Ka Nupepa Kuokoa, Volume XXV, Number 35, 28 August 1886 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

BUKE XXV,  HELU 35.  HONOLULU, POAONO, AUGATE 28, 1886.  NA HELU A PAU, 2091.

NA HOOLAHA KUMAU.

W R. KAKELA.

LOIO A HE KOKUA MA KE KANAWAI.

He Luna Hooiaio Palapala.

tf.

 

A ROSA. (AKONI.)

LOIO A HE KOKUA MA KE KANAWAI

He Luna Hooiaio Palapala.

KEENA HANA : Ma ke Keena Loio Kuhina.

tf.

2

HARDWARE COMPANY

@ Dilinahama Ma.

Mau Mea Kuai Lako Hoo

Alanui Papu, Honolulu.

 

S H. MEEKAPU.

Tela humuhumu lole.

HALE HANA: Helu 11 aianui Nuuanu.

 

J P. HANAAUMOE.

He Loio a he Kokua ma ke Kanawai ma na Aha Hoomalu a Apana o keia Aupuni.

E loaa no au ma Puna, Hawaii.

 

CHAS H PULAA.

HE LOIO A HE KOKUA MA KE KANAWAI

A e loaa no au ma Honomakau, Kohala Akau, Hawaii. 2001-tf.

 

CECIL BROWN.

LOIO A HE KOKUA MA KE KANAWAI.

A he Agena Hooiaio Palapala no ka Mokupuni o Oahu

KEENA HANA: Helu 8 alanui Kaahumanu.

KINNEY & PETERSON

LOIO, LOIO, LOIO.

KEENA HANA :  Helu 15 Alanui Kaahumanu.  Honolulu.

W. C. AKANA (KALAUKI.)

He Mahele a Unuhi-olelo ma ka olelo Pake me ka olelo Hawaii. Ua makaukau no hoi e hana i na Palapala Kuai a Hoolimalima a pela aku mawaena o na Pake a me na kanaka Hawaii. E loaa no au ma ke Keena Helu 7, Alanui Moi, ma kahi e kokoke ana i ka uwapo o Hooliliamanu.

2010-1y

 

WILDER & CO. (WAILA MA.)

Mea kuai papa a me na lako kukulu hale na ano a pau, a me na mea pono a pau no ka hale.

Kihi Alanui Moiwahine me Papu. tf.

 

RICHARD F. BICKERTON.

(PEKEKONA.)

LOIO A HE KOKUA MA KE KANAWAI

KEENA HANA : Helu 27 alanui Kalepa.

tf.

 

WILLIAM AULD.

Luna Hooiaio Palapala Kepa Paahana no ka Apana o Kona.

KEENA HANA: Ma ke Keena Wai o Honolulu. tf

 

JOSEPH WILLIAM KELIIKOA.
            He loio, a he kokua, a he pale, a he koo ma ke Kanawai. E loaa no au ma ke Keena a J.M. Poepoe kihi o na Alanui Alii a Aniani, Honolulu. Ua hiki no hoi ke hana i na Palapala pili Kanawai o kela me keia ano. 1 yr.

EDWARD E. HOPKE.

Loio a he kokua ma ke Kanawai

Keena Hana-Aia ka rumi helu 9, maluna ae o ka banako o ka Ona Miliona Spreckels Block.           2072 2m

J. A. MAGOON, (Makuna.)

LOIO A ME KOKUA MA KE KANAWAI

Keena Hana, Helu 42 Alanui Kalepa kokoke i ke Keena o Pekekona.

JOHN MAHIAI KANEAKUA.

LOIO A ME KOKUA MA KE KANAWAI

HE MEA UNUMIOLELO MA KA OLELO

BERITANIA A ME KA OLELO HAWAII.

Keena Hana ma Alanui Kalepa, Honolulu, maluna ae o ka Banako o Bihopa ma. 1 yr.

J. HALEAKALA BARENABA.

HA LOIO A ME KOKUA MA KE KANAWAI

Ma na Aha Hoomalu a Apana a he Agena Hooiaiio Palapala Kepa mawaena o na haku a me na kauwa no ka apana o Waialua Oahu E loaa no au ma Kauaula Waialua, a i ole ma Honolulu nei.

JAMES M. MONSARRAT.

(MAUNAKEA.)

LOIO A HE KOKUA MA KE KANAWAI.

He Luna Hooiaio Palapala.

