Ka Nupepa Kuokoa, Volume XXV, Number 47, 20 November 1886 — Page 3
| This text was transcribed by: | Keoki Ichiki |
| This work is dedicated to: | Kumu Keao NeSmith |
Ka Nupepa Kuokoa
KE KILOHANA POOKELA NO KA LAHUI HAWAII.
Ka Nupepa Kuokoa
Pela e THOSGTHRUM ma ka Halepai o ka Hui “PRE—PUBLISHING COMPANY,” Keena Hooponopono, ma na kihi o Alanui Moiwahine me Nuuanu.
I @@@@@na muaia mai na Olelo Hoolaha ma ke Keena Hooponopono mamua ae o ka hoea ana i ka awakea o na Poaha a pau. Aole e hoopakaia na Olelo Hoolaha ke laweia mai @@ @@ @@@ ka horo i hooikeia maluna. E hoo@@@@@@ aku ana makou i keia rula maluna.
E hooili mai i na leta a pau a me na kauoha a me ka uku pepa ia KA NUPEPA KUOKOA ma Honolulu. Ina e loaa pono ole aku keia mea i kona poe lawe, e hai mai me ka hakilia e i keia Keena.
O ka uku a keia pepa e haawi ai i kona @@@ @@@@@@, he umi keneta no ke dala, koe ka @@@@@@@@ o Kona, Oahu, a me kekahi mau apana @@@ kani nui o ka luhi i ka halihali ana i ka @@@ @@@ ma ia mau apana, e hooiia ka uku luna.
Kela me Keia
Aohe lohe hou ia mai o ua nupepa puka la hou, he hoohaili wale iho no paha.
E nana ae i ka hoolaha a ka Luna Auhau o Kau e puka aku nei ma keia kau. Mai hoolaha.
He mau ahaaina kekahi o na kauhale i malamaia ma ka la 16 iho nei, he I@@oi’e pu ana i ka la hanau o ka Moi.
Ua hiki mai nei ka waapa heihei hou o ka hui heihei waapa Honolulu. He mau kona kulana o ke ano palamime.
Nani na hana hoohiluhilu o ka la 16; nani na huakai hookahakaha, a nani na @@ukao lele o ia po. Kauluwela ka lewa.
No ka nui loa o ka ua ma ka Poaha nei, nolaila ua hoopaneeia ka holo ana aku o kekahi mau mokuahi o kakou a hiki i kakahiaka o nehinei.
Ma ka Poakahi nei i kulukulu iki iho ai he mau wahi pakaua makalii, aole hoi o ke ano puipui, a o ke poi pu nae o ka lani he oia mau.
O na loaa o nap o elua a ka huli keiki nika i weheia iho nei, he 750 dala a ke laweia na lilo a pau, koe 500 dala a oi. Nani no.
Ua hoomaha iho nei na kula a pau o ke aupuni iloko o keia pule wale no, no ka hoomanao ana i ka Iubile hapa keneturia o ke ‘lii ka Moi.
Ua hookohu ia o Major Antone Rosa i Loio Kuhina ma kahi o Kaulukou i waiho mai, a ma kahi hoi i pani ia iho nei e ke Kuhina Kalaiaina.
O na mele e puka pu aku nei me na Haawina Kula Sabati i keia mau pule, na ke kaikamahine ponoi a Laiana e unuhi mai nei.
Hihiu no hoi na wehi o loko o ka Hale Alii, a pohihihi uo hoi. O ka pohihihi paha ia la ke hou hewa la na makaikai i ke aniani no ke kuhihewa he puka.
Aia ka mokuahi hou o ka hui o Poka ma ma kona alahele a ku mai i Kapalakiko. He manawa wale no nona e ku mai ai ianei ke paa pono na hemahema.
He eha ka nui o na pio a ke kanawai i hoihoi hou ia mai ko lakou mau pono kivila e ke ‘lii ka Moi, oia o Mr. Jos. Woodward, Kekahima me David Watson.
Ke oili aku nei ka pepa me ka piha i na nuhou o ka la Iubile. Mai poina no hoi i ka alawa ana ae i ka kakou mau moolele, na manao heluhelu a me na hoolaha.
Ma ka la hanau nei i kahiko mai ai ka hana puhi ohe o ke kula Hoopololi i ko lakou mau aahu hou a ke ‘lii ka Moi i makana aku ai. He bana keia no ka moku manawa o Hawaii nei ke ku mai. Pela na lono.
