Ka Nupepa Kuokoa, Volume XXVI, Number 27, 2 July 1887 — Page 3

 

 Ka Nupepa Kuokoa

KE KILOHANA POOKELA NO KA LAHUI HAWAII.

 

                                                               Ka Nupepa Kuokoa.

Paiia e THOS. G. THRUM ma ka Halepai o ka nupepa "SATURDAY PRESS," Keena Hooponopono, ma na kihi o Alanui Moiwahine ma Nuuanu.

E hoouna mua mai na Olelo Hoolaha ma ke Keena Hooponopono mamua ae o ka hora me ke awakea o na Poaha a pau. Aole e hoopukaia na Olelo Hoolaha ke laweia mai mahope o ka hora i hoikeia maluna. E hooko koke aku ana makou i keia rula maluna.

E hooili mai i na leta a pau a me na kauoha a me ka uku pepa ia KA NUPEPA KUOKOA ma Honolulu. Ina e loaa pono ole aku keia pena kona poe lawe, e hai mai me ka hakalia ole i keia Keena.

O ka uku a keia pepa e haawi ai i kona me ana, he umi keneta no ke dala, koe ka apana o Kona, Oahu, a me kekahi mau apana e ae kahi nui o ka luhi i ka halihali ana i ka luna ma ia mau apana, e hooiia ka uku luna.

 

                                                                 Kela me Keia.

            He puali koa ko Hilo e paikau ia mai nei e Keoni Baker wahi a na lono aneane 200 ka nui o na koa. 

 

            He eke dala i piha me ke dala gula ka i okuku ia imua o kekahi poe kana ka i uku kipe ke lawe lakoa i na mea kaua a hoohana aku;" oia na lono.  Hoohana i ke aha a owai keia paipai kaua? 

 

            He holina ka i uwa ae ma kekahi wahi o ka Lae ino ae nei i ka po Poakolu nei aohe nae i maopopo ke kumu o ka hana Aole he kaiko i hoea ae ma ia kahua. 

 

            Ua hoike mai nei ke kula nui o Hilo like me na hoolaha ana ana ma keia pepa a ua loaa na haawina mahalo he nui no ka holo mua o ke kula ma na mea a pau.  

 

            Ua hookuuia na keiki haole i hoopii ia no ka hoeha i na makai kau lio no no lakou kela hihia i noho ai ka aha hoomalu o ka hemahema. 

 

            He 13 ana paha ka nui o na haumana o ke kula nui o Lahainaluna e hookuu ia ana i keia makahiki.  E hoike ana ke kula ma ka la 7 0 keia mahina ae, a e hoopokole ia ana na la hoike mai ka ekolu a ka elua. 

 

            Oiai ka halawai makaa nana e malamala ana ma Manamana i ka Poaha nei ua hoonaia ae la kekahi hapa o na koa Honolulu Raifela e kiai i ka maluhia a ka Hale Aupuni Aliiolani a me ka Hale Duke makai o Ainahou. 

 

            He kohu la nui kulaia no Honolulu nei ka Poaha i hala iho la ua panikuia na hale oihana kalepa a ua hooneoneo pa ia na alanui no ka pau o na kanaka i ka halawai makaainana ma Manamana kahi i puukiuki ai. 

 

            Ua malama ae na hui himeni Iolani me Heanani he aha mele a me kekahi mau hana kepolo maloko o k@ Hale Mele hou i ka po Poalua nei.  He mau wahi kauna makaikai no ka i  hele kino ae e ike i na hana a ua ku i ka mahalo nui ia. 

 

            Ma ka po  Poaha nei ua laweia ae i ka halewai kekahi lawehala i ooki ka puu o kekahi pukiki kalaiwa kaa aohe nae i kukonukonu loa.  Hookahi hoi haole i hopuia ma alanui Alakea me Moi no ka hooweliweli e kipu i kekahi haole iho.  He ona ke kumu o keia wahi a na lono. 

 

            Ua hoihoi nele ia mai kekahi o na luna hana aupuni iaia i kii aku ai i kana mau wahi kenikeni no kona mau kulu hou i hookahe ai a eia kahi olelo i pane ia mai  "O hoi aohe dala o ke aupuni ke kau nui aku nei ke aupuni o ka hoea mai o ka dala ma ka  Auseteralia".  

 

            E nana ae i ka leta anoai o Kohala ma ko makou aoao eha e puka aku nei He mau hunahuna mikololohua ko ia leta e nuu iho ai ua puni mea hou a lilio na pepeiao.  Mai poina i ko kakou mau hoolaha hou a me na moolelo hooniniau.  Ina iho ua hele a kuhua ka momona. 

