Ka Nupepa Kuokoa, Volume XXVI, Number 38, 17 September 1887 — Page 2

Ka Nupepa Kuokoa

KE KILOHANA POOKELA NO KA LAHUI HAWAII.

No ka Makahiki ...      $2.00

No Eono Mahina ...       1.00

---KUIKE KA RULA.---

Poaono, ...       Sepatemaba 17, 1887.

KE KOHO BALOTA.

Ma ka nana ana i na hana koho balota o ka Poakahi nei, he nani maoli no; hooneeia mai la ka pahu balota a kokoke i ke alo.  Maopaopa ole iho na iwi i ke kukini i kahi loa e like me ko na au i hala. a he pono hou keia.  Ke makaikai ae ma na wahi koho, ahuwale me ka laelae imua o ke alo, hiki ole ke olelo ae ua kolohe ia na balota, a imua iho la no o ke alo ka ulu a o ka hala iho la no ka ia.  He nani okoa no hoi ko ka poe koho, iho lua ka akau me ka hema i na mana koho elua, alii a me lunamakaainana.  Mamua pakahi kou mana, i keia wa papaiua kou mana.  Mamua he ikeia aku na kanaka i ka huki hele ia mai 1 o 2 ianei, i keia wa hoi hele laelae ka mea koho a hookomo i ka balota me ka hopohopo ole i ka huki hele ia.  Popohe lua ka maluhia  a puni na wahi koho i ikeia, ke hele la a pipika ua poe hoohaunaele ma kahi e.

I ke koho ana a puka na lunamaka ainana a me na alii o ka aoao hoomaemae aupuni mai kela huli a keia huli o Oahu nei, he lokahi ana ia a he ike ana eia ko Hawaii mau hoa'loha.  Ua lawa a ua aikena wale i na apahi a ko na au i hala, nolaila haalele ia apulu kahiko aohe o lakou waiwai.  Eia ka nuhou, ka waiwai io.  Ka mana koho palua, ka mea a kakou e olelo iho ai na kakou ponoi e wae i na lunamakaainana a me na alii o ka ahaolelo.

Ia kakou e ike ana i keia mau pono a lawelaweia ua pono ia a lawelawe ole ia ua hewa ia.  Oia ae nei na lala mua o ia pono a koe ka hoike ana mai a na hua i kona momona, a i ka awahia paha.  Ke koho e nei kekahi poe he awahia, aka laki  ole paha e lawe mai i na hooiaio pololei ana.  Ke olelo nei kekahi poe he elua auwe i hala, a hookahi auwe i koe a palahuli kakou Auhea nae na hooiaio?  O na olelo ia, he hoonuinui wale no, aole kakou i kokoke aku ilaila i keia wa, ua manao kakou, aka na ka hookele aupuni lapuwale e hoonee koke mai ia mau haawina.  O na olelo a pau he poino ke hiki mai ana, pono e nana i kona ho pena.

E KIAI MAKAALA.

Hala aku la ka la koho balota me kona ano hou i ike ole ia mamua, mao popo ae nei na kanaka i wae ia e ka lehulehu koho i mau waha olelo ma ka ahaolelo mua e malama ia ana malalo o ke Kumukanawai hou, nolaila, hookahi a kakou hana i koe o ka makaala aku i ko lakou kulana hana no ka maemae io paha o ke aupuni, a i ole no ka hookahuli aupuni paha e like me na kanikani leo a kekahi poe.  Pono ia kakou ke waino loa i na manao ano

@

ana i kekahi mau kina.  A pau ia alaila, ua nani loa.

Nolaila, ke hoike hou aku nei au me ke kohokoho ole a me ke kanalua ole, aole o na hana wale no mawaho ae ka keia poe e hele aku ai e lawelawe, aka, o ke Kumukanawai ana kekahi e hooponopono ia.  Aole no o'u kanalua iki no ko lakou hele i o a hana ole i kekahi hana kaulike  Ua lana mau ko'u manao e lawelawe ia ana ka pono a olino mau ma ko Hawaii umauma na pomaikai, a i ole pela, alaila na ka ino ia.

Mai alakai hewa ia ko ka lehulehu noonoo me na olelo o keia mau la e pane ia nei he hookhuli aupuni repubalika, he haawi aina, he poe hookele aupuni hahaka.  a pela wale aku Aole hoi i au wale ae nei na la o keia kahua aupuni hou  e ikeia aku ai ke kahuli io, ka lilo io o ka aina.  No ka mea, mamua o ka hoea ana mai o na hopena o na haawina like ole e lawelawe ia ana, e ike e ana kakou i ka pono a me ka hewa.  No keia wa hoi, he mau hoonuinui leo wale no ia no ke ano palaualelo.  "E nana mamua o ka lele ana."     P. D.

