Ka Nupepa Kuokoa, Volume XXVI, Number 51, 17 December 1887 — Page 4
| This text was transcribed by: | Naomi C. Losch |
| This work is dedicated to: | Huddy and Rose Clarke |
Ka Nupepa Kuokoa
KE KILOHANA POOKELA NO KA LAHUI HAWAII.
Nupepa Kuokoa.
No ka Makahiki ----------------------$2.00
No Eono Mahina ----------------------1.00
KUIKE KA RULA
Poaono........Dekemaba 17, 1887.
__________________________________
AHAOLELO O 1887.
LA HANA 25, DEC. 3
Halawai ka hale e like me ka hoopanee ana; pule ke kahunapule, heluhelu ia ka moolelo o ka la hana i hala a aponoia.
NA PALAPALA HOOPII.
Na Helekunihi he hoopii mai Makawao mai e noi ana e hookuu ia na mai lepera maopopo ole o ka mai, a e hoi hou o kauka Iwai no Kakaako. Haawiia i ke Komite Malama Ola.
HOIKE KOMITE WAE.
Na Townsend i hoike mai no na bila kanawai oihana koa i waihoia mai e Waterhouse a me C. Balaunu; ua noonoo ke komite a ua hana he bila kanawai mua a noi mai e hooholoia. He 4 puali koa i hoakaka ia ma ia bila kanawai, oia ka Honolulu Raifela, King's Own, Queen's Own, Leleiohoku Guard me ka puali Kiai Moi.
O ka Hon. C. Balaunu kekahi o ke komite wae na lakou e hooponopono keia mau bila. Ma kekahi halawai ana a ke komite, aole oia i kauoha ia e noho ma ia halawai, a ua hana malu ka hapanui o ke komite a hooholo i na hana me kona ike ole: nolaila aole oia i apono i keia hana a na lala e ae o ke komite, aole no oia i kakauinoa malalo o ka hoike i hoakakaia maluna ae. He bila kanawai hou kana i hoomakaukau ai, a ma ke noi ua lawe ia kana bila a waihoia ma ka papa ma ke ano he hoike na ka hapa uuku o ke komite.
Na ke komite wae ia lakou na bila pili waiona i hoike mai, o ka waiwai io o na waiona i unuhiia mai ka Hale Dute me ka dute ole he $39,795.89; mailoko mai oia huina he $34,885.51; no ka Moi, $591.05 no ka Halemai Moiwahine a pela aku, a he $4,319.33 no na luna aupuni o na aina e. Ua manao ke komite he mau hana hoopoino loa keia i ke aupuni, a me he la ua lawelaweia ka inoa o ka Moi e kekahi poe i ole ai e dute ia ko lakou mau waiona; a ua manao hou ke komite he mea pono i ka Loio Kuhina e huli aku i na hooia ana he nui i huipuia me ka ke komite, a e alakai ia kana mau lawelawe ana a pau ma ke kanawai. No ka pono o ka loaa ana i ka Moi ma na waiona, he mea pono e wae ia kekahi kanaka nana e hooponopono ia mea, a no na mea a pau mawaho ae, pono ke hoihoi hou ia i ke aupuni. Aponoia ka hoike.
Na ke komite wae ia lakou na hana pili hoolewa o ke kama 'liiwahine Likelike i hoike mai, ua hoaie ia na mea a ma ke kauoha a Hayselden, a ma na telepone mai ka Halealii ae, a ma ka ike ia no hoi o kekahi poe no ka pa alii, ua ike ke komite aohe mana o keia mau hoaie wale ana ma ke kanawai e koi ai i ke aupuni, aole no hoi i hoike aku ka poe ohi he mana ko lakou e aie ai ma ka inoa o ke aupuni, nolaila, ua manao ke komite e uku ia na mea a lakou i manao ai he kupono e like me ia malalo iho, oia hoi ka mea hana pahu a pela aku, na kanikau me na hoowehi o ka halealii, na kaa hoolewa, na kakauolelo ka ogana me na pakaukau, kanikau no na koa a me na kamalii kula, na kanaka huki kaa kupapau, na kahu ponoi o ke alii make, na lilo ai a me kekahi mau mea e ae, ua hooholo ke komite e hookaawale ia i haawina dala a waiho ma ka lima o na kahu waiwai o ke 'lii ka Moi na lakou e uku i na mea kupono, o ka $10,000 ka huina i manaoia ua lawa.
