Ka Nupepa Kuokoa, Volume XXV, Number 48, 27 November 1886 — Page 4
| This text was transcribed by: | Francene H Aarona |
| This work is dedicated to: | Mahalo nui to those who inspire us to seek out information of our heritage |
Ka Nupepa Kuokoa
KE KILOHANA POOKELA NO KA LAHUI HAWAII.
Nupepa Kuokoa.
---
No ka Makahiki...........$ 2.00
No Eono Mahina........... 1.00
KUIKE KA KULA.
Poaono..........Novemaba 27, 1886.
KE HOI HOME NEI KAKOU.
( We are going home. )
( G. H. 358. )
---
1
He apuupuu ke ala,
He mea noi no
Ma keia noho ana ;
A hiki ae ma o.
Chorus---Ke hoi hoi.
Ke hoi home nei,
A pae kakou ma o la,
Me Iesu ma ke ao.
2
Mulea ka wai o Mara,
Ohumu ae kakou,
Aloha nae ke Akua,
A hoi home e.
Chorus---Ke hoi, hoi, &c.
3
A luhi ma ke ala,
Hoomaha mai Iesu ;
A maha ma Elima,
A olu no kakou.
Chorus---Ke hoi, hoi, &c.
4
Maule, mai, pololi.
A ane make no.
Ua hanai me ka Mane,
A hiki ma ke ao.
Chorus---Ke hoi, hoi, &c.
5
Ma Nebo au e ku la,
Kokoke hiki i o,
Kekahi ma na awawa,
A hoi home no.
Chorus---Ke hoi, hoi,
Ke hoi home nei,
A pau kakou ma o la,
Me Iesu ma ke ao.
-----
Haawina Kula Sabati
HAAWINA XI.
---
Dec. 12. Na haipule ma ka lani. Hoik. 7 : 9 - 17.
A mahope iho o keia mau mea; nana aku la au, aia hoi, he anaina nui loa, aole hiki i kekahi ke helu aku, mailoko mai lakou o na aupuni a pau, a me na ohana, a me na lahuikanaka, a me na olelo a pau, e ku ana lakou imua o ka nohoalii, a imua hoi o ke Keikihipa, ua aahuia lakou i na holoku keokeo, a he mau bama ma ko lakou ma lima.
10 Hea mai la lakou me ka leo nui i mai la, No ko kakou Akua ke ola, ka Mea e noho la ma ka nohoalii, a no ke Keikihipa hoi.
11 A ku mai la na anela a pau a puni ka nohoalii, a me na lunakahiko, a me na mea ola eha, a moe iho la ko lakou alo ilalo imua o ka nohoalii, a hoomana aku la lakou i ke Akua.
12 I aku la, Amene; no ko kakou Akua ke aloha, a me ka nani, a me ke akamai, a me ka hoomaikai, a me ka hanohano, a me ka mana, a me ka ikaika, ia ao aku ia ao aku. Amene.
13 I mai la kekahi o na lunakahiko, ninau mai la ia ʻ u, Owai lakou nei i aahuia i ka aahu lole keokeo ? a mai hea mai la lakou i hele mai ai ?
14 I aku la au ia ia, e kuu haku, ua ike no oe. I mai la kela ia ʻ u, Oia ka poe i hele mai, mai loko mai o ka pilikia nui, a ua holoi lakou i ko lakou aahu, a hookeokeo, maloko o ke koko o ke Keikihipa.
15 Nolaila lakou i noho ai imua o ka nohoalii o ke Akua, a ke malama aku nei lakou ia ia i ke ao a me ka po, maloko o kona luakini, a o ka Mea e noho la ma ka nohoalii, oia ke noho pu me lakou.
16 Aole lakou e pololi hou, aole e makewai hou, aole e wela hou mai ka la maluna o lakou, aole hoi kekahi mea e wela ʻ i.
17 No ka mea ; o ke Keikihipa ka mea maloko ma kahi o ka nohoalii, oia ka mea e hanai ia lakou, a e alakai aku hoi ia lakou, i na punawai oia ; a na ke Akua no e holoi ae mai ko lakou maka aku, i na waimaka a pau.
Pauku Gula. Nolaila lakou i noho ai imua o ka nohoalii o ke Akua, a ke malama aku nei lakou iaia i ke ao a me ka po maloko o kona luakini. Hoik. 7: 15.
