

            I keia wa i ike ia aku ai ka nee ana mai o ka enemi, a e like me ka mama i loaa i kela poe lio, pela ka awiwi nui a lakou e holo mai nei. O ka nanaina o ka wiwo ole, oia ka haawina i loaa i na aoao elua, e halulu ana ka honua i ka hehi a na koa lio he umi tausani, me ka lakou mau pahikaua e nakeke hele ana ma ko lakou mau aoao. O ka hookui ana o na aoao elua i kahi hookahi, owai la o laua ke nahaha ana a emi hope. Ua pilipu ka hanu o na mea a pau i ka wa e kokoke ana e hui aku a hui mai, oia ka wa a Napoliona i haawi aku ai i ke kauoha i na pukaa o ka eheu akau me hema, a hoomaka ae la laua e ki aku i ka laina loihi pilipu o na koa lio e holo mai nei me ka mama nui, oia ka mea i ike ia aku, ua ulaa pu ia ke one nonolu kahi a na koa lio e holo mai nei a uhi pu maluna o lakou. E hina ana imua, e wala ana ihope, ua make iho la he mau haneri ka heluna, aole nae i hiki kokoke aku na koa Arabia i kahi a na kuea koa wawae e ku mai ana. O na laina aku mahope e pii mai ana, ua hehi aku la lakou i na koa lio e waiho make ana, holo pololei aku la no na koa wawae e ku mai ana imua pono o kou lakou mau maka, a ma kahi he mau anana wale no ke kaawale ua ki like ae la na aoao a elua me ke kukai like ana me na pu kaupoohiwi. O na koa lio o ka laina mua, ua hui aku ka umauma o ko lakou mau lio me ka elau-pu a na koa wawae Farani, a o ka laina koa lio hope loa aku hoi, ua ki aku la i ka lakou mau pu, hoohuli ae la i na lio a holo hoihope aku la no ko lakou kulana mua, malalo iho o ka huini oioi o na puramida e ku mai ana ma kahi mamao.

(Aole i pau.)

 

MAI PONAPE MAI.

            Ua kakau leta o Rev. E. T. Doane, a ua hiki mai ka moku ukana ma Manila mai i Ponape, Sebt 1, ua hoi mai me ka mahu a hiki i Manila, iloko o na la holo he 14.

            Ua hiki mai he mau moku ekolu Oct. 31, me na koa 600, a me kekahi Kiaaina hou. He kanaka lokomaikai a hoopono oia. Ua mahuka aku na makaainana i ka mauna. Ua nui ka aa, a hiki ole i na koa ke kaua aku. Aka nae, ua imi na misionari a me na hoahanau i ka poe i mahuka.

            Ma Nov. 1, a ua hoakoakoa ae ia lakou a me na alii.

            Ua ae na 'lii e hoolohe hou i ke kiaaina Sepania.

            Ua hooluia na kanaka ekolu, na mea io pepehi ai i ke kiaaina mau Iulai 3.

            Ua hoihoi ia he mau koa Manila i mahuka aku ai, a me na pu o na koa i make ai. Alaila, ua hoike ke kiaaina hou, he wa maluhia aku ana keia me ka hoopau ia oa na manao uluku hoala haunaele.

            Ua ae oia i ka hoopau ana i ka pakaha ana o na kahunapule Sepania i na aina o na misionari, me ka hookaa mai i na dala o ka hoopoino ana i na waiwai o na misionari Amerika malaiala.

            He pono no ke pule kakou i ke Akua lokomaikai e mau ana ka lokahi a me ka maluhia mawaena a na kamaaina o Ponape a me na malihini Sepania.

 

EDISEPA FERIDO

KAHIENA KAULANA O BAGALIA

KA OLALI O NA MEA HUNA POHIHIHI

Ka Aina Lawa Pahaohao o Mauna Beria.

 

Ke Kuhikuhi Puuone Poupou Kamahao, a o ka Liona Hanu Meheu Pololei.

 

He Moolelo Enelani i unuhi ia no ke Kuokoa.

IA WA, wehe malie ae la o ukulele Setiwa i kana wahi omole laau keokeo a hookulu iki iho la maluna o ke poo o ua Bakinerosa la.

            Ia wa koke no pili iho la na maka o ua Bakinerosa la, a hiamoe aku la oia no ka wa mau loa.