E hana ia no na Palapala Kuai, Palapala Hoolimalima, a me na palapala pili kanawai e ae ma ka olelo Hawaii. Dala no ka hoaie ma ka moraki ma na waiwai paa.

KEENA HANA: alanui Kalepa. tf

 

HE MOOLELO KAAO EEHIA

 ---NO KE---

Keikialii Romura,

(Ka Puuwai Liona)

Ka mea i kapaia, ka Opuu Rose o na kihapai me ka Punwai o kona Lahui, a o ka Manu Aeto hoi o na Kualono a me na Ululaau anoano o Algeria; he Iwikani no na au i hala,

Ka Hookalakupua o ka Makakila.

KAHEA aku la ke kuke me ka leo nui no ekolu manawa, aka, aohe leo a aohe mea i lohe ia, o ke anoano pu wale iho no, holo aku la ke kuke a loaa ke kahu lio, a hoike aku la oia no keia mea hookahi wale no no ka puka ole mai o Sepa a me kona pane leo ole mai, a oia au i hele mai la ia @ wahi a ke kuke i ke kahu lio.  Oiai laua i hoea hou aku ai ma ka puka, ua ike iho la laua i na kula koko e hilihili ana maluna o ka papahele, a na ia mau kulu koko i hoopuiwa ae ia laua, a holo aku la me ka huaolelo hookahi wale no e olelo ana, "ua make, ua make ke keiki alii Sepa," a pela wale aku.  No ia huaolelo hookahi i hoopuiwa ae i na mea a pau o ke alo alii o ua Sepa nei, a me kona mau naita kiai kino, a ia wa koke no i laina ae ai lakou a kai aku la no ka hale alii e ike pono i ka oiaio o na mea i hoike ia mai e ke kuke a ke keiki alii a me kona kahu lio.  Oiai lakou i hoea io aku aku ai ma ka ipuka, ua hooiaio iho la lakou i na olelo a kela mau kanaka i olelo ai a oiai hoi na kulu koko e hilihili ana maluna o ka papahele.  Na ia mau kulu koko i hookikina mai ia lakou e wahi aku i ke pani, a me ia manao i ku ae lakou a wahi ia aku la ke pani puka, a waiho ana ilalo, a aia hoi ke kino oni ole o ke kii kanaka i hele a like loa me Sepa e waiho ana iluna o ka papahele me ke poo ole.  Na ia mea i hoopuiwa ae ia lakou a pau a pane leo ole kekahi i kekahi, oiai na kulu koko e kiheahea ana maluna o ka papahele.

O keia poe a pau e ku ala iloko o ua keena nui nei, ua manao io loa no lakou o keia kino e waiho nei oia maoli no ke kino o Sepa ua pepehi ia a make e kekahi puuwai eleele.  Nolaila, ua hapai ia aku la ua kino nei a kauia aku la maluna o kekahi pakaukau mabala, me ka hoomaemae ia.  O na kulu koko e kiheahea la maluna o ka papahele me ka manaonao, na ia mea i hookomo mai i ka Inaiina iloko o na ukali o ua keiki alii ala.  I ka pau ana o ka hoomaemae ana i ua kino poo ole ala, ka lua o na mea nana i hooi loa aku i ka inaina wela iloko o ka umauma pakahi o na naita kiai kino ponoi o ua Sepa ala, a puana like ae la, "E make no ka mea nana i hana i keia hana puuwai eleele nui e like me ka make ana o na ilio kawau."  Ua huna ia iho la ke poo a nalo ma ka uhi ia ana iho i kekahi kihei weleweta nani i ike ole ia ke poo.  O na mea a pau e ku ala iloko, ua puana ae la lakou i ka huaolelo hookahi wale no, "Aole ma ke ha'i aku, ua okiia ke poo a moku, oiai, he oi loa aku ia o ka manaonao, e aho no ke lohe ia o ka puu wale no ka i moku, a e huna kele loa ia hoi keia mea."  Ua hoouna ia aku la na elele e lawe ana i ka lono no ka make ana o Sepa  He mea oiaio, ua pahola ae la ka lono o ka make ana o ke keiki alii, oia kekahi o na lono oi loa aku o ka eehia o na mea a pau o ka aina mai o a o, a ua hoouna ia aku la keia lono imua o na Moi, aka, e na hoa e kali iki iho.  I kela manawa no a ke kauka e papaleo ana me ke kino uhane ola lapu o Edoma, ua hoea mai la he umikumamalua mau kanaka i aahu ia i na aahu like ole, a ma ko lakou mau lima pakahi e paa ana he mau apanapana liilii o kekahi kaa, e paa ana kekahi he huila laau, a o kekahi poe hoi he apo hao, a he iho o ka huila ka kekahi, a e paa ana hoi kekahi i na laau kolo, a o ka kekahi hoi, he mau apana papa, a pela wale aku no, a ua hoolako ia no hoi lakou a pau me na makaukau o ka oihana naita.