Manao nui. He lehulehu na haipule ma ka lani, he poe maemae, ua hoola ia e ke koko o Iesu; e hoomana aku ana i ke Akua i ka po a me ke ao me ka hauoli lua ole.
NA HELUHELU LA.
Poakahi. Hoik. 7: 1-17.
Poalua. " 8: 1-13.
Poakolu. " 9: 1-21.
Poaha. " 13: 1-18.
Poalima. " 14: 1-20.
Poaono. 2 Kor. 4: 1-18.
Sabati. Hal. 23: 1-6.
Mele. Ka lei o ka oli. H. A. N. 298, Pule.
NA NINAU.
Heaha na mea i hoikeia ma ka mokuna eono o Hoikeana ? Ehia wepa i weheia ? 6 : 12. He mau mea kupanaha anei i hoikeia mai ma ka akaa ana ia mau wepa ? Ua hele anei ka mea i ike mua i ka lanakila ? 6: 2.
Pehea ka lua, he maluhia paha, he kaua paha ? p. 4. Heaha na pilikia hou i hiki mai ? p. 5. He wi ka ma ka aina ; heaha ka poino i hahai mahope ona ? p. 8.
Heaha ka mea weliweli i hoikeia mai i ka wehe ana i ka elima o na wepa ? p. 9. Ua hoomaauia na haipule no ke aha ? He nui anei ka oe i make no ko lakou kupaa mamuli o Iesu ? Heaha ka i haawi ia ia lakou ? p. 11. E lanakila ana anei ko lakou aoao ?
Ua pau anei na ino ? p. 12 - 14. Pehea auanei kanaka i ka ike ana i na mea weliweli ? p. 15. Pehea ko lakou kahea ana i na mauna ? p. 16. No keaha ? p. 17. Ua hiki io mai anei na popilikia e like me na mea a Ioane i ike ai ? Aole anei i kakauia ma na moolelo o na aupuni nui o ia wa ?
Oiai e pihoihoi ana kanaka no keia mau mea, pehea auanei na haipule ? Ua hoike ia anei ia Ioane he mea e lana ʻ i kona manao---he mea no hoi e hoolana ʻ i i ka manao o na haipule a pau ? Heaha kana i ike ai ? 7:1. Pehea ke kahea ana o kekahi anela ia lakou ? p. 3. Ua ikeia anei a kauwa oiaio a ke Akua ma ke ano o ka lakou hana ?
Ehia poe i hoailona ia ? p. 4. O lakou wale no anei ka poe e hoola ia ana ? p. 9. Nohea keia lehulehu ? He nui anei ka poe e hoola ia ana mai waena mai o kela a me keia lahui o ke ao nei ? He kumu anei keia e lana ʻ i ka manao o na haipule ? He kumu anei e hoomau, a e hooikaika i ka hoolaha ana i ka Olelo Maikai ? Aole anei i maopopo ma keia, e hoolaha ia ana ka euanelio ma na aina a pau, a e lohe na lahui a pau ? Ke komo aku nei anei keia olelo ma na wahi a pau o ka honua nei ? Heaha ka Iesu kauoha no keia hana ? Mar. 16: 15.
Mahea ka hana e ae i like me keia, o ka hoikeike ana i ka malamalama ma na wahi pouli-o ke kuhikuhi ana i ke ala o ke ola i ka poe hewa ?
Mahea ke ku ana o ia lehulehu ? Ua hala na ino o keia noho ana, a imua owai ko lakou akoakoa nui ana ? Ua komo anei kekahi me ia lehulehu, ke ole hoomaemae ia e ke koko o Iesu ? Heaha ma ko lakou mau lima ? Ua lanakila lakou maluna o keaha ? Nohea keia lanakila o lakou ? Komo anei kekahi me kona haukae iloko o ka lani ? Hiki anei e huna i ke ano o kekahi, a ike ole ke Akua,-a me ka hoopunipuni e komo ma ka lani a noho me ia poe maemae ? Hoik. 21: 8, 27. 22: 15.
Pehea ke kahea ana o keia poe ? p. 10. Hauoli anei lakou no ka loaa ana o keia pomaikai ? No lakou iho anei ia pono: nowai ? Owai ka i pane ae ? p. 11. Pehea ka lakou hoomaikai ana ? p. 12. Heaha ke ano o ka huaolelo Amene ?