            I kela wa a Bakinerosa i hiamoe ai, ia wa koke no e like me ka imo ana a ka maka, i kahuli ae ai ke kino o ua wahi Setiwa la mai ke kino ukulele ae a i ke kino kanaka maoli nona hoi ke kiekie he hookahi kapuai.

            I keia wa a Setiwa i lilo ai i kanaka maoli:

            Ia wa koke no, hooho mai la na kiai a pau:

            Auwe! he kupua!! O Setiwa hoi ke kanaka liilii!!!

            I kela wa koke no, me ka eleu nui, luku aku la ua wahi kanaka makalii nei i na kiai a pau loa, a pau loa iho la lakou i ka make ia Setiwa.

            I kela wa, hoi mai la ua Setiwa la a me ka awiwi nui, lilo mai la ka uhane o Bakinerosa iaia a ho-o ia iho la iloko o kekahi omole aniani, [oia no hoi kahi omole ana i lawe aku ai.]

            I ka pau ana no o kana apana hana, ua hoi ae la no hoi kona wahi kino a lilo i naonao, a hoomaka aku la e hele e like me kona ano mau.

            Iaia i hiki aku ai i kona wahi i oili ae ai, pane ae la oia i keia mau huaolelo penei:

            Aloha no oe e ke alii o na aupuni Eiwa, eia o Setiwa ke huli hoi nei no kona aina hanau. A nona hoi ka hooheno ana:

                        O ko'u la heo keia

                        Ke hiu nei na pe'a.

            Me keia mau huaolelo ua Setiwa la i pane ae ai a kalena ae la oia i kona hainaka lele a lele aku la.

            Aole oia i mamao aku, aia hoi, lohe ae la oia i ka halulu o kekahi mea mahope ona e like me ka halulu o na tausani hekili.

            I kela wa, huli ae la na Setiwa la a nana aku la oia i hope, aia hoi.

            Aia hoi, he mea e holo ai ka lia maeele ma kona kino a puni; ka ike ana aku i na tausani o na liona, na bea, na aeko, na ilio, a me na kiai like ole o na aupuni o na Hoku Eiwa.

            Oiai lakou e lele like mai la mahope o Setiwa.

            Ia wa koke no, kahuli ae la ua Setiwa la i kanaka nui e like hoi kona mau ano a pau me ke keupua na Hoku Eiwa, a oia maoli no hoi a e ao, ke nana aku, aohe hoi he wahi a ka maka e hoohalahala ai.

            A e kau ana hoi oia maluna o kekahi lio lele i like me ko ua na Hoku Eiwa la, a pelu hou mai la ua Setiwa la imua o na liona e lele aku ana.

            Nana aku la na kiai me ka manao he enemi keia no lakou.

            Aka, i kona kokoke ana mai, puana like ae la na kiai a pau me ka pane ana mai penei:

            Auwe! he kuhihewa maoli ko kakou manao a pau, he enemi la keia no kakou e lele nei mamua, eia ka a ko kakou haku maikai no o na Hoku Eiwa.

            Maanei, e hoomanao kaua e ka mea heluhelu i ke akamai luaole o keia wahi Setiwa.

            Oia hoi kona hoolilo ana iaia a like loa me ke kupua na Hoku Eiwa, i wahi nona e pakele ai mai ka make mai e kau mai ana maluna ona. A oia hoi ka ua wahi liilii la i puana ae ai i keia mau wahi lalani mele:

                        E kuhi ana no paha oe

                        A he hiki Kaamola nei

                        Ua hilo kaako'u ia

                        Pau kauna a ka makemake

                          Haku ia e ke kanaka makalii.

            I na kiai e moe a make ana i ke alualu i ka enemi, me ko lakou ike maka ole.

            Pane iho la o Setiwa me ke ano hookohukohu na Hoku Eiwa penei:

            E wiki e o'u mau kiai makaala, no ke aha la oukou e lohi nei, no ke aha la ko oukou mea e makaala ole nei, a no ke aha la e hanu ino nei ko oukou mau pukaihu, oiai, aole i loihi loa ko oukou holo ana mai nei.

            Iloko o keia mau olelo hookikina a Setiwa, ua kuhihewa loa no na kiai o ko lakou alii no keia, ka mea hoi a lakou i kapa mau ai i na wa i hala ae he haku maikai.

