Ka Nupepa Kuokoa, Volume XXVI, Number 28, 9 July 1887 — Ua hala, Ua nalo. [ARTICLE]

Ua hala, Ua nalo.

Me ka puuwai i kupouli i ke aloha, e oluolu e waiho aku ma kahi kaawale o kou mau rumi hookipa i keia, i ike mai ai na kini o ka mea i hala e aku ma ka aoao mau o ka honua. I ka wanaao o nehinei, Iune 22, ua waiho mai o John Jas. Kawehena i keia ola ana, a huli hoi aku la no ka aoao mau o ka honua. Ua piha iaia he 7 makahiki, 10 malama a me 26 la ma ka aina makamaka ole nei: a o makou hoi o kona mau hoaaloha o keia aina makua ole, hookahi makua o ka Papa Ola; nona ko makou mau hoomanao ana ae. O Kaupo i Maui kona one hanau, na Maunaloa (k) a me Kauhine (w) ekolu lakou a ka pupuu hookahi; he pokii kona aia i ka ua Apuakea, D. Loheau. Ua hoomailo mau ka mai nae iaia no kekahi mau mahina iho nei, a i ka po o ka la 22 iho nei o Iune, ua ano ikaika loa iho la ua nae la, kaili loa ke aho me ka ike ole ia; a i ke ao ana ae, kii ia aku e hoala, ua hala mua kela, ua la-au ke kino aloha no oia. He eueu kakele peni oia no keia panalaau, e hoike ana i na anoai o ke kahua lepera nei, i ke ao holookoa; a he luna nupepa oia. Ua pau ke kekele ana o kana maka peni ma kou mau kolamu. O ke aloha auanei ko na keiki kiikiipi o ka papa pai. JAS. IMAIKALANI. Kalawao, Iune, 23rd, 1887.