Ka Nupepa Kuokoa, Volume XXV, Number 35, 28 August 1886 — Page 4
This text was transcribed by: | Lawrence Gersaba |
This work is dedicated to: | Judith Nalani Kahoano Gersaba |
Ka Nupepa Kuokoa
KE KILOHANA POOKELA NO KA LAHUI HAWAII.
Nupepa Kuokoa.
No ka Makahiki......................$2 00
No Eono Mahina..................... 1 00
- KUIKE KA RULA. -
Poaono,...........Augate 28, 1886.
MAHEA KUU KEIKI I KEIA PO?
(Where is my boy tonight.)
G. H. No. 279.
1. Mahea kuu keiki i keia po,
Kau keiki auwana e,
A nona kuu pule uwe?
Cho. Auwe! e kuu keiki e,
Kou keiki auwana e,
Kuu hiwa nei i aloha ia' e,
Auhea la oe; e?
2. Maemae no oia maua 'e,
A pule me kona mama,
He maka maikai aloha e,
Hoolohe a noho haahaa.
Cho. Auwe. &c.
3. Auhea la oe kuu keiki e,
Ahea e hoi hou mai,
A oli papa me mama nei,
A hoi ka pomaikai?
Cho. Auwe, &c.
4. Kii i kuu keiki i keia po,
Kua keiki auwana e,
Iini no au e ike hou,
E apo a honi ae,
Cho. Auwe! e kuu keiki e, &c.
HAWAII.
Haawina Kula Sabati.
HAAWINA XI.
Sept. 12. Ka hana o ka uhane. Io. 16: 5 - 20.
ANO, ke hoi aku nei au i ka mea nana au i hoouna mai; aole mae kekahi o oukou e ninau mai ia'u, E hele ana oe i hea?
6 Aka, no ka'u olelo ana'ku ia oukou ia mau mea, ua piha ko oukou naau i ka ehaeha.
7 He oiaio no nae ka'u o olelo aku nei ia oukou; He pono no oukou e hele aku au: no ka mea, i ole au e hele aku, aole e hiki mai ke Kokua io oukou nei: aka, i hele aku au, na'u no ia e hoouna mai ia oukou.
8 Aia hiki mai ia, nana e hoakaka mai i ko ke ao nei i ka hewa, a i ka pono, a me ka hoahewa ana.
9 I ka hewa, no ka mea, aole lakou e manaoio mai ia'u.
10 I ka pono, no ka mea, e hele aku au i ko'u Makua, aole oukou e ike hou ia'u:
11 I ka hoahewa ana, no ka mea, ua hoahewaia ke alii o keia ao.
12 He nui ka'u mau mea i koe e olelo aku ia oukou, aka, aole e hiki ia oukou ke hoomaopopo i keia manawa.
13 Aia hiki mai kela, o ka Uhane oiaio, nana oukou e ao mai i ka oiaio a pau: no ka mea, aole nana kana olelo ana; aka, o na mea ana i lohe ai, oia kana e olelo ai, a e hoike no oia ia oukou i na mea e hiki mai ana.
14 E hoonani mai ia ia'u; no ka mea, e lawe no ia i ka'u, a e hoike aku ia oukou.
15 O na mea a pau a ka Makua, na'u no ia; nolaila au i olelo ai, E lawe no ia i ka'u, a e hoike aku ia oukou.
16 A liuliu iki, aole oukou e ike ia'u: a liuliu iki hou aku, a e ike no oukou ia'u, no ka mea ana au i ka Makua.
17 Nolaila, ninau ae la kekahi poe o na haumana ana ia lakou iho, Heaha keia mea ana i olelo mai ai ia kakou, A liuliu iki, aole oukou e ike ia'u; a liuliu iki hou aku, a e ike oukou ia'u; no ka mea, e hele ana au i ka Makua?
18 Ninau ae la hoi lakou, Heaha keia mea ana i olelo ai, A liuliu iki? Aole kakou i ike i kana mea i olelo ai.
19 Ike iho la no o Iesu i ko lakou makemake e ninau iaia, a i mai la oia ia lakou, Ke ninaninau anei oukou kekahi i kekahi i ka mea a'u i olelo ai, A liuliu iki hou aku, a e ike oukou ia'u?
20 Oiaio, he oiaio ka'u e olelo aku nei oukou, e uwe auanei oukou, a e kanikau hoi, aka, e olioli no ke ao nei: a e kaumaha auanei oukou, aka, e hooliloia ko oukou kaumaha i olioli.