E na hoa, o keia poe a kakou i ike ae la, oia no na naita he umikumamalua o ka puali naita o ua kauka opio ala a kakou, nona ka inoa Volcano a o Gileada hoi ka naita opio hoopaha'oha'o nui wale a na mea a pau e kuhihewa ala he kanaka keia naita no kekahi aina mamao loa ma kela aoao o ke kai nui, aole nae pela.  Oiai lakou imua o ko lakou haku opio, ua haawi ia mai ia ke kauoha e hoopa koke ia ke kaa, a e lawe koke aku i ka pahu hao ka home paahao hoi o Sepa e hiolani ala me ke kuhihewa ua palekana oia, a he ipuka lanakila ia nona, eia ka he ipuka pilikia ia, a ua hiki mai ka hora e kau ia ai oia maluna o ka @o ahiu o na la lani kuahiwi o Atalasa.  He manawa ole ua hooko ia ae la ke kauoha, a ua paa koke ae la ua kaa ala iloko o ka manawa pokole, a e ku ana ua kaa ala me ka makaukau, a ia wa no i hookau ia aku ai ua pahu hao ala maluna o ke kaa, a iloko o na kukai olelo ana i huli ae ai ua mau kaeaea ala o na pali nihoniho apiipii o Musia.  E lawe aku i keia pahu hao a maloko o ka pa-kaua o Sana Berenada a maloko hoi o ke kakela anoano o Walesele, a i ninau ia mai oukou e hoike aku ma kuu inoa, a me ka Moi Velona Rabona o ke kapuai dia, i pane aku ai ua opio ala.  I na naita e lawe ala i ka pahu hao, a me na mea lapaau a ke kauka, ua ku ae la ke kauka a kamoe aku la i kana huakai hele no ka hale alii Kinimailehuna o ka Moi Rabona.  Ua komo aku la keia iloko o ka pa me ke keakea ole ia a i ka rumi iwaena konu o ka hale alii iluna loa i hui aku ai ka kakou kauka opio me ka Moi, a hoike aku la no ka paa ana o Sepa iloko o ka pahu hao, a hoike aku la oia mai ka mua a hiki i ka hope o kana mau hana, akahi no a hoomaopopo iho la ka Moi me ka pane ana mai.  "Ke haawi aku nei au i na hoomaikai ana he nui maluna ou no kau mau hana akamai lua ole, a ke ma nao ala au, owau kekahi i hoopaha'oha'o ia mai me kuu manao io he kauka io mai ka aina mamao mai e like me ka mea a'u i lohe ai, aka, ano, ke ike maka nei au ia oe, a ke lohe nei hoi i kau mau hoike, a ke ninau aku nei au, "Owai kou inoa oiaio, oia no anei e like me kau i hoike mua mai ai aole paha ?"

"O Gileada ko'u inoa," i pane aku ai ka opio, "a ua hanau ia hoi au ma kekahi wahi kauhale ano kuaaina o kou aupuni e ke alii."  "O oe auanei kekahi o na kanaka koikoi maloko o ko'u aupuni ma keia hope aku" i pane mai ai ka Moi.  A ia manawa no i kamailio hou aku ai ua opio nei, i ka i ana aku:  "Ina oe e lohe ana i na lono ua make ke keiki alii i ke kakahiaka o ka la apopo, a i na paha e hoea mai ana na elele nou a me ka Moiwahine, mai wikiwiki oe i ka hele ana, aka, e kauoha aku oe, e lawe ia kela kino maloko o ka hale alii maloko o ka rumi ilalo loa, a i ka wa e hiki mai ai ua kino ala, alaila, e kukala aku ai oe me ke kauoha ana, e kii mai ia'u (kauka) e hele mai e nana i ke kino make o Sepa a na'u ia e hele mai a hoike i ke ano o ua kino ala e waiho ala maloko o ua keena ala, a oia auanei ka mea e hoopau ia ai ka manao uluku o na mea a pau, a e hoike pu ana no hoi au i na mea i hana ia, a me na mea e hiki mai ana ma ka'u kulana a me ka oihana a'u e paa nei, a na na mea a pau e manao io iho he kanaka akamai nui keia.  A ia wa oe e kukala mai ai e lilo au i kauka kiai kino nou e ke alii, a e kukala pu hoi oe, o ka mea nana i hoopaa aku o Sepa, e uku makana ia oia a e hoohanohano aku hoi oe iaia, a e hoike mai hoi oia @ iho iloko o elua la mahope iho.