Mai hoohewahewa iho i na puu haahelu o na makana dala i hoonoho hui ia, e hoomaopopo ia no ka puu huahelu mua oia ka makana mua a pela aku. Ua hoonoho huiia ma ko makou “Lealea maluna o na ale o ka moana” e puka aku nei.
Ua hoike ia mai e na hoe waapa heihei o ka Poakolu nei he nui ke ale o waho o ka nuku o Mamala ma ia la, a pela i poino ai kekahi mau waapa heihei ma ia la oia hoi ka lepe ana o kekahi mau apana papa a komo nui ke kai iloko.
Hookahi wahi waa pea i kahuli oiai oia e kaalalo ana a kuupau aku ikana pahi okioki ale o ka moana. A i ole, ua lealea loa paha ua wahi waa la no kona komo ana iloko o na hana Iubile, a hele e inu rama a ona loa oia, a oia ke kumu i kahuli ai.
Mamuli o ka loaa ana mai nei o ka waapa heihei hou o ka Hui Honolulu, ke wawa wale ia mai nei, me he la e malama ia ana he heihei waapa ma ka Poaono ka la 27 o keia mahina, oia hoi ka la kuokoa i hookaawaleia, mawaena o na Hui Honolulu me Myrtle.
Ma ka po o ka Poalua ka la hanau o ke ‘lii ka Moi, maloko o kekahi pa ma Kapalama, ua hakaka iho la kekahi mau kanaka elua, a mahope iho o ko laua kupa-pa ana maluna malalo, ua haele aku la laua me ka waiho iho no ka mea nona ka pa, hookah kuka a me ka wati. Aole i maopopo ke kumu o keia hakaka ana; aka, he ona no paha. Ke kauohaia aku nei ka mea nona ia waiwai e kii mai me na lilo o ka malama ana.
Laukanaka ke taona nei ikeia mau la i ko kuaaina mai. I naue mai e ike i na hana hoohiwahiwa o ka la hanau.
Ua hoalo iho nei kekahi mau nupepa puka la o kakou ma na la 16 me 17 no na hoomanao la hanau Iubile.
Ma kahi o William Boynton Wright i make, luna o ka Hale Pupule, ua hookohuia o Mr. Wm. Auld ma ia wahi. E mahaloia oia.
Ua holapu a ke ahi i kekahi mau hale waiho laina o ka mahiko o Hawi ma Kohala a pau loa. Pakele ka nui hale.
Mai poina i ke Kinau o keia pule ae, a Poakahi oia niau aku no kana huakai kaapuni. Ma ia moku e lohe ai ko kuaaina i ka nuhou o ka Iubile.
Hana mao ole mai nei ke ahi ai honua o Hawaii; ke pii mau la no kona hookalakupua, a ke manao ia la e poha hou ana he lua pele hou.
He poe pake pili waiwai ke i hopuia e na makai ma ke alanui Maunakea i keia mau la iho nei, a ua pau nui i ka hoopaa ia.
Ua lohe ia mai ka nui o ka ua ma Kau, Hawaii i ka pule i hala, a ma Hamakua mai hoi he hookilihune wale iho no ko laila.
He wahi olai ka i hoonaue ae i ka apana o Kau ma Hawaii i ka Poakolu o ka pule i hala, aole nae o ka oolea.
O ka heihei aholoa ma ka luu ana, ua eo no ia Palahu no i paha minute a oi. He wahi elemakule keia, eia nae aholoa ma ka luu.
Me he la ikoko o na heihei a pau i malamaia ma ka Poakolu nei, he elua heihei i haule ai ko ka Moi mau waapa, a o ka hapanui nana wale no.
Mai poina iho i ka ahaaina nui Iubile o ka Poalua iho ka la 23, a me ka hookahakaha nui o na pualikoa ma ia Poakahi aku ka la 29.
E kaa mai ana na hoomanao o ka la Kuokoa Nov. 28, ma ka Poaono iho Nov. 27. Mai poina ia la kulaia ou e Hawaii.
He mai nawaliwali ko ka kiaaina wahine o Kauai e noho nei; ua loheia mai ua haule oia mailuna iho o ka lio a haki kekahi o kona mau iwi.
O ke keiki a ka ona miliona mai nei kekahi i hiki mai ma ka mokuahi o ka Poakolu nei, a ke ole makou e kuhihewa, oia nei ka mea nana i kipu kekahi lunahooponopono nupepa o Kaleponi.