Pauku Gula. O ka uhane oiaio, nana oukou e ao mai i ka oiaio a pau. Io. 16: 13.
Manao nui, O ka hana o ka Uhane Hemolele, oia ka hoakaka ana i ke ao nei i ka hewa, a me ka pono, a me ka hoahewa ana, a nana e ao mai i ka oiaio a pau i na haumana a ka Haku.
NA HELUHELU LA.
Poakahi Io. 16: 1 - 20.
Poalua Io. 16: 22 - 33.
Poakolu Oih. 2: 1 - 21.
Poaha " 2: 22 - 43.
Poalima " 24: 10 - 27.
Poaono I Kor. 15: 1 - 20.
Sabati Io. 14: 15 - 31.
Mele, E oli Hosana. H. A. N. 242.
Pule.
NA NINAU.
No ke aha ko Iesu hai ana i keia mau mea i na haumana? Io. 16: 1. Heaha kekahi mau pilikia e hiki mai ana i o lakou la? Ua hookuke ia anei lakou iwaho o ka luakini i kekahi wa? Io. 9: 34. Oih. 21: 30. Ua imi anei kanaka e pepehi ia lakou? Oih. 17: 5, 9: 23, 8: 58 - 50, 26: 9 - 11.
Ma ko lakou manao, owai ka e hoomaikai ia ana, ma ka pepehi ana i na haumana? He oiaio anei ka manao o ia poe kanaka, e hoino ana na haumana i ke Akua? Mau anei ke kaumaha ana i na mohai, oiai, ua hiki mai ka mohai nui, o Iesu? Owai ke Kumu hoohalike nui? I na he mau haumana nana, aole anei he pono e hahai iaia? O ko Iesu ano anei ia, o ka hana ino, o ka hoomaau ia ha'i? Aole anei o kona rula mau, o ke aloha? E aloha aku i kou hoalauna, e like me ke aloha ia oe iho?
No ke aha e hana mai lakou i keia mau mea? p. 3. No ko Iesu ha'i e ana i keia mau mea ia lakou? p. 4. He mea anei ia e hoomahuahua i ko lakou manao io, i ka ike ana i ka hooko ia o ia mau mea? Aole anei e hoomaopopo lea ana lakou i ko Iesu ike ana i na mea a pau, aole o na mea i hala wale no, aka, o na mea e hiki mai ana? Ua hai aku anei o Iesu i na haumana mamua no na poina e kau mai ana, i na e hahai lakou iaia? Mat. 10: 16, 5: 10 - 12, 9: 15. No ke aha kona hoike hapa wale no mamua? Aole anei e noho pu ana oia me lakou ia wa? Oiai oia me lakou, aole anei maluna ona ke kau nui ana o na pilikia?
E aha ana oia? p. 5. E hoi ana ihea? Ua ninau anei kekahi no kahi ana e hele ai? No ke aha? p. 6. Kau nui ko lakou manao ma ko lakou kaumaha, a poina paha ka mea nana e hooluolu? Heaha ka mea i kaumaha ai lakou? I ko Iesu haalele hou an ia lakou mahope o kona ala hou ana, ua kaumaha anei lakou i kona hoi ana i ka lani? Lu 24: 52. Aole anei pela, kaumaha i ka make ana o ka makamaka, no ka mea, e ike hou ole ia ana ko lakou maka maanei, aka, hauoli no ka hoi ana i ka home lani me Iesu.
Heaha ka pono o ko Iesu haalele ana ia lakou? p. 7. Owai keia kokua ana e hoouna mai io lakou la? Ina o Iesu e noho kino ana ma ka honua nei ua hiki anei e launa me na haumana ana me kela wahi keia wahi i na wa a pau? Aole anei i pilikia o Maria ma no ke kaawale ana mai o lakou aku? Ina haawi ia mai keia kokua o ka Uhane Hemolele, aole anei e launa ana ma na wahi a pau; e kokua, e hooluolu like ana ia lakou, e like me ko lakou hemahema? Manao na haumana, he poino nui i loaa ia lakou, ma ka lawe ia ana o Iesu, aole anei i oi ka pomaikai i loaa hou mai ia lakou, i ko ka mea mua? Aole anei pela mau ko ke Akua hana, a no ko kakou ike hapa wale no, aole i hoomaopopo i na pomaikai e ulu mai ana no loko o na poino?