Nui ka hoopaapaa o na hoa, e apono ana a e kue ana i keia hoike, hoakaka ka aoao kue no ka minamina i ka inoa maikai o ke aupuni, e like me ka mea i kamailio mau ia iloko o keia hale ma na bona aie ma Ladana, aia kela mawaho, ua ae ia nae e uku aku, a eia hoi keia imua ponoi o ke alo, pono no e uku a pau, aole hoi e uku hapa.
Ma ke noi a ke 'lu Makee, ua laweia mai ka hoike a ke komite a waiho ma ka papa no ka noonoo pu ana me kekahi bila kanawai e laweia mai ana e ke aupuni e pili ana no keia hoolewa.
Hoomaha ka hale a hora 1:30.
Noho hou ka hale a kahea ia mai na olelo hooholo.
NA OLELO HOOHOLO ME NA BILA.
Na Kalaukoa he mau ninau i ke aupuni: He manao no anei ke aupuni i na keiki i hoonaauaoia ma na aina e a i kauoha ia aku ne e hoi mai? E haawiia anei i hana na lakou i kulike me ko lakou hoonaauao ia ana? E hoomau anei ke aupuni i ka uku ana i na keiki i koe e noho nei ma na aina e?
Na Rikikini i heluhelu mai he palapala mai kekahi mau kamaaina o Kohala, Hawaii, e hoakaka mai ana i ka pono o ka haawiia ana o ka laikini kuai waiona liilii malaila, he lawelawe pono ia e like me ke kanawai me ke kue ole, a he hoemi ana mai no hoi i ke kuai waiona malu ma ia apana. Waihoia ma ka papa a noonoo pu me na bila Kanawai.
Na ke 'lii Young i waiho mai he ninau i ke Kuhina Waiwai e hoomaopopo aku pehea la ke ano o ka hana ia ana o kekahi mau ku@u e hooponopono ana i kela kipe opiuma? A oiai hoi oia kekahi kumuhana i hoalaia ai he aupuni hoomaemae.
Pane ke Kuhina: Ua kuka pu ka Aha Kuhina me ka Moi, a ua ae mai Oia nana ponoi e pani i kela mau dala kipe. Ua waiho aku Oia i kona mau waiwai ma ka lima o kekahi komisina na lakou e ohi mai na loaa i mea e hiki ai ke ukuia; a ua ae pu mai na pake na lakou na dala kipe e hanaia pela i hookaaia ai keia aie, a me kekahi mau aie e ae ona.
NA HANA O KA LA.
Heluhelu ekolu ia ka bila kanawai e hooponopono ana i ka Oihana Makai kuloko o ke aupuni, a hooholo loa ia.
Heluhelu ekolu ia ka bila kanawai e hoopau ana i na laikini kuai waiona ma na kuaaina. Hoopaapaa loihi na hoa, a ma ka hopena ua hooholo loa ia.
Hoopanee ka hale a ka Poakahi.
LA HANA 26, Dec. 5.
Halawai ka Hale ma ka hora 10 o ke kakahiaka Poakahi. Pule ke kahunapule, heluheluia ka moolelo o ka la hana i hala a aponoia.
NA PALAPALA HOOPII
Na C. Palaunu i waiho mai he mau palapala hoopii penei: Mai ia 50 mau inoa mai Niuhelewai me Wailuakio, Honolulu, e hookaawale ia i 400 dala no ka hoomaemae hou ana i ko lakou alanui. Haawiia i ke komite o na hana hou. Mai ia Daniela Laiana o ka lunahooponopono o ka nupepa Elele e noi mai ana e nana ka Ahaolelo i na pono pai a ke Aupuni i haawiia nana e hana iloko o ka makahiki 1886. Haawiia i ke komite hookolokolo.
HOIKE KOMITE WAE.