KO KAKOU MAU LA O KEIA MUA

AKU.

O na manao akahele o ke kuokoa oiaio o ke kanaka, oia ka haawina hoo kahi i apo lokahi ia e na puuwai aloha aina a pau, a i ka Poakahi nei, ko kakou la koho balota i ae ia e ke Kumu kanawai hou no ke koho ana i na Alii a me na Lunamakaainana, oia ka la a kakou i pupuu lokahi ai i hookahi umauma, hookahi puuwai, a he hookahi iloko o ke aheahe lai malie o ka lana kila nui.

He mea kamahao iloko o ka moolelo o Hawaii nei na mea i hanaia e ka poai o ka poe nana e hapai hou nei ia Hawaii iluna, e ala ae mai kona noho kuapapanui ana malalo o ke alakai a na poe hoopilimeaai i ike a kamaaina mau hoi ia kakou i na wa i hala aku la.  Ke ole makou e kuhihewa, e ike ana kakou ma keia mea aku i na loli ana o ke aka hele ka ai pakiko a me ka hooholo mua ana o na hana hou kuloko o ka ama , a aia iloko o ko kakou mau lima ka mana e koho aku ai i na kanaka hoopono, a ola auanei ke kanaka e ola @ o ko kakou aian a e mau ai hoi kona kuok a mau loa.

He hana hupo a me ke kaulana ole na kakou, ka ahewa koke ana aku i ka Aha Kuhina hou, oiai he maula pokole wale no ko lakou e noho nei maluna o ka oihana, a ua pa tausani manawa ia ko Kipikona noho ana ma ka oihana, a ua ikeia ka hapapu a me ka papau o ka ilikole o ko kakou Waihona Aupuni, malalo o ka lawelawe a me na hoohana ana a ko kakou mau poo Aupuni, a ua loaa koke ia kakou ka mokuanana a me ka lokahi ole ma na kumu lehulehelehu.  Heaha la ko kakou hopena malalo o ke Kumukanawai kahiko? a heaha la ko kakou holomua a me ka mau o ko kakou kuokoa malalo o ke alakai ana o na kanaka i hiki ke hilinai ole ia no na makahiki loihi eono i hala ae nei?

O ka lahui holookea mai Hawaii a Niihau ka hoike oiaio no ia mau mea, ka uhauha dala o ka lehulehu, ke koho ia o na luna oihana aupuni i mau lunamakaainana, oiai ua manao nui wale iho no lakou i ko lakou mau pomaikai pili kino iho, aole no ka pomaikai o ka lahui a me ka hooholomua i ka aina.  I keia manawa i ike ai kakou i ka loli o ka poali i malamalama. A na keia

@

Ka La Koho Balota.

Hoau mua ke kumuka-

nawai hou.

Na ka aoao Hoomaemae

Aupuni ke kahua.

Lanakila a puni o Oahu.

HAWAII I KONA MAU HOALOHA

Maluhia na hana koho.

O ka Poakou i hala iho ka la koho balota aupuni ka paeaina malalo o ka @ ana i ke kumukanawai hou.

He la nui a maikai ia ma Honolulu nei, a ua hoike mai na hana o ia la i ke ano hou mai ko na kau i hala.  I ka wehena kakahiaka maaloalo ana na kaa lehulehu i hoailona ia me na hia @ ka "Hoomaemae Aupuni," oia hoike ia keia i hoolaaia no ka paio kaulana mawaena o ka pono a me ka hewa o na au i hala.  Alaila, halohaloha pu mai ia na papu alanui me na kanaka Hawaii, na haole a me na Pukki, he poe hoi i paa malalo o ka hoohiki ana a ke Kumukanawai hou e loaa na pono papalua o ke koho balota no na 'liia me na luna makaainana.

NA AOAO HOLO BALOTA.

He elua aoao o na moho holo balota i hoopaa ia lakou iho ma ka paa balota hookahi, oia ka aoao hoomaemae aupuni a me ka aoao hoomaemae i ke kumukanawai a no Lakou na huina like he 13 no ka aoao hookahi. he eha lunamakaainana me eiwa alii.  E ikea no ma ka papahelu malalo iho ko lakou mau inoa pakahi. ka huina balota o kela me keia ma kela me keia mahele koho o Honolulu nei, a e hoomaopopo pu ia hoi, o ka papa inoa maluna o ka papahelu, oia na moho holo balota a pau no ka aoao Hoomaemae Aupuni. malalo iho ko ka aoao Hoomaemae Kumukanawai.  He elua papahelu malalo iho, no na @ a no na lunamakaainana.

NO KE KOHO BALOTA.