He mau lono wale no keia e nune ia mai nei, i hoi mai nei kekahi o na keiki alii o kakou e noho i ke kulana kiaaina o Oahu nei. Maha nae paha he mau nune wale iho no keia.
E hoomanao i na hooikeike au kahiko o keia la, e hoomaka ana ma ka hora 9 o keia kakahiaka: a e hoomanao pu no hoi i ka paani kinipopo ma ke kahua daimana o Makiki.
Ua olohani like ae na luna lawe pepa o ka nupepa puka la o ke Elele ma ke ahiahi Poakahi nei no ka apakee ia ana o ko lakou uku o ka halihali ana i ka nupepa; pela mai ka lakou olelo.
Ma ka Poalua iho nei i hookuku ai kekahi mau koa o ka puali o Honolulu Raifela me kekahi poe e iho ma ke kipu pololei, a ua eo i ua poe wae la no 7 poina ka oi.
A hiki i ka manawa he 20 minute i hala o ka hora 4 o ke ahiahi Poakolu nei, ua ike ia aku la ka mokuahi Zealandia mawaho aku o Kawaihoa. Ma ka hora 6 a oi i komo mai ai no ke awa nei.
Ma na mokuahi i ku mai o na kakahiaka Poaono me la pule o ka pule i hala, ua ikeia he lehulehu o na holoholona hookupu i ka Moi, oia na puaa, pipi, a pela aku. Pela me na mea ulu, na hua ai a nui wale.
Ua loheia mai e hoomau ia aku ana na kahiko hou o ka oihana makai i puka nui ae i ka la Iubile nei, oia hoi kela papale peleleu kohu kaliu waa, ke apo ili ma ka opu a me ka newa ma ko lakou mau aoao.
He lono ka i loheia mai ua kauohaia aku ka poe kuai lei o na pipa alanui o ke kulanakauhale nei e lawe aku i ka lakou mai lei iloko o ka pa alii oia ka lakou makana. A no ka ae ole paha o keia poe, ua pau nui aku i ke kipaku ia mai na pipa alanui.
Ua huli hoi mai nei ka lunakawai o ka aha kiekie Hon. I. Makale mai kana huakai malama i ke kau hookolokolo kaapuni o Hawaii ma Waimea. Lehulehu no na hihia; o Mr A. Rosa ma ka aoao o ke aupuni. He eha mau hihia oki mare, ua pau elua a ua koe elua no keia kau ae.
Lehulehu loa o ko kakou mau kamaaina i huli hoi mai ma ka mokuahi Zealandia o ke ahiahi Poakolu nei, a iwaena o ia huina kamaaina, o ko kakou mai keiki alii kekahi i hoi mai; o lakou no a ekolu. O na kamaaina i hoi mai, oia ka Hon. H.A. Wilimana, Miss Wilimana, C. Wilimana, Mrs. C. P. Iaukea, Kiaaina o Oahu nei, G.W. Makapolena, J.A. Bekewita a me kana wahine, kekahi o ko kakou loio kamaaina F. M. Haki, a he lehulehu iho no.
O ka makana iho la ka la
Ma ka la 5 o Novemaba, ua malamaia he halawai ma ka luakini o Helani, ma Kahaluu, no ka noonoo ana e kukulu i ahaaina Iubile no ka Moi ma ka apana o Kona Akau, a ua hooholo ia e malamaia he ahaaina Iubile no ka Moi ma Kailua, ma ka pa i kapaia o “Keakealani.”
I ka hookuu ana o na hana o ia la, ua huli hou aku ko Kailua poe; a aia iloko o kekahi poe e hoi nei o Kailua, ua ona ia lakou i ka rama. Nowai mai hoi ia rama? Kai no hoi no ka lunamakaainana no hoi. O ka makana iho la ka ia o ka hoi ana mai nei. Ua haawiia na kiaha rama i kekahi mau kanaka o Kailua ma ka hale noho o ua lunamakaainana la, mahope o ka hookuu ana o ka halawai.
Kai no he hoike lu niu o ka Ahaolelo, aole ka.
J. N. POHULAI,
Na Lealea Maluna o na Ale o ka Moana
Malalo iho e ike ai na makamaka heluhelu o ke KUOKOA i ke kulana o na heihei ma ka Poakolu nei penei:
1. Heihei moku kiakahi, he ehiki ka nui o na moku, a he ekolu makana, he $50, $20, a me $10. Eo ia
Kahihilani, 3 h. 20m. 46s.
Pokii, 3h. 5m. 51s.
Pauline, 3h. 27m. 55s.
