Ka Nupepa Kuokoa, Volume XXVII, Number 4, 28 January 1888 — Page 1

Ka Nupepa Kuokoa

KE KILOHANA POOKELA NO KA LAHUI HAWAII

BUKE XXVII, HELU 4. HONOLULU, POAONA, IANUARI 28, 1888.

NA HELU A PAU, 2165.

 

HOOLAHA KUMAU.

 

GEORGE P. KAMAUOHA.

He Loio a he Kokua ma ke Kanawai

-A HE MEA-

ANA AINA.

E loaa no ma Kohala Akau, Hawaii

2091 - @y

VOLNEY VAILLANCOURT ASHFORD,

AKEPOKA.

He Loio , Hoakaka, Pale mak Kana@ai, Kaka@oilo, Lunahooponopono a me ka hana ana @ na Palapala Hoolilo.

LAWELAWE ILOKO O NA AHA A PAU O KE AUPUNI.

     E hana ia no na Palapala pili Kanawai a pau.

     Keena Hana Helu 21, Alanui Kal@pa, Honolulu Hale.    (2150 ly)

 

A ROSA.(AKONI.)

LOLO A HE KOKUA MA KE KANAWAI.

He Luna Hool@lo Palapala.

KEENA HANA: Ma ke Keena Loio Kuhina.

tf.

 

CECIL BROWN.

LOLO A HE KOKUA MA KE KANAWAI?

@@ @@ena Hoolaio Palapala no ka Mokupuni o Oahu

KEENA HANA: Ma alanui Kalepa.

tf.

 

WILLLIAM C. ACHI.

Loio a he kokua ma ke kanawai imua o na Aha a pau o keia Aupuni.

     He Mea Ana Aina a he Boroka ma na waiwai paa.

     Keena Hana, Helu 15, Alanui Kaahumanu Honolulu, oia ke Keena mua iho nei o Kini me Peterson.         2114-y

 

JOHN MAHIAI KANEAKUA.

LOIO A HE KOKUA MA KE KANAWAI.

HE MEA UNUHOLELO MA KA OLELO

BERITANIA A ME KA OLELO HAWAII.

Keena Hana, maluna ae o ka @anako o Kihopa ma.     1yr.

 

 

 

S. K. MAHOE.

LOIO A HE KOKUA MA KE KANAWAI.

 

He Agena Hooiaio Palapala Kope no ka Mokupuni o Oahu.

He Luna Hooiaio Palapala Kepa Paahana no ka Apana o Waialua, Oahu.

     E loaa no ma Waialua, Oahu.     2128-1y.

 

JAMES M. MONSARRAT.  (MAUNAKEA.)

LOIO A HE KOKUA MAKE KANAWAI

He Luna Hooiaio Palapala.

     E hana ia no na Palapala Kuai, Palapala Hoolimalima, a me na palapala pili kanawai e ae ma ka olelo Hawaii. Dala no ka hoaie ma ka moraki ma na waiwai paa.

     KEENA HANA:  Alanui Kalepa.

 

KAMIKA, KAKINA a me KINI,

LOIO, LOIO, LOIO.

KEENA HANA: Helu - Alanui Papu, Honolulu.   @.

 

S. B. DOLE.

LOIO. LOIO. LOIO.

He Luna Hooiaio Palapala.

KEENA HANA: Helu 15 alanui Kaahuman   2079 1y

 

W. R. KEKELA.

LOIO A HE KOKUA MA KE KANAWAI

H@ Luna Hooiaio Palapala.    @@

 

M. THOMPSON,

LOIO MA KE KANAWAI.

Keena Hana, aia ilu@a o ka Hale Pohaku o Kimo Camp@le, Lihi o na alanui Papu me Kalepa, Honolulu.

HE LOIO IMUA O NA AHA.

     Ina i makemakeia, alaila e haawi no oia kona manao kanawai ma ke kakau ana ma ka pepa, no ke ano o ka hihia e manaoia ana e hoopii maluna o na olelo ike e waiho ia mai ana e ka mea nana ka hihia.    2121-1y.

 

WILDER & CO. (WAILA MA.)

M@@ kuai papa a me na lako kukul@ hale @@ ano a pau, a me na m@ @@ pono a pau no ka hale.

     Kihi Alanui Moiwahi@ me Papu.  @

 

E G. HITCHCOCK.  (AIKUE HIKIKOKI).