            No keia mau huaolelo kakana luaole ua moe a make aku la kela kiai keia kiai me ka mama luaole, me ka manao ole iho i ke ola, me he mea la he pauku laau nui ka leo o Setiwa i pane iho ai, a ke nana aku i ua poe holoholona like ole la,

                        Ku ka huelo i pio mahope

                        Liolio lua i ka makinikele

                        Kani ke o i ka hiona

                        Kani ke o i ka piina

i kau a mea o ka mama i ka holo, me ka manao o ka leo io keia a ka haku, eia ka, o ka leo o kahi kolohe Setiwa.

            He mau hora loihi keia lele ana aku o ua poe kiai la.

            Ia wa, kahea aku la o Setiwa mahope o lakou i ka pane ana aku:

            E o'u mau kiai ahonui, e hoi.

            I kela wa koke no, ua huli ae la kela a me keia kiai a huli hoi aku la no ko lakou mau home.

            Oiai lakou e huli hoi ana, pane aku la o Setiwa penei:

            E hoi oukou, a hele hoi au e huli i ka enemi, a e hoomanao no hoi oukou i lohe oukou i ke poha o ka'u o-le, alaila, e hoomanao koke iho oukou, ua loaa ke kolohe ia'u, alaila o ko oukou wa koke no ia e imi mai ai ia'u mai kali a mai lohi.

            Ae like mai la na kauwa a pau a huli ike ae la lakou a pau a hoi aku la no ko lakou mau home.

            Ia lakou ala i hala aku ai, kani iki iho la ka aka a kahi Setiwa a huli ae la oia a hoi aku la me ka maalahi.

            Ina kiai i hiki aku ai i ko lakou aupuni, aia hoi e ku mai ana ko lakou alii ma ka puka, oia hoi o na Hoku Eiwa.

            A oia ka ua poe kiai la i pane ae ai:

            Kahihi, mama maoli no ko kakou haku, emoole, eia mai nei ka oia iloko nei mamua o kakou.

            Pane mai la kekahi o na kiai, aole no paha o kakou mama e like me iala, oiai, ua oi aku no kona mana imua o kakou, na wai ole hikiwawe no hoi.

            Ia lakou i hiki aku ai, ninau mai la ua kupua la:

            Auhea aku nei ke kupua a oukou i alualu aku nei.

            Pane like aku la na kiai a pau, aole no ka hoi oe ike, aole i loaa aku nei.

            Me kou ike iho no hoi, aole i loaa aku nei ia kakou i alualu, o kou ninau koke mai nei no ka hoi ia.

            Pane mai la o Hoku Eiwa, i nahea ko oukou ike ana, ua hele pu aku nei ua me oukou.

            Maanei iho nei no au kahi i kali ai no oukou me kuu manao, e hoi mai ana oukou me ka haawina o ka pomaikai eia ka aole.

            Pane aku la na kiai, e ko makou alii ko makou haku hoi, mai hoao mai oe e hoopahaohao i ko makou noonoo no ka mea, ua ike maopopo lea no makou i kou hele ana ae nei a hoi pu mai nei no kakou.

            Pane aku la ua alii la, he oiaio anei kena mau mea a oukou e kamailio mai nei ia'u?

            Ae, he oiaio no, wahi a na kiai i pane like aku ai.

            Pane mai la ua kupua la, ina pela ua puni aku la oe i ka hoopunipuni a kela kupua, a he mea oiaio no, o Setiwa aku la kena, ke kanaka makalii, no ka mea aole kanaka hiki ke loli ma na ano a pau, o ua wahi peke wawae liilii wale ala no.

            I ka lohe ana o na kiai a pau i keia, auwi like ae la lakou a pau me ka olelo ana i ko laqkou hewa me keia hana ana a oia ka lakou a pau i pane like ae ai, he keu lakou a ka makapo. Aia ka a hala ka puulena i Hilo, alaila olelo ae peia.

            Maanei e waiho kaua e ka mea heluhelu i ke kamailio ana no na mea e ae a pau, a e nana aku kaua no ke ala huli hoi o kahi Setiwa.

            He mau minute helu wale no, hoea aku la ua wahi kanaka makalii la no aupuni daimana a iaia i hoea aku ai e noho ana kana keiki i ke kapu o kona wahi makuakane, a oia kana i pane mai ai:

(Aole i pau.)

 

HE MOOLELO NO

Lonoikamakahiki

--KA--

Pua Alii Kiekie na Kalani.