2. Heihei waapa liilii eha hoe, oia o Benicia, Fair Play, Every Time, St. Jacob’s Oil: no elua makana, $10, $5. Eo ia
Benicia, 12:45.
Every Time, 13:15.
3. Heihei waapa huelo boti elima hoe, Lapakahoe, Kualakai, Keehukai, no elua makana $40, $10. Eo ia
Lapakahoe, 22:20.
Kualakai, 22:36.
4. Heihei waapa eha hoe, he ekolu waapa i komo, Pomaikelani, Liliuokalani, me Puaiwa, a he elua makana, $30, $15. Eo ia
Pomaikelani, 21:21.
Liliuokalani, 21:31.
5. Heihei waa eono hoe, o Leleanae wale no ka waa i komo aohe ona hoa heihei, a ua haawi ia oia e heihei me 12 minute, a ua eo iaia iloko o 11:33.
6. Heihei waapa eono hoe, Kaiulani, Liliuokalani, me Leialoha, no na makana $75 me $25. He mau waapa heihei maoli keia, a ua palanehe ko lakou holo ana. Haki nae ka hoe o kekahi waapa a haule loa ia i hope. Eo ia
1----Kaiulani---
2----Liliuokalani—
3----Leialoha.---
7. Heihei au, he eha poe i komo, he elua makana, $10: $5. Eo ia
Joe. Poepoe, 3m.
Joe. Kamai, 4:40.
8. Heihei waapa moku eha hoe, no elua makana $30, $10. Ekolu waapa i komo, Ironcrag, Pacific, me Malulani. Eo ia
Ironcrag, 24:02.
Malulani, 25:29.
Papa elua o na heihei waapa moku, oia o Nauahi, Mokolii, Kinau, Kaukeaouli, Haleakala, Moiwahine. Eo ia
Kunau, 26:17.
Nauahi, 26:19.
Ia manawa no na heihei tapu, eo ia J. Kay. A o ka heihei luu, eo ia Pelehu no 1 ½ minute.
9. He heihei moku kiakahi liilii keia, lehulehu na moku i holo, a he ekolu makana $50, $20, me $10. Loheia mai ua eo ia
Pokii, 42:26.
Nawililauhiwa, 46:27.
Kalaiokona, 43:53.
Gertie, 50:01.
10. Heihei waapa pukahi eha hoe, he ehiku waapa i komo, a he elua makana, $25, me $10. Eo ia
Benicia, 14:26.
Levi, 14:50.
11. Heihei waapa eono hoe o na hoe waa papa elua. Ekolu waapa i komo, Leialoha, Liliuokalani, me Kaiulani. O na waapa heihei maoli keia, a he elua makana, $50, me $25. Eo ia
Leialoha, 18:32.
Liliuokalani, 18:43.
12. Heihei waa pea, a ua lehulehu na waa i komo. Elua makana no keia heihei, $20, me $10. Eo ia
Puuloa, 37:52.
Waioli, 46:40.
13. Heihei waapa eha hee, he mau waapa heihei maoli keia, a he ekolu waapa i komo, Liliuokalani, Pomaikelani, me ka Kaiulani. Elua makana, $30, $15. Eo ia
Kaiulani, 18:32.
Liliuokalani, 28:35.
14. Heihei waa me waapa, a na ka waapa ke eo.
15. Heihei waapa nunui 12 hoe, ekolu waapa i komo, o Hanakeoki, Kapiolani, me Kaulike. Elua makana, $60, me $25. Eo ia
Kaulike, 31:03.
Kapiolani, 31:40.
No Kekaha, Kauai.
Ua haalele iho o Mr. V. Knudsen a me kona ohana i kona home noho ia Waiawa, ma ke awakea o keia la no Honolulu. E hala ana paha he mau la malaila, a hiki i ka la 20 o keia mahina; a ma ia la paha e kau ai ma ka mokuahi Australia a holo aku no Kapalakiko, a malaila aku no Bosetona ma ka hikina. E lawe ana oia i kana mau keiki i ke kula, a e hala ana paha he makahiki hookahi.
Ua kuai iho nei o Antone Faye i kona hapa o ka mahiko o Kekaha ia Mr. E. Kruser, aole nae i maopopo ke kumukuai.
Ua lono pu ia ae no hoi, e haalele ana paha oia ia Kekaha a huli hou aku no Amerika iloko o keia mahina iho.
Ua hooki iho nei ka wili ana o ke ko ma keia la. E hoomaha ana paha no akahi mahina. D. KUAIOLOKELA.