LOIO, A KOKUA MA NA MEA A PAU E.

PILI ANA MA KE KANAWAI.

E o@i ia no na Bila Aie, me ka awiwi   HIO, HAWAII.  2114. 1yr.

 

WILLIAM McCANDLESS

HALEKUAI BIPI O WILIAMA MA KALALENA ma Ulakoheo. Na ano Bipi a me na la a pau o ka makeke no na kumukuai oluolu.  UalaKahiki a pela'ku.  2002-ly

 

HE MOOLELO

-NO-

NAPOLIONA I.

EMEPERA O FARANI.

 

KA HUAKAI ILOKO O KA PUUWAI O AIKUPITA.

ONA Karistiano, na kauwa kuapaa a me na poe i lawe pakaha ia ko lakou mau pono, ua hali nui mai la lakou e kokua i na kumuhana a Napoliona i waiho aku ai, ka hoopoopono ana i na kanawai a me ka oihana o na luna aupuni, a me ka hoolilo ana i keia awa, i kikowaena no na waiwai kalepa me na aupuni e o Europa.

     He eono wale no la o ka noho ana o Napoliona me konapuali i ke kulanakauhale o Alekanedero, ua makaukau hou ae la oia no ka maki ana aku e hui ne na Moi o Kairo. He kanaono mile a lakou e hele ai maluna o ke one nonolu, me ka loaa ole o kekahi laau e ulu ana a me ka wai a hiki i ka muliwai o Nile. Ua lawe ia na lako ai e hiki ai ke lawa lakou mai kahi wahi aku a i kahi, me ka uhai pu ana hoi o na aumoku kao lawe koa ma ke alo ae o Roseta a pii ma ka muliwai Nile, a ilaila e huipu ai me na puali koa, a hookahi ka hele like ana iloko o ka aina o Aikupita Haahaa.

     Ma ke kakahiaka o ka la 6 o Iulai, ua poha mai ka la me kona malamalama nui, e kiloi ana me ke kamahao lua ole i ka la a ke kanaka i hele aku e lilo i Hoopakele nui no na miliona kanaka i hookauwa kuapaa ia malalo o ka wahahee o ka hoomana he Kaula mai ke Akua mai. O ka aina a lakou e hele aku ai, he one nonolu ai i ulu ole ia e kekahi laau, a he mau alualua wai-kai kakaikahi  hoi ke waho ana ma ko lakou alahele ua hookomo ia i ka laau make e na koa Arabia. He mau puuone nunui ke alai mai ana mamua o ka maka o na puali koa Farani, a ua hiki no ia lakou ke ike aku i kahi wa i kamaalo ae o  na koa Arabia ma kahi mamao o na kahoaka aouli lani maluna o na kamelo. He eha lao ka maki ana o kapuali holookoa, a hiki i  ka muliwai Nile e holo la i kai Roseta.

     O na huakai a Napoliona me keia poe koa no ona iloko o Italia ma na alahele kuahiwi o ka Mauna alapa, ua maa na koa i ka hele ana iluna o na aimaikai, me ka oluolu o ka ea a me ka malumalu o na laau o kanahele. O keia wahi a lakou e hele nei i papalua ia ka wela o ka la a me ka nonolu o ke one, aohe mau mea maluhiluhi e ae e like me keia, ma ka hoike ana mai o ka helehelena o na koa i ka wela a me ka maloeloe o na wawae a pihapu na kamaa i ke one. O Napoliona, ike aku la oia i ka pulu o ka lole o na kanaka i ka hou, ua lele iho la oia ilalo mai kona lio mai, a hele aku la ma ka aoao o kona mau koa, e lawe ana i ka haawina like o ka maluhiluhi o ke alahele one nonolu me ke koa haahaa loa   O keia hana a Napoliona, ua lilo mua iaia ka puuwai o kona mau koa o ka hele ana maluna o ka aina malihini me ka maluhiluhi.

     He mea mau no na puali kaua a pau e noho alakai ia ana e na kanaka naauao a wiwo ole, ua ulu mai he mau manao lili no na huakai pilikia e like me keia ke ano.

     Ua pinepine na olelo e pahola ana ma kekahi hapa o ka puali-"E hoo ulu ia kekahi haunaele iloko o ka puali, a e huli hoi aku lakou no ka home. No ka mea" wahi a lakou e olelo ai-"O ka aina keia e hele ai, e pau ana kakou i ka make iluna o keia one nonolu."