Ke Alii Nui o Hawaii.

[KAKAU IA NO KA NUPEPA KUOKOA.]

 

UA puka pono aku la no ke keiki iwaho ma ka puka o ua hale nei.

            Ma kahi no a ke alii o Hawaii e noho mai ana.

            A ua ike no ke alii Kakuhihewa, a me kona mau kahu i ka puka ana aku o ke keiki, aole paha lakou i hoomanao i ke kanawai a lakou i kau aku ai i ke alii Lonoikamakahiki.

            Me ko lakou manao paha he naaupo keia alii o Hawaii.

            E oluolu mai nae ka mea e heluheiu ana i keia hoonanea.

            E hoike aku kou mea kakau.

            Ma keia wahi o ka kakou moolelo.

            Akahi no a ike ia ke alii o Hawaii nona keia moolelo.

            Ua komo oia iloko o ka lima koko a me ka paumaele.

            E like me keia:

            I ka wa i puka io mai ai o ke keiki iwaho o ka hale, oia ka manawa i hopu aku ai na lima o Lonoikamakahiki i ke keiki, a paki iho la ma ka kipaepae puka, a he mea ku i ka hoomanaonao ke ike aku.

            Ua kiheahea ia ke koko ma ka puka o ka hale me ka mainoino nui, a ua make loa aku la.

            I ka wa i ike mai ai o Kakuhihewa, a me na kanaka oloko o ka hale i keia hana pepehikanaka.

            Ua auwe mai la lakou me ka leo o ka walohia,

            Auwe! auwe! make ke keiki e!!!

            I manawa i hoomaka aku ai kekahi poe i kela hale a lakou e noho la.

            Me ka manao e puka aku iwaho a holo no ka makau i ke alii o Hawaii, a ua puka io aku no kahi poe a holo aku la i pakele.

            O ke alii a me na kahu, a me kekahi poe mai i koe, aia no iloko o ka hale kahi i noho hoomanawanui ai.

            E u ana lakou i ka make ana o ke keiki.

            A ua ulu no nae ka manao i ka alii Kakuhihewa e puka ma kahi a na kanaka i wawahi ai i ka hale, a holo aku iwaho i pakele kona ola.

            Ua ike aku la ke alii o Hawaii i ka puka ana o kekeahi poe iwaho a holo aku la.

            Ua olelo aku la oia me ka leo moakaka a koikoi hoi i ka poe i koe iho iloko o ka hale i ka pane ana aku:

            Mai hoao kekahie holo mai iwaho, no ka mea, ua kapu owaho nei no makou.

            Ina e hoao ana kahi mea e like me ke keiki, alaila, o kona ola no auanei ke pani ma ia wahi e like me ke keiki e waiho nei imua o ko kakou alo.

            Nolaila, he mea malama ka la o ke ola, a he hookahi ka la o ka make o ka make no ia.

            Noho ana noonoo o ka auanei i ke kino. Aohe ka'u he huakai hookahe koko.

            He huakai maikai honua, aole hoi e hihi ua hana ia mai nei no e oukou ka hewa.

            He hewa ka oukou i ka noho malie, o ka ai a me ka i-a ka mea hoo maloko.

            O ka la ka mea nana, a me ke noho like ma ke ano hoaloha.

            Alaila loihi na la o ka noho loihi ana maluna o ka honua.

            Ia manawa i pane mai ai ke alii o Kakuhihewa me ka leo hoohaahaa me he pepe la imua o Lonoikamakahiki i ka i ana aku.

            E oluolu mai kou kiekie e ke alii o Hawaii a me kou lokomaikai e kala mai i ko'u hewa.

            No ko'u kaukanawai ana aka nei ia oe a me kou mau kanaka.

            Ua hewa loa au ma kela hana ana.

            Na'u no i kai i ke kanawai, a na ko'u aoao mua no i uhaki i ke kanawai.

            A ua pono kou hoopai ana, o ka hua iho la ia o ko'u kanawai ua kahe ke koko mamuli o ko'u hoopaakiki.

            Ia manawa no hoi i hoopuka aku ai o Lonoikamakahiki i kana mau huaolelo i ku i ka walohia:

            Ae, he oluolu loa au e kala aku i kou hewa.

            Aole au i manao e hookahe ia ke koko imua o kou alo i keia la, aole hoi e hihi o ko kanawai no au i kau ai.