Ua wehia na pahu balota ma ka hora 8 kakahiaka, a ua aluka ikaika like ke koho ana o ka poe koho ma na aoao ma ia wa aku a hoea wale i ka auina la me ka hoomaha ole, a ia wa i kualilii mai ai ke koho ana.  I ka hora 5 ahiahi, ua paniia na wahi koho a hoomaka ka helu ana i na balota. a mawaena o ka hora 8 me 9, hoikeia mai la ka heluna o ka poe koho o na apana, a ma ka hale kaawai ili Pacific Hose, alanui Moi i hoohuihui ia ai na balota a pau loa, i akaka ka poe i kohoia a me a poe i haule.  Hora 9 a oi kukalaia mai na balota penei:

AOAO HOOMAEMAE AUPUNI.

Kimo Pelekane opio    2192    kohoia

Frank Hustace             2195    kohoia

A. P. Kalaukoa                        2146    kohoia

D. I. Naone                 2142    kohoia

HOOMAEMAE KUMUKANAWAI.

A, Rosa                       1512    haule

J. M. Poepoe               1437    haule

W. C. Aehi                  1425    haule

S. K. Kane                  1420    haule

O ka papa inoa ae la maluna ko na lunamakaainana, a eia malalo nei ko lakou huina balota ma na apana koho eiwa:

A. H. A.         

[chart- see original]

A. H. K.         

[chart- see original]

Eia hoi ka nui o na balota o kela me keia Alii ahaolelo a puni o Oahu nei i kohoia penei:

AOAO HOOMAEMAE AUPUNI.

S. G. Waila              1212    kohoia

W. P. Robikana           1215       "

J. I  Dowsett Sr.         1214       "

Alex Young                1190       "

A. Jaeger                     1172       "

W. R. Kakela                         1269       "

W. O. Smith                1156       "

H. Waterhouse           1155       "

W. E. Foster               1106       "

HOOMAEMAE KUMUKANAWAI.

Keoni Kamaki             442      haule

S. M. Kaiukai  322         " 

O Sullivan                   343         " 

Palekaluhi                    376         " 

J Keau                                     319         " 

Lilikalani                     324         " 

J. Kanui                       332         " 

D. W. Pua                   311         " 

J Alapai                       310         " 

Eia malalo iho ka papahelu o na balota i kohoia ma kela me keia apana a mahele koho o Oahu nei

[table]

A. H. A.          [chart- see original]

NA APANA KUAAINA.

[table]

A. H. A.          [chart- see original]

NA HIONA O KA LA.

He maluhia na hiona o ke koho balota a puni ke kulanakauhale nei.  Aole he mau haunaele nui i ala ae, koe na okuku liilii iwaena iho o kekahi poe, a ua maluhia no nae.  He kohu ia Sabati keia ka meha o na alanui koe kahi koho.  Ma na kauhale no hoi he mau papaaina i hoomakaukau ia ma na wahi like ole he lehulehu no na houpo lewalewa; ua ai a lawa.

MAI NA APANA KUA.

Ma ke ahiahi iho, haiia mai la ka lohe i ke kulanakauhale nei i na moho holo balota i puka o na apana kau penei No Ewa me Wainae o 1. Kauhi, 360 balota  Waialua me Koolauloa o Hon. Kikila Baraunu. 317; no Koolaupoko Palanaike Baraunu, 200 balota.  O lakou nei ka i kohoia a puka, he poe i hoopaa e hana i ka maemae no ke aupuni, a nolaila, ua puni o Oahu nei i ka hoomaemae aupuni.

KA PO O KA LA KOHO.

Napoo iho la ka la, pahola ia ae la ka nuhou nui no ka puka aluka ana o na moho o ka aoao hoomaemae aupuni, alaila kani mai la na hoopahupahu, oloia ana na ahi kao i ka lewa, nei ae la na pihe huro o na kanaka, he hoike ana i ka hauoli nei no ka lanakila i loaa i ka aoao hoomaemae i ka aina a me kona mau palapu i kauia iho, ma ke kahua heihei o ka la ia.

HE MAU NUNE.

Hala ae la ka la koho me kana mau hana nui. wehe mai la ke kakahiaka o ka la 13, alaila holoke ae la ma ka waha o na kanaka na wawa olelo hoonuinui e olelo ana, ua apahi keia koho balota,---ua koloheia ka aoao hoomaemae kumukanawi e ka poe luna nana, ---e koho ho@ i pono ai---he kipe maopopo keia e ole na kaa puka ai---a nui wale aku.  E hoolohe a molowa.

NOHO BALOTA MA KAUAI

Ma ke ku ana mai o ka mokuahi James Makee i ka hora 6 o ke kakahiaka o nehinei i loaa mai ai na lono ano nui e pi i ana ike koho balota i malamaia ma ka mokuni o Kauai.  Malalo iho e ikeia ai na 'Lii a me na Lunamakaainana i kohoia:

NA ALII.