Ua pono keia i ka manao o ka Moi, a huli hoi aku la ka kakou moho lanakila no kona keena.  E hoi hou aku i ko kakou nanaina i na ipuka o ka hale alii o Sepa a me kela kino a na mea a na mea a pau e kuhihewa iho la i ka i-a maka ole, o ua kanaka ala no ia e moe ae la i ka moe hooonaona.  Oiai na elele imua o ka Moi me na huaolelo o ka make ana o ke keiki alii.  Kauoha aku la ka Moi i na elele e lawe ia mai ke kino make a maloko o ke keena nui o ka hale alii ilalo, oiai, ua makemake oia e ike ia ke kumu o ka make ana o ke keiki alii.  Ua hooko ia keia leo a ua lawe ia mai ke kino a ke waiho ala maloko o ua keena ala, a ua ike ia aku la no  hoi na mea a pau o ke alo alii e kupenu ana i nahainaka i na maka, a ia wa hookahi no i hoouna aku ai ka Moi i na elele e kii i ke kauka e hele mai e hoike mai i ke kumu i make ai.

Oiai ne elele imua o ka kakou moho ma ke ano he kauka e hoike ana i na olelo a pau a ka Moi, ua ku ae la ke kauka, a hele aku la no ka hooko ana i na mea i olelo mua ia e laua mamua oe o ka manawa.  Ua kahiko ae la ke kauka iaia iho i na kahiko o kona oihana no ka hele ana aku imua o ka Moi.  A oiai ke kauka imua o ua anaina nui ala, ka Moi hoi a me ke kino make e kuhihewa ia ala, ua ae ia mai la ke kauka e hana i kana apana hana, a e hoike hoi i kona ike.  A@ ke kauka ke makaikai ala i ke kino me ka maalea nui, a i ka pau ana o kana makaikai ana, ua hai aku la oia i ka Moi, e ae ia mai oia e hoike aku i na mea a pau ana i ike ai, a ia wa no i ku mai ai ka Moi a pane aku la.  "I keia wa e lohe ai oukou i na hoike a ke kauka no kana ike a pau e pili ana no ke kino make o ke keiki alii."  Ia wa koke no i ku ae ai ke kauka a pane mai la, "Ua makaikai au i keia kino, a ua kilohi hoi i kona mau helehelena, a me na ano a pau o keia kino a kakou e ike nei, a ua loaa ia'u ke kanalua a me ke kahaha no keia kino manoanoa a kakou a pau e makaikai ala, a he mea kanalua nui no oukou a me na mea a pau o keia anaina nui, ke lohe i na mea a pau a'u e hoike aku nei ia oukou.  O kela kino a'u e ike ei me oukou, aole ia o ke keiki alii Sepa e manao ia nei ua make, aka, he kino ia i hana ia e ke akamai a me ka naauao palena ole o kekahi mea.  O keia kino he kii wale no ia i hanaia me na mea pipili, ua-ua, a me ka lepo palolo, i hana noiau ia e ka ike a me ke akamai o kekahi Akeakamai,  a ma kona a i, he a-i no ka hipa, a ua pena ia hoi i kekahi pena waihooluu i like loa me ka iii o ke kanaka.  O kela koko a kakou e ike ala, he koko ia no ka hipa, a me he ala, ua hopu ia o Sepa a paa e kekahi kanaka naauao nui, malalo o kekahi mea nui a he mea huna hoi i hana ia no ua keiki alii ala, a me he ala, o ka Moi paha kai ike ia mea, a ua makemake au e hoike mai oia i kekahi moolelo a kekahi mea a'u i lohe ai no kela kahuna lapaau kaulana loa, oia hoi o "Duboida ke kaulana", a me kana popo laau kupanaha, aia malalo o ia mau hoike i paa ia o Sepa i ka hopu ia."

Ia manawa no i olowalu mai ai na mea a pau, i ka huaolelo hookahi wale no.  "Ke kauka wahahee nui a me ka hoopunipuni, a ke alakai hewa nei oe i ko makou Moi, me ka manao e huna iho i ke keiki alii."  I kela manawa a na leo e ikuwa ala, i ku ae ai ka Moi Rabona a kamailio mai la.