Na ke Kuhina o na aina e i pane mai no na ninau a Kalaukoa e pili ana no na opio Hawaii i hoonaauao ia ma na aina e; no ka ninau mua aole i poina ke Aupuni ia lakou, aohe no hoi he hana kupono a ke Aupuni e haawi ai ia lakou. Hookahi ua hoonaauao ia ma ka oihana kaua moana, a oiai ua hoopaa iho nei ke aupuni i ka manuwa Hawaii, nolaila ua nele ia ma ia kulana. Hookahi ua hoonaauaoia ma ka oihana koa pukaa, a oiai eia he bila kanawai koa imua o ka Ahaolelo, malia o loaa he kulana kona malaila. Hookahi i kauohaia aku nei e ke aupuni e hoi mai, a e ao ana oia i ka oihana lapaau. Mamuli o ka hoike a na kauka, he omaimai oia me ka maopopo ole o kona pono iloko o keia kau hooilo. A no na Hawaii opio a pau ma na aina e, e hoomau no ke aupuni i ka malama ana ia lakou e like me ka hooholo ana a ka ahaolelo he haawina dala hou no lakou.
Na ke komite wae o na waiona me opiuma i waiho mai i ka lakou hoike e pili ana i na hoopii lehulehu e hoopau a e hoohaiki ana i ke kuai waiona, ua manao ke komite e hooholo ia ka bila kanawai a ke alii Kamika i waiho mai ai i pili i ke kuai waiona. Aponoia ka hoike a ke komite, haawiia ua bila kanawai la no ke kakau poepoe, a heluhelu ekolu apopo.
OLELO HOOHOLO ME NA BILA.
Na C. Palaunu he olelo hooholo e hoakaka ana penei: E manao aku keia hale i ka Aha Kuhina ua uhakiia e lakou ka pauku 20 o ke Kumukanawai no ka hookohu ana ia Jas. Bright i hope Loio Kuhina, a haawi nae i ka lawelawe ana o na hihia i ke 'lii D. H. Hikikoki no ka uku he 150 dala.
Hoopaapaa loihi na hoa maluna o ka olelo hooholo, a o ka hopena ua hooholoia ka olelo hooholo he 31 ma ka ae, a he 10 ma ka hoole. Hoomaha ka hale.
Noho hou ka hale, a malalo o na olelo hooholo a pela aku, ua waiho mai o F. Palaunu he olelo hooholo e hoike mai ke Kuhina Kalaiaina i ka inoa o na hui pake a pake paha i loaa ia lakou na laikini kuai waiona ma ke kulanakauhale o Honolulu.
NA HANA O KA LA.
Heluhelu ekolu ia ka bila kanawai e hoopau ana i ke kuai opiuma a ua hooholoia.
Heluhelu ekolu ia ka bila kanawai e hooponopono ana i ka hookohu ana i na lunakanawai apana a hooholoia.
Heluhelu ekolu ia ka bila kanawai e ae ana i ka holo ana o na kanaka Hawaii i na aina e me ke ke'ake'a ole ia a ua hooholo loa ia.
Heluhelu ekolu ia ka bila kanawai e hooponopono ana i ka hele ana mai o na limahana pake. Ma ke noi ua noho ke komite o ka hale, ke alii Walakahauki ma ka noho. Noonoo pakahi ia na pauku.
Ua loihi ka manawa a na hoa i noonoo ai no keia bila kanawai; ikaika na olelo e hoohaiki loa ia ke komo ana mai o na pake. O ka luna o Hamakua ka mea ikaika loa ma ia aoao, a ua aneane e piha ka hora hookahi iaia ma ka haiolelo ana me ka paipai nui ia e na makaikai, a ua kokua ia kana mau wehew2ehe ana e ke alii Kamika.
Ma ka noi, ua haawiia ka pauku elua o ka bila i kekahi komite wae nana e hooponopono hou, me ka pakui hou o ua pauku la i waiho ia mai e ke alii Kakela. Eia ka inoa o ke komite; Wilimana, Kiai, Kakela, Kawainui me ke Kuhina Kalaiaina.
