Ka Nupepa Kuokoa, Volume XXVI, Number 2, 8 Ianuali 1887 — Ko Lota koho ana. [ARTICLE]

Ko Lota koho ana.

I ka hoi ana o Aberama a me Lota mai Aigupita mai, he mau kanaka waiwai laua. He nui na holoholona a me na kauwa; a o keia mau kauwa he 1,300, ua lilo i ka hoopaapaa ana no kahi e hanai ai i na holoholona. Kaumaha o Aberama no ia mea, a no kona makemake ole e hakaka, ua i aku ia Lota e koho oia i wahi nona e noho ai. Huli aku o Lota, a loaa ke awawa momona o Ioredane, malaila hoi ke kukulanakauhale i piha me na kanaka hewa. Aole i maka'u o Lota ke noho ilaila, oiai e mahuahua ana kona waiwai ina malaila. Aole e kala ka make ana o Aberama a me Lota —3,700 makahiki a keu ma mua aku nei. He nui na haawina e loaa ana ma ka huli ana i ko laua mo olelo. Ua alakai ke Akua ia laua; ua ao pinepine ia no na hana pono ole, a ua hoopomaikai ia no ka manaoio. He kumu hoohalike o Aberama no kakou —ua hana aku oia me ka lokomaikai i kana keiki ia Lota. Ina, ua like o Aberama me kekahi hapanui o kanaka e noho nei, ua i aku oia ia Lota: Owau ka mua: he keiki wale no o Lota na'u. Ia'u no kahi maikai o ka aina. Aole nae pela. Ua olelo ia Lota, e koho i kana wahi e koho ai, a iaia ke koena. He kanaka aloha, a lokomaikai o Aberama. Ua like kana hana me ka Iesu olelo, "o ke pookela iwaena o oukou, e like ia me ka mea uuku. " Lu. 22: 26. Mai hana oukou i kekahi mea me ka hakaka a me ka hookiekie wale wahi a Paulo. Pi. 2:3.

Aole nui na hoopaapaa a me ka hakaka ma na ohana, no ka waiwai, ua hoohalike me Aberama. Oia ke kana--wai, " E aloha aku- i kou hoalauna," aka, "ina e akiaki oukou, me ka hoo pau kekahi i kekahi. " Gal. 5:15 pehea auanei? oluolu anei ka noho ana? Aole anei he nui na makamaka i hookaawaleia, no ka hoohalike ole me Aberama. Kuee na hoa'loha, na hoahanau no ka paakiki o kela a me keia ma kona aoao. O Lota paha kekahi kumu hoohalike —kupono ole nae i ka hahai ia. Ua kuko oia i ka hai, a he puni waiwai oia. Ina ua kohu pono ka Lota hana, ua i aku ia Aberama, e koho e i kona wahi, a mahope kona. Eia nae kana, koho oia i kahi maikai o ka aina. Ua uha'i oia i ke kanawai umi; aole no i like me ka Paulo ao ana, "Aole hoi e nana kela mea keia mea i kana iho, aka, e nana i ka hai. " Pi. 2:4. He lehulehu ka poe e nana ana ia lakou iho, i ko lakou pono iho. Eia hou. Ua ike no o Lota, he mau kulanakauhale keu ke ino e waiho ana ma ka papu ana i koho ai; aole no e nele ana ka launa ana me na kanaka. Ina he haipule oiaio oia, ina paha ua makemake ole i home e pili ana ma ia nenelu; aka, ua ake nui e loaa ka waiwai, a nana ole i na ino, na poino paha e loaa mai ana i ka uhane ma ka launa ana me na uhane haukae. He hoao no nae oia. Pela no kanaka i keia la. Ua puni dala, ua kuko i ka waiwai; a nolaila, nana ole i ke ano o na hoa hana. Komo ma na Hui me na kanaka hoopunipuni, na kanaka aihue. Ina paipai ko lakou lunaikehala ia lakou, e i aku paha, ka mea paha keia e pono ai, i loaa ke ola kino. Pela no i hele pu ai ka poe opio me na hoa kupono ole. Ina e manao ana ka haipule e kupaa mamuli o Iesu, aole hiki iaia e hoolilo i ka hoomaloka i hoapili nona. Aole anei e launa me kakou ? E launa aku no, me ka manao e kokua ia lakou ma ka pono. Ina launa aku no kekahi kumu e ae, e poino auanei lakou. O kekahi poe ua hele ma kahi nihi nihi loa, i loaa mai kahi waiwai. Aole hookaawale lakou mai Sodoma aku, aka, ua hookokoke loa, e hoao ana ina paha ua hiki ia lakou e noho ilaila me ka poino ole. Ina e noho ana ma kahi o ka hoowalewale, aole i maopopo ka wa e lilo aku ai. Hookahi wale no mea e pono ai; e ku ma kahi mamao aku o na wahi hoowalewale, o kela ano keia ano. "O ke kanaka i manao ua kupaa ia, e ao hoi o hina." 1 Kor. 10:12. "Mai hookuu oe ia makou i ka hoowalewaleia mai."