Heaha ka olelo a kekahi lunakahiko ia Ioane ? p. 13. Heaha na ninau iloko o kona naau ? Me he la e nana anai ka poe i noho hoomaau ia maanei, a iloko paha o na pilikia he nui, a ua ninau nohea lakou. Pehea mai ka luna iaia ? p. 14. Ma keaha i hoomaemae ia ai lakou ?
Ua loaa anei ka pomaikai ma ke kau ana mai o na pilikia, na poino, ke ole i hoomaemae ia e ke Keikihipa ? Ua oia anei kekahi mamuli o kana mau hana-mamuli o kona hooikaika wale ana ? No keaha ko Iesu make ana ? Ke ole i lawe oia i na hewa o kanaka, a make no lakou, ua ola anei kekahi-ua komo anei kekahi ma ka lani, a hoonani i ke Akua a me ke Keikihipa no keia pomaikai ?
Mahea ke ala e ae e loaa ʻ i ke ola ? Ma o Iesu wale no, ke Keikihipa i make no kakou----He mea ole na mea e ae, o Maria ma. Ia Iesu e nana ʻ ku ai. Ke manao e alakai i kanaka i ka lani, e alakai ia lakou io Iesu la.
Mahea ka lakou lawelawe ana ? p. 15. Ua ike anei lakou i ka luhi, a me na pilikia ma ka lawelawe mau ana maanei ? Owai ma e lakou ? Ua ike hou anei na pilikia kino ? p. 16. 21: 3, 4. Ua kau mai anei ka pomaikai nui ? Mat. 5: 6.
Nawai i hanai ia lakou p. 17. He hana nui anei ko na Kahuhipa ? E ku mamao anei e kiai i na hipa ? E alakai paha i na hipa ma na kula uliuli, e hanai, e kiai, e pale i na ino ? Mahea e hoohainu ia lakou ? Mau anei na pono ? Ike hou anei i ke kaumaha ? Nawai e hooluolu ? Pomaikai io anei ka poe kaumaha ? Mat. 5:-1.
A hiki i ka lani, ua noho wale anei ? Ua komo nui paha i ka hoomana i ke Akua a me ka hoonani Iaia ? Ke ole makemake ke hoomana Iaia maanei pehea auanei mao ? He ala e ae anei e hiki aku ai i ka lani, ke ole ma o Iesu la, ka mea i kaulia ma ke kea ? Nui anei ka pomaikai o ka poe i hoomanawanui iloko o na pilikia maanei no ka pono o ka Haku ?
A pau na hewa o ʻ u
A maemae ka naau
Me Iesu no e noho ai
Ma ia home ao mao
Mele. Oli e maluna. H. A. N. 92:
MOOLELO O KA AHA LUNAKAHIKO O MAUI.
---
Noho ka Aha Lunakahiko ma Wainee, Lahaina, Maui, ma ka la 20 Nov. 1886, hora 10 a. m. Ia Rev. J. K. Hihio ka noho luna hoomalu ana mai.
KIHAPAI KAHU LUNAKAHIKO
Paia, Rev. Kuia, Kailewa
Haiku, - -
Huelo, - -
Keanae, - Kauapua
Hana, - -
Kipahulu, - -
Kaupo, - -
Honuaula, - Kealiiaa
Waikapu, S. Kaili, -
Wailuku, Paaluhi, D. Puu
Waihee, Nawahine, Maule
Kaanapali, Hihio, Kapela
Lahaina, A. Pali, Makekau
Olowalu, Kamakahiki, Kaaoao
Kaluaaha, Manase, Kaoo
Halawa, - M. Kane
Na hoa mau, Rev. S. Kamakahiki, a me J. K. Kawaiaea, he haiolelo.
Kohoia o Rev. S. E. Bihopa i hoakuka; hoomaka na hana ma ka himeni a me ka pule.
Kohoia o Manase, Pali, Bihopa i komite hoonoho hana ; a o Kaili, Kane, Kamakahiki i komite imi kumumanao. A ua hoike hapa mai ke komite hoonoho hana peni :
1-Hapalua hora haipule.
2-Na hoike kihapai.
3-Na palapala hoopii.
4-Heluhelu haawina.
5-Na ekalesia kahu ole.
6-Mahina hou.
7-Ke ola o na kahu.
8-Hoalohaloha i ka Makua Laiana.
9-Na hale kahu.
10-Na hoike komite.
11-Ka oihana kuloko.
12-Ke kula kahunapule.