"E o'u makaainana aloha a me na ohana alii o ko'u aupuni, e hoolohe mai i ka'u mau olelo; he mea oiaio, ua hoopaa iho au ia'u iho malalo o na hoike a me na alakai ana a kekahi kanaka i kaulana nona ka inoa a kakou i lohe ai i kela po oia hoi o "Duboida kekaulana," a me kana popo laau i kapaia "Duboida ke kupanana " E o'u makaainana, o keia kekahi o na mea huna i hoike ole ia aku ia oukou, i ko'u mau kuhina wale iho no, a me na ohana alii o ko'u alo alii, a me na kanaka koikoi hoi o ko'u alo alii, a me na kanaka koikoi hoi o ko'u aupuni, a me ko'u mau elele.  O ke kanawai a'u i kau iho ua hooko ia kela maluna o ke keiki alii Sepa, oiai, nana ponoi no i pepehi iho ke kanaka a'u i hilinai nui ai a me na kokua hewa elua oia kana kakauolelo a me kana kauwa.  O lakou nei no na hoike i lohe i keia mau olelo a kela popo laau kupanaha loa a'u e hoomanao ala me ka poino ole (me ke kuhi ana ae o kona lima i na alii a me na kuhina.)  Nolaila, ua hooholo iho au me ka hoohiki pu iho, na ko'u poe naauao a pau o ko'u aupuni e hookolokolo me ka ike ole ia e na mea a pau a na lakou e haawi ka hoahea maluna o ke keiki alii.  Nolaila, ua hana lakou a ua hooholo iho me ka lokahi, e kau ia o Sepa maluna o ka lio ahui i oi aku kona huhu mamua o na lio a pau, a ua waiho ia keia hana ma ka lima o kekahi kanaka opio nana e hopu a hoopaa iho ia Sepa me kona ike, oiai, ua lohe kakou i kona ikaika palena ole, aka, ano, ke ike ala au, ua hooko ia na mea i olelo ia e ua kanaka opio ala, a i keia manawa e lohe ai kakou i ka hoike a ke kauka e like me kona ike, a oia ka'u e haawi aku nei i ka mahalo a me ke hoomaikai ana he nui maluna ona."

I ka pau ana o na olelo a ka Moi, i ku ae ai ke kauka akamai nui wale, a pane mai la i ka Moi a me ke anaina kanaka e akoakoa ana ia manawa me ke anoano eehia, a hoopuka mai la penei:

( A hoo@ hou aku.)

HE MOOLELO KAAO NO

Edisepa Ferido.

KA HIENA KAULANA O BAGALIA

KA OLALI O NA MEA HUNA POHIHIHI

---O KA---

Aina Lewa Pahaohao o Mauna Be@ia

Ke Kahikuhi Puuone Poupou Kamahao, a o

ka Liona Hanu M@ Pololei.

He Moolelo Enelani i unuhiia no ke Kuokoa.

I KELA wa kahiko loa, ka wa hoi e omamalu ana o na hana hookahe koko weliweli kanawai oie, a me na hoopoluluhi ana a na hana hoopaha'oha'o a na moeuhane kupaianaha.  Ia wa, e noho ana kekahi alii wahine lokoino maluna o ka nohoalii o ke aupuni o Pelekane (Enelani) o Meresetina kona inoa.  Ua kaulana a puni ke ao holookoa, na hana ino a keia alii wahine, a ua nui hoi na leo uwe o na makaainana e hooho mau ana:  "I alii hou no kakou"!  "I alii hou no kakou"!  Aka, aole i ko ka lakou olelo, no ka mea, aole i make ke alii wahine a lakou i manao ino ai.

He elua ohana alii e noho ana i kela wa, oia ka ohana alii Lokugela a me ka ohana alii o Meresetina; a o ka ohana alii Lokugela nae, e noho alii ana lakou maluna o ko lakou mau waiwai ponoi, me ka oluolu maikai ole o ka noho'na.  O ke kumu nei o keia oluolu ole, oia no ka noho kue-e o ka ohana alii Meresetina i ka ohana alii Lokugela.