Kekaha Planation, Kauai
LAUDILA
KA NAITA HOOPAHAOHAO O NA
KAKAI MAUNA A ME NA KAEI PALI O ITALIA.
Ka Olali o ke Kahua Kaua
Ka @@@@ @@@@ i hookunihi ka O@@@@ malamlama o ka La i ka Ui kelakeia i malamaia mawaena o na @@@hiwi me na hualo@@ ka nani nana i hoo@@@@@@ ka p@@wai o na aliiwahine a pau o Edena a i eha i ka ‘eha lima @@@ a ke aloha .
Ka Makani Puahiohio Wiliau o ka Hikina.
A o ke Kupueu Iwikani o ka Makakila
I LOKO o ka hiamoe kulipolipo ke keiki alii i hoolana ae ai a lohe i na olelo a kona makua moneka i pane iho ai, a ia wa puoho ae la oia a ike ae la i kona makua e ku ana ma kona aoao, a pane ae la oia:
E papa, heaha kou makemake: e hai mai ia’u i keia manawa?
Pane aku la kona makua moneka: E ala e kuu alii opio, e hoomaemae nou iho, a e hui ae me a’u maloko o ka lumi hookipa. A nalo koke aku la ua moneka nei.
Aia hoi, halawai mai la me kona mau nanaina ka ohana alii e kali ana no kona hoea aku, a aia pu no hoi ma loko o ia poai kona makua moneka. E like no hoi me ke ano ona launa ana mawaena o ka ohana, pela i lawelawe koke ia ai iloko o ka manawa pokole a noho nui iho la maluna o na noho.
Ia wa i ku mai ai ka moneka a pane mai la: E na ’lii a me ka haku alii hoi, (Laudila) i keia la e huli hoi aku ana au i ko’u home kuahiwi no ke kiai ana i na waiwai o kuu hanai alii, a e noho no hoi oukou me kuu luhi. Keia ka la e ike hope ai oukou ia’u, a i ka wa hea la e hui hou ai. Me ka’u mau huaolelo hope, ke haawi aku nei au i ko’u mahalo a me ko’u aloha nui ia oukou—aloha oukou.
I ka pau ana o na olelo a ka moneka, oia no ka wa i haukawewe mai ai o waho o ka pa alii me he la he puali kaua nui, eia ka o na ukali no o ka moneka me na lio. Nolaila ua haawiia na lulu lima hope i ka moneka, kau ae la ia ma kona lio, a i lohi no i ka hoohuli ana o kona lio, a i ke kupono ana, oia no ka wa i haalele pau iho ai na manea o na lio, a nalo aku la iloko o ka halulu nui me he hu ana la na ka makani.
E na makamaka, eia kakou ke lua kaha pu nei me Laudila ma ka home o kona mau makua alii, a ua pau hoi ko kakou maalo hou ana ma na ipuka o ka home kakela o ka moneka. Nolaila e kamailio kakou no na hana a ke keiki alii Laudila mahope iho o ka haalele ana iho o kona makua moneka.
He mau la loihi i hala mahope iho, ua hoala ae la ke keiki alii Laudila he puali naita nui, a ao aku la ia lakou i na ike o na mea kaua i kokua pu ia mai e kona mau kaikuaana.
Me ka manaolana nae o na kaikuaana aole la e hiki i ko laua pokii ke oniu i ka pahikaua, eia ka auanei he wai auau ia nona; a o ko laua akamai i manao ai oia ka oi, he helu haahaa loa ia i ko Laudila.
He manawa loihi keia ao ana a ikeia iho la ka makaukau o na naita ma na mea kaua, a nolaila ua waiho aku la ke keiki alii i ka mana hoomalu a ao ana i na naita malalo o kekahi mau naita akamai loa i wae ia. A pau keia mau hana, ua manao iho la oia e hele hookahi aku ma kekahi huakai no ka imi ana i hoa kaunu pu nona, ka mea hoi au a ka mea heluhelu e olelo iho ai he ipo.
Ano hoi e na hoa, e huli iki ae ko kakou kamailio ana no ke kaikamahine a ke kiaaina o Italia, he ui oia, he nohea a he maoli ili lahilahi.
Ma na ahiahi a pau e haawi mau ana oia he mau aha lealea a me na hoahaaiana, a e kono mau ana no hoi oia ia Laudila e luana pu mai ia ma ua mau ahaaina la. E hoomanao iho e na makamaka, aohe kumu nui o keia mau hoahaaina wale ana a ua ui ihuanu la, aka, o ke kuko a me ka iini i nohoalii iloko o kona puuwai no Laudila, oia wale iho no.