G. N. Wilkoki            221     kohoia

C. Bakalamana            195        "

G. H. Dole                  192        "

NA LUNAMAKAAINANA.

Apana o Lihue me Koloa.

W. C. Rice                  674     kohoia

A. K. Mika                 84     neo

Hanalei me Koolau.

A. S. Wilkoki             511     kohoia

J. H. Kaiwi                   26     neo

Apana o Waimea me Niihau.

F. Gay                        322     kohoia

J. K. Kapuniai                 8   oki loa

O keia ae la na hoike e pili ana i ke koho balota ma ka mokupuni o Kauai, a he hoike ana mai hoi i ka lokahi o na mea a pau e apono aku i na kumuhana a ka aoao hoomaemae aupuni.

MAI HAWAII MAI.

O na lono koho balota o Hawaii i loheia ma keia kakahiaka eia malalo:

Hilo a me Puna.

D. Kamai                              884      kohoia

H. Deacon                879         "

J. Nawahi                   811      haule

G. Moeheau                714         " 

No na Kohala.

J. Kaimana                            851      kohoia

Kekipi                        282      neo

He mau inoa wale no ka i loheia no keia poe holo malalo iho o na apana like ole o Hawaii, koe hoi ko lakou huina balota penei :  No Hamakua, o W. A. Kini---no Kau, J. Kauhane---no Kona Hema, C. P. Kamauoha---Kona Akau, Keoni Parisa.

MAUI & MOLOKAI.

O na lono huikau i loheia no ka poe i puka ma Maui me Molokai penei no ia.  No Lahaina, o Horner; Hana, J. U. Kawainui, Molokai & Lanai, Naka leka me A. P. Paehaole, apopo nana ia aku ka pololei.

MA KE KAUOHA.

I keia ia ua hookohu aku au ia Wm. Puaoi i Luna Pa aupuni no ka Apana o Koloa, Kauai, ma kahi o Jim. Luka i make.

LANIHAU

Kiaaina o Kauai.

Keena Kiaaina o Kauai.

Lihue, Aug. 17, 1887.

I keia ia ua hookohu aku au ia Isaac Kahilina i Lunakanawai Apana no ka Apana o Hanalei, mokupuni o Kauai.

LANIHAU

Kiaaina o Kauai.

Keena Kiaaina o Kauai.

Lihue, Augate 1, 1887.

Ua hookohu ia i keia la 22 o Iulai 1887 o A. L. Rappety Esq. i Agena haawi Laikini Mare no ka Apana o Kau, mokupuni o Hawaii.

L. A. THURSTON

Kahina Kalaiaina.

Ua hookohu ia o J. W. Maele i keia la, i Agena haawii Laikini Mare no ka Apana o Kona Hema, mokupuni o Hawaii.

L. A. THURSTON

Kahina Kalaiaina.

Aug. 19, 1887.

Ua hookohu ia i keia o B. Naaikauna Esq. i Agena haawi Laikini Mare no ka Apana o Hilo, mokupuni o Hawaii.

L. A. THURSTON

Kahina Kalaiaina.

Aug. 19, 1887.

OLELO HOOLAHA HOOKAPU

AINA.

E ike auanei na kanaka a pau, owau o Mrs Paikalani w, e noho ana ma Niolona, Honolulu.  Ke papa a ke hookapu loa aku nei au i ka poe kuleana e komo ana a noho a hana maluna o kuu apana aina i kapaia ma ka inoa Kamaoa, Kau, Hawaii, oia ke kuleana i hoikeia ma ka inoa o Kaumu k, ma ka palapala Kuleana 9155.  A o ka mae wale no e noho maluna o ia aina oia o Holoaa k.

No ka oiaio o keia ke kau nei au i kuu inoa i keia la 10 o Sepatemaba, 1877.

PAIKALANI w.

Honolulu, Oahu.

HOOLAHA HOU.

HOOLAHA.

E ike ka poe a pau ke pili.  e noho ana ka Aha Hoopii Auahu no Hamakua, Kohala Hema.  Kohala Akau, Kona Akau a me Kona Hema no ka mokupuni o Hawaii puni  :

Oct.  6, 1887, hora 9 kakahiaka, ma ka Hale Hookolokolo ma Hamakua.

Oct.  8, 1887, hora 9 kakahiaka, ma ka Hale Hookolokolo ma Kohala Hema

Oct. 12, 1887, hora 9 kakahiaka, ma ka Hale Hookolokolo ma Kohala Akau

Oct. 20, 1887, hora 9 kakahiaka, ma ka Hale Hookolokolo ma Kona Hema

Ma ke kauoha a S. L. AUSTIN,

Peresidena Aha Hoopii Auhau.