13-Na hoomanamana pegana.
Aponoia ka hoike a ke komite.
NA HOIKE KIHAPAI. Na Kuia i hoike mai no Paia; emi mai ka ikaika o na haipule, a uuku ka poe hoomanawanui; ko Paia ponoi, he oia mau, aohe aie, a maikai no.
Na ke kakauolelo i heluhelu mai ka hoike o Haiku; ua emi loa, $ 13.50 ka mahina hou, noloko mai o na waiwai o ka hale kahu kekahi o ia mau dala ; ua koho ka aha i kekahi komite hoeueu e hele e kuka pu me keia ekalesia o Haiku, a aponoia.
Hoopaneeia ka aha apopo hora 9 me ka pule a ka lunahoomalu.
LA HANA 2.
Noho hou mai ka aha e like me ka hoopanee ana; hapalua hora haipule ua malamaia; heluheluia ka moolelo o ka la hana i hala a aponoia.
Na J. K. Kauapua i hoike ke kihapai o Keanae, aole lulu mahina hou a ola kahu a keia ekalesia, aloha ino.
Heluheluia ka hoike o Hana, ua ike ia ua emi ka ikaika o ia ekalesia; hooholoia na ke kakauolelo e hoihoi hou aku i keia hoike i ke kahu o Hana, a e hoopiha a momona me na heluhelu maopopo a hoouna hou mai i ke kakauolelo.
Ko Kipahulu, he $16 wale no i hanai ai kela ekalesia i ko lakou kahu no keia hapa makahiki, a he $3.00 mahina hou wale no.
Ko Kaupo, ua hanai keia ekalesia he $46 i na kiai elua, a o ka mahina hou hoi, aole.
Ko Honuaula, hanaiia ke kahu kuikawa $16; he $3 mahina hou.
Ko Waikapu, ke pii mai nei ka mai o keia ekalesia, he aie keia ekalesia i ke kahu $200 a oi.
Ko Wailuku, he maikai no, e maikai loa aku ana paha; he wahi aie kahu no koe.
Ko Waihee, ke holo mama nei oia imua, o ke Akua ka mea i maopopo loa ma keia hoike, e lawe hou ia ka hapa hope a noonoo hou; hooholoia.
Ko Kahakuloa, holopono na kokua, ola kahu, a me ka mahina hou.
Ko Kaanapali, o ke ola kahu, a me ko ka Papa Hawaii, he anoninoni: ma na anaina o ka pono, he nee malie no.
Ko Honokohau, aohe leo mai laila mai, ua moe loa.
Ko Lahaina, he nawe malie ka nee ana o ka pono, pela no na kokua, emi ka ikaika, no ka uuku loa o na hoa uhai o ka pono, mehameha ka aina.
Ko Olowalu, he mau no ka malama ia o ka nono, e ka hapa uuku, ua like lakou me ka papohaku, a o kekahi hapa, aia ma ke kino; kikeke mau ka olelo a ke Akua ma ka waha o Noa. He wahi kiko iki, e wiki a pau ae.
Ko Kaluaaha, noi ia mai keia hoike, e hoihoi hou i ke kahu, e hookomo maopopo i na mea hemahema.
Ko Halawa ekalesia, ua maikai no ka, he malu.
Ua koho ka aha i ke komite hoeueu e hele i Halawa, e ike pono i ke kuleana o kekahi haole i hoolilo ia i lunakahiko no ia ekalesia.
No Siloama, he oia mau no ia ekalesia, me na poino pu no.
Ko Huelo, aohe leo mai laila mai
Ko Lanai, aohe no he leo; ko Pelekunu me Wailau, aohe no he leo. Hookuu ka aha ia Kailewa e hoi.
Noi mai o Bihopa, e hookomo i ka hoike kihapai o Siloama i ka nupepa KUOKOA. Hooholoia.
Hoopanee ka aha a hui hou mai apopo.
LA HANA 3.
Noho hou ka aha elike me ka hoopanee. Malamaia ka hapa hora haipule. Heluhelu ka moolelo, a hoaponoia.
Kumuhana 3 Na palapala hoopii. No ka palapala hoopii a ke kahu Rev. J. Hanaloa i keia aha, e uku hoomau mai ka Papa Hawaii iaia i $50.00 dala no ka makahiki hookahi. Ua hooholo keia aha, e haawi ae ka Papa Hawaii i $50.00 dala na Rev. J. Hanaloa, no ka makahiki 1887.