Hoopauia ke komite, aponoia ka hoike a ka lunahoomalu, a hoomaha ka Hale a noho hou i ka hora 7 ahiahi.
Hora 7:15 p.m. akoakoa mai na hoa o ka Hale.
Ma ke noi a ke alii Dole ua aponoia ke kapae ana i ka rula 77 o ka Hale e papa ana i ke puhi paka iloko oke keena, a no ia mea ua ae ia na hoa e puhi paka.
Ma ke noi, ua noho hou ke komite o ka hale e hoopau loa i ke koena o ka bila hooponopono i ka hele ana mai o na limahana pake, oiai o ka pauku elua wale no ka i haawiia i ke komite wae me ke kauoha pu ia ana e waiho koke mai i ka lakou hoike.
Noonoo ia ke koena o ka bila a hooholoia, koe ka hapa mua o ka pauku 5, ua noi ia e haawi i ke komite wae i hoike maluna ae. Hora 8:56 ua hoopau ia ke komite, a aponoia ka hoike a ka lunahoomalu.
Ma ke kapaeia ana o na rula ua waiho mai ka lunahoomalu o ke komite wae ia lakou ka bila kanawai oihana wai o Hilo i ka lakou hoike, a ua manao ke komite e hooholoia e like me na hoakaka a ka bila. Ma ke noi ua waihoia a noonoo pu me ka bila.
Hoomauia ke kapaeia o na rula; a na ka Loio Kuhina i hoolaha mai i kona manao e lawe mai ana oia he bila kanawai e haawi ana i haawina hoomau no Jno. Owen Dominis.
Ma ke noi ua hoopaneeia ka Hale a noho hou i ka hora 10 kakahiaka Poalua.
LA HANA 27, DEC. 6.
Halawai ka Hale e like me ka hoopanee ana. Pule ke kahunapule, a heluheluia ka moolelo o ka la hana i hala a aponoia.
HOIKE KOMITE MAU.
Na ke Kuhina o na aina e i hoike mai ua waihoia imua o ka Moi na bila kanawai no kona hooia mai: Kanawai pakui Bila Haawina; kanawai e hoomaopopo ana i kekahi mau hana i lawelaweia e na Kiaaina mamua; kanawai e hooponopono ana i ka oihana lapaau Hawaii; kanawai e hoomaopopo ana i ke ano o na huaolelo ke "Alii" me ka "Moi"; kanawai e koho ai i komisina no ka oihana wai o Hamakua, Hawaii; kanawai e hoopau ana i na Kiaaina; a me ke kanawai e huikala ana i ke Kuhina Waiwai no kekahi mau hoolilo dala kue kanawai. Ua hoounaia aku keia mau bila kanawai ma ka la 5 o keia mahina.
NA OLELO HOOHOLO ME NA BILA.
Na ka Loio Kuhina i heluhelu mai no ka wa mua he bila kanawai e hookaawale i haawina dala uku hoomau no Jno. O. Dominis. Waihoia no ka heluhelu elua.
Na Kamauoha he olelo hooholo e kauoha aku ke Kuhina Kalaiaina i ka Peresidena o ka Papa Ola e kaohi mai i ka lawe ana i na mai lepera, oiai ua hoomaopopoia mai ka haiki a me ka lawa ole o na hale no na mai.
Kamailio ke Kuhina Kalaiaina aohe mana o keia Hale e komo pu aku i na hana hooko a me ka lawelawe ana o ka Papa Ola ma kana hana. Noi ia ka manao o ka Peresidena ma keia olelo hooholo, rula mai oia ua hala mawaho o na rula.
Na Paehaole he ninau i ke Kuhina o na aina e ina paha ua hooponopono ia na uku hana o Liwai me Kappakaula he mau puhi ahi no Kaimiloa @
Pane ke Kuhina o na aina e, ua uku hapa ia kekahi o laua, a o ke koena ua ukuia i kekahi mea okoa nana i lawelawe ka hana no kekahi manawa. O ka elua o na inoa aole i maopopo iaia.