AHA HOOKOLOKOLO KAAPUNI.  Apana Elua o ko Hawaii Pae Aina.  Ma ka hooponopono Waiwai.  Ma ka hanao ke kaha malama waiwai a me ke kino o KEALOHA liilii no Paia, Maui.

Ma ka heluhelu a me ka waiho ana mai o ka Palapala Noi a  Joseph Kekahuna ke kahu malama i ka waiwai a me ke kino o Kealoha liilii no Paia, Maui, a e noi ana e hookuu loa ia aku ia mai ka noho malama a kahu ana, a e hoaponoia kana moowaiwai.

Ua kauoha ia, o ka Poakolu, ka la 5 o OKATOBA, M. H. 1887 ma ka hora 11 ka kakahiaka,

oia ka manawa i koho ia no ka hoolohe ana i ua noi la, imua o ua Lunakanawai la, ma kena keena ma ka Hale Hookolokolo ma Wailuku, a ma ia manawa a ma ia wahi no, e hele mai ai na mea a pau i pili, e hoike mai i ke kumu, ina he kumu oiaio ko lakou e ae ole ia ai ua noi la. 

A o keia kauoha, e hoolahai ma ka olelo Hawaii i ekolu pule maloko o ke KUOKOA, nupepa ma Honolulu.    

Kekauia ma Wailuku, ko Hawaii Pae Aina, Sepatemaba 3, M. H. 1887.

GEO. E. RICHARDSON

Lunakanawai Kaapuni Apana Eha. H. P. Aina.

MA KE KEENA O KA LUNAKANAWAI KAAPUNI Apana III o ko Hawaii Pae Aina.  Ma ka waiwai o Alapai no Kaauhuhu Kohala Akau Hawaii, ua make.

Ua heluhelu ia a ua waiho ia ka palapala noi a Laha@ Kahue, e noi ana e hoonoho ia oia i Lunahooponopono no kona waiwai o Alapai no Kaauhuhu Kohala Akau Hawaii, i make Kauoha ole.

Nolaila, ua Kauoha ia ka poe a pau ke pili, o ka  Poalima la 14 o October 1887, ma ka hora 9 o ke kakahiaka, ma ka Hale Hookolokolo ma Kapaau Kohala Akau Hawaii, oia ka la a me kahi me ka manawa ua koho ia no ka hoolohe ana i ua noi la, a me ka poe hoole ke hoikeia.   

S. L. AUSTIN

L. K. Kaapuni.

August 27, 1887

HOOLAHA HOOKO MORAKI 

I kulike ai me kekahi mana kuai i hoikeia maloko o kekahi palapala moraki i hanaia mawaena o Chung Hoon mea moraki aku, a me Francis M. Hatch mea moraki mai,  ma ka la 4 o Mei 1883, i kopeia ma ka Buke 79, aoao 492, 493, 494, a i noho hope ia ua moraki la ia William Hillebrand mai ia Francis M. Hatch mea moraki mai, ma kekahi palapala i kakauia ma ka la 13 o Feberuari 1884, a i kopeia ma ka Buke 79 aoao 492; a ua make ua hope moraki la.

Nolaila ua hookohaia o Hon. C. R. Bishop i lunahooponopono no ka hooilima i huiia o ka waiwai o William Hillebrand. Ke hoike nei keia hoolaha, ua manao ka lunahooponopono o ka waiwai o William Hillebrand i make e hooko aku ia moraki i oleloia mamuli o ka uhakiia o na kumu aelike, ka uku ole ia o ke kumupaa me ka ukupanee ; a ma ia hooko ana e kuai kudala ia ana ma ke akea ma kahi a me ka manawa e hoike ia aku ana, na aina a me na mea a pau i hoakakaia ma ia moraki

No na mea i koe, e ninau ia Whiting & Crieghton he mau loio ma ke kanawai.

CHARLES R. BIHOPA

Lunahooponopono o ka waiwai o William Hillebrand

Penei na aina e kuai ia ana:  Aia ke waiho la ma ka aoao komohana hema alanui Hotele, Honolulu, nona ka ili he 35 anana kuea me 6 kapuai kuea, oia ke Kuleana Helu 258 ia Kauhola, Hangip i kakauia ma ka la 15 o Sepatemaba 1858, kopeia ma ka Bule 11 aoao 72 me 73.

O kela apana aina e pili pu la me ka aina i hoikeia maluna, alanui Hotele i hoakakaia ma kekahi palapala mai ia Francis Spencer ia Hangip i kakauia ma ka la 23 o Feberuai 1859, i kopeia ma ka Buke 11 aoao 492, nona na kapuai ma ke alo a hiki i ke alanui he---me 31 kapuai hohonu.