Kumuhana 4---Haawina Heluhelu. Na Rev. S. Kaili i kona. E weheweheia loa 3:5.
Na J. K. Hiohio i kona. E wehewehe ia i Korineto 13: 12. Mahaloia.
Na Rev. S. K. Kamakahiki i kona. E wehewehe ia Luka 13: 12. Mahalo loa ia.
Kumuhana 5---Na ekalesia kahu ole. Noi mai o A. Pali aia a pau ka paina ana, alaila, hoi mai kakou noonoo i keia, hooholoia; hoomaha e paina.
Noho hou mai ka aha, aohe olelo hooholo no ia kumuhana maluna ae.
Kumuhana 6---Mahina hou. Pehea la e holopono ai keia haawina a mahuahua ae ? Hooholoia. Na kela kahu, a me keia lunakahiko e koho mai ko lakou mau haawina iwaena o na ekalesia, no keia hapa makahiki ae e hiki mai nei. No Paia $20. Hanuaula $5. Waikapu $15. Wailuku $40, aole i pani ia o luna. Waihee $50. Kahakuloa $12. Olowalu $15. Kaluaaha $60. Halawa $30. Lahaina $100 no ka makahiki. O na ekalesia i koe, na lakou e koho no lakou iho.
Kumuhana 7---Ke ola o na kahu. Kuka nui ka aha a loaa keta mau oleloao :
1 E pule nui ke kahu.
2 E paipai ke kahu i na makamaka haipule, a e hele mau ma na hale e launa mau, i ole e palaka na hoahanau.
3 E noi maoli aku no ke kahu i ka ekalesia, e hookaa mai i kona ola kau, e like me ka lakou i hoohiki ai.
Kumuhana 8---Hoalohaloha i ka makua Rev. L.Laiana. Haawi ia i ke komite, Rev. S. Kaili, Rev. J. K. Hihio, Rev. Z. S. K. Paaluhi.
Kumuhana 9---Na hale kahu, Hon. J. W. Kalua ke komite no ka hale kahu o Waikapu, S. Kaili no ka hale kahu o Honuaula, H. Manase, M. Kane no ka hale kahu o Halawa.
Lilo ka lunakanawai D. Kahaulelio i hoakuka.
Kumuhana 10---Na hoike komite imi hana.
Heaha ka Babezito oiaio, o ka hooluu anei i ka wai nui, o ka pipi paha ? Na Z. S. K. Paaluhi.
Ua kupono anei i na kahunapule ke lawelawe i ka Oihana Kalepa ? J. K. Kawaiaea.
Pehea i akaka ai o Iesu Kristo, he mamo ia na Aberahama ? Na ka ekalesia o Keanae.
E wehewehe i ka huaolelo Betela ? Na ka ekalesia o Honuaula.
Heaha ka mea oi aku o ka mana e lanakila mau ai; ka puali kaua anei o ke ao nei, ka puali kaua o ka euanelio paha o ka pono ? J. P. Kuia.
Pehea ka loihi o ke kookoo o Mose i hahau ai i ke kai Ula, a mahele ia kela kai loihi i na apana elua ? Hihio.
E wehewehe i ka pauku 6 o ka mokuna 6 o Na Lii 2. Manase.
Ma na wahi ehia i hoowalewale ai o Diabolo ia Iesu i na la he 40 ? Kaili.
E wehewehe i ka manao o Luka 3:9. Ekalesia o Haiku.
E wehewehe i ka manao Mat. 24: 14. Ekalesia o Halawa.
I ka make ana o ka poe haipule, ua komo koke anei ko lakou uhane i ka lani, me ke Akua Hemolele ? O Nawahine.
Heaha la ke ano o ka la Penetekota i olelo ia ma Oih. 2:1. S. K. Kamakahiki.
E wehewehei ka moolelo o Melekizedeka ma Heb. 7:1. Ekalesia o Huelo.
I Petero 6:19 e wehewehe ia pauku. Rev. S. Kamakahiki.
Na A. Pali i kona kumumanao mua.
Noi ia mai e hoopanee ka aha apopo hora 9, me ka pule a A. Pali.
LA HANA 4.
Noho hou mai ka aha e like me ka hoopanee. Malama ia ka hapa hora haipule. Heluhelu ia ka moolelo, apono ia.