     Lohe iho nei o Napoliona i keia mau olelo e hoolala ia nei e kekahi mau aliikoa, me ka hala ole ana aku ia lakou i manawa e hoomau loa ia ai ka lakou mau hoolala ana, ua hele koke aku la o Napoliona imua o ua poe aliikoa la, a hai aku la i na huaolelo ikaika e hookaakaa koke iaai ko lakou mau maka-

     "Eia oukou ke kukakuka pinepine nei me na olelo e hookue ai i ka maluhia o ka puali. Ano! I keia manawa e hoopau ia ai ka hapai ana i kela mau olelo-no ka mea, aole o ka hiki ana o ko oukou ana kiekie i ka eono kapuai maluna o na koa e ae, he mea ia no oukou e pakele ai i ke kipoka ia aku iloko o na hora elua mai keia manawa aku."

     O keia na lawelawe ana o ka eleu i loaa ia Napoliona iloko o na alahele kaulana o kona ola ana, a o kela a me keia kauoha pakahi iloko o kona mau puali, aole loa hookahi o lakou iwaena o na tausani koa e hookui aku i kekahi mau olelo o ka hoihope imua o Napoliona. O ke kaula kaohi o ka hookele ana i ka puali, aia no ia malalo o na kuhikuhi ana a me ka pane ana aku o ka waha o keia kanaka opio, oia iho la ka keia poe elemakule e hooko koke ai iloko o ka manawa pokole.

     O ka wela kikiki o ka la e iliki pau ana iluna o ke kula one nonolu, e ikeia ana na koa e kiola ana i ko lakou mau kuka i ka honua, a e kawele @na i ka hou o ka lakou mau kino. E haule ana kekahi poe ma ke alahele mamuli o ka ikaika wela ino, a o ka Napoliona hana ka haawi aku i na kauoha e haawiia na kokua a me na malama ana i kela poe koa. O ka maluhiluhi  e loaa ana i ka puali, oia ka haawina like i loaa aku ia Napoliona. O na koa e hoomaha ana ma ke alahele maloko o na lua one, oia like kahi a Napoliona e moe pu ai me kona poe koa, a o ke one nonolu no kona uluna e moe ai. Oia ke kanaka hope loa e haule iho ai no ka hooluolu ana maluna o ke one, a oia no hoi ke kanaka mua loa e ala ai i ka wa kakahiaka nui a hele makaikai aku iloko o ka puali.

     He mau la keia hele ana maluna o ka waoakua one me ka pilikia nui o ka pokole koke ana o ko lakou lako wai, i kekahi a kikiki o ka la, ua hiki aku lakou i kahi e ike ia ai o kekahi wahi aiai mai o ka moanawai, oia ka@wa i holo ae ai o ka hauoli a puni ka puali, no keia lokowai o ka hui ana me lakou iwaena o ke alahele. Ua holo aku na koa i kahi o ka aleale wai e halana mai ana, a o ka mau o ko lakou hookokoke aku ilaila, pela ka mau o ke ano loihi ana aku o ua lokowai la, a hiki wale i ka manawa a lakou i hoomaopopo aku ai-o ka wai l@ula ia a ka wahine hele la Kaiona i alualu i ke kaha puu one pua ohai.

     I ka wa i uhi mai ai o ka po, ua hooluolu iho la ka puali e like me ka mea mau o ka hiamoe maluna o ke one noolu. Ua hele makaikai aku o Napoliona me kekahi o kona mau ukali i na puu one nui e ku mai ana ma kahi ma mao iki aku, a oiai lakou malaila e hoohala ana i ka manawa ma ke kamailio ana, ua ike kokoke loa ia aku kekahi mau koa lio Arabia hoomakakiu e hookokoke mai ana i kahi a lakou e noho ana, ia manawa lakou i holo koke aku ai no ka puali a puhi ia ae la ka o@le hoomakaukau, oia ka wa a na koa maluhiluhi i ala koke ae ai mai ko lakou wahi moe one ae a ki aku la i ka lakou mau pu.

     He pakele ekahi ana keia o Napoliona mai lawe pio ia e na koa hoomakakiu Arabia, a oi kana i pane ae ai i keia mau huaolelo:

     "Aole loa i kakau ia ma na wahi kiekie-e haule pio au a pepahi ia e ka lima o na koa Arabia."       (Aole i pau.)