 

            He mea manene loa noka pepeiao ka lohe ana aku i kekahi o na keiki liilii e holoholo ana maloko o ka pa o Aliiolani Hale i kekahi la o keia pule i bala iho le e hoopuka ana i na huaolelo ino loa ma ke ano e hailiili ana ma kahi akea hoi.  E hooikaika e hoonalo e na makua mai ae aku ia ano. 

 

            Maalo ae la kekahi makamaka ma kekahi o na hale o Aala ae nei ike aku la ia e holapu ia ana kekahi ohana e ka mana o ka waiona e ka anai o a lanei a i kona nana pono ana aku eia ka o kekahi makamaka maikai no,  Ua hoike ia maiiaia ua kau ka lia o ka ohana no ka mana o ke ahio Helene. 

 

            Kukulu kalaihi lua ka hoi ia wahi kaa huila lua e huki ia ana e kekahi i kekahi.  He elua manawa i ike ia aku ai ma alanui Maunakea e kololio ana.  Ua loheia mai na lono o ka po Poaha nei ka hoao ana o Kipikona e huna paha iaia iho maluna o ka moku ka lepa Kalakaua a me ka manao pu ana e kau maluna o kekahi kiakahi a holo aku la ihea?  Ua ahuwale nae kana kuikui hana pele ana a holo i kai e pee ai aohe i holo i uka.  Honolulu Raifela kahi i kiai ai ma ia po a ao.

 

Hoike o ko Kula Ka@ikamahine o Maunaolu

Mr. Lunahooponopono; Aloha oe

Ke noi ia aku nei kou ahonui a me kou lokomaikai e oluolu mai e hookomo iho i keia mau wahi nu iloko o ke kino lahilahi o kau hiwahiwa. 

            Ma ka Poaha Iune 3rd iho nei ua hiki kino aku kou mea kakau nei ma ka Kula Kaikamahine o Maunaolu no ka makaikai ana i na hana o ia Kula kaulana.  Akoakoa aku la  makou me na makamaka lehulehu i hiki ae iloko o ke keena Kula nui he hapalua i hala ae o ka hora eiwa hookani ia la ka bele no ka akoakoa ana mai o na keiki he wahi minute pokole mahope iho hookani mai la kekahi o na kumu i ka ogana a maki mai la  na keiki iloko o ke keena nui me ka  hoopololei ana i na keehina wawae pakahi ma ke mele e hookani ia ana iluna o ka ogana.

            Pau ia hoomaka ka hana ma ke mele hoomaikai ana i ka Haku a he mau mele e ae no hoi kekahi mahope koke iho i ka pau ana o na mele ua hea ia aku a ua kumai kekahi papa kula hoike honua ua paa pono no ka haawina a ua eleu no na keiki i ka pane ana i na ninau i haawiia aku ma keia wahi au i ike koke aku ai ke ao ia nei no na haumana o keia kula ma na rula aoana hou e like me na rula aoana e ao ia nei na haumana o na kula Beritania hele la o ke aupuni ka rula aoana nana i haawi i ke kula o Waihee i ke panepoo maloko o keia mokupuni. 

            O na haawina kula i hoikeia mai oia keia:  Aohonua Moolelo Hawaii Piliolelo Hooikaika kino. 

            Ua nui na himeni maikai i mele ia mai a he lealea maoli no ka pepeiao i kau a mea o ka honehone.

            He nui na haiolelo maikai a o na mea a pau i hanaia ua hanaia me ka maikai a me ka naauao.  Iloko o ka haawina Phisiology ua hoike pu ia mai aohe ka rama he ai aka he mea hoohaunaele i ka ono ai hoeha i ka opu he hanaino i ka wai hoowali ai (gastric juice) hoomomona i ka puuwai hoonawaliwali ia mea i kona pana ana a me ka nee ana o ke koko iloko o kona aa  nolaila he mea ino a hoomake kino ka rama.  He hoonaauao ana keia ma ka ike e pono ai ka noho'na a meka malama ana i ke kino e like me ka haina i pane ia mai e kekahi kaikamahine "i imi kakou i ka Phisiology a me Hygine i ike ai kakou i ka malama ana ia kakou iho." 

            He nui aku no na mea i hanaia aka e hooki au maanei oiai he haiki kahi. 

            Mahope o ka hoike ana ua nui ka poe i ku ae e paipai manao a o na mea nui oia keia:  E malama na makua i ka lakou mau kaikamahine oiai e pili aku ana me lakou mai hookuu aku me ka poe hoowalewale; o na kaikamahine i hoonaauao ia a malama pono ia ka manaolana o ka lahui:  Ka hoonaauao an a me ka imi a malama ana i ka pono o Kristo ka pualikaua nana e kiai nei ke Kuokoa o Hawaii.  O na kaikamahine i hoonaauaoia iloko o na kula hanai makua nana e malama a hooulu i keia lahui. 