Nolaila ma kekahi ahiahi, kono hou aku la ua kaikamahine nei a ke kiaaina ia Laudila e hele mai e hulahula pu me ia, no ka mea he ahaaina kana o ia ahiahi. A ua ae aku la o Laudila me na mahalo he nui.
Hiki ae la i ka manawa ai, aia o Laudila me ke kaikamahine a ke kiaaina ma ka papaaina kahi i noho ou ai, a e hoomahie like ana laua kekahi i kekahi me na imo ana he nui o ka hoomakaleho. Pela laua i hoohala ai i na minute ai e lawa pakiko ana i na mea ai o luna o ka papaaina, a he mea mau ia laua ka huli ana he alo a he alo me na minoaka hoohie, a e kilohi like ana hoi i ko laua mau helehelena me he la o ka laua mau mea ai ia a maona.
Hiki ae la i ka manawa hulahula, aia laua ke hoohehelo, wili akau lapuu ma ka hema, a pela wale aku ko laua hoohala manawa ana a aneane aku la i kauwahi o ke aumoe. Nolaila i hoopau ae ai laua i ka hula ana, a oia no hoi ka manawa a ke kaikamahine a ke kiaaina i koi aku ai ia Laudila e hele laua e holoholo iki mawaena o ka mala pua.
He mau kono maikai wale no keia i ko Laudila manao, oiai ua lokahi like laua ma na mea a pau me he la ua apo ia a paa i ke aupuni o Limaloa: nolaila ua kuikui like aku la laua a hoea ana iloko o ka mala pua.
Iloko o ia mau minute a laua e naku hele ana iloko o ka mala pua, hoea loa aku la laua ma ke kauwahi hale uuku e ku ana ma ke kae o kekahi punawai wai pipii iwaena o ka mala pua. He wahi hale keia i hoonaniia me na mea nani, a ua hoonoho ia ma ke kae o ka punawai na pohaku mabala kumukuai kiekie, a mao a maanei o ua wahi punawai la e luhiehu ana na pua aala o kela me keia ano.
I ka ike ana o keiki alii Laudila eia laua ke hele loa aku la i ka naele o Alakai, nolaila oia i ninau iho ai i ke kaikamahine. E hele ana kaua ihea?
Alawa ae la ua ui nei ia Laudila me na minoaka ana a ka hoomahie a pane ae la: E ka nani hookahi o ka honua, e poina iho ana ka pahe oe- a kani iho la ka aka a ua ui nei.
Ia laua no e kamailio la, aia pu laua ke pii la i na anuu alapii o ua hale la, a ia wa wehe aku la ke kaikamahine i ka puka a komo aku la laua iloko me ke ano pouliuli. Ho-a ae la ka ui i kekahi kukui a kono mai la ia Laudila e noho maluna o kekahi noho.
Haka pono aku la na maka o ua kaikamahine la a ke kiaaina maluna o na helehelena nohea o Laudila, a no kekahi manawa, hele aku la oia a apo mai la kona mau lima i ko ia nei a-i, a hoopa mai la kona mau lehelehe meli momona i ko ianei papalina pua rose lani palupalu, a oia no hoi ka wa a Laudila i hoomaopopo pono iho ai i ka like ole mawaena o ka heni nohea a kona makuahine a me ka ma-u onaona o ka honi a kekahi kaikamahine opuu opiopio.
Kuemi hope aku la ia me ko hoomau ana o kona mau maka maluna o Laudila, oiai ua koa opio la e kauaheahe ana me he la ua pulu i ka ua malule o luna. A liuliu, pane aku la ua ui nei:
He oiaio anei ka’u e ike nei, ano ka manawa e hooko ia ai ko’u iini nana i hoouluku i kuu puuwai nou, a e mawehe ae hoi i na hoopunini ana a ka moe? Ua lawa anei kou kino holookoa no ka hooko ana? Ua makaukau au ano.
Pane mai la ke keiki alii Laudila Aohe kau he moe e ka ui nani o Italia nei, aka he oiaio kau i ike mai nei, a e hala ole hoi ka’u mau hookaunu pu ana aku me oe no ka hooko ana i kou iini a me kou lia ana. Ua noa nei kino ia oe; e noi mai luna a lalo aohe mea nana e au’a. Noa keia i’a.