A hiki mai keia kokua, heaha kana hana? p. 8. Ua hewa kanaka ma ke aha? p. 9. He nui anei ka poe e manaoio ole ana ia Iesu? Imi anei kekahi i ke ola, ke ole e hoomaopopo ana i kona hewa, a me ka make e kau mai ana? Hoahewa mai ka Uhane ia kakou, haawi mai nae i wahi e pakele ai, aole anei he kokua io keia? Aole anei he keu ke aloha ole o ke kanaka e manao io ole ana ia Iesu, ka mea i haawi i kona ola no kakou.
E hoi ana o Iesu ia wai? p. 10. Pehea kona hele ana? Aole anei ma kona make ana? Na ka Makua e haawi i kana Keiki: a ae no ke Keiki e make, no kona aloha i kanaka; owai kana i hoouna mai ai i Kokua? Hiki anei i ka mea e a'e e hoala i ka pono iloko o kakou? Aole anei he pono e hoolohe i kona leo, kona paipai ana?
Hoahewa ia anei na hewa a pau? Hoopai mai anei ke Akua i na hewa a pau? A me ka poe hoomau ma ka hewa? Owai ka i hoahewa ia? p. 11. Aole anei i manao iho o Satana e lanakila ana oia, ke make o Iesu? Me e kona kuhihewa? Aole anei ma ko Iesu make ana e paopao ia ana ke poo o Satana, a e lanakila ana o Iesu a mau loa?
No ke aha ko Iesu hai ole i kekahi mau mea i na haumana? p. 12. Nawai e alakai ia lakou? p. 13. Nawai e alakai i ko ke Akua poe kanaka i na wa a pau? Mahea na olelo a Iesu i loaa ia kakou? Nawai i kakau i na Euanelio? Mahope o ka hiki ana mai o ka Uhane Hemolele, (Oih. 2.) owai na buke i kakau ia? Nawai i kakau ia Oihana? Nawai i kakau i na Episetole? Nawai hoi o Hoikeana? Ia wai ka hoike ia ana o na mea e hiki mai ana? Nawai i kokua ma ke kakau ana i keia mau mea a pau me ke Kauoha Hou? Tim. 3: 1, 16.
E hoonani o Iesu ia wai? O ke Keiki a me ka Makua, hookahi anei laua? Hana like anei laua? aole anei e kuee ana? He pono anei ke kuee ana o kana poe haumana? Holo mua anei a lanakila ke ole e hana like ana? Ua kokoke mai anei kona wa e make ai? p. 16. E ike hou ana anei lakou iaia mahope?
Ua maopopo anei keia mau mea i na haumana? p. 17, 18. Ua ninau anei lakou? Pehea ka Iesu pane ana ia lakou? p. 19, 20. E uwe auanei lakou no ke aha? No ke aha ka hauoli ana o ko ke ao nei?
Ina e launa mai ana ka Uhane ma na hana o ke Kula Sabati, a me na Ekalesia, aole anei ia he mea e ala mai lakou a e holo imua? Ahea ala na iwi maloo? Nowaho mai anei ke ola, no loko paha?
Mele. Mele Hosana. H. A. N. 84.
Ahaolelo o 1886.
(Koena o ka La Hana 78.)
Kapaeia na rula a waiho mai ke komite na lakou e hooponopono na haawina uku hoomau no J. M. Kapena a me Mrs E. Barnard, ua hooholo ke komite e hooholoia i $2,000 no J. M. Kapena, a no Mrs. E. Barnard $3,000. Aole nae laua e uku ia ke lawe laua i kekahi uka dala mai ke aupuni aku. waihoia a noonoo pu me ka bila kanawai.
Hora 12 hoomaha ka hale.
Halawai hou ka hale hora 1: 54.
Noonoo ana i ka Bila Kanawai auhau iloko o ke komite o ka hale. Ke 'lii Kauka ma ka noho. Ua hoomaka ka noonoo ana ma ka pauku 18. Ma ke noi ua hooholo loa ia.
Heluheluia ka pauku 19. Hoopololei ia ma kahi o ka Luna Auhau ma ka olelo Hawaii, Luna Helu ka pono.
E hoakaka ana keia pauku no ka poe hoohalahala auhau i heluia e ka luna helu. Hoololi mai o Wight i ka wa e noho ai ka Papa Hoopii Auhau mahope iho o ka pau ana o ka ohi a ka Luna Ohi. Oiai, lehulehu ka poe i poino mamuli o ka helu okoa ana o ka Luna Helu a ohi okoa ka Luna Ohi, a ua hala aku la ka wa hoohalahala. Ma ka wa e ohi ai ka Luna Ohi e ikeia ai keia mau hemahema. Kokua mai o Paehaole.
Hoololi mai o Likikini ia pauku hookahi, ma kahi o ka la 10 i oleloia, e hookomo malaila, la 5.