Hoike a ke komite o ka palapala kue a ka ekalesia o Waikapu i ko lakou kahu, no na kumu lehulehu :
Ua hiki ko oukou komite ma Waikapu, ua hui pu me na hoahanau, a me ka poe nona na inoa i ike ia ma ia palapala hoopii. Ua ninau pono ko oukou komite i ka oiaio o ia mau kumu, ua olelo mai kahi poe, aohe maopopo ia makou, no ka mea, i noi wale ia mai no ko makou inoa e kakau a kau aku la; a o kekahi o lakou, kuhikuhi wale aku no i kekahi, a kue kekahi o lakou i kekahi. Ua olelo mai lakou e hoopau wale, aole i ae ko oukou komite ia noi; ua imi ko oukou komite i ka mea oiaio.
Ma ka nana ono ana, imi pono ana, he mau kumu oiaio kekahi, oia keia : 1 Heihei lio. 2. Pili dala. Ua ninau ke komite i ka oiaio, ua ae mai ke kahu. He mau makahiki ke kaawale loihi o keia mau mea i hanaia, a ke hoala ia mai nei i keia wa. Pane mai ke anaina holookoa, he imi hala wale no keia. He oiaio no, he imi hala keia i ke kahu, nolaila, ninau ko oukou komite. O ka poe kue i ke kahu, e ku iluna. He elua wale no kanaka i kue. A o ka poe aloha i ke kahu, e ku, ua ku ae la ke anaina. A o ka pau noia o ka hana a ko oukou komite.
O Nawahine, A. Pali, ke komite. Apono ia ka hoike. Kohoia o Rev. P. Kuia, Paaluhi, Kaili, i komite hoeueu.
Kumuhana 11---Oihana kuloko: hooholoia, e hoi na hoa a pau o keia aha; a e hooili aku ma ka lima o ke kakauolelo o ka Papa Hawaii, a puuku paha.
12---Kula kahunapule. Lilo kekahi manawa e ninau ia Kauapua i keiki na ka aha.
13---Hoomanamana pegana. Waiho mai o Bihopa, he olelo hooholo. Hooholo ia. E kiai pono, a e makaala na kahu ekalesia, na haiolelo, a me na lunakahiko a pau, e pale aku i na hana hoomanamana pegana a pau, a e hookupaa i na haipule ma ka manaoio aku ia Iesu Kristo ka Hoola, i ole lakou e ae iki aku e hoomana i na Akua e, no ka mea, ua hoolapanai o Iesu i keia lahui Hawaii, mai lalo mai o ka mana o Satana, a me na Akua o ka pouli, nolaila, e kupaa mau kakou malalo o ke Alii nui Iesu, a e hoole aku i na mana a pau o ka pouli. E hoomanao kakou i na hoa ekolu, a Daniele i pane aku i ke alii, me ka a ole ia a komo wiwo ole aku i ka umu enaena.
Koho ka aha ia Rev. E. Bihopa i komite, e pane aku i ke aloha nui o keia aha, i ke kakauolelo o ka Papa Hawaii.
Hooholoia. Aia a hoopanee keia aha, e hui hou ma ka laukini o Kaahumanu ma Wailuku Maui, i ka Poalua mua o Mei 1887.
Hooholoia, e hoouna ia ka moolelo i ka Nupepa KUOKOA.
Hooholoia, e haawi aku keia aha i ka mahalo i na ekalesia o Lahaina, i ko lakou malama ana i na hoa o keia aha, i na mea oluolu.
Haawi mai o Bihopa i wahi olelo paipai. E huki mai i ka wai o ke ola noloko mai o ka punawai. Mahalo ia.
Apono loa ia ka moolelo; hookuu ka halawai me ka himeni a me ka pule. O. NAWAHINE. Kakauolelo o ka Aha Lunakahiko.
HE HAUNAELE.
Iawaena paha o ka hora 2 me 3 o ka wanaao Sabati i hala, Nov. 21, ua ulu ae la he haunaele manwaena o kekahi mau haole elua maloko o kekahi pa ma Honokaupu, Honolulu, a o na mea i ike ia aku e ka mea nana i hoike mai keia haunaele, penei no ia:
Ma na hora o ua wanaao la i oleloia ua hoea ae ua mau haole la maloko o ua pa la a komo iloko o ka hale. Aia maloko o kekahi lumi o ua hale la kekahi haole a me kekahi wahine, a ma kekahi ano aha la i ike aku ai ka mea nana i hoike mai keia nuhou, i ka puka ana mai o kela haole iloko o ka lumi a komo aku la keia mau haole elua. Me he la ma ka hoomaopopo aku, i kipaku ia mai iwaho, me ka pani ia mai o ka puka mahope o laua.