KA MAKA AIANI

     O ke kumukuai o na makaaniani e kuai ia nei ma ko kakou kulanakauhale, ua like pu no ia me ke kumukuai ma Amerika. Ua lehulehu na hale hana maka aniani i hoala ia iloko o keia keneturia mamua o ka wa i hala, a no ia nui lehulehu, ua paio a paio mai na poe kuai a imi ike o ke aniani, ua loaa na aniani ano hou, hoonui aku i ka ike a me ke kupono.

     O kekahi mau aniani i kuai ia no keia kumukuai, ua kuai ia ma Amerika he @ dala no ke aniani hookahi, a he holopono loa iho la ia ke loaa na aniani o ia ano. Ma Geremania a me Farani, ua kuai ia na maka aniani maikai loa no ke kumukuai he $50 a oi aku no hoi i kahi manawa. O ia ano aniani oia na maka aniani e mau ai e ka ike a me ka ikaika o ka maka no kekahi mau makahiki loihi.

     Ua manao wale ia iloko o kela mau lahui, o laua na lahui oi loa aku o ke kau mau i ka maka aniani, a ua hiki ke koho ia iloko o ko laua mau miliona kanaka, ua iki ke loaa ka helu hookahi maka aniani ke hui pu ia na kane, wahine me na kamalii iloko o kela a me keia 400 kanaka.

HE MOOLELO NO

Lonoikamakahiki

-KA-

Pua Alii Kiekie na Kalani.

 

Ke Alii Nui o Hawaii.

 

[KAKAU IA NO KA NUPEPA KUOKOA.]

 

IA manawa i hoka iho ai ke alii nona ka akena ana he aina i-a kona o Oahu nei.

     I aku la o Lonoikamakahiki, pehea iho la ua aina i-a nei ou e ke alii Kakuhihewa?

     Pehea iho la hoi, akalii no a maopopo ia'u he aina i-a ole ka ko'u o Oahu nei.

     E hoomaopopo pono no paha oe a ina aohe kee o kou aina, alaila, pono ke kaena ae ka oiwi, aole ka auanei i ike pono oe i ke ano o kou aina, he pono noho aina wale iho no kou, a mo'a i ke kanaka he waha kou e hamama ae a haupa iho.

     E oluolu oe e ke alii o Hawaii e heluhelu hou mai i kahi aku i koe o ua inoa nei.

     Ae, he pono nae hoi oe e hoolohe mai.

     A hoomaka aku la ke alii Lonoikahiki e heluhelu hou.

     O ka nalu wale i kapoiki

     O kona a ka malu o Halu'a

     I ka haka kau a ka manu

     I koekoe waiwai ole

     Ku ana hoolehelehe kii ana

     Kuhi i uka ka pono

     O ka puawa hiwa o uka o Paoa

     O ka uala moe aloaloa o kiokio

     O kalo hauna papaa lepo o Ha'o ka pokii

     O ka wai kikii a kane i Waipa

     No Waipa no ka ua

     Aha-Aha-la-e

     Ka hakai ka moana

     Kihekihe lanaki

     O luna ka haku kalauao

     A loaa i ka olo o ka Puhi

     Ka haku moana kanaloa

     Oi ana, E hoohainu a

     E hoohainu ana kanikele makua i kona awa

     Moe ana hoi Hua i ke kapu

     Amo ana i ke koi ke koi kua waa

     Kua ana i Wailua i ka Newenewe

     Kiai i ke awa o Kalalea

     A kii i ka pali o kahalahala

     Hoolono mai ana onkou

     O ke kini iluna o Palena ko oukou pokii

     O kupihea uwe Olaa

     Owala na Iku e.

     Oia iho la ka pau ana o ka pauku mua o kuu inoa.

     A ma ka pauku elua, oia ka ko mau kahu i heluhelu mua mai nei.

     E kuhi ana au ua paa la ia oe, a me kou mau kahu kuu inoa, aole ka.

     E pono nae hoi oukou e hoopaa i ka pauku mua a u i heluhelu aku nei ia oukou.

     Ke ku lohaloha la ke alii Kakuhihiwa, ke okuu mai la hoi na kahu, a ua kokoke loa lakou e hopu i ka laau nui a ke alii Kekuaokalani ia Hoolehelehekii.

     I hou mai la na kahu o Kakuhihewa ia Lonoikaakahiki.