Ninauia ka hoololi a Wight haule. Ka Likikini hoi a hooholoia. Hoololiia ka pauku 19 e like me ka hoololi.
Heluheluia ka pauku 20 a hooholoia me na hoololi ana. Pauku 21, 22, 23, ua kapae loa ia. Pauku 24 ua hooholoia; pauku 25 kapae loa ia. Pauku 26 hooholoia.
Hoopauia ke komite - aponoia ka hoike a ka lunahoomalu.
Hoopanee ka hale.
LA HANA 79, Aug. 18.
Halawai ka hale e like me ka mau. Heluheluia a aponoia ka moolelo o ka la hana i hala.
HOIKE KOMITE KUMAU.
Na ke komite pai i hoike mai, ua paiia ka bila kanawai e pili ana i na Luna alanui nui; ka hoike a ke kuhina e pili ana i ka uku o na luna helu me auhau, a me ka papa inoa o ka poe e lawe wale nei i ka wai me ka uku ole.
HOIKE KOMITE WAE.
Pane mai ke Kuhina Kalaiaina i ka ninau a Dickey i nehinei no ka hoopau ole ia o ka Luna wai ma o na hemahema i ikeia ma ka oihana wai, wahi ana, aole oia i liuliu loa ma keia kulana hou ona e maopopo pono ai iaia na mea a pau. Hookahi mea i maopopo iaia mai ka Luna Hooia mai, aole i nalowale ke dala o ka oihana wai mamuli o ka hemahema o ka Luna wai a me kana kakauolelo &c O ka hooponopono wale iho no ka keia Luna wai i ka oihana wai, aole ona lawelawe i na hana pili i ke dala. He kanaka makaukau oia ma ka'u ike iloko o ko'u mau la pokole ma ka oihana Kalaiaina.
Na Kaunamano i ka lakou hoike e pili ana i ka palapala hoopii mai Hilo i ma uwapo ma na kahawai o ia wahi.
Ua hooholo ke komite e waiho i keia hoike ma ka papa a na ka hale e noonoo i ka mea pono. Aponoia.
Na lakou no e pili ana i na itamu dala o na alanui uwapo a pela aku. Ua noonoo ke komite e waiho ma ka papa a noonoo pu me ka Bila Haawina.
Aponoia ka hoike.
Kapaeia na rula a hoike mai ke 'lii Makapolena i ka hoike a ke komite Kalepa e pili ana i ka bila kanawai lawe leta mawaena o Hawaii nei me Amerika. Ua hooholo ke komite; o ka oihana lawe leta a me ka laua mokuahi ana, he mea maikai loa ia i ko Hawaii nei oihana kalepa. Ua manao ke komite he mea maikai ke kokua ana i haawina dala no ka hali leta ana, nolaila ke waiho aku nei he bila kanawai pakui hou ma kahi o ka bila kanawai mua. He hoike keia o ka hapanui o ke komite. Waihoia ma ka papa a noonoo pu me ka hoike a ka hapa uuku.
No mai o Kakela e paiia ka bila kanawai a ke komite. Aponoia.
Kapaeia na rula a waiho mai ke komite hoonaauao i ka lakou hoike e pili ana i ke kanawai hoololi i ka mok. 35 kanawai hoopai karaima e pili ana i ka la Sabati, ua noonoo ke komite aole no e loaa he maluhia ma ia la ma ua kanawai la i waihoia aku, a nolaila, ua hana lakou he kanawai hou ma kahi o ke kanawai mua. Waihoia ma ka papa, a e paiia ke kanawai.
OLELO HOOHOLO & NA BILA.
Na Kakina he ninau i ke Kuhina Waiwai. Pehea la ke ano o ka uku ia ana o ka laina mokuahi Oceanic S. S. Co. mai Dek. 31, 1885 a hiki i Mar. 31, 1886, a me ka nui o na tona i hoopaaia ma ka Hale Dute.
Kapaeia na rula a noi mai o Kikaha e haawiia ke kanawai e pili ana i na laikini i ke komite wae mahope o ka heluhelu ia ana. Heluhelu elua ia.
NA HANA O KA LA.
Noonoo ana i ka Bila Haawina e ke komite o ka hale. Ke 'lii Ake ma ka noho. Hooholoia keia mau haawina malalo o ka oihana.
PAPA OLA.
Lilo laulaha Papa Ola..................................$35,000
Kukulu & hoomaemae halewai.................... 40,000
Oiai ke komite e hoopaapaa ana no ke kukulu i halemai no Lihue, ua noi ia mai la e hoomaha ke komite. Hora 12: 15, hoomaha.