Na Kalaukoa he mau ninau i ka Loio Kuhina: 1--I ka manawa hea ka Loio Kuhina i haawi ai i na hihia ma ko ke aupuni aoao i na mea hanohano maik Honolulu na 'lii W. R. Kakela me W. O. Kamika; a me ka mea hanohano mai Hamakua, Hawaii mai, W. A. Kini? 2--Ua ukku aku anei ka Loio Kuhina i ke dala no ko lakou lawelawe ana ia mau hihia ma ko ke aupuni aoao? 3--Ua kakauinoa mai anei lakou maloko o kekahi mau palapala no ka loaa pono ana aku o ia mau dala ia lakou mai ka Loio Kuhina aku? 4--Mahope anei o ko lakou kohoia ana i mau lala no keia hale ko lakou lawelawe ana i na hihia ma ko ke aupuni aoao?
Pane ka Loio Kuhina, ua haawiia na hihia mahope iho o ko lakou kohoia ana i mau lala no keia hale; ua uku aku oia ia Kakela mai kona dala ponoi oiai aole haawina dala i koe no ia hana me kona manao e lawe ae i kana mau dala mailoko ae o ka bila haawina i hoholoia iho nei; no ka hui o Kini me Kamika, he bila koi ka laua aole nae i ukuia aku; he 125 dala ka uku no elua hihia.
NA HANA O KA LA.
Hoike mai ka Peresidena, o na bila kanawai koe ka hana o ka la me na hoike a ke komite, he eha bila kanawai ka nui, 2 mau bila m@a, a he 2 na ke komite.
Noiia e ke komite ka hale a noonoo i keia mau bila, aponoia. Ke 'lii Kamika ka lunahoomalu.
Mamuli o ke pai ole ia ana o na bila kanawai a ke komite, ua noi koke mai o Kamauoha e hoopauia ke komite i haawiia na bila i ke komite no ke pai ana, i mea e hiki ai i na hoa ke hoomaopopo i ka lakou mea e hana ai, a aponoia.
Haawiia na bila kanawai i ke komite pai me ko lakou kauoha pu ia e hoihoi koke ia mai i ke kakahiaka o ka Poakolu.
Ma ke noi ua hoopanee ka hale a noho hou i ka hora 2 p. m.
Ma ka noho hou ana o ka Hale, ua kapaeia na rula a waiho mai ke komite malam ola i ka lakou hoike e pili ana i na hoopii e ae ia na kanaka e lapaau i ka mai lepera, a e hoihoi hou ia Kauka Iwai no Kakaako. Ma ke noi ua waihoia ma ka papa.
Hoomauia ke kapaeia ana o na rula a noi mai ke Kukhina o ko na aina e e hapaiia ka noonoo ana no ka bila kanawai e haawi ana i uku hoomau no Jno. O. Dominis. Aponoia.
Heluhelu elua ia ka bila ma kona poo a noi mai ke Kuhina o ko na aina e e hooholoia ka bila no ke kakau poepoe.
Kue ke 'lii Waiakahauiki i ka haawi ana i uku hoomau nona, a wahi ana, ina he manao ko na hoa e haawi i uku hoomau nona, ua hiki no ia lakou na 'lii ka poe waiwai e lulu i uku nona.
Hoopaapaa iki na hoa a mahope ua hooki koke ia i ka ninau ano. Ma ka ninauia ana ua hooholoia ka bila no ke kakau poepoe a heluhelu ekolu ma ka Poakolu.
Na ke komite waiwai i waiho mai i ka lakou hoike e pili ana no kekahi mau palapala hoopii. Waiho ia ma ka papa. Na ke komite no i hoike mai no ka bila e pili ana i ka Luna Hooia o ke Aupuni; elua hoike; na ka hapa nui me ka hapa uuku. E hoike ana ka hapa uuku e hoomauia no ke kulana Luna Hooia. Ma ke noi ua aponoia ka hoike a ka hapa uuku.