     E heluhelu ai ana oe i ka pauku elua.

     E heluhelu aku ana au, a oia no nae ka pauku a olua i heluhelu mai nei, aka nae, aohe hoi i pau pono aku nei ia olua ia pauku i ka heluhelu ia.

     I ike aku hoi au i na hua i haule.

     Ia kahi ka Honua ia Elekaukama

     O halala ka ulua Onae

     O nana na maka i ke ehu a Kama

     O Lua mahaia

     O Lua kamaia

     O Laloia, o Lalo ae kama

     O hoiwili kaloko i ka manawa

     O kukulu Halaanaiani

     O hanee aku

     O hanee mai

     O hanee i ke au kama

     O ka papa o ka lewa o Kuoni

     O pepeilani

     O-ha-ka niho lua

     O ke kupua i awaawa ke au

     O Haki o wikani

     O-ha ko koaie e Lono

     Opuu ka honua ka maka lewa

     O Noia i ka moo o Wakea

     O kino opiopi

     O hookahua o Lonoikaeha i ke alo o Waimea

     O ka-ka-eke

     Ia alii ku ka Ieiewe

     Wehe ka eke

     Maa ka eke

     Paa ka eke

     O uhao ka eke

     O ka ka eke

     O ka eke ia kaeleha elua

     Elua hono ke ana ke ana

     Elua maile pai la

     Elua Anaopili

     Hookahi o Honokawai

     I ka wai nui

     I kohu ia Kekaa

     Eha Halamahinahina

     Ka luna i Alaeloa

     Eha la Aina Hono

     Honolua, Honokahua-

     Honokohau, Honopou

     Aha la aina hono

     Alima ia Kahakuloa

     Kaukini ia Kahakuloa

     Kahakuloa la aono

     Makalina la ahiku

     Walu Waihee a like

     Na mahele i Wailuku

     He umi hookahi

     Ekahi Wailuku

     Ekahi Koolau

     Hookahi i Kahooku i kahaelelu, elua

     Elua honohono

     Elua kike

     Elua moe mai

     Elua ala mai

     Elua noho mai

     Elua ku mai

     Elua Nuaaialua, elua

     Elua i ka-piliwale, ekolu

     Ekolu Papa

     Ekolu makaiwa

     Ekolu noho o'u-e-noho o'u-e-eha

     Eha Waipio

     Eha Halehaku

     Eha ka uka o ke kaha

     Elima Huleia

     Elima Makawela

     Elima Pauwela

     Elima na kanaka alualu i ke kaha i Awaau.

     Ehiku Pulehu

     Ehiku mana

     Ehiku ka ohia i Paukauwila, he oi ewalu

     Ewalu o kela pali o Keiki

     He oi keiki noho wale

     Noho wale o ke ka@a wale o Paia

     Ee oi eiwa, eiwa

     Eiwa o Hana, a eiwa

     Eiwa Lanakila

     Eiwa i ka apai wale i Kauiki, he umi

     He umi Kipahulu

     He umi Kaupo

     He umi i ke alapii i Aalaloloa a elua

     Elua Ukumehame

     Elua Olowalu

     Elua Launiupolo i Lahaina he umi

     He umi o Makila

     He umi o Lele

     He umi o Kaula

     He umi Niihau

     He umi Kauai

     He umi Oahu

     He umi Molokai

     He umi Lanai

     He umi Kanaloa

     Hoolawaka Hono ka hookui o na moku o Kamalalawalu

     A Puuiki au a Puuiki

     A kilua au a kilua

     A kilele  A kihoa

     He ka kiki

     Ipukai kiki

     Oho ehu kiki

     He hookiki-ki-ki e Lono

     O ka Ipo-a-@oa

     Aohe i moea Kualoa

     Loa la

     Kalawalawa la

     Kapili i ka hoaloha la elua

     Elua aku Hauula ma

     Ma Hauula ma

     Ma kaipapau

     Ma Oiolele

     Kaulua ia moe a eono

     Eono Honouliuli

     Honouliuli i Hoaeae

     Me Waikele a Waikele

     A Waipio, a eiwa.