Aia iwaena o na keiki alii a pau a ke alii Lokugela, hookahi keiki i oi aku ka nani a me ka hiehie o kona kulana, a ua puni ka aina i ka lohe no kona nani a me ka maikai; a o kona wahi i mahalo loa ia ai, oia no kona oluolu a me kona lokomaikai i na poe pilikia a pau e noi aku ana iaia no ke dala a me kekahi mea e ae, a ua pili paa aku ke aloha o na kanaka iaia i na wa a pau, a nona hoi ka inoa poina ole io ka lahui holookoa o Heneri.  He nui wale o na kaikamahine i koikoi aku i ko lakou mau akua me ka olelo ana aku:  e papa, ua makemake au e lilo o Heneri i kane na'u, a na'u wale no oia, aole na kekahi mea e ae.

He nui nohoi na makua i hele aku imua o ke alii Lokugela me ke noi ana aku e lilo o Heneri i kane na ka lakou mau kaikamahine, aka, aole i ae mai ke alii, no ka makemake ole no o Heneri no ka mare wahine ana.

I kela a me keia la, e lohe mau ana ke ahi wahine Meresetina no ka akena mau ia o Heneri no ka ui, ka maikai a me ka olu waipahe o kana mau huaolelo e kaili ana hoi ka puuwai o na kaikamahine ue e makaikai aku ana no kona mau helehelena.  He mau kaikaina ponoi no ua Moiwahine Ia, o Ludia a me Elieda.  O ka hana mau a keia mau kaikamahine i na wa ai a pau a me na wa noho wale o ka la, e olelo mauana laua penei:  "O Heneri ko'u hoa olelo o ko'u wa noho hana ole."  A pane ae la hoi kekahi:  "O Heneri ko'u hoa holoholo o keia ahiahi", a pela wale aku.

No keia olelo kuko mau o keia mau kaikamahine, he mea hoonaukiuki loa ia i ka manao o ko laua kaikuaana alii, me kona olelo mai; hele paha olua a manao nui loa no Heneri.

Ae, manao nui no paha maua, no ka mea, o ka maua kane no ia, wahi a ua mau kaikamahine la.

No ka nui uluhua o ko ke aliiwahine naau no keia olelo mau ia o Heneri no ka ui, nolaila, upu ae nei oia e kauoha ia Heneri e pii mai, i ike maka ai hoi oia i kona nani, no ka mea, he lohe pepeiao wale no kona, koe hoi ka ike maka ana i kona nani.

Nolaila, i kekahi la, kanoha ae la oia i kon akahu kaa e hana ia kona kaa alii a e kii ia o Heneri e pii mai i ike maka ia ai hoi ka nani o Aipo.

Nolaila, ua hookoia ke kauoha a ke aliiwahine Meresetina; a i ka makaukau ana o ke kaa, ua holo aku la ua kaa alii la i hukiia e na paa lio e walu a me na kahu lio he umi.

I ka hiki ana aku o ke kaa alii i ka home o Heneri, aia no hoi ua Heneri @ e noho ana ma kona rumi hana, me kona mau helehelena i puia i ka nani lua ole.

Hiki aku la ke kii ma kona rumi, a hahaiia aku la hoi iaia, ua makemake ke aliiwahine ia, oe e pii no ka hale alii.  Huli mai la ua Heneria la a pane mai la, o hoi, a e hiki aku ana au ilaila iloko o ka hapalua hora mai keia wa aku.

@ kou kaa ke ku nei mawaho wahi a ke kauwa.

Aole, wahi a Heneri.  E hoihoi oe i kena kaa a e hiki aku ana no au me ko'u kaa.

Huli ae la ke kahu kaa a hoi aku la no ka hale o kona haku aliiwahine me ka ukana ole o kana kaa.

Iaia i hiki aku ai no ka hale alii, ua puiwa ia ka manao o ke aliiwahine i kona ike ana mai i kona kaa e hoi nele aku ana me ka ukana ole.

A i kona mau kahu kaa i hiki aku ai, ua pane koke mai la oia:  Auhea ka hoi ke keiki alii Heneri?

Eia ae no oia mahope mai.  Olelo mai nei, e hiki mai no oia iloko o ka hapalua hora.  Ia wa i mino aka iho ai ua aliiwahine la a pane mai la.  I na pela ua pono, e hoihoi i ke kaa.

Oiai hoi o Heneri e hoomakaukau ana iaia iho no ka hele ana, ua pane mai la kona makuakane.  E Heneri, ihea oe e hele nei ?

Pane aku la o Heneri, e hele ana au no ka hale alii i ke kauoha a ke aliiwahine.