Na Townsend he mau ninau i ke Kuhina Kalaiaina, pehea la ka hoolako ia ana o Kawa ma na pono a pau, ma ka aelike ana a ma kekahi ano e ae paha? Ina ma ka aelike, pehea kona hanaia ana? Ina ma kekahi ano e ae, pehea kona hanaia ana? Pehea i hoea hou ole mai ai kekahi mau mea pili i kela dala nalowale o ka Oihana Wai o ke aupuni mamua a heaha ka hopena?
Na ke Kuhina Kalaiaina i pane mai no na ninau a F. Palaunu i ka nui o na hui pake a pake paha i loaa ka laikini kuai waiona.
Na Kakela i nonoi mai e kauohaia na komite a pau o ka Ahaolelo e hoike mai i ka lakou mau hana a pau imua o ka Hale ma ke kakahiaka o ka Poakolu, a aponoia.
Ma ke noi ua hoopanee ka Hale a ka hora 10 a. m. Poakolu.
LA HANA 28, DEC. 7.
Halawai ka Hale e like me ka hoopanee ana. Pule ke kahunapule, heluheluia ka moolelo o ka la hana i hala a aponoia.
NA PALAPALA HOOPII.
Na Nawahine he hoopii mai Kaupo mai e hookaawaleia i $1000 no ke kukulu i halekula olelo Beritania malaila, waihoia ma ka papa a noonoo iloko o ke kau mau o 1888.
HOIKE KOMITE MAU.
Na ke komite pai i hoike mai ua pai ia na bila kanawai oihana koa a ka hapa nui me ka hapa uuku o ke komite.
Na ke komite o na buke helu i hoike mai no na lilo o keia kau ahaolelo kuikawa e pau ana i ka la 7 o keia mahina, o ka huina nui he $9,656.64.
Ukuia no ka unuhi $289.75
Koena " " 150.00 ----$439.75
Ukuia no na lako kakau... 328.05
Koena lako kakau 26.00 -----354.05
Ukuia no na lako hale 258.20
Koena lako hale. 75.00 -----333.20
Uku kakau poepoe 130.14
Koena " " 60.00 -----190.14
Ukuia no ke pai'na 678.00
Koena " " 60.00 -----738.00
Ukuia no na uku mile 429.00
Koena uku mile 138.00 -----567.00
Ukuia no na luna makaainana 6000.00 -----6000.00
Ukuia no na luna 675.00
Koena " " 325.00 -----1000.00
Ukuia no na hooko palapala kauoha 16.00 -----16.00
Ukuia no ke kakau kope 18.50 -----18.50
Huina _______________
$9,656.64
_________________________________________________________________________________________
Laau Mai Lepera Helu 1.
––––––––––
A S. H. Meekapu e hoomau ia ana no ka lehulehu, i loaa ai ka pono a lanakila ke inu i keia laau e hoopau i na mai Lepera kaokao, koko ino, mai hui, a me kua hanee, e hoouna ia no ke hoouna mua ia mai @a lilo laau.
S. H. MEEKAPU M. D. Waikahalulu.
_________________________________________________________
PAPA! PAPA!
AIA MA KAHI O
LEWERS & COOKE,
(O LUI MA.)
MA KE KAHUA KAHIKO MA
Alanui Papu a me Moi
E LOAA AI NA
Papa Nouaiki
o kela a me keia ano.
Na Papa Nani a Paa no ke kukulu ana i na Hale!
Na Pani Puka, Na Puka Aniani.
Na Olepelepe, Na Pou, Na O-a,
Na Papa Hele, Na Papa Ku.
A me na Papa Moe nui loa
NA PILI O NA HALE
O NA ANO A PAU.
Na Pepa Hoonani, Na Pena o na Wai a pau.
Na Kui mai ke Nui a ka Makalii,
Na Ami Puka, Na Ami Puka Aniani
Na Ami o na ano a pau.
Na Aila Pena, o keia me keia ana
Na Aila Hoomaloo, he lehulehu wale,
Na Aila e ae o na ano a pau.
NA WAI VANIKI
A ME NA
WAI HOOHINUHINU NANI
o na ano a pau loa.
NA BALAKI ANO NUI WALE
A ke hai ia aku nei ka lono i na Makamaka pau, ua makaukau keia mau makamaka o oukou e hoolawa aku ma na mea a pau e pili ana ma ka laua oihana
NO KA
UKU HAAHAA LOA!