He mau minute mahope iho, hoea hou ae la ma ua lumi ei ka mea i kipaku ia i hoikeia maluna ae, a ma kona lima e paa aa i kekahi pauku kakaki. Ma ka hoomaopopo ana i kona mau helehelena, ua piha loa oia i ka inaina, a oiai pu no hoi e hoopuka ana i na huaolelo maemae ole. Wehe oia i ka puka a komo iloko, a oia no ka wa i hoomaka ai ka haunaele.
No ke ano poeleele a no ka paa hoi iloko o ka lumi, ua ike ole aku la ka mea hoike nuhou i na mea e hanaia ana maloko, aka, hookahi ana mea i ike mahope koke iho, oia ka puka ana mai o ka haole me ke kakaki ma kona lima a pili ae la mawaho o ka puka, aua makaukau hoi ke kekaki e haule iho maluna o kekahi kino kanaka e oili mai ana iwaho ia wa. Ke puka nei na olelo pelapela, a ke kahea pu la i ka mea iloko o ka lumi e puka mai iwaho.
I kela mea maloko mai o ka lumi e aneane mai ana e puka iwaho, oia no ka wa e anehe iho ana ka mea me ke kakaki eholu iho maluna, aka, iloko o ia sekona no, ua hopu ia mai la ke kakaki mahope e kekahi kanaka a lilo aku la. A oia no hoi ka wa i haalele pau mai ai kela haole maloko o ka lumi i ka puupuu maluna o neia haole e ku ana mawaho, a hele okoa mai la ke koko ma ka ihu. Me keia ehaeha nui i loaa iaia, hina aku la oia ilalo. I kona ala ana mai, holina ae la oia, aka, aole he makai i hoea koke mai ia wa. Me ke kunewanewa a me ka hiolo makawalu mai o ke koko, puka aku la oia iwaho o ka pa, a ua loheia mai ua hoea hou oia malaila me ka makai e hopu ai i kona hoapaio, aole nae i loaa. Eia paha ke huli ia nei.
I kahi hea e hoopokole ia ai ka inoa o kekahi holoholona me na hua pi-apa like elua, a i loaa ai hoi ke kaona o ko laua ano me ka piano o na huamele, a o ka nanahe hoi e kupilikii ai.
HOOLAHA KUMAU.
WILDER & CO. (WAILA MA.)
@ kuai @papu a me na lako kukulu hale na ano a pau, a me na me na pono a pau no ka hale.
Kihi Alanui Moiwahine me Papu. tf
UA WEHE AE NEI O
Y. ANIN
-HE-
HALE INU KOPE
HELU EKAHI.
MA NA KIHI O NA ALANUI
Hotele a me Maunakea.
2000 3m
PACIFIC HARDWARE COMPANY
---
Na hope o Dilinahama Ma.
Mau Mea Kuai Lako Hao
Alanui Papu, Honolulu.
JAMES DOWER.
Oia hoi o Kimo Kapiolani, ka ona mua o ka mokuahi Kapiolani. Ua makau kau oia me na lako apau, no ka hana ana i na waapa, a me ka hanahou ana i na waapa naha. Ua makaukau oia me na Wae, na Umii, a me na apana hookui e paa ai na waapa, a me na lako e ae no ke kapili ana i na waapa. E hele mai ma kona hale ma Manamana. Honolulu. 2029
H. HACKFELD & CO
Mea Kalepa Nui, a Kuai Kukaa i na
Waiwai Lole, a me na Mea Hao
A HE MEA
KALEPA WAIWAI NUI
HONOLULU, H. I. 2082-1yr
HALEKUAI HOU
---ME NA---
LOLE HOU !!
---
KA HALEKUAI MAKEPONO LOA keia o neia Kulanakauhale me ka mai kai loa no na lole ma ke kihi o na
Alanui Papu me Kalepa.
Na Lole o na ano a pau no na
Keonimana me Keikikane.
Na Lole komo.
Na Papale,
Papalekapu,
Na Pahu waiho Lole,
Na Paiki Ili,
a pela aku.