Ia manawa no i hohola ae ai na hiohiona hauoli o ka hoomahie maluna o ua ui la, a oia no kona wa i kuu pau mai ai i kona nohea nani oi kela e hoomalule loa ia ai ka naau o ke keiki alii e noho la.
Nalo aku la oia no kekahi mau mau minute a i kona hoea hou ana mai, aia hoi he kino wale no kona e ku mai ana, aohe kona mau pono aahu, a no kekahi manawa pane mai la:
E kala mai ia’u e ka nani mae ole, eia au mai luna a lalo ua laahia nau; e kilohi mai, a e hoike mai ia’u ina he mau wahi kahi o ko’u kino e palepale ai na lima o ke kalukalu.
Kilohi aku la no hoi ke keiki alii me na minoaka ana, a pane iho la iloko ona, ea, nani io no oe mai luna a lalo; polinahe i ka makani kaieulu o Honokaupu; e upu aku ana au ia oe e ku aloha e neenee mai &c., hina io no ke kupaa, haulehia io no ka manaoio ia oe. No kekahi manawa keia kilohi ana a ke keiki alii a pane aku la: E ka ui, ua kilohi aku nei au ia oe mai luna a lalo, a iloko o ko’u wa e kilohi ana me he la aia au ke makaikai la i ka memele o na hua apala o ke kihapai pua o Edena, a e kala mai hoi ia’u no ka mea he hookahi wale no a’u haina e pane aku ai, oia hoi keia, aohe wahi palepale a na lima o ke kalukalu.
Pane mai la ke kaikamahine, alaila ke pana nei ko’u puuwai iloko o na hauoli he nui i loaa ole i nei puuwai mamua, a nolaila e ae mai ia’u e hoopa hou aku i kou mau papalina nohea me ko’u mau lehelehe, a ina he mea ia e wawahi ana i kou maluhia e ka ui opio, ua oluolu au e kala ia no ia hana ana pela.
Ua noa nei kino ia oe mai luna a lalo, wahi a Laudila, a mai hoohala hou i kahi mau minute e hooko ia ai kou iini a me kou anoi nui. He mea nui ka iini hana mao ole a loko.
Me keia mau huaolelo i lele mai ai ke kaikamahine ui a honi mai la i na papalina ula ohelohelo o Laudila, a pane iho la: Onaona no hoi ka honi ana o ka ipo. Ke ike nei au i ka like ole mawaena o ka honi a ka makua.
Ia wa i akaaka like ae ai laua, oiai ka a o ke kukui i hoemi ia iho ai a uuku, a no kekahi manawa aia laua ma ke kae o ka bele uwea holu o Niolopua kahi i loli pua ai me he mau puhi la ia e halakika ana i ka paala o ke kahakai.
(Aole i pau.)
HOOLAHA KUMAU
Ka Waiwai o ka Hilinai
KA AYER Laau Sasaparila, kai kaulana a hilinai nui ia no ka hoomaemae koko, ma na wahi a pau o ka honua, he aneane 40 makahiki i hala ae nei, a ua lawelawe nui ia hoi iwaena o na oihana lapaau. O keia
LAAU SASAPARILA, no loko ae ia o ke aa Sasaparila Honedura maoli: ua loaa ka mana hoomaemae ma o ka hui pu ia ana me kekahi mau aa laau e ae, a me kekahi mau mea no loko o ka honua a me ka hao.
HE koko inoino a nawaliwali anei koa? Ua awili pu anei me na ano mai ikaika? A ua hui pu anei me na wai awaawa hoopehu? Na keia
LAAU e hoomaemae ia mau mea ino a pau, a maikai. O na kauka lapaau a pau o Amerika i ike i ke ano o ka AYER SASAPARILA, ua olelo lakou, ao e he mea maikai e ae no ka hoomaemae koko ana mai na mai i awili pu ia, aka o keia wale no. No ka
HOOMAEMAE ana i ke koko, a me ka hookahua pono ana i na mea a pau ma kekahi mau ano mai i ikeia, o ka AYER SASAPARILA wale no ka laau nana e hoomaemae hakalia ole mamua ae o kekahi ano laau e ae: O ke
KOKO ino hakuhaku, a nawaliwali hoi kona holo pono ana ma ke kino, e hoomaemae ia a e hooikaika pu ia no hoi ma o ka ai ana i keia LAAU SASPARILA A AYER. He maalahi a he
MAIKAI loa hoi keia Laau, aole no ka hoomaemae wale ana no i ke koko, aka, no ka hookaawale pu ana kekahi i na ma’i, hoomomona hou ana i ke koko ino, a me ka hooikaika pu i kona holo pono ana ma na aa. He lehulehu wale na hooia ana mai na wahi a pau o ke ao nei i hoohana mau i keia laau mamua o kahi mau laau e ae.