Ma ka halawai hou ana o ka hale, ua kamailio hou ke komite maluna o ka halewai o Lihue, a hooleia.
Kahua hoomalu mai.....................................$4,000
Kapiolani Home............................................ 8,000
No mai ke 'lii Waila e hookomo ia malalo o ka haawina o na kauka aupuni i $1,500 ka uku no kauka Makipine no kona lawelawe ana i ka hana malalo o ka Papa Ola a hiki i ka la 30 o Iune 1886. Oiai aole i uku ia oia no ia hana ana i ka hana o ka Papa Ola, a aole no hoi he mau hoakaka e ae mai ka Papa Ola aku e pili ana no kona uku, aka he wahi leta wale no e hoike aku ana ua hoole ka Papa Ola i ka uku ana aku iaia, oiai o ke Kuhina Kalaiaina ka mea mana nana e hooko ke kanawai i hoololiia no kona uku.
Pane mai ke Kuhina Kipikona ua oiaio loa na mea i hoikeia e ke 'lii Waila. Ua hana ia ke kanawai, aloe nae he haawina dala i hooholoia e ka ahaolelo. Aka, ua kauoha ia oia e hoomau aku i kona hana &c.
Uku ia Kauka Makipine...............................$1,500
Uku Agena &c.............................................. 900
Kauka & Agena o ka Papa............................ 2,800
Uku i ka Hui Ookala..................................... 1,000
OIHANA HOONAAUAO.
Kula aupuni, Hawaii & Beritania..............$115,000
Kula Hoopololei, Keone ula...................... 15,000
Kukulu & Hoomaemae Keoneula.............. 5,000
Kukulu & Hoomaemae Halekula............... 15,000
KELA ME KEIA.
Kokua Home Luina................................... 5,000
Hoopau ia ke komite a aponoia ka hoike a ka Lunahoomalu.
Hoopanee ka hale.
LA HANA 80, AUG. 19.
Halawai ka hale e like me ka mau. Heluhelu ia a aponoia ka moolelo o ka la hana i hala.
HOIKE KOMITE MAU
Na Kaunamano i ka lakou hoike e pili ana i ka hoopii mai Waimea, Kauai i halemai no laila. Ua manao ke komite he mea maikai keia, aka, he mea paakiki ka hooholo ana, nolaila, ua noi mai ke komite e waiho ia ma ka papa.
NA HANA O KA LA.
Noonoo ana i ka bila kanawai auhau imua o ke komite o ka hale. Ke 'lii Kapena ma ka noho. Heluhelu ia ka pauku 27. Na kakela i waiho mai ka hoololi no kela pauku, a no kahi wa loihi ka hoopaapaa ana o ke komite a hiki i ka hooholo loa ia ana o ka pauku me ka hoololi.
Ma ke noi ua hoomaha ke komite.
Halawai hou ka hale hora 1:50. Heluhelu ia ka pauku 28, a mahope o na kamailio pokole ana o na hoa, ua hooholo ia e kapae loa i keia pauku. Kapae ia.
Heluhelu ia ka pauku 29, a hooholo loa ia keia pauku me na hooponopono hou ana a ke komite. Pauku 30, hooholoia me na hoololi. A hooholo loa ia ke kanawai, koe ke noi a Kikaha e haawi hou ke kanawai i kekahi komite wae nana e hooponopono hou na hemahema o ke kanawai. Aponoia.
Ma ke noi ua hoopau ia ke komite, a apono ia ka hoike a ka lunahoomalu.
Noi mai o Kakela e hapai ia ka noonoo ana no kekahi kanawai auhau e hoololi ai i na pauku 58 a me 59 mok. 43 kanawai o 1882 e pili ana i ka ohi auhau. Aponoia.
Waiho ia mai ka hoike a ka komite auhau, hapa nui ne ka hapa uuku, a heluhelu pu ia ke kanawai. Oia hoi ka haawi ia ana i mana hoomalu waiwai i ka Luna Auhau ke ole e hookaa ia ka auhau &c. Ma ke ano lima ikaika. E hoopau ana ke kanawai hou ia mana hoomalu, koe ka mana hoopii imua o ka aha.
Noi o Kikaha e kapae loa ia keia kanawai, no ke kumu, oia ka lawe ia o ka mana hoomalu mai ka Luna Auhau ae, a me na hoakaka he nui &c.