E like me ka mea e holo ana mawaena o
LAUA a me ka MEA KUAI.
HELE MAI E WAE NO OUKOU
__________________________________________________________
MRS. THOMAS LACK,
HELU 81, ALANUI PAPU.
MEA KUAI A LAWELAWE I
NA
Mikini Humuhumu na Aahu a nui wale Aku
HE AGENA KUAI NO NA MIKINI
White, New Home,
Davis, Crown, Howe,
Me Florence,
Na Kui Mikini o na
ano a pau a Howard,
Na pepa ana lole o
na ano a pau, a me
kela keia mea
NA LOPI MIKINI A KALAKA.
HE AGENA KUAI I NA
Pu Raifela, Pu Panapana, Pu ki manu, na Poka, Lu, Pauda, Kukaepele.
NA KAPUAHI AILA MAHU
Mai ke nui a ka liilii.
_______
Ma ka lawelawe nui ana o'u i ka hana lima akamai o ka oihana hana pu a pela aku, ua makaukau au e hooko kaulua ole i na kauoha a pau.
O na kauoha mai na mokupuni e hookohuia 2080-1f.
__________________________________________
WOLFE & CO.
________
Mea kuai i na Ano a pau o na Mea
AI, HUA AI, O NA ANO A PAU.
Eke Palaoa, Berena, Waiu Bata, Berena manoanoa, Berena huinaha, mea ono, o kela ano keia ano; Ko paa, Kope, Ti, Aila mhu, a me na ano a pau.
_______________________
Helu 66, Alanui Hotele, Halekuai mua o Lewis & Co
E loaa koke aku no na kauoha a pau loa me ka hakalia ole, a me ka maikai o na hoomalu ia ana. E hooko ia na kauoha o ke kulanakauhale nei me ka hikiwawe ma na ka me ka uku ole. O na kauoha mai na mokupuni, e lawelawe koke ia. 2085-6m
_______________________________
Nuhou! Nuhou! Nuhou!
AILA MAHU MAIKAI!
HOOKAHI DALA WALE NO NO KE
KINI AILA HOOKAHI!
E kuai pau ia aku ana no ka nui loa o ka aila i keia manawa.
E AU E NA MAKAMAKA! E AU!
E kipa ae ma ka halekuai o
Kakela me Kuke.
_______________________
B. F. EHLERS & CO.,
PAINAPA.
_____________
Poe Kuai i na Ano Lole a Pau.
Helu 99 alanui Papu. - Honolulu.
__________
E loaa mau ana na lole hou o na ano a pau maluna o kela a me keia moku.
___________________________
Ka Waiwai o ka Hilinai
______________
KA AYER Laau Sasaparilak kai kaulana a hilinai nui ia no ka hoomaemae koko, ma na wah a pau o ka honua, no aneane 40 makahiki i haia ae nei, a ua lawelawe nui ia hoi iwaena o na oihana @@@au. O keia
LAAU SASAPARILA, no loko ae ia o keia Sasaparila Honedura maoli; ua loaa ka mana hoomaemae ma o ka hui pu ia ana me kekahi mau aa laau e ae, a me kekahi mau mea no loko o ka honua a me ka hao.
He koko inoino a nawaliwali anei kou? Ua awili pu anei me na ano mai ikaika? A ua hui pu anei me na wai awaawa hoopehu. Na keia
LAAU e hoomaemae ua mau mea ino a pau, a maikai. O na kauka lapaau a pau o Amerika ike ke ano o ka AYER SASAPARILA, ua olelo lakou, aole he mea maikai e ae no ka hoomaemae koko ana mai na mai i awili pu ia, aka o keia wale no. No ka
HOOMAEMAE ana i ke koko, a me ka hookahua pono ana i na mea a pau ma kekahi mau ano mai i ikeia, o ka AYER SASAPARILA wale no ka laau nana e hoomaemae hakalia ole mamua ae o kekahi ano laau e ae O ke
KOKO ino hakuhaku, a nawaliwali hoi kona holo pono ana ma ke kinok e hoomaemae ia a e hooikaika pu ia no hoi ma o ka ai ana i keia LAAU SASAPARILA A AYER. He maalahi a he
MAIKAI loa hoi keia Laau, aole no ka hoomaemae wale ana no i ke koko, aka, no ka hookaawale pu ana kekahi i na ma'i, hoomomona hou ana i ke koko ino, a me ka hooikaika pu i kona holo pono ana ma na aa. He lehulehu wale na hooia ana mai na wahi a pau o ke ao nei i hoohana mau i keia laau mamua o kahi mau laau e ae.