HOOLAHA HOOKO MORAKI 

I kulike ai me kekahi mana kuai i hoikeia maloko o kekahi palapala moraki i hanaia mawaena o Chung Hoon mea moraki aku, a me Charles R. Bishop me Samuel M. Damon, he mau kahu no ka waiwai o Rebecca Punee Puuku mea moraki mai, i kakauia ma ka la 6 o Feberuari 1885, i kopeia ma ka Buke 91, aoao 461, 462. Ke hoike nei keia palapala ua manao na mea moraki mai e hooko ia moraki no ka uhakiia o na kumu aelike, oia ka uku ole ia o ke kumupaa a me ka ukupanee, a ma ia hooko ana e kuai kudala ia ana ma kahi a me ka manawa e hoike ia aku ana, na aina a me na pono i hoakakaia ma ia moraki e like me ia malalo iho:

No na mea i koe, e ninau ia Whiting & Crieghton he mau loio ma ke kanawai.

CHARLES R. BIHOPA

SAMMUEL M. DAMON }

Na kahu o ka waiwai o Rebecca P. Puuku.

Penei na aina e kuai ia ana:  O kela aina me na pono e waiho la ma alanui Maunakea Honolulu i hoakakaia na palena penei: Hoomaka ma ke kihi akau alanui Maunakea, holohikina 60 kapuai i  ko John Meek apana aina, a ma ko Manini apana komohana 59 1/2 kapaai a hiki i ke alanui Maunakea:  a ma ia alanui aku he 37 1/2 kapuai a hiki hou i kahi o ka hoomaka ana; oia no hoi ka hapa o ka aina i hoakakaia ma ka Palapala Silu Nui helu 47.

HOOLAHA HOOLE KULEANA

E ike auaunei na na kanaka a pau ma keia.  Owau o Honolii k, o Kohala Akau, mokupuni o Hawaii, a mamuli o ka mana o kekahi palapala kuai  i hanaia e Kalawaia w, a me Makaole ka, kana kane mare, e hoolilo mai ana ia'u ma ka la 5 o Aperila A. D. 1887 i kela aina e waiho la ma Kuhua, Lahaina mokupuni o Maui, oia ke kuleana i hoikeia ma ke kumu Kulena Helu 7682 Palapala Sila Nui Helu 5684; a ua hoopaaia ua palapala kuai la ma ke kuena Kakau Kope o ke Aupuni, ma ka Buke 104 a ma na aoao 139 me 140.  Nolaila ke hoolaha a ke hoikeia aku nei ma ke akea aole loa he kuleana o Kamanawaulu e like me kana hoolaha ma ka nupepa ko HAWAII PAE AINA ma ka apana aina i olelo ia.  A ke papa ia aku nei na poe waiwai aole e lawe a paa ma ke ano moraki a ano hoolilo okoa ae paha mai a Kamanawaulu ia i oleloia o poho auanei.  E hoole mau loa aku ana au i ke kuleana kupono o Kamanawaulu a me kekahi poe e ae e hoi ana he kuleana ko lakou ma ka aina i oleloia.  A o na aha kanawai wale no kahi e haawiia ai ka mea kuleana kupono a ku i ke kanawai.     HONOLII

Makapala, N. Kohala, Sept. 2, 1887.

HALE PAIKII ALANUI NUUANU

I WEHEIA NO EKOLU MAHINA.

MAHOPE IHO O NA HOOPONOPONO hou ana i wahi e loaa ai he wa maikai no kela a me keia e hele mai ai e pai kii no lakou iho ma ka uku oluolu, ua hoopaa iho makou e hoolako aku i ka poe a pau e like me keia malalo iho:

Kii pepa, ...      6, no $1.00.

Kii lako hale, lumi, hale a pela aku ... 3, no $1.00.

Kii nui 8 x 10 ... 1, no $1.00; a i ole $8 no ke kakini.

Hoomaemae a hoolele hou ana i na kii ka hiko, ma ia uku hookahi no.  Hookahi kii pena 8 x 10 a me ka laau, he $6.00.

H. A . LUSCOMB.

Helu---Alanui Nuuanu.

AHA HOOKOLOKOLO KAAPUNI.  Apana Elua o ko Hawaii Pae Aina.  Ma ka hooponopono Waiwai.  Ma ka hana o ka waiwai o PAELE k, no Kupeke, Molokai i make kauoha ole.

Ma ka heluhelu a me ka waiho ana mai o ka Palapala Noi a  Oloolo k, e hoike ana ua make kauoha ole o Paele k, no Kupeke, ma Molokai ma Molokai.  A e noi ana e hoapono ia ka waiwai, a e hoonoho ia na hooihaa.