Hoakaka o Kakina i ka pono o ke kanawai hou. E pono ka Luna Auhau e hoomalu i na waiwai malalo o ka mana o ka aha.
Kue loa ka Loio Kuhina i keia kanawai me na hoakaka naauao. Loihi no ka wa i hoakaka ai na hoa maluna o keia kanawai, a o ka hopena, oia ke ano pohihihi ana o na hoa i ke kanawai a me na hoololi, a ua noi ia e waiho ma ka papa a makaukau kekahi mau hoololi. Hoopanee ka hale.
LA HANA 81, AUG. 20.
Halawai ka hale e like me ka mau.
HOIKE KOMITE KUMAU.
Na ke Komite Pai, ua pau i ke paiia kekahi mau bila. Aponoia.
HOIKE A NA KOMITE WAE.
Na ke Kuhina Kipikona, no ka bila kanawai e haawi ana i ka mana i ke Kuhina Kalaiaina e hoolilo aku i kekahi apana aina i ka misiona Katolika, ua manao ke Komite he pono ke haawi aku ke Aupuni i kela apana aina ia lakou. Waiho ia ka hoike a noonoo pu me ka hoike a ka hapa uuku i keia Pokahi ae.
Na Dole, no ka bila e hoemi ana i ka laikini kuai waiona i waiho ia mai e Kauai, ua manao ke Komite e waiho i ka bila ma ka papa. Aponoia.
NA OLELO HOOHOLO ME NA BILA.
Na Kaunamano no ka wa mua, i ka bila no ka hoopae a me ka laikini ana i ka opiuma ma keia Aupuni. Haawi ia ka bila e pai.
Heluhelu mua mai o Kaulukou i ka bila e hoololi ana i ka pauku 5 o ka mokuna 86 o ke Karaima no ke koho balota ana. Ma ke kapae ana i na rula ua heluhelu alua ia ka biia ma ke poo a haawi ia i ke komite e pili ana i ke koho balota.
Hoolaha mai o Kaulukou, e lawe mai ana ia he bila e hoomau aku ai i ke kanawai aie elua miliona.
NA HANA O KA LA.
Noonoo ana i ka Bila Haawina imua o ke Komite o ka Hale, Ke 'lii Kapena ka Lunahoomalu.
OIHANA O KO NA AINA E.
Puali Koa Kiai o ka Moi, $78,000. Noi o Dickey, e hooholoia ka haawina i $35,000. Noi o Kaulukou, e hoololoia i $88,000 no ka Puali Kiai o ka Moi.
Noi hoi o Brown, ua lawa loa ke $60,000 no ka Puali Koa Kiai o ka Moi.
Kamailio mai o Aholo, he nui na mea e ninau ia nei no ka waiwai ole o na koa, ke hoomanao nei au i kekahi haunaele i hana ia ma keia kulanakauhale, he koa ka mea i maluhia ai ka haunaelo o ia la; aia no he mau makai, aka, aole i hiki ke hoomalu. O ke kumu o keia, no ka nele o ke Aupuni i ka oihana koa oke ia wa, a e ole na koa o kekahi o na moku kaua o na aina e, loaa ai ka maluhia. He puali koa no ma ka lani, kahi i oleloia he hemolele, a pela no hoi, he puali koa ma ka po. Ua olelo ia mai nei, he eono makahiki i hala ae nei, he $31,000 a oi aku ka haawina i haawi ia i na koa, ua loaa no nae ka maluhia a me ka hanohano i ka Moi ia mau la, a pela no a i keia wa; he hoohalike kuhihewa keia, oiai aole i like ke kumukuai o na mea ai o ia mau la i ko keia wa, he emi ko ia wa a he pii loa ko keia wa, a oia ke kumu o ka pii ana ae o keia haawina a mahuahua, aka nae, o ke noi i $88,000 he nui loa paha ia, manao au ua lawa no ke $78,000 e like me ka bila.
Olelo o Nahinu, ua kupono no i ke aupuni ke hoolako i mau puali koa, i mea e mau ai ka maluhia a me ka hanohano o ka aina. I ka makahiki 1884 owau ke kanaka mua loa i hookaheia ke koko e na kanaka kipi a hoohaunaele i ka wa i koho ia ai ke Alii i Moi, ua pepehi ia au e na kanaka me ka mainoino, a ua hookahe ia he mau galani koko mai ia'u aku; no ka nele o ke aupuni i ke koa ole, ke kumu i pilikia ai makou i kela poe kipi hoohaunaele. O kela mau huaolelo makia e kau mau mai la ma ke kalaunu, "Ua mau ke ea o ka aina i ka pono," aole oia ka mea i malu ai, he kuhihewa ia manao ana pela, no ka mea, he mau olelo hoonani wale no ia i mea e nani ai, aka i maluhia ke aupuni i na koa a oia kona mea e ikaika a e paa ai hoi ka hanohano a me ka maluhia. Mai kuhihewa kakou he mana kekahi iloko o kela mau olelo makia, aka o na koa wale no ka mea i loaa ai ka mana i ke aupuni, nolaila ke paipai a ke kokua loa nei au i ka haawi ana i haawina mahuahua no keia oihana a ina i ae na hoa o ka hale i ka bila aie umi miliona a'u i lawe mai ai, alaila e haawi ana au a mahuahua aku ka haawina no na koa.