            O keia ae la ka panina o na hana aole hoi he mau mea ono kuai kekahi e like me mamua.  Rufus C. Wilcox.

 

Eia ka Hoopunipuni nui.

            Eia ma Puako nei apana o Kohala Hema he kanaka o Nani kona inoa a o keia ka makua o ka hoopunipuni ma keia apana a e hoike aku wau i kana mau hoopunipuni i maopopo mai i kou hanohano a me  na makamaka o kaua Ma ka hoomaka ana o ka pule mua o keia mahina e nee nei a ma ka la 2 ma ke ahiahi ana oia ka hora 7 paha ua hoopuka mai koa wahahee  mai kona wah mai ma ka olelo ana mai o ka uhane o ka poe a pau o Puako ua laweia aku i ka huakai uhane o na alii pela kona ike ia manawa a hoike pu aku keia hoopunipuni nui i ka inoa o kekahi kaikamahine opiopio oia ka ka uhane aole he hapa ma kona kino a ma keia mau hana ua piliwale wale no ka manao o kekahi poe a makau aku i keia hoopunipuni nui wahi ana i pane mai ai ma ke alo o kekahi poe ina e loaa kekahi i ka mai e hele aku iaia oiai oia ka hoola.  Ma keia ke hoike aku nei kou mea hanu mea hou ua lawa pono oia me na ike he lehulehu no keia moo nui hoopunipuni P. Rome oiai ka huelo o keia moo e huki ana i  ka 1/3 o na hoku o ka lani. 

            He kahuna hoopunipuni oia ma keia apana a ua nui ka poe puni no kana mau hana no ka wa mua aka no keia manawa ua nui ka poe makemake ole no kana mau hana.  He nui ka poe mai a keia hoopunipuni e hana nei aohe nae he ola ana ae no keia ke minamina nei kou uhane no ka lalau ole mai o na makai e ao i keia hoopunipuni nui no ka lo o o na makai ma keia mau hana ua oi aku pono e ao pu mai kaua i keia hana hoohilahila oiai ka aina i ke au naauao.  (Makai-kiu)

 

            Ninau aku na naumana a Iesu Iaia "Heaha la ka hoailona o ka hiki ana o ka la hope o ke ao nei?"  "Aia oukou a lohe i na nene kaua ana ka mai ahulau &c alaila o ka hoomaka ana ia o ua mau la la"  Ke neenee mai la anei ia mau sekona?  Pane ae ko makou Prof:  Aole aia pouli ka la.

 

KA HUAKAI ALII MA LADANA

            Ua pae ola maikai aku ko kakou mau alii a me na ukali ma Enelani ma ka la 7 o Iune i hala iho la.  I ka wa a ko lakou moku e hookomo aku ana i ke awa ua lehulehu na moku i ukaii pu aku mahope no ka hoohanohano ana.  A ia lakou no a ku iuka e ku makaukau mai ana kekahi kaa alii i hoounaia mai no laua mai ka haleahi mai o Bakinehama.  Ua ohohia nui ia na alii o kakou e na makaainana Enelani a ua haawi ia he mau hookipa hanohano ana no laua.  A he mea nuhou loa ia lakou ka hoea hou ana a ko Hawaii nei mau alii malaila no kekahi wa loihi i hala ae nei.  Ua apo ia mai na alii me ke aloha nui ia.

 

 KA LA IUBILE MA LADANA

            He la nui loa keia ma ke kulanakauhale o Ladana a ma na wahi a puni o Enelani.  Ma ka po a ao ae ka la Iubile ua kai huakai nui ae na kanaka ma na huina alanui ua kauluwela ke kulanakauhale i na lama kukui pela pu ka lewa i na ahi kao wehe akea ia na ipuka o na hale aupuni ma ia po a ao.  H lehulehu loa na hoohiwahiwa i malama ia no ka la Iubile o ka Moiwahine Victoria nana i rula o Enelani iloko o ke kanalima makahiki a ua lawa ole no keia pepa ke hoikeike aku i ka piha hauoli palena ole o na kanaka mai o a o.  Ua olelo  ia aia maluna o elua miliona kanaka ka i akoakoa ae ma ke kulanakauhale o Ladana a i komo pu i ka hoomanao hiwahiwa no ka Iubile. 

 

UWEA TELEGARAPA MOANA

            Ke hoea hou mai nei i o kakou nei na lohe no kela u wea olelo moe moana e hoomoe ia mai ana mai Kanada Vanecouva a hiki loa i Hawaii nei a mai nei aku hoi a na paemoku Fiji Samoa a me Auseteralia.  A ua koho wale ia aia maluna aku o ka miliona dala ke kumuwaiwai io e hoohana ia ai keia hana.  O ka manao o ka hui e loaa ona mau koka hou mawaho ae mai na wahi a lakou e hoomoe mai ai ka uwea olelo.  Ua kokua nui ke aupuni o Kanada i keia hana a ua komo pu aku me kakou nei.  A ke holopono loa keia mau hoolala ana e loaa ana no na pomaikai o ka launa kamailio ana na wahi e ae o ka honua nei.