Ae.  O hele e kuu keiki, a hoi mai iloko o ka hora hookahi, mai noho aku a oi i ka hora hookahi, no ka mea, he ike ana ia na ka poe e hoolauwili ana no ka hewa pohihihi.

Ae aku la o Heneri, a puka aku la oia no ka hele ana i ka hale alii.  Iaia i hiki aku ai no ka puka pa o ka hale alii, aia hoi na puka ua hamama nona, a komo aku la oia me kona kulana kilakila o ke kanaka ui, a ike aku la oia he ekolu mau kaikamahine e kiei mai ana ma ka puka aniani o ka hale alii ma ke ano hoomakaleho.

Pii aku la ua Heneri la ma ke alapaii a ku ana ma ka puka.  Ia wa no i oili mai ai ke aliiwahine Meresetina me kona kahiko piha o ke aliiwahine, me ka mino aka ana o ke ano hoohie, a kunou mai la ia Heneri.  Wehe ae la o Heneri i kona papale, a haawi aku lai kona aloha.

Lawe ia aku la ua Heneria la maloko o kekahi lumi nani loa, a malaila laua i noho iho ai no ka launa kamailio ana, a no ko laua hui malihini ana, me ka makaikai ana hoi no ko laua hiona nohea.

He oliaio, ua kailiia ke kupaa o ke aliiwahine i kona ike ana mai ia Heneri, a wahi a ua aliiwahine la iaia iho.  E kuhi ana au ia Heneri e kaulana nei, o kahi ua ae nei no la, eia ka he ui oia e loaa ole ai kona lua ma ko'u aupuhi nei.  E huli paha a pau ke aho, aole e loaa he kane i like me keia Heneri.

Hooholo koke iho la ua aliiwahine la e lilo o Heneri i kane nana, me kona hoopuka ole ae nae, aka aia no iloko kahi i @ ai ka makani moewaa.

eia hoi ke keiki alii Heneri ke kamailio nei a ke nana pu nei no ka manawa o kana wati e like me ke kauoha a kona makuakane.

A i ka pau ana o ka hora hookahi, ua ku ae la o Heneri a pane aku la i ke aliiawhine:  E hoi ana au, no ka mea, ua pau ae la ko'u manawa i hookuu ia mai nei.

Pane mai la ke aliiwahine.  Ae, e hoi oe, a eia ko'u manao ia oe, a o oe a me a'u maluhia keia.  E hoolohe oe i keia ahiahi. a i kani ka o-le kapu o ko'u hale aiii nei, alaila, e hoomanao iho oe, aia au mawaho o kou pa e kali ana nou, a ma ia wahi auanei kaua e luana ai no ka hoohala ana i ka hana nui a loko he aloha.

Kunou aku la ua Heneri la ma ke ano hoopunipuni, no ka mea, aia oloko o kona naau ke olelo la.  Aole, aole au e hiki mai, aole no hoi ia o ke hoa e lai ai ke kaunu ana.

Ia wa, ku ae la ke aliiwahine me kona noi ana aku.  e ka ui heneri.  Aole he mea haumia, i na oe e kulou mai no ko'u muki aloha ana aku ia oe ma kahi o ka ula ohelohelo e puapuai mai ia makou papalina.  Pane aku ia o Heneri, eia mai, e hooko i ke @oii koi a @ iini, a muki ae la laua, a hoi aku la o Heneri me kona hoihoi, ole no keia pii ana mai ona, a wahi ana i olelo iho ai.  Aole au e pii hou ana no kou hale alii ma keia hope aku.

Oiai o Heneri i hoi aku ai ua haniehia ma'u-wale ke aliiwahine iloko o ke aloha ka-pouli no Heneri, a hookahi ana mea uluhua o ka napoo ole aku o ka la mai kona kau ana iluna.

I ke ahiahi ana iho o ua la la, a uhi mai la ha pouli, a i ke kani ana o ka hora 9 o ka po, ua kani ae la ka o-le kapu ia wa i komo iho ai ke aliiwahine i kona koloka holoholo po, a iho aku la no kahi ana i olelo aku ai ia Heneri.

A o Heneri hoi, i kona lohe ana i ke kani a ka o-le o ka hale alii, ua hoi wikiwiki aku la oia no kona lumi moe, a moe aku la.