Hoomaha ka Hale hora 12 awakea.
Hora 1: 45 akoakoa ka hale.
Na Kakina i olelo mai, i kona nana ana ke lu nei kakou i ke dala ma ka akau a me ka hema oiai kakou e noho ana iloko o ka pilikia a me ka ilihune eia ka aina iloko o ka aie e noho nei a aole i hiki ke hoakaka ia a ke pehu ae nei a nui. Ua olelo mai ka luna o Kona Hema o na olelo maikai o ko kakou nei aina, "Ua mau ke ea o ka aina i ka pono." aole he oiaio a he mea ole; ina paha i loaa iaia ka mana e holoi ae i kela mau olelo makia, ina ua kau ia ma ia wahi: Ua mau ke ea o ka aina i na koa.
He eha mau ninau imua o ka Hale i ka wa a ka noho i ninau ai, oia $88,000 $78,000 a me ke $35,000: a ma ka ninau ia ana o ka puu nui, ua hoole ia; a ua hooholo ia ke $78,000 no ka oihana koa kiai o ka Moi.
Puali Puhi Ohe, no Hae me kipu aloha $40,000. Holo Kokua Puali Pualu $26,250.34 Holo
OIHANA WAIWAI.
Uku o na Luna Helu 33,000 Holo.
Uku o na Luna Ohi 31,000. Holo.
Uku Papa Hoopii Auhau 1,000 Holo
Aie Lahui e hookaa ia ana 267,900. Holo.
Ukupanee aie Lahui $180,000 Holo.
Aie ia Irwin ma ma ka 9 keneta 130,366. Hoopanee a ka Poakahi.
No na dala Iapana e uku ia ana 28,062.05. Haawiia i ke Komite.
Hoopauia ke Komite a aponoia ka hoike a ka lunahoomalu.
Kapaeia na rula a hoike mai o Kikaha, ua pau ka bila auhau i ka hooponopono ia, a noi mai la e haawi ia no ke kakau poepoe a heluhelu ekolu ia i keia Poalua ae.
Kapaeia na rula, a hoike mai ke 'lii Makapolena ke Komite Kalepa no ka bila noke ana i na moku ma ka hale Dute, ua manao ke komite e hooholo loa ia ka bila. Aponoia.
Haawiia ka bila no ke kakau poepoe a heluhelu ekolu i ka Poaha.
Hoopanee ka hale a noho hou i ka hora 10 apopo.
HOOLAHA KUMAU.
CLARENCE WILDER ASHFORD.
VOLNEY VAILLANCOURT ASHFORD.
ASHFORD & ASHFORD.
(NA HOAHANAU AKIPOKA.)
He mau Loio Hoakuka, Pale ma ke kanawai,
Kakaolelo, Luna Hooponopono a me ka
hana ana i na Palapala Hoolilo.
LAWELAWE ILOKO O NA AHA A PAU
O KE AUPUNI.
E HANAIA NO NA PALAPALA MEI
KANAWAI A PAU.
Keena Hana Helu 21, Alanui Kalepa,
Honolulu Hale. 2082 1y
Laau Mai Lepera Helu 1
- A -
S. H. MEEKAPU.
E LOAA A E HOOUNA IA NO MA ke
kauoha, ka laau Mai Lepera ma na wahi
a pau ke loaa he mau hoike oiaio no ka
mai Lepera, a ke hoouna mua mai i na
lilo o ka laau. E loaa pu no hoi me na
Rula o ka inu ana.
Helu 1, Alanui Nuuanu - - - Honolulu.
2086 1yr
KE KAUKA IAPANA
Mr., M. Goto.
He Kauka no ka mai lepera, na mai
e pil ana i ka ili o ke kanaka, ka mai
kaokao
etc. etc. etc.
KEENA HANA - Aia ma Kapalama, mauka
pono o kahi noo o ka Hon. J. Keau.