 

            HE LEO KAHEA      E kou poe lawe nupepa Kuokoa eia ka wa kupono e hookaa mai i ka hapa hope ke ola o ka pepa mai kali o hala e ka wa pono o hoopaa ia ka oukou ia Uepa Eleele a me Ekikepa ka iwa o ka lewa ka mea nana i huli i ke aupuni o Bevia. E hoolohe i keia o nele i ka haawina o Laudila ke koa wiwo ole Aupuni Aniani.   S. K. KAHOOPII

 

PUUA I KA IA: I kekahi la o ka pule i hala ua iho aku he elua mau keiki puukani o Kahua a Ranch i kahakai i ka lawaia oia o Mr. Akau he pua no Kina a me Mr. Pahinui a he wahi lede ka hoi kekahi me kana popo lehua oia hoi o Kauhiwai.  Oiai laua e lawaia ana ma ka lae kahakai ua ai ae la he ia i ka Pahinui makau oia hoi he wahi poopaa i aneane 6 iniha ka loihi a no ka paa loa o kana makau ua nanahu iho la oia ma ke poo o ua wahi ia nei a he ulia ana iho la la hoi no ke aha ua noho pono aku la ua wahi ia la iloko o koua kani a-i a hemo mai la ka makau.  Iloko o ia manawa he wa ia no kona kupilikii a ano pilikia maoli no  e noke ana oia i ka uu iluna i hemo aku iwaho aohe nae he wahi mea a hemo iki a e noke ana hoi i ka uu iho ilalo i poholo iho hoi iloko o ka opu aole no he pono ua noke oia i ke kahe i kona kokoolua aole no he hiki oiai he like me ka ole kahi leo puka mai a iloko o ia wa ua noonoo iho la oia o kona hora hope loa ia ua hoomaka iho la oia e holo i kula i ike ia kona pauku kino e kona mau hoa ina e lawe aku ana ka mea Mana Loa i ka hanu hope a oiai oia i hiki aku ai ma ia wahi me na hooikaika no ka hemo aku ua lewalewa io aku la kekahi mea me kona kuhi la o kona alelo eia ka o ua wahi ia nei ua hemo aku la a pau ae a na kokoia no ka pilikia a hoomanao ae la ia e ai wahi kalo moa ana no ka eia nae ua pilikia kekahi mau mea o ka puu a nui ke kahe o ka wai-ula.    L.S.K.

 

BUKE MOOLELO HOU

Mamuli o ke noi pinepine ana mai o na makamaka i ka moolelo o ka Haku Nelekona ua lawe hou mai au oia ke kahua o ka hana no ke pai Buke.  Ua pakui hoololi a hooponopono hou ia na wahi hemahema i lilo ai keia i moolelo helu ekahi mamua o kekahi mau moolelo e ae a kakou i heluhelu mau ai Ua pakui pu ia aku keia mau moolelo malalo nei iloko o ka Buke: 

            1 Ka Hoopaapaa Aupuni Kipa a ka Hon Henare Ka-le Kuhina Kaua Nui o Amerika me Hon. John Runedope he hoa no ka Ahsolelo Senate.   

            2 Ka haiolelo paio a Hon. Daniela Webster me ka Hon. Robata Haina ka pukuniahi o na mokuaina o ka Hema, he mau hoa no ka Ahaolelo Senate o Amerika i kapaia--ka Hooili Kaua a na Loea Kilo Aupuni o ka Honua.

            3 Ke Ao Oihana Koa a me na papa kuhikuhie pili ana ke Kaua a Kenela Wolseley o Enelani he kanaka i kaulana iloko o keia au hou e hele nei no kona wiwo oe. 

            4 Ka Hooikaika Kino a o na Rula o ke Kuikui a Geo. Benedict o Kikako he moho i kaulana ma ka lawena o ke kui a me ka pale. 

            5 Moolelo o Papu Aupuni Samana  a i ole ia o ka Poka mua loa o ke Kukala Kaua no ka wehe ana i ke kaua Huliamahi o ka Akau me ka Hema: ke Kanaka Lawe Kauoha o ke awa kumoku o Charleston. 

            6 Ke Ki o ka Make a i ole ia o ke kanaka iloko o ka hoohai nokekahi Ipo a me kona poo i okiia. 

            7 Ka Wehewehe Moeuhane a Petenagila me na kuhikuhi e pili ana. 

            O na kauoha mai na mokupuni mai e hoouna a pane ia aku na leta ninau wale mai no.  He $2 no ka Buke hookahi a he 300 ka nui. E puka ana i ka  mahina o Iulai

            THOS. P. SPENCER

                                                    

 KA MOOLELO KAHIKO O

 ENELANI.