            He aloha nae wau i ke keiki, oiai, aole oia i hana i ka hewa.

            O kaua no o na lii ka i hana i ka mea e hewa ai.

            Nolaila ua make mauwale ke keiki mahope o ka kaua mau hana, a he aloha ko'u i na makua nana keia keiki i make iho la ia'u.

            Ia oe anei e ke alii o Oahu nei i ke kau ana i ke kanawai?

            Ua waia ka'u huakai no ka make ana iho la o ke kanaka ia'u.

            A loaa iho la ke kiko eleele iloko o ko'u moolelo ma keia hope aku.

            A he mea hiki ole hoi ke holoi ia me ka wai.

            Ina he oki loa no ka ili i ka lepo, alaila o ka wai wale no kona laau lapaau e pau ai, aole nae pela kela kiko eleele a'u i hana iho nei.

            O ke ola makame, he mea nui loa ia, he mea loaa ole hoi ke ola o ke kanaka i ka lalau ae.

            No ka mea, ua hele aku la oia i ke ala hoi ole mai.

            No ia mea ke kaumaha nei ko'u naau ma keia hana ana iho la a'u.

            Eia ka he huakai pephi kanaka keia a'u i holo mai nei, auhea la hoi i ike ia na ulia poino ma keia holo ana mai nei.

            I kela makawa aole e hiki i ke alii o Oahu nei ke hoopuka leo mai, ua ike no hoi ia.

            Oia no ka mea i make ai o kela keiki, na ua alii nei i kau i kona kanawai lalau.

            E kapu oloko o kona hale i ka poe o waho ke komo mai, a ua kapu hoi o waho aole lakou e puka aku.

            Alia nae hoi la e huki ana i ka ihu i kahi oioi, i ke aloha i ke keiki i make aku la.

            Nana no i kau i ke kanawai, a na kona mau ohua aku la no i uhaki aku la i ua kanawai la ona.

            Oia hoi ke keiki i puka aku la iwaho a loaa mai la i ka poino ulia wale ma kona kino.

            Ke ike aku la no o Kakuhihewa ua ili ke koikoi a me ke kaumaha o ka make ana o kela keiki hala ole mamuli ona.

Oia no ka mea i hiki ole ai ke olelo ino aku i ke alii o Hawaii.

            No ka mea, na ua alii nei no o Oahu nei i hooni i ka wai ua lana malie.

            Ike nae oe la i ka pii o ka wai i ka akolea.

            Ma keia wahi o ko kakou moolelo, e hoopoina loa aku ana kakou i na mea e pili ana i ke keiki i moe kau a moe hooilo aku la.

            E hoohuli hou ae ke ala o ko kakou hoonanea ma ke kuamoo pololei.

            Ia manawa i olelo mai ai o Kakuhihewa i ke alii o Hawaii:

            E, auhea oe e ke alii o Hawaii.

            E hoopau i ko kakou noonoo ana no na mea i hana ia iho la e kaua.

            Ua ili ka hemahema ma ko'u aoao, a eia wale no ka'u noi aku ia oe e ke alii o Hawaii.

            Aole anei e heluhelu aku oe i ka inoa o kaua?

            I aku la o Lonoikamakahiki e aho no kou mau kahu e heluhelu aku i kahi i koe o ko kaua mau inoa.

            Owau wale no nei e heluhelu aku nei aole wahi mea a heluhelu iki mai o kou mau kahu.

            Ina aole hoi o kou mau kahu, alaila, o oe no hoi ke heluhelu mai i lohe aku hoi makou, e like me ko oukou hoolohe ana mai nei i ka'u i heluhelu aku nei.

            O ka'u paha ka pololei a o ka oukou paha.

            I aku la o Kakuhihewa:

            Ua ane like no paha, oia no hoi ko'u mea i manao ai o oe no e ke alii o Hawaii ke heluhelu mai a hiki i ka pau ana o ka inoa.

            Ia manawa i olelo aku ai o Lonoikamakahiki aole pela, owau heluhelu, a o oukou no hoi kekeahi e heluhhelu mai, i ike ia aku na hua haule a me na hua i like loa o na inoa o kaua.

            Ia wa i olelo aku ai o Kakuhihewa, i na pela, ua hiki, he mea maikai io no ia.

(Aole i pau.)