A HILINAIIA no ka ikaika kupono o ke ola kino, ma ka maemae ana o ke koko, hoomake pu ia na ma'i a pela aku. He nui na laau hoomaemae koko i hoolaha wahahee wale ia malalo o na inoa lehulehu, aka, o na hilinai a me na hooia wale no a ke ao holookoa, maluna o ka
Ayer Laau Sasaparilla.
I HOOMAKAUKAUIA E
Kauka J. C. Aver & Co., Lowell, Mass.
HOLLISTER & CO.
Na A ena ma ka Paeaina Hawaii.
Helu 100. . . . Alanui Papu, Honolulu 2086-tf
____________________________________
FRANK GERTZ.
MEA KALEPA A LAWELAWE HANA MA
NA ANO KAMAA A PAU NO NA
Wahine, Kaikamahine a me Kane.
Na Kamaa Buti a me na Kamaa haahaa no na Keiki Kane a me na Kanaka makua, o na ano paikini hou lo 2081-6m.
_________________________________
HOOLAHA @@@@@
NA HOOLAHA KUMAU
KAKELA & KUKE.
HALEKUAINUI O NA WAIWAI.
E laa na pahiolo, koi hole,
e hamale, koi nui a me liilii, kila,
wili puaa, rula, apuapu, kai o na ano a pau,
kala kaa , hao hoopaa puka
pohaku hoana kepa, lei ilio, kaula hao ilio, pahi, upa, pahi umiumi, kalapu,
kope hulu, pulupulu, oepa kalakala, lina hao, ami, keehi, a me ke
KAULA OPU
Palau o na ano a pau,
Oo, ho, koala, pe, kipikua, hao kope, au ho a pela aku, kua bipi,lei bipi, kaula hao bipi, uwea pa, uwea keleawe, hao pili. piula, kaapalala, ipuhao, ipu ti
PA-PALAI MAKAU ME KE AHO
Ili wai, papa holoi, kopa ala, kaula kuaina, hu'akai, ehi wawae, hulu pena, a pela aku.
Pena wali, kini nui a me liilii o na ano a pau, me ka pepa kuhikuhi, pena keokeo, aila pena, aila hoomaloo, vaniki kaa, a me vaniki moe;
PENA HOOMALOO
-a me aniani hale-
AILA MAHU, AILA MIKINI, AILA HAMO ILI, AILA KAA, INIKA KAMAA.
PAUDA, KUKAEPELE, KIANA PAUDA, UIKI IPUKUKUI O NA ANO HE NUI A LEHULEHU.
LOLE MAKEPONO
E laa na
AHINAHINA, KALAKOA. KEOKEO, LEPONALO, HULUMANU, UWE-WAHINE, KUI HUMUHUMU, A ME KA LOPI.
Ke Kuike e loaa no la ma kahi o
Kakela & Kuke!
NA MEA PIULA
Mikini Humuhumu
Mekini a WHEELER a me WILSON
MIKINI A WILCOX ME GIBBS
NA MAKINI A
-REMINGTON-
He nui loa na mea hao me na ukana e ae o na ano a pau, aole hiki ke hai pau ia aku, hewa i ka wai na maka ke ike.
Laau Lapaau Kaulana Loa
A DR JAYNE.
LAAU HOOMAEMAE KOKO LAAU HOOPAU NAIO, LAAU KUNU, PENIKILA, HUAALE PAAKAI, LAAU HOOPAAHI. A
Me na Laau Hamo a Pela 'ku.
Kakela me Kuke.