Unuhiia no ka Nupepa Kuokoa.

MOKUNA XII.

ENELANI MALALO O HENERI II.

Hapa mua.

            M A ka mokuna i hala ua hoike a ka lanakila ana o ke keikiahi Heneri a ka moiwahine Matilda malu na o ke keikialii Eustace a ka Moi Setepano a ma ia lanakila ana ua pii ae la oia maluna oka nohoalii o Enelani mahope iho o ka make ana o Setepano.  He keiki opio oia o 21 makahiki a ua hoohiwahiwa nui ia kona poniia ana.  A kapaia iho la oia ke alii Heneri II o Enelani.  

            Na Heneri i kipaku aku kekahi mau hana ino i hookawowo ia ma Enelani e na lii mua i hala a nanano i hookuikahi i kekahi mau aupuni me Enelani mai ka nohona kue a i ka lokahi. 

            Aka ala ae la iwaena o na kahu bihopa kekahi mau karaima koikoi ka pepehi kanaka ka pakala waiwai ka aeahaukae a me ka aihue a o ka oi loa o ke ino i ikeia oia ka hookuu wale ana i na lawehala a pau a ua mahuahua loa aku an karaima.  Ua ala mai keia mau hana mamuli o ka hoowahawaha ia o ke alii Heneri a ua lilo ia he mea nana e noonoo nui ai no kana hana aku i koe e hoopau ai i keia ino maluna o ke aupuni.  Ua hooikaika nui oia a hiki i ka hopena o ka piha ana iaia o na makahiki ehiku i nohoalii ai make aku la ke poo o ka bihopa o Canterbury a ua loaa iaia he wa pono e hoonoho ae ai i mea kupono malaila.  Hoonoho ae la oia ia Gilebata Baketa kekahi o kana mau punahele i bihopa poo a hoano hou ae la i na hana a pau oia oihana laa me ka hoonalo pu ana i na hewa koikoi i ulu ae a ua maluhia ka aina.  No keia bihopa hou kahi moolelo pokole a kakou e nana iho ai e na hoa: 

            I kekahi wa e noho ana keia Gilebata he kanaka kalepa waiwai loa no Ladana.  Mahope haalele mai ia Ladana a holo aku no ka Aina Hemolele i Asia a ma kekahi ano hoi ua hopu pio ia oia e kekahi haku Saracena a lawe aku la iaia i wahi kauwa lawelawe nona.  Ua malama maikai loa ia oia e keia haku no kekahi wa loihi loa a he kaikamahine ui no hoi kana i haule iloko o ke aloha no keia Gilebata a i ake loa e mare me ia ke mahuka laua i kekahi aina Karistiano. 

            He mea nui a koikoi loa keia mau olelo a ke kaikamahine i pane mai ai i ke kanaka kalepa a makau iho la oia.  I kekahi wa loaa iaia he wa pono e holo malu ai mai kealo aku o kona ha ku a me ke kaikamahine i paa kona aloha nona.   Nolaila lawe ae la oia i kekahi o kona mau hoa o ka lawe ae la oia i kekahi o kona mau hoa o ka lawe pio pu ia ana i kokoolua nona e holo malu ai a me ka malu loa ko laua nele ana a hiki i Enelani ma kona home mua i noho ai. 

            Noho iho la ke kaikamahine iloko o ke aloha mokumokuahua no Gilebata ka mea i naalele ino iho iaia ma ka home o kona makua a no kona piha i ke aloha nolaila oia i naauaua hele aku ai e huli i kahi a ke aloha e na ai.  Haalele iho la ke kaikamahine i ka hale o kona makua hele aku la ma na aina a ma ke kai iloko o na pilikia he nui -- aka he mea ole ia i ke kono a ke aloha. 

            Hiki oia ma kekahi kapakai kahi e ku ana moku a ninau aku la i ka moku e holo ana ma ia la.  He kaikamahine keia no ka lahui Saracena i okoa loa ka lakou ole'o mai ko Enelani aku.  I ka wa e noho ana o Gilebata me ia ma ka Aina Hemolele he elua wale no mau huaolelo Enelani ana i ao aku ai iaia oia o "Ladana" a me kona inoa ponoi Gilebata a ua wale waha hoi keia mau huaolelo i ke kaikamahine.   A me ka huaolelo "Ladana" i maopopo ai i ke kapena o ka moku e holo ana ma ia la he ake kona i moku e holo ai i Ladana a ua kuhikuhi ia mai iaia ka moku no Ladana. 