He mau waiwai i lawe pololei ia mai no keia wahi, a i wae pono ia no hoi i kulike me ka makemake o na makamaka Hawaii.
Ka Hale Kuai keia o ke Kanaka Ilihune. He mea e lawa ai ka makemake oka poe uuku o kahi loaa.
O KO MAKOU MAKIA,
E OLA KE KANAKA ILIHUNE
E hele mai a e nana pono, i ike a pau kuhihewa.
EGAN & CO.
2092-1y
PAPA ! PAPA !
AIA MA KAHI
LEWERS & COOKE.
( O LUI MA)
---
ma ke kahua kahiko ma alanui Papu a me Moi.
E loaa ai
P A P A N O U A I K I
o kela a me keia ano
---
a P@ P@, Na Puka Aniani, Na Olepelepe,
Na Pou, Na Ola, Na Papa Hele, Na Papu
Ku, A me na Papa Moi nui loa
---
Na Pili o na Hale o na Ano a Pau
---
Na Pepa Hoonani, Na Pena o na Wai e pau
Na Kui mai ke Nui a ka Makalii, Na Ami
Puka, Na Ami Puka Aniani, Na Ami
o na ano a pau, Na Aila Pena, o
kela me keia ano Na Aila Hoo-
maloo, he lehulehu wale,
Na Aila e ae o na
ano apau.
---
NA WAI VANIKI
---A ME NA---
WAI OOHINUHINU NANI !
O NA ANO A PAU LOA.
NA BALAKI ANO NUI WALE.
A ke hai ia aku nei ka lono i na Makamaka a
pau, na makaukau keia mau Makamaka
o oukou e hoolawa aku ma
na mea a pau e pili ana
ma ka laua oihana
---NO KA---
UKU HAAHAA LOA.
---
E like me ka mea e nolo ana mawaena
LAUA a me ka MEA KUAI.
HELE MAI E WAE NO OUKOU
HOOLAHA KUMAU.
Kakela a me Kuke
HALEKUAI NUI O NA WAIWAI.
E laa na pahiolo, koi hele,
hamale, koi nui a me liilii, kila,
wili puaa, rula, apuapu, kui o na ano
a pau, kala kaa, hao hopaa puka
pohaku hoana, kepa, lei ilio, kau-
la hao ilio, pahi, upa, pahi umiumi.
kalapu, kope hulu, pulupulu @pa ka
lakala, lina hao, ami, keehi, a me
---KAULA OPU---
Palau ona ano a pau,
Oo, ho, kopala, pe, kip@
kua, hao kope, au ho@
a aku, kua bipi, lei bi-
pi, kaula hao bipi, uwea
pa, uwea keleawe, @ @
piula, kaa palala, ipuhao, @
PA-PALAI, MAKAU ME KE AHO
----
Ili wai, papa holoi, kopa ala kaula
@kuaina, hu ʻ akai, ehi wawae,
hulu pena, a pela aku.
Penawali, kini nui a me liilii o na
ano a pau, me ka pepa kuhi-
kuhi, pena keokeo, aila
pena, aila hoomaloo,
vaniki kaa, a me
vaniki moe.
PENA HOOMA-
LOO
---a me aniani hale---
AILA MAHU, AHA MIKINI, AHA @
AILA KAA, INIKA KAMAA.
PAUDA, KUKKAEPELE, KIANA
PAUDA, UIKI IPUKUKUI O NA
ANO, HE NUI A LEHULEHU
---
LOLE MAKEPONO
-E aa na-
AHINAHINA, KALAKOA, KEO
KEO, LEPONALO, HULUMANU
UWE-WAHINE, KUI HUMUHU
MU, A ME KA LOPI.
Ke Kuike e loaa no ia ma kahi o
Kakela & Kuke !
---
NA MEA PIULA
---
Mikini Humuhumu
Makini a WHEELER a me WILSON
MIKINI WIILOX ME GIBBS
NA MIKINI A
---R E M I N G T O N---
He nui loa na mea hao me na ukana ae o na ano a pau, aole hiki ke hi@@ ia aku, hewa i ka wai na maka k@
---
Laau Lapaau Kaulana Lo
A DR. JAYNE.
LAAU HOOMAEMAE KOKO
LAAU HOOPAU NAIO, LA@
KUNU, PENIKILA, HUAALE
PAAKAI, LAAU HOOPAA HI,
Me na Laau Hamo a Pela ʻ ku.
Kakela me Kuke.