Oi kali mai hoi ke aliiwahine i ke anu me ka manao hoi e hiki aku ana la ka mea a kona naau i aloha ai, eia nae, he ole ka hiki mai.  Kakali iho la oia, ma ia wahi a hiki i ka hora 2 o ka wanaao, he ole ka hiki mai.  Nolaila, huli ae la ua aliiwahine la a hoi aku la me ka piha hoonaukiuki no ka hooko ole ia ana o kona makemake, a i ka hora 3 kona hoea loa ana aku no ka hale iii me kona kino i hele a pulu-pe i ke anu o ke kehau i hoomanawanui ia.

Haula aku la oia iluna o kona wahi moe a waiho aku la ma ke ano he ma'i pilikia he hilahila no keia hoohokaia ana.

Aole oia i hele aku no kona papa aina i ke kakahiaka ae, hookahi wale no ana mea i pane aku ai i kana mau kauwa oia keia:

"E kii aku oukou i ke keiki alii Heneri e pii mai, no ka mea, ua ma'i ia au i ke aloha nona, a o ko'u ike wale aku no ka hoi aiai la, oia ka laau lapaau e ole ai keia mai."

Ae aku la kana mau kauwa, a kii ia aku la o Heneri, a he ole nae ka neeu mai, oiai aole i komo iloko o kona mau hoonoo ana ka manao makemake no ke aliiwahine.

I ka hoi mai o na kauwa a komo iloko o ka hale alii, lohe aku la ua aliiwahine la i ke pahupahu mai o na ka puai wawae e hele pololei mai ana i kona lumi (kahi ana e kali ana o ka hiki mai o ke aloha), hoomanao koke ae ia oia o Heneri ae paha keia, nolaila, owili ae la oia iaia ho me kona kihei moe po a pulou iho la me ka mino aka ana iho, a pane iho la.  eia ae ua kanaka palau nei ia'u i ke ahiahi nei, aka e ike ana hoi oe.

Komo mai la ke kauwa a ma ka aoao o ka moe ku iho la, a aia no hoi ke aliiwahine ke moe nei, me kona manao kuhihewa hoi o ka mea la ia ana i aloha ai e ku nei ma ka aoao o kona moe, aia hoi pane iho la kana kauwa iaia.  E kuu haku alii, ua hoole mai nei o Heneri aole oia e pii mai ana.

"Auwe no ka hoi kuu pilikia nui e, ua eha au i ka eha lima ole a ke aloha", ua eha au i ke eha lima ole a ke aloha", i pane ae ai ua aliiwahine nei mailoko ae o kona kapa oiai oia e pulou ana no.

Pane hou mai la ua aliiwahine la me ka leo nawali o ka mai pilikia loa me ka maalea nui penei:  Hele aku nei oukou a pehea kana i olelo mai nei?

Pane aku la ke kauwa. Hele aku nei no hoi m akou a hahai aku nei no hoi makou a hahai aku nei no hoi e like me kau i olelo mua mai nei, olelo mai nei ua Heneri ia, aole ona makemake e pii hou mai.

Ae, ua hiki wahi a ua aliiwahine la, ala mai la oia mai loko mai o kona mai maalea me na helehelena i hele a haakokohi i ka huhu.  Komo iho la oia i kona kapa, kauoha ae la oia i kona mau koa ikaika he 4,000 ko lakou nui, e kii ia o Heneria a e hoopaa ia oia iloko o ka hale paahao.

I ka lohe ana o kona mau koa i keia kauoha, ua kii koke ia aku la ua Heneri la a loaa i kona hale, a hai ia aku la iaia ka lohe.  E lawe ia ana oe no ka hale paahao no kou hoole i ka olelo kauoha a ke aliiwahine.

I ka lohe ana o Heneri i keia mau olelo a me kona ohana alii a pau, ua olowalu like mai la ka leo o kona ohana me ka olelo ana "keiki ino maoli oe e Heneri," heaha ia kou mea hoolohe ole i ka olelo a ke aliiwahine, a poino no oe a e pono he hoole kauoha.

Hulu ae la o Heneri a pane kau la i kona ohana a pau.  ua kuhihewa ou kou a pau, mai manao ino mai oukou ia'u no ka mea, he wa pokole ko'u me oukou a nalo aku au no ka aina moeuhane o ka make, no ka mea, aole au e ae ana e ike hou i ka maka o kela aliiwahine, a e ki@ hoi ma na paia o kona home.  Oki loa aku hi ka hi@ ia maua maloko o ka @ o @ berita male.  Keiki naaupo, keiki pupule wahi a na leo kona ohana.  Ia wa no ua lawe ia aku la ua Heneri la no ka hale paahao e like me ke kauoha a ke aliiwahine.  (A olali hou aku no.)