            Ma na la loihi i hala ae o kana huakai imi kane ua hoolilo nui oia i kona dala a koe uuku a me ia wahi dala a me kona mau kinohinuhi gula i lawa ai kona uku moku a hiki i Ladana.  (Aole i pau.)

 

ROMURA.

Ke Keiki Alii o Ka Puuwai Liona.

Ka mea i kapaia ka Opuu Rose o na kihapai me ka Puuwai o kona Lahui; a o ka Manu Aeto hoi o na kualono me na Ulalaau anoano polikua o Alegeila.

 

HE IWIKANI EUEU O IA AU I HALA

A O KA

Hookalakupua o Ka Makakila.

Helu 30

E oki ae i ke poo o ua kupua la a hookomo iho iloko o ka ipuhao keleawe e lewalewa iho ana maluna iho o kahi ana e moe ana, alaila huli hoi mai oe me ka awiwi nui o hiki koke auanei aku auanei ka uhane imua o Abederubima a lilo ia i hana nui na kaua e hana aka ai. 

            Pane aku la ke keikialii ke aa nei au e hooko pono i na kuhikuhi mai ia oe mai a oia ka'u ukanae auamo hele aku ai ma ko'u alahele a hiki i ka waiho pu ana o keia mau iwi. 

            I ka pau ana o ka laua mau kukai olelo ana no ia i kau iho ai keia iluna o ua pahi nei a ia wa no i nee ae ai ua pahi nei i ka loa a me ka laula a hoomaka aku la e holo i ka wa i ku ai ua pa pohaku mabala nei ua owa ae la ia a ku ma o a maanei a ia wa no i  ku mai ai mamua ona pali pohaku paea paakiki aka he mea ole i ka maka o'lua o ua pahi nei ua mahele hapalua ia aku la ua mau pali nei hiolo aku la ua mau pali nei a ke lohe ia la kona halulu nui ma kela a me keia  wahi o ka honua me he olai la e hoouaueue ana i na moku.  A no ka manawa pokole wale no hoea aku la keia  i kahi o ke kiaha e niniu la ia ia manawa no i hahau iho ai keia i ka pahikaua ilunao ke kiaha me ka puana pu ana  aku penei:  

            E ke kiai naue ole o ke aloha e wehe oe i ka puka no'u i ike aku ai ia .  Ariare ka nani e haule ai na ipuka o ka haleahi Muraria kaulana. 

            I ka pau ana o keia mau huaolelo a ke keikialii ia menawa no i ku malie iho ai ua kiaha la a kikoni aku la keia ma ke kae o ua kiaha nei a ia wa ko ke no i oili ae ai he kaikamahine opiopio a haawi mai la i na kamaa nona ka nani e loaa ole ai kona hoa e like ai  ia manawa no i pane akn ai keia i ua kaimahine la hookahi a'u mea i koe e noi aku ai ia oe a e hoolohe iki mai oe. 

            Pane mai la ua kaikamahine la heaha ia me a i koe?  

            Pane aku la keia i ui ko'u i like me keia mau kamaa a o ko'u mau maka e like me na maka o ka manu nunu ilo ko o kau pale e noho ana iluna o ka piko mauna o Hatelina. 

            Pane aku la ua kaikamahine la e hele mai ua hooko ia kou makemake o ko ianei miki aku la no ia a ku ana imua o ke aniani nui e ku ana a i ko ianei kilohi ana aku ua hiki oi i ka palena ana i noi ai no ia mea i komo iho ai keia i na kamaa holo a puana ae la e lawe ia'u ipuka nani o halealii Muraria kaulana. 

            I ka pau ana no o keia mau olelo a iloko o ka imo ana a ka maka i hoea aku ai keia i na ipuka o ua halealii la  a i ka manawa i ike mai ai na pani ua moe iho lako'i i lalo a ahuwale iho la na keena kamahao  o ua Muraria pa haohao la a hoomaka aku la keia e hehi iluna o na pohaku keokeo me he mea la ua kamaaina mua no ilaila a haea aku la i kahi a ke kupua Ravedena e hiolani la me ka manao ole ae e eia he kupueu iwikani ka hookolo aku nei iaia a oiai keia i lalau aku ai i ka paopale alii a loaa iaia nei ua hahau koke iho la keia i ka pahikaua a moku ae la ke poo a kaawale a me ka elua keia i hopu iho ai a hookomo aku la ilokl o ka ipuhao keleawe ia menawa no i paila ae ai ua ipuhao la me ke ahi ole maialo ae o ko ianei wa koke no ia i puka ai iwaho a oia no ka wa i oili aku ai ua mau kamaa la. 

            No ka manawa pokole wale no hoea aku la keia i kahi a ka popoki eleele e noho ana. 