A HILINAIIA no ka ikaika kupono o ke ola kino, ma ka maemae ana o ke koko, hoomake pu ia na ma’i, a pela aku. He nui na laau hoomaemae koko i hoolaha waha hee wale ia malalo o na inoa lehulehu, aka, o na hilinai a me na hooia wale no a ke ao holookoa, maluna o ka
Ayer Laau Sasaparila
I HOOMAKAUKAUIA E
Kauka J. C. Aver & Co., Lowell, Mass.
HOLLISTER & CO.
Na Agena ma ka Paeaina Hawaii.
Helu 100…. Alanui Papu, Honolulu
2086-11
Laau Mai Lepera Helu 1
A
S. H. MEEKAPU
E loaa no na kuka’i olelo ana ma ko’u Home noho ma Hikimua, Kaakopua. Alanui Papu, ke loaa mua ke kauoha ma ko’u hale Oihana Tela Humuhumulole ma Alanui Nuuanu, Helu 11.
S.H. MEEKAPU
2086-1YR.
HOOLAHA KUMAU
MRS. THOMAS LACK
HELU 80, ALANUI PAPU.
MEA KUAI A LAWELAWE I
NA
Mikini Eumuhumu, na Aabu, 2 nui wale Aku
HE AGENA KUAI NO NA MIKINI
White, New Home,
Davis, Crown, Howe,
Me Florence.
Na Kui Mikini o na
ano a pau a Howard.
Na pepa anal ole o
na ano a pau, a me
kela keia mea.
NA LOPI MIKINI A KALAKA
HE AGENA KUAI I NA
Pu Raifela, Pu Panapana, Pu ki manu,
na Poka, Lu, Pauda, Kukaepele.
NA KAPUAHI AILA MAHU
Mai ke nui a ka liilii
Ma ka lawelawe nui ana o’u i ka hana lima akamai o ka oihana hana pu a pela aku, ua makaukau au e hooko kaulua ole i na kauoha a pau.
O na kauoha mai na mokupuni e hooko hoia.
2082 1y
FRANK GERTZ.
MEA KALEPA A LAWELAWE HANA MA
NA ANO KAMAA A PAU NO NA
Wahine, Kaikamahine a me Kane.
Na kamaa Buti a me na Kamaa haahaa no na Keiki Kane a me na Kanaka makua, o na ano @@@@@ hou loa @@@@@@
THOMAS MULDOON.
Hale Inu Kope Pookela
Pola Kope me ka Pa Kupa
UMI KENETA.
Ma ka Hale Inu rama Cosmopoitan Saloon ma ke kahi o ke alanui Nuuanu me Hotele
2080-3m
W. AHANA
KELA HUMUHUMU LOLE
Mea hana i na lole hou ma na paikini maikai a pau a me ka hoomaemae hou ana i na
LOLE KAHIKO.
2089-3M
WOLFE & CO.
Mea Kuai i na Ano a pau o na Mea
AI, HUA AI, O NA ANO A PAU.
Eke Palaoa, Berena, Waiu Bata, Berena manoanoa, Berena huinaha, meaono, o kela ano keia ano: Ko paa, Kope, Ti, Aila mahu, a me na ano a pau.
Helu 66, Alanui Hotele, Halekuai mua Lewis & Co.
E loaa koke aku no na kauoha a pau loa me ka hakalia ole, a me ka maikai o na hoomalu ia ana. E hooko ia na kauoha o ke kulanakauhale nei me la hikiwawe ma na ka me ka uku ole. O na kauoha mai na mokupuni, e lawelawe koke ia.
2085-6m
Nuhou! Nuhou! Nuhou!
AILA MAHU MAIKAI!
HOOKAHI DALA WALE NO NO KE
KINI AILA HOOKAHI!
E kuai pau ia aku ana no ka nui loa o ka aila i keia manawa.
E AU E NA MAKAMAKA! E AU!
E kipa ae ma ka halekuai o
Kakela me Kuke.
B.F. EHLERS & CO., PAINAPA.
Poe Kuai i na Ano Lole a Pau.
Helu 99 alanui Papu.- Honolulu.
E loaa mau ana na lole hou o na ano a pau maluna o kela a me keia moku.