     Eiwa kahalekee i Makaua ia Kaneloa he umi

     He umi ia Keawaula ke kaha ia kakaia, aia

     Aia Hilo a

     Ke ako mai la

     Kaupaku mai la

     Ke koli mai la

     Paepae mai la

     Papaku mai la

     Ka hoaka mai la

     Kaumaha mai la

     O ka piko mai la

     Ooki mai la

     Halii mai la

     Kamanu mai la

     Ka moena mai la

     Ke moe mai la

     Ke ala mai la

     Hoolako mai la

     O ka ai mai la,

     O ka i-a mai la

     O ka wai mai la

     O kanaka oloko

     He ai, he i-a

     He ai mai la

     Maona mai la

     Hoomoa mai la

     Ke kupa mai la

     Aia' Aia ka Ipo e Lono

     A oia ko'u Inoa i lohe mai oukou

     A oukou hoi e lawe wale nei i ko'u Inoa

     Pehea ka oukou i manao, ai e loaa ana no anei he hua kakuhihewa iloko o keia inoa? Aole paha ea?

     Ina e heluhelu ia keia inoa a hiki i ka pau ana, aole e loaa ka hua inoa kakuhihewa. O ka pua Lono wale no ke loaa.

     No ka mea hoi, no keia alii no keia inoa i haku ia ai.

     No Lonoikamakahiki ka Pua a ka Lani

     Malia nae paha hoi i loaa ole ka hua kakuhihewa i ka'u heluhelu ana.

     Ina paha na kou mau kahu e heluhelu mai ua inoa nei hoi o kaua, alaila, e loaa anapaha ka hua kakuhihewa iloko o keia inoa.

     Nele ae no paha i na pauku ma, oki loa aku o hope.

     E aho paha e hoao, e heluhelu mai o ua mau kahu nei ou, ilaila paha kaua e ike ai i ke au nui a me ke au iki, whai a ke alii o Hawaii.

     Ke kulou la e poo o ke alii Kakuhihewa ilalo, no ka maopopo no iaia, aohe no i komo kona hua inoa iloko.

     No ka mea hoi, mai iaia aku no i i paa ai i na kahu, e like me na mea i hoike mua ia ma ke kakau moolelo ma na helu i hala.

     O ka heluhelu paha a laua, a o ka heluhelu ole ua likeno a like i ko'u manao.

     Wahi a Kakuhihewa, e aho paha nau no e heuhelu mai a hiki i ka pau ana o ua i@oa nei.

     Ka! he mea kupanaha ia ia oe e ke alii i ko hoole mua i ko laua heluhelu mai.

     Ua ike no ka hoi oe, aohe nou ka inoa.

     Pehea la ka hoi oe i hana ai e like me keia ana i manao ai?

     A kau ae nei hoi oe i ke kanawai.

     Kapu makou owaho nei aole e komo aku iloko o ka hale, aohe i loaa mai nei ko makou mau wahi kapa.

     Ehia mea aloha o ka ili i ka wela o ka la.

     A noho mai nei hoi oukou i ka hale i kahi malu.

     Aka nae, he naaupo no ia kanawai au e ke alii i kau ai.

     Heaha auanei ke ola o kahi kihapai iki, haalele ia mai la ka e oe ke kihapai nui owaho nei.

     He nui ko waho nei mau pono.

     Eia iwaho nei ka ai, eia iwaho nei ka ia, ka wai a me na pono no a pau e ola ai o ka noho ana.

     O ko oukou noho ana nei ia iloko o ka hale, ai oukou i ka ai, ka ia a me ka wai, ai pau ae.

     Manao ae oukou e puka mai i mau mea ai na oukou iwaho nei, alaila o ko oukou pilikia aku no ia ia makou.

     Mo ka mea, ua kapu owaho nei no makou.

     Ina aole e heluhelu ana kou mau kahu i ua inoa nei.

     Alaila he mea maopopo loa no no'u no ka inoa aole nou e ke alii o Oahu nei.

     Ia anawa i kuhau ai na kahu o Kakuhihewa.

     Ua maopopo ia laua e kaa ana ka lanakila o ka inoa i ke alii o Hawaii.

     A he mea oiaio ka ke alii o Hawaii i olelo ai e komo aku ana lakou iloko o ka pilikia.

     Oia hoi ke alii o Oahu nei a me kona mau kanaka.

     He wahi kihapai iki ko lakou o loko o ka hale.

     Aia iloko o kela hale alii o Kakuhihewa he wahi keiki uuku.

     I ka wa i loaa ai ka pilikia hanawai i ua wahi keiki nei, hoomaka aku la oia e puka iwaho no ka hoopau ana i ua pilikia nei ona.      (Aole i pau.)