            I ka ike ana mai o ha popoki eleele haawi mai la oia i na hoomaikai he nui me ka puana ana mai: 

            E wiki kaua o hoea mai auanei o Diabolo mai ke aupuni mai o Hiroma a o ko kaua make no ia oiai he mei ole wala no keia mau mea mana iaia. No ia mea i huli ae ai laua ma ke komohana, a iloko o ka wa pokole i hoea aku ai laua i kahakai a i ka manawa no i kahuli ae ai o Leinadia i waapa ulaula a o kahi popoki eleele i ka noho ana iwaena a ma ka hoe ka e paa ana o Romura a iloko o ka wa pokole ua hala hope ae la ka aina a ia wa no i puapuai ae ai na puka wai o ua moana kai la a pii mai la na ale apiipii o ka moana a ke puhi mai la na kikiao makani a ke popoi mai la na ale a ke uhi mai la na ao kaalelewa iluna o ua moanakai la aloha ole ke holopapa ae la ka leo ikuwa o ka hekili a ke a mai la ke ahi o ka lewa a oia ka'u i hoomanao ai i keia hooheno: 

            Hauliuli kai pali e Kahikinui. 

            Kokalo mai ka ehu la he ino ia  (Aole i pau)

 

HOOLAHA KUMAU.

 

OLELO HOOLAHA

            O KELA olelo hoolaha a Wm. Hookuanui (k) ko'u makuakane ponoi i hoopuka ia ma ka Nupepa Kuokoa helu - ua pololei loa ia, nolaila ua hana au i palapala lako o keia la 9 o Iune M. H. 188-, e hoihoi hou ana i ua mau waiwai la a pau no Wm. Hookuanui a e hoole ana i ka mana o ia palapala no kekahi kumu waiwai i loaa ia'u.

            MISS. LUCY  LINDSEY

            Waimea, Iune 15, A. D. 1887.  2131-4t

 

Ka Waiwai o ka Hilinai

KA AYER Laau Sasaparila, kai kaulana a hilinai nui ia no ka hoomaemae koko, ma na wah a pau o ka honua, no aneane 40 makahiki i hala ae nei, a ua lawelawe nui ia hoi iwaena o na oihana lapaau.  O keia

LAAU SASAPARILA, no loko ae ia o keia Sasaparila Honedura maoli; ua loaa ka mana hoomaemae ma o ka hui pu ia ana me kekahi mau aa laau e ae, a me         kekahi mau mea no loko o ka honua a me ka hao.

HE koko inoino a nawaliwali anei kou? Ua awili pu anei me na ano mai ikaika? A ua hui pu anei me na wai awaawa hoopehu.  Na keia

LAAU e hoomaemae ua mau mea ino a pau, a maikai.  O na kauka lapaau a pau o Amerika ike ke ano o ka AYER SASAPARILA, ua olelo lakou, aole he mea maikai e ae no ka hoomaemae koko ana mai na mai i awili pu ia, aka o keia wale no. No ka

HOOMAEMAE ana i ke koko, a me ka hookahua pono ana i na mea a pau ma kekahi mau ano mai i ikeia, o ka AYER SASAPARILA wale no ka laau nana e         hoomaemae hakalia ole mamua ae o kekahi ano laau e ae    O ke

KOKO ino hakuhaku, a nawaliwali hoi kona holo pono ana ma ke kinok e hoomaemae ia a e hooikaika pu ia no hoi ma o ka ai ana i keia LAAU SASAPARILA  A  AYER.  He maalahi a he

MAIKAI loa hoi keia Laau, aole no ka hoomaemae wale ana no i ke koko, aka, no ka hookaawale pu ana kekahi i na ma'i, hoomomona hou ana i ke koko ino, a me ka hooikaika pu i kona holo pono ana ma na aa. He lehulehu wale na hooia ana mai na wahi a pau o ke ao nei i hoohana mau i keia laau mamua o kahi    mau laau e ae.

A HILINAIIA no ka ikaika kupono o ke ola kino, ma ka maemae ana o ke koko, hoomake pu ia na ma'i a pela aku. He nui na laau hoomaemae koko i hoolaha    wahahee wale ia malalo o na inoa lehulehu, aka, o na hilinai a me na hooia wale no a ke ao holookoa, maluna o ka

Ayer Laau Sasaparilla.

I HOOMAKAUKAUIA E

Kauka J. C. Aver & Co., Lowell, Mass.

HOLLISTER & CO.

Na Agena ma ka Paeaina Hawaii.

Helu 100.  . . . Alanui Papu, Honolulu                                                                   

2086-tf

 

WOLFE & CO.

Mea Kuai i na Ano a pau o na Mea

AI, HUA AI, O NA ANO A PAU

            Eke Palaoa, Berena, Waiu Bata, Berena Manoanoa, Berena huinaha, mea ono, o kela ano keia ano; Ko paa, Kope, Ti, Aila mhu, a me na ano a pau.