Ua kauoha ia, o ka Poakolu, ka la 5 o OKATOBA, M. H. 1887 ma ka hora 10 kakahiaka, oia ka manawa i koho ia no ka hoolohe ana i ua noi la, imua o ua Lunakanawai la, ma kona keena ma ka Hale Hookolokolo ma Wailuku, a ma ia manawa a ma ia wahi no, e hele mai ai na mea a pau i pili, e hoike mai i ke kumu, ina he kumu oiaio ko lakou e ae ole ia ai ua noi la.  A o keia kauoha, e hoolahai ma ka olelo Hawaii i ekolu pule maloko o ke KUOKOA, nupepa ma Honolulu.    

Kekauia ma Wailuku, ko Hawaii Pae Aina, Sepatemaba 3, M. H. 1887.

GEO. E. RICHARDSON

Lunakanawai Kaapuni Apana Eha. H. P. Aina.

MA KE KEENA O KA LUNAKANAWAI KAAPUNI Apana Ekolu o ko Hawaii Pae Aina.  Ma ka waiwai o HAAE no Kealia, Kona Hema, Hawaii, i make.  Ua waihoia ka Palapala noi a Kaumu wahine, mare a Haae o Kona Hema, Hawaii, e noi ana e hoonoho ia oia i Lunahooponopono no ka waiwai o kana kane o Haae no Kona Hema, Hawaii, ua make kauoha ole.

Nolaila, ua Kauoha ia ka poe a pau ke pili, o ka  Poalua la 25 o October 1887, ma ka Hale Hookolokolo ma Hookena, Kona Hema Hawaii, i ka hora 9 o ke kakahiakaoia oia kahi a me ka manawa i kohoia no ka hoolohe ana i ua noi la, a me na mea kue hoikeia.   

S. L. AUSTIN

Lunakanawai Kaapuni.

Sept. 1, 1887

MA KE KEENA O KA LUNAKANAWAI KAAPUNI Apana Ekolu o ko Hawaii Pae Aina.  Ma ka waiwai o KAANAANA no Hookena, Kona Hema, Hawaii, i make.

Ma ka waihoia ana mai o ka Palapala Noi a Kahele Kama w, e noi ana e hoonoho ia oia i Lunahooponopono no ka waiwai o KAANAANA no Hookena, Kona Hema, Hawaii, i make kauoha ole.

Nolaila, ua kauohaia na mea a pau ke pili, o ka  Poalua la 25 o October M. H. 1887, i ka hora 9 o ke kakahiaka, ma ka Hale Hookena, Kona Hema, Hawaii, oia kahi a me ka manawa i koho a no ka hoolohe ana i ua noi la, a me na mea kue ke hoikeia.    S. L. AUSTIN

Lunakanawai Kaapuni.

Sept. 1, 1887

OLELO HOOLAHA.

E ike auanei na mea a pau, he nana mai i keia, o maua o na mea nona na inoa malalo iho nei, ke papa a ke hookapu loa aku nei mana i ko maua aina hoolimalima oia ke kula o Kamaoloa, a me ke kai lawaia o Palea.  e waiho ana ma Manana Ewa, ua kapu ka hele ana ona bipi, lio, hoiki, miala, puaa a me na mea e ae.

Ua kapu pu ka poe e hele wale ana e @ ma ke kai i olelo ia maluna.  Ua kapu na upena huki, upena koko, upena e @ei ku i ka la waia, ua kapu na mea a pau.

Ma keia ke hookohu aku nei maua ia J. Kelekoma, i paniolo nana e hopu i na mea hele hewa a pau, e lilo no keia i kanawai mai kona la i puka ai.

MRS. MILEKA, KEONEIKEOLE.

Manana, Ewa.  Aug. 27, 1887.

No ka oiaio o keia ke kau nei au i kuu inoa i keia la 10 o Sepatemaba, 1877.

PAIKALANI w.

Honolulu, Oahu.

MA KE KEENA O KA LUNAKANAWAI KAAPUNI Apana Ekolu o ko Hawaii Pae Aina.  Ma ka waiwai o Akeona no Kohala Akua Hawaii, i make. 

Ua waihoia ka Palapala noi o L. S. Thompson Luna Hooponopono no ka waiwai o Akeona no Kohala Akua Hawaii, i make Kauoha ole, e noi ana e apono ia i kona hoike hope, a e haawi ia aku i ka waiwai i koe, i na hooalina, a e hookuu aku ia ia mai kona noho ana i Luna hooponopono no ia waiwai.