 

LETA MAI NA AINA E MAI

 

HE PO@@@I ME KE ALOHA.

E ke KUOKOA; Aloha oe.-

     Ua makemake ia kau nupepa o 1888 nei, o na dala e loaa aku ana ma kou lima oia kona ola, hoouna ia mai e like me ka makemake.

KO MAKOU NOHO'NA.

     Eia makou iloko o ka hooilo, a ke helelei wale mai nei na pu, na wehiwehi ulumahiehie o ka aina, a o a la hoi keia ke hele kapakahi ae la na kona alahele mau, a o kona mau kukuna wela ua hamani, ua ike ia aku la hoi na ao hakumakuma o ka lewa, a ke ha ule mai nei ka ua, puhi ikaika mai hoi ka makani, e hoike mai ana he hooilo nei, a ke mao ae hoi keia, o ka haukawewe mai la no ia o ko luna poe (hau), a o ka wa ia e li ai ka io i ke anu o Hauailiki, kohu ipo ka uwe hone i ka poli.

KA NANAINA O KA AINA

     O ka nanaina o ka aina, ke nee mua nei kona mau aekai me na ululaau loloa, malalo iho hoi o na mauna ua uhi paa ia e ka hau, pela hoi na hale, hale moe, na hale hana, na uwea olelo, na uwea o na kukui uwila, na alahao a me na kaamahu, a pela hoi na moku o kela me keia, na muliwai a pela aku, a he ku maoli no i ka nani a me ke kupanaha o keia mau mea a'u e ike nei, he lohe olelo wale hoi i ke anu o Kaleponi akahi ho a ike io.

     Aole au e poina i ka puana ae, "O Hawaii no ka oi a ke anu ole."

     Ei ka makana la he leo:

     O ke Kilohana ka'u aloha

     Ke pookela o ka lahui

     No kuu lahui ili ulaula.

     Pau pu me ke keokeo,

     He nani ia ua hiki mai

     Kou kahoaka i anei

     Me ka halialia aloha pu.

     Aloha oe e ke Kuokoa,

     Nau i kuhikuhi mai

     Ke ala e hiki ai

     O ke kanaa ili ulaula.

     Ke palahalaha he ololi

     Mahea mokou e ku ai?

     Mahea hoi e hele ai?

     No kela aina kamahao.

     Hai mai no oe

     Ma ke ala maawe iki

     Ma kahi ala ololi.

     Owai hoi ke kuhikuhipuuone

     Ke pailaka pololei?

     No Hawaii pomaikai,

     No Hawaii mau loa.

     O kamalii waha kani anei?

     Aole! Aole!! Aole loa!!!

     O ke Kilohana o ka lahui

     A kuu lahui ili ulaula,

     Mai Hawaii a Niihau,

     A welowelo loa mai ia nei.

     A ooe e ke Kuokoa,

     Ka makua o na nupepa,

     Na wahaolelo a ka lahui.

     He manaolana ua hiki mai;

     Hauoli au me ka iini,

     E ike i kou kino nani,

     Hanohano a hiwahiwa,

     A'u i milimili ai

     A'u i hoonuu iho ai,

     A'u i hoonuu iho ai,

     A'u i haupa iho ai,

     I kau papaaina momona.

     No na au i kunewa ae,

     He elua kauna me kanaha,

     Makahiki i holo iho nei,

     Aole oe imua o'u

     Aole hoi au imua ou.

     E oluolu kou hanohaweo,

     E ka milimili a ka lahui,

     I ke no a kou haahaa,

     E kipa mai oe e ka anoi,

     Ma ko'u ipuka hale,

     A hui nou kaua,

     I ke anu o Kaleponi,

     Ma keia aina malihini,

     E pupue ia nei i ke anu,

     I ka au oki o ka mauna,

    O keia aina mamao,

     Mai na aekai aloha mai;

     O kuu home oiwi,

     Kahi a'u e lia mau nei,

     I na kau a kau.

     O kou mau ea oluolu,

     Kou mau kula uliuli,

     Na awawa omaomao,

     Nou au e mele nei,

     No kuu aina hanau,

     O Hawaii Ponoi,

     No ka Moi Kalakaua ia,

     A kau i ka puaaneane.

     J. W. D KALIKOIKALEHUANUI,

     Kanaka Taona, Tacoma, W. T. Dekemaba,-1887