Helu 66, Alanui Hotele, Halekuai mua o Lewis & Co.

            E loaa koke aku no na kauoha a pau loa me ka hakalia ole a me ka maikai o na malu ia ana. E hooko ia na kauoha o ke kulanakauhale nei me ka hikiwawe a me ka uku ole.  O na kauoha mai na mokupuni, e lawelawe koke ia.        2085 ft6

 

Nuhou! Nuhou! Nuhou!

 

AILA MAHU MAIKAI!

HOOKAHI DALA WALE NO NO KE

KINI AILA HOOKAHI!

E kuai pau ia aku ana no ka nui oloa o ka aila i keia manawa.

E AU E NA MAKAMAKA! E AU!

E kipa ae ma ka halekuai o

Kakela me Kuke

 

B. F. Ehlers & Co.,

PAINAPA.

Poe Kuai i na Ano Lole a Pau.

Helu 99 alanui Papu. - Honolulu

            E loaa mau ana na lole hou o na ano a pau maluna o kela a me keia moku.

 

HOOLAHA KUMAU.

HOOLAHA HUI.

E IKE auanei na kanaka a pau e nana ana i keia olelo hoolaha, o makou o ka poe no lakou na inoa malalo iho, ua hookohu pono aku makou ia JOS. MAIKAALOA KAUHI, o Mokuhooniki, Hilo, Hawaii, i Peresidena no ko makou Hui Kalepa Hawaii, ma Kahalii, Hilo, Mokupuni o Hawaii, ma kahi o J. Kaianui i hoopau ia, a i k Komsina ohi aie no hoi, a ke hoike ia aku nei ka lohe i na poe a pau i aie i ka waiwai o ka Hui, e hookaa ae ia Jos. Maikaaloa Kauhi i oleloia, oia ka mea mana e hana, a e lawe i na hihia e ulu mai ana, imua o ka Aha Hookolokolo.

            O makou no,   Kaawa,

            J. K. Kalakoili

            I. Kalua,

            Manu

            Kaihupau.                    2130. 3m

 

HALE PAIKII ALANUI NUUANU

            I WEHEIA NO EKOLU MAHINA.

            MAHOPE IHO O NA HOOPONOPONO hou ana i wahi e loaa ai he wa maikai no kela a me keia e hale mai e pai kii no lakou iho ma ka uku oluolu, ua hoopaa iho makou e hoolako aku i ka poe a pau e like me keia malalo iho:

Kii pepa,         6, no $1.00

Kii lako hale, lumi, hale a pela aku,    3 no $1.00.

Kii nui 8x10                1, no $1.00; a i ole $8 no ke kakini.

            Hoomaemae a hoolele hou ana i na kii kahiko, ma ia uku hookahi no.  Hookahi kii pena 8x10 a me ka laau, he $6.00.

            H. A. LUSCO MB,

Helu - Alanui Nuuanu.  2116-tf

 

MRS. THOMAS LACK,

 

HELU 81, ALANUI PAPU.

MEA KUAI A LAWELAWE I

NA

Mikini Humuhumu na Aahu a nui wale Aku

HE AGENA KUAI NO NA MIKINI

White, New Home,

Davis, Crown, Howe,

Me Florence,

Na Kui Mikini o na

ano a pau a Howard,

Na pepa ana lole o

na ano a pau, a me

kela keia mea

NA LOPI MIKINI A KALAKA.

 

HE AGENA KUAI I NA

Pu Raifela, Pu Panapana, Pu ki manu, na Poka, Lu, Pauda, Kukaepele.

NA KAPUAHI AILA MAHU

Mai ke nui a ka liilii.

_______

            Ma ka lawelawe nui ana o'u i ka hana lima akamai o ka oihana hana pu a pela aku, ua makaukau au e hooko kaulua ole i na kauoha a pau.

            O na kauoha mai na mokupuni e hookohuia                                                                                                                                                               2082-1y.

 

KAUKA IWAI (IAPANA.)

            Kauka lapaau a Kauka oki; ma kahi o Kauka Goto, e lapaau ana i na mai e like me ka Kauka Goto hana ana.  Manawa hana ma Kakaako mai ka hora 9 a hiki i ka hora 11 A.M. o na la a pau koe ka la Sabati.  E hele no oia i na hale o ka poe i mai ke kauoha ia mai.

            O na mai e ae, ma kona hale kauka e hele ai, kihi o na alanui Puowaina me Beritania.  Manawa hana, mai ka hora 1 a hiki i ka hora 5 P. M. o na la noa; a mai ka hora 8 A.M. a hiki i ka hora 12 M. ma na la Sabati.  Teleponae Bell Helu 387. 2130-3mo.