NA HORA HANA { Hora i a ka 5 p. m.
: : { Na la Sabati hora 8 a 17 m.
2047 131
LEN SING.
Helu 135 Nuuanu Street
- MEA HUMUHUMU LOLE -
He mea Hana, Hoomaemae a me hana hou
ana i na lole kahiko. 2085 3ms
H. HACKFELD & CO
Mea Kalepa Nui. a Kuai Kukaa i na
Waiwai Lole, a me na Mea Hao.
M HE MEA
KALEPA WAIWAI NUI
Kihi Alanui Papu me Moiwahine.
HONOLULU , H. I. 2082 1yr
PAPA! PAPA!
AIA MA KAHI
LEWERS & COOKE,
(O LUI MA)
ma ke kahua kahiko ma alanui Papu a me Moi.
E loaa ai na
PAPA NOU AIKI.
o kela a me keia ano.
Na Pane Puka, Na Puka Aniani, Na Olepelepe,
Na Pou, Na O-a, Na Papa Hele, Na Papu
Ku, A me na Papa Moe nui loa
Na Pili o na Hale o na Ano a Pau.
Na Pepa Hoonani, Na Pena o na Wai e pau
Na Kui mai ke Nui a ka Makalii, Na Ami
Puka, Na Ami Puka Aniani, Na Ami
o na ano a pau, Na Aila Pena, o
kela me keia ano Na Aila Hoomaloo,
he lehulehu wale.
Na Aila e ae o na
ano a pau.
NA WAI VANIKI
- A ME NA -
WAI HOOHINUHINU NANI!
O NA ANO A PAU LOA.
NA BALAKI ANO NUI WALE.
A ke hai ia aku nei ka lono i na Makamaka a
pau, ua makaukau keia mau Makamaka
o oukou e hoolawa aku ma
na mea a pau e pili ana
ma ka laua oihana
- NO KA -
UKU HAAHAA LOA.
E like me ka mea e holo ana mawaena
LAUA a me ka MEA KUAI.
HELE MAI E WAE NO OUKOU.
KAKELA & KUKE.
E laa na pahiolo, koi bole,
hamale, koi mai a me liilii, kila.
wili puaa, rula, apuapu kai o na ano
a pau. kala kaa. hao hoopaa puka.
pohaku hoana, kepa lei ilio, kaula
hao ilio, pahi, upa, pahi aminmi,
kalapa, kope hulu, palapala, oepa
kalakala, lina hao, ami, keehi, a me
ke
- KAULA OPU. -
Palau o na ano a pau,
Oo, ho, kopala, pe, kipikua,
hao kope, au ho a pela aku,
kua bipi, lei bipi, kaula
hao bipi, uwea pa.
uwea kekeawe. hao pili
piula, kaa palala, ipuhao,
ipu ti
PA-PALAI MAKAU ME KE AHO.
Ili wai, papa holoi, kopa ala, kaula
kuaina, hu'akai, ehi wawae,
hulu pena, a pela aku.
Pena wali, kini nui a me liilii o na
ano a pau, me ka pepa kuhikuhi,
pena keokeo, aila pena, aila
hoomaloo, vaniki kaa, a me
vaniki moe,
PENA HOOMALOO
- a me aniani hale -
AILA MAHU, AILA MIKINI, AILA
HAMO ILI, AILA KAA, INIKA
KAMAA.
PAUDA, KUKAEPELE, KIANA
PAUDA, UIKI IPUKUKUI O NA
ANO HE NUI A LEHULEHU.
LOLE MAKEPONO
-E laa na -
AHINAAHINA, KALAKOA. KEOKEO,
LEOPONALO, HULUMANU,
UWE-WAHINE, KUI HUMUHUMU,
A ME KA LOPI.
Ke Kuike e loaa no ia na kahi o
Kakela & Kuke!
NA MEA PIULA,
Mikini Humuhumu
Mekini a WHEELER a me WILSON
MIKINI A WIILCOX ME GIBBS
NA MIKINI A
- REMINGTON. -
He nui loa na mea hao me na ukana e
ae o na ano a pau, aole hiki ke hai pau
ia aku, hewa i ka wai na maka ke ike.
Laau Lapaau Kaulana Loa
A DR. JAYNE ,
LAAU HOOMAEMAE KOKO
LAAU HOOPAU NAIO, LAAU
KUNU, PENIKILA, HUAALE,
PAAKAI, LAAU HOOPAA HI, A
Me na Laau Hamo, a Pela 'ku.
Kakela me Kuke.