Nolaila, ua Kauoha ia ka poe a pau ke pili, o ka  Poalima oia ka la 14 o October 1887, i ka hora 9 o ke kakahiakaoia, ma ka Hale Hookolokolo ma Kapaau Kohala Akau, oia kahi a me ka manawa ua koho ia no ka hoolohe ana i ua noi la, a me ka poe hoole ke hoikeia.   

S. L. AUSTIN

Lunakanawai Kaapuni.

Aug. 23, 1887

HOOLAHA HOOKO MORAKI

I KULIKE AI ME KEKAHI MANA Kuai i hana ia maloko o kekahi moraki mawaena o

Ane Nakoolani Holokahi (w) mea moraki aku, a me W. L. Holokahiki (k) kana kane mare,

ia A. H. Spencer ka mea moraki mai,  i hana ia ma ka la 1 o Sepatemaba 1885, a i kopeia ma ka Buke 03, ma na aoao 422, 423, 424.  Ke hoike nei keia hoolaha e hooko ia ana ia mana kuai o na moraki la i olelo ia mamuli o ka uhaki ia ana o na kumu aelike, oia ka uku ole ia o ka ukupanee, a e kudala akea ia ana ka aina a me na pono maluna iho ma kahi a me ka manawa e hoikeia aku ana, ua moraki la i oleloia e like me ia malalo iho.

No na mea i koe, e ninau ia Whiting & Crieghton he mau loio ma ke kanawai.

A. H. SPENCER

Honolulu, Aug. 25, 1887.

Penei na aina e kuai ia ana:  O kela apana aina me na pono e pau e waiho la ma Punahoa Hilo, Hawaii, i hoakakaia penei:  E hooniaka ana ma ke kihi o ka pa pohaku, kihi hema o ko C. H. Wetmore aina, alanui Luakini, holo Ak. 52 1/4 deg. Hik. 1. 90 Kaul. ma ia (alanui a hiki i ke kihi hema o ko D. F. Sandford aina, alaila Ak. 22 1/2 deg. Kom. 1. 98 kaul. ma ia lihi aina alaila, Hema 53 1/2 deg. Kom 2.45 1/2 kaul. a hiki i ka pa pohaku kihi komohana o ia aina, alaila Hema 39 deg. Hik. 2.04 kaul. ma ia pili pa a hiki hou kahi i hoomaka ai, nona ka ili he 43-100 eka, i hoakakaia ma ka palapala o S. N. Castel ia John K. Akina i kakauia ma ka la 1 o Augate 1870, a i kopeia ma ka Buke 31 ma na aoao 141 me 142.

MA KE KEENA O KA LUNAKANAWAI KAAPUNI Apana III o ko Hawaii Pae Aina.  Ma ka waiwai o Kahookeli no Kohala Akua Hawaii, i make. 

Ua waihoia ka Palapala noi o Robert Hail ka Luna Hooponopono waiwai o Kahookeli no Kohala Akua Hawaii, ua make kauoha ole, e hoike ana:  aole i lawa ka waiwai Lewa o ka mea make e hookaa i na aie, ua noi ia oia i ka mana e kuai aku i ka waiwai Paa.

Nolaila, ua Kauoha ia ka poe a pau i pili, o ka  Poalima oia ka la 14 o October 1887, i ka hora 10 o kakahiakaoia, ma ka Hale Hookolokolo ma Kapaau Akau, oia kahi a me ka manawa e ka hoolohe ia ua noi la, a me ka poe hoole ke hoike ia.

S. L. AUSTIN

Lunakanawai Kaapuni.

Aug. 23, 1887.

OLELO HOOLAHA.

E IKE auanei na kanaka a pau loa ke nana mai i keia, o ka aina o Puulani ka inoa me Popoiwi, e waiho la ma Kaupo mokupuni o Maui, "Ko Hawaii Pae Aina," oia hoi ka aina o Wm. B. Sake haole i kaua aku ai i kuu keiki ponoi ia Jona Laika no Kipahulu, Maui nolaila, ke hoike aku nei au ma ke akea; aole he kuleana i kona mau hanau mua e lawe i ka mana e malama ma ke ano Luna Hooponopono Waiwai---a hoolilo a hoolimalima i ua aina la, aia no ia'u na hooponopono ana i na mea a pau e pili ana i ka waiwai o Jona Laika a me na mea a pau, aole i kahi mea e ae, a o ka mana a'u i hookohu aku ai ia Hilipoolani i hope nana e malama i ua aina la.  E like me ka hoolaha i puka ma ka "Nupepa KUOKOA" ma ka M. H. 1886, ua hoopau loa ia ia i keia la, aia wale no maluna o'u na mana a pau mai keia la aku.

C. E. LAKE Kona X Kaha

Kipahulu, E. Maui, Iune 21, M. H. 1887.

@